ভারতকী প্রধানমন্ত্রী

ইন্দোনেসিয়াদা ভারতপু মশক তাক্লিবা ময়াম পুম্নমকপু ঐহাক্না খুরুমজরি।

সলামত সোরে, তমান–তমান। (গুদ ইভিনীং ফ্রেন্দস)

আপা কাবার? (অদোম কমদৌবীরিবগে?)

সায়া সনাং সকালী বর – অদা দী সিনী (ঐহাক মফম অসিদা লাকপদা য়াম্না নুংঙাইবা ফাওই)

রমজানগী শেংলবা থা অসিদা ঐহাকপু তরাম্না ওরপীবগীদমক ঐহাক্না ইন্দোনেসিয়াগী মীয়াম্বু, ময়াম পুম্নমকপু অমদি অখন্ননা রাষ্ট্রপতি ৱিদোদোবু তৌবীমল খঙবা উৎচরি। ঙসি অয়ুক ইন্দোনেসিয়াগী মখল মখা য়াম্লবা শক্তম অদু উবা ফংজরে। তোঙান তোঙানবা ফিজোল শেৎপা মীয়ামশিং অমসুং অঙাংশিংনা ঐহাকপু তরাম্না ওকপিখি। মদুনা ঐহাক্কী থম্মোয় শুমহৎখ্রে।

মরূপশিং,

থা খরগী মমাংদা ঐখোয়না আসিয়ানগী লুচিংবা ১০গা লোয়ননা ভারতকী রিপব্লিক নুমীৎ পালন পাংথোকখি। আসিয়ান্দা ইন্দোনেসিয়া অসি খ্বাইদগী মীশিং য়াম্বা মরুওইবা মীহুৎ অমনি। মদুদা রাষ্ট্রপতি ৱিদোদোনা মহাকপু মীথুংলেন ওইনা তরাম্না ওকচনবগী তঞ্জা পীনবীখিবা অদুগীদমক তৌবীমল খঙবা উৎচরি। ১৯৫০গী নই দিল্লীদা পাংথোকখিবা রিপব্লিক দে পেরদতা ইন্দোনেসিয়াগী রাষ্ট্রপতিনা অথোইবা মীথুংলেন ওইখিবা অদু মতাং চান্নরুবা নত্তে।

মরূপশিং,

হৌখিবা চহি মরি অসিদা ভারত মচা কোতি চামগা কুনমঙাগী মীহুৎ ওইদুনা মালেমগী মফম কয়াদা ঐহাক্না চৎচরুবা মতমদা মফমশিং অদুদা লৈরিবা ভারতকা মরি লৈনবা মীওঈশিংগা উননবা ঐহাক্না হোৎনজৈ। উনজখিবশিং অদুদা মান্নবা ৱাফম অমদি য়াওরি। ৱাফম অদুদি ভারত ইমাবু নীংজবা অমসুং ইকায় খুম্নবগী ৱাফম্নি। মফম অসিদা ইন্দোনেসিয়াদসু ৱাখল্লোন অদুমক ঐহাক্কী ইমাংদা উবা ফংলি। ময়াম পুম্নমক অয়াম্বনা ইন্দোনেসিয়াগী মীওই ওইরি অদুবু থম্মোয়গী কাচিন অমদা ভারতকী মমিসু তারি।

মরূপশিং,

ঐখোয়গী মরক্তা সংস্কৃতিগী ওইবা মরি লৈরি। ময়াম পুম্নমক্কী মরক্তা জেনরেসন মরি মঙাদগী মফম অসিদা লৈরক্লবা য়াওরি, চহি কুন কুনথ্রাদগী লৈরকপা কয়া অমসু য়াওরি। ময়ামগী মরক অসিদা কনাগুম্বা খরনা ফি–রোল ললোনবগী থবক তৌরি, কনাগুম্বা খরনা শান্ন–খোৎনবগী মচাক য়োল্লি। কনা কনাগুম্বনা ইঞ্জিনীয়র ওইরি, কনাগুম্বা খরনা কন্সলতেন্ত ওইরি। কনা কনাগুম্বনা সি এ ওইরি, অদুগা কনাগুম্বা খরনা বেঙ্কতা থবক তৌরি। ভারত্তগী হৌখিবা শ্রী গুরুনাম সিংহনা ১৯৬২গী জকার্তা এসিয়ান গেম্সতা ইন্দোনেসিয়াগীদমক তকমান লৌখি।

মরূপশিং,

মতম অমদা অদোম অদোমগী অহল লমনশিং অদুনা তোঙান তোঙানবা ফিভমনা মরম ওইদুনা ভারত থাদোকপা তাখি। ঙসিদি ভারতনা মালেম অসিদা অচেৎপা শক্তম অমা শাগৎপা ঙম্লে। হৌখিবা চহি মরি অসিদা ভারতনা মালেমগী ইকোনোমী অসি চাউখৎহনবগী থবক তৌরি।

• ঙসিদি ভারত অসি মালেমগী ওপন ইকোনোমীশিংগী মরক্তা অমা ওইরে। ভারত্তা রেকোর্দ ওইবা থাক্তা ফোরেন ইনভেস্ত তৌরি।
• ভারতকী ফোরেন একচেঞ্জ রিজর্ব অসি চাউরাক্না বিলিয়ন দোলর ৩০০ ওইরম্বা অদু হেঙ্গৎতুনা বিলিয়ন দোলর ৪০০ হেল্লে।
• গ্রীনফিল্দ এফ দি আইগী পুক্নীং চিংশিনবা মালেমগী অহানবা লৈবাক ভারতনা ওইরে।
• এফ দি আই কনফিদেন্স ইন্দেক্সতা মকোক থোংবা মার্কেৎ অনিদা ভারতনা অমা ওইরে।
• ৱার্ল্দ ইকোনোমিক ফোরমগী গ্লোবেল কম্পিতিতিবনেস ইন্দেক্সতা ভারতকী রেঙ্কিং অসি ৭১ ওইরম্বা অদুদগী ফগৎলদুনা ৪০ ওইরে।
• ইজ ওফ দুইং বিজিনেসকী রেঙ্কিংদা ভারত ১৪২ শুবা মফমদগী ১০০শুবা মফমদা হায়গৎলে।
• লোজিস্তিক্স পর্ফোমেন্স ইন্দেক্সতা মফম ১৯ হায়গৎলে।
• গ্লোবেল ইনোবেসন ইন্দেক্সতা ভারতকী রেঙ্কিংদা মশিং ২১ হায়গৎলে।
• অঙ্কতাদকী রিপোর্ততা ভারত অসি তুংগী অচৌবা ইকোনোমী তরাগী মনুং চল্লি।
• হৌখিবা চহি ১৪দা অহানবা ওইনা মুদীনা ভারতকী ক্রিদিৎ রেতিংদা ইম্প্রুবমেন্ত পুরক্লে।

ইচল–ইচে অমসুং ইচিল–ইনাওশিং

ভারত অসি মালেমগী খ্বাইদগী চাউবা দেমোক্রেসী চৎপা লৈবাক ওইরিবা অদুম্না ইন্দোনেসিয়াদসু দেমোক্রেসীগী অচেৎপা মরা তারি। ভারতকী মীয়াম কোতি চামগা কুনমঙানা ঐহাক্কুম্বা ইচম চম্বা মীশক অমবু মকোক থোংবা সেবারী ওইজনবা তাঞ্জা পীনবীরিবা অদুগুম্না ইন্দোনেসিয়াগী মীয়ামনসু ৱিদোদোজীবু মখোয়গী রাষ্ট্রপতি ওইনা খল্লি। মরূপশিং, মফম অসিদা লোন মখল কয়া অমা ঙাংনরি, মীওই কাংলুপ কয়া অমা লৈরি, মতৌ অদুম্না ভারত্তসু হায়নবা লৈ, মাইল অমমম খুদিংগী ঈশিংগী মহাও খেৎনৈ, মাইল মরি খুদিংগী লোনদা খেৎনবা লৈ। হৌখিবা নুমীৎ হুমনি–মরিনিগী মমাংদা ঐহাক উরিশাগী কতক্তা চৎচরুই। মফম অদুদা অচৌবা মীফম অমা পাংথোকখিবা লম্পাক অদুগী মমিং বালীজাত্রা কৌই। বালীজাত্রগী ৱাহন্থোক অসি করিনো? ইন্দোনেসিয়াগী বলিগী খোংচৎ। চহি চা কয়াগী মমাংদা উরিশাগী অফাওবা হিরোইশিংনা কতক্তগী হৌরগা জাবা–সুমাত্রা অমসুং বোর্নিয়ো ফাওবা লাক্লম্মি। ঙসিসু চহি খুদিংগী ওক্তোবর–নবেম্বর থাদা উরিশাদা বালীজাত্রাগী থৌরম অসি য়াম্না নীংথিজনা চাউনা পাংথোকই। ভারত অমসুং ইন্দোনেসিয়াগী মরক্তা লাপ্নরিবা অসি শুপ্নগী নোতিকেল মাইল ৯০ খক্তনি।

মরূপশিং,

ভারত অমসুং ইন্দোনেসিয়াগী অচেৎপা সংস্কৃতিগী ওইবা মরিশিং অদু মফম অসিদা মখল কয়া থোক্না পাংথোকই হায়না ইফমদা তাকপীররে। মফম অসিদা ইন্দোনেসিয়া তমিল সংগমগী সংস্কৃতিগী ওইবা থৌরমসু তোঙান্না মশক খঙবীরি। মমাং চহিদা জকার্তা অমদি অতোপ্পা মফমশিংদা ইন্তর্নেস্নেল যোগ নুমীৎতা পাংথোকখিবা মহৈ য়ানখিবা প্রোগ্রামশিং অদুগী মতাংদা ইফমদা খঙহনবিরে। বালীদা মমিং চৎলবা ইন্দিয়ন ত্রেদিস্নেল মেদিসিন্সকী সেন্তর, পঞ্চকর্ম–আয়ুর্বেদ সেন্তরশিং মীয়ামনা পাম্বগী চাং হেঙ্গৎলক্লি হায়নসু ইফমদা খঙহনবিরে।   

মরূপশিং,

মমাংগী চহিচাদা ঐখোয়গী লৈবাক অনি অসিনা নীং তম্বা ফংলবা মতুংদগী গ্লোবেল অমসুং রিজনেলগী থাক্তা অমনা অমগী মতেং পাংনরি। হৌখিবা চহি মরিদগী ঐখোয়গী মরি অসি হেন্না চেৎশিল্লক্লি। ঙসিদি ভারত অমসুং ইন্দোনেসিয়াগী মরক্তা লৈনরিবা মরি অসি অনৌবা থাক অমদা লৈরে। দিপ্লোমেৎ ওইগেরা, স্ত্রাতেজিক ওইগেরা মদু নত্রগনা ইকোনোমিক কোওপরেসন ওইগেরা, ভারত অমসুং ইন্দোনেসিয়ানা অমত্তা ওইনা থেংনরি। ঙসি ভারত অমসুং ইন্দোনেসিয়ানা ঐখোয়গী ওইবা স্ত্রাতেজিক পার্তনরশিপ অসি অনৌবা থাক অমদা পুখৎনবা ৱারেপ লৌরে। রাষ্ট্রপতি ৱিদোদো অমসুং ঐহাক্না ঙসি খোংথাং অমা হেঙ্গৎহন্দুনা মসিবু কমপ্রেহেন্সিব স্ত্রাতেজিক পার্তনরশিপকী স্তেতস অদু পীরে। ঐখোয়গী লান্মীশিংগী মরক্তা পুন্না লান ঔরাইবগী থৌরম চত্থরি। ঙসিদি ইন্দোনেসিয়া অসি আসিয়ান লৈবাকশিংগী মনুংদা ভারতকী খ্বাইদগী চাউবা ললোন ইতিক্কী পার্তনর ওইরি। ঙসিদি ঐখোয়গী ললোন ইতিক অসি দোলর অরব ১৮ ফাওবা য়ৌরে।

মরূপশিং,

ভারত অমসুং ইন্দোনেসিয়াগী মরক্তা অচেৎপা মরিগী অতোপ্পা য়ুম্বী অমদি ঐখোয় মীয়াম্নি। ঐখোয়গী লৈবাক অনি অসিদা চহি ৩৫গী মখাগী মীশিং য়াম্না লৈ। লৈবাক মীয়ামগী আশা–মথৌ তাবা অদুগী মতুং ইন্না ঐখোয়না গুদ গবর্নান্সদা পুক্নীং থৌগৎলি, মিনিমম গবর্নমেন্ত, মেক্সিমম গবর্নান্সদা পুক্নীং থৌগৎলি। ঐখোয়না সিতিজেন–ফার্স্তকী মন্ত্র অদুগা লোইননা মাংলোমদা চংশিল্লি। ঐখোয়গী সরকারনা শেঞ্জা থুমজা লৈতবা, সিতিজন–সেন্ত্রিক অমসুং দিবেলপমেন্ত ফ্রেন্দলী ইকোসিস্তেমদা খ্বাইদগী চাউবা প্রায়োরিতী পীরি। হৌজিক্তি ভারত্তা পাসপোর্তকীদমক্তা থা কয়া অমদি হপ্তা কয়া ঙাইনদ্রে, নুমীৎ নিনি হুম্নিদা ময়ুম ময়ুমদা পাসপোর্ত য়ৌরক্লে। ইন্দোনেসিয়া য়াওনা লৈবাক ১৬৩গী মীয়ামবু ই–ভিজাগী খুদোংচাবা ফংহল্লে। ই–ভিজাদা ভারত্তা লম কোয়বা লাকপা মীগী মশিং চাদা ১৫০ হেঙ্গৎলে। হৌখিবা চহি খরদা ভারত্তা অরিবা আইন ১৪০০ হেন্না মুত্থৎখ্রে। গুদস এন্দ সর্বিস তেক্স–জি এস তিনা ভারতপু হেন্না ফবা তেক্স কমপ্লাইন্স সিস্তেম অমা, হেন্না ফবা রিভেন্যু সিস্তেম অমা ফংহল্লে।

মরূপশিং,

ঐখোয়না লৈবাক্কী মীয়ামশিংগীদমক ইজ ওফ লিভিং অমদি লৈবাক্কীদমক মোদর্ন ইনফ্রাস্ত্রকচরগী য়ুনিক কোম্বিনেসন্দা থবক তৌরি। ঐখোয়না ভারত্তা অদুগুম্লবা সিস্তেম অমা হৌদোক্লে মদুনা ত্রান্সপরেন্ত ওইবদা নত্তনা সেন্সিতিবসু ওইরি।

• রেলৱে লাইনবু ব্রোদ গেজদা ওন্থোকপগী থবক শরুক অনি হেঙ্গৎলে।
• রেল লাইনশিংদা ইলেক্ত্রিক ফংহনবগী থবক শরুক অহুম হেন্না য়াংনা চত্থরি।
• ঐহাক্কী সরকারনা খুঙ্গংশিংদা লম্বী–থোং অমসুং নেস্নেল হাইৱেশিং শেম্বগী থবক শরুক অনি হেন্না য়াংনা পায়খৎলি।
• মমাংদা পাৱর ত্রান্সমিসন লাইন তিংলম্বা স্পীদ অদুদগী শরুক অনি হেন্না ঙসি লাইন তিংবগী থবক চত্থরি।
• মমাংদা খুঙ্গংগী পঞ্চায়েৎ ৫৯ খক্তবু ওপ্তিকেল ফাইবরনা শম্নহল্লমবা অদুগা চাংদম্নবদা ঐখোয়না খুঙ্গং লাখ ১গা লিশিং ১০বু ওপ্তিকেল ফাইবরনা শম্নহল্লে।
• মমাংদা গবর্নমেন্ত স্কিম শুপ্নগী ২৮ খক্তা অদুগা য়েংনবদা হৌজিক্তি স্কিম ৪০০ হেনবগী শেনফম মীয়ামগী বেঙ্ক একাউন্তা হকথেংননা ফংহল্লে।
• মমাংদা লুপা চাহুম য়াঙ্খৈদা ফংলম্বা এল ই দি বল্ব অদু হৌজিক্তি লুপা ৪০–৫০দা ফংলে।
• মমাংদা ভারত্তা মোবাইল মেনুফেকচরিং কম্পেনী শুপ্নগী ২ খক্তা লৈরম্বা অদু হৌজিক্তি মদুগী মশিং ১২০ য়ৌরে। ভারত্তা শেম–শারিবা মোবাইলদা ইম্পোর্ত তৌবগী চাদিংসু তঙ্খাইদা হন্থহল্লে।

ঙসিদি ভারত্তা ইঞ্জিনীয়রিং কোলেজ, মেনেজমেন্ত কোলেজ, মেদিকেল কোলেজ মশিং য়াম্না হাংদোক্লে। শুপ্নগী হৌখিবা চহি অনি মখায়গী মনুংদা ভারত্তা স্তার্ত অপ রেজিস্তার লিশিং ৯ হেন্না তৌখ্রে। মালেমগী অনিসুবা খ্বাইদগী চাউবা স্তার্ত–অপ ইকোসিস্তেম অমা ভারতনা শেম্লে। ভারত অসি সোলর ইনর্জীবু মীওইবা খুন্নাইগীদমক য়াম্না কান্নবা মওংদা শিজিন্ননবা ইন্তর্নেস্নেল সোলর এলাইন্স লুচীংলিবা লৈবাকশিংগী মরক্তা অমনি।

মরূপশিং,

ইন্দিয়া অমসুং ইন্দোনেসিয়া অসি মিংগী উচারন্দা মান্নবা লৈবা খক্তা নত্তনা ঐখোয়গী কলচর, ত্রেদিসন অমসুং দেমোক্রেতিক ভেল্যুদসু মান্নবা লৈরি।

ইচে–ইচল অমসুং ইচিল ইনাওশিং,

ভারত অমসুং ইন্দোনেসিয়া অসি সংস্কৃতিগী ওইবা লীপুন্না পুন্দুনা থম্লি। ঐখোয়গী লৈনরিবা মরি অসি য়াম্না লীরবা মরিনি। অদুবু ঐখোয়গী চারোল শুরোলশিংনা তুংদা ঐখোয়গী পিপল তু পিপল কন্তেক্তস হেঙ্গৎহন্নবা, হেন্না চেৎশিনহন্নবা, হিংহন্দুনা থম্নবা পুন্না থবক তৌমিন্নবা মথৌ তাই। ময়ামগী মরক অসিদা ভারত্তা অমুক্তা ফাওবা চৎলুদ্রিবা মীওই য়াওরমগনি। ঐহাক্না অদোমদা হায়জনীংবদি, অমুক্তংদি অদোমগী মরূপশিংগা লোয়ননা ভারত্তা লাকপীয়ু। ভারত্তা কয়া য়াম্না অহোংবা লৈরবগে হায়বা অদু য়েংবীয়ু।

অদোম্না ঐহাকপু মফম অসিদা অসুক য়াম্না ইকায় খুম্নবীরিবা অসিগীদমক ঐহাক্না অমুক হন্না অদোমগী অমদি ইন্দোনেসিয়া সরকারবু, মফম অসিগী এদমিনিস্ত্রেসনবু হন্না হন্না থাগৎচরি।

তেরীমা কাসিহ কালিয়ান তহল বর–অদা দী সিনী (মফম অসিদা লেংবীরকপগীদমক ময়াম পুম্নমকপু হন্না হন্না থাগৎচরি)

সলামত রমাদান!