ভারতকী প্রধানমন্ত্রী

ইকায়খুম্নরবা দোক্তর সয়েদনা মুফাদ্দাল সাইফুদিন, মৈধ্য প্রদেসকী চীফ মিনিস্তর সিবরাজ সিংহ চৌহান জি  অমসুং মফম অসিদা তিল্লিবা দাৱুরি বোহরা কাংলুপকী ঐগী ইমুং-মনুংগী মীওইশিং ।

নখোয় ময়ামগী মরক্ত শরুক য়াবা অসি ঐঙোন্দা য়াম্না পুক্নিং থৌগৎপা অমনি অমসুং মসি ঐঙোন্দা অনৌবা অমনি ।

মসিগী শেংলবা অসারা মুবারাকা থৌরমদা শরুক য়ানবা ঐঙোন্দা খুদোংচাবা অসি পীবগীদমক ঐনা তশেংনা হরাওই ।

তেক্নোলোজিগী মতেংনা তোঙান-তোঙানবা লৈবাকশিংদা লৈরিবা ঐখোয়গী খুন্নাই অসিগী মীওশিং শরুক য়ারি হায়বা ঐনা খঙলে । তেক্নোলোজিগী মতেংনা অরাপ্পা মফমশিংদা থৌরম অসি শরুক য়ারিবশিংদা ঐনা কোক নোঞ্জরি ।

মরুপশিং,

নখোয় ময়াম্না নখোয়গী পুন্সিদা ইমাম হুসেনগী শেংলবা পাউজেলশিং ইল্লি  অমসুং চহি কয়া লৈবাক অসিদা অমসুং মালেম শীনবা থুংনা মহাক্কী পাউজেল শন্দোক্লি । শান্তি অমসুং অচুম্বগীদমক ইমাম হুসেন্না মহাক্কী পুন্সি কৎথোকখি । মহাক্না মহাক্কী খোঞ্জেল অদু অরানবশিং অমসুং মঙক কনবশিংগী ময়োক্ত লৈখি । মহাক্কী পাউতাকশিং অদু মমাংঙৈদগগী হৌজিক্না হেন্না চুনরে । মহাক্কী পাউতাকশিং অদু পাক শন্না শন্দোকপগী তঙাইদবা লৈরি । মসিগী মীসন অসিদা সয়েদনা সাহেব অমসুং বোহরা কাংলুপকী মীওইশিং শরুক য়াবা অসিদা ঐ হরাওই ।

মরুপশিং,

ঐখোয়না ‘ভাসুধাইভা কুতুমবাকাম’ দা থাজবা লৈ; ঐখোয়না মালেম অসি ইমুং অমনি হায়না খল্লি । মসিনা ঐখোয়গী খুন্নাই অসি মপাঙ্গল কনহল্লি অমসুং অতোপ্পা লৈবাকশিংগা চাংদম্নবদা ঐখোয়গী তোখাইবা মশক অমা লৈহল্লি ।

ভারতকী মসিগী পাঙ্গল অসিগা লোয়ননা বোহরা কাংলুপনা মালেমগা পুন্না হিংমিন্নবা অসিদা  ঐ হরাওই । ঐনা মালেমগী মফম কয়াদা চৎপা মতমদা মখোয়না ঐ কমদৌরিবগে হায়না হংলকখি ।

ঐখোয়গী পুৱারিগী ঐখোয় চাওথোকচবা পোক্লি, ঐখোয়গী হৌজিক্কী ফিবম অসিদা থাজবা লৈরি অমসুং হেন্না ফবা তুংগী ৱারেপ লৌরি । ঐনা চৎপা মফম খুদিংদা মীয়ামদা  ঐখোয়গী খুন্নাইগী চাউখৎপা অমসুং শান্তিগী থবক তৌনবা তকশিনখি ।

শান্তি, নুংশিনবা, সৈত্যগ্রাহ অমসুং মরৈবাক নুংশিবদা বোহরা কাংলুপকী থৌদাং অসি শিংথাবা য়াই । সয়েদনা সাহেব মশামক মহাক্কী পাউতাকশিংদা ঐখোয় ইমা লৈবাক অসিগীদমক নুংশিবা অমসুং কৎথোকপগী কৎথোক্লি । হৌজিক মহাক্না ৱা ঙাংবদা ঐখোয়না কমদৌনা লৈবাক অসিগী, খুন্নাইগী , কাংলোনশিং ঙাক্না হিংগদগে হায়বা তাকখি ।

মমাংদসু, ইকায়খুম্নরবা সায়েদনা তাহির সাইফুদিন সাহেবগা মহাত্মা গান্ধীগা লোয়ননা হায়রিবা মগুনশিং অসি লৈহন্নবা মরুওইবা থৌদাং লৌখি  ।

অচৌবা মীওই অসি ত্রেনগী খোঙচৎ অমদা থেংনবগী ৱারি অমা ঐনা পাখ্রে । মতুংগী তুংদা মখোয় অনি তোইনা উনখি অমসুং মরুওইবা ৱাফম কয়াদা ৱা খন্নখি নৎত্রগা মরৈ য়েৎনখি ।

দান্দি মার্চ মনুংদা বাবু মহাত্মা গান্ধীনা সায়েদনা সাহেবকী য়ুমদা লৈখি । মহাত্মা গান্ধীগা মহাক্কা লৈনবা মরুপ-মপাং ওইবগী মরি অদু  ইকায়খুম্নবা উৎপা ওইনা সাইফুদিন সাহেবনা মহাক্কী সাইফি ভিলা অদু নিংতম্লবা মতুংদা লৈবাক অসিদা কৎথোকখি । হায়রিবা সাইফি ভিলা অদু হৌজিক লৈবাক অসিগী নহারোলশিংদা থৌনা পীরি ।

মরুপশিং,

ঐনা বোহরা কাংলুপকা লৈনবা মরি অসি য়াম্না কুইরে অমসুং ঐ তশেংনা  কাংলুপ অসিগী মীওই অমনি হায়না ফাওরে । ঐনা মতম চুপ্পদা নখোয়গা নক্না লৈমিন্নবগী ৱাখল অদু ফাওরি । ঙসি ফাওবা ঐগী থোং অসি নখোয় ময়ামগী লাওনা হাংদুনা লৈরি । নখোয় ময়াম্না ঐবু নুংশিবা অসি ঐগী লাইবাক ফবনি ।

ঐগী ইপোক নুমিৎ ৱাৎলি অদুবু মসিগী শেংলবা মফম অসিদা ঐঙোন্দা য়াইফ-পাউজেল পীবা অসি লৈবাক অসিগী য়াইফনবা থবক তৌনবা ঐঙোন্দা থৌনা পীবনি। মসি তশেংনা অচৌবা খুদোংচাবা অমনি। মসিগী ঐনা ময়াম থাগৎচরি ।

বোহরা কাংলুপগী মীওই য়াওদবা খুঙ্গং থিবা খর ৱাগনি। ঐনা গুজারাতকী চীফ মিনিস্তর ওইরিঙৈ মতমদা খোঙথাং খুদিংদা বোহরা কাংলুপনা ঐবু শৌগৎখি । হায়রিবা নক্নবা মরি অদু ঙসি ঐ মফম অসিদা লাক্লিবনি।

নোংমা সয়েদনা সাহেবনা পাতনাদগী হল্লকখিবা অদু ঐ ফজনা নিংশিংলি ; মহাক সুরত্ত চৎকদবনি । মহাক্কী মতম লৈতদবদগী ঐনা মহাক উন্নবা এয়রপোর্ততা চৎখি মরমদি মহাক্কা উনদনা তোকপা অদু ঐনা পামখিদে । ঐখোয় অনি এয়রপোর্ততা উনখি অমসুং মহাক্না ঐঙোন্দা অঙাং মচাগী মতৌগুম মহাক্কী নুংশিবা অদু উৎখি । ঐগা ৱারি শানবা মতমদা গুজরাত্ত ঈশিং তাংবগী খুদোংচাদবশিং অমসুং দামশিং শাবগী মতাংদা ৱারি শানখি । মহাক মতম অদুদা চহি ৯৭-৯৮ রোম শুরম্লগনি । ৱারি শানবা অদুনা মরম ওইদুনা মহাক্না থবক অদু পা্ন্দম অমগী মখাদা পায়খৎপা হৌখি অমসুং  মহাক্না গুজরাতকী খুঙ্গং কয়াদা দামশিং শাদুনা ঈশিং তুংশিনবা হৌখি । হায়রিবা খোঙজং অদু মাইপাকখি অমসুং খুঙ্গং কয়া ঈশিং ফংবা হৌখি ।

চহি খরগী মমাংদা, মচি ওইবা চিঞ্জাক চাবা ৱাৎপা থেংন্নবা থৌরম অমগীদমক ঐনা বোহরা কাংলুপকী মতেং নিখি । মীয়াম ভাব তাহন্নবগী থৌরম অমা পায়খৎনবা ঐনা হায়জখি । বোহরা কাংলুপনা থবক অদু খুদক্ত পায়খৎতুনা গুজরাতনা মসিগী খুদোংচাদবা অসি কোকহনবা ঙমখি ।

খন্দুনা য়েংউ, দাৱুরি বোহরা কাংলুপনা শেংলবা অসারা মুবারাকা থৌরম পাংথোক্লিঙৈ মতম অসিদা লৈবাক অসিনা নিউত্রিসন মিসনগী মখাদা নিউত্রিসনগী থা পাংথোক্লি । মসিগী খোঙজং অসি লৈবাক অসিগী মমাশিং অমসুং অঙাংশিং অশোই-অঙাম থোক্তনবা লৈবাক শীনবা থুংনা পায়খৎলি ।

নখোয়না ইজুকেসন, হকশেল, নিউত্রিসনগী লমদা পায়খৎলিবা থবকশিং অসিনা খুন্নাই অসিগী  অঙাংশিং ফগৎহনবা ঙম্লি। প্রোজেক রাইসকী মখাদা লৈবাক অসিগী তোঙান-তোঙানবা  মফমশিংদা নখোয়না অঙাংশিংদা মচি ওইবা চিঞ্জাক পীজরি হায়বা ঐনা খঙলে । নখোয়না পায়খৎলিবা থবকশিং অসিনা লৈবাক অসিগী তুংগী অফবা ওইগনি ।

অহানবা ওইনা সরকার অসিনা হকশেলগী লমদা মরুওইবা মীৎয়েং থম্লিবা অসি নখোয়না খঙলম্লগনি । অহোংবা মমলদা অনা-লায়েংগী খুদোংচাবা কয়া ফংহল্লে । অফবা মখলগী হোস্পিতাল কয়া লিংখৎলে । জন ঔশাদি দুকানশিংদা হিদাকশিং অহোংবা মমলদা ফংহল্লে । লেম্না দাইলাইসিস তৌবগী খুদোংচাবা পীরে অমসুং থম্মোয় অমসুং খুউগী ওপরেসন তৌবগী খরচ য়াম্না হন্থরে । লৈবাক অসিগী লায়রবা মীওই ক্রোর ৫০ হেন্না অয়ুসমান ভারতনা কল্লে ।

অয়ুসমান ভারতনা অমেরিকা, কানাদা অমসুং মেক্সিকোগী অপুনবা মীশিংদগী হেনবা মীওইশিং কান্নবা ফংহনগনি ।অপুনবা য়ুরোপকী মীশিংদগী হেনবা ভারতকী অ্পুনবা মীশিং মসিগী থৌরম অসিনা কান্নবা ফংহনগনি ।

চহি অমদা ইমুং অমদা লায়েংনবা লুপা লাখ ৫ পীগনি । মসি অপীকপা ৱারেপ অমা নত্তে । মীওই ক্রোর ৫০গী ইমুং অমমমনা চহি অমদা লুপা লাখ ৫ ফংগনি । মসি লৈবাক শীনবা থুংনা সেপ্তেম্বর ২৫দা পন্দিৎ দিনদয়াল উপধ্য জিগী মপোক নুমিৎতা হৌদোক্কনি ।

মরুপশিং,

২০২২ ফাওবগী মনুংদা য়ুম লৈজদবা মীওইশিং য়ুম পীনবা সরকারনা পান্দম থম্লি । মীওই ক্রোর অমা হেনবদা য়ুমশিং শোশিং শীন্নখ্রে । মসি ইচম চম্না লাওথোকপা অমা নত্তে । অতৈ য়ুম কয়া শাগৎপগী থবক য়াংনা পায়খৎলি । মীয়াম হিংবদা লাইনবা অমসুং মখোয়গী পুন্সি মহিং ফগৎহন্নবা সরকারনা লেপ্পা লৈতনা হোৎনরি ।

মরুপশিং,

লায়রবশিং অমসুং ময়াই ওইরপ লৈবা ইমুংশিংগা মরি লৈনবা থবক অমা সরকারনা পায়খৎলি । থবক অদু লু-নানবগা মরি লৈনবনি । সরকারনা মসিগী থবক অসি হৌরে অমসুং মসিনা ভারতমচা ক্রোর ১২৫ য়ৌহন্নবা পান্দম থম্লি ।

চহি মরিগী মমাং ঐনা প্রধান মন্ত্রী ওইদ্রিঙৈদা , ভারতকী য়ুম চাদা ৪০ খক তোইলেত লৈরমখি । তেনখ্রবা মতম অসিদা হৌজিক চাদা ৯০ তোইলেত লৈরে । লৈবাক অসি য়াম্না থুনা লমহাংদা খোঙহামদবা লৈবাক অমা ওইরগনি হায়না ঐনা চেৎনা থাজৈ।

লৈবাক অসিদা লুবা নানবগী লমদা ইন্দোর অসি মাংজিল থারি অমসুং লেপ্তনা হোৎনরি । মরম অদুনা ঐনা ইন্দোরগী মীয়াম অমসুং মীয়ামগী মীহুৎশিং অমসুং চীফ মিনিস্তর সিবরাজ সিংহ চৌহান অমসুং মহাক্কী কাংবু থাগৎলি ।

ইন্দোর খক নত্তনা ভোপালসু অঙকপা থবক কয়া পায়খৎলি । অকোয়বগী ফিবম ফনা থম্নবা অমসুং লু-নান্না লৈনবা হোৎনবদা নখোয়গী ফুরুপনা মতেং পাংলি হায়বা ঐ খঙলে । সয়েদনা সাহেব মশামক অসি অকোয়বগী ফিবম ফনা থম্নবা অমসুং লু-নান্না লৈনবা হোৎনবদা মাংজিল থারিবা মীওই অমনি ।

মফম অসিদা প্লাস্তিক মপুং ফানা থিংলে । থৌরম অসি অমোৎপা হুন্দোক্তবা থৌরম অমা ওইরে । নুমিৎ খুদিংগী অমোৎপা তন ১০ রিসাইকল তৌদুনা হার ওন্থোক্লি অমসুং মদু লৌমীশিংদা লেম্না পীরি। নখোয়না পায়খৎলিবা থবকশিং অসিনা অকোয়বগী ফিবম ফনা লৈহনবতা নত্তনা সরকারগী অমোৎপদগী ইনর্জি পুথোক্নবা পান্দম অদুদা মতেং পাংলি । লৈবাক অসিগী শ্বাছগ্রাহিশিংনা অসিগুম্বা লু-নানবগী থবকশিং অসিদগী পারা অমা তমহৌনবা ঐনা হায়জরি । মথংগী লাক্কদৌরিবা থৌরমশিংদা অমোৎপদগী ইনর্জি পুথোক্নবা থবকশিং অকনবা মীৎয়েং থম্লগনি ।

হয়েং অয়ুক ঐনা ভিদিও কনফরেন্সিংগী খুৎথাংদা শ্বাছগ্রহিশিং, ধর্ম্মগী গুরুশিং, কলাকারশিং, শান্নরোইশিং, উদোক্কী মীওইশিং অমসুং খুন্নাই অসিগী মশক নাইরবা মীওইশিংগা লু-নানবগী মতাংদা মীয়ামদা ভাবা তাহন্নবগী মতাংদা ৱারি শানগনি । মদুগী মতুংদা ৱার্ল্ড রিকোর্দ অমা শেমগনি । মীওই ক্রোর কয়ানা মতম অমত্তদা লম-তু শেংবগী থবক  পাংথোক্কনি ।

অমরোমদা, ওক্তোবর ২দা মহাত্মা গান্ধীগী চহি ১৫০সুবা মপোক নুমিৎতা মরি লৈনবা থবকশিং হৌরগনি ।বাপুগী চহি ১৫০সুবা মপোক নুমিৎতা মরি লৈন্না সায়েদনা সাহেবনা ঐখোয়দা য়াইফ পাউজেল পীরে । মথং চহি অনিগী  মনুংদা ঐখোয়না বাপুনা পামজরম্বা লু-নানবা হায়বা লম্বী অদুদা চৎনবা থবকশিং লেপ্তনা পায়ৎকনি ।

মরুশিং,

ঙসিগী থৌরম অসিদা অতোপ্পা মরম অমগীদমক ঐনা নখোয় ময়াম থাগৎপা পাম্মী । নখোয় অয়াম্বা ললোন-ইতিক্কী থবক তৌরি । নিয়মশিংগী মখাদা ফজনা কমদৌনা থবক তৌবগে হায়বগী খুদম অমা নখোয়না ওইরি । নিয়ম ইন্দুনা কমদৌনা ললোন-ইতিক্কী থবকশিং পাংথোক-চাওথোকহনগদগে হায়বা উৎলি । মখোয়না খুন্দারিবা মালেমগী মফমশিংদা দাৱুরি বোহরা কাংলুপনা মখোয়গী ওইবা তোঙানবা মশক অমা উৎলি ।

নখোয়গী লমচৎশিংগা লোয়ননা মতৌ করম্না পুকচেল শেংনা ললোন-ইতিক তৌগদগে হায়বগী খুদমশিং নখোয়না উৎলি ।লৈবাক অমগী ললোনবা অমা অসি লৈবাক অদুগী ইকনোমিগী য়াংলেনশরুনি । লৈবাক অসিদা থবক ফংহনবদা মহাক্না মরুওইবা থৌদাং লৌরি । ঐখোয়না ললোনবশিং শৌগৎনবা মরুওইবা থবক কয়া পায়খৎলি । মসিনি ঐখোয়না অকনবা মীৎয়েং থম্লিবা ।

খুৎ অমগী খুৎশাশিং চাউবা অমত্তা মান্নদে হায়বসি অচুম্বনি । ঐখোয়গী মরক্ত নমথাক তৌবা অসি ললোনবনি হায়না খনবা মীওই কয়া লৈরি ।হৌখিবা চহি মরি অসিদা সরকারনা মীপুম খুদিংমক লোগী মখাদা লৈগদবনি হায়না পাউজেল পীবা হৌরে । জি এস তি অমসুং ইন্সোলভেন্সি এন্দ বেঙ্করপসি কোদগুম্বা লোশিং পুকচেল শেংবা ললোনবশিং পুক্নিং থৌগৎলি । ঐগী বোহরা কাংলুপকী মীওইশিং মসিগী খুদোংচাবা লৌরি।

হৌখিবা চহী মরি অসিদা লৈবাক মনুংগী অমসুং মপানগী শেন থাদবশিংনা থাজবা হেনগৎলকপগী মরম কয়া লৈরি । হৌজিক মেক ইন ইন্দিয়াগী মখাদা ঐখোয়না মোবাইল ফোনশিং, কারশিং অমসুং অতৈ পোৎ কয়া পুথোক্লি । শেন থাদরকপগী চাং হেনগৎলে । মসি ভারতমচা ক্রোর ১২৫না থবক কন্না শুবগী মহৈনি ।ঐখোয় অসি মালেমদা শেন-থুমগী ফিবম য়াংনা ফগৎলক্লিবা লৈবাক অমা ওইরি ।

মরুপশিং,

মালেমদা লৈবাক অসিগী মিংচৎ ফজনবা হোৎনবদা নখোয়না মরুওইবা থৌদাং লৌরি । ঐখোয়না অনৌবা ভারত অমগী ইকায়খুম্নবা অদু ফংনবগী খুদোংচাবা ফংলে ।

ঐখোয়গী লৈবাক অসি নৌনা অমুক শেমগৎনবা হোৎনবদা ঐখোয় লেপ্তনা হোৎনরি । ঐগী ৱারোল অসি  লোইশিঞ্জরে । ঐনা অমুক হন্না ময়াম থাগৎচরি । ঐনা সায়েদনা সাহেব অমসুং মহাক্কী ইমুং-মনুং থাগৎচরি । ঐনা মতম চুপ্পদা নখোয়গী থৌজাল অমসুং মীনুংশিং ফংখি । নখোয়গী থৌজাল অদুনা ঐগী থৌনা ওইখি ।মসিগী থৌনা অসি ঐ খক্তগী নত্তে ভারতমচা ক্রোর ১২৫গীনি । ঐনা অমুক হন্না ময়াম পুম্নমক থাগৎচরি ।

অদোম্বু থাগৎচরি !