ভারতকী প্রধানমন্ত্রী

ঐগা লোইননা য়াম্না হৌনা হায়বীয়ু, জয় জয় কেদার।

লাইগী লৈবাক উত্তরাখন্দগী ইচিল-ইনাউ পুম্নমক্তা ঐনা খুরুমজরি। বাবা কেদরনা পুম্নমক্তা থৌজানবীবা ওইসনু।
ঙরাংমক লৈবাক অসিদা অমদি মালেম অসিদা দীপাবলীগী কুম্মৈ পাংথোকখ্রে। দীপাবলী অসিগী শেংলবা কুম্মৈ অসিদা লৈবাক অপুনবা অমদি মালেমদা শন্দোকখ্রিবা ঐখোয়গী ইচিল-ইনাউশিংদা কেদরনাথকী শেংলবা লমদম অসিদগী হন্না হন্না য়াইফ-পাউজেল পীজরি।

গুজরাতকুম্না রাজ্য খরদা ঙসিদগী অনৌবা চহী হৌনরি। অনৌবা চহি য়াইফবা ওইরসনু। মালেম পুম্নমক্তা শন্দোকখ্রিবা, ঙসিদগী অনৌবা চহী হৌরিবা ইমুং পুম্নমক্তা ঐগী মাইকৈদগী অনৌবা চহিগী হন্না হন্না নুংঙাইবা ফোংদোকচরি। অদোম পুম্নমক্তা অনৌবা চহিগী য়াইফ-মঙ্গল পীজরি। অমুক হন্না বাবানা ঐবু কৌবীরে। অমুক হন্না বাবাগী খুয়া খাদা চিংদুনা পুবীরক্লে। ঙসি অমুক হন্না থাইনগী মীয়ামগা উনরে ঐহাক। ঐগী মরমদা তাখিবা মখোয়, ঙসি অমুক হন্না ঐবু নীংশিংবীরম্মি।

করিগুম্বদা গরুর চত্তীদা, মফম অসিদা পুন্সিগী মরু ওইবা চহি লেঞ্জনবগী ঐ তাঞ্জা ফংজখি। অমসুং মরম অসিনা ঙসি অমুক্কা হন্না মফম অসিদগী ৱাশক লৌদুনা, মফম অসিদগী অনৌবা থৌনা ফংজদুনা, ভোলে বাবাগী থৌজাল লৌজদুনা শেংলবা পুক্নীংনা, অচেৎপা ৱাশক্না ২০২২, ভারতকী নীং খা তম্বগী চহি ৭৫, হিন্দুস্তানী পুম্নমক্কী ৱাশক, হিন্দুস্তানী পুম্নমক্কী থমোইদা মালেমদা হিন্দুস্তানবু খ্বাইগী মতোলদা য়ৌহন্নবা ৱাখল, বাবাগী থৌজালদগী অদুগুম্বা থৌনা অদু পোক্কনি। হিন্দুস্তানী পুম্নমক্না ৱাশক অসি লান্থোক্নবগীদমক থৱাই য়াওনা হোৎনগনি।

ৱাশক অসিগা লোইননা ঐ খ্বাইদগী অহানবদা শেংলবা লমদম অসিদা মহৌশাগী খুদোং থিবনা শোকহল্লবা লৈবাক্কী রাজ্য খুদিংমক্তা কনা কনাগুম্বনা হকচাং অদু মফমসিদা থনম্মি অমসুং বাবাগী লমদম অসিদা তিনখরি। অদুগুম্বা থৱাইশিং অদু ঙসি ঐনা ইকাই খুমনজবগা লোইননা শ্রদ্ধাঞ্জলি কৎচরি। লৈবাক অসিগী রাজ্য পুম্নমক্কী মীওইশিংনি। অমসুং মতম অদুদা ঐহাক অৱাবা পোকচখি। ঐ মতম অদুদা রাজ্যগী মুখ্যমন্ত্রী ওইরম্মি, অতোপ্পা রাজ্য অমদা ইনক্রোচমেন্ত তৌবগী ঐগী হক লৈরমদে, অদুম্না কৈদৌঙৈদসু ঐ খনবা ফাওবা ঙমখিদে। অদুবু ঐহাক ইশাবু ফাথবা ঙমজখিদে। অফবরা ফত্তবরা হায়বদুদি পুৱারিনা লেপকদবনি। অদুবু চৈনা ফংলবশিংগীদমক য়ৌরুবা, ঐগী পুক্নীংবু খাম্বা ঙমখিদে, ঐ লাকখি।

অমসুং মতম অদুদা ঐনা মতম অদুগী সরকারদা হায়জখি মদুদি অদোম্না গুজরাত সরকারদা কেদরনাথ অমুক হন্না শেমজিনবগী থৌদাং পীনবীয়ু, লৈবাক মীয়াম্না খনবা অদুগুম্না ঐ পাংথোকচগে। ঐখোয়না কা মনুংদা ফমলিঙৈ মতম অদুদা মুখ্যমন্ত্রীনা য়াবীখি, ওফিসর পুম্নমক্না য়াবীখি, মখোয়না হায়খি অফবনি, মোদীজীনা গুজরাতনা থৌদাং লৌবীরবদি অমসুং ঐনা নুংঙাইরদুনা, মপান্দা থোরক্তুনা মেদীয়াগী মাংদসু ঐগী ৱারেপ অদু ফোংদোকখি। খঙহৌদনা তিবিদা পাউ লাকখি মদুদি মোদীনা হৌজিক কেদরনাথ শেমজিনবগী থৌদাং লৌরে। অদুনা দিল্লীদা শাফু পীরম্মি। মখোয়না খনখি গুজরাতকী মুখ্যমন্ত্রী করিগুম্বা কেদরনাথতসু য়ৌশিল্লগদবা, পুং অমগী মনুংদা অসিগুম্বা ইহৌ অমা হৌরক্তুনা রাজ্য সরকারদা শাফু পীরখি অমসুং রাজ্য সরকারনা অহেনবা ওইনা লাওথোকপা তাখি মদুদি ঐখোয় গুজরাতকী মতেংগী মথৌ তাদে, ঐখোয়না তৌজগনি। ফরে, দিল্লীদা ফম্বা মীয়ামনা অৱাবা ফাওরগদি ঐনা করিগী অৱাবা পীরুগনি? ঐ হন্দোকখি। অদুবু বাবনা লেপখিবনি, থবক অসি বাবাগী মচা নুপাগী খুত্তা তৌবা তাখি।

অমসুং ঐনা মফম অসিদা ভারতীয় জনতা পার্তীগী সরকার শেমখিবদা, উত্তরাখন্দগী মীয়াম্না মপুং ফানা মতেং পাংখি, অদুনা ঐনা মপুং ফানা থজখি মদুদি বাবানা লেপ্লে মদুদি থবক অসি ঐনা তৌবা তাই অমসুং মরম অসিনা ইথোং ফাৎপা মতমদা ঐ লাকখি, পুক্নীংদা করিগুম্বা ৱারেপ খরা লৌরগা লাকখি অমসুং ইথোং থিংদ্রিঙৈগী মমাংদা মফম অসিদা থুংলখি অমসুং বাবাগী খুয়া খাদা অমুক্কা হন্না খুরুমজরি মদুদি কেদরনাথকী লমদম অসিবু অমুক্কা হন্না মতৌ অদুগুম্না শেমজিন্নবা ঙসি উরেপ-উয়ুং তম্লি। অকক্নবা মতমগী মনুংদা তীর্থ মফম করম্না ওইহনগনি, মফম অসিগী পুরোহিৎশিংগীদমক্তা করম্বা থৌরাং তৌগনি, পন্দিৎশিংগী হৌজিক্কী তঙাইফদবশিংগী মতাংদা করম্না ৱাখল চংগনি, মখোয়না অৱাবা খাংখিবশিং অদুগীদমক্তা মখোয়সু অফবা নুংঙাইবা পুন্সি ফংননবগীদমক করম্না থৌরাং তৌগনি, মসিদা য়ুমফম ওইদুনা মসিগী চাওখৎ-থৌরাংগী, অমুক হন্না শেমজিনবগী থৌরাং শেম শারে। লেপ্তনা ইশামক য়াওশিঞ্জরি, পুম্নমক য়েংসিঞ্জরি, করি দিজাইন তৌগনি, করি আর্কিতেকচর ওইগনি? ঐখোয়গী ধর্মগী ওইবা আর্কিতেকচর, লাইশঙশিংগী আর্কিতেকচর পুম্নমক্কী কাংলোনশিং অদু ঙাকলদুনা করম্না হন্না শেমজিনগনি? ৱাফম ময়াম অসিবু খল্লদুনা মসিগী চাওখৎ থৌরাংগী কয়াৎ য়াৎথোক্লে।
হৌজিক পুরোহিৎশিংনা ফংগদৌরিবা য়ুম অসি অমরোমদা থ্রি-ইন-ৱান ওইগনি। মখাদা লাকলিবা য়াত্রীশিংগী সেবাগীদমক্তা তৌবা য়াবা থৌরাং পুম্নমক শেম শাগনি। মথক থংবা শরুক্তা মখোয় লৈগনি। পুং ২৪ মৈ ফংগনি, ঈশিং ফংগনি, মপুং ফানা লু-নানবগী থৌরাং পাইখৎকনি অমসুং লম্বী অসি য়াম্না পাকথোকহনগনি, লোইননা মসিগী মতুংদা পুরোহিৎশিংগীদমক্তা তোঙানবা থৌরাং তৌগনি।

মশিং য়াম্না য়াত্রিশিং লাক্লবা মতুংদা খরনা পুজা-প্রসাদ লৌগনি, খরনা মফম অসিদা তীর্থগী পোৎলমশিং লৌগনি, থৌরাং পুম্নমক ফংননবা মসিগী থৌরাং তৌগনি। পোস্ত ওফিস লৈগনি, বেঙ্ক লৈগনি, তেলিফোনগী থৌরাং লৈগনি, কম্প্যুতর শিজিন্ননবা থৌরাং, পুম্নমক শিল-লাংগনি।

মফম অসিদা ঙসি মখল অমরোমদা প্রোজেক্ত মঙা হৌদোক্কদৌরি। অহানবদা, ঐনা হায়খিবগুম – লম্বী পুম্নমক্কী অপাকপা, আরসিসিনা শেমগনি অমসুং অনৌবা থৌরাংশিং য়াওহনগনি। য়াত্রিশিংনা চৎপা হেক হৌবগা মখোয়না লাকপা পুংফম অুগা চান্নবা পুক্নীং হুরবা ঈশৈ-নোংমাইসু তাবা ফংহনগনি, ভক্তিদা লুপ্লদুনা মখোয় চৎহনগনি।

মন্দাকিনীগী মপানসু রিতেনীং ৱাল খাগনি। অমরোমদা অরাকপা য়াত্রিশিংনা ফমননবগী খুদোংচাবা লৈহনগনি, লিরি লিরি চেন্থরিবা তুরেলগী খোঞ্জেল ফংহন্নবা থৌরাং তৌগনি। ঐনা হায়খিবা এপ্রোচ রোদ, গ্রান্দ-দিবাইন ওইহনগদৌরিবা এপ্রোচ রোদ শেমগনি। মসিগী লাইতনীংসু, মন্দাকিনীগী মনাক্তা রিতেনিং ৱাল অমসুং তোর্বান্দা শেম্বা অদুগুম্না শেমগনি মরমদি মাইকৈ অনিমক্তা ঈশিংগী মতিক-মঙাল উরি। অদুনা অমরোমদা ইমা সরস্বতীগীসু রিতেনিং ৱাল অমসুং মসিগী তোর্বান শেমগৎপগী থবকসু পাইখৎকনি। অমসুং মসিদসু লুপা ময়াম অমা থাদগনি।

ঐ খঙই চাদিং ময়াম অমা তৌগনি অদুবু ঐনা মপুং ফানা থাজৈ, করিগুম্বা হিন্দুস্তানগী য়াত্রিনা পুকচেল শেংনা লেপ্লবদি অমুক হন্না শেমজিনবা পাম্বা মওং অদুদা শেম্বদা চংগদবা শেনফমগী অৱাৎপা লৈবাক অসিদা খক লৈরোই, মসি ঐগী থাজবনি। অমসুং ঐনা লৈবাক অসিগী সরকারশিংদসু মসিদা শরুক য়াবীনবগীদমক পাউজেল পীজরি। ঐনা কোর্পোরেৎ সোসিএল রেসপোন্সসিবিলিতীগীদমক্তসু, ইন্দস্ত্রীগী তাইবংগী মীওইশিংদসু, ললোন-ইতিক তৌবা মীওইশিংদসু মসিদা মতেং পাংবীনবগীদমক পাউজেঞ্জরি।

ঐহাক জেএসদব্লিয়ুবু থাগৎপা ফোংদোকচরি, মখোয়না অহৌবগী থবক্কীদমক থৌদাং য়াননবা লেপখ্রে। অদুবু ঐগী ৱাখলদা অমসুং মংলান্দা উরি, অনৌবা অনৌবা ৱাখল পোক্লক্লি, অমসুং মসিগীদমক্তা অমুক্কা হেন্না সিএসআরগী মীয়ামদা হায়জরি।
মসিদা শেল ময়াম অমা চংগদৌরিবা অসিদা, ইনফ্রাস্ত্রকচর ময়াম অমগী থবক তৌগদৌরিবা অসিদা অকোইবগী ফিভমগী কাংলোনশিং ঙাক্কনি। মফম অসিগী অপাম্বা, চৎনবী, ইহুল মতুং ইন্না মসিবু অমুক হন্না শেমজিনবগী থবক পাইখৎকনি। মসিদা অনৌবা মওংশিং হাপকনি অদুবু মসিগী থৱাই অদুদি মমাংঙৈদগী হৌনা কেদারগী লৈমাই অসিনা মসিগী মনুংদা ফুমদুনা থম্লক্লবা থৱাই অদুমক ওইগনি, অসিগুম্বা অমুক হন্না শেমজিনবগী মাইকৈদা থবক তৌগনি।

ঐনা মফম অসিদা লাকপা মতমদা, থোং হাংবগী মতমদা, মসিগী মরুমদা ঐগী ৱাখল্লোন অমা লোৎলি মদুদি ঐনা লৈবাক অসিদা পাউজেল অমখক পীবা পামখি মদুদি মখোয় থৌদোক অদুগী ৱাখল অদুদগী থোরক্লো। করিগুম্বা য়ুমদগী থোরকপা মতমদা খল্লি মদুদি মফমদুদা ফিভম শেম শারবরা শাদ্রিবরা খঙদে। চৎপা ঙমগদ্রা ঙমলোইদ্রা খঙদে। মরম অসিনা য়াত্রিশিংগী মশিং হন্থখিবনি। অদুবু ঐহাক নুংঙাইবা পোকই মদুদি হন্দক চাওরক্না য়াত্রি লাখ মরি মখাইরোম তেনখ্রবা মতম অসিদা বাবাগী খুয়াদা লাকখি। অমুক হন্না মফম অসিদা অমুক্কা মপুং ফাবা ওইরে। অমসুং মরম অসিনা মথংগী চহিদা লাখ তরাদগী তরোই, ইদুনা থম্বীয়ু। মরমদি মীয়াম্না থাজবা থমখ্রে, পাউজেল য়ৌখ্রে, তিভিদা লৈবাক অপুনবনা য়েংখ্রে অমসুং ঙসিগী থৌরম অসিদগী অমুক হন্না পাউজেল য়ৌখ্রগনি মদুদি থোং হেক হাংবগা অমুক হন্না য়াত্রা হৌরগনি, থৌনা অসিগা লোইননা অমুক হন্না য়াত্রাগী শঙ্গু চৎপা হৌরগনি। অমুক হন্না উত্তরাখন্দ, ঐখোয়গী লাইরৈবাক, উত্তরাখন্দ ঐখোয়গী অথৌবগী লমদম, উত্তরাখন্দ ঐগী থৌনা ফবী ইমাশিংগী লাইনীং ফোংদোক্নবগীদমক্তা মসিদগী হেন্না ফবা মফম অমা অমুক লৈবা হৌনদে।

ঐখোয়গী লৈবাক্কী হিমালয়গী থোইদোকপা মগুন অমা লৈজরম্মি। চাউখৎপগী অদুক্কী মতিক ওইথোকপশিং অমসুং হিমালয়গী তম্পাক খুদিংদা মসিগী তোঙানবা মতিক অমা লৈজৈ। করিগুম্বা শ্রীনগরদা চৎলবদি হিমালয়গী শরুক্তা ইথিল অমা পোকই, ইমা বৈষ্ণা দেবী, অমসুং অমরনাথতা চৎলবদি অতোপ্পা ইথিল অমা পোকই। হিমাচল প্রদেশতা হিমালয় অদুমক, শিমলা, কুল্লু, মনালী চৎপীয়ু ইথিল অমা পোক্কনি অদুবু হিমালয় অদুগী তম্পাক্তা উত্তরাখন্দ লৈমাইদা লাক্লগদি লাইরোলগী ওইবা থৌনাগী ইথিল পোকই। হিমালয় অদুমক্তা দার্জলিংদা চৎলগদি অতোপ্পা ইথিল অমা পোকই, সিক্কিমদা চৎলগদি অতোপ্পা ইথিল অমমুক পোকই। অদোম্না ৱাখল তৌবীবা য়াই মদুদি হিমালয় অমখক্তদা, নুংশিৎ অদুমক, চিং অদুমক, উন অদুমক, অদুবু তোঙান তোঙানবা লমদমদা তোঙান তোঙানবা থৌনাগী ইথিল পীরি।

ঐখোয়গী হিমালয়গী তম্পাক্তা ওর্গানিক ফার্মিং মালেম পুম্নমক্কীদমক্তা য়াম্না চাওবা ওইথোকপা য়াবা মফম অমা ঐনা উই। সিক্কিম অপীকপা লমদম অমনি। মী মশিং লাখ ৬-৭ খক্তনি অদুবু তুরিস্ত লাখ ১২-১৫ ফাওবা লাকই, অমসুং মফম অদুদা চৎথোক-চৎসিন তৌবগী লম্বীদা অৱাবা ওইরিবনি, এরোপ্লেন তাফম ফাওবা লৈবা নত্তে। হৌজিক ঐনা শেম্লি, মতম খরগী মনুংদা শেমলগনি। মসি মক্তদসু অসুক য়াম্না তুরিস্ত লাক্লি। সিক্কিমনা রাজ্য অপুনবা ওর্গানিক ওইহল্লি।

চহি ১০-১২ লেপ্তনা মালেমগী ওইবা থাক্কী পাম্বৈশিংনা থবক তৌই। হিমালয়গী তম্পাক পুম্নমক্তা কেমিকেল ফর্তিলাইজরদগী নান্থোকপা, হিমালয়গী রাজ্যশিংদা হিদাকশিংদগী লাপথোকপা – মনা-মসিংগী হিদাক-লাংথক, লবুক্তা হিদাক কাপ্পা থিংলি। করিগুম্বা চহি ১০-১২ খাংবগা লোইননা থবক তৌরবদি ঐখোয়গী পোৎথোক্তা লুপা অমা ফংলম্বদু, মালেমদা অদোমদা দোলর অমা পীনবগীদমক শেম সারগনি, মসি ওর্গানিক ফামিংগী থৌনানি।

ঐহাক উত্তরাখন্দদা পাউজেল পীজরি। উত্তরাখন্দগী সরকারদা হায়জরি, ঐনা উত্তরাখন্দগী অফসরানশিংদা হায়জরি মদুদি পোৎলুম অসি পুবীয়ু। উত্তরাখন্দবু ওর্গানিক স্তেৎ ওইহন্নবগী মংলান পুদুনা চৎপীয়ু, ২০২২গী পান্দম ওইবীয়ু, লোইননা হৌজিক্তগী থবক তৌবীয়ু। সর্তিফাই তৌবদা চহি তরা চংবা য়াই, মসিগী কাংলোন লৈজৈ। অদুবু অমুক্তং লেপথোকপীয়ু, মীয়াম হৌনা শরুক য়ারক্কনি, পোৎলমশিং হোংলক্কনি। অদোম্না খনবীবা য়াই মদুদি ঙসি মালেম অপুনবা হোলিস্তিক হেল্থ ক্যারগী মাইকৈরোমদা চৎনরি। অমসুং মদুতদা কেমিকেলগী তাইবংদগী লাপ্না ঐখোয়গী লৌবুক্কী পোৎথোকপু পুরগদি মীওইবা খুন্নাইগী কয়াদা চাওরবা সেবানো তৌগদবা। হিমালয়গী থৌনা অসিবুসু পুখৎকদৌরিবনি।

তুরিজমগীদমক্তা ওইথোকপা য়াম্না লৈ। মসিগী লাইরোলগী ওইবা থাজবা অসি খজিক্তবু ওইরবসু শোকহল্লোইদবনি। অমসুং মদুগা লোইননা তুরিজম্বু চাওখৎহনবা য়াই। অনৌ-অনৌবা লমশিং শেমগৎপা য়াই। মহৌশাগী ঙাক-শেনববু ওইরো, অকোইবগী ফিভম ঙাক-শেনবগীবু ওইরো অমসুং শেম্বীবা মপুগী মফমদা থাজবগী ৱাখল্লোলসু কাইদনা লৈগনি।

উত্তরাখন্দগী সরকারসু তেনখ্রবা মতম অসিদা, অদুক্কী মতিক মরু ওইখ্রবা ৱারেপ লৌরি, অদুক্কী মতিক মরু ওইখ্রবা ইনিসিএতিব লৌরি অমসুং মদুনা মরম ওইদুননি ঙসি চাওখৎপগী মতোল অমদা লৈরিবা। অনৌবা থাজবগী ৱাখল্লোন অমা পোক্লরি।

উত্তরাখন্দগী মফমদা থৌনা য়াম্না লৈ। মফম অসিদা দিসিপ্লিন, মফম অসিগী তুখোংশিংদা য়াওরি। ইমুং অমদা লান্মী লৈতবা অমত্তা য়াওদে। থবক্তগী পোথারবা লান্মী ২৫০-৩০০ লৈতবা খুঙ্গং অমত্তা লৈতে অমসুং অদুক্কী মতিক লান্মী মশিং য়াম্না লৈবা মফম অদুদা দিসিপ্লিন অদুদি অদুক্কী মতিক থাগৎনীংঙাইনি। য়াত্রিশিংগীদমক্তদি দিসিপ্লিন অসি য়াম্না চাওবা ৱাফম্নি। তুরিস্তশিংগীদমক্তা দিসিপ্লিন অসি য়াম্না চাওবা থৌনা অমনি। মসিবু ঐনা শক খঙনহনবা পাম্মি। মসিগীদমক্তা ঐখোয়না স্কিমশিং শেমগবনি। থবক্তগী পোত্থারবা ঐখোয়গী লান্মীশিংনা মসিগী খঙ-হৈবশিং অসি শিজিন্নদুনা, তুরিস্তশিংদা অনৌবা থাজবা অমা পোকহন্নবগীদমক ঐখোয় অসিগুম্বা ঐখোয়গী অতোপ্পশিংগীদমক্তা য়াম্না চাওবা ৱাফম অমা ওইগদবা থৌরাং অমা শেমগদবনি। ওইথোকপা য়াবা য়াম্না লৈ। অমসুং অসিগুম্বা ওইথোকপা য়াবশিং অসি পুদুনা উত্তরাখন্দগী চাওখৎ-থৌরাং, উত্তরাখন্দ অসি লৈবাক অসিগীদমক্তা খ্বাইদগী পুক্নীং চিংশিন্নীংঙাই ওইবা মফম, খ্বাইদগী পাম্নরবা তুরিস্ত দেস্তিনেসন ওইনবা, তুরিস্তকীদমক্তা উত্তরাখন্দ, য়াত্রিগীদমক্তা উত্তরাখন্দ, এদভে্চরগীদমক্তা উত্তরাখন্দ, অথোইবা মহৌশাগীদমক, মহৌশাগী তম্পাক্তা লৈরিবশিংগী অপাম্বগীদমক্তা উত্তরাখন্দ, শেমদোক-শেমজিন তৌবা, অনৌবা পুথোকপশিংগীদমক্তা উত্তরাখন্দ।

থৌনা অসি লমদম অসিদা লৈ, ঐনা অদোম পুম্নমক্তা পাউজেল পীজরি মদুদি লাকপীরো ঙসি দীৱালীগী মতম অসিদা অদুগা অমরোমদা অনৌবা চহিগী হৌরকপা অসিদা, ঐখোয়গী অসিদা হিন্দুস্তান পুম্বদা দীৱালীগী নুমিত্তা অরিবা চে-চাং লোইশিল্লি অমসুং অনৌবা চে-চাং হাংদোকই। ঙসি চাওখৎ-থৌরাং অমগী চে-চাং হৌদোক্লি। অসিগুম্বা অনৌবা চে-চাং অসিদগী ঐখোয়না চাওখৎপগী ৱারী হৌদোক্লি। অনৌবা মতোল অদুদা পুননবগীদমক মাংদা চখৎকনি। ঐনা ঙসিসু ৱাফম ময়াম অমা পুখৎলি। রাজ্য সরকারনা মসিবু অমুক্কা হন্না য়েংশিনবীগনি। অদুগা অমুক হন্না থা অমা অনিদা অমুক্কা হন্না উনগনি। ঐগী পুক্নীংদা মফম অসিদা হেন্না তৌনীংবা থবকশিং অদুদসু শাফু পীগনি। অদুবু অকোইবগী ফিভম ঙাক শেনবা হায়বসি ঐখোয় পুম্নমক্কী থৌদাংনি। মহৌশাবু ঙাক-শেনবা অসি ঐখোয় পুম্নমক্কী থৌদাংনি। ঐখোয়না অকোইবগী ফিভম ঙাক-শেল্লবদি, অকোইবগী ফিভমনা ঐখোয়বু ঙাক-শেনবীগনি, মসি ঐনা গরেন্তি পীজরি। ঐখোয়না মহৌশাবু ঙাক-শেল্লবদি, মহৌশানা ঐখোয়বু ঙাক-শেনবীগনি, মসি ঐনা অদোমদা থাজবা পীজরি।

চহি কয়াদগী পুৱারিনা খুদম ওইদুনা লাক্লি মদুদি মহৌশাবু হেক হেক ঙাকশেনবা মফমদুদা মহৌশগী মাইকৈদগীসু করিগুম্বা অৱাবা অমত্তা থোরক্তে। অকোইবগী ফিভম ঙাকশেনবা মফম অদুদগী অৱাবা অমত্তা পীরক্তে। অমসুং ঐখোয় পুম্নমক্তা অদুগুম্বা থৌনা অদু পীবা ঙম্বা লৈমাই অদুদি মসি।

ঐনা উত্তরাখন্দ সরকারদা পাউজেল পীজরি মদুদি ভারত সরকারগী খোংজং অসি অদোম পাইখৎপীয়ু। অমসুং রাজ্য-রাজ্যশিংগী মরক্তা অথোই-অহেন তান্নবীয়ু, করম্বা রাজ্যনা খ্বাইদগী হান্না লাইবক ফবা স্কিম অসি হান্না পাংথোকপগে? করম্বা রাজ্যনা খ্বাইদগী হান্না প্রধানমন্ত্রী উজ্জ্বালা য়োজনা য়ৌহনবগে? করম্বা রাজ্যনা খ্বাইদগী য়াম্না তুরিজম চাওখৎহনবগে? লাক্কদৌরিবা মতমগীদমক্তা চাওখৎ-থৌরাংগী লমদা রাজ্য-রাজ্যশিংগী মরক্তা অকনবা অথোই-অহেন তান্নবা পাংথোকপীয়ু। ঐনা হিমালয়গী রাজ্য পুম্নমক্তা অথোই-অহেন তান্নবা অসিগীদমক পাউজেল পীজরি। ঐনা লৈবাক অসিগী রাজ্য পুম্নমক্তা পাউজেল পীজরি। লাকপীরো রাজ্য অমনা অতোপ্পা রাজ্য অমগা লোইননা অকনবা লম্বা তৌনরসি। হেল্দী কম্পিতিসন তৌরসি অমসুং চাওখৎপগী অনৌবা মতোলদা মাংদা পুখৎলসি।

ঐনা উত্তরাখন্দা ৱাফম অসিগীদমক থাগৎপা ফোংদোকচরি – অমাংশঙ, লমহাংদা মাংশিনবা তোকপা, নুমিৎ খরগী মমাংদা ঐঙোন্দা তমখি মদুদি উত্তরাখন্দগী খুঙ্গংশিংদা অমাংশঙ শাবগী থবক মপুং ফারে। হৌজিক খুঙ্গংদা কনা অমত্তনা লমহাংদা মাংশিনবা চৎনদ্রে। শহরদা থবক পাইখৎলি। মতম খরগী মনুংদা শহর য়াওনা উত্তরাখন্দ অপুম্বদা লমহাংদা মাংশিনবা তোক্ননবা শেম শারি।

হৌজিক ফাওবদা অদোম্না খোংজেল পীরিবা থবকশিং অসিগীদমক্তা অদোম্বু থাগৎপা ফোংদোকচরি। অদুবু ঐনা হায়জরি মদুদি মসিবু মিশন মোদ অমদা পাংথোকপীয়ু। নগরশিংদসু কনামতনা লমহাংদা মাংশিনবা চৎহনবীগনু।

মতম খরগী মমাংদা ঐহাক উত্তর প্রদেশতা চৎলুই। উত্তর প্রদেশতা য়োগীজীগী সরকারনা য়াম্না চাওবা থৌদাং অমা লৌহৌই। অমসুং মখোয়না হৌজিক অমাংশঙগী মমিং ফাওবা হোংদোকহৌরে। হৌজিক মখোয় অমাংশঙবু অমাংশঙ হায়না কৌদ্রে। অমাংশঙবু মখোয় খোং হাম্ফম হায়না কৌদ্রে। মখোয়না অমাংশঙবু ইজ্জতঘর হায়না মমিং থোল্লে।

ঐনা খঙই মদুদি লমহাংদা খোং হাম্বা চৎলিবা ইচল-ইচেশিংনা ইজ্জতঘর অসিগী ৱাহন্থোক ময়েক শেংনা খঙই। ঐখোয়সু ইজ্জতঘর অসিগী খোংজং পাংথোকসি। ইচল-ইচেশিংবু ইজ্জত পীননবগীদমক অমাংশঙ অসি য়াম্না খুদোং চাবা অমা ওইরি। মখোয়গী হকশেলগীদমকসু য়াম্না খুদোংচাবা অমা ওইরি। অমসুং হৌজিক য়ুনিসেফনা সর্বে তৌরে। হিন্দুস্তানগী খুঙ্গং লিশিং তরা সর্বে তৌরে। অমাংশঙ শাবা অমদি শাদবা য়ুম অমদি খু্ঙ্গং, পুম্নমক অদু মখোয় নৈনরে, য়ুনিসেফনা। য়ুনাইতেদ নেসন্সকী লুপ অমনি অমসুং মখোয়না ফংখি মদুদি অমাংশঙ লৈতবনা মরম ওইদুনা মখল-মখা কয়াগী লাইনা পোক্লি, অমসুং লাইনা অদুনা মরম ওইদুনা অঙাংশিং নারবদি মমা অদু মথৌ চিলহল্লি, মপা অদু মথৌ চিলহল্লি, অঙাং স্কুল চৎত্রে। মপা অদু শেল তানবা চৎপা ঙমদ্রে। মমা নাখ্রবদি ইমুং পুম্বা অদু অনাবা ওই। ইমুং অদুদা শেল থোক্লিবা অদু নাখ্রবদি চাগা লাক্ত্রে, ইমুং অপুনবা চাদবনা শি। অমসুং পুম্নমক অসি উরুরগা মখোয়না সর্বে তৌখি মদুদি অমাংশঙ লৈত্রবদি অনাবা লায়েংবদা চংবা চাদিং অমসুং অমাংশঙ শারবদি য়ুনিসেফকী মীওইনা সর্বে তৌদুনা পুথোরকখি মদুদি লাইরবা ইমুংগী অনাবগী মরুমদা চংবা শেনফম লুপা লিশিং ৫০ অদু কনবা ঙম্মি, অদোম খনবীয়ু করিগুম্বা ইমুং অদুগী চহিগী লুপা লিশিং ৫০ কল্লগদি, ইমুং অদুগী পুন্সিদা কয়াদা চাওরবা থৌনা হাপকদবা।

অমাংশঙ অমনা পুন্সিবু হোংদোকপা ঙম্মি অমসুং মরম অসিনা লৈবাক অপুম্বদা অচেৎপা লাইনীংগা লোইননা বাবা কেদরনাথকী ধাম শাগৎলিবা অসিগুম্না ঐহাক হিন্দুস্তানগী লাইরবশিংগী অমাংশঙ শাননবা খোংজংসু চংশিনগনি। মদুতদা ঐগী লৈবাক্না মাংদা চখৎকনি। ৱাখল্লোন অসি পুদুনা ঐখোয় মাংদা চখৎসি।

ঐনা অমক হন্না উত্তরাখন্দগী সরকারদা নোল্লুকচরি অমসুং থাগৎপা ফোংদোকচরি। অমসুং লৈবাক অপুনবদগী ধাম মরিগী য়াত্রাদা লাকপীরিবা মীয়াম, মখোয়না খঙই মদুদি ঐখোয়না লুপা কোতি লিশিং ১২ চংবা ধাম মরি অসিবু শম্নহনবা রোদ শেম্ননবা থবক হৌরে। অনৌবা কনেক্তিবিতীগী থৌরাংশিং হৌদোক্লে।

হৌজিক কেদরনাথ অসি মতৌ অসুম্না শেম্লগনি। ঐগী কেদরনাথ চিংলেম্বা ওইগনি, লাইওইরবা ওইগনি। ইথিল পীনীংঙাই ওইবা অথোইবা মফম ওইগনি। মসি লৈবাক মচা কোতি ১২৫গী লাইনীংগী মফম অমা ওইরি। অহল ওইরবা মমা-মপাবু ধাম মরি অসিগী য়াত্রা অমুক্তং তৌহনবা অসি অঙাং খুদিংমক্কী লাইনীং ওইরি।

ঙসি সরকার অসিনা লৈবাক মচা কোতি ১২৫গী মংলান ওইরিবা থবক অদু তৌরি, মসিবু মপুং ফাহন্নবা থবক পাইখৎলি। থবক অসি উত্তরাখন্দগী লৈমাইদা পাংথোক্লি অদুবু থবক অসি হিন্দুস্তানগী মীপুম খুদিংমক্কীদমক পাংথোক্লি। থবক অসিবু অদোমগী মাংদা হৌদোক্ললদনা পুন্সিদা তোপ তোপ্পা লাইনীংগী থৌনা অমগী অপেনবা পোকচরি।

ঐনা অদোম পুম্নমক্তা য়াইফ-মঙ্গল পীজরি, অমুক্কা হন্না ভোলে বাবাবু শোঞ্জরি । অমুক্কা হন্না ঐনা অদোমদা হায়জরি মদুদি ঐগা লোইননা খুৎ অনি লোন্নদুনা য়াম্না হৌনা খুম্বীয়ু –

জয় জয় বাবা ভোলে, জয় জয় বাব ভোলে

জয় জয় বাবা ভোলে, জয় জয় বাব ভোলে

হন্না হন্না থাগৎচরি।