ভারতকী প্রধানমন্ত্রী

ঐহাক্কী নুংশিজরবা ইচিল–ইনাও অমসুং ইচল–ইচেশিং,

ঙসি লৈবাক অসিনা লৈতাদবা অমসুং নুংঙাইতবা ফাওরি। মফম অসিদা লাকপীরিবা ময়াম পুম্নমক্কী মফমদা ফাওরিবশিং অদু ঐহাকসু খঙবা ঙম্মি। পুলৱামাদা চত্থখিবা তেরর এতেক্ত অদুনা ভারত মচা পুম্নমকপু য়াম্না কন্না শাওহল্লে। ঐখোয়গী থৌনা ফরবা জৱানশিংনা লৈবাক্কী সেক্যুরিতীদা মখোয় মশাগী থৱায় কত্থোক্লি, মখোয়না কত্থোক্লিবা অদু লেম্না মাংলোয়। মসিগী থাজবা অসি ঝান্সীগী লৈপাক লৈহাওদগী, অথৌবা অমসুং লান্মীশিংগী লমদম অসিদগী ঐহাক্না হিন্দুস্তান্দা লৈরিবা মীওই কোতি ১৩০গী মফমদা পীজরি।

ঐখোয়গী সেক্যুরিতী ফোর্সশিংগী থৌনা, মখোয়গী শক্তি অদু লৈবাক অসিনা উখ্রে অমদি ঐখোয়গী লৈবাক অসিদা ঐখোয়গী লান্মীগী থৌনা অমসুং পাঙ্গলদা চিংনবা অদুগুম্লবা মীওই অমত্তা লৈরম্লোই। লৈবাক অসিনা মখোয়গী থৌনা অমসুং পাঙ্গলদা চাউনা থাজবা থম্লি।

অদুগা ঐহাক্কী নুংশিজরবা ইরৈবাকচাশিং, মফম অসিদা থৌজাল পীবীনবা লেংবীরক্লিবা ঐহাক্কী নুংশিজরবা ইচিল–ইনাও অমসুং ইচল–ইচেশিং, সেক্যুরিতী ফোর্সশিংগীদমক মখা তাবা এক্সন লৌখৎনবা মফ ওইগেরা, মতম ওইগেরা, মওং মতৌ ওইগেরা, পুম্নমক অসি ৱারেপ লৌনবা অয়াবা পীখ্রে। পুলৱামা এতেক্কী মরাল লৈরবা, পুলৱামা এতেক্কপু শিল লাংখিবা পুম্নমক শোয়দনা চৈরাক ফংগনি। ঐখোয়গী য়ুম্লোন্নবা লৈবাক্না কাওরবা মাল্লে মদুদি অনৌবা পোলিসী অমসুং অনৌবা মেনর লৈবা ভারতনি। তেরোরিস্ত গ্রুপশিং অমসুং মখোয়গী মকোকথোংবশিংনা উৎলিবা তমথিবা মওং মতৌ অসি মপুং ফানা হিসাব তৌগনি। 

মরূপশিং, ঐখোয়গী য়ুম্লোন্নবা লৈবাক অসি মতম অসিদা ইকোনোমিক মরায় চাইথবনা য়াম্না নাতৈ চাদবা ফিভম অমদা লৈরি। মখোয় হৌজিক মতম অসিদা কাং–খোং চাইরি, মখোয়গী ফিভম অসি অদুক য়াম্না ফৎখিদ্রে মদুদি চাউর–চাউরবা লৈবাকশিংনা মখোয়দগী লাপথোকপা হৌরক্লে। মখোয়না নোংমগী ওইবা মশাগী চাদিং ফাওবা তৌবদা অৱাবা ওইরে। মখোয়না তেঙ্গোৎ পায়দুনা কোয়চৎ চৎলি, অদুবু, ঙসি মালেম অসিদগী মখোয়না য়াম্না লায়না মতেংসু ফংবা ঙমদ্রি। মরায় চাইথবগী মতম অসিদা মখোয়না ভারত্তা অসিগুম্বা মখলগী এতেক্ত তৌদুনা, পুলৱামাগুম্বা মাং তাকপা থোকহন্দুনা মখোয়না খল্লিবা অসি ভারতসু মরায় চাইথরনি অসিনি, ঐখোয়গী য়েক্নবশিং, পাকিস্থানদা ফম্লিবা মীওইশিং, মশিমদি মমুৎতানা খঙজিল্লু– নখোয়না চৎলিবা লম্বী অদুনা নখোয় নশাগী মাং তাকপা অদু উবা ফংলে। ঐখোয়না চৎলিবা লম্বী অসিনা ঐখোয়বু শরক কয়া হেন্না চাউখৎহল্লবগে হায়বদু মালেম অসিনা উরি।

ইচিল–ইনাও অমসুং ইচল–ইচেশিং, ঐখোয়গী য়ুম্লোন্নববু মহাক্কী অসিগুম্লবা অনৌবা থৌওং অসিগীদমক লৈবাক অসিগী মীওই কোতি ১৩০না অমত্তা ওইনা পুন্দুনা পাওখুম পীগনি, মতিকচাবা পাওখুম পীগনি।  

মরূপশিং, ঙসি মালেম অসিগী চাউর–চাউরবা লৈবাকশিংনা ভারতকীদমক্তা লেপলি, ভারতকী ৱাখল্লোনবু পুক্নীং থৌগৎলি। ঐহাক্কী ইফমদা লাক্লিবা পাওজেলশিং অদুদগী খঙবা ঙম্লি মদুদি মখোয়সু ঐখোয়গুম্না নুংঙাইতবা ফাওরি, ঐখোয়গুম্না শাওনীংবা ফাওরি। মালেম পুম্বনা তেরোরিস্তকী থৌওং অসিবু লোইশিন্নবা মায়কৈদা লেপলি।

মরূপশিং, লমদম অসি মনিকর্নিকাগী থৌনা ফরবা লমদম্নি, মহাক্না ঝান্সীগী রানীগী শক্তমদা লৈবাক্কী নীংতম্বগী ইহৌবু অনৌবা পুক্নীং ইহুল, অনৌবা ইন্সপীরেসন পীনবীখি। মনিকর্নিকা কাশীগী মচানুপী ওইরম্মি অমদি ঐহাক্কী লাইবক ফবনা মফম অদুগী মীয়াম্না, কাশীনা, ঐহাকপু মখোয়গী পর্লিয়ামেন্তকী মীহুৎ ওইনা খনবীরে। ঐহাক্না নীংশিংলি মদুদি ঐহাক্না অহানবা ওইনা অদোম ময়ামগী মরক্তা লাকখিবা মতম অদুদা ময়ামদা ঐহাক্না ৱাশকচখি মদুদি অদোম ময়াম্না পীবীরিবা ইকায় খুম্নবা অদু শেন্দোয়গা য়াওনা হন্দোকচগনি। ময়াম্না নীংশিংবীরিবা নত্ত্রা? ঐহাক ৱাশক ঙাকপা মীওইনি। করিগুম্বা খরা পাংথোক্নবা থোরকপনি, পাংথোকনীংলিবা অদু মপুং ফানা পাংথোক্লগা তোক্লি।

মরূপশিং, দিবেলপমেন্তকী ইচেল মঙা হায়বদি অঙাংশিংগী মহৈ মশিং, নহাশিংগী শেন্থোক লম্বী, অহল ওইরবশিংগী হিদাক লাংথক, লৌমীশিংগী ইথৈ লৌখোং অমসুং মীপুম খুদিংমক্কী ৱারোল তানবগীদমক বি.জে.পি.গী সরকারশিংনা থবক তৌরি। পান্দম অসিদা মাংলোমদা চংশিন্দুনা হৌজিক হৌজিক ঐখোয়না বুন্দেলখন্দ অমসুং উত্তর প্রদেশকী চাউখৎ থৌরাংগা মরী লৈননা চাউরাক্না লুপা কোতি লিশিং ২০গী চাউখৎ থৌরাংগী থবকশিংগী উরেপ উয়ুং তম্বা অমসুং শঙ্গাবগী থৌরম পাংথোকখ্রে। মসিদা সেক্যুরিতী, এম্প্লোইমেন্ত, রেল, ইলেক্ত্রিসিতী, ঈশিং; অসিগুম্লবা প্রোজেক্ত কয়া অমা য়াওরি।

ইচিল–ইনাও অমসুং ইচল–ইচেশিং, হৌজিক্তি বুন্দেলখন্দবু লৈবাক অসিগী সেক্যুরিতী অমসুং দিবেলপমেন্তকী কোরিদোর ওইহন্নবা কেম্পেন পায়খৎপা হৌরে। ঝান্সীদগী আগ্রা ফাওবা শেমগৎলিবা অসিগুম্লবা দিফেন্স কোরিদোর অসিনা লৈবাক অসিবু মপাঙ্গল কলহনবগা লোয়ননা বুন্দেলখন্দ অমসুং উত্তর প্রদেশকী নহাশিংবু এম্প্লোইমেন্তকী অনৌবা খুদোংচাবা অমা ফংহল্লগনি। লৈবাক অসিগী অমসুং মালেম অসিগী চাউর–চাউরবা ইনবেস্তরশিংনা মফম অসিদা ইন্দস্ত্রী লিংখৎনীংবগী অপাম্বা উৎলরে।

ইচিল–ইনাও অমসুং ইচল–ইচেশিং, অচৌবা ইন্দস্ত্রী লিংখৎলগদি মদুগী অনকপদা লৈবা অপীকপা ইন্দস্ত্রীশিংসু দিবেলপ তৌরকই। মপুং ফাবা ইকো – সিস্তেম অমা, মপুং ফাবা এনভাইরনমেন্ত অমা থৌরাং তৌই। ঝান্সী অমসুং মনাক নকপদা লৈরিবা অপীকপা ইন্দস্ত্রীশিংসু কোরিদোর অসিনা চাউনা কানহল্লগনি। কোরিদোর অসিনা লমদম অসিগী নহা লাখ কয়াবু হকথেংননা থবক ফংহল্লগনি।

মরূপশিং, হৌজিক ঐহাক্না মফম অসিদা মায়োক্নরিবা অতোপ্পা খুদোংচাদবা অমগী মতাংদা হায়জগে। মায়োক্নরিবা অদুদি ঈশিংনি। ঈশিং অসি লমদম অসিগী খ্বাইদগী চাউবা মায়োক্নরিবা অমনি। বুন্দেলখন্দা লৈরিবা ময়াম পুম্নমক্না ঈশিংগীদমক অদুক্কী মতিক হোৎনবা তারি, মসি ঐঙোন্দা ফাওজৈ। যোগী আদিত্যনাথজীগী সরকারনসু মসি ফাওরি। অদুনা অদোমগী ঈশিংগী সমস্যা অদু কোকহন্নবা হোৎনরিবা অদু মাংলোমদা পুখৎলদুনা ঙসি লুপা কোতি লিশিং ৯গী পাইপলাইনগী উরেপ উয়ুং তমখ্রে।

বুন্দেলখন্দগী ইমাশিং – ইচল–ইচেশিং পুম্নমক্না ঐখোয়বু মপুংফানা থৌজাল পীনবীদুনা অথুবা মতমদা থবক অসি মপুং ফানা লোইশিন্দুনা ময়ামগী মফমদা থক্নবা ঈশিং ফংহনবা ঙমবা ওইরসনু। ঙসি ইমুংদা ঈশিংগীদমক্তা খ্বাইদগী ৱারীবা অসি ইমাশিং – ইচল–ইচেশিংনি। মখোয়গী শক্তি অপুম্বা ঈশিং হোনবদা শিজিন্নরি। ইমাশিং – ইচল–ইচেশিং ঐহাক ময়ামগী লমন অদু শিংজবা লাকচরি, ময়াম্বু অৱাবা অসিদগী কোকহন্নবা লাকচরে। ময়াম্না ঐখোয়দা থৌজাল পীনবীদুনা পাইপলাইন্দগী ঈশিং য়ৌহনবা ঙমহনবীয়ু। ঐহাক্তি মসি সুপ্নতগী পাইপ লাইনগী প্রোজেক্ত নত্তে হায়জনীংই, মসিদি লমদম অসিগী পাইপ লাইন নত্তে, লাইফ লাইন্নি লাইফ লাইন।

ইচিল–ইনাও অমসুং ইচল–ইচেশিং, প্রোজেক্ত অসি মপুং ফানা পায়খৎপা লোইরবা মতুংদা বুন্দেলখন্দগী জিলা পুম্নমক হায়বদি ঝান্সী, ললিতপুর, জালৌন, হমীরপুর, মহোবা, বান্দা অমসুং চিত্রকুৎকী খুঙ্গং পুম্নমকপু থক্নবা ঈশিংগী পাইপলাইন্না শম্নহল্লগনি। মতৌ অসুম্না ঝান্সী শহর অমসুং মনাক নকপদা লৈরিবা খুঙ্গংশিংগীসু অমৃত স্কিমগী মখাদা কেন্দ্র সরকারনা লুপা কোতি ৬০০ চংনা স্কিম পায়খৎলে। বাতৱা তুরেলগী ঈশিংনা ঝান্সী শহরগী মীয়ামগী ইখৌ লাংবা কোকহনবতা নত্তনা মনাক নকপদা লৈরিবা খুঙ্গং কয়াদসু থক্নবা ঈশিং য়ৌরগনি।

ইচিল–ইনাও অমসুং ইচল–ইচেশিং, প্রোজেক্ত কয়া অসিনা হৌজিক হৌজিক্কী দরকার ওইবশিং অদু ফংহনবতা নত্তনা তুংগী দরকার ওইবশিংসু ফংহল্লগনি।

ইচিল–ইনাও অমসুং ইচল–ইচেশিং, পহারী দাম প্রোজেক্তকী মোদর্নাইজেসন্নসু লৌমীশিংদা চাউনা কান্নহল্লগনি। মমাংদদি দাম অসিদগী লৌমীশিংগী লৌবুক ফাওবা ঈশিং মতিক চানা ফংবা ঙমলমদে অমসুং গেৎ থাদবা মতমদসু লিক ওইরম্মি। হৌজিক্তি ঈশিং লিক ওইবা অদু থিংজিল্লে। লোয়ননা হন্দক্কী বজেত্তা বি.জে.পি.গী সরকারনা প্রধান মন্ত্রী কিসান সম্মান নিধী কৌবা পুৱারী ওইরবা স্কিম অমসু পুরক্লে। মসিগী মখাদা মশাগী একর মঙাদগী তানা লৌ লৈবা লৌমীশিংগী বেঙ্ক একাউন্তা চহী খুদিংগী কেন্দ্র সরকারনা লুপা ৬০০০ হকথেংননা দিপোজিৎ তৌরগনি। শেনফম অসি লুপা লিশিং অনি-অনি তাংকক অহুমলক থোক্না অদোমগী নাক্তা য়ৌরক্কনি। সরকারনা এক্সপেক্ত তৌরি মদুদি উত্তর প্রদেশকী লৌমী কোতি অনিগা লাখ ২৫গী মনুংদা লৌমী কোতি অনিগা লাখ ১৪না স্কিম অসিগী কানবা ফংলগনি। হায়বদি উত্তর প্রদেশকী জিলা খুদিংমক্তা লৌমী চাদা ৯৫ হেনবনা স্কিম অসিগী কানবা ফংলগনি।

মরূপশিং, প্রধান মন্ত্রী কিসান সম্মান স্কিমগী মখাদা মথংগী চহী তরাদা লুপা কোতি লাখ তরেৎ মখায়গী অপুনবা শেনফম, শেনফম অসি মচা নত্তে, লুপা কোতি লাখ তরেৎ মখায় লৌমীশিংগী একাউন্তা হকথেংননা দিপোজিৎ তৌরগনি। অমদি মসি মতম পুম্নমক্তা নীংশিংবীয়ু, শেনফম অসি লৌমীশিংগী একাউন্তা হকথেংননা য়ৌগনি, ময়াই চাবা অমত্তা য়াওরোই, দলাল অমত্তা য়াওরোই, কনাগুম্বা অমত্তনা অদোমগী হক মৎপা ঙম্লোয়।

মরূপশিং, হৌখিবা চহী মরি মখায়দগী খোংজেল য়াম্না য়াংনা লৌমীশিংগী, লায়রবশিংগী বেঙ্ক একাউন্ত হাংদোকহন্দুনা লাক্লি, অদুবু মদুগী তুংদসু ঐখোয়না মতম শাংনা থবক তৌনবা ৱাখল্লোন লৈরি, কান্নদবদা একাউন্ত হাংদোকহন্নবা হোৎনখিবা নত্তে। অদোমগী বেঙ্ক একাউন্ত হাংদোকহন্দুনা অদোমগী গ্যাসকী সবসিদী, মনরেগাগী খুৎশুমন, পেন্সন, অঙাংশিংগী স্কোলরশিপ, পৈশা পুম্নমক অসি অতোপ্পা মফম অমত্তদা চৎহন্দনা অদোমগী বেঙ্ক একাউন্তা দিপোজিৎ তৌনবা ঐখোয়গী সরকারনা থৌরাং তোরিবনি অমদি মদুনা মরম ওইদুনা মরক্তা য়ুরম্বা অদু থিংখ্রে। অদোম অদোমগী একাউন্তা হকথেংননা দিপোজিৎ তৌবনা লৈবাক অসিগী চাউরাক্না লুপা কোতি লাখ অমা কনবা ঙম্লে। লুপা কোতি লাখ অমা, মদু মমাংদদি কনা কনাগুম্বশিংগী একাউন্তা চংলম্মি। অদোম অদোম্বু লুৎ তৌরিবা মিদলমেনশিং অদুগী মরক্তা ঙসিদি মোদীনা ফকলাং ওইদুনা লেপ্লি।

ইচিল–ইনাও অমসুং ইচল–ইচেশিং, লৌমীশিংগা লোয়ননা ঐখোয়গী সরকারনা শা–শন লোইরিবশিং অমসুং ঙা য়োক্লিবশিংগীসু য়াম্না চাউবা ৱারেপ লৌরে। হৌজিক্তি শা–শন লোইবশিংশু মখোয় মশাগী বিজিনেস চাউথোকচবা ঙমজনবা কিসান ক্রিদিৎ কার্দতগী লোনগী খুদোংচাবা ফংহল্লে।

মসিগী মথক্তা লৌমীশিংগী য়াইফনবা মরুওইবা ৱারেপ অমসুং লৌরে। মমাংদা বেঙ্কশিংদগী লৌমীশিংনা লুপা লাখ অমা ফাওবা বেঙ্ক গরেন্তী য়াওদনা কৃশী লোন লৌবা য়ারম্মি। মতমগী অহোংবা অমসুং দরকার লৈবা অদু য়েংদুনা লুপা লাখ অমদগী হেঙ্গৎহন্দুনা লুপা লাখ অমগা লিশিং হুম্ফু পীনবা ৱারেপ লৌরে।

মরূপশিং, চেলেঞ্জশিং অসিগা লোয়ননা অদোমগী ইলেক্ত্রিসিতীগী সমস্যা অদু কোকহন্নবা লমদম অসিগী ত্রান্সমিসন সিস্তেম ফগৎহল্লে। হৌজিক্তি বুন্দেলখন্দ য়াওনা নোংচুপ থংবা উত্তর প্রদেশকী মফম কয়াদি ইলেক্ত্রিক সিস্তেম ফগৎলগনি। হৌজিক্তি নোংচুপ অমসুং অৱাং থংবা গ্রীদতা পুথোক্লিবা ইলেক্ত্রিসিতী তোঙান তোঙানবা মফমশিংদা লায়না ত্রান্সমিসন তৌবা ঙম্লগনি।

মরূপশিং, বুন্দেলখন্দ এক্সপ্রেস–ৱে নত্ত্রগা মফম অসিগী রেল কনেক্তিবিতী; ঐখোয়গী সরকারনা লেপ্পা লৈতনা মসিদা ইনোৎ পীরি। ঝান্সীদগী মানিকপুর অমসুং খৈরার–ভীমসেন সেক্সনগী দবলিং ওইগেরা নত্ত্রগা ঝান্সীদগী খৈরার অমদি ভীমসেন ফাওবগী রুৎকী ইলেক্ত্রিফিকেশন ওইগেরা, অসিগুম্লবা প্রোজেক্ত কয়া অসিনা লমদম পুম্বা অসিদা য়াম্না চাউনা কানহল্লগনি।

ইচিল–ইনাও অমসুং ইচল–ইচেশিং, লৌমী ওইগেরা, জৱান ওইগেরা নত্ত্রগা ঐহাক্কী নহা ওইরিবা ইচানুপা–ইচানুপীশিং ওইগেরা, ময়াম পুম্নমক্কীদমক অপনবা ৱাখল্লোন অমগা লোয়ননা দিবেলপমেন্তকী মন্ত্র পুরদুনা  সবকা সাথ সবকা বিকাস, করিগুম্বা মখল অমত্তগী দিসক্রিমিনেসন লৈতনা, ঐগী নঙগী থম্দনা, সবকা সাথ সবকা বিকাস মন্ত্র অমখকসি পুদুনা ঐখোয়না থবক তৌরি। অদুগা মসি পুম্নমক অসি ওইথোক্লিবগী মরমদি চহী মরি মখায়গী মমাংদা অদোম্না কেন্দ্রদা অচেৎপা সরকার অমা শেমখিবা অদুননি। অমদি লৈবাক পুম্বনা উত্তর প্রদেশকী লমন তোনশিল্লে হায়না ঐহাক্না খনজৈ মরমদি চহী ৩০গী মতুংদা হিন্দুস্তানবু মপুংফাবা মেজোরিতী ওইবা সরকার পীবীরিবা, হিন্দুস্তানবু অহানবা ওইনা, চহী ৩০গী মতুংদা তুং কোইবা সরকার পীনবীবা, হিন্দুস্তানবু চহী ৩০গী মতুংদা ৱারেপ লৌবা ঙম্বা সরকার পীনবীরিবা, মদুদা খ্বাইদগী চাউবা থৌদাং লৌখিবা অসি ঐহাক্কী উত্তর প্রদেশননি, ঐহাক্কী উত্তর প্রদেশকী ভোত্তরশিংননি।

চাউখৎ থৌরাংগীদমক, অনৌবা ভারতকীদমক অদোম অদোম্না লাক্কদৌরিবা নুমীৎ খরা অসিদা ঐহাকপু অহেনবা থৌজাল পীনবীগনি হায়বা ঐহাক্না থাজবা থম্লি।

ইচিল–ইনাও অমসুং ইচল–ইচেশিং, অমুক হন্না চাউখৎ থৌরাংগা, এম্প্লোইমেন্তকা মরী লৈনবা প্রোজেক্তশিং অসিগীদমক ময়াম পুম্নমকপু হন্না হন্না য়াইফ পাওজেল পীজরি। ঐহাক্না উমাজীবুসু অখন্ননা তৌবীমল খঙবা উৎচরি মদুদি ৱাফম মচা মচাদগী হৌরগা লমদম অসিগী চাউখৎ থৌরাংগীদমক সরকারগী দিপার্তমেন্ত খুদিংমকপু মহাক্না কোয়নিক নিক্লি, কোয়চেন চেল্লি। ঐহাক্না খঙজৈ, পর্লিয়মেন্তরিয়ন অমা ওইনা ঐহাকসু লৈবাক পুম্বগী থৌদাংশিং অদুগা লোয়ননা, মহাক্না মহাক্কী থৌদাংশিংবু পাংথোক্লি, ঐহাক্না উমাজীবুসু থম্মোয় শেংনা তৌবীমল খঙবা উৎচরি, মহাকপু হন্না হন্না থাগৎপা ফোংদোকচরি।

ঐহাক্কা লোয়ননা অহৌবা খোংজেলদা লাওমিন্নরশি–

ভারত ইমানা – য়াইফরে

ভারত ইমানা – য়াইফরে

ভারত ইমানা – য়াইফরে

হন্না–হন্না থাগৎচরি।