ভারতকী প্রধানমন্ত্রী

রাষ্ট্রপতি অমদি ঐহাক্কী মরূপ শ্রীমান মুন জে-ইন, সামসুংগী ভাইস চেয়রমেন জে ৱাই. লী, কোরিয়া অমসুং ভারতকী মীহুৎশিং অমসুং শরুক য়াবীরিবা শক্নাইরবশিং।

ঐহাক্কী মরূপ রাষ্ট্রপতি মুনগা লোয়ননা নোয়দাদা শারিবা সামসুংগী অসিগুম্লবা ফেক্তরীদা লাকপা ফংবা অসি ঐহাক্কীদমক নুংঙাইবা ৱাফম অমনি। ভারতকা লোয়ননা মোবাইল মেন্যুফেকচরিংগী অনৌবা য়ুনিৎ অমা উত্তর প্রদেশকী নোইদাদা লিংখৎলিবা অসি চাউথোকচনীংঙাইনি। মসিগী অনৌবা য়ুনিৎ অসিগীদমক সামসুংগী তীম অপুনববু নুংঙাইবা ফোংদোকচরি, য়াইফ-পাউজেল পীজরি।

মরূপশিং, ভারতপু মেন্যুফেকচরিংগী গ্লোবেল হব ওইহন্নবগী মায়কৈদা ঙসিগী অসিগুম্লবা তাঞ্জা অসি য়াম্না মরু ওই। লুপা কোতি ৫০০০ ইনভেস্ত তৌবা অসিনা সামসুংবু ভারতকা ললোন ইতিক্কী মরি চেৎশিলহনবতা নত্তনা ভারত অমসুং কোরিয়াগী মরক্তা লৈনরিবা মরিসু হেন্না চেৎশিলহল্লগনি। সামসুংগী গ্লোবেল আর এন্দ দি হব ভারত্তা লৈরি অমসুং হৌজিক্তি মসিগী মেন্যুফেকচরিং ফেসিলিতী অসিনসু ঐখোয়গী মীংচৎ হেঙ্গৎহল্লগনি।

মরূপশিং, ব্যুজিনেস কমুনিতীগী মীওঈশিংগা ঐহাক্কা ৱারী শান্নবা খুদিংদা ৱাফম অমদি ঐহাক্না অদুমক হায়দুনা লাক্লি। ভারত্তা লৈরিবা মিদল ক্লাসকী ইমুং খুদিংদা কোরিয়াগী প্রদক্ত উবা ফংদবা ইমুং অমত্তা য়াওরমলোই। তশেংনা হায়রবদা ভারতকী প্রজাশিংগী পুন্সিদা সামসুংনা মহাক্কী ওইবা তোপ তোপ্পা মফম অমা কন্দুনা থম্লি। অখন্ননা অদোমগী ফোন, খোংজেল য়াংনা চংশিল্লক্লিবা স্মার্ত ফোন মার্কেৎতা ঙসিদি মালেমগী মকোক ওইরি। সামসুংগী লুচীংবশিংগা ঐহাক্কা ৱারী শানবা খুদিং ঐহাক্না মখোয়বু ভারত্তা মেন্যুফেকচরিংগীদমক পুক্নীং থৌগৎখি। ঙসি নোইদাদা পাংথোক্লিবা থৌরম অসি মদুগী মমিনি। ঙসিদি দিজিতেল তেক্নোলোজীনা মীচম প্রজাগী পুন্সিবু হেন্না লায়থোকহনবদা মরুওইবা থৌদাং লৌরি। ঙসি ভারত্তা চাউরাক্না স্মার্তফোন কোতি ৪০ শিজিন্নরি, মীওই কোতি ৩২না ব্রোদবেন্দ শিজিন্নরি, য়াম্না হোংনা ইন্তর্নেত দেতা ফংলি, লৈবাক অসিগী গ্রাম পঞ্চায়ৎ লাখ অমা হেনবদা ফাইবর নেৎৱার্ক য়ৌরে। মসি পুম্নমক অসি লৈবাক অসিদা ওইরক্লিবা দিজেতেল রিবোলুসনগী খুদম্নি।

মরূপশিং, মমল হোংবা মোবাইল ফোন, খোঞ্জেল য়াংবা ইন্তর্নেত, মমল হোংবা দেতাগা লোয়ননা ঙসিদি অয়াংবা অমসুং ত্রান্সপরেন্ত ওইবা সর্বিস দেলিবরী শোয়দনা ফংহল্লে। মৈ-ঈশিংগী বিল থিবা ওইগেরা, স্কুল-কোলেজদা এদমিসন ওইগেরা, প্রোবিদেন্ত ফন্দ ওইগেরা নত্রগা পেন্সন ওইগেরা চাউরাক্না খুদোংচাবা পুম্নমক ওনলাইন্দা ফংলে। লৈবাক্কী মফম কয়াদা হাংলিবা কমন সর্বিস সেন্তর চাউরাক্না লাখ অহুমলোম্না খুঙ্গংগী মীয়ামগীমক থবক তৌরি। শহরশিংদা ফ্রী ৱাই ফাই হোৎস্পোৎনা লায়রবা অমসুং মিদল ক্লাসকী নহাশিংগী এস্পিরেসন্দা পুক্নীং থৌগৎলি।

মসিদসু নত্তনা জি.ই.এম. হায়বদি গবর্নমেন্ত ই-মার্কেৎকী খুত্থাংদা হৌজিক্তি সরকারনা পোত্থোক পুথোক্লিবশিংদগী হকথেংননা পোৎ লৈরি। মসিনা ময়ায় ওইরপ্পা অমসুং অপীকপা ইন্ত্রপ্রিনরশিংদসু কান্নবা ফংহল্লে অমদি সরকারনা পোৎ লৈবদা নুং-পান উবসু হেঙ্গৎলে।

মরূপশিং, ঙসিদি দিজিতেল ত্রাঞ্জেক্সন লেপ্পা লৈতনা হেঙ্গৎলক্লি। ভিম এপ্লিকেসন অমসুং রুপে কার্দনা ত্রাঞ্জেক্সন য়াম্না লায়থোকহল্লে। জুন থা খক্তদা ভিম এপ্লিকেসনগী থোংদা চাউরাক্না লুপা কোতি লিশিং ৪১গী শেনফম পীথোক পীশিন তৌনখি। ঙসিদি ভিম অমসুং রুপে অসি মালেম পুম্বদা য়াম্না পাম্নরি। নুমীৎ খরনিগী মমাংদা সিঙ্গাপুরদসু খুদোংচাবা অনি অসি হৌদোক্নবা তাঞ্জা অদু ঐহাক্না ফংজখি।

মরূপশিং, মেক ইন ইন্দিয়া ইনিসিয়েতিব অসি ইকোনোমিক পোলিসীগী শরুক অমখক্তা নত্তে মসি সাউথ কোরিয়াগুম্বা মরূপ ওইরিবা লৈবাকশিংগা লোয়ননা হেন্না ফবা মরি থম্ননবা ৱারেপসুনি। মসিনা সামসুংগুম্বা থাজনীংঙাই ওইবা ব্রান্দা অনৌবা খুদোং চাবা পীবগা লোয়ননা মালেম অসিদা লৈরিবা অনৌবা ভারতকী নুং-পান উবা ওইবা ললোন ইতিক্কী মচৎকী কান্নবা লৌবা পাম্বা অদুগুম্লবা ললোন ইতিক তৌবশিংদা বার্তন তৌরি। ঐহাক নুংঙাইবা ফাওই মদুদি অসিগুম্লবা ইনিসিয়েতিব অসি ঙসিদি মালেম পুম্বনা তরাম্না ওক্লি, মতেং পাংলক্লি। মোবাইল ফোন মেন্যুফেকচরিংগী ৱাফম ওইরগদি ঙসি ভারত অসি মালেমদা অনিশুবা মফমদা লৈরে। চহি মরিগী মনুংদা ফেক্তরীগী মশিং, মোবাইল ফোন শারিবা ফেক্তরীগী মশিং ২দগী ১২০দা হেঙ্গৎলে, অমদি নুংঙাইবা ৱাফম অমনা, মদুগী মনুংদা ৫০ হেন্না নোইদাদা লৈরি। মসিনা নহা লাখ ৪ হেন্না থবক ফংহল্লে। থবক ফংহনবদা সামসুংনা অচৌবা থৌদাং লৌরি। লৈবাক পুম্বদা সামসুংনা চাউরাক্না মীওই লিশিং ৭০দা থবক পীরি, মদুগী মনুংদা চাউরাক্না লিশিং ৫দি নোইদাদা লৈরি। মসিগী অনৌবা প্লান্ত অসিদা অতোপ্পা মীওই লিশিং অমগা থবক ফংলগনি। মফম অসিদা শারিবা য়ুনিৎ অসি কম্পনীগী খ্বাইদগী চাউবা মোবাইল ফোন মেন্যুফেকচরিং য়ুনিৎ ওইগনি হায়না ঐঙোন্দা তাকপীরে। মফম অসিদা থা খুদিংগী চাউরাক্না ফোন কোতি অমা শেম শাগনি। মরু ওইরিবা ৱাফমদি মফম অসিদা পুথোক্লিবা পোত্থোক্কী চাদা ৩০দি এক্সপোর্ত তৌগনি, মালেমগী তোঙান তোঙানবা লমদমশিংদা চৎখিগনি। মসিনা গ্লোবেল মার্কেৎতা অদোমগী মফম চেৎহল্লগনি। হায়বদি কোরিয়াগী তেক্নোলোজী অমদি ভারতকী মেন্যুফেকচরিং অমসুং সোফৱেয়র সপোর্তকী থোংদা মালেমদা খ্বইদগী ফবা পোত্থোকশিং থৌরাং তৌরগনি। মসিমক ঐখোয়গী লৈবাক অনিগী পাঙ্গলনি অমদি ঐখোয়গী অপুনবা মীৎয়েংনি।

সামসুংগী অপুনবা তিম্বু অমুক হন্না নুংঙাইবা ফোংদোকচরি, য়াইফ-পাউজেল পীজরি। অদোম্না ঐহাকপু মফম অসিদা বার্তন তৌবীরকপা, থৌরম অসিগী শরুক অমা ওইহনবীবগীদমক হন্না হন্না থাগৎচরি।