ভারতকী প্রধানমন্ত্রী

লৈবাক অসিগী তোঙান–তোঙানবা মফমশিংদগী লাক্লিবা ঐগী নুংশিরবা ইনাওশিং অমসুং ইচলশিং, অহানবদা, উত্তর প্রদেশকী এম পি অমা ওইনা ঐনা অদোমবু তরাম্না ওকচরি। ঐনা থাজৈ, অদোম্না পুৱারী ওইরবা শহর অসি নুংঙাইরমগনি। মরূপশিং, নখোয়না অহোংবশিং অসি য়ারি অমসুং মসি শীন–থুংনা চৎনরি। নহাক মেয়োর অমা ওইবা য়াই নৎত্রগা কমিস্নর অমা ওইবা য়াই নৎত্রগা সি ই ও অমা ওইবা য়াই, নহাক্না অনৌবা চহিচা অমগী, অনৌবা ভারত অমগী অমসুং অনৌবা মীরোলগী মহুৎ শিল্লিবা ভারতকী শহরশিংগী মীহুৎ অমা ওইরিবনি। হৌখিবা চহি ৩ অসিদা ভারত মচা ক্রোর কয়াগী মঙলানশিং মঙফাওহন্নবা নহাক্না ঐখোয়গা লোয়ননা নক্ননা থবক তৌমিন্নরি।

ঙাইহাক্কী মমাংদা ,মফম অসিদা পাংথোকপা মেলা অমা য়েংবগী খুদোংচাবা ফংলে। লৈবাক শীনবা থুংনা পায়খৎলিবা প্রোজেক্তশিংগী মতাংদা ঐঙোন্দা খঙহল্লকখি। স্মার্ত সিতী মিশনগী মখাদা থবক ফজনা পায়খৎলিবা শহর খর মনা পীরে। মসিগী মথক্তা ইনাওশিং, ইচলশিং অমসুং ইচানুপীশিংদা মখোয়গী য়ুমশিংগী শো শীন্নরে। শো ফংলবা মতুংদা মখোয়গী মাইথোং মকা লাম্বা অমসুং মখোয়গী মীৎশিংদা উরিবা তুংগী থাজবশিং অদুনা ঐখোয়দা অচৌবা ইথিল অমা পীরে।

দাইস্তা কারক্ত্রিঙৈ মমাংদা ঐনা অসিগুম্বা কান্নবা ফংলবশিংগা ৱারী শানবগী খুদোংচাবা অমা ফংখ্রে। লায়রবশিং অমসুং য়ুম লৈজদ্রবশিংগী পুন্সিদা অহোংবা অমা লাকহনবগী খুদোংচাবা ফংবা অসি ঐগী লাইবক য়াম্না ফবনি। মনা ফংলবা শহরশিং অমসুং য়ুম ফংলবশিংদা ঐনা থাগৎলি অমসুং ঐগী য়াইফ–পাউজেল পীজরি। অদুবু, নখোয়না উরমগনি মদুদি ঐনা মনা পীবা মতমদা লৌবা লাকখিবশিংগী মরক্তা সুপ্নগী মেয়োর অনিখক নুপানি অতৈ লমহৌরিবশিংদি নুপী ঙাক্তনি। মখোয়না অসিগুম্বা থবক অসি পাংথোকপগীদমক ঐখোয়গী ইচলশিং অসিগীদমক খুবাক খুসি।

মরূপশিং, মিশন অসি শহরগী য়ুম লৈতবশিংদা পক্কাগী য়ুম পীবা ওইবা য়াই নৎত্রগা স্মার্ত সিতী ১০০গী থবক ওইবা য়াই নৎত্রগা অমরুত সিতী ৫০০ ওইবা য়াই, ঐখোয়গী পান্দমদি মীওই ক্রোর কয়া লাইনা নুংঙাইনা লৈহনবনি অমসুং হৌখিবা চহি ৩ অসিদা মখোয়না অশোই–অঙাম থোক্তবা হেনগৎলক্লে। উত্তর প্রদেশকী শহরশিং শেমগৎনবা স্কিম কয়াগী উরেপ–উয়ুং ঙসি তম্লে। ঐনা খঙহল্লি মদুদি লুপা ক্রোর ৭,০০০গী প্রোজেক্তশিং মপুং ফানা লোইশিল্লে অমসুং স্মার্ত সিতী মিশনগী মখাদা লৈবাক অসিগী মফম কয়াদা লুপা ক্রোর ৫২,০০০গী প্রোজেক্তশিং য়াংনা পায়খৎলি।

মসিগী মিশন অসিগী পান্দমদি শহরদা লৈবা লায়রবশিং, খরা নুংঙাইবশিং অমসুং ময়াই ওইরপ নুংঙাইবা মীওইশিং হিংবদা লাইহনবা অমসুং খুদোংচাবা হেন্না ফংহনবনি। শহর অদুগী অপুনবা ওইনা থবক তৌনবা স্মার্ত সিতীশিংদা ইন্তিগ্রেতেদ কম্মন সেন্তরশিং লিংখৎকনি। মফম অদুদগী থবক খুদিংমক য়েংশিনগনি। মখোয় অদু শহরশিংগী থৱায়গুম্বনি।

মরূপশিং, মিশন অসিগী মখাদা খনগৎলবা শহর ১০০গী মনুংদা শহর ১১দা ইন্তিগ্রেতেদ কমান্দ এন্দ কন্ত্রোল সেন্তরশিং থবক তৌবা হৌরে। মথং থা খরগী মনুংদা শহর ৫০দা মসিগী থবক লোইশিন্নবা কন্না হোৎনরি। কন্না হোৎনবা অসিগী মহৈ ফংবা হৌরে। মসিগী খুদোংচাবা অসি গুজরাতকী রাজকোত শহরদা ফংহনবদগী অহোংবা কয়া লাক্লে, হৌখিবা থা ৬ অসিদা মীহাৎ–মীপুনগী থবকশিং হন্থরে। সি সি তি ভিগী মতেংনা য়েংবদগী অমোৎপা লংথোকপা অমসুং মৈ থাবগী থবক হন্থরে।

মসিনা মরম ওইদুনা ভোপালদা প্রোপরতী তেক্স খোমগৎপা হেনগৎলে। অহমেদবাদতা বি এস তি এস কোরিদোরশিং অমসুং বসশিংদা ৱাই ফাই লেম্না ফংহনবদগী মী থোরকপগী চাং ৱাংলে। বিসাখাপত্তনমদা বসশিং সি সি তি ভি অমসুং জি পি এসগী খুৎথাংদা খোঙ্গুল লিরে। পুনেদা মফম ১২৫দা ইমরজেন্সী কোল বেলশিং থম্লে অমসুং বতম অমা হেক নম্বগা খ্বাইদগী নকপা পুলিস স্তেসনশিংদা পাউ য়ৌহনগনি। ঙসিদি অসিগুম্বা সিস্তেম কয়া থবক হৌরে। স্মার্ত সিতী মিশনগী মখাদা অসিগুম্বা খুদোংচাবশিং আগ্রা, কানপুর, ইলহাবাদ, অলিগর, বনারসী,ঝান্সি, বরৈলী, সহারনপুর, মোরাদবাদ অমসুং ঐখোয়গী শহর লখনৌগী মীয়াম্না ফংলগনি।

ইনাওশিং অমসুং ইচলশিং,

ঐখোয়গী মিশন “ত্রান্সফোরমিং লেন্দস্কেপ ওফ আর্বান ইন্দিয়া” অসিগা শহর অসিগা নক্নবা মরি লৈনৈ। লখনৌ শহর অসি শহরগী পুন্সিগী অনৌবা মাইকৈ অমা তাক্লম্বা অতল বিহারী ভাজপেয়ীগী থবক মফম্নি। মফম অসি মতম শাংনা মহাক্কী পর্লিয়ামেন্তরী কন্সতিতুয়েন্সী ওইখি অমসুং লৈবাক অসিগী হান্নগী প্রধান মন্ত্রী অসিনা ঐখোয়দা ইথিল কয়া পীখি। হৌজিক অতলজীগী হকচাংগী ফিবম ফৎত্রে অমসুং লৈবাক অসিনা মহাক্কী হকচাংগী ফিবম ফগৎনবা থৌনিজরি। অদুবু অতলজীনা হৌদোক্লম্বা প্রোজেক্ত অসি অৱাংবা থাক অমদা পুখৎনবা ঐখোয়গী সরকার অমসুং ভারত মচা ক্রোর কয়ানা কন্না হোৎনরি।

মরূপশিং, অমরোমদা, অতলজীনা লখনৌ অসি শহরগী পুন্সি অওনবা পুরক্নবা লেবোরেতোরী অমা ওইনা শেমগৎলমখি। ঙসিদি লৈকং থোংশিং, বাইও তেক্নোলোজী পার্ক, সাইন্তিফিক কনভেন্সন সেন্তরশিং লৈরে অমসুং লম্বীশিংনা লখনৌগী অকোয়বদা লৈবা খুঙ্গং লিশিং অমরোম শম্নহল্লে। ময়াম অসি মহাক্না লখনৌগী এম পি অমা ওইরম্বগী মঙলান অদুগী মহৈনি। হৌজিক লৈবাক অসিগী শহর কয়াদা মেত্রো রেল চেল্লে অমসুং লৈবাক অসিগী শহর কয়াদসু অথুবা মতমদা থবক হৌরগনি। লখনৌগী মেত্রো পাকথোক চাউথোকপগী থবকসু পায়খৎলি। মসিগী সিস্তেম অসি লৈবাক অসিদা অহানবা ওইনা দিল্লীদা পায়খৎলি, অতলজীনা পায়খৎলম্বা থবক অসিনা শহরগী চৎথোক–চৎশিনগী থবক্তদা য়াম্না চাউনা অহোংবা পুরকলে। ঙসিদি দিল্লী মেত্রোগী মাইপাকপা অসি লৈবাক শীনবা থুংনা শন্দোক্লে।

মরূপশিং, অতলজীনা হায়রমখি, অরিবা শেমগৎতনা অনৌবা অমত্তা ফংবা ঙম্লোই। মসি মহাক্না অনৌবা অমসুং অরিবা লখনৌগী মতাংদা হায়রম্বনি। ঙসিদি মসিনা অমরুত অমসুং স্মার্ত সিতী মিশনগী ইথিল অমা ওইরে অমসুং মসিগী মতাংদা অতলজীগী মিং য়াওরি অমসুং অমরুতগী অশাংবা অসি অতল মিশন ফোর রিজুবেনেসন এন্দ আর্বান ত্রান্সফোর্মেসন হায়বনি।

মসিগী ৱাখল্লোন অসিগা লোয়ননা, শহর কয়াগী অরিবা মওংশিং নৌনা শেমগৎলে। হায়রিবা শহরশিং অসিদা সিৱরেজ, থক্নবা ঈশিং, লম্বী মৈগী ফিবম ফগৎহল্লে অমসুং পাৎশিং, পুখ্রিশিং অমসুং পার্কশিং ফজহন্নবা থবক পায়খৎলি।

মরূপশিং, শহরশিংদা অহাংবদা লৈরিবা য়ুম লৈজদবা ঐগী ইনাওশিং অমসুং ইচলশিংগী য়ুম শানবা স্কিম অসি অতলজীনা হৌদোক্লম্বনি। ২০০১দা অতলজীনা বালমিকী–অম্বেদকর হাওজিং স্কিম লৈবাক শীনবা থুংনা হৌদোকখি। ২০২২দা ভারতনা নীংতম্বা চহি ৭৫ সুবা মতমদা মী খুদিংমক্কী য়ুম অমমম লৈহন্নবা সরকারনা হোৎনরি অমসুং লৈবাক অসিদা মশাগী য়ুম লৈতবা ইমুং অমত্তা লৈহল্লোই। মসিগী পান্দম অসি থম্লগা হৌখিবা চহি ৩ অসিদা শহরশিংদা য়ুম লাখ ৫৪ হেন্না শানবা অয়াবা পীখ্রে। শহরশিং খক নত্তনা, খুঙ্গংশিংদসু য়ুম ক্রোর অমা হেন্না শাখ্রে। ঙসিদি য়ুম শারবশিংদা অমাংশঙ অমা অমসুং সৌভাগ্য স্কিমগী মখাদা মৈ ফংহল্লে। উজ্জ্বালা স্কিমগী মখাদা মখোয়দা এল ই দি বল্বশিং ফংহল্লে। হায়রিবা য়ুমশিং অসি শাবগী শেন্দোই সরকারনা পীরি।

মরূপশিং,

য়ুম লৈজদবশিংদা য়ুম পীরিবা অসি লৈনবা খক নত্তে, মসি নুপীদা শক্তি পীবগী খুদম অমনি। প্রধান মন্ত্রীগী হাওজিং স্কিমগী মখাদা য়ুম পীরিবা ইমাশিং অমসুং ইচলশিংগী মিংদা পানবনি। স্কিম অসিগী মখাদা, য়ুম লাখ ৮৭ হেন্না নুপীগী মিংদা নৎত্রগা অপুনবা ওইনা রেজিস্তার তৌরি। মসি নৎত্রবদি ঐখোয়গী করম্বা মখলগী খুন্নাইগী মওং লৈগনি। নহাক্না ইমুং অমদা চৎপা মতমদা, কনাগী মিংদা লম অদু পল্লমগনি? মদু মপুরোইবগী, মপাগী নৎত্রগা মচানুপাগী মিংদা লৈরমগনি। য়ুম অদু কনাগী মিংদা লৈরমগনি? য়ুম অদু মপুরোইবা নৎত্রগা মচানুপাগী মিংদা লৈরমগনি। কনাগী মিংদা গারিমচা লৈবগে? মদু মচানুপাগী মিংদা লৈরমগনি। নুপীগী মিংদা করিগুম্বা অমত্তা লৈরম্লোই। মসিগী ফিবম অসি ঐখোয়না হোংদোক্লে। হৌজিক লৈরক ফাওদুনা চৎলিবশিংনা য়ুম অসিগী মপু কনানো হায়না হংলরোই। মখোয়না হংলগনি – য়ুম অসি করম্বা নুপীগীনো? খুন্নাই অসিদা হোংলক্লিবা ৱাখল্লোন অসি মসিনি।

লায়রবশিংগী পুন্সি মহিং ফগৎনবা স্কিম অসি য়াম্না য়াংনা পায়খৎপগীদমক ঐনা য়োগীজী অমসুং মহাক্কী সরকারবু থাগৎলি। মসিগী মথক্তদা ঐনা মমাংগী সরকারগী থবক মওংশিংসু খঙলে। ২০১৪গী মতুংগী ফিবম অমসুং য়োগীজীগী সরকার শেমদ্রিঙৈগী মমাং অদু ঐ ফজনা খঙলে অমসুং মদু ঐনা মীয়ামদা নীংশিংহল্লি। লায়রবশিংগী য়ুম শানবা ঐখোয়না হঞ্জিন হঞ্জিন চিথি ইখি অমসুং ঐনা মখোয়গা উনবা মতমদা থবক খর পায়খৎপীয়ু হায়জখি, ঐখোয় ফন্দ পীনবা থৌরাং তৌরি হায়খি। ঐখোয়না মখোয়দা তকশিনখি। অদুবু সরকার অমসুং মীয়াম হান্নগী ফিবমদা লৈখি। মখোয়গী থবক তৌবগী মওং অদু হোংনবা হোৎনখিদে। মখোয়না পায়খৎপা থবক অমদি লৈখি, মদুদি মখোয়গী য়ুমশিং নৌনা শেমজিনবা অমসুং লৈতেংবনি। অদুগা লায়রশিংগী য়ুম্না মখোয়গী থবক্কী অহাংবা মতমদা শাগনি।

ঙসিদি ঐনা নখোয়দা অতোপ্পা ৱারী অমগা লিবা পাম্মি। মরমদি উত্তর প্রদেশনা ঐহাকপু পর্লিয়ামেন্তগী মেম্বর অমা ওইনা খল্লকপনা ঐনা ৱাফম অসি নখোয়গা শরুক য়ামিন্নবা পাম্বনি অমসুং মসি নখোয়গী হকনি। ঐঙোন্দা ইরাল শিবা নখোয় তারম্লগনি। মরাল অদুদি ঐ খোঙলোই অমনি অমসুং চৌকিদার নত্তে হায়বনি।

উত্তর প্রদেশকী ঐগী মরূপশিং, ঐগী ইরৈচাশিং, মরাল শিরকখিবা অদু মনা অমনি হায়না খল্লি অমসুং ঐ খোঙলোই অমা ওইবদা চাউথোকচবা পোকই। ঐ লৈবাক অসিগী লায়রবশিংগী খোঙলোই অমনি। ঐ থবক কন্না শুরিবা শিন্মীশিংগী খোঙলোই অমনি। ঐ নৈহৎপীরবা মমা খুদিংমক্কী খোঙলোইনি অমসুং মফম অসিদা চাইদুনা লৈরিবা উ–শিং খোমজিনবদা অমসুং লৈরংদা ষন্থী অকংবা থাবদা মীৎ অমসুং মহাক্কী হকচাং শোক্লবা মমাশিংগী খোঙলোইনি। ঐনা মমা খুদিংমক্কী লৈরং অনৌবা শীনবা পাম্মি। ইকং নৎত্রগা ইচাউনা মরম ওইদুনা মহৈ–মরোং মাং–তাকহল্লবা লৌমী খুদিংমক্কী খোঙলোইনি ঐ। ঐ অদুগুম্বা লৌমী অদুগী শেন–থুমগী খোঙলোইনি। য়াম্না ইংবা কারগিল অমসুং সিয়াচিনগুম্বা মফমশিংদা অমসুং অশাবা মফম জাইসলমের অমসুং কচ্ছদা ঐখোয়বু ঙাকশেন্নবা থৱায় থানবা থৌরাং তৌদুনা লৈরিবা ঐখোয়গী থৌনা ফরবা লান্মীশিংগী মরূপ অমনি ঐ। ঐ ইমুং অমগী মীওই অমা নাবদা লায়েংনবা লৌ–ইঙ্খোল য়েন্থোকপদগী অৱাবা নংলিবা লায়রবা ইমুং অমগী মরূপ অমনি। হায়রিবা ইমুংশিং অদুগী ঐনা খল্লি অমসুং মখোয়গীদমক থবক তৌরি।

লায়রবা খুদিংমক্কী য়ুম অমমম ফংহন্নবা থবক কন্না পায়খৎলিবা মরূপ অমনি ঐ। মরম অদুনা মখোয়গী য়ুমদা অমাংশঙ অমা লৈরগনি, মরম অদুনা মখোয়না অফবা থক্নবা ঈশিং অমসুং মৈ ফংলগনি; মরম অদুনা মখোয় অনা–অয়েক য়াউরকপা মতমদা অহোংবা মমলদা হিদাক অমসুং লায়েংবা ফংলগনি অমসুং মখোয়গী মচাশিং লাইরিক তম্বা ফংলগনি। ঐখোয়গী নহাশিং স্কিল, থবক অমসুং মশানা মশাবু থবক পীজনবা পায়খৎলিবা থবকশিংগী মরূপনি ঐ। শেন্দল তোংবা ঐখোয়গী মীয়াম্না এরোপ্লেন তোংদুনা চৎপা ঐ উবা পাম্মি।

মরূপ অমা ওইবা ফংবদা ঐ চাউথোকচৈ অমসুং ঐ লায়রবা মমা অমগী মচানুপা অমা ওইবগী চাউথোকচৈ। লায়রবনা মরম ওইদুনা ঐঙোন্দা পুকচেল শেংবা অমসুং থৌনা পীখিবনি। লায়রবগী চৈনা অদুনা ঐঙোন্দা ঐগী পুন্সি মতৌ করম্না হিংগদগে হায়বা তাকখি। লায়রবনা থোকহনবা অৱাবশিং ঐ খঙলে, ঐনা লায়রবশিংগী অৱাবা অমসুং নুংঙাইতবশিং য়াম্না নক্না উরে। ঐখোয়গী লৈবাক্তা হায়নবা অমা লৈরি – মখোঙদা অনাবা লৈত্রিবা মীওই অমনা অতোপ্পগী অনাবা খঙদে। চৈনা ফংলবশিং খক্তনা অনাবগী চৈনা খঙই অমসুং মদু কোকহন্নবগী পাম্বৈ মখোয়না খঙই।

মসিগী মমাংদা ঐ চা য়োনবা অমনি হায়না নোক্নরম্মি, চা য়োনবা অমনা মতৌ করম্না লৈবাক অমগী মীনাই মকোক ওইগদগে হায়না ঐঙোন্দা হংলম্মি। অদুবু হায়রিবা মীওইশিং অদুনা মসি খঙলোই। মদুগী ৱারেপতি লৈবাক অসিগী মীওই ক্রোর ১২৫ লেপকদবনি।

মরূপশিং,

মসিগী মরি অসি নোক্নরিবা মীওইশিং অমসুং মখোয়গী ৱাখল্লোন অদুনা ঙসি ঐখোয়গী শহরশিংদা মায়োক্নরিবা অৱাবশিংগী হৌরকফম্নি অমসুং মখোয়গী ৱাখলগী মমি অদু তারি। স্মার্ত সিতীশিং শেমগৎনবা অমসুং মদুগী থবক তৌনবা ঐখোয়দা অপাম্বা লৈ। ঙসিদি লৈনুং তৌথোক্তুনা অরিবা শহরশিং ফংবা ঙম্লে, মখোয় ঐখোয়গী অহল–লমনশিংনা মতৌ করম্না শহর অমা দিজাইন তৌরম্বগে হায়বগী খুদমশিংনি। চহি কয়াগী মমাংদা মখোয়না মতৌ করম্না মতম অদুগী স্মার্ত সিতীশিং দিজাইন তৌরম্বগে হায়বসি অঙকপা অমনি। অদুবু, চুম্না খনবা হৈতবা অমসুং রাজনীতিগী অচেৎপা ফিরেপ লৈতবদগী মাংজবা কয়া থোকহল্লে।

নীংতম্বা ফংলবা মতুংদা ঐখোয়না লৈবাক অসি শেমগৎনবা দাইত্ব লৌবা মতমদা মীশিং য়াম্বগী খুদোংচাদবা লৈরমদে। হায়রিবা মতম অদুদা তুংগী য়েংলগা ঐখোয়গী শহরশিং শেমগৎনবগী খুদোংচাবা কয়া ফংলম্মি। মতম অদুদা অসিগুম্বা মখলগী খুদোংচাদবশিং থেংনরমদে। মতম অদুদা ঐখোয়না নীংথিনা থৌরাং তৌদুনা থবক পায়খৎলম্লবদি ঙসি ঐখোয়না থেংনরিবা অৱাবশিং অসি থেংনরোই। শহরশিং মওং মরিল তাদনা শেমগৎলমখি অমসুং মীয়াম্না মখোয়না অপাম্বা মওংদা পাকথোক–চাউথোক্লম্মি। মতম অদুদা ঐ শেল পায়রবদি ঐনা অপাম্বা তৌবা য়াই হায়বগী ফিবমদা লৈখি। অমরোমদা, কন্ত্রীদকী জঙ্গল শেমগৎপা য়ারম্মি। ঙসিদি ভারতকী শহর খুদিংমক মসিগী ৱাফম অসিগী মতাংদা ভাব তারে।

মরূপশিং, মীরোল অমা মসিগী খুদোংচাদবশিং অসি থেংনদুনা হৌখ্রে অমসুং করিগুম্বা মতমদা মীরোল ২/৩ ফাওবা অসিগুম্বা ফিবম অসিদা হৌখ্রে অমসুং লাক্কদৌরিবা মীরোলশিংসু মখা তানা অসিগুম্বা অৱাবশিং থেংনগনি। অখঙ–অহৈশিংনা ভারত অসি চাদা ৭.৫গী চাংদা হেনগৎলক্লি হায়রি, মথং চহিশিংদনা হেন্না চাউখৎলক্কনি। অসিগুম্বা ফিবম অসিদা, লৈবাক অসিগী জি দি পিদা চাদা ৬৫ পুথোক্লিবা মফম অমা করিগুম্বা মওং মরিল তাদনা থম্লবদি করম্বা মখলগী খুদোংচাদবশিং থেংনগনি। মরম অদুনা মসিগী খুদোংচাবশিং অসি ফংহনবা হায়বসি য়াম্না তঙাইফদবনি।

কোকথক্তা মৈ তারা পুবা, খোঙবালগী অমোৎপা ঈশিং কামথোরকপা, পুং কয়া লম্বী চিনবা, হায়রিবা মওং মরিল তাদবা থবকশিং অসিনা ২১শুবা চহিচাদা ভারতকী মশক তাকপা য়ারোই। মসি মাংলোমদা থম্লগা, চহি ৩গী মমাংদা মসিগী মিশন অসি য়ুম্ফম থোনখিবনি। মিশন অসিগীদমক শহর ১০০ খনগৎলে অমসুং লুপা ক্রোর লাখ ২ হেন্না থাদুনা হায়রিবা শহরশিং অসি শেমগৎনবা ৱারেপ লৌরে। শহর অদুগী অনৌবা বোদী অমা লৈরগনি, শহরশিংগী অনৌবা কলচর অমসুং লুবা –নানবগী পুন্সি লৈরগনি। অসিগুম্বা মখলগী অহিংবা শহরশিং শেমগৎনবা ঐখোয়না থবক য়াংনা পায়খৎলি।

মরূপশিং, স্মার্ত সিতী অসি সুপ্নগী সরকারগী প্রোজেক্ত অমা নত্তে, মসি পান্দম অমনি। মসি অওনবা পুরক্নবগী পান্দমনি, লৈবাক অসি অওনবা পুরক্নবগী মিশন্নি। মসিগী মিশন অসিনা অনৌবা ভারত অমদা ঐখোয়গী শহরশিংনা মায়োক্নগদৌরবা খুদোংচাদবশিং থেংননবা শেম শাগনি। মসিনা ২১সুবা চহিচাগী ভারত্তা মালেমগী থাক্তা লৈবা ইন্তিলিজেন্ত আর্বান সেন্তরশিং শেমগৎকনি। শহরশিং অসিনা খজিক্তং ফগৎপদগী য়াম্না ফগৎপা পাম্লিবা লৈবাক অসিগী নহারোলশিংগী অপাম্বগী মহুৎ শীনগনি। মীরোল অসিগীদমক খুদোংচাবশিং শেমগৎপা অসি ঐখোয়গী থৌদাংনি অমসুং ঐখোয়গী থাজবনি। পোৎ খুদিংমক ঐখোয়না ‘ই’ শিংদা য়ুম্ফম ওইগদবনি অমসুং হায়রিবা ‘ই ‘ ৫ অদুদি, ইজ ওফ লিভিং, ইজুকেসন, ইমপ্লোইমেন্ত, ইকনোমী অমসুং ইন্তর্তেনমেন্তনি।

ঐনা নখোয়গুম্বা শহরশিংগী মেয়োরশিং নৎত্রগা ম্যুনিসিপাল কম্মিস্নরশিং নৎত্রগা সি ই ওশিংগা ৱারী শানবা মতমদা ঐগী অনৌবা অশা লাকখি। স্মার্ত সিতী মিশন অসি মীয়াম্না শরুক য়াবা, মীয়ামগী অপাম্বা অমসুং মীয়ামগী থৌদাংদা য়ুম্ফম ওইবনি। হায়রিবা শহরশিং অসিদা লৈরিবা মীয়াম্না মখোয়গী শহরশিংদা করম্বা মখলগী স্কিমশিং পায়খৎকদগে হায়বা লেপচবনি। মখোয়গী ৱাখল্লোনশিং অদুনা স্মার্ত সিতীশিং অদুগী পায়খৎকদবা থবকশিং য়ুম্ফম ওইবনি অমসুং ঙসিদি শহরশিং অদুদা য়াম্না য়াংনা থবকশিং পায়খৎলে ।

অনৌবা খুদোংচাবশিং ফংহনবতা নত্তনা ফন্দিংগী অতোপ্পা খুদোংচাবশিংসু শেমগৎপদা ঐ য়াম্না হরাওই। পুনে, হায়দ্রবাদ অমসুং ইন্দোরনা ম্যুনিসিপাল বোন্দশিংগী খুৎথাংদা লুপা ক্রোর ৫০০ হেন্না খোমগৎলে। মসিগী থবক অসি য়াম্না থুনা লখনৌ অমসুং গাজিয়াবাদতা হৌরগনি। হায়রিবা ম্যুনিসিপাল বোন্দশিং অসিনা সরকারদা শেন–থুমগী পোৎলম হন্থহনগনি। অসিগুম্বা থবকশিং অসি পায়খৎনবা ঐনা অতোপ্পা শহরশিংদা অপীল তৌরি।

মরূপশিং, হায়রিবা শহরশিং অসিগী থবকশিংগা তেক্নোলোজীগা শম্নহনদুনা মীয়াম হিংবদা লাইহনগনি। মীচম মীয়াম পরেং লেপহন্দনা মতৌ করম্না খুদোংচাবশিং অসি ওনলাইনদা ফংহনগদগে হায়না নহাক্না খল্লমগনি। হায়রিবা কিউশিং অদু শেঞ্জা–থুমজাগী হৌরকফম্নি। হৌজিক নহাক্না বিল থিবা দরকার ওইরবা, থবক অমগী দরকার ওইরবা, নহাক্না সর্তিফিকেৎ নৎত্রগা স্কোলর্শিপ, পেন্সন, প্রোবিদেন্ত ফন্দগী দরকার ওইরবদি মদু হৌজিক ওনলাইন্দা ফংলে। মসিনা তাক্লিবদি হৌজিক লৈবাক ঙাকপা অসি স্মার্ত ওইরে অরোনবা লৈত্রে হায়বনি অমসুং মসিনা শেঞ্জা–থুমজা ফনা য়াম্না হন্থরে ।

মরূপশিং, স্মার্ত, সেক্যুর, স্তেনেবল অমসুং অরোনবা লৈতবা থবকশিংনা লৈবাক অসিগী মীওই ক্রোর কয়াগী পুন্সিদা অহোংবা পুরক্লে। পায়খৎলিবা থৌওংশিং অসি মীয়ামগীনি। মসি অৱাংবা অমসুং অনেম্বা নৎত্রগা কাংলুপ নৎত্রগা ফুরুপ্তা য়ুম্ফম ওইবা নত্তে। চাউখৎপা হায়বসি মসিগী ফোরমুলানি। মসিদা অরোনবা অমসুং অচান–মীরাই নাইবা লৈতে। হায়রিবা পুম্নমক অসি মীয়াম, রাজ্যশিং অমসুং লোকেল বোদীশিংনা শরুক য়ারবা মতমদা ওইথোক্কনি। মসি সব কা সাথ সব কা বিকাস হায়বগী ৱাখল্লোন্নি। অপুনবা ভারতকী ৱাখল্লোন অসিনা অনৌবা ভারত অমগী মঙলান অদু মঙফাওনগনি। ঙসি ঐনা য়োগীজীগা ৱারী শানবদা মহাক্না অনৌবা ৱাফম অমা হৌদোরকখি। করিগুম্বা ঐখোয়গী নাগরিকশিং অসিনা থাজরবদি অঙকপা ফল ফংগদবা থবক ময়াম অমা পায়খৎপা য়াই। অদুবু মমাংগী রাজনীতি তৌবশিংনা মীখল মতম খক্তদা মীয়াম নীংশিংলকপা অসি লাইবক থিবনি।

করিগুম্বা ঐখোয়না পুকচেল শেংনা মীয়ামগী শক্তি অমসুং অফবশিং নৈনবা ঙম্লবদি করম্বা মখলগী অঙকপা ফল ফংগনি। য়োগীজীনা ঐঙোন্দা হায়খি। ঐনা ওগস্ত ১৫দা রেদ ফোর্ত্তগী অপীল তৌবা মতমদা নখোয়না ফজনা খঙলমগনি অমসুং করিগীদমক নখোয়না চাক থোংনবা গ্যাস সবসিদী পীনবা খন্নগদৌরিবনো। করিগীদমক মীয়াম্না চাক থোংনবা গ্যাস সবসিদী ফংগদৌরিবনো? ঐখোয়গী লৈবাক অসিদা সবসিদী অসি রাজনীতিগা য়াম্না নক্নবা মরি লৈনবনা কনা অমতনা মসিগী মরমদা ৱারী শানীংদে। অদুবু ঐখোয়দি ৱারী শারি। লৈবাক অসিনা চাউথোকচগদবনি মদুদি চাউরাক্না ইমুং ক্রোর ১.২৫ চাক থোংনবা গ্যাস সবসিদী লৌদ্রে।

রেলৱেনা মসিগী রিজার্বেসন ফোর্মদা কলম অমা হাপ্লে। মসি এদভর্তাইজ নত্তে অমসুং ঐখোয়না খঙলে মদুদি অহলশিং রেল তোংবা মতমদা কন্সেসন ফংলি হায়বা। মসি ইনকমগা মরি লৈনদে, মসি নহাক্না চহি অসুক সুরবা মতমদা মসিগী কান্নবা ফংগনি। রেলৱেনা ইরি মদুদি করিগুম্বা নহাক্না শেন পায়রবদি অমসুং নহাক্না সবসিদী লৌবা পামদ্রবদি চানবীদুনা মসিগী কলম অসিদা তিক তৌবীয়ু। অতেনবা মতম অসিগী মনুংদা মীওই লাখ ৪০ হেনবনা মখোয়গী রেলৱেগী সবসিদী থাদোকপা অসিদা ঐ হরাওই। মসি অপীকপা থবক অমা নত্তে।

ঙসি য়োগীজীনা ঐঙোন্দা হায়খি মদুদি মমাংদা য়ু পীগী খুঙ্গংশিংদা য়ুম ফংখ্রবা মীওইশিংগী শেন–থূমগী ফিবম ফগৎলে। মখোয় খরদি মখোয়গী মচাশিং শহরদা শেন তানবা লৈখিবদগী মখোয়সু শহরদা লৈখ্রে। য়ু পী সরকারনা মীয়ামদা অপীল তৌরি মদুদি সরকারনা য়ুম শাবীখ্রবশিংনা করিগুম্বা মখোয়গী ফিবম ফগৎলক্লবদি চানবীদুনা য়ুম অদু সরকারদা অমুক পীবীয়ু। য়ুম অদু ঐখোয়না অতোপ্পা লায়রবা মীওই অমদা পীবা পাম্মি। য়ু পীগী খুঙ্গংশিংগী মীওই ৪৬,০০০না মখোয়গী য়ুমশিং অমুক পীথোরক্লে হায়বা তাবা অসিদা ঐ য়াম্না হরাওই। মসি অপীকপা থবক অমা নত্তে।

মতম অমদা ঐখোয়গী লৈবাক্তা ৱাখল্লোন অমা লৈরম্মি মদুদি মী খুদিংমক হুরানবা ঙাক্তনি অমসুং মখোয় খুদিংমক হুরানগনি হায়বা। অসুম্না খনবগী মথৌ তাদ্রে, ঐখোয়না ঐখোয়গী লৈবাক্কী নাগরিকশিং থাজগদবনি অমসুং লৈবাক ঙাকপদা ঐখোয়গী মীয়াম্না ঐখোয়দগী হেন্না হৈবা হেল্লি হায়বসি ঐখোয়না থাজগদবনি।

হৌজক লৈবাক অসিদা অহোংবা পুরক্নবা মীয়াম মাংদা থোরক্লে অমসুং পুকচেল শেংবগী ফিবম
অমা শেমগৎলে। মমাংগী মতমদা চাংদম্নবদা হৌজিক মীয়াম মশিং য়াম্না তেক্স পীরে ।করিগুম্বা মীয়াম্না শহরদা খুদোংচাবশিং ফংলবদি মখোয় তেক্স থিংনীংগনি। মখোয় হৌজিক থাজরে মদুদি শিকি অমা ফাওবা ফজনা শীজিন্নগনি হায়বা, শেনফম অদু রাজনীতি তৌবশিংগী য়ুম শাবদা শীজিন্নরোই হায়বগী থাজবা মখোয়দা লৈরে।

মসিগীদমক ঐনা নখোয়বু অমুক হন্না থাগৎলি। নখোয়না পাংথোকখিবা থবকশিংগীদমক। মথংদা শহর কয়া লাক্কনি হায়না ঐনা থাজৈ, মীয়াম থোরক্কনি হায়না থাজৈ। অনৌবা শহরশিংগী তৌবা ঙম্বা কয়া লৈ অমসুং নহাক্না লুচীংবা ওইবা দরকার ওই। নহাক্না শহর অমগী কমিস্নর নৎত্রগা মেয়োর নৎত্রগা সি ই ও অমা ওইবা য়াই, চানবীদুনা পান্দম অমা থম্বীয়ু। নখোয়দা মনা পীনবা ঐনা ঙাইদুনা লৈরি। ঐনা নখোয়বু ইকায়খুম্নবা উৎনবগী খুদোংচাবা অমা পীবীয়ু। নখোয়দা ইকায়খুম্নবা উৎনবগী খুদোংচাবা অমা পীনবা ঐনা ভারতকী মীয়ামদা হায়জরি।

মাইপাক্লবশিং অমসুং মাইপাক্নবা কন্না হোৎনরিবশিংদা ঐনা অমুক হন্না ঐগী য়াইফ–পাউজেল পীজরি।

ময়াম্বু ঙমখৈ লৈতনা থাগৎচরি।