ভারতকী প্রধানমন্ত্রী

মরূপশিং,

ভাগবান শিবনা চহি অমগী মনুংদা পামজবা থা শ্রাবন য়ৌরক্লে। লৈবাক অসিগী মফম কয়াদগী ভাগবান শিব নীংজবশিংনা মখোয়গী কাভাদগা লোয়ননা থোরক্লে। মতৌ অসুম্না হৌখিবা কুম্মৈ অসি দিৱালীদা লোইশিনগনি।

মরূপশিং, কুম্মৈশিংগী মথক্তা, লৈবাক অসিগী মফম অয়াম্বা নোং ফজনা তারে। নোং ফজনা তাবা অসি লৌউ–শিংউবগীদমক অফবা অমনি অমসুং শেল–থুমগী ফিবম অফবা অমনি অদুবু লৈবাক অসিগী মফম খরাদা নোং কন্না চুবনা মীয়ামদা অৱাবা মায়োক্নরে। অসিগুম্বা ফিবম অসিদা সরকার অসি ৱারী। অৱাবা তারবা মীয়াম কন্নবা হোৎনবদা সরকারনা রাজ্য সরকারশিংগা লোয়ননা থবক কন্না পায়খৎলি।

মরূপশিং,

ঐনা থাজৈ মদুদি, মীয়ামগী খনবা সরকার অমা ওইনা, মীচম মীয়ামগী পুন্সি হিংবদা লাইহনবা অমসুং অৱাবা তাহন্দবা অসি ঐখোয়গী মরুওইবা পান্দম্নি। মসি ঐখোয়গী অমত্তা ঙাইরবা পান্দম্নি। মসিগী পান্দম অসিগা লোয়ননা ঐখোয় হৌখিবা চহি ৪ অসি মাংলোমদা চংশিল্লক্লি। ঙসি লখনৌগী হোলদা ময়াম পুল্লিবা অসি মসিগী শরুক অমনি। শহরগী পুন্সি নুংঙাইনবা অমসুং খুদোংচাবা কয়া ফংহন্নবা থৌরম অমা ঙরাং ঐমা শরুক য়াবগী খুদোংচাবা অমা ফংখ্রে। ঐনা উত্তর প্রদেশকী শহরশিংদা প্রোজেক্ত কয়া পায়খৎনবা উরেপ–উয়ুং তম্বগী খুদোংচাবা ফংখ্রে অমসুং লায়রবা য়ুম লৈজদ্রবা ইনাওশিং অমসুং ইচলশিংদা য়ুমগী শো শীন্নখ্রে। ঐ ঙসিদি হরাওই মদুদি উত্তর প্রদেশগী কাচিন–কোয়না শীনবা থুংনা অওনবা পুরক্নবা ৱারেপ লৌদুনা মাংলোমদা চংশিল্লি।

মরূপশিং, মসি থা ৫গী মনুংদা লাখনৌদা ঐগী ইন্ত্রপ্রিনর মরূপশিংগা ঐগা উনবা অনিরক শুবনি। মমাংদা ঐ ফেব্রুৱারীদা য়ু পি ইনভেস্তর সম্মিৎ মনুংদা লখনৌদা লাক্লম্লে। মীফম অদুদা য়ু পীদা লুপা ক্রোর লাখ ৪.২৫ হেন্না থাদনবা ৱাফম অমা ঐনা হায়রমখি। মদুগী ৱারেপ অদু থবক ওইনা পাংথোক্নবা ঙসি অচৌবা থবক অমা পায়খৎপা হৌরকপদা ঐ হরাওই।

লুপা ক্রোর লিশিং ৬০গী শেনফম অসি অয়াম্বা নত্তে হায়না করিগীদমক সতিসজীনা হাথু—হাথু হায়রিবনো হায়বা ঐ খঙদে। মহাক্কী অচম্বা ৱাঙাং অসিনা লুপা ক্রোর লিশিং ৬০গী মগুন অসি হন্থরে। ঐহাক মতম শাংনা মুখ্য মন্ত্রী ওইরমখি অমসুং ঐ উদ্যোক্কী থবক তৌবা রাজ্য অমগা মরি লৈনরিবনি। লুপা ক্রোর লিশিং ৬০ অসি অপীকপা শেনফম অমা নত্তে। মসি অচৌবা শেনফম অমনি। মসিনা করি পাংথোকপা য়াবগে হায়বা নখোয়না খঙদ্রে।

মফম অসিদা লৈরিবা ওফিসরশিং ঐনা থাগৎনীংই। নখোয়না পাংথোক্লিবা থবক অসি ঐখোয়না খল্লুবগী ৱাংমদনি। শেন থাদবা মতমদা থেংনরিবা অৱাবশিং অদু ঐনা খঙই। শুপ্নগী কোর্ত্তা কেস অমা ফাইল তৌরকপদা নুমি ২–৩ থবক লেপকদৌরিবনি। করিগুম্বা ইনভাইরনমেন্তকী থৌমীশিংনা য়েৎলক্লবদি, মখোয়না থবক থীন্থহনগদৌরিবনি। করিগুম্বা মীদিয়াগী মীওই অমা য়ৌরক্লবদি, সতিসজী, সরকার ফাওবা প্রোজেক্ত অদু পায়বা কিরিবনি, মরমদি য়েক্নবশিংনা থৌরাং ফজনা তৌদুনা লৈরিবনি। অসিগুমবা ফিবম অসিদা থা ৫গী মনুংদা খুদোংচাদবা খুদিংমক কোকহনবা অমসুং লুপা ক্রোর লিশিং ৬০ থাদবা হায়বসি তশেংনা অখন্নবা মাইপাকপা অমনি। ঐনা মসি হায়রিবগী মরমদি ঐনা অসিগুম্বা অসি থেংনরকপদগীনি। দরকার ওইবা লম খুদিংমক পীরিবা লৌমীশিং ঐনা থাগৎলি। খ্বাইদগী পীকপা সরকারগী থবক তৌবশিং অমসুং পতৱারীশিংনা ফাওবা খুদোংচাদবশিং কোকহল্লি। মরম অদুনা মসিগী শেন থাদবা অসি ঙমহনবনি। লৈবাক অসি প্রধান মন্ত্রী নৎত্রগা পতৱারীশিংনা ঙাকপা ঙম্লোই। মরম অদুনা মাইপাক্না লুচীংদুনা মুখ্য মন্ত্রীদগী হৌরগা পতৱারী ফাউবনা চপ মান্নবা মাইকৈ অমদা অতেনবা মতমগী মনুংদা থবক তৌবা ঙমগনি।

অনিশুবদা, নখোয়না মী অমা খক্কী অপাম্বদা চৎতবগীদমক ঐ হরাওই। নহাক্না হীরম কয়াগী থৌশিলশিং শেম্লে অমসুং থবক খুদিংমক অরোনবা লৈহন্দ্রে। থবকশিং অসি কনাগুম্বা অমনা ওনলাইন্দা য়েংবা য়ারগনি অমসুং থবক অদুদা মীওই অদু য়াওরিবরা হায়না মশামক্না য়েংবা য়ারগনি। মসি থৌশিলনা মাংজিল থাদুনা পুরিবা রাজ্য অমনি। মসি উত্তর প্রদেশকী খ্বাইদগী চাউবা মাইপাকপনি। মরম অদুনা ঐনা হায়জরি মদুদি লুপা ক্রোর লিশিং ৬০ অসি অপীকপা শেনফম অমা নত্তে। মসি থোইদোক হেন্দোক্না মাইপাকপা অমনি।

হরাওনবগী অতোপ্পা মরম অমসু লৈরি। সাইকলগী ত্যুব অমা শীজিন্নবা য়াদ্রিফাওবা নুংশিৎ হাল্লসি। করিগুম্বা মতমদা ত্যুবকী কাচিন অমদা এয়র বব্বল অমা লৈবা য়াওই। মিতরগী মতুংইন্না নুংশিৎ য়াওফম থোকপা চাং য়ৌনা য়াওরে হায়রবসু এয়র বব্বল অদুনা মরম ওইদুনা সাইকল অদু থৌবা য়াদে। উত্তর প্রদেশকী মুখ্য মন্ত্রীনা রাজ্য অসিগী মফম খুদিংমক থোং মান্ননা চাউখৎনবা থবক পায়খৎলিবা অসিদা ঐ হরাওই। থোং মান্ননা চাউখৎহনবগী তঙাইফদবা অমা লৈ। রাজ্য অসিগী চাউখৎপা অসি শুপ্নগী নোইদা অমসুং গজিয়াবাদ খক্তগী ওইরবদি উত্তর প্রদেশকী দরাকর ওইরিবা অদু ফংবা ঙম্লোই। হায়রিবা ময়াম অসি য়েংলগা থবক পায়খৎলিবা অসি উবদা ঐ হরাওই।

মীওই খরনা মসি উরেপ–উয়ুং তম্বা থৌরম অমনি হায়রি। মহৌশানা মসি উরেপ–উয়ুং তম্বা থৌরম ওইরবসু ঐনা মসি রেকোর্দ থুগাইবা থৌরম অমনি হায়রি। তেনখ্রবা মতম অসিগী মনুংদা থবক তৌবা মওংদা অহোংবা পুরক্লে অমসুং থবক য়াংশিনহল্লে। উত্তর প্রদেশতা অসিগুম্বা থবক মমাংদা পাংথোকখ্রে হায়না কনাগুম্বা মীওই অমত্তনা হায়বা ঙম্লোই হায়না ঐনা থাজৈ। থবকশিং অসি উত্তর প্রদেশ লৈঙাক্কী অনৌবা থবক ঙাক্তনি। য়োগীজীগী লুচীং মখাদা সরকার অসিনা ইনভেস্ত্রশিংগা লেপ্তনা উনবা অমসুং শেল থাদরক্নবগী চপ চাবা ফিবম অমা শেমগৎপা অসিদা ঐ হরাওই। এম ও য়ু ত্রেক্কর নৎত্রগা নিভেস বনধুগুম্বা সিঙ্গল ৱিন্দো প্লেতফোর্মনা ক্লিয়রেন্স পীনবগী থবকশিংদা অহোংবা পুরকপদা নত্তনা য়ু পীদা ললোন ইতিক তৌনবগী খুদোংচাবা কয়া শেমগৎলে। মতম অমদা য়ু পিদা শেল থাদবা অসি অচৌবা শিংনবা অমনি হায়না খন্নরম্মি। হায়রিবা শিংনবশিং অদু হৌজিক খুদোংচাবা কয়া ওইরক্লে। খুদোংচাবশিং অদুদি থবক ফংবা, ললোন–ইতিক, অফবা লম্বী, মৈ মরাং কাইনা ফংবা, হৌজিক্কী অমসুং তুংগী অফবা ফিবমশিংনি। য়ু পিনা চংশিল্লিবা খোঙজেল অসিদা চৎলবদি য়াম্না থুনা য়ু পি অসি ত্রিলিয়ন দোল্লর ইকোনোমীগী থোংজিলদা লেপ্লরগনি। ঐগী উদ্যোক্কী মরুশিং ঐনা থাগৎলি অমসুং মখোয়দা ঐগী য়াইফ–পাউজেল পীজরি।

উদ্যোক্কী মীওইশিংগা পুন্না চৎমিন্নবদা ঐখোয় অকিবা লৈতে। উদ্যোকপতি অমগা ফোতো নম্মিন্নবদা পাখৎপা মীওই কয়া নহাক্না উরমগনি। অদুবু মখোয়গী ময়ুমশিংদা চৎতবা অমসুং মখোয়গী মমাংদা ৱাকৎ খোঙজং চংশিনদবা উদ্যোকপতি অমত্তা লৈরম্লোই। মফম অসিদা অমর সিংহজী লৈরি। মহাক্না ৱারী লোইনা লিগনি। অদুবু নহাক্কী ৱাখল অদুনা মকত্রবদি অমসুং পুকচেল শেংলবদি কনাগুম্বা অমগী মনাক্তা লেপ্পদা করিসু অকায়বা লৈতে। মহাত্মা গান্ধীগুম্বা অশেংবা থম্মোয় অমনা বিরলাগী ইমুংদা চৎপা অমসুং মখোয়গা লৈমিন্নবদা করিসু চিংনবা লৈখিদে। মহাক্কী ৱাখল শেংবা মরম্না বিরলাগী মনাক্তা লেপ্পদা করিসু চিংনদে। মীয়াম মমাংদদি উনদবা অদুবু লোন্না উনবশিং অদুদি লেপমিন্নবা কিগনি। লৌমী অমগী থবক, খুৎহৈবা অমগী, বেঙ্কর, সরকারগী থবক তৌবা মী অমসুং শিন্মী অমনা লৈবাক শেমগৎপা থৌদাং লৌরি, উদ্যোকপতি অমগী থবক কন্না সুবা অসিসু মরুওইবা অমনি। মখোয়বু ইকায়বা পীবা নৎত্রগা হুরালবা ওইনা উবা অসি অচুম্বা নত্তে। তশেংনা, অরানবা তৌবশিং লৈবাক অসিদগী তান্থোক্কদবনি নৎত্রগা কৈশুমশঙদা থমগদবনি। মমাংঙৈদদি থবক খুদিংমক মীওই খরাগী মরুম থুপ্লগা পাংথোকপনা থবক অমত্তা লৌখৎলমদে। কনানা কনাগা শম্নবগে হায়বা মীয়াম্না খঙনরে।

মরম অদুনা লৈবাক অসি মাংলোমদা চৎখৎনবা মীপুম খুদিংমক্কী মতেং দরকার ওই। ভারত মচা ক্রোর ১২৫ ইকায়খুম্নবা উৎপা হায়বসি ভারত মচা খুদিংমক্কী থৌদাংনি। ঙসি হৌদোক্লিবা প্রোজেক্তশিং অসিনা নহারোল লাখ ২ হেনবদা থবক ফংহনগনি অমসুং লৈকাইগী মীয়াম থবক ফংহন্নবা ফেক্তরীশিং লিংখৎকনি। লৌমী ওইগেরা, শিন্মী ওইগেরা নৎত্রগা নহারোল ওইগেরা মীপুম খুদিংমক কান্নবা ফংগনি।

মরূপশিং, য়ু পিগী মীওই ক্রোর ২২দা ঐনা ৱাশক্লি মদুদি মখোয়গী মীনুংশি অদু ঐনা শেন্দোইগা লোয়ননা শিংগনি। হায়রিবা প্রোজেক্তশিং পায়খৎলক্লিবা অসি ৱাশকশিং অদু ঙাক্নবগী মরুওইবা খোঙথাং অমনি। প্রোজেক্তশিং অসিনা য়ু পিগী শেন–থুম অমসুং উদ্যোক্কী লমদা থোং মান্নদবা লৈরিবশিং কোকহনবা ঙমগনি। থবকশিং অসি রাজ্য অসিগী অকক্নবা মফম খরা খক্তদা পায়খৎলোই। প্রোজেক্তশিং অদু নোইদা, গ্রেতর নোইদা, মেরুত, মুজাফরনাগর, ঝানসী, হরদোই, অমেথী, রাইবারেলী, জাওনপুর, মিরজাপুর অমসুং গোরখপুরদা পায়খৎকনি।

প্রোজেক্তশিং অসিনা দিজিতেল ইন্দিয়া অমসুং মেক ইন ইন্দিয়াগী থবকশিংদা অচৌবা কান্নবা পীগনি। য়ু পিগী দিজিতেল ইনফ্রাস্ত্রকচরশিং হায়বদি অয়াংবা ইন্তর্নেত নৎত্রগা ওপ্তিকেল ফাইবর নেতৱার্ক তিংবা নৎত্রগা আই তি সেন্তরশিং লিংখৎপা অসিনা য়ু পিদা অনৌবা মাইওন অমা পীগনি অমসুং রাজ্য অসিগী নহারোলশিংদা অনৌবা খুদোংচাবশিং ফংহনগনি। দিজিতাইজেসন তৌদুনা মীচম মীয়ামগী পুন্সি হিংবদা লাইহনবা হায়বসি সরকারগী অচৌবা থৌরাং অমনি। অচান–মীরাই নাইবগী থবক অমত্তা লৈতনবা থবক খুৎতৌ অমা শেমগৎপা ঐখোয়না পাম্মি। থবকশিং অদু য়াংনা অমসুং নাক–য়েৎ খঙনা পায়খৎকদবনি। লায়রবা অমসুং ইনাকখুনবা নৎত্রগা অৱাংবা নৎত্রগ অনেম্বা অনিগী মরক্তা খেন্নবা থম্লোইদবনি। সব কা সাথ সব কা বিকাস হায়বা অসিদা চপ মান্ননা মীৎয়েং য়েংগদবনি।

মরূপশিং,

থবকশিং য়াংনা অমসুং অরোনবা লৈতনা পাংথোকপদা দিজিতেল ইন্দিয়ানা মরুওইবা থৌদাং লৌরি। কম্মন সর্বিস সেন্তর লাখ ৩ হেনবনা ঐখোয়গী খুঙ্গংশিংগী পুন্সিদা অহোংবা পুরক্লে। খুঞ্জাশিংনা তিকেৎ কক্নবা, তেলিমেদিসিন, জন ঔশদী, আধার, মৈগী বিল থিবা অমসুং তেলিফোনগী বিল থিনবা সরকারগী ওফিসশিং নৎত্রগা অতৈ মফমশিংদা চৎপা মথৌ তাদ্রে। কম্মন সর্বিস সেন্তরশিং, মমল তিংদবা ৱাই ফাই অমসুং অহোংবা মোবাইল ইন্তর্নেতনা লায়রবশিং অমসুং খরা নুংঙাইবা ইমুংশিংগী পুন্সি হিংবদা লাইহল্লে।

মরূপশিং, আই তি সেক্তরনা চহি কয়া ঐখোয়গী পাঙ্গল ওইদুনা লাক্লি। ঙসিদি আই তি সেক্তর অসি থাক অমা য়ৌরে। মীওই লাখ ৪০ হেন্না মসিগী উদ্যোক অসিদা থবক তৌরি অদুবু মসি লৈবাক অসিগী অচৌবা শহরশিং অমসুং মেত্রোশিং খক্তদা খুদোংচাবা ফংলি। মসিগী থবকশিং অসি অপীকপা শহরশিং অমসুং খুঙ্গংশিংদসু য়ৌহন্নবা ঐখোয়গী সরকারনা থবক পায়খৎলি।

মরূপশিং,

সরকারনা নাইতোম থবক তৌবগী ৱাখল্লোন অদু লৈত্রে। সরকারগী স্কিমশিংগা থবক্কা হকথেংননা মরি লৈনৈ। দিজিতেল ইন্দিয়া অমসুং মেক ইন ইন্দিয়া অসি মসিগী খ্বাইদগী ফরবা খুদমনি। মোবাইল ফোনশিংগী মমল হন্থরকপগী মরমশিংগী মনুংদা দিজিতেল ত্রান্সসেক্সন হন্থরকপা অসিসু অমনি। হৌজিক ভারত্তা মোইবাইল ফোনশিং শারকপদগী মোবাইল ফোনশিংগী মমল হন্থরে। ঙসিদি লৈবাক অসিগী মালেমগী ওইনা মোবাইল ফোন শাফম অমা ওইরে। মালেমগী ওইনা মোবাইল শাবদা ঐখোয়না অনিশুবদা লৈরে অমসুং মসিগী অওনবা অসিদা য়ু পিনা মাংজিল থাবদা ঐ হরাওই। হৌজিক য়ু পিদা মোবাইল শাফম ফেক্তরী ৫০ হেন্না লৈরে। ইকুই কুইদনা য়ু পিদা মালেমগী খ্বাইদগী চাউবা মোবাইল ফোন শাফম অমা হাংদোক্লে। ঙসি হৌদোক্লিবা ফেক্তরীশিং অসিগী মরক্তা মোবাইল শাফম ফেক্তরীশিং য়াউরি।

মরূপশিং, হৌজিক ওইরবা ফিবম অসি তারক্নবা হৌখিবা চহি ৪ অসিদা সরকারনা ৱারেপ ময়াম অমা লৌদুনা লাক্লি।ৱারেপশিং অদুগী মনুংদা এফ দি আই, শেন থাদবা,পোৎ–চৈ শাবদা মতেং পীবা নৎত্রগা থবক পায়খৎপদা লাইহনবা য়াওরি। থবকশিং অসিনা উদ্যোকশিংগী থবকশিং লাইথোকহল্লি। জি এস তি অসি চহি কয়া পন্দুনা লাক্লি। হৌজিক মসিনা লৈবাক অসি তেক্সকী লাংদগী নান্থোক্লে। জি এস তিগী কান্নবা উদ্যোকশিংনা ফজনা ফংলে।

হৌখিবা চহি খরা অসিদা লৈবাক অসিদা মেন্যুফেকচরিং চাউখৎনবা মরুওইবা থবক কয়া পায়খৎলে। ভারত্তা শাবা পোৎলমশিং লৈনবা পায়খৎপা থৌশিলগী শরুক অমা ওইনা বিভাগশিং অমসুং ইন্সতিত্যুসনশিংনা লৈবাক মনুংদা শাবা পোৎলমশিং অমসুং থবক লৈনবা তকশিল্লি। মেক ইন ইন্দিয়া অসি য়োকখৎলে। মসিগী থবক অসিনা অপীকপা উদ্যোকশিংদা মতেং পাংলি। হৌখিবা অমা, হায়রিবা অহোংবশিং অসিগী কান্নবা য়ু পীনা অনিরক ফংখি, য়োগীজিগী মখাদা শেমখিবা থৌশিলশিং অমসুং মীহাৎ–মীপুনগী থবকশিং হন্থবনি। মরূপশিং, বি জে পি সরকার অসিনা অচুম্বা মীৎয়েংগা লোয়ননা খুদিংমক কোনশিনবা হায়বা অসিদা থবক পায়খৎলি।

মসিগী মফম অসিদগী ঐনা উদ্যোক্কী মীওইশিংদা থাজবা পীবা পাম্লি। মসি ঐগী ওইনা লমজেল হৌরকপদা ঙাইরি। চৎকদবা লম্বী য়াম্না শাংলি অমসুং থবকশিং থুনা পায়খৎপগী তঙাইফদবা লৈরি। নখোয় লৈবাক অসি শেমগৎপগী য়াম্না মরুওইবা য়ুনিৎ অমনি অমসুং নখোয়গী ৱারেপ অদুগা লৈবাক অসিগী নহারোল ক্রোর কয়াগী মঙলানগা মরি লৈনৈ। হায়রিবা মঙলানশিং অসি মঙফাওনহন্নবা অচৌবা ৱারেপশিং লৌনবা থৌনা পীনবা ঐখোয়গী ৱাখল অমসুং পাঙ্গল লৈরি।

ইনফ্রাস্ত্রকচরগা মরি লৈনবা ঐখোয়গী অচৌবা প্রোজেক্তশিং শেম শাদুনা লৈরবা মতমদা, লৈবাক অসিদা দিসইনভেসমেন্তগী থবক লাইহল্লগনি। পোৎ–চৈ পুথোক পুশিনগী খরচ হন্থরগনি। মথংগী মীরোলগী ইনফ্রাস্ত্রকচর অসি মীয়াম খক নত্তনা উদ্যোক্কী লমদসু কান্নবা ফংহল্লগনি।

মরূপশিং, আই তি, কঞ্জ্যুমর ইলেকত্রোনিক্স অমসুং ইলেকত্রোনিক্সগী পোৎ–চৈ শাবদা য়ু পীদা থবক পায়খৎনবগী খুদোংচাবা মরাং কাইনা লৈরি। তুংদা নৌনা ইনফ্রাস্ত্রকচর শেমগৎলকপা মতমদা এম এস এম ই সেক্তরসু কান্না ফংলগনি। হৌজিক কেস ওইনা ত্রান্সসেক্সন তৌরিবা এম এস এম ইশিংনা দিজিতেল ত্রান্সসেক্সন তৌনবা ঐনা অপিল তৌরি।

মরূপশিং,

তুংকোইনা চৎনগদবা চাউখৎ–থৌরাংগী থবকশিং অমসুং লেপ্তনা হোৎনবনা ভারত মচা ক্রোর ১২৫গী মঙলানশিং মঙফাওনবা ঙমগনি। মৈ ফজনা ফংহনবা অসি চাউখৎনবগী অচৌবা শরুক অমনি। অহোংবা মমলদা চাংনাইনা মৈ ফংহনবা অসি মীয়ামগী য়াম্না দরকার ওই। মৈ অসি লৌউ–শিংউ অমসুং উদ্যোক্কী য়াম্না মরুওইবা অমনি। মরম অদুনা সরকার অসিনা মৈদা অকনবা মীৎয়েং চংলি। ঙসিদি লৈবাক অসিনা মহৌশাগী ইনর্জীদগী গ্রিন ইনর্জীদা মীৎয়েং চংলি। মরুওইনা সরকার অসিনা সোলর ইনর্জীদা মীৎয়েং চংলি। ইন্তর্নেস্নেল সোলর এলাইন্স শেম্নবা ঐখোয়না পায়খৎলিবা থবকশিং মালেম্না শক খঙলে। য়ু পি অসি সোলর ইনর্জীগী মফম অমা ওইরক্লগনি। নুমিৎ খরনিগী মমাংদা মিরজাপুরদা অচৌবা সোলর প্লান্ত অমা হাংদোকখ্রে। ঙসি অতোপ্পা প্লান্ত অমগী উরেপ–উয়ুং তমখ্রে।

মরূপশিং, হৌজিক ভারত খক নত্তনা অফ্রিকা অমসুং চাউখৎলক্লিবা লৈবাকশিংদা সোলর তেক্নোলোজী অমসুং সোলর পম্পকুম্বা মেচিনশিং য়াম্না দরকার ওইরক্লি। ভারত্তা অশেংবা অমোৎপা লৈতবা ইনর্জী পুথোকপগী থবক্তা মাংজিল থানবা ঐনা ঐগী উদ্যোক্কী মরূপশিংদা তকশিল্লি।

মরূপশিং, মৈ পুথোকপা অমসুং য়ুমথোং খুদিংদা মৈ য়ৌহনবগী থবক য়াম্না য়াংনা পায়খৎলি। চহি মরিগী মনুংদা ঐখোয়গী মৈ ৱাৎপা অসি চাদা ৪.২ ওইরমবদগী হৌজিক চাদা ১দা হন্থরে। মতম অমদা ৱাথোক থোক্নবগী মরম ওইরম্বা কোয়লা অসি হৌজিক মরাং কাইনা পুথোক্লে। হৌজিক কোয়লা ৱাৎপনা মরম ওইদুনা পাৱর গ্রিদ থবক তৌদবা লৈত্রে। মরুওইনা মৈগী লমদা অওনবা কয়া পুরকপদগী লৈবাক অসিগী মীয়াম্না মৈ লিক্না শীজিন্নরে।

উদয় স্কিমনা দিস্ত্রিব্যুসন কম্পেনীশিংদা অনৌবা পুন্সি অমা পীরে। উজালা স্কিমগী মতেংদগী, এল ই দি লাইৎশিং শীজিন্নবদগী হৌখিবা চহি অহুম অসিদা মৈগী বিল হন্থদুনা মিদল ক্লাস ইমুংশিংগী অমসুং লম্বীদা মৈ থানবগী নাগরপালিকাশিংগী লুপা ক্রোর লিশিং ৫০গী শেনফম কল্লে। করিগুম্বা মোদীনা লুপা ক্রোর লিশিং ৫০গী কন্সেসন অমা লাউথোক্লবদি মদু লৈবাক পুংজাউ থিনগনি। মীয়াম্না ঙক্নগনি। অদুবু ঐখোয়না স্কিম অমা শেমদুনা মীয়ামগী লুপা ক্রোর লিশিং ৫০ কনবা ঙম্লে। লৈবাক অসিদা অওনবা পুরক্লি অমসুং ফজনা চাউখৎনবা অচুম্বা ৱাখলদা থবক তৌরি।

মরূপশিং, ঙসিদি মৈ অসি য়াম্না লাইনা ফংলে। ৱার্ল্দ বেঙ্ককী মৈ লাইনা ফংহনবগী রেঙ্কতা ভারত ৮২ সুবা মফমদা লৈরে। মসি য়াম্না ফগৎলবনি। হৌজিক খুঙ্গং খুদিংদা মৈ ফংহন্নবা থবক পায়খৎলি। মথং চহিগী মার্চ ফাওবগী মনুংদা লৈবাক অসিগী মফম খুদিং মৈ ফংহন্নবগী ঐখোয়গী পান্দম অদু ফংনবা ঐখোয় থবক কন্না পায়খৎলি।

মীওই খরনা ঐখোয়গী তুংদা ৱা ঙাংনবা মরম থিদুনা লৈবা অসিদা ঐ অঙকপা পোকই। করিগুম্বা ঐখোয়না থবক অমা পাংথোক্লে হায়বা মতমদা, মখোয়না থবক অদু তৌদে হায়গনি। ঐগী ক্রিতিক্সশিংদা ঐনা হায়বা পাম্মি মদুদি নখোয়না মোদীদা য়েৎনবা অচুম্বশিং খঙবা পাম্লবদি, চহি ৭০ হেন্না পৎতুনা লাক্লবা প্রোজেক্ত কয়া লৈরি। য়াম্না ফরে, লৈবাক অসিদা লেপ্তনা মৈ ফংহন্নবা পান্দম অদু ফংনবা ঐখোয় হোৎনরি। মরম অদুনা মৈ পুথোক–পুশিনগী নেতৱার্ক ফগৎহল্লে।

ঙসি শঙ্গারিবা ঘতামপুর–হাপুর ত্রান্সমিশন লাইন অসি থৌরাং অদুগী শরুক অমনি। মমাংগী সরকারশিংগী মতমদা অকায়–অতোই থোক্লম্বা ত্রান্সমিশনগী থবকশিং ফগৎহন্নবা য়োগীজিগী সরকার অসিনা থবক পায়খৎলি। মতম কয়াগী মমাংদগী লখনৌদগী ঐখোয়গী এম পি লৈরক্লি। ঐখোয়গী ইকায়খুম্নরবা হান্নগী প্রধান মন্ত্রী অতল বিহারী ভাজপেয়ীনা হায়খি, মহাক্না চাউখৎপা ভারত অমা উবা পাম্মি, ইনাকখুনবশিং অমসুং লায়রবশিংগী মরক্তা নৎত্রগা শিন্মীশিং অমসুং মপুগী মরক্তা নৎত্রগা লৈঙাক অমসুং নাগরিক্কী মরক্তা খেন্নবা লৈতবা।

অতলজীনা মসিগী মঙ মঙবদা নত্তনা, মহাক্না মসি ফংনবা থৌরাং ফজনা তৌরমখি। মহাক্না হায়রমখি, লম্বীশিং অসি খুবাক ময়িগুম্বনি। মসিগী ৱাখল্লোন অসিনা মরম ওইদুনা, মহাক্না ইনফ্রাস্ত্রকচরদা মীৎয়েং থমখি। মসিগী ৱাখল অসি ২১সুবা চহিচাগী দরকার মতুংইন্না মাংলোমদা পুখৎনবা ঐখোয়না কন্না হোৎনরি।

বুনদেলখন্দা ঐখোয়না লৈবাক অসিগী খ্বাইদগী চাউবা এক্সপ্রেসৱে, পুরবাঞ্চল এক্সপ্রেস অমসুং দিফেন্স ইন্দস্ত্রিয়েল কোরিদোর শেমগৎনবা থবক পায়খৎলি। ভারত মচা ক্রোর ১২৫ অসিদা মালেমগী খ্বাইগী ফবা খুদোংচাবশিং ফংহন্নবা সরকার অসিনা অঙম্বা থাক্তা থবক পায়খৎলি। ঐখোয়গী অমত্তা ঙাইরবা পান্দমদি মীওই ক্রোর কয়াগী মঙলান মঙফাওনহনবা অমসুং মীয়াম শরুক য়াদুনা অনৌবা ভারত অমা শেমগৎপনি। উত্তর প্রদেশ অমসুং ভারতকীদমক নখোয়না থবক পাংথোকপগীদমক ঐনা থম্মোয়দগী তশেংনা থাগৎচরি। থা ১ নৎত্রগা ২গী মমাংদা ঐ মুম্বাইদা চৎখি অমসুং উদ্যোক্কী মীওইশিংদা চেবাউ পীখি। মহৌশানা মীয়াম্না মখোয়দা চেবাউ পীখি অদুবু করিগুম্বা অমত্তা হায়নবগী থৌনা লৈখিদে। মখোয়না অচৌবা ললোন–ইতিক্কী থবক তৌবদগী ইনাক য়াম্না খুল্লে হায়না ঐনা মখোয়দা হায়খ্রে অদুবু ভারত্তা লৌউ–শিংউবদা কোর্পোরেতনা শেন থাদরিবা অসি চাদা ১ খক্তনি। মসি মালেমগী লৈবাকশিংদগী খ্বাইদগী য়ামদবনি। কোর্পোরেতশিং মতৌ করম্না লৌউ–শিংউবদা শেন থাদহনগদগে হায়বগী থৌরাং তৌবদা ঐ নোংমা তঙ্খাই অমা মতম হৌখি। মসি চাদা ১ অসি ত্রেক্তর শাবশিং অমসুং য়ুরিয়া শুংবশিংগীনি। উদ্যোক্কী মীওইশিংনা মতৌ করম্না লৌমীশিংগী মতেং পাংগদগে অমসুং লৌউ–শিংউবদা মতৌ করম্না তেক্নোলোজী শীজিন্নগদগে হায়বা অসিদা থবক পায়খৎহন্নিংই। পোৎথমফমশিং, কোল্দ স্তোরেজ, পেকেৎ তৌবা অসি লৌমীশিংদা য়াম্না কান্নগনি। হিরম অসিদা থবক পায়খৎনবা ঐনা উদ্যোক্কী মীওইশিংদা তকশিল্লি। কোক চুংশিন্নবা কাংবু অমা শেম্নবা অমসুং হীরম কয়াদা ৱা খন্ননবা ঐনা মখোয়দা তকশিনখি। লৌউ–শিংউবদা কোর্পোরেতনা শেন হেন্না থাদরিবমখৈ লৌমীশিংনা পোৎথোক পুথোকপা হেনগৎকনি। করিগুম্বা মতমদা মহৈ–মরোং লোক্লবা মতুংদা মাংবা য়াওই। ঙাইহাক্কী মমাংদা সুরীজীনা হায়খিবা, লৈবাক অসিদা হৌরিবা উহৈশিংদগী হৈ মহি পুথোকপা য়াই হায়না। মসিগী থবক অসিনা লৌমীশিংদা য়াম্না কান্নগনি। হৈ মহি থকপশিং মশা ফগনি অমসুং মশা ফবা নাগরিকশিংনা মপাঙ্গল কনবা লৈবাক অমা শেমগৎকনি।

উদ্যোকশিংগা খুঙ্গংশিংগা শম্নবা ঐনা পাম্মি। মসিগী অপীকপা থবকশিং অসি মতৌ করম্না খুঙ্গংগী পুন্সিগা শম্নহনবা য়াগদগে হায়বা ৱাখল খনবা ঐখোয় মথৌ তারি। ঐখোয়না লুপা ক্রোর লিশিং ৬০গী থবক পায়খৎপা হৌরে। লুপা ক্রোর লিশিং ৫০গী থবক লোইশিল্লকপগী ফিবমদা লৈরে হায়না য়োগীজিনা হায়রি। মসি অচৌবা মাইপাকপা অমনি হায়না ঐনা থাজৈ। ঐনা নখোয় ময়াম অমুক্কা হন্না থাগৎপা পাম্মি।

ময়াম্বু থাগৎচরি! উত্তর প্রদেশকী এম পি অমা ওইনা, রাজ্য অসিগী চাউখৎপদা ঐ হরাওই। য়ু পীগী মীয়ামগী য়াইফনবা থবক পায়খৎপা অসি ঐগী থৌদাংনি। মরম অদুনা ঐনা য়ু পিদা অনিরক, মঙারক নৎত্রগা ১৫রক লাক্লে। ঐ নখোয়গী সেবাগীদমক লৈরিবনি।

থাগৎচরি।