ভারতকী প্রধানমন্ত্রী

মন্ত্রী পরিশদকী ঐহাক্কী মরূপ শ্রীমান জে.পি. নদ্দাজী, অশ্বিনী চৌবেজী, অনুপ্রিয়া পতেলজী অমদি ফম্বাকথক্তা লেংশিংনবীরিবা শ্রীমান রনদীপ গুলেরিয়াজী, শ্রী আই. এস. ঝা, দাক্তর রাজেশ শর্ম অমদি শক্নাইরবা পুম্নমক।

দিল্লীদা লৈরিবা মীয়ামগী অনা লায়েংনবগীদমক, দিল্লীদা লাক্লিবা মীপুম খুদিংমক্কীদমক, ময়াম পুম্নমক্কীদমক ঙসি অসি অখন্নবা নুমীৎনি। অমদি ঐহাক্না নুংঙাইবা ফাওই মরমদি ঙসি লাইরবশিং, মীচম মীয়ামশিং, লাৱর মিদল ক্লাস, মিদল ক্লাসকী মীওইশিংনা মখোয়গী পুন্সিগী অৱাবা তাঙ্ককশিংদগী লান্থোক্নবা, অনা অয়েক থেংনবদা মতেং ওইনবা অনৌবা য়ুম্বী ফংলে। ঙাইহাক্কী মমাংদা মফম অসিদা চাউরাক্না লুপা কোতি ১৭০০ কী অনৌবা প্রোজেক্ত শঙ্গাখ্রে অমদি উরেপ উয়ুং তমখ্রে। মসিনা দিল্লীদা লৈরিবা লৈবাক অসিগী অচৌবা হোস্পিতাল অনি– এইম্স অমসুং সফদরজং হোস্পিতালদা চাউরাক্না ফমুং ১৮০০গী অহেনবা কেপাসিতীগী লম্বী অমা হাংদোক্লে।

মরূপশিং, এইম্সতা হেঙ্গৎলক্লিবা প্রেসর অদু য়েংলগা দিল্লীদা লৈরিবা মসিগী কেম্পস পুম্নমক্কী কেপাসিতী হেঙ্গৎহনবগী থবক চত্থরি। ঙসি লুপা কোতি চাহুম হেন্না চংনা শাগদৌরিবা নেস্নেল সেন্তর ফোর এজিংসু উরেপ উয়ুং তম্লে। সেন্তর অসিদা ফমুং ২০০ লৈগনি। লাক্কদৌরিবা চহি অমমখায় অনিগী মনুংদা মপুং ফানা লোইশিন্নবা হোৎনগনি। মসিদা সেনিয়র সিতিজনশিংগীদমক খুদোংচাবা কয়া অমা লৈগনি। মসিদা নত্তনা সফদরজং হোস্পিতালদসু লুপা কোতি ১৩০০ হেন্না চাদিং তৌদুনা হোস্পিতালগী কেপাসিতীশিং মোর্দনাইজ তৌবগী থবক চত্থরি। মসিগী মখাদা মফম অসিদা ইমর্জেন্সী ব্লোক অমদা সুপর স্পেসিলিতী সর্বিস লৈবাক মীয়ামদা কত্থোকখ্রে। শুপ্নগী মেদিকেল ইমর্জেন্সীশিং খক্তগী ওইবা ফমুং ৫০০গী কেপাসিতীগা লোইননা সফদরজং হোস্পিতাল লৈবাক অসিগী খ্বাইদগী চাউবা ইমর্জেন্সী কেয়র হোস্পিতাল ওইরগনি।

মরূপশিং, ঙসি শঙ্গাখিবা অমদি উরেপ উয়ুং তমখিবা প্রোজেক্ত মঙাগী মনুংদা পাৱর গ্রিদ বিশ্রাম সাদন অমসু য়াওরি। মসিনা নারিবা মীওইশিং অদু খক্তা নত্তনা মখোয়বু শেন্নরিবশিং অদুদসু য়াম্না চাউনা অৱা অনা কোক্লগনি।

মরূপশিং, মতম চানা লায়েংবনা পুন্সি কনবদা মরুওইবা থৌদাং লৌরি। অদুবু দিল্লীগী ত্রাফিকনা মসিদা অয়েৎ–অপন পীরি। মমাংদা এইম্সকী তোঙান তোঙানবা সেন্তর অমসুং কেম্পসকী মরক্তা অনাবা মীওইশিং অমসুং দাক্তরশিংগী চত্থোক–চৎশিন্দা য়াম্না চাউনা খুদোং চাদবা মায়োক্নরম্মি। এইম্সকী মেন বিলদিং অমসুং জয় প্রকাশ নরায়ন ত্রোমা সেন্তরগী মরক্তা লৈরম্বা সমস্য অদুগী পাম্বৈ ফংলে। চাউরাক্না কিলোমিতর ১ শাংবা লৈনুং–শুরুং শঙ্গাবগী খুদোংচাবসু ঙাইহাক্কী মমাংদা ফংজখি। তনেল অসিনা অনাবা মীওইশিং, মখোয়গী মরি–মতাশিং, দাক্তরশিং অমসুং মথৌ তাবা হিদাকশিং খুৎলায়শিং অয়েৎ–অপন য়াওদনা চত্থোক–চৎশিন ঙমহল্লে।

মরূপশিং, ভারতকুম্বা পাক চাউখ্রবা চাউখৎলক্লিবা লৈবাক্কীদমক মমল অহোংবা, লাইনা ফংবা, সেক্যুর ওইবা অমসুং মোর্দন ওইবা হকশেলগী খুদোংচাবশিং ফংহনবা অসি কয়া য়াম্না চাউবা থৌদাংনো হায়বা অদু ময়াম পুম্নমক্না খঙবীরিবা অদুনি। হৌখিবা চহি মরি অসিদা পব্লিক হেল্থ কেয়রদা লৈবাক অসিনা অনৌবা লম্বী অমদা চংশিল্লি। রাজ্য সরকারশিংগা লোয়ননা কেন্দ্র সরকারনা লৈবাক পুম্বদা হকশেলগা মরি লৈনবা মোর্দন ইনফ্রাস্ত্রকচর লিংখৎলি। মসি সরকারনা লেপ্তনা হোৎনরিবা অদুগী মহৈনি। ঙসি লৈবাক অসিদা হোস্পিতালশিংদা অঙাং উনবা হেঙ্গৎলক্লিবা, মীরোনবী নুপীশিং অমসুং পোকপদা ঙাইরিবা অঙাংশিংগী ফিভম চাং নাইনা য়েংশিনবা, তিকা থাবদা অনৌবা ভেক্সিন মঙা হাপচিন্দুনা মমা অমসুং অঙাং শিবগী চাং হন্থহল্লে। হোৎনরিবশিং অসিদা ইন্তর্নেস্নেল  এজেন্সীশিংনসু মতেং পাংলি।

মরূপশিং, অফবা হেল্থকেয়রগী খুদোংচাবশিং তয়র ২ অমদি তায়র ৩গী শহরশিংদা শন্দোকহন্নবা সরকারনা হোৎনরি। মসিগীদমক সরকারনা মায়কৈ অনিদা থবক পায়খৎলি। অহানবদা হৌজিক লৈরিবা হোস্পিতাল অসিদা অহেনবা খুদোংচাবা পীরি অমদি অনিশুবদা লৈবাক্কী মনুং হুঞ্জিনবা লমদমশিংদা হকশেলগী খুদোংচাবশিং য়ৌহনবগী থবক চত্থরি। 

মরূপশিং, নীং তম্লবা মতুং চহি ৭০ অসিদা এপ্রুব তৌখিবা অমদি শাখিবা এইম্স মশিংদগী চহি মরি অসিগী মনুংদা এপ্রুব তৌখিবা মশিংনা হেল্লি। লৈবাক অসিদা অনৌবা এইম্স ১৩ লাওথোকখ্রে মদুগী মনুংদা নিপালদি শেমগৎ শাগৎপা হৌখ্রে। মসিগী মথক্তা লৈবাক পুম্বদা লৈরিবা মেদিকেল কোলেজ ১৫দা সুপর স্পেসিয়েলিতী হোস্পিতাল শেমগৎপগী থবক চত্থরি।

মরূপশিং, অনৌবা ভারতকীদমক খ্বাইদগী ফবা অমদি মতিক চাবা, ফমুং য়াম্না লৈবা, অফবা ইনফ্রাস্ত্রকচর অমদি দাক্তর অমসুং মহাক্কী তীম লৈবা হোস্পিতাল শেমগৎলি। পান্দম অসি ফংনবগীদমক মেদিকেল এজুকেসন্দসু অনৌবা খুদোংচাবশিং শেমগৎলি। ঐখোয়গী সরকার অসিনা জিলা ৫৮দা লৈরিবা হোস্পিতালশিংবু মেদিকেল কোলেজকী থাক্তা অপগ্রেদ তৌনবা থবক পায়খৎলি। হন্দক্কী বজেৎতা সরকারনা অনৌবা মেদিকেল কোলেজ ২৪ শানবা লাওথোকখি। লোকসভা সিত অহুমদা য়ামদ্রবদা মেদিকেল কোলেজ অমমম থম্নবা সরকারনা হোৎনরি। হৌখিবা চহি মরি অসিদা লৈবাক পুম্বদা চাউরাক্না মেদিকেলগী অন্দর গ্রেজুয়েৎ নত্রগা পোস্ত গ্রেজুয়েৎকী অনৌবা সিত লিশিং ২৫ হাপচিল্লে। এদমিসনগী প্রোসেস্তসু হেন্না ময়েক শেংহন্নবা থবক সরকারনা পায়খৎলি।

মরূপশিং, সরকার অসিগী ভিজন অসি হোস্পিতাল, অনা–অয়েক অমদি হিদাক লাংথক অমসুং মোর্দন কেপাসিতী ফংহনবা অদু খক্তা নত্তে। শেল য়াম্না চংদনা মীপুম খুদিংমকপু লায়েংবা ফংহনবা, মীচম মীয়াম্বু অনা অয়েক থোকহল্লিবা মরমশিং অদু মুত্থৎনবা হোৎনবনি। ৱাখল্লোন অসিগা লোয়ননা নেস্নেল হেল্থ পোলিসী হৌদোক্লে। ঐখোয়গী সরকার অসিনা হেল্থ সর্বিস অসি হেল্থ মিনিস্ত্রীগী মপান্দা শন্দোকখিনবা হোৎনরি। ঐখোয়গী হেল্থকী ভিজনগা লোয়ননা ঙসিদি খুঙ্গং চাউখৎ–থৌরাংগী মন্ত্রালয়সু শম্নহল্লে। নুপী অমসুং অঙাংগী দিবেলপমেন্ত চাউখৎ–থৌরাংগী মন্ত্রালয়সু মসিগা শম্নহল্লে।

নেস্নেল হেল্থ প্রোতেক্সন স্কিম নত্রগা আয়ুশ্মান ভারতসু মায়কৈ অসোমদা মরুওইবা অমা ওইরি। স্কিম অসিগী মখাদা লৈবাক্কী মফম পুম্বদা চাউরাক্না লাখ অমা মখায় হায়বদি লৈবাক অসিগী অচৌবা পঞ্চায়ৎ খুদিংগী ময়ায়দা হেল্থ & ৱেলনেস সেন্তর লিংখৎপগী থবক চত্থরি। তুংদা সেন্তরশিং অসিমক্তদা লাইনা খঙদোক্নবা চাংয়েং তৌবা অমসুং লায়েংবগী অনৌবা খুদোংচাবশিং ফংহল্লগনি। অরুবা লাইনা নারকপা মতমদা লাইরবা অমসুং লাৱর মিদল ক্লাসকী মীয়াম্না অফবা মখলগী লায়েং অমসুং লুপা লাখ মঙা ফাওবা লেম্না লায়েংনবা থবক চত্থরি। স্কিম অসিনা রাজ্য অয়াম্বা শম্নহন্নবা হোৎনরি। প্রাইবেৎ হোস্পিতালগা মরি লৈনবা মীওইশিংগসু ৱারী শানরি। তোঙান তোঙানবা ৱাফমশিংদা স্তেক হোল্দরশিংগা য়ানাবা পুরক্লে অমদি অথুবা মতমগী মনুংদা মসিনা মালেম অসিগী খ্বাইদগী চাউবা হেল্থ ইন্সুরেন্স স্কিম মালেমদা লাক্লগনি।

মরূপশিং, হৌখিবা চহি মরি অসিদা এফোর্দেবল হেল্থ কেয়রগী মখাদা চত্থরিবা স্কিমশিংনা মীচম মীয়ামদা কয়া য়াম্না কান্নবা ফংলবগে হায়বদু খঙনবা থা অসি হৌরকপদা ঐহাক্না লৈবাক পুম্বদা লৈরিবা কান্নবা ফংলবা মীওইশিংগা ৱারী শান্নখি। চাউরাক্না সেন্তর লাখ অহুমদগী মীওই লাখ কুনথ্রা–নিফুনা ঐগী মাংদা লেপখি। সরকার অসিনা চংদবা য়াদ্রবা হিদাক চাউরাক্না ১১০০গী মমল হন্থহল্লে। মসিনা মরম ওইরগা মীয়াম্না হিদাক লৈবদা তৌরম্বা চাদিং অদু চাউরাক্না লুপা কোতি লিশিং ১০ হেন্না কনবা ঙমহল্লে। চহি অমদা লুপা কোতি লিশিং ১০গী সেভিং– মদুসু স্কিম অমগী মহৈ। লৈবাক্কী মফম খুদিংদা জন–ঔশধি কেন্দ্র ৩,৬০০ হেন্না হাংদোক্লে। কেন্দ্রশিং অসিদা হিদাক মখল ৭০০ হেন্না অমদি সর্জরীগী পোৎলম চামগা য়াঙ্খৈ হেন্না অহোংবা মমলদা ফংহল্লে। মসিগী মথক্তা ঙসিদি স্তেন্ত অমসুং নী ইমপ্লান্তকী মমল হন্থহন্দুনা লৈবাক্কী লাইরবা অমসুং মিদল ক্লাসকী মীওইশিংদা চাউরাক্না লুপা কোতি লিশিং মঙা কন্নবা ঙমহল্লে। লৈবাক অসিগী জিলা খুদিংদা দাইলাইসিস সেন্তর শেমগৎলে। মফম অসিদা লাইরবশিংবু লেম্না দাইলাইসিসকী খুদোংচাবা পীরি। হৌজিক ফাওবদা চাউরাক্না অনাবা লাখ অনি মখায়না মসিগী কান্নবা ফংখ্রে। হৌজিক্তি লাইরবশিংনা লেম্না দাইলাইসিস তৌবগী খুদোংচাবা ফংবা অসিনা দাইলাইসিসকী সেসন খুদিংদা চাউরাক্না লুপা ১৫০০দগী ২০০০ ফাওবা কনবা ঙমহল্লে। স্কিম অসিগী মখাদা দাইলাইসিস সেসন চাউরাক্না লাখ ২৫ লেম্না পাংথোকখ্রে।

মরূপশিং, লৈবাক অসিগী মীপুম খুদিংদা হেল্থ সর্বিস ফংহনবা অসি সরকার অসিগী পান্দম্নি অদুবু ময়ামগী মতেং য়াওদনা, অদোমগী মতেং য়াওদনা হায়বদি মেদিকেলগী অপুনবা তাইবংগী মতেং য়াওদনা মসি ওইথোক্লোই। ঙসি লৈবাক অসিনা ন্যু ইন্দিয়াগী ৱাশক অমগা লোয়ননা মাংলোমদা চংশিল্লিবা অসিদা হেল্থ সেক্তরগা মরি লৈনবা মীয়াম্নসু মখোয়গী ওইবা ৱাশক অমা লেপথোক্কদবনি। সরকারনা ২০২৫ ফাওবদা লৈবাক অসি তি বি লৈতবা লৈবাক অমা ওইনবা থবক তৌরি। তি বি নারবা মীওইশিংগী ন্যুত্রিসন অদু খঙলদুনা থা খুদিংগী মখোয়দা লুপা ৫০০গী শেলগী তেংবাং পীরি।

মরূপশিং, ঙসিদি পুকচেল শেংগী এনভাইরনমেন্ত অমা শেমগত্তুনা মী অয়াম্বনা লৈবাক শেমগৎপদা মখোয়না চাউনা থৌদাং লৌরি। মীয়ামদা মসিগী ৱাখল্লোন অসি লাক্লে মদুদি মখোয়না থিরিবা তেক্স অদুনা লৈবাক্কী য়াইফনবা থবক তৌরি। অমদি থাজবা অসিগী মহৈ অদু সমাজকী থাক খুদিংমক্তা ঐখোয়না উবা ফংলে। ঐহাক্না লাল কিলাদগী লৈবাক্কী মীয়ামদা হায়জখি মদুদি চাদিং তৌবা ঙম্বা মীওইশিংনা করিগীদমক গ্যাসকী সবসিদী লৌরিবনো, লৌবিরনু। ৱাফম অসি খক্তনি ঐহাক্না হায়খিবা। ঐহাক্কী ৱাফম অসিদা লৈবাক অসিগী ইমুং কোতি অমগা লাখ কুনমঙানা সবসিদী লৌবা তোকখি। ৱাফম অমসু ঐহাক হায়জগে, মতৌ অসুম্না হৌখিবা মতমদা রেলৱেগী খুত্থাংদা, অদোম্না খঙবীরিবা অদুনি, রেল তোংদুনা চৎলিবা সেনিয়র সিতিজনশিংনা সবসিদী ফংই কমিসন ফংই। অদুবু রেলৱেনা মখোয়গী ফোর্মদা অদোম্না অদোমগী সবসিদী থাদোকপা পামব্রা হায়না ইখি। অদোম্না খঙবদা অঙকপা ফাওগনি মদুদি রেলৱেগী রিজার্বেসনগী এপ্লিকেসন ফোর্মদা অদোম্না অদোমগী সেনিয়র সিতিজনগী বেনিফিৎ অদু থাদোকপা পামগদ্রা হায়না ইবা খক্তদা হৌখিবা থা নিপাল মাপলগী মনুংদা সেনিয়র সিতিজন পেসেঞ্জর লাক ৪২না মখোয়গী সবসিদীগী কান্নবা লৌখিদে। মতৌ অসুম্না ঐহাক্না লৈবাক অসিগী দাক্তরশিংগী মফমদা হায়জখি। ঐহাক্না হায়খি মদুদি থা অমগী মনুংদা অমুক্তং তাং ৯দা অদোমগী থোংজিন্দা লাকপা লায়রবা মীরোনবী নুপী অদু থমোয় শেংনা থা অমগী তারিক ৯দা লাইরবা মমা অদুগী মফমদা কত্থোকপীয়ু। লায়রবা নুপী অদুবু চেক তৌবিয়ু মহাক্না করি তৌগদগে হায়বদু লমজিং–লমতাকপিয়ু। অমদি ঐহাক্না নুংঙাইবা ফাওই মদুদি দাক্তর লিশিং কয়ানা য়াম্না পুকচেল শেংনা মাংলোমদা চংশিল্লকখি। প্রধান মন্ত্রী সুরক্ষিৎ মাত্রিত্ব অভিয়ানগী মখাদা হৌজিক ফাওবদা লৈবাক অসিদা মীরোনবী নুপী কোতি অমগা লাখ কুনমঙা হেন্না দাক্তরশিং অসিনা চেক তৌখ্রে। ঐহাক্না অভিয়ান অসিদা দাক্তর মরুপশিং অদুগী মতেংগীদমক, মেদিকেল প্রোফেসন খুদিংদা থবক তৌরিবা পুম্নমকপু থাগৎপা ফোংদোকচরি।

মরূপশিং, হকচাং ফবা ইমুং মনুংদগী হকচাং ফবা খুন্নাই অমদি হকচাং ফবা খুন্নাইদগী হকচাং ফবা লৈবাক অমা ওইরকই। ঐখোয় পুম্নমক্তা অখন্ননা অদোমদা লৈবাক অসিবু মশা মউ ফনা থম্নবা থৌদাং লৈরি। মরম অদুনা রাষ্ট্রপতিজীনসু অদোম্বু লৈবাক অমা শেমগৎপগী মরুওইবা মখোং অমনি হায়রি। ঙসি মফম অসিদা পাংথোক্লিবা থৌরম অসিদা ফংলিবা খুদোংচাবা অসিগীদমক ঐহাক্না দিল্লী অমদি লৈবাক পুম্বদা অমুক হন্না নুংঙাইবা ফোংদোকপগা লোয়ননা দিপার্তমেন্তকী মফমদসু নুংঙাইবা ফোংদোকচরি। মখোয়না অকক্নবা মতমগী মনুংদা থবক পুম্নমক মপুং ফানা লোয়শিন্নবা কন্না হোৎনখি। ঐহাক্না হায়জনীংবদি ঐখোয়না পাংথোকপা ঙমগদবা থবক অদু খক্তা খুৎনা লামগদবনি। ঐখোয় অহোংবা অমা পুরক্নবা ৱাশক পুদুনা লাক্লি অমদি ময়াম পুম্নমক্কা চৎমিন্ননবা লাক্লি। অদোমগা লোয়ননা অমদি অদোমগী মতেং লৌদুনা লৈবাক্কী আশা অমদি এস্পিরেসনবু মপুং ফাহন্নবা ৱাশক অমগা লোয়ননা চংশিল্লি। ঐহাক্কী মরূপশিং অদোম্নসু মতেং পাংলক্কনি হায়না ঐহাক্না থাজবা থম্লি।

হন্না হন্না থাগৎচরি।