ভারতকী প্রধানমন্ত্রী

প্রধান মন্ত্রী নরেন্দ্র মোদীনা লুচিংবা কেন্দ্রগী মন্ত্রীমন্দলনা অনৌবা সেন্ত্রেল সেক্তর স্কিম অমা অয়াবা পীখ্রে, পুৱারী ওইরবা ৱারেপ অসিনা ভারতকী লৌমীশিংদা শক্তি হেঙ্গৎহল্লগনি। মসি ঐখোয়গী লৈবাক অসিবু পীজ-পীথক্নবগীদমক অহিং নুংথিল নাইদনা থবক শুরিবা লৌমীশিংবু পেন্সন ফংহনগদবা অদুগুম্লবা স্কিম অমনি। নীংতম্বা ফংলবা মতুং অহানবা ওইনা লৌমীশিংগীদমক অসিগুম্বা মখলগী পেন্সন কোভরেজ অমদা মিৎয়েং থম্লি।

মসিনা অহানবা চহী অহুমদা অপীকপা অমসুং শোত্থরবা লৌমী কোতি ৫দা কান্নবা ফংহল্লগনি হায়না পানরি। কেন্দ্র সরকারনা স্কিম অসিগী মখাদা সোসিয়েল সেক্যুরিতী কোভর ফংহন্নবগীদমক চহী অহুমগী মতম অমগীদমক লুপা কোতি ১০৭৭৪.৫০ চাদিং তৌগনি। 

স্কিম অসিগী শক্তমশিং অদুদি:

লৈবাক্কী মফম খুদিংমক্তা স্মোল এন্দ মার্জিনেল ফার্মরস (এস.এম.এফ) পুম্নমক্কীদমক ভোলুন্তরী অমসুং কন্ত্রিব্যুতরী পেন্সন স্কিম।

চহী ৬০ চংলকপদা য়ামদ্রবদা লুপা ৩,০০০গী ফিক্স পেন্সন ফংহনবগা লোয়ননা চংলকপগী চহী ১৮দগী ৪০ ফাওবা ওইবা।

খুদম ওইনা, কান্নবা ফংগদবা লৌমী অমনা চহী ২৯গী চাংচৎতা চংলকপগী চহীদা থা খুদিংগী লুপা ১০০গী শেন্থাং পীগনি। কেন্দ্র সরকারনসু লৌমী অদুনা থাংলিবা শেনফম অদুগা চপ মান্নবা শেনফম অমা পেন্সন ফন্দা থাংগনি।

সব্সক্রাইবর অদুনা লৈখিদ্রবা মতুং, পেন্সন অদু লৌবা মতমদা এস.এম.এফ.কী কান্নবা ফংলিবা মীওই অদুগী নুপী নত্ত্রগা নুপা অদুনা ফেমিলী পেন্সন ওইনা কান্নবা ফংলিবা মীওই অদুনা ফংলম্বা শেনফম অদুগী চাদা ৫০ ফংগনি। কন্ত্রিব্যুসনগী মতমগী মনুংদা সব্সক্রাইবর অদুনা লৈখিদবা তারগদি মহাক্কী নুপী নত্ত্রগা নুপা অদুনা চাং নাইনা কন্ত্রিব্যুৎ তৌদুনা স্কিম অদু মখা চত্থনবা ওপ্সন লৈগনি।

লৌমীশিংগীদমক স্কিমশিং অমসুং চাউখৎ থৌরাংগী মরক্তা থাক মান্নহনবা:

স্কিম অসিগী পুক্নিং চিংশিন্নীংঙাই ওইবা শক্তম অমদি লৌমীশিংনা স্কিম অসিদা মহাক্কী থাগী শেন্থাং অদু প্রধান মন্ত্রী কিসান সম্মান নিধী স্কিমগী কান্নবা ফংলিবা অদুদগী হুনবা য়াগনি। অমরোমদা, লৌমী অমনা মহাক্কী থাগী শেন্থাং অদু MeitYকী মখাদা কমন সর্বিস সেন্তরশিংগী থোংদা রেজিস্তার তৌবা য়াগনি।    

মরুওইবা ৱাশকশিং পাংথোকপা, লৌউ–শিংউবগী সেক্তরদা শক্তি শিন্নবা:

নীংতম্বা ফংলবা মতুং চহী হুম্ফুতরা ফাওবা লৌমীশিংগীদমক অসিগুম্বা কোভরেজ অমত্তা খনখিবা লৈখিদ্রি। ২০১৯গী পর্লিয়ামেন্ত মীখলগী মনুংদা প্রধান মন্ত্রী নরেন্দ্র মোদীনা অহানবা ওইনা অসিগুম্বা মখলগী ৱাখল্লোন হৌদোকখি, মদু ভারতকী মফম পুম্নমক্তা তাবা ফংলি। বি.জে.পি.গী মেনিফেস্তোদা অসিগুম্লবা থৌরাং অমা হাপখি অমদি অনৌবা সরকার শেম্লবা মতুং অহানবা মন্ত্রীমন্দলগী মীফমদা মসি থবক ওইনা পাংথোকলে।