ভারতকী প্রধানমন্ত্রী

ঙসি প্রধান মন্ত্রী শ্রী নরেন্দ্র মোদীনা বিসকেক্ত এস.সি.ও সম্মিৎকী নাকলদা ইরানগী রাষ্ট্রপতি দোক্তর মসৌদ পেজেসকিয়ানগা লোয়ননা লৈবাক অনিগী মীফম অমা পাংথোকখ্রে।

লুচিংবা অনিনা লৈবাক অনিগী মরীশিংগী মরমদা খন্নখ্রে। হন্দক ৱেষ্ট এসিয়াদা ওইরক্লিবা মুক্নবা অসিগী মতাংদা মখোয়না খন্নখি অমসুং ওইরক্লিবা ফিবম অসিদা মখোয়গী মীৎয়েংশিং ফোঙদোক্নখি। লমদম অসিদা মুক্নবা হেনগৎলকপদা প্রধান মন্ত্রীনা নুংনাংবা ফোঙদোকখি অমসুং ৱারি শানবা অমসুং কুতনিতিগী খুৎথাংদা য়ানদবা খুদিংমক ৱারোইশিন পুরক্নবা ভারতকী লেংদবা ফিরেপ অমুক হন্না থমখি।

লমদম অসিদা মতম শাংনা শান্তি অমসুং তুংদু-লৈতাবা পুরক্নবা মখা তানা থবকশিং পায়খৎপগী দরকার ওইবা অদু প্রধান মন্ত্রীনা অমুক হন্না পনখি। অথিংবা লৈতনা জহাজ হোনবা অমসুং ললোন-ইতিক পাংথোকপা য়াহন্নবা তকশিল্লদুনা, ললোন-ইতিক্কী জহাজ হোনবা অমসুং হিরোয়শিং য়াওনা, মীচমশিং অমসুং মীয়ামগী ইনফ্রাষ্ট্রকচরশিংদা ফিবম অমদা হেক্ত মাঙহল্লোইদবনি হায়না মহাক্না তকশিনখি।

বিক্স অমসুং এস.সি.ও য়াওনা মালেমগী লুপশিংদা ইরানগা লোয়ননা নকশিন্ননা থবক তৌনবা ভারতনা থৌরাং তৌদুনা লৈরি হায়না অমুক হন্না ফোঙদোকখি, ব্রিক্স মীফমদা রাষ্ট্রপতি পেজেসকিয়ান ভারত্ত তরাম্না ওক্নবা প্রধান মন্ত্রীনা ফোঙদোকখি।

***