ভারতকী প্রধানমন্ত্রী

প্রধান মন্ত্রী শ্রী নরেন্দ্রা মোদীনা ঙসি ওরিশা রাজ্যদা ২০১৯গী মে থাগী তাং ৩দা লাকখিবা সাইক্লোন ফোনীনা মাংহন তাকহনখ্রবশিং নোংথক্তগী য়েংশিনখ্রে। প্রধান মন্ত্রীনা নোংথক্তগী পিপিলী, পুরী, কোনার্ক, নিমপারা অমসুং ভুবনেশ্বরগী ফিভম য়েংশিনখি। নোংথক্তগী য়েংশিনখিবা অদুদা প্রধান মন্ত্রীগা লোয়ননা রাজ্য অসিগী রাজ্যপাল প্রোফেসর গনেশী লাল, মুখ্য মন্ত্রী নবীন পতনায়ক অমদি পেত্রোলিয়ম অমসুং নেচরেল গ্যাসকী কেবিনেৎ মিনিস্তর শ্রী ধর্মেন্দ্র প্রধানসু শরুক য়াখি।

নোংথক্তগী য়েংশিল্লবা মতুংদা প্রধান মন্ত্রীনা সাইক্লোন ফোনীনা মাংহন তাকহনবা অমদি মী কনবা অমসুং নৌনা খুন্দা লৈতাহন্নবগীদমক পায়খৎলিবা খোংথাংশিং অদুগীদমক কেন্দ্র অমসুং রাজ্যগী মকোকথোংবা ওফিসরশিংগা মীফম অমা পাংথোকখি। প্রধান মন্ত্রীনা ওরিশাদা পীবা য়াবা তেংবাং পুম্নমক পীগনি হায়না থাজবা পীখি। মহাক্না খুদক্কী ওইনা লুপা কোতি ১০০০ তেংবাং লাওথোকখি। শেনফম অসি ২০১৯গী এপ্রিল ২৯দা রাজ্য সরকারদা হান্ননা পীখ্রবা লুপা কোতি ৩৪১ অদুগী মথক্তনি। মহাক্না ইন্তর-মিনিস্ত্রিয়েল সেন্ত্রেল তীম অমনা থিজিল্লবা মতুংদা মখা তাবা তেংবাং পীগনি হায়না ৱাশকখি।

ওরিশাগী প্রজাশিংগা লোয়ননা মহাক্না অমত্তা ওইবগী ওইবগী ৱাফম প্রধান মন্ত্রীনা ফোংদোকখি। কেন্দ্র সরকারনা খুদক্কী ওইবা তেংবাং ফংহনবতা নত্তনা রাজ্য অসিবু নৌহৌননা শেমগৎপগী থাজবসু থমখি। সাইক্লোন অসিনা মরম ওইদুনা লৈখিদবা মীগী মশিং য়াম্না হন্থহনখিবা অসিদা সেতেলাইতনা থারকপা মমী অমসুং অৱাংবা থাক্কী নোং-চিংগী ফিভম মাংজৌননা খঙহন্নবা তেক্নিকশিং য়াওনা তেক্নোলোজীনা লৌরিবা থৌদাং অদু প্রধান মন্ত্রীনা থাগৎপা ফোংদোকখি। প্রধান মন্ত্রীনা সাইক্লোন য়ৌরক্ত্রিঙৈ মাংওইননা মীওই লাখ ১০ হেন্না শাফগদবা মফমশিংদা হোংদোকহনখিনবগীদমক রাজ্য সরকারনা হোৎনখিবশিং অমদি মরিক চুম্না মাংজৌননা খঙহনখিবগীদমক আই.এম.দি.বু অখন্না থাগৎপা ফোংদোকখি। মহাক্না সমুদ্র মপানগী লমদমদা খুন্দারিবা মীওইশিং অমসুং ঙামীশিংগী তেংবাং অদুবুসু থাগৎপা ফোংদোকখি। প্রধান মন্ত্রীনা কেন্দ্র অমসুং রাজ্য সরকারশিংগী মরক্তা মতিক চানা তেংবাং পীনদুনা মীশি মিনা থোকপগী চাং হন্থহনখিবা অদুদসু অপেনবা ফোংদোকখি। মহাক মশামকসু সমুদ্র মপান্দা লৈবা রাজ্য অমগী মুখ্য মন্ত্রী অমা ওইরক্লবনা অসিগুম্লবা সাইক্লোন অসিনা কয়া য়াম্না মাংহন তাকহনবগে হায়বদু মহাক্না মমুৎ তানা খঙই হায়না প্রধান মন্ত্রীনা ফোংদোকখি।

ইনফ্রাস্ত্রকচর, হাউজিং, ঙামীশিং অমদি লৌমীশিংদা থোকহনখিবা মাংহন তাকহনবা অমদি রাজ্যা অসিদা পীগদবা তেংবাংগী চাং য়েংশিন্নবগীদমক রাজ্য অসিদা কেন্দ্র সরকারগী তীম অমা লাক্লগনি হায়না প্রধান মন্ত্রীনা থাজবা পীখি। মহাক্না কেন্দ্র অমসুং রাজ্যগী ওফিসরশিংদা মৈ, তেলেকোম, রেলৱে শেমজিনবগী থবক পায়খৎতুনা অথুবা মতমদা মথৌ হৌহন্নবা পাওতাক পীখি। মহাক্না রোদ এন্দ সর্ফেস ত্রান্সপোর্ত মিনিস্ত্রীদসু অকায়-অতোই থোক্লবা লম্বী-থোং শেমজিনবগী খোংথাং লৌখৎনবা অমদি হিরম অসিদা রাজ্য সরকারদা পীবা য়াবা তেংবা পীনবসু খংহনখি। ইন্সুরেন্স কম্পেনিশিংনা খুদক্তা মখোয়গী ওবজাবরশিং থাদুনা ইচাওনা শোকহল্লবা লমদমশিংদা ক্রোপ ইন্সুরেন্সকা মরী লৈনবা লৌমীশিংগী ক্লেম ফংহন্দুনা অথুবা মতমদা মখোয়দা তেংবাং য়ৌহন্নবা পাওতাক পীখি।

প্রধান মন্ত্রীনা নোংলৈ নুংশিৎ অদুনা মরম ওইদুনা লৈখিদ্রবশিংগী নক্নবা মরী-মতাশিংদা লুপা লাখ অনি অমদি ফিভম থিনা শোক্লবশিংদা লুপা লিশিং য়াঙ্খৈগী এক্স-গ্রেসিসা লাওথোকখি। অসিগুম্লবা অৱাবা মতম অসিদা কেন্দ্র সরকারনা ওরিশা রাজ্যগী মীয়ামগীদমক লেপ্লি হায়না প্রধান মন্ত্রীনা খাজবা পীখি।