ভারতকী প্রধানমন্ত্রী

ইকাই খুম্নজরবা প্রধান মন্ত্রী ওলীজী, কলচর অমসুং তুরিজম মন্ত্রী রবিন্দর প্রসাদ অধিকারীজী, পশুপতি এরিয়া দিবেলপমেন্ত ত্রস্তকী মীহুৎ দা. প্রদীপ ধকলজী, মফম অসিদা লেংশিনবীরিবা ইকাই খুম্নজরবা মীওইশিং, অরাপ–অরাপ্পা মফমদগী লেংবীরক্লিবা ভোলে বাবাগী মনাইশিং অমসুং নেপালগী ঐগী নুংশিরবা ইচিল–ইনাওশিং।

বাবা বিশ্বনাথকী কাশী লমদমগী মপারী অমনা ঙসি পশুপতিগী তম্পাক অসিদা পুনবীররিবা অদোম পুম্নমকপু ইকাই খুম্নজবগা লোইনা খুরুমজরি। ইকাই খুম্নজরবা ওলীজীনা হায়বীখিবদুনি নেপালী লোন অমদি ঐখোয় গুজরাৎ মচাশিং অসি খঙবা য়াম্না লাই।

ভারত অমসুং নেপালগী মরূপ–মপাং ওইবগী মরি, অতলজীনা লৈখিদবা মতমদা ঐনা খঙলকই মদুদি অসিগুম্বা অৱাবগী পুংফমদা কনাগুম্বনা অদোমগী মফমদা মখোয়গী মীনুংশি অদু য়ৌহনবীরকপা মতমদা অদোমগী পুক্নীংদা পোৎথাবা অমা ফংই। অতলজীনা লৈখিদবা মীৎকুপ খরগী মতুংদা ওলীজীনা ঐঙোন্দা ফোন তৌদুনা অৱাবা ফোংদোকপীরকখি, মসি ওফিসিএল ওইনা নত্তে। অমত্তা ওইবগী ৱাখল্লোন অদুনি অমসুং অতলজীগী মফমদা মপাল থৌরম পুবা মন্ত্রীনা অদুগুম্বা ইকাই  খুম্নমবা অমদি ৱাখল্লোন অদুগা লোইননা মহাক্কী অরোইবা মথৌ–মঙমদা লেংবীরকখি। অমসুং ঙসি অতলজীগী শৈরেংশিং নেপালী লোন্দা হন্দোক্নবা নেপালগী সরকারনা ৱারেপ লৌরি। ঐনা খল্লি মদুদি কনাগুম্বা অথোইবা মীশক অমগী নীংশিংবা অমদি মহাক্কী পাউজেল অদু ঐখোয়না করম্না ঙাক–শেন্দুনা থমগনি, মহাক্না য়েনবীরম্বা লৌশিং অদু ঐখোয়না মথংগী মীরোলশিংদা করম্না য়ৌহনগনি। মদুবু ঐখোয়না পুন্সিদা কয়া য়াম্না ইঞ্জবা ঙম্লবগে। মসি মঙোন্দা কৎচবা খ্বাইদগী চাউবা শ্রদ্ধাঞ্জলি অমনি অমসুং নেপালনা অতলজীগী ৱাখল্লোন, মহাক্কী লৌশিং, পুম্নমক মহাক্না শৈরেং ওইনা ইদুনা থম্লম্লবা অদুবু লাক্লিবা মীরোলশিংদা য়ৌহন্নবা ৱারেপ লৌরে, অসিগুম্বা অথোইবদগী থোইরবা শ্রদ্ধাঞ্জলি কৎপীবগীদমক ইকাই খুম্নজরবা ওলীজীবু, নেপালগী সরকারবু, নেপালগী মীয়াম্বু থমোই শেংনা তৌবীমল খঙবা উৎচরি।

ঐখোয়গী নাৎ–চৎনবীগী ওইবা মরি লৈনরক্লি, চহি কয়া লিরবা মরিনি অদুবু মালেমগী লৈবাক অমা হেক্তগা থম্নবা মরি অদু য়াম্না কুইবা মতম অমগী ওইদ্রিফাওবা, মীগা মীগগী মরক্তা থৌনা হেনগৎহন্দ্রি ফাওবদি অচেৎপা মরি ওইবা খক ঙমদে হায়বসিমদি তশেংবনি। শুপ্নগী কাথমান্দু খক্তংগা দিল্লীগা তিন্নরগা, শুপ্নগী কাথমান্দুগী সরকার অমসুং দিল্লীগী সরকার তিন্নরগা ওইথোকপা য়াবা নত্তে, নেপালী খুদিংমক, হিন্দুস্তানী খুদিংমক্না অমগা অমগা লোইনদ্রিমখৈ পাঙ্গল অদু ফংলোই। অমসুং ঙসি মীগ–মীগগী পাঙ্গল অদু হেনগৎহন্নবগী অথোইবা থবক অমা নেপাল–ভারতগী মরূপ–মপাং ওইবগী খুদম ধর্মশালাগী ঙসি শঙ্গারি।

ঐগী নুংশিরবা ইচিল–ইনাওশা, ঐনা কাথমান্দুদা লাকপা খুদিংগী ঐনা মফম অসিগা মীনুংশি অমদি অমত্তা ওইবগী ৱাখল্লোন অদু থমোইদা ফাওবা ফংই। ঐ খক্তগী নত্তনা ভারতকী মফমদসু নেপালনা অসুম্না য়েংবা মীৎয়েং অদু উবা ফংই। ভারত অমসুং নেপালগী মরক্তা শিব ভক্তি অমসুং শিব ভক্তশিংগী মরি অসি অদুক্কী মতিক চেৎলি। কাথমান্দু অমসুং কন্যাকুমারীগী মরক্তা কিলোমীতর লিশিং কয়া লাপ্নৈ অদুবু চাউরাক্না চহি লিশিং অমা মখাইগী মমাংদগী তমিলনাদুদা পশুপতিগী ৱারীনা নীল্লি।

শৈব কুরুবরগী থেবরমদা ভগবান পশুপতিগী মরুওইবা মফম লৈ, অথোইবা মফম লৈ। অমসুং বাবা পশুপতিনাথনা অরাপ্পা খা ভারতকী মাগী লোইবা নাইদ্রবা ভক্তশিংগী চারোল শুরোল কয়াদগী গনেশ অমসুং কার্তিক্কুম্না মশানা মশাবু লাইশঙ অসিদা মফম লৌজখি। মরম অসিনা ঙসি ঐগী অথোইবা মরূপ প্রধান মন্ত্রী ওলীজীগা লোইননা নেপাল–ভারতকী খোংলোইনা পশুপতি ধর্মশালাবু মালেম পুম্বগী য়াত্রিশিংগীদমক, তুরিস্তশিংগীদমক, শিবগী মনাইশিংগীদমক কৎথোকচবা অসিদা ঐগী অপেনবগী খমখৈ লৈত্রে। মালেম পুম্বদগী মফম অসিদা লাক্কদৌরিবা লাইবু থাজবশিংগী খুদোংচানবগীদমক্তা ভারত মচা ক্রোর চাম্মা কুনমঙাগী মাইকৈদগী পশুপতিনাথকী খুৎয়া খাদা য়াম্না পীকপা খুদোল অমা কৎচবগী খুদোংচাবা অমা ঐনা ফংজরে।

মরূপশা, পশুপতিনাথ অমসুং জানকী ধামনা নেপালগী মখল মখা কয়া অসিবু অমত্তা ওইনা লেংশিল্লি লোইননা মখোয়না ভারতকা লৈনরিবা মরি অসিবুসু মতম পুম্নমক্তা অনৌবা থৌনা হাপতুনা লাক্লি। কাশী অমসুং কাথমান্দুবু বাবা বিশ্বনাথ অমসুং পশুপতিনাথনা শম্নহল্লি। অদুগা ঐহাক্না সোমনাথকী লমদমদগী থোরকপনি। সোমনাথতগী বিশ্বনাথ, বিশ্বনাথতগী পশুপতিনাথ মতৌ অসুম্না ইমা সীতা অমসুং প্রভু শ্রী রামগী মরি জনকপুর অমসুং অয়োধ্যাদগী ওইখিবা অদুগুম্না ভগবান অমসুং মুক্তিনাথ মস্তঙ্গবু পুরীনা শম্নহল্লি। কাথমান্দুগী লৈরক অমসুং খোংলম্বীশিংদা চৎপগী নুংঙাইবা অদু য়াত্রী খুদিংমক্না লৌবা য়াই। ভগবান পশুপতিনাথগী মফম অসি থাজবা কয়াগী মফমশিংনা কোইশিন্দুনা লৈরি। বুদ্ধ লম্বোইবশিংগী শাগৈ কয়া শন্দোকলি। অদুগা হৌজিক প্রদীপজীনা হায়বীখি মদুদি – ওম মনি পদ্মে হম – অমসুং শিবগী মনাইশিংগী মচিন্দগী ওম নমঃ শিবায়গী মন্ত্র অদু অমত্তা ওইনা করম্না তিনখিবগে হায়বদু খঙবা ফাওবা ঙমহৌদে। চৎনবী অসিসু ভারত অমসুং নেপালগী মরক্তা লৈনরিবা মরি অসিগী মরু ওইবা লংজিল অমনি। নেপালগী লুম্বিনীনা মালেমদা গৌতম পীখি, অদুগা ভারতকী বৌদ্ধ গয়ানা বুদ্ধ পীখি। গৌতম বুদ্ধনা তাকপীরম্বা লম্বী অদু ঙসি এক্সত্রিমিজম অমসুং তেরোরিজমগী তাইবং অসিদা সমস্যা কয়া লোইশিন্নবগী পাম্বৈ ওইরি।

মরূপশা, ভারত অমসুং নেপালগী মরক্তা থাজবা, মপান্নাইদবা অমসুং অমত্তা ওইবগী পুৱারী ওইরবা শরুক য়ামিন্নবগী মরি লৈনরি। মসি ঐখোয়গী লোইনাইদ্রবা পাঙ্গলনি, মমল নাইদ্রবা লনগৈনি, অতাংবা ললনি। চহি লিশিং কয়াগী ঐখোয়গী চাউথোকচনীংঙাই ওইরবা পুৱারী, বসুধৈব কুতুম্বকমগী মাইকৈদা ঐখোয়গী অচেৎপা ৱাখল্লোন অসি ঐখোয়গী লৈবাক অনি অসিবু মালেমগী সভ্যতা কয়াদগী তোঙান্না থম্লিবা ঐখোয়গী তাংলবা মগুন অদুনি। হৌজিক ওলীজীনা তাকপীখি – সর্বে ভবন্তু সুখিনঃ। সর্বে সন্তু নিরাময়াঃ। পুম্নমক্কী য়াইফনবগীদমক্তা খনবা, ইশাগী খক্তা নত্তনা, সর্বে ভবন্তু সুখিনঃ। মসি লৈবাক অনিগী মরু ওইবা ৱাখল্লোন্নি। অমসুং অপুনবা অসিদগী থোরকপা থাজবা অদুমক্না মালেমদা ঐখোয়গী মফম অদু লেপকনি।

মরূপশা, হিন্দুস্তানী পুম্নমক্না মসি উবদা অপেনবা পোকই মদুদি নেপালদা ঙসি রাজনীতিগী তংদু লৈতাবা অদু লৈরে। মসিনা মরম ওইদুননি চাউখৎপগী লম্বীদা নেপালনা মহাক্কী খোংজেল য়াংখৎলক্লিবা। ঐনা মফম অসিদা লেংশিনবীরিবা নেপালগী প্রধান মন্ত্রীজীদা, নেপালগী মীয়াম পুম্নমক্তা থাজবা অসি পীজরি মদুদি অদোম পুম্নমক্কী পুন্সিবু য়াইফবা ওইহন্নবগীদমক্তা থাজনীংঙাই ওইবা মরূপ অমা ওইনা ভারতকী পুকচেল শেংবা অমসুং মতেং মতম লৈবা খিবিক্তা অদোমগা লোইননা লৈরি। বাবা পশুনাথকী থৌজাল মতম পুম্নমক্তা লমদম অসিদা লৈবা ওইরসনু অমসুং নেপাল–ভারতকী মরি অসিদা মহাক্কী থৌজালগী মীৎয়েং অদু থম্বীবা ওইরসনু হায়বা অসি ঐগী লাইনীংনি।

ঐনা থাজৈ মদুদি নেপাল–ভারতকী মরি পশুপতি ধর্মশালা অসি শুপ্নগী ফুরা অদুখক্তা নত্তে, লম্বী চৎপা অমনা পোৎথানবা মফম অদুখক্তা নত্তে, মরূপ–মপাং ওইবগী য়ুম্বী, অদুগুম্বা শেনমিৎলোন অমগী খোংজেল পীগদবা ইনর্জীগী পোক্লকফম অমা ওইরগনি হায়বা থাজবা অসিগা লোইননা ঐনা অমুক্কা হন্না ইকাই খুম্নজরবা প্রধান মন্ত্রীজীবু থমোই শেংনা তৌবীমল খঙবা উৎচরি মরমদি বিমস্তেক অদু য়াম্না চাউবা মরু ওইখ্রবা থৌরম অমনি অমসুং মদুসু য়াম্না থোইদোক হেন্দোকপা মওংদা ঙসি কাথমান্দুগী লমদম অসিদগী মালেমদা পাউজেল পীখ্রে। মালেমগী মী মশিং চাদা ২২গী মহুৎ শিল্লিবা বিমস্তেক সমিৎ নেপালগী লমদমদা পাংথোকপা, পশুপতি ভগবানগী খুয়া খাদা পাংথোকলবদবু, মফম অসিদগী লৌখিবা ৱারেপশিং মপুং ফাদনীংঙাইগী ৱাফম লৈতে। ঐনা অমুক্কা হন্না থৌরম অসিগীদমক অদোমগী মতম কাইথোকপীবা অমসুং ঐখোয়না পুন্না অমত্তা ওইনা খুদোল অমা তমজনবগী তাঞ্জা অমা ফংজবা, হিন্দুস্তান্দসু থৌরাংশিং অসিদা হরাওরমগনি, নেপালগী মীয়ামসু থৌরাং অসিদা হরাওবীরমগনি অমসুং থৌরাং অসিদগী অনৌবা শেনমিৎলোনগী খোংজেল পীনবগী তাঞ্জাসু ফংলগনি, মসিগী ৱাখল্লোন অসিগা লোইননা ঐনা অমুক্কা হন্না ভগবান পশুপতিনাথকী খুয়া খাদা ইকোক নোঞ্জদুনা, খুরুমজদুনা ঐগী ৱাহৈ লোইশিঞ্জরি, হন্না হন্না থাগৎচরি।