ভারতকী প্রধানমন্ত্রী

দাইজদা লৈরিবা শক্নাইরবশিং অমসুং কার নিকোবরগী ঐগী নুংশিরবা মরূপশিং।

ঙরাং ঐ বনরসিদা ইমা গঙ্গাগা লৈমিন্নখি অদুগা ঙসিনা ঐ নখোয়গা লোয়ননা পাক্লবা সমুদ্র অসিগী মতম্বাক্ত লৈরি। ইমা গঙ্গাগনা মহাক্কী অশেংবা অদু  মীয়ামদা থৌজাল ওইনা পীবগুম, মসিগী সমুদ্র অসিনা নিংশিংবা থোক্ত্রিঙৈ মতমদগী ইমা ভারত থাগৎপগী ঈশৈ শক্তুনা লাক্লি অমসুং লৈবাক অসিগী ঙাকশেনগী থবক্ত থৌনা পীরি।

মরূপশিং,

ঙসি ঐনা মফম অসিদা হেক থুংলবগা, কার নিকোবর য়াওনা মফম অসি নিংতম্নবা থৱায় কৎখ্রবশিংগী মফমদা ঐনা ইকায়খুম্নবা উৎচরি।

মরূপশিং,

নখোয় ময়ামনা মহৌশাগী মমল য়াম্লবা লনশিংগী মপু ওইবতা নত্তনা খ্বাইগী ফরবা চৎনবী, আর্ত অমসুং স্কিলশিংগী মপু ওইরি। মিকুপ খরগী মমাংদা অঙাংশিংনা উৎখিবা জগোয় অদুনা ভারতকী ইনাকখুল্লবা কলচর অসি মসিগী সমুদ্র অসি ফাওবা য়ৌরে হায়বা উৎলে।

নখোয়না ঙাক্তুনা থম্লিবা অপুনবা ইমুংগী চৎনবগী অসি ঐখোয়গী ভারতকী পুন্সি মহিংগী থৌনা ওইরি। মসি কমদৌনা থবক, লন-থূম অমসুং পাঙ্গল য়েন্থোক্নবগে অমসুং শীজিন্নবগে হায়বগী অশেংবা খুদম্নি। মসিগী ইমুংগী মওং অসি কার্গিলদগী কার নিকোবর অমসুং কুতচদগী কোহিমা ফাওবগী ঐখোয়গী লৈবাক্কী পাঙ্গল অমা ওইরিবনি।

মরূপশিং,

ঐ সুনামি মেমোরিয়েল অমসুং ৱাল ওফ লোস্ত সোলদা চৎলুরে। চহি ১৪-১৫গী মমাংদা থোকখিবা তমথিরবা থৌদোক অদুদা লৈখিদ্রবশিংগী মফমদা ঐনা ইকায়খুম্নবা উৎখি। অদুবু, নখোয়না কন্না হোৎনদুনা কার নিকোবর অসি অমুক শেমগৎলকখিবা অসি থাগৎনিঙাইনি।

মরূপশিং,

কার নিকোবরগী মীয়ামগী য়াইফনবা ঙসি প্রোজেক কয়া হৌদোক্লে নৎত্রগা উরেপ-উয়ুং তম্লে। মসিদা ইজুকেসন, হকশেল, থবক পীবা, স্কিল ত্রেনিং , ত্রান্সপোর্তেসন, ইলেকত্রিসিতি, শান্নবা অমসুং তুরিজমগী প্রোজেকশিং য়াওরি। মসিগী প্রোজেক ময়াম অসিগীদমক ঐনা নখোয় ময়াম থাগৎচরি। মসি ঐখোয়গী সবকা সাথ সবকা বিকাসগী শরুক অমনি। মসিনা তাক্লি মদুদি মীওই অমত্ত নৎত্রগা লৈবাক অসিগী মফম অমত্ত চাওখৎ-থৌরাংগী খুদোংচাবা ফংহন্দবা তৌরোই হায়বসিনি।

লৈবাক অসি পুনশিন্নবা অমসুং পুন্না হিংমিন্নবগী ৱাখল্লোন মীয়ামগী থম্মোয় হেনগৎহন্নবা ঐখোয়না থবক পায়খৎলি। হৌখিবা চহী মরি মখাই অসিদা ঐনা প্রধান মন্ত্রী অমা ওইনা ইশামক লৈবাক অসিগী মফম কয়া চৎতুনা নখোয় ময়ামগা উনরি।

মরূপশিং,

ঙাইহাক্কী মমাংদা উরেপ-উয়ুং তমখিবা নৎত্রা হৌদোকখিবা প্রোজেকশিং অদুদা সমুদ্রা চেকপল খাবগী প্রোজেক অমা য়াওরি। লৈবাক নিংখাইবনা মরম অদুনা থেংনরিবা খুদোংথিবশিং অদু য়েংলগা নখোয়না মতম কয়াগী মমাংদগী তকশিনদুনা লাকখিবনি। সমুদ্রগী চেকপল অসি লুপা ক্রোর ৫০ চংনা শাগনি অমসুং মসিগী উরেপ-উয়ুং তম্বা অসি ঐগী লাইবক ফবনি। হৌজিক চেকপলগী প্রোজেক অসি অথুবা মতমদা লোইশিনগনি অমসফুং মসিনা কার নিকোবর অসি ঙাকথোক্লগনি।

মরূপশিং,

কার নিকোবরগী মীয়ামদা অঙাংশিং লাইরিক তম্বা, নহারোলশিং শেন্থোক লৈহন্নবা, অহলশিংগী হিদাক-লাংথক পীনবা, লৌমীশিংগী ঈশিং ফংহন্নবা অমসুং মীয়ামগী অৱাবশিং কোকহন্নবা থবক কয়া পায়খৎলি। মফম অসিগী নহারোলশিং লাইরিক তম্নবা অমসুং ত্রেনিংগী লাপ্না চৎলি। হৌজিক অরোং খুঙ্গংদা আই তি আই অমা লিংখৎপদগী নহারোলশিং মসিগী কান্নবা ফংলগনি। ইলেকত্রিসিয়ান, উ শুবা, প্লম্বর অমসুং ওতোমোতিপ তেক্নিসিয়ান ওইনা পাস তৌরকপা নহারোলশিং লৈবাক অসিগী মফম অমদা হেক্ত থবক ফংলগনি।

মহৌশাদগী লৈজরক্লবা শেন্থোক-লম্বী অসিগী মথক্ত কার নিকোবরগী নহারোলশিং ঙসিদি  ইজুকেসন অমসুং হকশেলগী লমদা শীনফম অমা ওইনা চংশিনবা হৌরে। লমদম অসিগী নহারোলশিংদা শান্নবগী হৈথোই-শিংথোইবা য়াওরি। ফুদবোল য়াওনা মশান্না কয়াদা কার নিকোবর অসি হৌজিক মমিং চৎলে। ঙাইহাক্কী মমাংদা ঐনা মফম অসিগী মমিং লৈরবা শান্নরোইশিংগা উনখি। কার নিকোবরগী ফুদবোল তিম্না মমিং লৈরবা সুব্রোতো মুখর্জি কপ মরিরক লৌরে হায়বা ঐ খঙলে।

মরূপশিং,

লাপাতি খুঙ্গংদা অনৌবা শানফম অমা লিংখৎলে। মসি অন্দমান অমসুং নিকোবর ইথৎশিংদা অমত্তা ঙাইরবা স্পোর্ত কমপ্লেক্সনি। লুপা ক্রো ৮ চংনা শাবা স্পোর্ত কমপ্লেক্স অসিদা খুদোংচাবা কয়া ফংলি। নুপামচাশিং অমসুং নুপীমচাশিংগী হোস্তেলশিংগী মথক্ত, সিন্থেতিক ত্রেক অমসু য়াওরি। সাইক্লিং , কায়াকিং,রোৱিং অমসুং ফুদবোলগী লমদা কার নিকোবরনা লৈবাক অসিগী মগুন লৈরবা শান্নরোই কয়া পুথোক্লি। তুংদা স্পোর্ত কমপ্লেক্স অসিদা ভেলোদ্রোম অমসুং সুইমিং পুল শেমগৎকনি।

মরূপশিং,

অন্দমান অমসুং নিকোবরগী মীয়ামদা পীফম থোকপা খুদোংচাবশিং ফংহন্নবা কেন্দ্র সরকারনা থাজবা পীরি। অহোংবা মমলদা চেং-হৱাই, অফবা থক্নবা ঈশিং, গ্যাস কন্নেক্সন অমসুং কেরোসিন পীনবা থবক পায়খৎলি। মফম অসিদা লৈরিবা মীয়ামদা হকশেলগী খুদোংচাবা ফংহন্নবা থবক পায়খৎলি। দিগলিপুর সব-দিস্ত্রিক হোস্পিতাল পাকথোক-চাওথোকহনবা অসিনা অনা-লায়েংগী খুদোংচাবা হেন্না ফংহল্লগনি।

মরূপশিং,

মফম অসিগী মহৌশাগী অকোয়বগী ফিবম ঙাক-শেন্নবা অমসুং লমদম অসিগী কলচর ঙাক্তুনা থম্নবা কেন্দ্র সরকারনা থবক পায়খৎলি। মসিগী মতাংদা সরকারনা ৱারেপ কয়া লৌরে। অন্দমান অমসুং নিকোবর ইথৎশিং য়াওনা লৈবাক অসিদা লৈরিবা কোপ্রা অমসুং য়ুবী থারিবা লৌমীশিংগী মরুওইবা ৱারেপ কয়া সরকারনা লৌরে। কোপ্রাগী এম এস পি কুইন্তল অমদা লুপা ২০০০দা হেনগৎলে। তকখাইরবা কোপ্রাগী এম এস পি কুইন্তল অমদা লুপা ৭৭৫০দগী লুপা ৯৫০০দা হেনগৎলে। বোল কোপ্রাগী এম এস পি কুইন্তলদা লুপা ৭৭৫০দগী লুপা ৯৯২০দা হেনগৎলে।

মরূপশিং,

ঙামীশিংগী ফিবম ফগৎহন্নবা কেন্দ্র সরকারনা থবক পায়খৎলি। লৈবাক অসিদা ঙা ফাবগী থবক অসি শেন্দোং লৈবা থবক অমা ওইনবা হন্দক লুপা ক্রোর ৭০০০গী ফন্দ অমা শেম্লে। মসিগী মখাদা ,ঙামীশিংনা অপীকপা শেন্দোইদা লোন লৌবা য়াগনি।

ঐখোয়গী সমুদ্র মপানগী শরুকশিং ব্লু রিভোলুসনগী মরুওইবা মফম অমা ওইহন্নবা ঐখোয়গী সরকারনা থবক পায়খৎলি। ঙা ফাবা নৎত্রগা সিৱিদ থাবগা মরি লৈনবা ললোন-ইতিক্কী থবকশিং সরকারনা পুক্নিং থৌগৎলি। মতমগা চুনবা হি লৈবদা সরকার অসিনা ঙামীশিংদা শেন্থং পীরি।

মরূপশিং,

কার নিকোবরগী অকোয়বগী ফিবম কাইহন্দনা থম্নবা, মফম অসিগী সোলার পৱার শীজিন্নবা থিজিনবা হৌরে। ঙসি ভারত অসি সোলার পৱার পুথোকপা অমসুং শীজিন্নবা মালেমগী লৈবাকশিংগী মনুংদা য়াওরে। সোলার ইনর্জিগী মতেংদগী লৈবাক অসিদা মৈখু চেন্দবা ইনর্জি ফংহন্নবা ঐখোয়না থবক পায়খৎলি। ঙসি ভারতনা মাংজিল থাদুনা ইন্তরনেসনেল সোলার এলাইন্স শেম্লে। ভারতনা ‘মালেম অমা, নুমিৎ অমা , গ্রিদ অমা ‘ হায়বা পান্দম অসিদা থবক তৌরি।

মরূপশিং,

ঐখোয়গী সমুদ্রা মপানগী শরুকশিং অসি রিনিউয়েবল ইনর্জি পুথোক্নবগী খুদোংচাবা কয়া লৈরি। মসিগী খুদোংচাবশিং অসি লৌনবা ঐখোয়না থবক পায়খৎলি। মসিগী স্কিম অসিগী মখাদা কার নিকোবরদা কিলোৱাত ৩০০গী রুপতোপ সোলার প্লান্ত অমা লিংখৎনবা পান্দম থম্লি। স্কুলশিং অমসুং হোস্পিতালশিংদা কিলোৱাত ৫০গী সোলার পেনেলশিং থমলে হায়বা ঐ খঙলে ।

মরূপশিং,

কার নিকোবর, মসিগী সমুদ্রা অমসুং মালাকা স্ত্রাইত অসি লন-থুম অমসুং ঙাক-শেনগী লমদা য়াম্না মরুওই। মসি ইন্দিয়ান ওসিন অমসুং পেসিফিক ওসিনগী মরক্ত য়াম্না মরুওইবা জহাজ চৎফম অমনি। মসি মালেমদা কার্গো সিপশিংগী খ্বাইগী চিনবা লম্বীনি। মসি মাংদা থম্লগা, ত্রান্সপোর্তেসনগী মওং অসি ফগৎহল্লে। মসিনা নখোয় ময়ামদা কান্নবা ফংহনবতা নত্তনা থবক ফংবগী খুদোংচাবা কয়াসু পীরগনি।

মরূপশিং,

লৈবাক অসিগী দরকার ওইবা  ৱাখল মাংদা থম্লগা , ঙসি ত্রান্স-সিপমেন্ত পোর্ত শানবা ঙসি উরেপ-উয়ুং তম্লে। মসিগী প্রোজেক অসিনা গল্ফগী খা থংবা শরুকশিংদা অনৌবা ইন্তরপ্রাইজশিং লিংখৎনবগী খুদোংচাবা কয়া ফংলগনি। সাগরমালা প্রোজেক্কী মখাদা লৈবাক অসিগী সমুদ্রা মপানশিংদা লুপা ক্রোর লাখ ২.৫গী  প্রোজেকশিং পায়খৎলি। তুংদা লৈবাক অসিগী সমুদ্রা মপানশিংদা কোস্তেল ইমপ্লোইমেন্ত জোন ১৪ শেমগৎনবা পানদম থম্লি।

মরূপশিং,

সাগরমালা স্কিমগী মখাদা কার নিকোবরদা লুপা ক্রোর ৫০ চংনা কাম্পবেল বে জেত্তি মিতর ১৫০ ফাওবা শাংদোক্লে। মফম অসিদা অচৌবা জহাজশিং হোনজিল্লকপদা খুদোংচাদবা থোকহন্দনবা মুস জেত্তিগী অরুবা হেনগৎহন্নবা থৌরাং কয়া লৈরে।

মরূপশিং,

লমদম অসিদা নোংথক্ত চৎথোক-চৎশিনগী থবক ফগৎহন্নবা সরকার অসিনা থবক পায়খৎলি। মীয়ামগী পুন্সি মহিং ফগৎহন্নবা সরকার অসিনা কন্না হোৎনরি।

মরূপশিং,

ঐনা ত্রাইবেল কাউন্সিল থম্মোয় শেংনা থাগৎচরি। মফম অসিদা চাউখৎ-থৌরাংগী থবক য়াংশিন্নবা অমসুং লৈবাক অসিগী গনতন্ত্র মপাঙ্গল কনখৎহন্নবা নখোয়না মরুওইবা থৌদাং লৌরি। ভিলেজ কাউন্সিলদা ইচলশিং অমসুং ইচানুপীশিং মশিং য়াম্না শরুক য়ারে হায়বা ঐ খঙলে। মসিগী থবকশিং অসি থাগৎনিঙাইনি।

কার নিকোবর চাউখৎহন্নবা সরকারনা মপুংফানা থবক পায়খৎলি। লাক্কদৌরিবা অনৌবা চহি অসিদা , ঐখোয়গী থবক অসিনা মখা তানা অনৌবা থৌনা পীগনি।

অরোইবদা , তোঙান-তোঙানবা চাউখৎ-থৌরাংগী থবকশিং অসিগীদমক ঐনা নখোয় ময়াম অমুক হন্না থাগৎচরি।

ময়াম থাগৎচরি ! জয় হিন্দ !