ভারতকী প্রধানমন্ত্রী

নোংচুপ বেঙ্গলগী রাজ্যপাল শ্রী আর.এন. রবি, থৌনা ফরবা মুখ্য মন্ত্রী শ্রী সুবেন্দু অধিকারী, চীফ ওফ নেভেল স্তাফ শ্রী কৃষ্ণ স্বামিনাথনজী, অমসুং মফম অসিদা লৈরিবা নুপী অমসুং নুপাশিং!

ঙসি অসি হীরম কয়াদা অখন্নবা নুমিৎ অমনি। মালেম পুম্বনা ইন্তর্নেস্নেল য়োগ নুমিৎ পালন তৌরি। মসিগী তাঞ্জা অসিদা বেঙ্গলগী চাউরবা লমদম অসিদা লাকপগী খুদোংচাবা ফংজবা অসিদা ঐহাক নুংঙাইবা ফাওই। মসি ভারতকী ৱাখল্লোনশিংদা অনৌবা মায়কৈ অমা পীখিবা, ভারতকী রিনাইসেন্স খোঙজেল য়াংখৎহনখিবা অমসুং ভারতপু চহি চা কয়াগী মমাংদগী সমুদ্রগী থোংদা মালেমগা শম্নহনখিবা লমদমনি। ঙসি, ‘আত্মনির্ভর ভারত’ (মশা-মরোমদোম লেপচবা ভারত), সেক্যুর ভারত অমসুং চাউখৎলবা ভারতকা মরী লৈনবা মরুওইবা থৌরম অমা মফম অসিদা পাংথোক্লি। মতম খরগী মমাংদা, আই.এন.এস. অগ্রয়, আই.এন.এস. দুনাগিরী, অমসুং আই.এন.এস. সনশোধক অসি ভারতকী নেভীদা ইন্দক্ত তৌখ্রে। চানরুবা ওইনা, জুন ২১ অসি ‘ৱার্ল্দ হাইদ্রোগ্রাফি দে’ ওইনা পাঙথোক্নরি। ঙসিগী নুমিৎ অসিদা, ঐখোয়না ভারতকী খ্বাইদগী অওনবা হাইদ্রোগ্রাফিক ভেসেল ‘আই.এন.এস. সনশোধক’ কম্মিসন তৌখিবা অসি য়াম্না নুংঙাইবা থৌদোক অমনি। ঐহাক্না ইন্দিয়ন নেভী, মসিগী প্রোজেক্তশিং অসিগা মরী লৈনবা সাইন্তিস্ত, ইঞ্জিনীয়র অমসুং ৱার্কর পুম্নমক অমসুং ঐহাক্কী লৈবাক মীয়ামদা ঐহাক্কী য়াইফ-পাউজেল অমসুং থম্মোয় শেংনা থাগৎপা ফোংদোকচরি।

মরুপশিং,

সমুদ্রগী মপাঙ্গল য়াওদনা লৈবাক অমত্তনা অচৌবা শক্তি ওইরকপা ঙম্লোই হায়বসি মালেমনা খঙই। চাউখৎপা, সেক্যুরিতী, অমসুং চাউখৎপা পুম্নমক অসি সমুদ্রগা মরী লৈনৈ। ঙসিদি, মালেমগী ললোন-ইতিক্কী অয়াম্বা শরুকশিং অসি সমুদ্রগী লম্বীদা চৎলি। মালেমবু শম্নহল্লিবা দেতাগী অচৌবা নেৎৱার্কশিং অসি সমুদ্রগী মখাদা চৎলি। তুংলমচৎতা, মরুওইবা মিনরেলশিং, অরুবা সমুদ্রগী রিসোর্সশিং অমসুং ইনর্জীগী অনৌবা সোর্সশিংসু সমুদ্রগা মরী লৈনগনি। মরম অদুনা, মপাঙ্গল কনবা সমুদ্রগী পাঙ্গল লৈবা লৈবাক অমনা মান্নবা মপাঙ্গল কনবা শেন্মিৎলোন অমসুং থৌরাংগী ইথিল পীগনি। ভারতনা মসিগী তশেংবসি মপুং ফানা খঙই অমসুং মদুগী মতুং ইন্না মশাবু শেম-শারি। ঙসিগী নুমিৎ অসি ঐখোয়গী তৌবা ঙম্বশিং অমসুং ঐখোয়গী হৈশিংবগী খুদম অমনি।

মরুপশিং,

চহি খরগী মমাংদা ঐখোয়না আই.এন.এস. বিক্রান্ত জাতিদা কত্থোকখিবা মতমদা, ভারতনা মাগী মেরিতাইম পাৱরদা অনৌবা চেপ্তর অমা শঙ্গাখি। মালেম পুম্বদা ঐখোয়গী তৌবা ঙম্বশিং অদু ফোংদোকখি। আই.এন.এস. বিক্রান্ততগী ঙসি ফাওবগী খোঙচৎ অসি অনৌবা লানগী জহাজশিং খক্তা নত্তে, মসি ভারতকী চাউখৎলক্লিবা মশা-মরোমদোম লেপচবগী খোঙচৎ অমসু ওইরি। ঙসি, আই.এন.এস. অগ্রয়, আই.এন.এস. দুনাগিরী, অমসুং আই.এন.এস. সনশোধকনা হায়রিবা খোঙচৎ অসিদা অনৌবা ইথিল পীরি। হায়রিবা জহাজ অহুম অসিনা ভারতকী মরুওইবা ৱারেপ অহুমবুসু মশক তাক্লি। মখোয়শিং অসি ভারত্তা শাখ্রে অমসুং ভারত্তা দিজাইন তৌখ্রে। মখোয় অসি শাবা অসিনা ভারতকী ইন্দস্ত্রীশিংগী হৈ-শিংবা, ভারতকী ইঞ্জিনীয়রশিংগী হৈ-শিংবা অমসুং ভারতকী শিন্মীশিংগী কন্না হোৎনবগী মমি তারি। অমসুং মসিদা অনৌবা ভারতকী খ্বাইদগী চাউবা শক্তি লৈ।

মরুপশিং,

ঙসিদি, ভারতনা ঙাকশেলগী সেক্তরদা শুপ্নগী বায়র অমা ওইনা খক্তা লৈহন্নবা পামদে। ঐখোয়গী লান্মীগী পাঙ্গলনা মালেমগী কৈথেল অমা ওইনা থবক তৌবা ঙম্লোই। ঐগী শক্তি অসি মালেমগী কৈথেল অমা ওইবনা তাকপদি নত্তে। মদুগী মহুত্তা, ঐগী শক্তিগী অশেংবা চাংদি ইশাদা থাজবা থম্বা অদুনি। ভারতনা মেনুফেকচরর অমা ওইনবা হোৎনরি। অমসুং ঐখোয়না মেনুফেকচরর ওইরকপা নুমিত্তা, ঐখোয়না ৱারেপ লৌবা য়াবা প্লেয়রশিংসু ওইগনি। ঐখোয়না মসিগী মাইকৈ অসিদা খোঙজেল য়াংনা চংশিল্লি। হৌখিবা চহি খরা অসিদা, ‘মেদ ইন ইন্দিয়া’গী লানগী জহাজ অমসুং সবমেরিন ৪০ হেন্না নেভীদা ইন্দক্ত তৌখ্রে। মসিগী ৱাহন্থোক্তি ভারত নেভীনা চয়োল খরা খুদিংগী অনৌবা পোৎলম অমা ফংলি। হৌজিক্কী ওইনা, মরুওইবা নেভেল প্লেতফোর্ম ৪৫ শেমগৎলি। মসি মশীং খক্তা নত্তে, মসি ভারতকী ইন্দস্ত্রীগী মপাঙ্গল অমসুং ভারতকী তুংলমচৎকী খুদম অমনি।

মরুপশিং,

লাক্কদৌরিবা চহিশিংদা ভারতকী মেরিতাইম সেক্তরদা অনৌবা থবক লাখ কয়া পুথোকপগী ওইথোকপা লৈ। মরম অসিনা ঐখোয়না মেরিতাইম সেক্তর অসি তোঙানবা সেক্তর অমা ওইনা খল্লোই; ঐখোয়না মসি চাউখৎলবা ভারতকীদমক্তা থবক পীবগী ইঞ্জিন অমা ওইনা উরি। মোদর্ন জহাজ অমদা স্তীল, ইলেক্ত্রোনিক্স, মেছিনরী, অমসুং কম্পোনেন্ত লিশিং কয়া তন চা কয়া য়াওরি। মসি পুম্নমক্কী মথক্তা কম্পেনী লিশিং কয়া অমা থবক তৌরি, মসিনা তাকপদি নহা লিশিং কয়া অমা থবক ফংলি। ঙসি কম্মিসন তৌখিবা জহাজ অহুম অসি শাবদা এম.এস.এম.ই. ২০০ হেনবনা শরুক য়াখি। এম.এস.এম.ই. ২০০ – হায়রিবা স্মোল-স্কেল ইন্দস্ত্রীশিং অসিদা থবক কয়া অমা শেমগৎলকখিবা য়াই হায়বসি ৱাখলনা শাগৎপা য়াই।

মরুপশিং,

ভারতনা মাগী মেরিতাইম পাৱরগী মথংগী ফেজদা চঙবগী মতম ওইরে। মসিনা মরম ওইদুনা, ভারতনা শিপ বিল্দিং সেক্তরগীদমক অনৌবা মীৎয়েং অমগা লোয়ননা মাংলোমদা চংশিল্লি। হৌখিবা চহিশিংদা পোলিসী রিফোর্ম কয়া অমা পায়খৎখ্রে অমসুং দোমেস্তিক মেন্যুফেকচরিং কেপাসিতী হেনগৎহন্নবা অখন্নবা থৌরাং কয়া লৌখৎখ্রে। মসিগী মথক্তা, শিপ বিলদিং, শিপ রিপেয়রিং, শিপ রিসাইকলিং, অমসুং এম.আর.ও. অসি মরুওইবা নেস্নেল মিসন অমা ওইনা উরি।

মরুপশিং,

শিপ্পিং সেক্তরগীদমক লাউথোকখিবা লুপা করোর ৭০,০০০গী ইন্সেন্তিব পেকেজ অসি শেন্মিৎলোনগী ওইবা ৱারেপ খক্তা নত্তে, মসি ভারতকী মেরিতাইম ফ্যুচরদা শেল থাদবনি অমসুং ভারতকী ইন্দস্ত্রীএল এক্সপান্সনদা শেল থাদবনি।

মরুপশিং,

ঙসিদি, ভারতনা মাগী মেরিতাইম ইকোসিস্তেম মপুংফানা মপাঙ্গল কনখৎহল্লে। মসিনা মরম ওইদুনা লৈবাক অসিনা পোর্তশিং মোদর্নাইজ তৌরি, অনৌবা কেপাসিতী শেমগৎলি, অনৌবা কন্নেক্তিবিতী শেমগৎলি, তুরেলগী ঈশিং লম্বী পাকথোক চাউথোকহল্লি অমসুং মল্তি-মোদেল লোজিস্তিক নেৎৱার্কশিং শেমগৎলি। সগরমালাগুম্বা ইনিসিয়েতিবশিং অসি মসিগী অপুনবা মীৎয়েং অসিগী শরুক অমনি। মসিনা ললোন-ইতিক্কী মমল হন্থহল্লি, ইন্দস্ত্রীশিংদা অনৌবা থৌনা পীরি, অমসুং সমুদ্র মপালগী লমদমশিংদা অনৌবা খুদোংচাবশিং পীরি।

মরুপশিং,

মতম অমদা ভারত অসি মালেমগী খ্বাইদগী চাউবা দিফেন্স ইম্পোর্তরশিংগী মনুংদা অমা ওইনা খঙনরম্মি। মসিগী মখা পোনবা অসিনা ঐখোয়দা স্ত্রেতেজিক অমসুং সেক্যুরিতীগা মরী লৈনবা শিংনবশিং পুথোকখি। ঐখোয়না ২০১৪দা ওফিস পায়রকপা মতমদা, ঐখোয়না ফীভম অসি হোংদোক্নবা ৱারেপ লৌখি। মসিগীদমক্তা, মরু ওইবা পোলিসী রিফোর্মশিং পায়খৎখি, অমসুং দিফেন্স সেক্তরদা মশা-মশানা থাজবা থম্বা অসি মরুওইনা লৌখি। হায়রিবা হোৎনরিবশিং অসিগী মহৈ ওইনা, দিজাইন, মেন্যুফেকচরিং, অমসুং এক্সপোর্তকী অনৌবা খুদোংচাবশিং দিফেন্স সেক্তরদা থোরক্লি। ২০১৪ ফাওবদা লৈবাক অসিগী অপুনবা ঙাকশেলগী পোৎথোক পুথোকপা অসি চাউরাক্না লুপা করোর ৪০,০০০ ওইরম্মি। ঙসিদি মসি চাউরাক্না লুপা করোর ১,৮০,০০০ ওইরে।

অমসুং মরুপশিং,

নাকল অমরোমদা লৈবাক অসিদা দিফেন্স প্রদক্সন হেনগৎলক্লি, অদুগা নাকল অমরোমদা ঐখোয়গী দিফেন্স এক্সপোর্ত অসি মমাংদা অমুক্তা ওইখিদ্রিবা মওংদা হেনগৎলক্লি। ২০১৪ ফাওবদা, ভারতনা চাউরাক্না লুপা করোর ৭০০গী দিফেন্স প্রদক্তশিং এক্সপোর্ত তৌখি; ঙসিদি, হায়রিবা মশিং অসি লুপা করোর ৪০,০০০গী ময়াদা য়ৌরে। ভারতনা শাবা ঙাকশেলগী পোৎলমশিং হৌজিক মালেমগী লৈবাক ৮০ হেনবদা য়ৌরে।

মরুপশিং,

মশা-মরোমদোম লেপচবা ঙম্নবগী মাইকৈদা চংশিনবা য়াবা থবক কয়া অমসু লৈরি। ঐগী মীৎয়েংদা, মসি অহৌবা খক্তনি; অদুম ওইনমক, হৌখিবা চহি ১২ অসিদা খুমাং চাউশিল্লকখিবা অসিনা পোলিসীশিং অসি ময়েক শেংলে, মাইকৈ চুম্লে, অমসুং ঐখোয় পুন্না থবক তৌমিন্নরবদি লৈবাক অসিনা কয়া য়াম্না চাউনা অহোংবা পুরকপা ঙমগনি হায়বদু উৎলি।

মরুপশিং,

মেরিতাইম হেরিতেজকী মতাংদা লাকপা মতমদা, বেঙ্গলগী মমিং অসি মহৌশানা মাংজিল থানা লাকই। মসি ভারতকী সমুদ্রগী কন্নেক্তিবিতীশিংগীদমক মরু ওইবা মফম অমসু ওইরি। হুগলীগী ঈশিং অসিনা পুৱারী শেমগৎলকপগী খুদম ওইরি। মসিদা ললোন-ইতিক্কী অনৌবা চেপ্তরশিং হাংদোকপা অমসুং চাউখৎপগী অনৌবা খোঙচৎশিং হৌরকপা উরে। পোর্ত অসিগী মমিং অসি বেঙ্গলগী মচানুপা, লৈবাক অসিগী অহানবা ইন্দস্ত্রী মন্ত্রী, দোক্তর শ্যামা প্রসাদ মুঝর্জীগী মিংদা থোনখিবসি য়াম্না শিংথানিংঙাই ওই।

মরুপশিং,

ভারতনা মাংলোমদা চংশিল্লিবা অনৌবা মেরিতাইম চহিচা অসিদা নোংচুপ বেঙ্গলনা মরু ওইবা থৌদাং অমা লৌগদৌরি। রাজ্য অসিদা পোর্তশিং অমসুং ইন্দস্ত্রীশিংগী কেপাসিতী লৈ, লোয়ননা মেরিতাইম ইকোনোমী অসি অনৌবা অৱাংবা থাক্তা পুখৎনবগীদমক তেলেন্ত অমসুং স্কিলশিং মথৌ তাই। লাক্কদৌরিবা চহিশিংদা, নোংচুপ বেঙ্গল অসি ভারতকী ব্লু ইকোনোমী, মেরিতাইম মেনুফেকচরিং, লোজিস্তিক্স অমসুং কোস্তেল দিবেলপমেন্তকী মরুওইবা মফম অমা ওইরক্লগনি হায়না ঐহাক্না থাজবা থম্লি।

মরুপশিং,

ভারতনা মতম পুম্নমক্তা সমুদ্রশিংবু কোওপরেসনগী মেদিয়ম অমা ওইনা উদুনা লাক্লি। অদুম ওইনমক, ভারতনা শান্তি ঙাক্নবা হোৎনবদা মপাঙ্গলসু চপ মান্ননা মথৌ তাই হায়বা খঙই। শেন্মিৎলোনবু ঙাক শেনবগীদমক্তা সেক্যুরিতী অসি য়াম্না মরু ওই, অমসুং তুংলমচৎ শেমগৎনবগীদমক্তা মশাদা থাজবা থম্বা অসি তঙাইফদে। ঙসি, আই.এন.এস. অগ্রয়, আই.এন.এস. দুনাগিরী, অমসুং আই.এন.এস. সনশোদকনা হায়রিবা ৱাখল্লোন অসিগা লোয়ননা ভারতকী লান্মীদা শরুক য়াখ্রে। মখোয়না ২১শুবা চহিচাদা ভারতনা মশাগী ওইথোকপা য়াবশিং অদু মপুং ফাহনবগী মমি তারি। ভারতনা মশাগী তৌবা ঙম্বশিংদা থাজবা থম্লি অমসুং অনৌবা থাজবগা লোয়ননা খোঙজেল য়াংনা মাংলোমদা চংশিল্লি।

মরুপশিং,

য়াইফরবা থৌরম অসিদা, ঐহাক্না নেভীদা লৈরিবা ঐহাক্কী মরুপশিং অমসুং ঐহাক্কী সহরগী মীওই পুম্নমক্তা য়াইফ-পাউজেল পীজরি। ঐহাক্না অমুক্কা হন্না, ভারতকী নেভী, মাগী সাইন্তিস্তশিং, ইঞ্জিনীয়রশিং, ৱার্করশিং অমসুং লৈবাক অসিগী মীয়াম পুম্নমকপু থম্মোয় শেংনা নুংঙাইবা ফোংদোকচরি। হন্না-হন্না থাগৎচরি।

*****