ভারতকী প্রধানমন্ত্রী

লৈবাক্কীদমক মপুন্সি কৎথোকখিবা লৈবাক অসিগী মতিক মথৌনা লৈবা মপারিবু নিংশিংলিবা ঙসি অসি য়াম্না ফবা তঞ্জা অমনি । আচার্য় সত্যেনদ্রা নাথ বোসকী ১২৫ শুবা মপোক কুমওন অসিদা ময়াম পুম্নমকপু অমসুং অখন্ননা বৈগ্যানিক মরুপ মপাশিংবু য়াইফ পাওজেল পিজরি ।

মরূপশিং, চহি খুদিংগী চহি হৌবা নুমীৎতা শক্নাইরবা বৈগ্যানিকশিংগা শকখং মায়খংনদুনা ৱারি ৱাতাই শান্নবগী তঞ্জা অদু ঐহাক্না ফংজরে । ঙসি ময়ামগী মফমদা ঐহাক্না ৱাখল্লোন খরা ফোংদোকপা ফংজবা অসিদা ঐহাক নুঙাইবা ফাওই । ঙসি ঐখোয়না চহি অমা চুপ্না পাংথোক্কদবা আচার্য় সত্যেনদ্রা নাথ বোসকী ১২৫ শুবা মপোক থৌরম হৌদোক্লে, মহাক ইং ১৮৯৪গী নুমীৎ অসিদা পোকখি ।

নিং-তম খোংজংগী ৱাফম ওইগেরা, সাহিত্য ওইগেরা, সাইন্স ওইগেরা, শান্ন-খোৎনবা ওইগেরা, লম খুদিংদা বঙ্গালগী ইশিং অমসুং লৈবাক লৈহাওগী মমি অদু ময়েক শেংনা উবা ফংই । স্বামী রামকৃষ্ণ পরমহন্স, স্বামী বিবেকানন্দ, গুরুবর রবিন্দ্র নাথ তেগোর, সুভাশ চন্দ্র বোস, শ্যামা প্রসাদ মুখর্জী, বঙ্কিম চন্দ্র- শরদ চন্দ্র, সত্যজীত রে, ময়াম্না লম অমা হেক্তা হায়বিয়ু, লম অদুদা বঙ্গালগী শক্নাইবা অমা নত্রগা অমদি শোয়দনা উবা ফংগনি ।

ভারতকীদমক্তা চাওথোকচনিঙাই ৱাফমনি মদুদি লৈবাক অসিনা মালেম পুম্বদা বৈগ্যানিক কয়া পুথোক্তুনা পিরি । আচার্য় এস. এন. বোসকী মথক্তা জে. সি. বোস, মেঘনাদ সাহা, মখোয় কয়া অমনা লৈবাক অসিদা মোর্দন সাইন্সকী খোংফম চেৎশিনহনখি ।

মরূপশিং, ভারতকী সাইন্তিফিক রিসার্স ইকো-সিস্তেম অসি খোংফম চেৎনা লৈরি । হৌখিবা চহি তরা কুন অসিদা ভারত অসি সাইন্স অমসুং তেক্নোলোজীগী লমদা য়াম্না থুনা চাওখৎলক্লি । আইতি সেক্তরবু ওইগেরা, স্পেস তেক্নোলোজীবু ওইগেরা, মিসাইল তেক্নোলোজীবু ওইগেরা, ভারতনা মালেম পুম্বদা মসাগী মশক তাক্লি । ঐখোয়গী বৈগ্যানিকশিং, ঐখোয়গী তেক্নোলোজী এক্সপার্তশিংনা পাংথোক্লিবশিং অসি মালেম পুম্বগী চাওথোকচনিঙাই ওইবা হিরম্নি ।

ইসরোগী রোকেতনা অমুক্তংদা সেতেলাইত ১০০ হেন্না থাগৎখিবা মতমদুদা মালেম পুম্বনা মমীৎ লাওনা পাংদুনা য়েংনখি । মতম অদুদা ঐখোয় ভারত মচাশিংনা কোক ৱাংনা থাংগৎতুনা ঐখোয়গী বৈগ্যানিকশিংগী মায় পাকপা অদুদা চাওথোকচবা ফাওখি ।

মরূপশা, চাংয়েংশংদা অদোম্না মতম অমসুং পুন্সি কৎথোক্তুনা হোৎনরিবা অদু চংয়েংশংদা অদুমক লোয়খিবা তারগদি লৈবাক্কীদমক অদোমগীদমক মাংজবা ওইগনি । ঐখোয়গী ইনোভেশনশিংগী, ঐখোয়গী রিসার্সকী অরোইবা আউত কম লেপথোকপা মথৌ তাই । নখোয়না পুথোকখিবশিং অদুনা কনাগুম্বা লাইরবা অমগী পুন্সিদা মতেং ওইখিবা লৈব্রা, মিদল ক্লাসকী মীওই অমত্তগী পোৎলুম হন্থখিবা লৈব্রা?

ঐখোয়গী বৈগ্যানগী চাংয়েংশিং অসি ঐখোয়গী সমাজকী শেল থুমগী অৱাবা মায়োক্নরিবা অসি কোকহন্নবা ওইবা মতমদা, নখোয়গী অরোইবা আউত কম, নশাগী পান্দম অদু লেপথোকপদশু অরাইবা ওইগনি ।

ইফমদা খংহনবিরে মদুদি তোঙান তোঙানবা সাইন্তিফিক সংস্থানশিংনা সোলর পৱার, ক্লিন ইনর্জী, ৱাতর কঞ্জার্বেসন ৱেস্ত মেনেজমেন্ত অসিনচিংবা হিরমশিদা পুক্নিং চংদুনা আএন্দদি প্রোজেক্তশিং হৌদোক্লে । অসিগুম্বা মখলগী প্রোজেক্তশিং অমসুং মদুগী মহৈ অদু চাংয়েংশিদা অদুমক লৈহন্দবা অসিশু ঐখোয় পুম্নমক্কী ইথৌনি ।

শক্নাইরবা বৈগ্যানিকশিং অমসুং মহৈরোইশিং, ক্বানতম মেকানিক্সকী মতাংদা নখোয়না পারম্লগনি অমসুং থোইদোক হেন্দোক্না খংলম্লগনি । মসি ঐহাক্না পিখিদ্রি । অদুবু ঙসিগী ঐখোয়গী পুন্সি অসিদা ফিজিক্সনা পরা কয়া অমা তম্বিবা ঙম্মী হায়বা অদু ঐহাক খংই ।

য়াম্না লুবা গুহা অমগী মনুংদগী ক্লাসিকেল পার্তিকল অমা লাইনা নানথোকখিবা ঙমদে । অদুবু ক্বানতম পার্তিকল অমনা ঙম্মী ।  মরম অমা নত্রগা অমদগী ঐখোয় ইশানা ইশাবু নাইতোম তারকই । ঐখোয়না ঐখোয়গী খংজ হৈজবশিং অদু অতোপ্পা ইনস্তিত্যুতশিং অমসুং নেস্নেল লেবোরেতরিশিংগী বৈগ্যানিক মপাংশিংদা পাক্না খংহন উহন্দে । ঐখোয়গী অশেংবা পোতেন্সিএল অদু ফংনবা অমসুং ভারতকী বৈগ্যনিকশিংবু মখোয়গী মতিক চাবা মায়পাকপা অদু ফংনবা ঐখোয় ক্বানতম পার্তিকল অমগুম্না লৈগদবনি ।

মরূপশিং, দিবেলপমেন্ত, গ্রোথ অমসুং ত্রান্সফোর্মেসনগীদমক সাইন্স অমসুং তেক্নোলোজীনা থোইদোক হেন্দোকপা ইঞ্জিন অমসুং থবক তৌই । ঐহাক্না ময়াম পুম্নমক্কী মফমদা, লৈবাক্কী বৈগ্যানিক কাংলুপকী মফমদা অমুক হন্না হায়জরি মদুদি ময়াম্না ইনোবেসনগী মায়কৈ অদু ঐখোয়গী সমাজনা মায়োক্নরিবা শেল থুমগী খুদোং চাদবা অদু খংলগা লেপ্পিয়ু ।

ময়াম্না খংবিরিবা অদুনি লৈবাক অসিদা মীওই লাখ কয়া অমা অখন্ননা ত্রাইবেল কাংবুগী অঙাং লিশিং কয়া সিক্কল সেল এনেমিয়ানা শোকহল্লি । মসিগী মরমদা চহি তরা কুনগী মমাংদগী থিজিন্দুনা লাক্লি অদুবু মালেম পুম্বদা লৈনা অসিগী কোস্ত ইফেক্তিব সিম্পল সোলুসন ফংহনগনি হায়না ঐখোয় ৱারেপ লৌবা ঙম্লগদ্রা?

মালন্যুত্রিসনগী মায়োক্নরিবা অদু লাকশিন্নবা প্রোতিন মরাং কায়না য়াওবা য়াম্না হোংবা অনৌবা হৱাই মখল পুথোকপা য়াব্রা? মনা মশিং অমসুং হৱাই চেংৱাইগী ক্বালিতী হেঙ্গৎহনবা য়াব্রা? তুরেলশিংবু লু নান্না থম্নবা, তুরেলশিংবু মোৎশিনবদগী ঙাকথোক্নবা তেক্নোলোজীশিংদা থবক য়াংশিনবা য়াগদ্রা? মেলেরিয়া, ত্যুবরক্যুলোসিস, জপানিজ ইনসেফেলাইতিজ অসিনচিংবা লৈনাশিং ঙাকথোক্নবা অনৌবা হিদাক লাংথক, অনৌবা বেক্সিন পুথোকপা য়ারোইদ্রা?

মরূপশিং, মরম কয়া অমা লৈবদগী ঐখোয়না অহানবা ইন্দস্ত্রীএল রিভোলুসন অদু নান্থোকখি । ঙসিদি অদুগুম্লবা খুদোংচাবা অদু মাংহনবা য়াদ্রে । আর্তিফিসিএল ইন্তেলিজেন্স, বিগ দাতা এনালাইতিক্স, মেছিন লর্নিং, সাইবর-ফিজিকেল সিস্তেমস, জেনোমিক্স, অমসুং ইলেক্ত্রিক ভেহিকলশিংগুমবা সেক্তরশিং অসি নখোয়না পুক্নিং চংনিঙাই ওইবা নৌনা মায়োক্নরিবশিংনি । মসিগী তেক্নোলোজীশিং অমসুং ইনোবেসনশিং অসিদা মফম অমা থম্নবা হোৎনগদবনি ।

মরূপশিং, ঐখোয়গী লৈবাক অসিগী লৈজরিবা দেমোগ্রাফিক দিভাইদেন্দকী পাঙ্গলশিং অদুদা মালেম পুম্নমক্না কলকপা ফাওরমগনি । মদু খংলদুনা সরকার অসিনা স্তেন্দ অপ ইন্দিয়া, স্তার্ত অপ ইন্দিয়া, স্কিল দিবেলপমেন্ত মিশন, প্রধানমন্ত্রী মুদ্রা য়োজনা অসিনচিংবা প্রোজেক্তশিং পায়খৎলি ।

ইনস্তিত্যুতস ওফ ইমিনেন্স মিশনদা শরুক য়ানবগীদমক সরকারনা হাইয়র এদুকেসনগা মরি লৈনবা প্রাইবেত অমসুং পব্লিক সংস্থানশিংবু অখন্ননা ইনভাইত তৌরি । ঐখোয়না চৎন কাংলোনদা অহোংবা পুরক্লে, আইনদা অহোংবা পুরক্লে । পব্লিক সেক্তরদা লৈবা খনগৎলবা সংস্থান অদুদা লেপথোক্লবা মতম অমা লুপা কোতি ১০০০ ফাওবগী শেলগী মতেংশু পিরগনি ।

এস এন বোস নেস্নেল সেন্তর ফোর বেসিক সাইন্স অমসুং অসিগুম্বা মখলগী অতোপ্পা ইনস্তিত্যুতশিংদা ঐহাক্না হায়জরি মদুদি ইশাগী সংস্থানশিং অদু অৱাংবা থাক্কী সংস্থান ওইহন্নবা প্লান তৌবিয়ু, মদুগীদমক হোৎনবিয়ু । মহৈরোই অমসুং নহা ওইরিবা রিসার্সশিংবু মোতিভেত তৌনবা অদোমগী সংস্থানশিং অদুদা অসিগুম্বা মখলগী ইকোসিস্তেম অমা শেম্বিয়ু হায়না ঙসি ঐহাক্না অদোমগী মফমদা হায়জরি ।

করিগুম্বা বৈগ্যানিক খুদিংমক্না অঙাং অমমমখক সাইন্স তম্বিরবা, রিসার্সকী লমদা লমজিংবিনবা মতম খজিক্তং কায়থোকপিরগদি লৈবাক অসিগী মহৈরোই লাখ কয়াগী তুংগী পুন্সিদা মহৈ য়ানবা ওইগনি । আচার্য় এস.এন. বোসকী ১২৫শুবা মপোক থৌরম অসিদা মফমদা মসিনা খ্বাইদগী চাওবা শ্রদ্ধানজলি ওইগনি ।

মরূপশিং, ইং ২০১৭তা ঐখোয় পুম্নমক্না, ভারত মচা কোতি চামগা কুনমঙানা অনৌবা ভারতকী অমত্তা ওইনা ৱারে লৌখি । ইং ২০২২ ফাওবদা ঐখোয়গী লৈবাক মনুংদা লৈরিবা ফৎতবশিং অদু মুথৎনবা ৱারেপ । ঐখোয়গী নি-তম লান্মীশিংনা মংলম্বা মঙলান অদু মংফাওহন্নবা ৱারেপ ।

ইং ২০১৮, চহি অসি ৱারেপশিং অসিগীদমক্তা য়াম্না মরু ওই । চহি অসিদা ঐখোয়গী শক্তি পুম্নমক, ঐখোয়গী ইনর্জী পুম্নমক ৱারেপ অসি ফংনবা হোৎনবদা শিজিন্নগনি ।

লৈবাক অসিদা লৈরিবা মীপুম খুদিংমক্না, ইমুং খুদিংমক্না, সংস্থান খুদিংমক্না, গ্রুপ খুদিংমক্না, বিভাগ খুদিংমক্না, মন্ত্রালয় খুদিংমক্না মশা মশাগী মায়কৈদগী হোৎনবা মথৌ তাই । স্তেসন অমদগী ত্রেন থৌবা হৌরকপগা মিনিত ৫-১০গী মতুংদা খোংজেল য়াংনা চেল্লকপা অদুম্না ২০১৮ অসি মসাগী খোংজেল অদুদা পুরকপা মথৌ তাই । লৈবাক অসিগী বৈগ্যানিকশিং, সাইন্স অমসুং তেক্নোলোজীগা মরি লৈনবা মীওইশিংনা মখোয় মসাগী ইনোবেসন অমসুং রিসার্সকী পান্দম অদু ন্যু ইন্দিয়া হৌদোক্নবা মায়কৈদা থমগদবনি ।

অদোমগী ইনোবেসনশিং অদুনা লৈবাক অসিগী লাইরবা অমসুং মিদল ক্লাস কাংবুগী ফিভম ফগৎহন্দুনা, লৈবাক অসিগী ফিভম ফগৎহল্লগনি । আধারবু ওইগেরা, দাইরেক্ত বেনিফিত ত্রান্সফর ওইগেরা, সোইল হেল্থ কার্দ ওইগেরা, প্রোজেক্তশিং অদু সেতেলাইত নত্রগা দ্রোন্না মোনিতর তৌববু ওইগেরা, মসিগী খুদোংচাবশিং অসি নখোয়গী শেম শাখিবা ঙাক্নি । মতৌ অশুম্না অতৈ করি করি তৌবা য়ারিবগে, মতৌ করম্না জোব-লেদ ইকোনোমিক গ্রোথদা মতেং পাংবা য়াবগে, হিরম অসিদা বৈগ্যানগী ওইবা সংস্থানশিংনা চাওনা শরুক য়াবা য়াই ।

মরূপশিং, য়ুম কৈ শাবা, থক্নবা ইশিং, পৱার, রেলৱেজ, তুরেলশিং, লম্বী সরকশিং, এয়ারপোর্তশিং, ইথৈ লৌখোং, কমুনিকেসন্স, দিজিতেল ইনফ্রাস্ত্রকচর অসিনচিংবা তোঙান তোঙানবা লমশিংদা অনৌ অনৌবা ইনোবেসনশিংনা অদোম অদোমবু ঙাইদুনা লৈরি ।

সরকারনা নখোয়গীদমক লেপলি, নখোয়গী থৌনা অদু কনাদগীশু তাথদে, মরম অদুনা মায় পাকপা অদুশু তুংইন্নদুনা নখোয়গী নাক্তা শোইদনা লাক্কনি । নখোয়না মায় পাক্লগদি লৈবাক অসিসু মায় পাক্লগনি ।

মরূপশিং, ইফমদা খংহনবিরে মদুদি স্কুল অমসুং কোলেজশিংদা থোইদোক হেন্দোকপা লেকচর ১০০ হেন্না পাংথোক্নবা থৌরাং তৌরি । তোঙান তোঙানবা নেস্নেল অমসুং ইন্তরনেস্নেল কোনফরেন্সশিং অমসুং বিগ্যানগী ওইবা প্রোব্লেমশিংদা সোলুসনশিংগী কম্পিতিসন ১২৫শু এজেন্দাদা য়াওরি ।

ময়াম পুম্নমক্কী মফমদা ঐহাক্না য়াইফ পাওজেল পিজরি । ঐহাক্না থাজবা থম্লি মদুদি নখোয়গী চোকথবা নাইদনা হোৎনরিবা অদুনা, তুংদা লৈবাক অসি হেন্না ফবা ওইহল্লগনি ।

মহৈ য়ানবা অনৌবা চহি অমগীদমক ঐহাক্না য়াইফ পাওজেল পিজরি ।  

জয় হিন্দ!