ভারতকী প্রধানমন্ত্রী

নই দিল্লীগী ৭ লোক কলয়ান মার্গতা পাংথোকপা থৌরম অমদা মহাত্মা গান্ধীগী ১৫০শুবা মপোক নুমিৎকা মরি লৈননা পুথোকপা কলচরেল ভিদিও অহুম প্রধান মন্ত্রী শ্রী নরেন্দ্র মোদীনা ফোঙখ্রে।

থৌরম অদুদা ভারতকী ফিল্মগী মীওইশিং হায়বদি অমীর খান, সাহ রুখ খান, রাজকুমার হিরানী, কঙ্গানা রানাউত, আনন্দ এল. রাই, এস. পি. বালাসুব্রমনিয়ম, সোনম কাপুর, জেক্কী শ্রোফ, সোনু নিগম, এক্তা কাপুর, তরক মেহতা গ্রুপ, ই.তি.ভি. গ্রুপকী মীওইশিং শরুক য়াখি।

ৱারী শানবা অদুদা, মহাক্না লনাই ওইনা হায়জবদগী মখোয়গী চিল্লবা মতম কাইথোক্তুনা মহাত্মা গান্ধীগী মফমদা ইকায়খুম্নবা উৎপগীদমক ফিল্মগী শক্নাইরবশিংবু প্রধান মন্ত্রীনা থাগৎখি।

ফিল্ম অমসুং হরাও-কুম্মৈ ইন্দস্ত্রীনা মীচম মীয়াম পুক্নিং থৌগৎকদবা নুংঙাইবা অমসুং পুক্নিং লৌশিং ওইগদবা থৌরমশিং পুথোক্নবা প্রধান মন্ত্রীনা তকশিনখি। খুন্নাইদা অফবা অহোংবা পুরকপদা মখোয়না তৌবা ঙম্বশিং মহাক্না মখোয়দা অমুক হন্না নীংশিংখি।

গান্ধী, মালেম শম্নহল্লিবা ৱাখল্লোন

হৌজিক্কী মতমদা মহাত্মা গান্ধীনা পীরিবা ইথিলগী মতাংদা, প্রধান মন্ত্রীনা হায়খি মালেমগী মীপুম খুদিংমক শম্নহনবা ঙম্বা করিগুম্বা ৱাখল অমা, মীওই অমা হায়বা তারবদি মদু গান্ধীজীনি। মহাক্না হৌদোকপা আইন্সতাইন চেলেঞ্জগী মতাংদা প্রধান মন্ত্রীনা হায়খি ফিল্মগী মীওইশিংনা তেক্নোলোজীগী অঙকপা অসি গান্ধীগী ৱাখল্লোন মাংদা পুখৎপদা শীজিন্নগদবনি।

ভারতকী হরাও-কুম্মৈ ইন্দস্ত্রীগী ইথিল অমসুং তৌবা ঙম্বশিং

চাইনাগী রাস্ত্রপতিগা মমল্লাপুরমদা মহাক্কা ৱারী শানবদা রাস্ত্রপতিনা চাইনাদা দাঙ্গলগুম্বা ভারতকী ফিল্ম য়াম্না পাম্নবগী ৱারী প্রধান মন্ত্রীনা পাউদমখি। খা-নোংপোক এসিয়াদা রমায়ন পাম্নবগী মতাংদা মহাক্না পনখি।

ফিল্মগী মীওইশিংনা মখোয়গী মী শুমহৎপা ঙম্বগী গুন অদু ভারত্তা তুরিজম ফগৎহনবদা শীজিন্ননবা মহাক্না মখা তানা তকশিনখি।

তুংগী লম্বী

২০২২দা ভারতকী ৭৫শুবা নীংতম্বা থৌরম পাংথোক্কদবা অদু প্রধান মন্ত্রীনা ফোংদোকখি। মসিগী মতাংদা, ১৮৫৭তগী ১৯৪৭ ফাওবগী ভারতকী নীংতম লানগী অঙকপা ৱারীশিং অমসুং ১৯৪৭তগী ২০২২ ফাওবগী ভারত চাউখৎলকপা উৎনবা ৱারী পুথোক্নবা মহাক্না তিল্লিবা মীয়ামদা হায়জখি। চহিগী ওইবা মালেমগী হরাও-কুম্মৈগী মীফম অমা ভারত্তা পাংথোক্নবা থৌরাং তৌরিবা ৱাফম অমা মহাক্না পনখি।

ফিল্ম স্তারশিংনা প্রধান মন্ত্রীবু থাগৎখি

প্রধান মন্ত্রীগা ৱারী শানবগী থৌরম অমদা, মালেমদা মহাত্মা গান্ধীগী পাউজেল শন্দোক্নবা মতেং পাংনবা ৱাখল্লোন অমা হৌদোরকপগীদমক এক্তর অমির খান্না প্রধান মন্ত্রীবু থাগৎখি।

শক্নাইরবা ফিল্ম দিরেক্তর রাজকুমার হিরানীনা হায়খি ঙসি ফোঙলিবা ভিদিও অসি ‘চেঞ্জ ৱিথিন’ হায়বা থিম অদুদগী পুথোরকপশিংগী মনুংদগী অমনি। মহাক্না লেপ্তনা থৌনা হাপ্পা, লমজিংবা অমসুং শৌগৎপীবগীদমক মহাক্না প্রধান মন্ত্রীবু থাগৎখি।

মরম অমগীদমক ফিল্মগী মীওইশিং পুনশিন্নবা অমসুং থবক তৌমিন্ননবা মফম অমা শেম্ববীগীদমক প্রধান মন্ত্রীবু থাগৎলদুনা সাহ রুখ খান্না হায়খি অসিগুম্বা থবক অসিনা মালেম পুম্বদা গান্ধী ২.০ খুদোল তমদুনা মহাত্মা গান্ধীগী পাউতাকশিং অমুক হন্না শক্তাক্কনি।

লৈবাক শেমগৎপগী থবক্তা হরাও-কুম্মৈগী ইন্দস্ত্রীগী তৌবা ঙম্বশিং শকখঙবীবগীদমক শক্নাইরবা ফিল্ম মেকর আনন্দ এল. রাইনা প্রধান মন্ত্রীবু থাগৎখি।

হিরম খুদিংমক্তা ফিল্ম ইন্দস্ত্রী চাউখৎনবা মহাক্কী সরকারনা পীবা য়াবা মতেং পীগনি হায়না ফিল্মগী মীওইশিংদা প্রধান মন্ত্রীনা থাজবা পীখি।

মহাত্মা গান্ধীগী ১৫০শুবা মপোক নুমিৎকী থিমদা পুথোকপা ভিদিও অসি রাজকুমার হিরানী, ই.তি.ভি. গ্রুপ, তরক মেহতা গ্রুপ অমসুং ভারত সরকারগী কলচর মন্ত্রালয়না শেম্বা অমসুং পুথোকপনি।