ভারতকী প্রধানমন্ত্রী

ঙসি প্রধান মন্ত্রী মোদীনা গান্ধীনগরগী মহাত্মা মন্দির একজিবিসন কম কনভেন্সন সেন্তরদা ৯শুবা ভাইব্রেন্ত গুজরাত সমিৎ হৌদোকখি । থৌরম অদুদা উজবেকিস্তান, রৱান্দা, দেনমার্ক, জেক রিপব্লিক অমসুং মালতাগী চীংবা মঙাগা লোয়ননা সেক্তর কয়াগী ইন্দস্ত্রিগী চীংবশিং অমসুং ভারত অমসুং মপান লৈবাকশিংগী দেলিগেত ৩০,০০০ হেন্না শরুক য়াখি ।
দরকার ওইবা মচাকশিং অমসুং খুদোংচাবশিং হৌজিক মফম চানা লৈবনা ললোন-ইতিক্কী থবক অসি শেন থাদবা মীওইশিংনা নুংঙাইবা ফিবমদা লৈবদগী মালেমগী ললোন-ইতিক্কী চীংবশিং অমসুং কম্পেনশিংনা ভারত্তা শেন থাদনবা প্রধান মন্ত্রীনা খঙহনখি । প্রধান মন্ত্রীনা হায়খি, হৌজিক ভারত অসি ললোন-ইতিক্কী শেম-শাদুনা লৈরে । হৌখিবা চহি মরি অসিদা ঐখোয় মালেমগী ওইনা ললোন-ইতিক নুংঙাইবগী রেঙ্কিংদা মফম ৬৫ হাইগৎলে । মথং চহিশিংদা মকোক ৫০গী মনুংদা য়াওহন্নবা থবক কন্না শুনবা ঐনা ঐগী কাংবুদা খঙহনখি ।

প্রধান মন্ত্রীনা হায়খি, ৱাল্দ বেঙ্ক, আই এম এফ অমসুং মুদিকুম্বা মালেমগী ইন্সতিতুৎশিংনা ভারতকী ইকনোমীদা থাজবা পোকলে । ললোন ইতিক তৌবা অসি মমল হোংহন্নবা ঐখোয়না হোৎনরি । জি এস তি চৎনবদগী অমসুং তেক্স কোমথোকহনবদগী ত্রান্সসেক্সনগী মমল হন্থরে অমসুং থবকশিং লাইনা পাংথোক্লে । দিজিতেলগী থবকশিং অমসুং সিঙ্গল পোইন্ত ইন্তর্ফেসেসশিংনা মরম ওইদুনা ঐখোয়না ললোন ইতিক্কী থবকশিং য়াংনা পায়খৎলি ।

ভারতকী গ্রোথকী মরুওইবা অমসুং মসিগী অকনবা ইকনোমীগী ফন্দামেন্তেলশিং পল্লদুনা প্রধান মন্ত্রীনা হায়খি, চাংচত্ত জি দি পি চাদা ৭.৩ গ্রোথ লৈবা অসি ১৯৯১দগী ভারতকী সরকার অমগী খ্বাইদগী ৱাংবনি । ১৯৯১দগী ভারতনা মসিগী লিবেরালাইজেসনগী থবক হৌরকপদগী ভারতকী সরকার অমদা ইনফ্লেসন চাদা ৪.৬ লৈদুনা খ্বাইদগী নেম্বা ওইরি ।
মহাক্না হায়খি, ভারত্তা য়াম্না তোইনা লাকপশিংনা অহোংবা অমা , মাইকৈ অমসুং খোঙচেলদা অহোংবা লাক্লিবা অসি উবা ফংগনি । হৌখিবা চহি মরি অসিদা ঐগী সরকারগী পান্দমদি সরকার পীকশিনহনবা অমসুং লৈঙাক চাউথোকহনবনি । ঐখোয়গী ইকনোমী অসি কনখৎহন্না অকনবা মওংদা অহোংবা পুরক্নবা ঐখোয়না পান্দম থম্লি । ঐখোয়না মখা তানা মালেমদা খ্বাইদগী য়াংনা চাউখৎলক্লিবা ইকনোমী অমা মখা তানা ওইখিগনি ।

প্রধান মন্ত্রীনা হায়খি, ভারত অসি হৌজিক মালেমদা স্তার্দ-অপশিংগী খ্বাইগী চাউবা মফম অমা ওইরে অমসুং শেন থাদনবা চপ চাবা ফিবম শেমগৎনবা লৈবাক অসিদা মালেম থাক্কী রিসর্সকী খুদোংচাবশিং লৈরে । ঐখোয়গী নহারোলশিং থবক ফংনবা মেনুফেকচরিং চাউখৎহন্নবা ঐখোয়না থবক কন্না পায়খৎলি । মেক ইন ইন্দিয়াগী মখাদা লাক্লিবা ইনভেসমেন্তশিং ঐখোয়গী দিজিতেল ইন্দিয়া অমসুং স্কিল ইন্দিয়ানা শৌগৎলি ।

প্রধান মন্ত্রীনা মখা তানা হায়খি, ২০১৭দা মালেমদা লমকোয়বা মশিং খ্বাইদগী য়াম্না হেনগৎপশিংগী মরক্ত ঐখোয়সু য়াওরি । ২০১৬দা মালেমগী ওইনা চাদা ৭ হেনগৎপদা ভারতনা চাদা ১৪ হেনগৎখি । চহি মরি অসিদা পেসেঞ্জরশিং তিকেত ককপদা দিজিত অনি গ্রোথ লৈদুনা ঐখোয়না মালেমদা খ্বাইদগী য়াংনা চাউখৎপা এভিয়েসন মার্কেত ওইরি । ভারত অসি খুদোংচাবা কয়া মরাং কাইনা লৈবা লৈবাক অমনি । লৈবাক অসি অমত্তা ঙাইরবা দেমোক্রসি , দেমোগ্রাফী অমসুং দিমান্দ পীবা লৈবাক অমনি ।

ভাইব্রেন্ত গুজরাত সমিৎকী মতাংদা মহাক্না হায়খি, মসি হৌজিক মালেমগী মফম অমা ওইরক্লে অমসুং চীংবা কয়া শরুক য়াবা অসিনা মালেমগী ওইনা মতেং পীনবা অসি মখা তানা লৈবাক্কী কোনুং খক্তদা নত্তনা রাজ্যশিংগী কোনুংশিংদসু য়ৌরে হায়বা উৎলে।

মহাক্কী থৌশিলনা লমজিংবা লৈঙাক অমসুং চীংবা অদুগীদমক গুজরাতকী চীফ মিনিস্তর বিজয় রুপানিনা প্রধান মন্ত্রী মোদী থাগৎখি অমসুং লাইনা ললোন-ইতিক তৌবা য়ানবা পীবা য়াবা মতেং পীগনি হায়না ইন্দস্ত্রিশিংগী চীংবশিংদা থাজবা পীখি ।
থৌরম অদুদা উজবেকিস্থানগী প্রসিদেন্দ সাভকাত মিরজোয়োয়েভকা লোয়ননা দেনমার্ককী প্রধান মন্ত্রী লার্স লোক্কে রাসমুসসেন, জেক রিপব্লিক্কী অন্দ্রেজ বাবিস অমসুং মালতাগী দোক্তর জোসেফ মুসকাত শরুক য়াখি ।

ভাইব্রেন্ত গুজরাত সমিৎ ২০১৯গী মরুওইবা অমনা ভিদিও কনফরেন্সিংগী খুৎথাংদা ইজরেলগী প্রধান মন্ত্রী বেঞ্জামিন নেতানয়াহুনা অখন্নবা পাউজেল অমা পীরকখিবা অদুনি , মহাক্না হায়খি, ঐখোয়গী মীওই অনিগী মরক্ত অকনবা মরি লৈনবা অদু গুজরাতনা খুদম্নি । তুংগীদমক ঐখোয়না পুন্না ঙমখৈ লৈতবা খুদোংচাবা কয়া শেমগৎলি ।
নুমিৎ হুমনিগী মীফম অদুগী মরুওইবা থৌরমশিংদি গ্লোবেল ফন্দশিংগী মকোকশিংগা মীফম পাংথোকপা, অফ্রিকাগী নুমিৎ, এম এস এম সি মীফম, সাইন্স, তেক্নোলোজি,ইঞ্জিনিয়ারিং অমসুং মেথসমেতিক্স (স্তেম) ইজুকেসন অমসুং রিসর্সকী খুদোংচাবশিংগী মীফম য়াওরি । মসিগী মথক্ত, তুংগী তেক্লোলোজীশিং অমসুং স্পেস এক্সপ্লোরেসনগী একজিবিসন, পোর্ত লেত দিবেলপমেন্তগী সেমিনার অমসুং এসিয়াদা ভারত অসি ত্রান্স-সিপমেন্ত হব ওইহন্নবা খন্নবা, অমসুং মেক ইন ইন্দিয়াগী মাইপাকপগী ৱারীশিং য়াওরি ।

প্রধান মন্ত্রী নরেন্দ্র মোদীনা মতম অমদা গুজরাতকী চীফ মিনিস্তর ওইরিঙৈদা ২০০৩দা অহানবা ভাইব্রেন্ত গুজরাত সমিৎ পাংথোকখি । মতম অদুদগী হৌনা সমিৎ অসিনা লৈবাক অসিগী রাজ্যশিংদা অসিগুম্বা সমিৎশিং পাংথোক্নবগী অচৌবা থৌদাং লৌদুনা লাক্লি ।

***