ভারতকী প্রধানমন্ত্রী

য়োর এক্সিলেন্সী, প্রধান মন্ত্রী ক্রিস্তোফর লক্সন,

লৈবাক অনিগী মীহুৎশিং,

খুরুমজরি!

কিয়া ওরা!

ঐহাক অমসুং ঐহাক্কী মীহুৎ কাংবুবু তরাম্না ওকপিবা অমসুং মীয়োক-মীচান ফবা মতৌগীদমক ঐহাক্না ঐহাক্কী মরুপ, প্রধান মন্ত্রী লক্সনবু থাগৎপা ফোংদোকচরি। মহাক্না তরাম্না ওকপদা নুংশিবা মতৌ উৎতুনা ওকলেন্দগী অইংবা অসি ফাওবা ঙসিদি খরা ফবগুম তৌহল্লি। খোঙচৎ অসিগী মনুংদা ন্যু জীলেন্দগী মীয়ামদগী ঐনা ফংখিবা নুংশিবা অমসুং ইচিল-ইনাপ ওইবগী ৱাখল্লোন অসি ঐখোয়গী থম্মোয়দা মতম পুম্নমক্তা লৈহৌরগনি।

মমাং চহিদা প্রধান মন্ত্রী লক্সনগী ভারত খোঙচৎ অসিনা ঐখোয়গী মরীগী লম খুদিংমক্তা অনৌবা ইনর্জী পীখি। মহাক্কী লুচিংবগী মতৌ, ময়েক শেংবা ভিজন অমসুং অচেৎপা ফিরেপ অসিনা ভারত অমসুং ন্যু জীলেন্দগী মরক্তা লৈনরিবা মরুপ মপাং ওইবগী মরীদা অনৌবা ইথিল অমসুং মায়োল অমা পীরি। ঙসিদি, চহি ৪০গী মতুংদা ভারতকী প্রধান মন্ত্রী অমা লাক্লি। অমসুং ঐহাক্না মতম পুম্নমক্তা হায় মদুদি ঐহাক্কী মমাংদা লৈরম্বা মীওইশিংনা লোইশিল্লমদবা থবক কয়া অমা লৈরি মদু ঐহাক্না হৌজিক মখা চত্থরি। মরুপশিং, মসি ঐখোয়গী মরীদা অনৌবা পন্দুপ অমগী অহৌবনি।

মরুপশিং,

ভারত অমসুং ন্যু জীলেন্দগী দেমোক্রেতিক ভেল্যুশিংদা অচেৎপা থাজবা অসিনা ঐখোয় পুন্না মাংলোমদা চংশিনবদা মহৌশাগী ওইবা নুংঙাইবা অমা পীরি। হৌখিবা চহি খরা অসিদা, ঐখোয়না ঐখোয়গী মরীদা মমাংদা অমুক্তা ওইখিদ্রিবা মওংদা খুমাং চাউশিনহনবা ঙমখ্রে।

ঙসিগী মীফম অদুদা, ঐখোয়না ঐখোয়গী কোওপরেসন অসিদা অনৌবা লম হাপচিনবগী মতাংদা কুপ্না খন্ন-নৈনখি। ঐখোয়না ভারত-ন্যু জীলেন্দ মরীশিং স্ত্রেতেজিক পার্তনরশিপকী থাক্তা পুখৎনবা পুৱারী ওইরবা ৱারেপ লৌখ্রে। মসিগী ফ্রেমৱার্ক অসিগী মখাদা ঐখোয়না সেক্তর খুদিংমক্তা ময়েক শেংবা পান্দমশিং অমসুং তেঞ্জিবল ওইবা মহৈশিংগা লোয়ননা মাংলোমদা চংশিনগনি।

চহি অসিদা ঐখোয়না অতেনবা মতমদা ফ্রী ত্রেদ এগ্রীমেন্ত অমা লোইশিনখি। মসিগী মায় পাকপা অসিনা লৈবাক অনিমক্কী ইন্দস্ত্রীশিং, লৌমীশিং অমসুং নহাশিংগীদমক অনৌবা লম্বীশিং হাংদোক্লগনি। ললোন-ইতিক্কা লোয়ননা ঐখোয়না থাজবা, তেক্নোলোজী অমসুং তেলেন্তদা য়ুম্ফম ওইবা ব্লুপ্রিন্ত অমা শেমগৎলি।

হৌখিবা চহি অহুম অসিদা ঐখোয়গী ললোন-ইতিক অসি চাদা ৫০ হেনগৎলে। এফ.তি.এ.না লাক্কদৌরিবা চহি মঙা অসিদা ঐখোয়গী ত্রেদ ভোল্যুম শরুক অনি হেনগৎহন্নবা মপাঙ্গল লৈবা য়ুম্ফম অমা ওইগনি হায়না ঐখোয়না থাজবা থম্লি।

ভারত্তা দোল্লর বিল্লিয়ন কুন থাদনবগীদমক ন্যু জীলেন্দনা থাজবা পীরকপবু ঐখোয়না অখন্ননা তরাম্না ওক্লি। মসিনা ন্যু জীলেন্দগী কম্পনীশিংদা ভারতকী গ্রোথ স্তোরীদা মতম শাংনা পার্তনর ওইনবগী খুদোংচাবা পীগনি।

মরুপশিং,

ঐখোয়গী স্ত্রেতেজিক পার্তনরশিপ অসি মগুন লৈবা ওইহন্নবা, ঐখোয়না ঐখোয়গী লৈবাক অনিগী মপাঙ্গলশিং অসি থবক ওইনা পাংথোক্নবা কোওপরেসনদা ওইনা ওন্থোক্লি। ফিনতেক্কী লমদা, ঐখোয়না ভারতকী য়ু.পি.আই. অমসুং ন্যু জীলেন্দগী পেমেন্ত সিস্তেমশিংগা শম্নহন্নবা মাংলোমদা চংশিল্লি।

ঐখোয়না লৌউ-শিংউ, দাইরী অমসুং ফুদ প্রোসেসিংদা মতেং পীননবা অচেৎপা ফ্রেমৱার্ক অমা শেম্লে। ঐখোয়গী লৌমীশিং অমসুং শা-শন য়োক্লিবশিংনা মসিগী কান্নবা ফংগনি।

ন্যু জীলেন্দ অমসুং ভারত অনিমক্না ত্রেদিস্নেল মেদিসিনগী ইনাক খুল্লবা অমসুং অচৌবা ত্রেদিসন লৈ। ঙসি ঐখোয়না ঐখোয়গী হেল্থকেয়র কোওপরেসনদা ত্রেদিস্নেল মেদিসিনগী থৌদাং হেনগৎনবা য়ানখি।

ঙাকশেল অমসুং সেক্যুরিতীগী লমদা ঐখোয়গী হেনগৎলক্লিবা কোওপরেসন অসিনা ঐখোয়গী অচেৎপা স্ত্রেতেজিক ত্রস্ত অদু উৎলি। হৌখিবা চহিদা খুৎয়েক পীনখিবা দিফেন্স কোওপরেসন এগ্রীমেন্তনা ঐখোয়গী কোওপরেসনগীদমক মপাঙ্গল কনবা ফ্রেমৱার্ক অমা শেমগৎলে। ঙসি, ঐখোয়না ইন্দো-পেসিফিক্তা মেরিতাইম কোওপরেসনগী ফ্রেমৱার্ক অমদা য়ানখ্রে। বাইলেতরেল নেভেল এক্সরসাইজ, লোজিস্তিক সপোর্ত, অমসুং হায়দ্রোগ্রাফীদা তেংবাং পীনবনা ঐখোয়গী ম্যুচুএল কোওর্দিনেসন হেনগৎহনগনি।

মরুপশিং,

ঐখোয়গী মরীগী খ্বাইদগী চাউবা মপাঙ্গল অসি ঐখোয়গী মীয়ামগী মরক্তা লৈনরিবা মরীদা লৈ। ভারতকী কম্ম্যুনিতীনা কন্না হোৎনদুনা অমসুং হৈ-শিংবগা লোয়ননা ন্যু জীলেন্দদা মশক থোকপা মফম অমা শেমগৎলে। মখোয়বু য়েংশিনবীরিবা ন্যু জীলেন্দগী প্রধান মন্ত্রী লক্সন, সরকার অমসুং মীয়ামদা ঐহাক্না থাগৎপা ফোংদোকচরি।

ঙসি খুৎয়েক পীনখিবা কলচরেল কোওপরেসনগী মতাংদা মেমোরেন্দম ওফ অন্দর্স্তেন্দিং (এম.ও.য়ু.) না লৈবাক অনিগী মরক্তা আর্ত, কলচর, হেরিতেজ অমসুং ক্রিএতিব ইন্দস্ত্রীশিংদা এক্সচেঞ্জ হেনগৎহল্লগনি। ন্যু জীলেন্দ অসি ভারতকী মহৈরোয়শিংগীদমক মরু ওইবা মফম অমা ওইদুনা লাক্লি। ঐখোয়না ন্যু জীলেন্দগী য়ুনিভর্সিতীশিংদা ভারত্তা কেম্পসশিং হাংনবা হায়জরি।

চহি অসিদা, ঐখোয়না ঐখোয়গী লৈবাক অনিগী মরক্তা স্পোর্তসকী মরী শাগৎপগী চহি চাম্মা শুবা থৌরম পাংথোক্লি। চহি ১০০গী মমাংদা মেজর ধ্যান চান্দনা লুচিংবা হোকী তীম্না পুৱারী শেমখিবা অসিনা ঐখোয়গী স্পোর্তস পার্তনরশিপ অসিদা ইথিল পীরি। থৌরম অসিবু নিংশিংনবগীদমক, ঐখোয়না লৈবাক অনিমক্তা শান্ন-খোৎনবগী থৌরম কয়া অমা পাংথোক্লি। ঐখোয়না ক্রিকেৎ য়াওনা অতোপ্পা শান্ন-খোৎনবশিংদা মতেং পীনবা স্পোর্তস জোইন্ত এক্সন প্লান অমা শেম্লে। ভুবনেশ্বরদা ন্যু জীলেন্দ রগবি অমসুং রগবি ইন্দিয়াগী মরক্তা হৌখিবা কোচিং প্রোগ্রাম অসি অফবা অহৌবা অমা ওইরে।

মরুপশিং,

মালেমগী থাক্তা ভারত অমসুং ন্যু জীলেন্দ অসি থাজবা য়াবা পার্তনরশিং অমসুং নক্নবা মরুপশিংনি। ঐখোয়না থাজৈ মদুদি হৌজিক্কী মতমগী শীংনবশিং অসি থেংননবা য়ু.এন. য়াওনা মালেমগী ইন্সতিত্যুসনশিংদা রিফোর্ম অসি তঙাইফদে।

ঙসি, ঐখোয়না তেরোরিজমগী ইসু অসি থেংনবদা অমত্তা ওইনা থবক তৌনবা জোইন্ত ৱার্কিং গ্রুপ অমা লিংখৎলে। ভারত অমসুং ন্যু জীলেন্দগী মরক্তা তেংবাং পীনবা অসি ইন্দো-পেসিফিক্তা শান্তি, তংদু লৈতাবা অমসুং সেক্যুরিতীগীদমক য়াম্না মরু ওই।

মরুপশিং,

ঐহাক্না ময়াম পুম্নমকপু মাওরি ন্যু ইয়র, “মাতরিকী”গীদমক্তা থম্মোয় শেংনা য়াইফ-পাউজেল পীজরি। অদোম্না পনখিবগুম্না মফম অসিদা “মাতরিকী” হায়না মমিং থোনবা কনস্তেলেসন অসি “কৃত্তিকা নক্ষত্র” হায়না অরিবা মতমদগী ভারত্তা খঙনরক্লি। ঐহাক্না থাজবা থম্লি মদুদি “মাতরিকী”গী কুহ্মৈ অসিনা ঐখোয়গী মরীশিংবু থৱানমিচাকশিংগুম্না মঙাল থোকহন্নবা ইথিল পীগনি।

প্রধান মন্ত্রী লক্সন,

ন্যু জীলেন্দদা ঐহাক্কী খোঙচৎ অসি কাওঙমদবা অমা ওইহনবিবগীদমক্তা ঐহাক্না অদোমগী মরুপ-মপাং ওইবগীদমক, অদোমগী থৌদাং অদুগীদমক ঐহাক্কী থাগৎপা ফোংদোকচরি। রগবিদা তীম ৱার্ক অমসুং থাজবা অসি য়াম্না মরু ওইবগুম্না, ঐখোয়নসু অমগা অমগা থাজনবগা লোয়ননা মাংলোমদা চংশিনগনি। ঐখোয়না চপ মান্নবা তীমদা য়াওরি, মরম অদুনা ঐখোয়না থেংনগদবা অসি শীংনবশিং খক্তনি।

অদোমবু হন্না-হন্না থাগৎচরি।

***