ভারতকী প্রধানমন্ত্রী

ঐহাক “সরদার পতেল” হায়না হায়রক্কে অদুগা অদোম পুম্নমক্না পাওখুম পিবিরকউ, “মতম চুপ্পদা লৈবা ওইরসনু, মতম চুপ্পদা লৈবা ওইরসনু ।”

সরদার পতেল – মতম চুপ্পদা লৈবা ওইরসনু, মতম চুপ্পদা লৈবা ওইরসনু ।

সরদার পতেল – মতম চুপ্পদা লৈবা ওইরসনু, মতম চুপ্পদা লৈবা ওইরসনু ।

সরদার পতেল – মতম চুপ্পদা লৈবা ওইরসনু, মতম চুপ্পদা লৈবা ওইরসনু ।

ঐগী নুংশিজরবা ইরৈচাশিং,

ঙসিগী থৌরম অসি খরা তোঙাল্লি। হৌজিক ফাওবদা ঐখোয়না মতম পুম্নমক্তা য়ুনিতি দেদা অয়ুক অঙনবদা থৌরম অসি পাঙথোক্তুনা লাক্লি। হন্দক্কী মতম অসিদা খরা অহোঙবা অমা লাক্লে। ঐখোয় পুম্নমক নুমিদাংৱাইরম অসিদা পুল্লরে। অয়ুক্তা নাগরিক লাখ কয়ানা জাতিগী অপুনবা ৱাশক লৌদুনা রন ফোর য়ুনিতিদা শরুক য়াখি। রন ফোর য়ুনিতিদা মিয়ামগী থৌনা অদু ঐখোয়না উবা ফংখি। ঙরাং নুমিদাং ভারত পর্ব পেবিলিয়ন্দা অঙকপা প্রজেন্তেসনশিং ঐনা উখি। অদুগা হৌজিক জাতিগী ওইবা থৌরম অসিদা ঐখোয়না সরদার পতেলগী খুয়াখাদা পুল্লরি।

মরুপশিং,

মসি মালেমগী খ্বাইদগী ৱাঙবা মিতম, স্তেচু ওফ য়ুনিতিনি। মসিগী শেমগৎপদা জাতি পুম্বনা শরুক য়াবা, মফম অসিগী অখন্নবা ওরা, অমসুং য়ুনিতি দেগী অচম্বা ইনর্জি অমসুং ইনশপিরেসন অসিনা মফম অসিদা লাকপা মতমদা কনাগুম্বা অমগী থম্মোয়দা চাওথোকচবা অমসুং থাগত্‍‌পা ফোঙদোকই। অচৌবা জাতি অসিগী নাগরিক অমা ওইবগী চাওথোকচবা, অমসুং নীংতম্লবা মতুংদা নিংথৌ পানবা রাজ্য ৫৫০ হেন্না অমত্তা ওইনা পুন্সিনখিবা সরদার ভল্লভভাই পতেলগী মফমদা থাগত্‍‌পা ফোঙদোকচরি। লোয়নবিগী ৱারেপ অমগা লোয়ননা মহাক্না জাতি অসিবু অমত্তা ওইবগী থোঙদা অমত্তা ওইনা পুন্সিনখি।

মরুপশিং,

জাতি অমত্তগী নীংতম্বা অসি তঙায়ফদবা অমনি। জাতি অমানা নীংতম্বা ফংলবা মতমদা মশাগী তুংলমচৎ লেপচৈ। অদুবু নীংতম্বা অসি রিপব্লিক অমগী খুত্থাংদা অচুম্বা মায়কৈ ফঙই। রিপব্লিক অমানা ঐখোয়দা সংবিধানগী ফ্রেমৱার্ককি মনুংদা ৱারেপ লৌবগী লম্বি অদু উৎলি। সংবিধান অসিনা ঐখোয়বু মিয়ামদা ৱায়েল পিদুনা থম্লি। অমসুং অপুনবা অসিনা ঐখোয়দা জাতি অমা ওইনা মাংলোমদা চঙসিনবগী পাঙ্গল পিরি। মরম অসিনা ঐখোয়গী লৈবাক অসিদা নীংতম্বা নুমিৎ, রিপব্লিক দে, অমসুং য়ুনিতি দে পুম্নমক অসি জাতিগী কুহ্মৈ ওইনা য়াম্না থৱায় য়াওনা পাঙথোক্লি।

মরুপশিং,

ঙসি অমুক হন্না এক্তা নগরদা ভারতকি অপুনবগী অচৌবা মিত্‍‌য়েং অদু ঐখোয়না উবা ফংলে। চহি অসিগী নেস্নেল য়ুনিতি পেরেদ অসিসু তোপ-তোপ্পা থৌরম অমা ওইরে। মসিগী পেরেদ অসি ঐখোয়গী পুলিশ অমসুং সেক্যুরিতি ফোর্সশিংগী মথৌনা-মরিংজেলদা কত্থোক্লি। তেব্লোগী খুত্থাংদা জাতি অসিগী হেরিতেজ অমসুং এসপিরেসনশিং লৈবাক অসিগী মমাঙদা ফোঙদোকখ্রে। মরম অদুনা য়ুনিতি দে অসি হৌজিক্তি ওফিসিএল ওইবা থৌরমশিং খক্তনা লোইবা নত্রে। মীয়াম শরুক য়াবগী খুত্থাংদা মসি জাতিগী চাওথোকচনিংঙায় ওইবা থৌরম অমা ওইরে। থৌরম অসিদা ঐহাক্না লৈবাক্কি মীয়াম পুম্নমকপু নেস্নেল য়ুনিতি দেদা ঐহাক্কি য়াইফ-পাওজেল পিজরি। সরদার ভল্লভভাই পতেলগী খোঙদা থম্মোই শেঙনা ইকায় খুম্ননা খুরুমজরি।

মরুপশিং,

সরদার পতেল অসি ভারতকি পুৱারিদা লৈরিবা অদুগুম্লবা অথোইবা পর্সোনেলিতি অদুনি, মহাক য়াওদনা হৌজিক্কী ভারত অসি খনবদা অৱাবা ফাওই। ঙসি ঐখোয়না খঙলিবা ভারত অসিবু শমজিন্নহনখিবা অসি সরদার পতেলনি। পার্তিসিপেসনগী মতুংদসু হিমালয়দগী ভারত মহাসাগর ফাওবা ভারতপু শোই-ঙামদনা থমখিবা মিওই অদু সরদার পতেলনি।

মরুপশিং,

সরদার পতেলনা মসি তৌবা ঙমখি মরমদি মহাক্না ভারতকি মওং মতৌ অমসুং ৱাখল লৌশিং অদু খঙখি। ভারতকি খেন্নবা অসি মসিগী অশোনবা নত্তে হায়বা মহাক্না খঙলম্মী। মহাক্না খঙলমই মদুদি ভারতকি তোপ তোপ্পা মওং মতৌ অসি, তশেঙনমক, মসিগী অপুনবা অসিগী অশেংবা য়ুম্ফম্নি। চহি লিশিং কয়াদগী ঐখোয়না অসিগুম্বা মওংদা হিংমিন্নদুনা লাক্লি। মসিগী য়াম্না পাঙ্গল লৈবা অসিগী খুত্থাংদা ঐখোয়না খুমাং চাওশিনবা অমসুং খুঞ্জাও-লৈচাওবগী অৱাঙবা থাকশিং ফংখি।

মরুপশিং,

সরদার পতেলনা অমুক হন্না অদুগুম্বা ভারতকি য়ুম্ফম থোনখি । মহাক্না জাতি অসিগী জিওগ্রাফি খক্তমক শেমখিবা নত্তে; মহাক্না ইমোস্নেল য়ুনিতিগী খুত্থাংদসু লৈবাক অসিবু অমত্তা ওইনা পুন্সিনখি। গুজরাতকি সোমনাথ লাইশঙ অমুক হন্না শেমগৎপগী খুত্থাংদা মহাক্না জাতি অসিগী কলচরেল রিনাইসেন্সনসু হৌদোকখি।

মরুপশিং,

চহি অসিসু অদুগুম্বা অথোইবা থবক অদু চহি ৭৫ সুরকপনি। সোমনাথ লাইশঙগী ফিরাল অসি চহি লিশিং কয়াদগী এগ্রেসরশিংনা হঞ্জিন হঞ্জিন মাংহন তাকহন্নবা হোত্‍নরবসু চাওথোকচবগা লোয়ননা উরেপ উয়ুং তমখিবা অদুগুম্না মশা-মরোমদোম ইকায় খুম্নবগী ৱাখল্লোন অদুনা ঐখোয়দা সোমনাথ স্বভিমান পর্ব পাঙথোক্নবা থৌনা হাপ্পিখি। অমসুং চহি অসিদা জাতি অসিনা চপ মান্নবা থৌনাগা লোয়ননা থৌরম অদু পাঙথোক্লি।

ঐগী নুংশিজরবা ইরৈচাশিং,

ঙসিদি জাতিগী অপুনবগী অথোইবা থৌরমশিং, মালেমগী থাক্তা ভারতকি ৱাংখৎলকপা থাক, ঐখোয়গী ইকোনোমিক প্রোগ্রেশকি খোঙজেল য়াঙবা খোঙজেল, অমসুং কাশি বিস্বনাথতগী রাম মন্দির ফাওবা ঐখোয়গী শেংলবা সেন্তরশিং অমুক হন্না হিংগৎহনবা, পুম্নমক অসিনা ভারতনা চংশিল্লিবা মায়কৈ অদু তাকই। মসি সরদার পতেলনা ঐখোয়দা তাকপিবা লম্বি অমনি। অমসুং মসিগীদমক জাতি অসিনা মহাক্কী মফমদা মতম চুপ্পগী ওইনা লমন তোন্দুনা লৈরগনি।

মরুপশিং,

মমাঙ চহিদা ঐখোয়না সরদার পতেলগী ১৫০সুবা মপোক কুমওন পাংথোকখি। চহি অনিগী ওইনা লৈবাক শিনবা থুংনা থৌরমশিং অমসুং সেলেব্রেসনশিং পাংথোকখি। ঐখোয়না জাতিগীদমক অচৌবা রিজোলুসনশিং লৌখি অমসুং মদু মপুঙ ফাহন্নবা ৱাশকখি। অদুগাা ঙসি ঐখোয়না মহাক্কী ১৫১সুবা মপোক কুমওন পাঙথোক্লিবা অসিদা, জাতি অসিনা য়াম্না অতেনবা মতমগী মনুংদা হায়রিবা ৱারেপশিং অদু মপুঙ ফাহল্লে হায়না ঐখোয়না নুংঙায়বা ফোঙদোকচরি। চহি অনি অসিদা লৈবাক অসিনা মমাঙদা অমুক্তা ওইখিদবা মওংদা মায় পাকপা কয়া অমা ফংলে।

মরুপশিং,

সরদার পতেলগী ১৫০সুবা মপোক কুমওনগী থৌরমদা, মফম অসিদা মহাক্কী খোঙদা লেপ্লগা ঐহাক্না হায়বিরম্মী, “লৈবাক অসি নক্সেলিজম অমসুং মাওইশ্তকি তেত্রোরিজমদগী মপুঙ ফানা নান্থোক্লক্ত্রিফাওবা ঐখোয় পেনবা লৌরোয়।” অমসুং তশেঙনা চহি অমগী মতুংদা, ঙসি ঐখোয়না মফম অসিদা লেপলিবা মতম অসিদা, অদুগুম্লবা নেস্নেল রিজোলব অদু মপুঙ ফারে। ঙসি লৈবাক অসিদা নক্সেলিজমগী মকোকথোঙবদু থুগাইরে। ২০১৫দা লৈবাক অসিগী জিলা ১২৬ লেফ-ৱিং এক্সত্রিমিজম্না শোকহনখি। ২০২৬কি মার্চ ফাওবদা লৈবাক অসিদা হৌজিক ফাওবা নক্সেলিজম্না শোকহন্দবা জিলা অমত্তা লৈরমদে। দিকেদ কয়া হিংশা অমসুং ঈখেং তাখিদবা জিলা অমত্তা লৈরমদবা অদু হৌজিক চাওখত্‍‌পগী মরুওইবা লম্বিগী শরুক অমা ওইরক্লি। ঙসিদি হায়রিবা মফমশিং অসিদা লম্বিশিং পাকথোক-চাউথোক্লক্লি। মোবাইল নেতৱার্ক অসি মিশিংদা য়ৌরক্লি। এজুকেসন অমসুং হেল্থকেয়রগী খুদোংচাবশিং হেনগৎলক্লি। মতম অমদা শোয়দ-ঙামদবা মায়োক্নরম্বা নহাশিংনা হৌজিক্তি মহৈ-মশিং তম্বা, থবক ফংবা অমসুং প্রোগ্রেশকি অনৌবা খুদোংচাবশিং ফংলে।

মরুপশিং,

হন্দক্কী মতম অসিদা য়ুনিতি দে সেলেব্রেসন অসিদা নক্সলনা শোকহল্লবা লমদমশিংদগী ইমুং মনুংশিংনা মফম অসিদা অখন্নবা মিথুংলেন ওইনা ঐখোয়গা লোয়ননা শরুক য়াখ্রে। ঐহাক্না মখোয় পুম্নমকপু তরাম্না ওকচরি অমসুং মখোয় পুম্নমকপু মঙাল নাইরবা তুংগী য়াইফ-পাওজেল পিজরি। ঙসি ঐহাক্না লৈবাক অসিগী লমদমশিং অসিদা শান্তি থম্নবা অথোইবা কত্থোকপা অদুগুম্লবা থৌনা ফবা সেক্যুরিতিগী মিওই পুম্নমকপুসু ইকায় খুম্নজরি।

মরুপশিং,

ঙসিদি ভারত অসি হান্নদগী হেন্না সেক্যুর ওইরে। ঙসিদি ভারত হান্নদগী হেন্না ৱারেপ লৌরে । অমসুং মসিগী অচৌবা মরম অমদি ঐখোয়গী নাগরিকশিংগী থাজবা হেনগত্‍‌লকপনি। থাজবা অসি এচিবমেন্তশিংদগী লাকই। থাজবা অসি সরকার অমসুং সিস্তেমগী সেন্সিতিবিতিদগী লাকই। ঙসি ঐহাক্না অসিগুম্বা অচৌবা নেস্নেল এচিবমেন্ত অমগী মতাঙদা শোয়দনা ৱাফম থমজগে।

মরুপশিং,

ভারততা লায়রবা মুত্থৎনবা ৱারি শানবা অসি নীংতম্বা ফংলবা মতুংদগী চত্থরক্লি। লায়রবা মুত্থৎপগী মিংদা ভোৎ থাদখি। অদুবু লৈবাক অসিদা লায়রবগী তশেংবা ফীভম অদু করি ওইখিবগে হায়বদু ঐখোয় পুম্নমক্না খঙই। মশামক্না লায়রবা মুত্থৎনবা খোঞ্জেল থোকহনখিবশিং অদু হেন্না শেল থুমগী ফীভম ফগত্‍‌লকখি। হৌখিবা চহি খরসিদা ফিভমদা অহোঙবা লাকপা হৌরকখি। নুমিৎ খরনিগী মমাঙদা ৱার্ল্দ বেঙ্ককি রিপোর্ত অমা ফোংখি। রিপোর্ত অসিনা হায়রি মদুদি ২০২৪গী মমাঙদা চহি তরাদগী তরা ফাওবগী মনুংদা ভারত মচা ক্রোর ৫০না লায়রববু মায়থিবা পিখ্রে। হায়বদি মমাঙদা মিওই ১০০গী মনুংদা ২৭, হায়বদি মী শরুক মরি থোকপগী অমা কা হেন্না লায়ররমখিবা মফম অদুদা ঙসিদি মশিং অদু মিওই ১০০ খুদিংগী ৩দগী তানা হন্থরে।

মরুপশিং,

মসি অচৌবা মায়পাকপা অমনি হায়বা মালেম পুম্বনা য়ানরি। অদুবু মসি করম্না ওইখিবগে? মরমদি হৌখিবা দিকেদ কয়াদগী লৈবাক অসিনা লায়রবশিংগী য়াইফ-থৌরাং অমসুং শক্তি পিবদা মরু ওইবা থম্লি । চহি তরা অসিগী মনুংদা জাতি অসিনা লিক-প্রুফ সিস্তেম অমা ফংখি। দি.বি.তি.গী খুত্থাংদা দিল্লীদগী থারকপা লুপা খুদিংমক লায়রবশিংদা য়ৌখি। ফ্রি রেসন অমসুং ফ্রি হেল্থকেয়রনা লায়রবা ইমুংশিংদা শেল তিংহন্দবা ঙমহনখি। পরমেনেন্ত ওইবা য়ুম কোতি কয়া, তোইলেৎ কোতি কয়া, মৈখু চেন্দবা চাকশঙশিংনা লায়রবশিংগী পুন্সি লাইথোকহনখি। মিওই ক্রোর কয়ানা ইন্সুরেন্সকি ঙাকথোকপা ফংখি, মসিনা ক্রাইসিসকি মতমদা মতেং পাঙবগী হৌরকফম অমা ওইরকখি। ২০১৪গী মমাঙদা লৈবাক অসিগী মিওই কোতি ২৫ ফাওবা সোসিয়েল সেক্যুরিতি কোভরেজ অমত্তা তৌরমদে। ঙসিদি লৈবাক অসিগী চাওরাক্না মিওই কোতি ১০০ সোসিয়েল সেক্যুরিতি সেফতি নেত অমগা শম্নহল্লে।

মরুপশিং,

ঙসি জাতি পুম্বনা সরদার সাহেবপু নিংশিংবা অমসুং ইকায়খুম্নবা উৎপা মতমদা মহাক্কী থৱায়না ঐখোয়দা থৌজাল শোয়দনা পিবিরমগনি। অসিগুম্বা হোত্‍‌নরিবশিং অসিগী খুত্থাংদা ঐখোয়না লৈবাক অসিদগী লায়রবা মুত্থৎলগনি অমসুং চাউখৎলবা ভারত অমা শেমগত্‍‌লগনি ।

মরুপশিং,

নেস্নেল য়ুনিতিনা জাতি অমগী তংদু লৈতাবা অমসুং মায় পাকপগী গরেন্তি পিরি। অমসুং অসিগুম্বা মালেমগী তংদু লৈতাদবা মতম অসিদা অপুনবগী মরুওইবা অদু হেন্না হেনগত্‍‌লে। অদোম পুম্নমক্না খঙবিরিবা অদুনি ঙসি মালেম অসি তংদু লৈতাদবা মৈনা চাকপনি । মসি হৌখিবা চহি তরাগী খুজিং কয়াগী খ্বাইদগী অরুবা মতমশিংগী মনুংদা অমনি। মালেমগী লৈবাক কয়াগী মরক্তা লান থোক্লি। অচৌবা ইকোনোমিশিংনা শিংনবা কয়া মায়োক্নরি। রিসোর্সশিংগী ক্রাইসিস অসি মখা তানা হেনগৎলক্লি। মালেমগী শপ্লাই চেনশিং অসি চেন্থরক্লি। অসিগুম্বা মতম অসিদা ভারতকি অপুনবা, ভারত মচা পুম্নমক্কী অপুনবা অসি ঐখোয়গী খ্বাইদগী চাওবা পাঙ্গলনি। মরমদি মসিগী অপুনবা অসিনা ঐখোয়না নোংলৈ-নুংশিৎ খুদিংমক মায়থিবা পিবদা মতেং পাংগনি।

ইচিল-ইনাও অমসুং ইচল-ইচেশিং,

হৌখিবা থা খরশিদা মালেম অসি ইনর্জিগী ক্রাইসিস অমগা লোয়ননা লান্থেংনরিবা অদু ঐখোয়না উবা ফংলে। লৈবাক খরদ্দী পেৎত্রোল অমসুং দিজল লৌবদা লিমিৎ ফাওবা থমখি। হায়নরম্মী মদুদি ভারত্তা খ্বাইদগী চাওবা ক্রাইসিস অসি মায়োক্নগনি মরমদি মসিদা মিশিং অসি য়াম্না চাওই অমসুং পেৎত্রোলিয়ম মতীক চানা পুথোক্তে। হায়রিবা অৱাবশিং অসিগী মরক্তা এন্তি-ইন্দিয়া ফোর্সশিংসু এক্তিব ওইরকখি।

অদুবু মরুপশিং,

মসি ভারতকি পাঙ্গলনি। মালেমগী ইনর্জিগী ক্রাইসিস অসিগী ইম্পেক্তা অসি ঐখোয়গী নাগরিকশিংদা য়ৌহনবা ঐখোয়না অয়াবা পিখিদে। মসি লৈবাক অসিগীদমক শোয়দনা দিপ্লোমেতিক অমসুং স্ত্রেতেজিক ওইবা মায় পাকপা অমনি, অদুবু ঐখোয়গী মিয়ামগী অপুনবা অমসুং সোলিদরিতিনা চপ মান্নবা মরুওইবা থৌদাং লৌখি। জাতি অসিনা মপানগী শিংনবশিংগী সোলুসন থিবা মতমদা লৈবাক অসিগী মনুংদা অকক্নবা ফোর্সশিংনা তংদু লৈতাদবা থোকহন্নবা হোৎনবদা অরানবা অমসুং ৱাফমশিং শন্দোকপদা থৱায় য়াওখি। অদুবু ভারতকি মীয়াম্না জাতি অসিগা খুৎশম্নদুনা লেপ্লম্মী। মসি লৈবাক অসিগী খ্বাইদগী চাওবা পাঙ্গলনি। মসি ঐখোয়গী থাজবগী খ্বাইদগী মপাঙ্গল কনবা য়ুম্বিনি।

মরুপশিং,

সরদার পতেল অমসুং বাবাসাহেব অম্বেদকরগুম্বা অথোইবা লুচিঙবশিংনা ভারতকি সংবিধান শেমখিবা মতমদা মখোয়না লৈঙাকপা নাকল অমদি ওপোজিসন শাইদাকি সিস্তেম লিংখৎখি। মখোয়না থৌরাং অসিগী মরুওইবা অদুসু ফোঙদোকখি। গনতন্ৎর অমদা ওপোজিসনগী থৌদাংদি সরকারগী থৌশিলশিংগী মায়োক্তা লানথেংনবনি। অদুবু নুংঙায়তবা ৱাফম অমানা ঙসিগী ভারততা ওপোজিসননা মখোয়গী দ্য়ুতি থাদোক্তুনা ওপোজিসনদগী মশাবু অপনবা পীবা ওইনা ওন্থোক্লে। মসিগী ৱাখল নুংঙায়তবা অমসুং অশাওবা অসিনা লৈবাক অসিগী চাওখত্‍‌পগী লম্বিদা অথিঙবা থম্বা হৌরে। মসি ওপোজিসন নত্তে; মসি অপনবনি। মখোয়না মসিবু মখোয়গী রাজনিতিগী য়ুম্ফম ওইহল্লে। মখোয়না সংবিধানগী ইকায় খুম্নবা অমসুং থৱায়বু লান্না লমজিংবদা থৱায় য়াওরি।

মরুপশিং,

হায়রিবা ফোর্সশিং অসিনা জাতি অসিবু খায়দোক্নবা ঙম্নবা থৌরাংশিং লেপ্তনা চত্থরি। ভারত ইমাগী মচাশিংবু খাইদোক্নবা অমসুং অমগা অমগা লান্থেংননবা হোত্‍‌নরি। দিকেদ কয়াদগী হেন্না নুংঙায়তবা অমসুং ৱাখল ৱাবা অসিনা মরম ওইদুনা হৌজিক্তি মিওইশিং অসি ফোংনা থোরক্লে। মপান্দা কনা কনাবু চুমদনা উনরিবনো, কনানা কনাগুম্বা এন্তি-ইন্দিয়া ফোর্সশিংনা কনাবু শৌগত্‍‌লিবনো, কনানা ভারতকি য়েক্নবশিংগী লোল ঙাংলিবনো হায়বা ঐখোয়না খঙদোক্কদবনি। ঐখোয়না হায়রিবা মওংশিং অসি খঙগদবনি। ঐখোয়না অমত্তা ওইনা পুনশিনগদবনি অমসুং মখোয়গা মায়োক্নগদবনি। মরু ওইনা সোসিয়েল মিদিয়া অসি খুত্‍‌লাই ওইনা শিজিন্নবগী মওং, ৱাফম কয়া শন্দোকলিবা মওং, অমসুং ভারতকি মশক মাংহন তাকহন্নবা হোত্‍‌নরিবা অসিনা নাগরিক খুদিংমক পুন্না চৎমিন্নদুনা খুদোংচাদবশিং অসি থেংনমিন্নগদবনি। ঐখোয়না মনুং হঞ্জিনবা লমদমশিংদা নক্সেলিজম লোয়শিনখ্রে। অদুবু ইন্তেলেকচুএল নক্সেলিজমগী চৈথেং অদুদি লৈবাক অসিদগী হৌজিক ফাওবা মাংদ্রি। কোক লৈরবা নক্সলশিং অসিগী মায়োক্তা জাতি অসি মতম পুম্নমক্তা চেকশিন্না লৈগদবনি।

মরুপশিং,

ফিভমশিং অসি কয়া য়াম্না লুবা ওইরবসু, ঐখোয়না জাতিগী অপুনবা অসিগী অচৌবা মিসন অসি অমসুং মপাঙ্গল কনবা অমসুং তৌবা ঙম্বা ভারতকি মায়কৈদা চৎলিবা খোঙচৎ অসি থিংজিনবা য়াহল্লোয়দবনি। ঐখোয়না হৌজিক মথংগী অচৌবা পান্দমশিংগী মায়কৈদা থবক তৌগদবনি। ঐখোয়না জাতিগী ঙমখৈশিং মপুঙ ফানা ঙাক-শেনগদবনি। ঐখোয়না ইনফিলত্রেসন অমসুং মসিনা থোকহনবা দেমোগ্রাফিক ওইবা অহোঙবশিং থিংগদবনি। ঐখোয়না সেকুলর সিভিল কোদ অমগী মায়কৈদসু মাংলোমদা চঙশিনগদবনি।

মরুপশিং,

জাতি অমনা অচৌবা ৱারেপ লৌবা মতম খুদিংদা, অচৌবা ৱারেপ লৌবা মতম খুদিংদা অথিঙবা লাক্কনি, খুদোংচাদবা লাক্কনি, অমসুং নোংলৈ-নুংশিৎশিং মায়োক্নগদৌরিবনি। অদুবু ভারত অসি হৌজিক হনবা নাইররোই। “এক ভারত, শ্রেস্থ ভারত” হায়বা মন্ত্র অমসুং বিকসিত ভারত অমগী পান্দম অসি হৌজিক্তি ভারতকি লেংদবা ৱারেপ অমা ওইরে। ঐখোয়না অরৈবা থাদুনা কন্না হোৎনগনি। হুলকপা নোংলৈ-নুংশিৎ খুদিংমক ঐখোয়না ৱারেপ লৌদুনা মায়োক্নগনি। অদুবু ঐখোয়গী মিত্‍‌য়েংদি পান্দম অমখক্তদা লেপ্লগনি: ২০৪৭ ফাওবদা, জাতি অসিনা নীংতম্বগী চহি ১০০ মপুঙ ফারকপা মতমদা, মপাঙ্গল কনবা, তৌবা ঙম্বা, অমসুং চাওখত্‍‌পা ভারত অমা শেমগত্‍‌পা। ঐখোয়না হোত্‍‌নরিবা খুদিংদা অমসুং স্বর হৌনবা খুদিংদা মসিগী পামজবা অসি লৈগদবনি। মসিগী ৱাখল্লোন অসি ঐখোয়গী নিংশা শ্বর হোনবা খুদিং থম্মোইদা য়ৈগদবনি৷  মসিগী ৱারেপ অসিগা লোয়ননা ঐহাক্না অমুক হন্না নেস্নেল য়ুনিতি দেদা ময়াম পুম্নমকপু থম্মোই শেঙনা নুংঙায়বা ফোঙদোকচরি।

ইমা ভারতনা য়াইফরে!

ইমা ভারতনা য়াইফরে!

ইমা ভারতনা য়াইফরে!

বন্দে মাতরম।

বন্দে মাতরম।

বন্দে মাতরম।

অদোম্বু হন্না-হন্না থাগৎচরি।

***