ভারতকী প্রধানমন্ত্রী

তামিল নাদুগী রাজ্যপাল শ্রী রাজেন্দ্র আর্লেকরজী, মুখ্য মন্ত্রী সি জোসেফ বিজয়, কেন্দ্রগী মন্ত্রী-মন্দলগী ঐহাক্কী মরুপ শ্রী এল মুরুগনজী, শ্রী নৈনার নাগেন্দ্রনজী, ঐহাক্কী তামিল ইচিল-ইনাওশিং, বনক্কম।

ময়াম পুম্নমক্কা উন্নবা চেন্নাইদা লাকপা অসি য়াম্না নুংঙাইবা অমনি। ঙসি অসি তামিল নাদুগী পুৱারী ওইরবা নুমিৎ অমনি। ঙসিগী প্রোগ্রাম অসিদা লুপা করোর লিশিং তরাহুমদোইগী ময়াগী প্রোজেক্তশিং য়াওরি। ঐখোয়না লোইশিনখ্রবা প্রোজেক্ত কয়া অমা শঙ্গাখ্রে অমসুং অনৌবা কয়া অমগী উরেপ-উয়ুংসু তম্লে। খরনা নুমিৎ খুদিংগী চৎথোক-চৎশিনদা লাইথোকহনগনি। অতোপ্পশিংনা ইন্দস্ত্রী অমসুং ললোন-ইতিকবু মপাঙ্গল কনখৎহল্লগনি। পুন্না, মখোয়না তামিল নাদুগী নহাশিংদা থবক পীগনি। মসিগী থৌরম অসিদা রাজ্য অসিগী মীয়াম্বু ঐনা নুংঙাইবা ফোংদোকচরি।

ঙসিদগী নবরাত্রিগী য়াইফরবা কুহ্মৈ হৌরে। নবরাত্রিগী শেংলবা থৌরম, শিবা অমসুং শক্তি অনিমক্কী লমদম অমা ওইরিবা – তামিল নাদুগী শেংলবা লমদম অমসুং থৌরম অসিদা শরুক য়াদ্রিঙৈগী মমাংদা জালাকান্তেশ্বর মন্দিরদা ভগবান শিবাগী থৌজাল ফংজবগী খুদোংচাবা ফংবা –  পুম্নমক অসিনা মীকুপ অসি তশেংনা অখন্নবা ওইহল্লি। তামিল নাদুগী অশেংবা লমদম অসিদগী ঐহাক্না ঐহাক্কী লৈবাক মীয়াম পুম্নমকপু নবরাত্রিগী য়াইফ-পাউজেল পীজচরি।

মরুপশিং,

ঙসি অসি ভারত রত্ন জয়প্রকাশ নরায়ন অমসুং ভারত রত্ন নানাজী দেশমুখকী মপোক কুমওনসু ওইরি। শক্নাইরবা মীওই অনি অসিগী পুন্সি অসিনা ঐখোয়দা লৈবাক অসিগী সেবা তৌবদা হেন্না চাউনা কত্থোকপগা লোয়ননা থবক তৌনবা ইথিল পীখি। প্লেৎফোর্ম অসিদগী ঐহাক্না হায়রিবা শক্নাইরবা মীওই অনি অসিদা ইকায় খুম্নবা উৎচরি।

মরুপশিং,

মতম খরগী মমাংদা, ঐহাক্না আই.আই.তি. মাদ্রাসকী ব্রেন রিসর্সচ সেন্তরদা চৎপগী খুদোংচাবা ফংখি। হীরম অসিদা রিসর্চ তৌবনা পব্লিক হেল্থ সেক্তরদা অনৌবা খুদোংচাবা কয়া অমা পীবা য়াই। খোঙচৎ অসিগী মথক্তা ঐহাক্না চেন্নাই মেত্রোগী অতোপ্পা শরুক অমা মীয়ামদা কত্থোকপগী খুদোংচাবা ফংখি।

মরুপশিং,

লাইশঙশিংদগী হৌরগা মেত্রো ফাওবা, তামিল নাদুদা লৈরিবা অসিগুম্বা এক্সপরিয়েন্সশিং অসিনা মোদর্ন ইন্দিয়াগী স্পিরিৎ অদু উৎলি। ভারতনা মাগী কলচরেল শক্তিদগী ইথিল লৌরি, সাইন্তিফিক প্রোগ্রেসকী থোংদা মাংলোমদা চংশিল্লি অমসুং মোদর্ন ইনফ্রাস্ত্রকচরগী থোংদা অনৌবা খুদোংচাবশিং শেমগৎলি। ঐখোয়গী হেরিতেজ অমসুং তুংলমচৎকীদমক ঐখোয়গী এস্পিরেসনশিং অসি অমত্তা ওইনা মাংলোমদা চংশিল্লি।

মরুপশিং,

নুমিৎ খরনিগী মমাংদা, অদোমগী য়াইফ-মঙ্গোল অমসুং ঐহাক্কী সহরগী মীয়ামগী মীনুংশি অদুগী মতেংদগী, ঐহাক্না সরকারগী মকোক ওইদুনা চহি ২৫ শুরকপগী মরুওইবা মাইলস্তোন অমা লান্থোক্লে। ঐহাক্না ২০০১গী ওক্তোবরদা মুখ্য মন্ত্রী ওইনা ৱাশক লৌখি অমসুং মতম অদুদগী হৌনা লৈবাক অসিগী মীয়াম্না ঐহাকপু অহানবদা সি.এম. অমসুং মতুং তারকপদা পি.এম. ওইনা থবক তৌবগী খুদোংচাবা পীখি। চহি ২৫গী মতম অসিদা, দেমোক্রেসীগী য়ুম্বী অনিদা ঐগী থাজবা অসি লেপ্পা লৈতনা মপাঙ্গল কনখৎলক্লি: অহানবদা, লৈবাক অসিগী মীয়াম, অমসুং অনিশুবদা, কোওপরেতিব ফেদরেলিজম। ঐহাক্না মতম পুম্নমক্তা লৈবাক অসিগী চাউখৎপা অসি রাজ্যশিংগী চাউখৎপদগী লাকপনি হায়বা মন্ত্র অসিনা লমজিংদুনা লাক্লি।

মরুপশিং,

মুখ্য মন্ত্রী অমা ওইনা ঐহাক্না রাজ্যশিংগী অপাম্বশিংবু মশানা খঙজখি। মরম অদুনা, প্রধান মন্ত্রী ওইরবা মতুংদা, ঐহাক্না মখোয়শিং অদু মপুং ফাহনবা হোৎনবতা নত্তনা রাজ্য খুদিংমক্না মখোয়গী এস্পিরেস্নেল গোলশিং ফংহন্নবা হোৎনখি।

মরুপশিং,

মুখ্য মন্ত্রী ওইরিঙৈ মনুংদা ঐহাক্না করুনানিধিজী অমসুং অম্মা জয়ললিতাজীগা ৱারী শানবগী খুদোংচাবা কয়া ফংখি। প্রধান মন্ত্রী ওইরবা মতুংদসু ঐহাক্না জয়ললিতাজী, ও. পন্নরসেলভম-জী, ই. পালানিস্বামীজী অমসুং এম.কে. স্তালিন-জীগুম্বা লুচিংবশিংগা লোয়ননা থবক তৌবগী খুদোংচাবা ফংজখি। লৈঙাকশিং হোংলকখি, অদুম ওইনমক তামিল নাদুগী চাউখৎ-থৌরাং অমসুং মীয়ামগী সেবা তৌবগী ঐগী ৱারেপ অসি হোংখিদে। ঙসিদি, চপ মান্নবা ৱারেপ্না লমজিংদুনা, ঐখোয়না তামিল নাদুগী চাউখৎ থৌরাংগী খোঙচৎ অসি মুখ্য মন্ত্রী জোসেফ বিজয়জীগা খুৎশম্নদুনা মাংলোমদা চংশিল্লি।

মরুপশিং,

ঙসি, তামিল নাদুদা, অর্বান দিবেলপমেন্ত অসি ঐখোয়গী অচৌবা মরুওইবা অমনি। ঐহাক্না মতম পুম্নমক্তা থাজবা থম্লি মদুদি অর্বানাইজেসন অসি শিংনবদু নত্তে, মসি খুদোংচাবা অমনি অমসুং মসিদা পব্লিক ত্রান্সপোর্তনা মরু ওইবা থৌদাং অমা লৌরি। ইফিসিএন্ত ওইবা ত্রান্সপোর্ত অসিনা মীয়ামগী ‘ইজ ওফ লিভিং’ হেনগৎহল্লি। ঐখোয়না পুম্নমক্না খঙই মদুদি হেন্না ফবা ত্রান্সপোর্তকীদমক লম্বীশিং পাকথোকহনবা খক্তনা য়াদে। মোদর্ন সিতিশিংদা হোলিস্তিক ইনফ্রাস্ত্রকচর মথৌ তাই। মসিনা মরম ওইদুনা, হৌখিবা চহি তরা অসিদা, ঐখোয়না লৈবাক শীনবা থুংনা মেত্রো নেৎৱার্ক পাকশন্না পাকথোক চাউথোকহনখ্রে। ২০১৪দা, মেত্রো সর্বিসশিং অসি সহর মঙা খক্তদা মথৌ তৌখি; ঙসিদি, মখোয় অসি সহর ২৫দা মথৌ তৌরি। নেস্নেল মেত্রো নেৎৱার্ক অসি ২০১৪দা কিলোমীতর ২৫০ রোম শাংলমখি অদুগা হৌজিক্তি কিলোমীতর ১১০০ হেনখ্রে। চেন্নাই মেত্রোগী পাকথোক চাউথোকহনবনা মসিগী নেৎৱার্ক অসি হেন্না পাকথোক চাউথোকহনবদা ঐহাক নুংঙাইবা ফাওই। থবক তৌবা ইমুংশিং, মহৈরোয়শিং অমসুং সেনিয়র সিতিজনশিং য়াওনা চেন্নাইগী মীচম প্রজাগীদমক মখোয়গী খোঙচৎশিং অদু থুনা চৎনবা অমসুং খুদোংচাবা ঙম্নবা থবক অসি পায়খৎলি।

মরুপশিং,

ঐখোয়না ঐখোয়গী রাজ্যশিংবু মপাঙ্গল কনখৎহন্দুনা ভারতপু মপাঙ্গল কনখৎহনগদবনি। মরম অসিনা কেন্দ্র সরকারনা তামিল নাদুগুম্বা রাজ্যশিংদা মেন্যুফেকচরিংবু পুক্নিং থৌগৎলি। ভারত মচা খুদিংমক্না তামিল নাদুগী মেন্যুফেকচরিং সেক্তর, মসিগী অপীকপা ইন্দস্ত্রীশিং অমসুং মসিগী মনুংদা থবক তৌরিবা মীওই খুদিংমকপু চাউথোকচরি। ঙসিদি, ‘মেক ইন ইন্দিয়া’ নৎত্রগা ‘ভোকেল ফোর লোকেল’ ওইগেরা, কেন্দ্র সরকারগী থৌরাংশিং অসিনা তামিল নাদুদসু কান্নবা ফংহল্লে।

মরুপশিং,

কেন্দ্র সরকারনা রাজ্য খুদিংমক্তা পোত্থোক শন্দোকপগী চেন মপুং ফানা মপাঙ্গল কনখৎহল্লি। কম্পোনেন্তশিংদগী হৌরগা তেক্নোলোজী অমসুং ফিনিশ প্রদক্ত ফাওবদা পুম্নমক অসি য়াওরি। অমসুং মসিগী হোৎনরিবশিং অসিগী মহৈনি মদুদি ঙসি ঐখোয়না মালেমগী অনিশুবা খ্বাইদগী চাউবা মোবাইল মেন্যুফেকচরর ওইরে। ২০১৪দগী ঐখোয়গী ইলেক্ত্রোনিক্স এক্সপোর্ত অসি শরুক ১১ হেনগৎখ্রে, ঐখোয়গী দিফেন্স এক্সপোর্ত অসি শরুক ৫০ হেনগৎখ্রে, অমসুং ঐখোয়গী ইঞ্জিনীয়রিং এক্সপোর্তসু অনৌবা রেকোর্দ অমা শেমখ্রে।

মরুপশিং,

মেন্যুফেকচরিংদা হেনগৎলকপনা লৈবাক অসিগী নহারোলশিংগীদমক হকথেংননা অমসুং নাকোইননা থবক লাখ কয়া অমা পীরি, অমসুং মেন্যুফেকচরিংদা হেনগৎলকপদা তামিল নাদুগী মীয়াম্না থাগৎনিংঙাই ওইবা থৌদাং লৌরি। ঙসি, ঐখোয়না এদভান্স লুব্রিকেন্ত বেজ ওইল প্রোজেক্ত অমগী উরেপ উয়ুং তমখ্রে। মসিনা মফম অসিদা থবক ফংহন্নবা অনৌবা খুদোংচাবশিং ফংহল্লগনি অমসুং লৈবাক অসিগী ইম্পোর্ত হন্থহনবদা চাউনা মতেং পাংগনি। মপাঙ্গল লৈরবা মেন্যুফেকচরিং সেক্তর অমা শেমগৎপদা অফবা লম্বীশিং, রেলৱেজ অমসুং পোর্তশিংসু মথৌ তাই; অসিগুম্বা ইনফ্রাস্ত্রকচর অসি শেমগৎলকপা মতমদা, মসিনা থাক কয়াদা থবক কয়া অমা শেম্মী।

কন্সত্রক্সন এক্তিবিতীনা মীপুম খুদিংমক্তা থবক পীরি – ইঞ্জিনীয়রশিং, তেক্নিসিয়নশিং অমসুং শিন্মীশিং। মসিনা সিমেন্ত, স্তীল অমসুং ইক্বিপমেন্ত পুথোকপা ফেক্তরীশিংদা থবক পীবগী খুদোংচাবা লৈহল্লি, লোয়ননা অপীকপা কম্পনীশিংদসু থবক পীরি। মসিগী মথক্তা, প্রোজেক্ত অমা লোইরবা মতুংদা, হেন্না ফবা কনেক্তিবিতীনা ইন্দস্ত্রীশিং অমসুং সর্ভিসশিং হেনগৎহনবদা মতেং পাংই। মরম অসিনা ঙসি উরেপ উয়ুং তম্লিবা অমসুং শঙ্গারিবা রেল অমসুং লম্বীগী প্রোজেক্তশিং অসি তামিল নাদুগী চাউখৎ থৌরাংগীদমক য়াম্না মরু ওইগনি।

ঙসি লৈবাক শীনবা থুংনা পোর্ত ইনফ্রাস্ত্রকচর মপাঙ্গল কনখৎহন্দুনা শিপ্পিং সেক্তরবু অনৌবা অৱাংবা থাক্তা পুখৎপা ঙমহল্লে অমসুং মসিগী হোৎনবদা তামিল নাদুগী মরুওইবা থৌদাং লৈরি। মসিগী মতুং ইন্না, কেন্দ্র সরকারনা অথুবা মতমদা মরু ওইবা ৱারেপ অমা লৌখ্রে: থোথুকুদিদা লৈবা ভি.ও.সি. পোর্ত অসি চাউরাক্না লুপা করোর ১৭,০০০গী শেনফমগা লোয়ননা মালেমগী থাক্কী মেগা কন্তেনর অমসুং গ্রীন ইনর্জী হব অমা ওইনা শেমগৎলি। প্রোজেক্ত অসি লোইরবা মতুংদা, মালেমগী খ্বাইদগী চাউবা কন্তেনরগী জহাজশিং অসি মফম অসিদা য়াম্না লাইনা দোক তৌবা ঙম্লগনি। মসিনা তামিল নাদুবু ইন্দস্ত্রী অমসুং ত্রান্সপোর্তকী মালেমগী হব অমা ওইহনবদা মতেং পাংগনি।

হৌখিবা চহি খরা অসিদা, ভারতকী পোর্তশিংগী স্পীদ অমসুং ইফিসিএন্সী অনিমক ফগৎলক্লি। হেনগৎলক্লিবা স্পীদ অসিনা পোর্তশিংদা শিপশিংগী তর্ন-অরোন তৌবগী মতম শরুক অনিদা হন্থহনখ্রে। মসিনা ভারতকী পোত্থোকশিংবু হান্নদগী হেন্না থুনা মালেমগী কৈথেলশিংদা য়ৌহনখ্রে।

ঐখোয়গী ঙামীশিংনা মহাসাগরগী শেন্মিৎলোনগীদমক ঐখোয়গী ভিজন অসিদা মরুওইবা থৌদাং অমা লৌরি। মসিনা মরম ওইদুনা পি.এম. মতস্যা সমপদা য়োজনা অমসুং অতোপ্পা স্কিম কয়াগী খুত্থাংদা তামিল নাদুগীদমক লুপা করোর লিশিং কয়াগী প্রোজেক্তশিং অয়াবা পীখ্রে। মফম অসিদা ফিশিং হার্বরশিং অপগ্রেদ তৌরি, অমসুং ফিশিং লেন্দিং সেন্তরশিং শেমগৎলি। কোল্দ চেন ফেসিলিতীশিংদা অহেনবা মীৎয়েং থম্লি, অমসুং অতেকপা ঙাশিংবু থম্নবা ত্রান্সপোর্ত ভেহিকলশিং লৈনবগীদমক মতেংসু পীরি।

মরুপশিং,

কেন্দ্র সরকারনা ঐখোয়গী ঙামীশিংদা মতেং পাংলি- মসিদা চেন্নাই ফিশিং হার্বর মোদর্নাইজ তৌবা নৎত্রগা তামিল নাদুদা ‘সী-ৱীদ পার্ক’ অমা শেমগৎপা য়াওরি। ঙামীশিংনা কিসান ক্রেদিৎ কার্দ স্কিমগী খুত্থাংদা হৌজিক্তি ৱার্কিং কেপিতেলদা লায়না এক্সেস তৌবা ঙম্মী। ঙসিদি, লৈবাক অসিগী ঙা পুথোকপদসু খোঙজেল য়াংনা হেনগৎলক্লি। হৌখিবা চহিদা ঐখোয়গী সীফুদ এক্সপোর্ত অসি ভোল্যুম অমসুং ভেল্যু অনিমক্তা রেকোর্দ য়ৌখি। মসিনা ঙামীশিংগী ইমুং-মনুং অমসুং সমুদ্র মপালগী লমদমগী মীয়ামগী পুন্সি মহিং হেনগৎহনখি।

মরুপশিং,

ঐখোয়না তামিল নাদুবু লেপ্পা লৈতনা অনৌবা অৱাংবা থাক্তা য়ৌহনবা পাম্মি। মসি ফংনবগীদমক্তা কেন্দ্রগী মায়কৈদগী মথৌ তাবা মতেং পুম্নমক পীবদা ঐখোয়না মপুং ফানা থাজবা থম্লি। ‘চাউখৎলবা তামিল নাদু’গী খুত্থাংদা ‘চাউখৎলবা ভারত’কী মঙলান অসি মঙফাওনহন্নবা ঐখোয় পুন্না থবক তৌমিন্নসি। ৱাখল্লোন অসিগা লোয়ননা, ঐহাক্না অমুক্কা হন্না প্রোজেক্তশিং অসিগীদমক্তা ময়াম পুম্নমক্তা নুংঙাইবা ফোংদোকচরি।

থাগৎচরি, বনক্কম!!!

***