ভারতকী প্রধানমন্ত্রী

ভারত মাতাগী জয়

ভারত মাতাগী জয়

ঐনা বাবা সাহেব অম্বেদকর হায়রকপদা অদোমনা অমর ওইরসনু অমর ওইরসনু, হায়না অনিরক খুম্বীয়ু।

বাবা সাহেব অম্বেদকর – অমর ওইরসনু অমর ওইরসনু।

বাবা সাহেব অম্বেদকর – অমর ওইরসনু অমর ওইরসনু।

বাবা সাহেব অম্বেদকর – অমর ওইরসনু অমর ওইরসনু।

ফম্বাক থক্তা লেংশিনবীরিবা মন্ত্রীমন্দলগী ঐগী খোংলোই শ্রীমান জে.পি. নদ্দাজী, ছত্তিসগরগী মীয়াম্না য়ারবা মুখ্য মন্ত্রী রমণ সিংহজী, নেস্নেল এস.তি. কমীশনগী চেয়রমেন শ্রী নন্দ কুমার সাইজী, ছত্তিসগর সরকারগী অতৈ মন্ত্রীশিং অমসুং মশীং য়াম্না মফম অসিদা লেংবীরক্লিবা বীজাপুর বস্তরগী ঐগী নুংশিজরবা ইচিল-ইনাও, ইচে-ইচলশিং।

ঐনা মফম অসিগী আদি দেবী অমসুং দেবতাশিংবু ইকোক নোঞ্জরি মখোয়না বীজাপুর খক্তা নত্তনা বস্তরগী মীয়াম পুম্নমকপু মহৌশাগা লোইননা লৈবা তম্বীখি। ঐনা ঙসি বীজাপুরগী লৈমাইদগী অমর ওইরবা অথৌবা গৈন্সীবুসু নীংশিংজরি, মহাক্না বস্তরগী লমদম অসিনা ঙসিদগী চাউরাক্না চহি চানিগী মমাংদা অংগ্রেজশিংগা মায়োক্নদুনা থৱাই কৎথোকখি। অসিগুম্বা লুচীংবা অমা চাউরাক্না চহি চাম্মগী মমাংদা মহানায়ক বীর গুন্দাধুরগী শক্তমদা মফম অসিদা শাফোংবীরকখি। গৈন্সীবু ওইরো নত্রগা গুন্দাধুরবু ওইরো, অসিগুম্বা লোকনায়ক কয়াগী থৌনা ফবগী ৱারীশিং অদোমগী খুনুং ঈশৈশিংদা মীরোল অমদগী মীরোল অমদা শন্দোক্তুনা লাক্লি। ঐনা অফাওবা লমদম অসিগী থৌনা ফরবা মপারী মমোমলোইশিংগী মফমদা ইকোক নোঞ্জরি। লমদম অসিদা ঙসিসু থৌনা ফবগী ৱারীশিং ইরি।

মরুপশা, মফম অসিগী শিংনবশিংগা মায়োক্ননরদুনা মফম অসিগী চাউখৎ-থৌরাংগীদমক মতম লৈবা খিবিক্তা মফম অসিগী মীয়ামগী ঙাক-শেলগীদমক্তা মখোয়গী অহিং-নুংথিল কৎথোক্লিবা সেক্যুরিতী ফোর্সকী জৱান কয়া মরুম্না মখোয়গী মথ্বাই ফাওবা পুম্মুবা তৌদে। অদুগুম্বা জৱান অদুনা লম্বী শেম্বদা, মোবাইলগী তৱার য়ুংবদা, খু্ঙ্গংশিংদা হোস্পিতাল শাবদা, স্কুল শাবদা, ছত্তিসগরগী ইনফ্রাস্ত্রকচরবু মপাঙ্গল কলহনবদা মখোয়গী অচৌবা থৌদাং য়ারি। ছত্তিসগরগী চাউখৎ-থৌরাংদা লুপ্লিবা অসিগুম্বা ঙাক-শেলগী থৌমীশিং অসি মথ্বাই ফাওবা মাংনরি। নেক্সলাইৎ মাওৱাদীগী লান্দাদা থৱাই থাখ্রবা অদুগুম্বা থৌনা ফরবা জৱানশিংগীদমক্তা নীংশিং ফুরা শারে। ঐনা মখোয়গী মফমদা ইকোক নোঞ্জরি, ইকাই খুম্নবগা লোইননা শ্রদ্ধাঞ্জলি কৎচরি।

মরূপশা, এপ্রিল ১৪গী ঙসিগী নুমিৎ অসি লৈবাক অসিগী মীওই কোতি চাম্মা কুনমঙাগীদমক্তা য়াম্নমক মরু ওইবা নুমিৎনি। ঙসি ভারত রত্ন বাবা সাহেব ভীমরাও অম্বেদকরগী মপোক কুমওন্নি। ঙসিগী নুমিৎ অসিদা অদোম ময়ামগী মরক্তা লাকচদুনা আশীর্বাদ লৌনবগী তাঞ্জা ফংজরে, ঐগীদমক্তদি মসি লাইবক ফবনি। বাবা সাহেব অম্বেদকরগী মপোক কুমওন অসিদা অদোম্না খুৎ অনিমক থাংগৎপীদুনা ঐগা লোইননা হায়বীয়ু –

জয় ভীম – জয় ভীম 

জয় ভীম – জয় ভীম 

জয় ভীম – জয় ভীম 

জয় ভীম – জয় ভীম

অদোমগী বস্তর অমসুং বীজাপুরগী অতিয়াদা বাব সাহেবকী মিংলেন্না নীল্লিবা খোঞ্জেলনা, অদোম পুম্নমকপু য়াফ-পাউজেল পীররি। বাবা সাহেবকী মিংলেনগী নীল্লিবা খোঞ্জেল্লক্তা য়াওরিবা আশা, য়াওরিবা অনীংবা-অপাম্বা অসিবুসু খুরুমজরি।

মরূপশা, ঐখোয়গী সরকারনা শ্যামা প্রসাদ মুখর্জী আর্বান মিশন ছত্তিসগরগী লৈমাইদগী হৌদোকখি। প্রধান মন্ত্রী গ্রামীন আৱাস য়োজনাসু ছত্তিসগরগী লৈমাইদগী হৌদোকখি। থৌরাংশিং অসি জাতিগী থাক্তা লৈবাক্কী চাউখৎ-থৌরাং অসিবু খোংজেল পীবগী থবক তৌরি।

ঙসি ঐহাক্না অমুক হন্না ছত্তিসগর লাক্লিবা অসি ‘আয়ুশ্মান ভারত য়োজনা’গী অহানবা তাঙ্কক অমসুং ‘গ্রাম স্বরাজ অভিয়ান’ হৌদোক্নবা লাক্লিবনি। কেন্দ্র সরকারনা হৌখিবা চহি মরি অসিদা লাইরবা, দলিৎ, চৈথেং ফংলবা, শোৎথহৌরবা, নুপীশিং অমসুং ত্রাইবেলশিংগী থৌনা হাপ্ননবগীদমক শেমখিবা থৌরাং খুদিংমক্কী কান্নবা মখোয় খুদিংমক অদুদা ফংননবা, খোংজং অসিদগী লেপথোক্লি, গ্রাম স্বরাজ অভিয়ান অসি লৈবাক অপুনবদা ঙসিদগী মে ৫ ফাওবা চৎথগনি।

ঐনা থাজৈ মদুদি বাবা সাহেবকী কুমওন অসিদা ঙসি মফম অসিদা কেন্দ্র সরকার অমসুং রাজ্য সরকারগী হৌদোক্লিবা থৌরাং পুম্নমকসু চাউখৎপগী পুন্সিগী থৌরাং হোংদোক্নবগী অনৌবা রেকোর্দ শেম্বদা মাই পাক্লগনি।

নুংশিরবা ইচিল-ইনাওশিং, লাইরবী মমা অমগী মচা নুপা, অদুক্কী মতিক শোৎথরবা খুন্নাই অমদগী হৌরকপা অদোমগী খোংলোই অসিনা ঙসি লৈবাক অসিগী প্রধান মন্ত্রীসু ওইরিবা অসিসু বাবা সাহেবকী খুদোন অদুমক্ননি। মরূপশা ঐগুম্বা মীওই লাখ-কোতি কয়াগী নীংজবা, মখোয়গী থাজববু, মখোয়গী এসপিরেসনশিংবু, অপাম্ববু হৌদোকপীবদা বাবা সাহেবকী চাউরবা থৌদাং য়াওখি।

ইচিল-ইনাও, ইচল-ইচেশিং, ঙসি ঐগী মাংদা লৌমী ময়াম অমা লৈরি, লৌবুক্তা থবক শুবা মীয়াম অমা লৈরি, থবক তৌবা মী ময়াম অমা লৈরি, তোঙান তোঙানবা ওফিসতা থবক শুবা ময়াম অমা লৈরি। খরা অমনা মশানা থবক পীজবা ওইরমগনি, খরনা মহৈরোই ওইরম্বসু য়াই। অদোম ঐগী ৱাহং অমগী পাউখুম পীবীয়ু – কন্না খুমলক্ত্রবসু য়াগনি, পুক্নীংদা শোইদনা খনবীয়ু – করিগুম্বা কনাগুম্বগী পুন্সিদা হেন্না ফবা খরা তৌনবগী অপাম্বা পোক্লবদি, খরনা ওইরক্নবগী, খরনা ফংনবগী পান্দম লৈরবদি মখোয়না শরুক অনি হেন্না শুবরা শুদবরা? তৌবরা তৌদবরা? অদুগা করিসু তৌরোইদবা মীশক অদুনা করি তৌবগে, তুমদুনা লৈথোকপরা লৈথোক্তবরা? মপুক্নীংদা করিগুম্বা মঙলান অমা লৈরিবা মীশক অদুনা মীৎশেল খাংবরা খাংদবরা? মখোয় কন্না শুবরা শুদবরা? অদোম ইশানা ৱাহং অসি হংবীয়ু।

ইচিল-ইনাও, ইচল-ইচেশিং, লৌমীশিংনা থাজরবা মদুদি হন্দক নীংথিজনা নোং তাগনি অমসুং নোং নীংথিজনা তাবা হৌরবা, অদু ওইরবদি ঐঙোন্দা হায়বীয়ু লৌমীশিংনা খরগা হেন্না কন্না হোৎনবরা হোৎনদবরা? নোং চুরবা, নোং মংলবা, মখোয়না হোৎনবা হৌবরা হৌদবরা? মরমদি অদুগুম্বা অমংবা নোংশিং অদুগা লোইননা মখোয়গী মঙলানশিং অদু লোইনরিবনি।

ইচিল-ইনাও, ইচল-ইচেশিং, ঙসি বাবা সাহেবকী ইথিলনা বীজাপুরগী মীয়ামদা, মফম অসিগী লৈঙাক্তা মসিগী অনৌবা থাজবা অসিখক পীবা লাকচরিবনি, অনৌবা থাজবা অমা পোকহনবা লাকচরিবনি, অনৌবা অনীংবা অমা হৌদোকচবা লাকচরিবনি। ঐহাক মসি হায়জবা লাকচরিবনি মদুদি কেন্দ্রগী সরকারনা অদোমগী আশাশিং, অপাম্বশিং, অদোমগী অনীংবশিং, এস্পিরেসনশিংগা লোইননা লেপ্লি।

ইচিল-ইনাও, ইচল-ইচেশিং, জিলাশিং অসিদা লৈরিবা ইমাশিং অসিনা মখোয়গী মচাশিংগী মশা-মউ ফহনবা অসি মখোয়গী হক নত্তবরা? মখোয়সু ঈগী অৱাৎপা লৈহল্লোইদবনি। মখোয়গী অৱাংবসু নীংথিজনা য়ৌহনগদবনি। জিলাশিং অসিগী মীয়াম্না মখোয়সু লৈবাক অসিগী চাউখৎ-থৌরাংদা শরুক য়াহনগনি হায়বগী আশা তৌদবরা? লমদম অসিগী অঙাংশিং, ইচা নুপীশিংবু লাইরিক-লাইশু তম্বগী, মখোয়গী স্কিল দিবেলপমেন্তকী হক লৈতবরা? মখোয়গী অনীংবা লৈতবরা? হোস্পিতাল, স্কুল, লম্বীশিং, থক্ননবা অফবা ঈশিং, নীং খা তম্লবা মতুংদসু লৈবাক অসিদা ময়াম অমা ওইরক্লবা অসিদসু করিগুম্বা অৱাৎপা খরদি লৈরি মদুদি লৈবাক অসিগী চাম্মদগী হেনবা জিলাশিং ঙসিসু মহৌশাগী ওইবা মওংদগী শাথিনা শোত্থরি। মসিসু ঙক্নীংঙাইনি মদুদি শোৎথরে হায়রিবা জিলাশিং অসিদা মহৌশাগী ওইবা রিসোর্সশিং মরাং কাইনা লৈজরি। অদোমগী বীজপুর জিলা অসিদা লৈতবা করিবু য়াওবগে? লোইনমক লৈরি।

ইচিল-ইনাও, ইচল-ইচেশিং, অদোম্না খনবীরমগনি মদুদি ৱাফম অসি ঐনা মতৌ করম্না অদুক কন্না হায়বা ঙম্লিবনো? মফম অসিদা লাক্ত্রিঙৈগী মমাংদা ঐখোয়গী সরকারনা বীজাপুর য়াওনা জিলা ১০০দগী হেনবদা থিজিলহনখি অমসুং থৌবকশিং হৌদোক্তুনা মদুগী ফল অদু চাং য়েংখি। থা অহুমগী ঐখোয়গী এক্সপিরিয়েন্সনা হায়রি মদুদি জিলাশিং অসিগী মীয়াম পুম্নমক, জিলাগী লৈঙাকলোই, জিলাশিং অসিগী মীয়ামগী মীহুৎশিং, লৈকাই খুদিং, খুঙ্গং খুদিংনা করিগুম্বা খোংজং অসিদা য়াওশিল্লবদি আন্দোলন অমগুম্না পুম্নমক্না মসিদা শরুক য়ারবদি হৌখিবা চহি ৭০ অসিদসু নীং তম্লবা মতুংদা ওইথোকপা ঙমখিদবশিং অদু ঙসি ওইথোকপা ঙমগনি।

মরূপশা, অরিবা লম্বীদা চৎতুনা অদোম্না কৈদৌঙৈদসু পন্থুং অদু ফংবা খক ঙমলোই। অরিবা থবক-থৌওংনা মালেম অসি হোংদোকপা ঙম্লোই। মতমগী মতুং ইন্না মওং-মতৌসু হোংদোকপা তাই। করিগুম্বা অনৌবা পান্দমশিং ফংগে হায়রবদি অনৌবা মওংদা থবক তৌবা তাই। বীজাপুর য়াওনা লৈবাক অসিগী শোৎথহৌরবা জিলা ১১৫ অসিগীদমক্তসু ঐখোয়গী সরকারনা অনৌবা এপ্রোচকা লোইননা থবক তৌরি। এপ্রোচ অসি করিনো, মসিগী খুদম অমা ঐ অদোমদা পীজগে। মফম অসিদা মশিং য়াম্লবা লৌমী ইচিল-ইনাওশিং ফম্লি, য়াম্না লাইনা মখোয়না মসি খঙবা ঙমগনি। ঐখোয়গী লৌমী ইচিল-ইনাওশিংনা ফৌ থাই, চুজাক থাই, হৱাই থাই। ঐনা লৌমী ইচিল-ইনাওশিং অসিদা ৱাহং খরা হংবা পাম্মি – অদোম্না অদুগুম্বা লৌফমশিং অদুদা চপ মান্ননা ঈশিং পীবরা? ফৌদা পীবা ঈশিং অদুক্কী মতিক চুজাক্তসু পীবরা? মদুমক মনা-মশিংদসু পীবরা? অদোম্না খুম্বীরক্কনি পীদে। ফৌদনা হেন্না পী, অসিগুম্বা অসিগীনা অসুক পী, অসিগুম্বা অসিগীনা অসুক পী। তোঙান তোঙানবা লৌরোক্কীদমক্তা অদোম্না তোঙান তোঙানবা মওংদা থবক তৌবরা নত্রগা তৌদবরা? ইচম চম্বা লৌমীশিংসু মসুম্না তৌই। মতৌ অসুম্না তোঙান তোঙানবা মথৌ তারিবনিনা মখোয়গী অৱাবসু, মখোয়গী অশোনবসু, মখোয়গী শিংনবশিংসু তোঙান তোঙানবা মশানা তাবনি। মসিবু পুক্নীংদা থমদুনা জিলা খুদিংমকপু মখোয়গী মশাগী মথৌ তাবা মওংদা লালোং য়াৎপা তাই, চাউখৎ-থৌরাংগীদমক মখোয় মশাগী প্লান শেম্বা তাই। মফম অদুগী রিসোর্সশিংগী মতুং ইন্না পাংথোকপা তাই।

অদোমগা ৱারী শানরগা মফম অসিগী লৈঙাক্না অদোমগী মথৌ তাবা অমমমগী মতাংদা, মদু করম্না মপুং ফাহনগনি হায়বসিগী মতাংদা থৌরাং য়াৎকনি। য়াম্না অপীক অপীকপা খোংথাংনা অদোম্বু চাউখৎপগী খোংজেলদা মথক থোংবা থাক্তা পুখৎকনি। অসিগুম্বা থৌওং অপুনবা অসিদা কেন্দ্র অমসুং রাজ্যগী তীম, খুঙ্গং, ব্লোক্কী মীয়াম্না থোং মান্ননা চৎমিন্নগনি।

সরকারগী পান্দমদি থবক অসিবু ২০২২ ফাওবগী মনুংদা মপুং ফাহনবনি। অদোম্না খনবীবা য়াই কয়াদা চাউরবা থবক কোক্তা থোংগৎচরিবনো হায়না। হায়বদি লৈবাক অসিনা নীং খা তম্বগী চহি ৭৫ শুবগী থৌরম পাংথোক্লিঙৈদা, লৈবাক অপুনবদা হেল্থ অমসুং ৱেলনেস সেন্তরনা শন্দোক্তুনা লৈরম্লগনি। মসিদসু হৌজিক চাউখৎ-থৌরংগী লমজেলদা খরা শোৎথহৌরিবা জিলা ১১৫দা মপুং ওইনা পান্দম থমগনি।

ইচিল-ইনাউ, ইচল-ইচেশিং, হায়রিবা ৱেলনেস সেন্তরশিং অসিগী মথৌ করিগী তরিবনো? মসিগী মতাংদা ঐ অদোমদা শন্দোক্না হায়বা পামজৈ। ঐখোয়না হেল্থ অমসুং ৱেলনেস সেন্তরগী ৱা পল্লকপদা ঐখোয়না হোৎনজরিবা অসি অনাবশিংবু লায়েংবা অদুখক্তা নত্তে, নারক্কদবদগী থিংবা অসিসু ঐখোয়গী ৱাশক্নি। ঐখোয়গী লৈবাক্তা ব্লদপ্রেশরবু ওইরো, দাইবেতিসপু ওইরো লাইনাশিং অসি মশিং য়াম্না নানৈ। থমোইগী লাইনাগা মরি লৈনবা অৱাবশিং, ইশিং পুকচৎ, শোর হোনবদা ৱাবা, কেন্সর, হায়রিবা লাইনা মরি অসিগী মরমনা অনাবা চাদা ৬০গী থৱাই মাংল্লি। অদুবু মসি মতম লৈরিঙৈদা লায়েংহৌরবদি হেঞ্জিল্লক্ত্রিঙৈদা থিংবা ঙম্মি।

হৌজিক হেল্থ অমসুং ৱেনেস সেন্তরদসু অসিগুম্বা থৌরাং অসি হাপচিন্নবা হোৎনরি। মসিগী পাম্বৈনা মখল কয়াগী চাংয়েংসু লেম্না পাংথোক্নবা অকনবা থৌরাং লৌখৎলি।

মরুপশা, মতম চানা চাংয়েং পাংথোকপনা কান্নবা ফংহল্লি, মসি খুদমসু ঐ অদোমদা পীজগে। খনবীয়ু, চহি ৩৫ শুরবা নহা অমা চাংয়েং তৌবদা মহাক ব্লদ প্রেশর লৈরে হায়না খঙলবদি তুংলমচৎতা ওইরক্কদবা তমথিবা লাইনা কয়াদগী ঙাকথোকপা ঙমগনি। করিগুম্বা মাংজৌননা চাংয়েং পাংথোক্তুনা, মতম চানা হিদাক চাদুনা, য়োগ, হকচাং শাজেল নত্রগা মথৌ তাবা ঙাকশেল খরা লৌখৎহৌরবদি অচৌবা চাদিং অমসুং খুদোংথিবা অনি অসিদগী কনবা ঙমগদৌরিবনি।

ঐনা ঙসি ৱেলনেস সেন্তর শঙ্গারিঙৈদা চহি ৩০-৩৫গী ইচন্নুপী অমা মফমদুদা থেংনখি, মহাক দাইবেতিস নারে হায়বসি মহাক খঙজরমদে। দাক্তরদা লাক্তুনা মহাক্না হায়খি মদুদি ঐহাক ঈশিং য়াম্না খৌরাংবা পোকই, ঐ কোক ঙাওই, ঐহাক চোকথবা ফাওই; দাক্তরনা চাংয়েং তৌবা মতমদদি মহাক দাইবেতিসকী য়ামনা শাথিবা থাক্তা লৈরম্লে। চহি ৩০-৩২গী ইচল অদু মঙোন্দা করি লাইনা লৈ হায়বদু খঙজরমদে। অদুবু ঙসি ৱেলনেস সেন্তরদা লাকপদদি মহাক খঙলম্মি অমসুং হৌজিক মহাক করি চাগনি করম্না চাগনি অমসুং করম্না লৈগনি হায়বদু খঙবা ঙম্লগনি। মদু মহাক্না লাকশিন্দুনা অতৈ লাইনাশিংদগী মশা মরোমদোম ঙাকথোকচবা ঙম্লগনি। লায়েংদগী হেন্না মথৌ  তাবদুদা শাফু পীরিবা ৱাখল্লোন অসিবু হেল্থ অমসুং ৱেলনেস সেন্তর অসিনা খুঙ্গং খুঙ্গং শিনবা থুংনা য়ৌহনগদৌরিবনি।

হেল্থ অমসুং ৱেলনেস সেন্তর অমরোমদা লাইরবশিংগী ফেমিলী দাক্তর অমগুম্না থবক তৌগনি। মমাংঙৈগী মতমদা ময়াই ওইবা থাক অমসুং অচৌবা ইমুংশিংগী ফেমিলী দাক্তর লৈনরম্মি। হৌজিক্তি মসিগী ৱেলনেস সেন্তর অসি অদোমগী ইমুংমক্কী এক্সতেন্সনমক্কুম ওইরগনি, মসিনা অদোমগী নুংতিগী পুন্সিগা শম্নরগনি।

মরুপশা, আয়ুশ্মান ভারতকী ৱাখল অসি শুপ্নগী সেবা খক্তদা লোইবা নত্তে মসি মীয়াম্না শরুক য়ানবগী খোল্লাও অমসুনি মরমদি মসিনা ঐখোয়বু মশা মউ ফবা, মপুং ফাবা অমসুং অপেনবা ন্যু ইন্দিয়া অমা শেম্বা ঙম্নবনি। ঙসি আয়ুশ্মান ভারত থৌরাংগী অহানবা তাঙ্কক হৌরি। হৌজিক অতোপ্পা পান্দম অসি চাউরাক্না লাইরবা মীওই কোতি ৫০ রোমবু তমথিবা লাইনানা নারকপা মতমদা লুপা লাখ ৫ ফাওবগী, চহি অমদা লুপা লাখ মঙা, শেলগী তেংবাং পীনবগীনি। মসিগী মতাংদা খোংজেল য়াংনা থবক পাইখৎলি।

ঙসিদগী মতম খরগী মমাংদা মফম অসিগী জিলা হোস্পিতালদা দায়লাইসিস য়ুনিৎ হাংদোকপগী খুদোংচাবসু ফংজখি। ঐহাক মসি ফোংদোকচবা পামজৈ মদুদি প্রধান মন্ত্রী দায়লাইসিস স্কিমগী মখাদা হৌজিক লৈবাক্কী হোস্পিতাল ৫০০ হেনবদা লেম্না দায়লাইসিসকী খুদোংচাবা ফংহন্নগী থবক পাইখৎলি। মসিগী কান্নবা অসি চাউরাক্না অনাবা লাখ অনি মখাইরোম্না ফংখ্রে। ছত্তিসগরগী মেপ্তা খ্বাইদগী মখাদা উবা ফংলিবা সুকমা, দন্তেৱারা অমসুং বীজাপুর জিলাশিংদা পাইখৎলিবা চাউখৎ-থৌরাং অসি শিংথানীংঙাইনি, ঐনা মফম অসিগী সরকারদা থাগৎপা ফোংদোকচরি।

ছত্তিসগরবু চাউখৎপগী লম্বীদা হেন্না খোংজেল য়াংনা পুনবগীদমক্তা কেন্দ্র সরকারনা লালোং অনি থোক্না য়াৎতুনা থবক পাইখৎলি। অহানবা খোংথাংনা লমদম অসিদা হেন্না চাউখৎনবগীনি অদুগা অতোপ্পনা কঙাওনরবা নহারোলশিংবু ওইথোকপা য়াবা মওংদা চাউখৎপগী লম্বেল অসিদা অমুক হন্না তিলহন্নবনি। হৌখিবা চহি মরিরোম অসিদা ছত্তিসগর অমসুং মরু ওইনা বস্তরদা চাউখৎ-থৌরাংগী অঙকপা থৌরাং কয়া হৌদোকখ্রে। বস্তরগী লালহৌবনা শকহল্লবা মফমশিংদা কিলোমীতর চামরি শাংবা লম্বী শেমখ্রে। হান্না জীপ ফাওবা চংবা ঙম্লমদবা খু্ঙ্গংশিংদু হৌজিক চাং নাইনা চৎপা বস চেনবা হৌখ্রে।

সৌভাগ্য য়োজনাগী মখাদা বস্তরগী য়ুমথোং খুদিংদা ইলেক্ত্রিক কনেক্সন ফংহন্নবা হোৎনরি। য়ুমথোং খুদিংদা য়ৌরিবা উজালানা লৌমী, মহৈরোই, দুকান্দার, অপীকপা ললোন-ইতিক তৌবশিং, পুম্নমক্কী পুন্সিদা মঙাল অমা পুদুনা লাক্লগনি। বস্তরদা সোলর পম্প লিশিং কয়া য়েন্থোকপগী থবকসু পাইখৎলি। সোলর পম্প অসিনা লৌমীশিংদা অঙকপা ফংনা মতেং ওইররি। ঙসি লম অসোমদা স্কুল, কোলেজ, হেস্পিতেল, হেল্থ সেন্তর, সরকারনা চলাইবা দুকানশিং, বেঙ্কশিংগী ব্রাঞ্চশিং, এ.তি.এম.না থৌরাং পুম্নমক ফংহল্লি। মোবাইল তৱারশিং য়ুংবগী থবক পাইখৎলি। বস্তর অসি হৌজিক রেলগী থোংদা রায়পুরগা শম্নহল্লি।

ঙসি রেল সেক্সন অমগী থবক হৌদোক্লে। চহি অনিগী মনুংদা মসি জগদলপুর ফাওবা য়ৌরগনি। চহি অসিগী অরোইবা ফাওবদা জগদলপুরদা অনৌবা স্তীল প্লান্ত অমসু মথৌ তৌবা হৌরগনি। মসিদগী বস্তরগী নহারোল পুম্নমক্না মশিং য়াম্না থবক্কী খুদোংচাবা ফংলগনি।

জগদলপুরদা অনৌবা এয়রপোর্তসু শেম-শাগৎলি অমসুং মসি মথংগী থা খরগী মনুংদা মথৌসু পাংথোকপা হৌরগনি। এরোপ্লেনগী কনেক্তিবিতী পাইখৎপা অসিনা লমদম অসোমদা শেনমিৎলোন অসিবু অনৌবা মতোল অমদা পুখৎলগনি।

ন্যু ইন্দিয়াগা লোইননা ন্যু বস্তরনা মফম অসিগী মীওই লাখ কয়াগী পুন্সিদা লাইনা হিংবা ঙমহল্লগনি। চহি তরাগী খুজিং তরাদগী মখোয়গী পুন্সিদা লৈরম্বা অমম্বা অদুদগী মখোয়বু পুথোরক্লগনি। অনৌবা বস্তর, অনৌবা আশাগী বস্তর ওইরগনি, অনৌবা অপাম্বশিংগী বিস্তর ওইরগনি। হৌজিক্তি মসি হায়বা য়ারগনি মদুদি নুমিৎনা নোংপোক্তগী শোইদনা থোকচরবসু ছত্তিসগরগী চাউখৎপগী নুমিৎনা খারোমদগী থোরক্কদবা নুমিৎ অদু কুইররোই, বস্তরদগী থোরক্লগনি। মফম অসোমদা মঙান নাইরবদি লমদম অসি মঙাল নাইরগনি। মফম অসোমদা হরাও-নুংঙাইরবদি লমদম অসোমদা হরাও-তয়াম্বতনা থল্লগনি।

ইচিল-ইনাওশা, সরকারগী থৌরাংশিং অমসুং সেবাশিং অসিবু অদোম ফাওবা য়ৌহনবা, মসি তশেংনা মথৌ তাই, মসি মতম পুম্নমক্তা য়াম্না চাউবা শিংনবা অমা ওইদুনা লাক্লি। লম লম মান্নদবগী মরুমদা লৌরিবা অচৌবা মরম অসিগী মনুংদা মসিসু অমনি। অমসুং ঐহাক নুংঙাইবা পোকই মদুদি রমন সিংহজীগী সরকারনা মসিগী মতাংদা পুক্নীং চংলি, অফবা খোংথাং পাইখৎলি।

ঙৈহাক্কী মমাংদা ঐহাক জঙ্গলা বিকাস কেন্দ্র চৎননবগী তাঞ্জা ফংজখি। কেন্দ্র অসিগী নুংগী ৱাখল্লোন অসি মীয়ামগীদমক্তা মফম অমখক্তদা সরকারগী সেবাশিং ফংহনবনি মরমদি মসিনা মফম-মফম কোইচৎ চৎনদুনা মীয়ামগী মতম অমসুং ইনর্জী অরেম্বদা মাংহন্দনবনি। গ্রাম পঞ্চায়ৎকী ওফিস ওইরো, সরকারগী রাশনগী দুকান ওইরো, স্কুল ওইরো, খুদোংচাবশিং অসি মফম অমখক্তদা ফংহনবা হায়বসি য়াম্না চাউবা সেবা অমা ওইগনি।

ঐঙোন্দা হায়খি মদুদি অপুনবা লমদম অসিদা অসিগুম্বা মফম ১৪ শানবগী থৌরাং অসি সরকারগীনি। অসিগুম্বা চাউখৎ-থৌরাংগী কেন্দ্র অসিনা অতৈ রাজ্যশিংগীদমক্তসু মোদেল অমা ওইনা থবক তৌবা য়াই।

মরূপশা, লৈবাক অসিদা খল মান্নদবা মুথৎনবগী থৌওং অমদি কনেক্তিবিতীনি। মরম অসিনা হাইৱেবু ওইরো, রেলৱেবু ওইরো, এয়রৱেবু ওইরো নত্রগা আইৱেবু ওইরো – ইনফোর্মেসন ৱে, কনেক্তিবিতীদা শাফু পীরি। ফোন অমসুং ইন্তর্নেৎ অসি খ্বাইদগী মথৌ তাবা ওইরক্লিবা খোংচৎ অসিদা করিগুম্বা লমদম অমদা অফবা থৌরাং লৈত্রবদি মাংদা চখৎপা অসি অৱাবনি। মরম অসিননি বস্তরবু কনেক্ত তৌনবগীদমক বস্তর নেৎ প্রোজেক্ত ফেজ ৱানগী মাইখুম হাংদোক্লিবা অসি। প্রোজেক্ত অসিগী থোংদগী জিলা ৬তা চাউরাক্না কিলোমীতর চামরিরোম শাংবা ওপ্তিকেল ফাইবর নেৎৱর্ক তিংলে।

ঐঙোন্দা হৌজিক জাংগলাগী খুঙ্গংগী বি.পি.ও.সু য়েংহনখ্রে মসিনা মীয়ামগী চাগা হেনগৎহনবগা লোইননা মখোয়গী পুন্সি মহিং লাইথোকহন্নবগী থবকসু তৌগনি। ছত্তিসগরদা ভারত নেৎ প্রোজেক্তসু খোংজেল য়াংনা থবক পাইখৎলি। ঐঙোন্দা তমখি মদুদি গ্রাম পঞ্চায়ৎ লিশিং তরাগী মনুংদা লিশিং মরিনা ভারত নেৎকা শম্নখ্রে অমসুং লেমহৌরিবা থবক মথংগী চহি ফাওবগী মনুংদা মপুং ফাহন্নবগী থৌরাং তৌরি।

ঙসি চাউরাক্না কোতি ১৭০০ রোমগী লম্বীশিং উরেপ-উয়ুংসু তমখ্রে, লুপা কোতি ১৭০০। লম্বীশিং অসি বীজাপুরদা নত্তনা কাংকরে, কোন্দাগাও, সুকমা, দন্তেৱারা, বস্তর, নারায়ণপুর অমসুং রাজনান্দ খুঙ্গংদা রোদকী অনৌবা নেৎৱর্ক শেম শারগনি। প্রধান মন্ত্রী গ্রামীন সরক য়োজনাগী মখাদা কিলোমীতর ২৭০০, কিলোমীতর লিশিং অনি চাতরেৎতগী হেনবা লম্বী শেমগনি। বস্তর অমসুং সরগুঝাগুম্বা পাক-চাউরবা ত্রাইবেলশিংগী চিদাই অসি নোংথক্কী খুদোংচাবশিংগা শম্ননবা এয়রপোর্তশিংসু শেমগৎলি। তুংলমচৎতা লমদম অসিবু উরান য়োজনাদা তিলহন্নবা হোৎনগনি।

ইচিল-ইনাওশা, বীজাপুরদা ঈশিংগী অৱাবা কোকহন্নবগীদমক থক্নবা ঈশিংগী থৌরাংশিংগীসু ঙসি উরেপ-উয়ুং তমলে। মসিদা নত্তনা ইন্দ্রাবতী অমসুং মিঘালচল তুরেলশিংদা থোং অনি শাননবগী থবকসু ঙসি হৌরে।

ইচিল-ইনাওশা, সরকার অসি লাইরবশিং, দলিৎশিং, চৈথেং ফংলবশিং, শোৎথহৌরবা ত্রাইবেলশিংগী সরকারনি। হৌখিবা চহি মরিগী মনুংদা লাইরবা অমসুং ত্রাইবেলশিংগী য়াইফ-থৌরাংগীদমক্তা লৌখিবা ৱারেপ, অনৌবা কাংলোন ৱাফম অসিগী শাখিনি।

মরুপশা, ভেল্যু এদিসন, কয়াদা কান্নরিবা, মসি ঐনা ঙসি মফম অসিদা উরে। ঙসি য়োল্লিবা অতেকপা মঙ্গে অসি কিলোদা লুপা ১৭-১৮গী মখাদা শিৎলি। অদুবু করিগুম্বা মসিদগী মরু লৌথোক্তুনা ফজনা পেকিং তৌদুনা য়োল্লবদি লুপা ১৭-১৮গী মঙ্গে অদু কিলোদা লুপা ৫০-৬০ য়ৌই, হায়বদি মমল শরুক অহুম হেনগৎলি।

ইচিল-ইনাওশা, ঙসি ঐখোয়না মফম অসিদা বন-ধন য়োজনা হৌদোক্লে। প্রধান মন্ত্রী জন-ধন য়োজনা, বন-ধন য়োজনা অমসুং অদোম্না তাবীরমগনি ঐখোয়না বজেত্তা হায়খি গোবর্ধন য়োজনা। করিগুম্বা খু্ঙ্গংদা লাইরবদগী লাইরবদা বন-ধন, জন-ধন অমসুং গোবর্ধন, য়োজনা অহুম অসি ফংহল্লবদি খুঙ্গংগী শেনমিৎলোন হোংদোক্লগনি, মসি ঐ অদোমদা থাজনা হায়জরিবনি।

ত্রাইবেলশিংগী কান্নবশিংগী মতাংদা মিৎয়েং থম্লদুনা বন-অধিকারগী কাংলোনবু হেন্না চেৎশিন্নবা হোৎনরি। হন্দক্তা অচৌবা ৱারেপ অমগা সরকার অসিনা লৌরে, মদুদি ৱাগা মরি লৈনবা অরিবা কাংলোনশিংদা অহোংবা পুরকপা। মরূপশা, থাইনগী অরিবা কাংলোন্দা ৱা অসি উগী থাক্তা থম্লম্মি। অমসুং উগী থাক্তা থম্বনা মরম ওইদুনা ৱা য়ানবা, ৱাবু পুথোক পুশিন তৌবদা কাংলোনগী অথিংবা কয়া মায়োক্নরম্মি, অৱাবা ওইরম্মি।

অদুবু হৌজিক কেন্দ্র সরকারনা উমংগী কাংলোন্দা অহোংবা পুরক্তুনা হৌজিক ফাওবা উগী লিস্তা য়াওরম্বা ৱা অদু লৌথোক্লে অমসুং হৌজিক ৱাবু অথিংবা অমত্তা লৈতনা ললোন-ইতিক তৌবা য়রে, ৱা থাবা য়ারে, ৱা য়োনবা য়ারে।

ইচিল-ইনাওশা, ঈশিং অসি, লৈমাই অসি উমং অসি অদোমগীনি। মসিদা অদোমগী হক লৈ। ৱাখল্লোন অসিবু সরকারনা খঙলে অমসুং চহি ৬০ ফাওবা থৌরাং অমা চৎনরম্বা অদুদসু অহোংবা পুরক্লে। সরকারনা মিনরেলগা মরি লৈনবা অরিবা কাংলোনশিংদসু অহোংবা পুরক্লে। ঐখোয়না কাংলোন অমা শেমলে মদুদি হৌজিক মিনরেল লৌথোক্লিবমখৈ মদুগী শরুক অমা মফম অদুগী মীয়ামদা চাদিং তৌবা মথৌ তারে। মসিগীদমক্তা মিনরেল লৈবা জিলা খুদিংমক্তা দিস্ত্রিক্ত মিনরেল ফাউন্দেসন লিংখৎলে।

কাংলোন্দা অহোংবা পুরক্লবা মতুংদা ছত্তিসগরনা চাউরাক্না লুপা কোতি ৩,০০০দগী হেনবা অহেনবা শেনফম অনৌবা থৌরাং অসিগী মরমদগী ফংলে। সরকারনা কাংলোন অসিসু শেমখি মদুদি প্রধান মন্ত্রী মিনরেল সেক্তর ৱেলফ্যের স্কিমগী মখাদা চাদা ৬০দি অকোইবগী ফিভম ঙাক-শেনবা, পোলুসন কন্ত্রোল, হকশেলগী থবক, মহৈ-মশিং, নুপী অমসুং অঙাংগী য়াইফ-থৌরাংদা চাদিং তৌবা তাই।

ইচিল-ইনাওশিং, ত্রাইবেলশিংগী শেন্দাল লম্বীগা লোইননা লাইরিক-লাইশু তম্বগী মতাংদসু সরকারনা মরু ওইবা খোংথাং অমা ওইনা লৌদুনা থবক পাইখৎলি। হনদক্কী চহি অসিগী বজেত্তা অচৌবা থৌরাং কয়া ঐখোয়না লাওথোক্লে। সরকারনা পান্দম লেপথোক্লে মদুদি ২০২২ ফাওবদা ত্রাইবেলশিংগী মশিং চাদা ৫০দগী হেন্না খুন্দাবা ব্লোক খুদিংমক্তা নত্রগা য়ামদ্রবদা থাক অসিগী মীওই লিশিং ২০ লোম লৈবা মফম অদুদা একলব্য মোদেল রেসিদেন্সিয়েল স্কুল লিংখৎলগনি।

মরুপশা, শেনমিৎলোনগী মপাঙ্গল কলহনবা শেনমিৎলোনগী খল মান্নদবা অসি লোইশিন্নবগী অচৌবা পাম্বৈ অমদি বেঙ্কনি। ঙসিদি বেঙ্ককী থবক অসি তঙাই ফদবা মওংদা পুন্সিগা মরি লৈনরে। ঙসি ঐহাক মফম অসিদা বেঙ্ক ওফ ইন্দিয়াগী ব্রাঞ্চ অমা শঙ্গাবগী তাঞ্জাসু ফংজরে। ঐঙোন্দা তমখি মদুদি মীয়ামনা বেঙ্ককী মথৌ তারকপদা কিলোমীতর ২০-২৫ রোম চৎপা তারম্মি। মসিগী মথক্তা বেঙ্ককী স্তাফশিংগী মশিং ৱাৎপনা মরম ওইদুনা অৱাবা কয়া মায়োক্নবা তারম্মি। হৌজিক্তি ব্রাঞ্চ অসি হাংদোকপা অসিনা অদোম্না কান্নবা য়াম্না ফংগদৌরে।

ইচি-ইনাওশা, বেঙ্কতা একাউন্ত লৈবনা কয়াদা কান্নবা ফংহল্লি হায়বসি জনধনগী একাউন্ত লৈবশিংনা নীংথিজনা খঙই। সরকারনা লেপ্তনা হোৎনবনা মরম ওইদুনা ঙসি লৈবাক অসিদা একাউন্ত কোতি ৩১ হেন্না হাংখ্রে। ছত্তিসগরদসু একাউন্ত কোতি অমা লাখ ৩০ হাংখ্রে। মখোয়শিং অদু লাইরবা, দলিৎ, ত্রাইবেল, শোৎথরবা, মখোয়গী হংবীনবা কনাসু লৈত্রবা ঙাক্তনি।

ঙসি ঐহাক ছত্তিসগরগী ইচা নুপী সবিতা সাহুজীগী ই-রিক্ষাদা তোংজবগী তাঞ্জা ফংজখি। সবিতাজীগী মতাংদা ঐঙোন্দা তমখি মদুদি ইমুং মনুংদা মহাক অৱাবা খরা মায়োক্নরি, অদুবু মহাক্না মাইথিবা খক য়াজরমদে অমসুং ই-রিক্ষা থৌদুনা মাগী হিংননবা হোৎনখি। মহাক্না সদস্য সমিতীগী লম্বী খনখি। সরকারনসু মহাক্কী মতেং পাংখি অমসুং হৌজিক মহাক ইকাই খুম্নরবা পুন্সি অমদা হিংলি।

স্বচ্ছ ভারত মিশনবু ওইরো, স্বস্থ ভারত মিশনবু ওইরো, বেতী বচাও-বেতী পরাও য়োজনা পাকথোক-চাউথোকহনববু ওইরো, সুকন্যা সমৃদ্ধি য়োজনাবু ওইরো, অসিগুম্বা থৌরাং কয়ামরুমগী পাম্বৈনা ইচানুপীশিং-ইচলশিংবু মপাঙ্গল কলহন্নবা থবক সরকারনা পাইখৎলি।

ঐ ঙসি লৈঙাক্কা মরি লৈনবা ওফিসরশিং, শিন্মীশিং, মখোয়দসু হায়জরি মদুদি মখোয় মখোয়গী জিলাশিংবু চাউখৎপগী লম্বীদা খোংজেল য়াংনা মাংদা চখৎনবা ৱাশক লৌবীয়ু অমসুং মদু তৌদুনা উৎপীয়ু।

ইচিল-ইনাওশা, সরকারনা শুপ্নগী থৌরাং শেম্বা খক্তদা পুক্নীং চংবদা নত্তনা মখোয়গী মফমদা থৌরাংশিং অসি করম্না য়ৌহনগনি, অরোইবা মীশক অদুগী মফমদা করম্না য়ৌহনগনি হায়বসিগী মতাংদসু হোৎনরি। ঐনা অদোমদা হায়জরি মদুদি লৈবাক অসিগী ইকোন কোনবা মীশক অদুগী মপাঙ্গল কলহন্নবগীদমক সরকারনা পাইখৎলিবা থবক অসি মাংদা চখৎহন্নবা শরুক য়াবীয়ু। অদোম্না শরুক য়াবীবা অসিমক সরকার অসিগী থৌনা ওইরিবনি অমসুং থৌনা অসিমক ২০২২, নীং খা তম্বগী চহি ৭৫ ফারকপদা, ন্যু ইন্দিয়া শেম্নবগী ৱাশক অদু মপুং ফাহনগদৌরিবনি। বাবা সাহেব অম্বেদকর অমসুং মহাত্মা গান্ধীগুম্বা মহাপুরুশশিংগী মঙলানবু মঙফাওনহনগদৌরিবনি।

অমসুং মরম অসিনা অদোমদা হায়জরি মদুদি সরকারনা অদোমগী কান্ননবগীদমক্তা ফোংদোকচরি। ঐখোয় চাউখৎপগী লম্বীদা চৎকদবনি। অদোমগী অঙাংশিংবু স্কুলগী মহৈ-মশিং ফংহন্নবা, অদোমগী পোৎথোকশিংগী মমল মপুং ফানা ফংনবা, অদোম্না ইকাই খুম্নরবা পুন্সি মহিংদা হিংবা ঙম্নবা, হিদাক-লাংথক ওইরো, মহৈ-মশিং ওইরো, শেন্দাল লম্বীবু ওইরো, অদোমগী তঙাইফদবশিং মপুং  ফানবা, অমসুং মরম অসিগীদমক থবকশিং অসি পাংথোকপদা ঙাক-শেল লান্মীগী জৱান, অদোমগী মফম অসিদা স্কুল চৎথদুনা লৈনবা, ওজা লাকপা ঙম্নবগীদমক মখোয়গী মপুন্সি কৎথোক্লি।

লাকপীরো ঐগী ইচিল-ইনাওশিং, ইচলশিং, চাউখৎপগী লম্বীদা চৎলসি। লৈবাক অসিবু অনৌবা মতোলদা পুখৎলসি। পান্দম থম্লিবা জিলা ১১৫, আশা থম্লিবা জিলা ১১৫, মখোয়শিং অদু অহোংবা অমা পুরক্নবা ৱাশক লৌরসি। আয়ুশ্মান ভারতকী মঙলান কন্না হোৎনদুনা ঐখোয় মপুং ফাহল্লসি।

অনীংবা অসিগা লোইননা অমুক্কা হন্না অদোম পুম্নমকপু অসুক্কী মশিং য়াম্না লেংবীরকপগীদমক্তা, অসিগুম্লবা চাউরবা থৌরম অমা উমং অসিদা পাংথোকপীবগীদমক্তা ঐনা অদোম পুম্নমকপু হন্না হন্না নুংঙাইবা ফোংদোকচরি।

জয় ভীম – জয় ভীম, জয় হিন্দ।