ভারতকী প্রধানমন্ত্রী

য়োর এক্সিলেন্সী, অমসুং ঐহাক্কী ইচলনুপী প্রধান মন্ত্রী তাকাইচীজী,

লৈবাক অনিমক্কী দেলিগেৎশিং,

মীদিয়াগী মরুপশিং,

খুরুমজরি!

কোনিচি ৱা

ইন্দিয়া-জাপান এন্যুএল সম্মিৎকীদমক মহাক্কী অহানবা খোঙচৎ অসিদা প্রধান মন্ত্রী তাকইচীবু ভারত্তা তরাম্না ওকপদা ঐহাক নুংঙাইবা ফাওই।

মহাক্না জাপানগী অহানবা নুপী প্রধান মন্ত্রী অমসুং মীৎয়েং শান্না উবা ঙম্বা অমসুং মীয়াম্না পাম্নবা লুচিংবা অমনি। মসিগী মথক্তা, মহাক্না জাপানগী নারা প্রিফেকচরদগীনি, মসি ভারত অমসুং জাপানগী মরক্তা লৈরিবা বুদ্ধিস্ত হেরিতেজগী য়াম্না মরু ওইবা মফম অমনি।

মরুপশিং,

নুমিৎ খরনিগী মমাংদা জি.৭ সম্মিৎতা, হৌজিক মালেমগী ‌ওইরিবা ফীভম অসিদা, অমগা অমগা থাজনবা অসি ঐখোয়গী খ্বাইদগী চাউবা স্ত্রেতেজিক এসেৎনি হায়না ঐনা ফোংদোকখী। অমসুং ভারত-জাপানগী পার্তনরশিপ অসিনা স্তেন্দর্দ অসি মপুং ফানা থুংহনবা ঙম্বা অসিদা ঐহাক চাউথোকচৈ।

হৌখিবা দিকেদ কয়াদা ওতোমোতিবতগী ইলেক্ত্রোনিক্স ফাওবগী সেক্তর কয়াদা জাপান অসি ভারতকী গ্রোথ স্তোরীদা মরুওইবা মপাং অমা ওইদুনা লাক্লি, মসিনা মরুপ-মপাং ওইবগী অমসুং থাজবগী মমল য়াম্লবা রিজর্বর অমা শেমগৎলি।

অমসুং ঙসি, প্রধান মন্ত্রী তাকাইচীগী খোঙচৎকা লোয়ননা, ঐখোয়না ঐখোয়গী অখন্নবা স্ত্রেতেজিক অমসুং গ্লোবেল পার্তনরশিপকী অনৌবা পন্দুপ অমা হৌরি।

মরুপশিং,

ঙসিদি, ভারত অমসুং জাপান অনিমক মালেমগী খ্বাইদগী চাউবা শেন্মিৎলোনশিংগী মনুংদা অমা ওইরে। নীংতম্বা, চাউখৎপা অমসুং কাংলোনশিংদা য়ুম্ফম ওইবা ইন্দো-পেসিফিক অসি ঐখোয়গী অপুনবা প্রাইওরিতী অমনি।

লমদম অসিগী খ্বাইদগী চাউবা দেমোক্রেতিক অমসুং মার্কেত ইকোনোমীশিং ওইনা, ঐখোয়না ঙসি মরুওইবা ইনিসিএতিব কয়া অমা হৌদোক্লে। মসিগী খুত্থাংদা, ঐখোয়না পুন্না লমদম অসিদা শান্তি, তংদু লৈতাবা অমসুং খুমাং চাউশিনবগী লম্বী য়াৎলগনি।

মরুপশিং,

তেক্নোলোজী পার্তনরশিপ অসি ঐখোয়গী কোওপরেসনগী খ্বাইদগী মপাঙ্গল লৈবা য়ুম্বী ওইগনি হায়না প্রধান মন্ত্রী তাকাইচী অমসুং ঐহাক্না থাজবা থম্লি। মসিগী মঙলান অসি মঙফাওনহন্নবা, ঐখোয়না ঙসি এ.আই.গী লমদা জোইন্ত স্তেতমেন্ত অমা থোকখ্রে। ভারতকী এ.আই. ইকোসিস্তেমগী মনুংদা লৈবা মরুওইবা ইন্সতিত্যুসন কয়ানা ঙসি মখোয়গী জাপানগী পার্তনরশিংগা লোয়ননা য়ানৱারোলশিং খুৎয়েক পীখ্রে। জাপানগী প্রিসিজন তেক্নোলোজী অমসুং ভারতকী সোফৱেয়রগী মপাঙ্গলনা মালেমগী এ.আই. দিবেলপমেন্তদা অনৌবা থৌনা অমসুং শক্তি পীরগনি।

ঙসি ঐখোয়না দিফেন্স সেক্তরদা ভারত অমসুং জাপানগী মরক্তা অহানবা কো-দেবেলপমেন্ত প্রোজেক্তকী মতাংদা য়ানৱারোল অমা খুৎয়েক পীনখ্রে। নেভেল রেদিও এন্তেনাশিং য়াওবা প্রোজেক্ত অসিনা ঐখোয়গী দিফেন্স তেক্নোলোজী পার্তনরশিপকী অনৌবা পন্দুপ অমা হাংদোক্কনি। ঐখোয়না হৌজিক অমত্তা ওইনা রিজনেল শান্তি, সমুদ্রগী ঙাকশেল অমসুং কাংলোনশিংদা য়ুম্ফম ওইবা চৎন-কাংলোনবু মপাঙ্গল কনখৎহনগদবা ঙাকশেলগী তেক্নোলোজীশিং পুন্না পুথোক্কনি।

ফার্মাস্যুতিকেলশিং, মেদিকেল দিভাইসশিং অমসুং বাইওতেক্নোলোজীগী লমদা ঙসি খুৎয়েক পীনখিবা য়ানৱারোলশিংগী খুত্থাংদা ঐখোয়না মালেমগী হেল্থ সেক্যুরিতীদা মতেং পাংগনি। ভারতকী স্কেল অমসুং জাপানগী ক্বালিতী পুনশিন্নদুনা ঐখোয়না মালেমদা মমল হোংবা, থাজবা য়াবা অমসুং অওনবা পুরকপা হেল্থ সোলুসনশিং ফংহন্নবা থবক পায়খৎলগনি।

মরুপশিং,

ভারত-জাপান ইনভেস্তমেন্ত পার্তনরশিপ অসি লেপ্পা লৈতনা মপাঙ্গল কনখৎলক্লি। হৌখিবা চহিদা, অনৌবা বিজিনেস এগ্রীমেন্ত ১০০ হেন্না খুৎয়েক পীনখ্রে, মসিনা ভারত্তা জাপানগী ইনভেস্তমেন্ত দোল্লর বিলিয়ন ১০ হেনবা পুরক্লগনি। ঙসি ফাইনান্সিএল সর্ভিস এজেন্সীশিংগী মরক্তা য়ানখিবা অসিনা কেপিতেল অমসুং ইনভেস্তমেন্ত ফ্লোশিং হেন্না লাকহল্লগনি।

ঐখোয়গী পান্দম অসি ময়েক শেংই: লাক্কদৌরিবা চহি ১০দা জাপানদগী ভারত্তা য়েন ত্রিলিয়ন ১০গী ইনভেস্তমেন্ত লাকহনবা অমসুং ভারত্তা লৈবা জাপানিজ কম্পনীশিংগী মশিং শরুক অনি হেনগৎহনবা। ভারত্তা লেপ্তনা পাংথোক্লিবা রিফোর্মশিংনা ইজ ওফ দুইং বিজিনেস ফগৎহল্লে, অমসুং জাপানিজ কম্পনীশিংনসু মসিগী খুদোংচাবা লৌবা য়াই।

মরুপশিং,

ঙসিগী ওইরিবা তংদু লৈতাদবা মতম অসিদা, ভারত অমসুং জাপান অনিমক্না শেন্মিৎলোন অমসুং ইনর্জী সেক্যুরিতীগী মরুওইবা অদু মপুং ফানা খঙই। মসিগী ৱাখল্লোন অসিগা লোয়ননা, ঐখোয়না ঙসি ইকোনোমিক সেক্যুরিতীগীদমক জোইন্ত রোদমেপ অমা শেম্লে। মসিগী খুত্থাংদা, ঐখোয়না সেমিকন্দক্তরশিং, ক্বান্তম তেক্নোলোজী অমসুং এদভান্স মেতিরিএলশিংগুম্বা স্ত্রেতেজিক সেক্তরশিংদা সপ্লাই চেনগী রেসিলিয়েন্স মপাঙ্গল কনখৎহল্লগনি।

ঙসি ঐখোয়না ইনর্জী সেক্যুরিতীগী লমদা মরু ওইবা ৱারেপ কয়া অমসু লৌখ্রে। ইন্দিয়া-জাপান বাইও-গ্যাস ইনিসিএতিবকী খুত্থাংদা ঐখোয়না ভারত শিনবা থুংনা বাইও-গ্যাস অমসুং ওর্গানিক ফর্তিলাইজর প্লান্ত লিশিং অমা লিংখৎপদা মতেং পাংগনি। মসিনা ঐখোয়গী ‘গোবর-ধন’ ইনিসিএতিববু হেন্না মপাঙ্গল কনখৎহল্লগনি।

মসিনা ভারতকী খুঙ্গংশিংদা তুং কোইনা চৎপা, চাউখৎপা অমসুং খুঙ্গংগী পুন্সি মহিংদা অনৌবা ইনোৎ অমা পীবা ওইরগনি। ওইল শোককুম্বা ফিভমশিং অসি থেংননবা, ঐখোয়না ঙসি ইনর্জী রেসিলিয়েন্সকী মতাংদা মরুওইবা খোঙথাং অমা হৌদোক্লে। মসিগী মথক্তা, বেতরীশিং, গ্রীন হায়দ্রোজেন, অমসুং ন্যুক্লিয়র ইনর্জীদা ঐখোয়গী মতেং পীনবা অসিনা মালেমগী ক্লিন ইনর্জীগী তুংলমচৎতা চাউনা তেংবাংগনি।

ভারত অমসুং জাপাননা শেন্মিৎলোনগী সেক্যুরিতীবু শিয়র্দ সেক্যুরিতী ওইনা অমসুং ইনর্জী ত্রাঞ্জিসনবু শরুক শিয়র্দ ওপুরচুনিতী অমা ওইনা লৌই। ঐখোয়না এজেন্দা অসি মাংলোমদা পুখৎনবা অমসুং মসিগী মাইকৈ অসিদা ত্রান্সফোর্মেসন পুরক্নবা হোৎনগনি।

মরুপশিং,

ঙসি ঐখোয়না ইন্দিয়া-জাপান নেক্স জেনেরেসন মোবিলিতী পার্তনরশিপ ফ্রেমৱার্কসু লোইশিনখ্রে। মসিগী খুত্থাংদা, ঐখোয়না হৌজিক্তি ওতোমোতিব সেক্তরদা ঐখোয়না মায় পাকপগী ৱারী অসি শিপ বিলদিং, এভিএসন অমসুং লোজিস্তিক্সকুম্বা লমশিংদা অমুক হন্না পাংথোক্কনি।

মরুপশিং,

ঐখোয়গী মরীগী মরুওইবা মপাঙ্গল অসি ঐখোয়গী মীয়ামগী মরক্তা লৈনরিবা মরীদা লৈ। ঐখোয়না তেলেন্ত মোবিলিতী, স্কিল দিবেলপমেন্ত, অমসুং তেক্নিকেল ইন্তর্নশিপ প্রোগ্রামশিংগী খুদোংচাবশিং পাকথোক চাউথোকহল্লি। মসিগা লোয়ননা ঐখোয়গী লৈবাক অনিগী মরক্তা রিসর্চ, এজুকেসন অমসুং স্তার্ত-অপ ইকোসিস্তেমদা মতেং পীনবা হেনগৎহল্লি।

লাক্কদৌরিবা চহি অসিদা ভারত অমসুং জাপানগী মরক্তা দিপ্লোমেতিক রিলেসনশিপকী চহি ৭৫শুবা থৌরম পাংথোক্কদৌরিবা অসিদা ঐখোয়না নুংঙাইবা ফাওই। মরুওইবা থৌরম অসিদা, ঐখোয়না কলচর, তুরিজম অমসুং ক্রিএতিব ইকোনোমীদা মতেং পাংনদুনা ঐখোয়গী ম্যুচুএল কনেক্তিবিতী হেন্না চেৎশিলহল্লগনি।

য়োর এক্সিলেন্সী,

ভারত অমসুং জাপানগী শেন্মিৎলোনশিং অসি অমগা অমগা মরী লৈনৈ। কলচরেল ভেল্যুশিংদগী হৌরগা মোদর্ন তেক্নোলোজী ফাওবদা, ঐখোয়গী ৱাখল্লোন অমসুং থৌওংশিং অসি মান্নৈ।

পুম্নমক্কী মথক্তা, ঐখোয়গী মরীগী য়ুম্ফম অসি অমনা অমদা থাজবা থম্বদা য়ুম্ফম ওই। ঐহাক্না থাজবা থম্লি মদুদি অখন্নবা পার্তনরশিপ অসিনা অদোমগী মপাঙ্গল কনবা অমসুং চাউখৎপা জাপানগী মীৎয়েং, চাউখৎপা ভারত অমগী ঐখোয়গী ৱারেপ অমসুং মালেমগী চাউখৎপা অসি অনৌবা অৱাংবা থাক্তা পুখৎকনি।

মপাঙ্গল কনবা অমসুং চাউখৎপা জাপানগী অদোমগী মীৎয়েং, চাউখৎলবা ভারতকী ঐখোয়গী ৱারেপ অমসুং মালেম পুম্বগী চাউখৎপা পুরক্নবা ঐখোয় পুন্না থবক তৌমিন্নসি।

ঐহাক্না অমুক্কা হন্না অদোমবু তরাম্না ওকচরি।

অদোমবু হন্না-হন্না থাগৎচরি।

***