ভারতকী প্রধানমন্ত্রী

ময়াম পুম্নমকপু  তরাম্না ওকচরি !

মফম অসিদা তিল্লিবা ঐগী নুংশিরবা রাজগরগী  ইচিল- ইনাওশিং, ইচল-ইচেশিং ,

জুন থাগী শারবা নুংশা মরক অসিদা মশিং য়াম্লবা মীয়াম্না মফম অসিদা পুল্লরিবা অসি ঐ অমসুং  ঐগী মরূপ-মপাংশিংগী য়াইফবনি। অদোমগী মীনুংশি অদু ঐনা থাগৎচরি।  অদোমগী পাঙ্গল অমসুং থৌজালনা মতম চুপ্পদা ভারতীয় জনতা পার্তীনা অদোমগী সেবা ফজনা তৌবা ঙমজরিবনি। ঈশিং পীনবা প্রোজেক্ত অহুমগা লোয়ননা লুপা কোতি ৪০০০গী মোহনপুরা ইরিগেসন প্রোজেক্ত হৌদোকপা অসি ঐগী লাইবক ফবনি। মকোক্তা চেক পুরিবা ইচিল- ইনাও অমসুং ইচল-ইচেশিং  য়োৎপাক পায়রিবা ইমাশিং অমসুং অচৌবা অমসুং অপীকপা মেছিনশিং পায়রিবশিং য়াওনা প্রোজেক্তশিং অসিদা থবক শুরিবশিং ঐনা থাগৎচরি । লৈবাক শেমগৎপগী থবক্ত মখোয়না পাংথোক্লিবা থবকশিং অসিগী লাম্বা লৈতে।

ঐগী নুংশিরবা ইচিল- ইনাও অমসুং ইচল-ইচেশিং,

বত্তম অমা নম্লগা প্রোজেক্তশিং হৌদোকপা অসি ইচম চম্বা চৎনবী অমনি। মসি তশেংনা অদোমগী থবক কন্না শুবা অমসুং হুমাং মমল অদুনা হৌদোকপনি। অদোমগী থৌজাল অমসুং থবক কন্না শুবা অদুনা সেন্তরদা ভারতীয় জনতা পার্তীনা চহি মরি মায়পাক্না মীয়ামগী য়াইফনবা থবক পাংথোকপা ঙম্বনি। অদোম মশিং য়াম্না পুল্লরিবা অসিনা তাক্লে মদুদি ভারতীয় জনতা পার্তীগী সরকার অমসুং মসিগী থৌশিলশিংদা অদোম্না থাজবীরে। মীনম্বা , ওইদবা অমসুং ফত্তবা শন্দোক্লিবশিং অদু অশেংবা হায়বদু মশক খঙদবা ঙাক্তনি।

দোক্তর শ্যামা প্রসাদ মুখর্জী লৈখিবদগী  কুমওনসু জুন ২৩দা  থোক্লে। নুমিৎ অসিদা মহাক কশ্মীরদা অঙকপা মওংদা লৈখিদে। থৌরম অসিদা , ঐনা মহাক্কী মফমদা ইকায়খুম্নবা  উৎপা পামজৈ।

ইচিল-ইনাও অমসুং ইচল-ইচেশিং ,

দোক্তর শ্যামা প্রসাদ মুখর্জীনা হায়রম্মি, মশাগী পাঙ্গল খক্তনা লৈবাক অমা ঙাকথোকচবা ঙমগনি। লৈবাক অসিগী লন-থুমশিং অমসুং মীয়ামগী হৈ-শিংবদা মহাক্না ফজনা থাজবা থমখি। নীংতম্লবা মতুংদা মহাক্না নীংবা কাইরবশিং অমসুং উপায় লৈত্রবশিং চিংখৎনবা হোৎনরম্বা মহাক্কী থৌরাং অদু মীওই কোতি কয়াদা হৌজিক ফাওবা ইনোৎ  পীরি। লৈবাক অসিগী অহানবা উদ্যোগ অমসুং সপ্লাইগী মন্ত্রী অমা ওইনা মহাক্না লৈবাক অসিগী অহানবা উদ্যোগকী থৌশিল শেম্লমখি। মহাক্না হায়রম্মি, করিগুম্বা সরকার, মহৈলোয়শঙশিং অমসুং উদ্যোগকী লুপশিংনা পুন্না উদ্যোগশিং য়োকখৎলবদি , লৈবাক অসি শেল-থুমগী মনীংতম্বা ফংগনি। এজুকেসন, নুপীদা শক্তি পীবা অমসুং এতোমিক ইনর্জীগী লমদা লৈরিবা মহাক্কী ৱাখল্লোল অসি মহাক্কী মতম অদুদগী মাংজিল থাখি। লৈবাক অমা চাউখৎপদা মীয়াম শরুক য়াবা য়াম্না  মরুওই হায়না মহাক্না উৎলম্বা লম্বী অদু হৌজিক ফাওবা চুনরি।

মরূপশিং,

দোক্তর শ্যামা প্রসাদ মুখর্জীনা হায়রম্মি, সরকার অমগী খ্বাইদগী মরুওইবা মথৌদি লায়রবশিং, য়ুম লৈজদ্রবশিং সেবা তৌবা অমসুং মখোয়গী হিংবগী থাক হেনগৎহনবনি। মরম অসিননি মহাক্না উদ্যোগকী মন্ত্রী ওইদ্রিঙৈ, বেঙ্গালগী শেল-থুম মন্ত্রী ওইরিঙৈদা  লেন্দ রিফোর্মগী মতাংদা থবক কয়া পায়খৎলমখিবদু। সরকারনা মীয়ামগী অপাম্বশিং ফংহনগদবনি অমসুং ব্রিতিসকী মওংদা  লৈবাক ঙাক্লোইদবনি হায়বসি মহাক্কী থাজবনি।

দোক্তর শ্যামা প্রসাদ মুখর্জীনা এজুকেসন , হকশেল অমসুং ঙাকশেলগী লমদা অকনবা মীৎয়েং থমখি। মহাক্না হায়খি, মপী তম্বদগী হৌরগা অৱাংবা থাক ফাওবগী লাইরিক তম্বগী খুদোংচাবা সরকারনা পীগদবনি অমসুং মখোয়গী খুঙ্গংশিং অমসুং শহরশিংগী য়াইফনবা থবক তৌননবা নহারোলশিংগী লোৎতুনা লৈরিবা হৈশিংবশিং চিংথোক্নবা হোৎনগদবনি। দোক্তর শ্যামা প্রসাদ মুখর্জীগী পুন্সি, লৌশিং, লন-থুম অমসুং চাউখৎপা অসি অমত্তা  ওইনা পুনশিনখি।

অকক্নবা ইমুং অমখক মমিং চৎনবা হোৎনবা অসি লৈবাক অসিগী ওইনা লাইবক থিবনি অমসুং ইমা ভারতকী অথৌবা মচাশিংগী দান থৌওইনা নমথবীরে অমসুং মীয়ামগী ৱাখলদগী মখোয়গী থবকশিং মমি শামহনখিনবা হোৎনরে।

মরূপশিং,

কেন্দ্র সরকার অমসুং রাজ্যশিংদা ভারতীয় জনতা পার্তীগী সরকারশিংগী ৱাখল্লোন অসিগা দোক্তর মুখর্জীগা খেন্নবা লৈতে। স্কিল ইন্দিয়া মিশন, স্তার্ত অপ ইন্দিয়া মিশন, মুদ্রা য়োজনাদা দোক্তর মুখর্জীগী মীৎয়েংগী মমি তাবা  উগনি অমসুং মশানা মশাবু থবক পীজনবা নৎত্রগা  মেক ইন ইন্দিয়াগীদমক গরেন্তী য়াওদনা বেঙ্কশিংনা লোন পীরি।

অদোমগী রাজগর জিলা অসি মখা তানা চাউখৎত্রিবা জিলা অমা ওইনা খঙনররোই । জিলা অসি তমজনফম ওইবা জিলা অমা  ওইনা শেমগৎনবা সরকারনা ৱারেপ লৌরে। হৌজিক মফম অসিদা হকশেল, এজুকেসন, লু-নানবা, অফবা চিঞ্জাক, ঈশিং য়োক্নবা অমসুং লৌউ-শিংউগী থবকশিং পায়খৎলগনি।

রাষ্ট্রীয় গ্রাম স্বরাজ অভিয়ানগী মখাদা অখন্নবা জিলাশিংগী খুঙ্গংশিংদা দরকার ওইবশিং ফংহল্লগনি। জিলাশিং অসিগী খুঙ্গং খুদিংমক উজ্জ্বালা য়োজনাগী মখাদা  গ্যাস পীগনি, সৌভাগ্য য়োজনাগী মখাদা মৈ পীগনি , জন ধন য়োজনাগী মখাদা বেঙ্ক একাউন্তশিং হাংগনি, ইন্সুরেন্স য়াওগনি, মিশন ইন্দ্রধনুস মিশনগী মখাদা মীরোনবীশিং অমসুং অঙাংশিং তিকা থাগনি।

মরূপশিং,

হায়রিবা থবকশিং অসি মমাংগী সরকারশিংনা পাংথোক্লমগদবা ঙাক্তনি। অদুবু, মতম শাংনা পানখিবা দল অদুনা অদোম অমসুং অদোমগী থবকশিংদা থাজবা থমখিদে। লৈবাক অসিগী তৌবা ঙম্বশিংদা দল অদুনা থাজখিদে।

ঐঙোন্দা হায়বীয়ু ,হৌখিবা চহি ৪ অসিদা কেন্দ্র সরকার অসিনা মীয়ামগী নীংবা কাইগদবা ৱাহৈ অমত্তা হায়খিবরা? ওইরোইদবা অমত্তা ঐখোয়না হায়খিবরা? ঐখোয়গী অনীংবশিং থুংনবা অমসুং হেন্না অফবা পুরক্নবা ঐখোয়না মতম চুপ্পদা থবক কয়া পায়খৎখি।

মরম অদুনা , ইচিল-ইনাওশিং অমসুং ইচল-ইচেশিং,

থাজবা অমগা  লোয়ননা ঐখোয়না মাংলোমদা চংশিনবদা ঐখোয়না থাজবা থমলি।

মরূপশিং,

লৈবাক অসিগী দরকার ওইবশিং অমসুং মসিগী লন-থুমশিংদা থাজবা থম্লগা , ২১শুবা চহিচা অসিদা অৱাংবা থাক অমদা পুখৎনবা সরকার অসিগী অচেৎপা ফিরেপ লৈরি অমসুং থবক কন্না পায়খৎলি।

চহি মরি শুরবা কেন্দ্র সরকার অমসুং চহি ১৩ শুরবা মধ্য প্রদেশকী বি জে পী সরকার অসিনা লায়রবশিং, শোৎথরবশিং অমসুং লৌমীশিংগী য়াইফনবা থবক কয়া পায়খৎলি। হৌখিবা চহি ৫ অসিদা লৈবাক অসিগী ওইনা খ্বাইদগী ৱাংবা  ওইনা এম পিনা লৌউ-শিংউগী লমদা চাদা ১৮ গ্রোথ লৈরি। হৱাই, থাও থোকপা মরু, শগোল হৱাই, নুঙ হৱাই, খামেন অশিনবা অমসুং চনম পুথোকপদা লৈবাক অসিদা এম পিনা মাংজিল থারি।   হঙ্গাম, হৈগ্রূ, ফদিগোম, গেহু অমসুং অহর পুথোকপদা অনিশুবদা লৈরি  অমসুং হৌজিক মকোক তানবা হোৎনরি।

সিবাজীগী লৈঙাক মখাদা মধ্য প্রদেশতা চাউখৎপগী অনৌবা মাইওন অমা লাকপা হৌরে। মোহনপুরা ইরিগেসন প্রোজেক্ত হৌদোকপা অমসুং ঈশিং পীনবা স্কিম অহুম হৌদোকপা অসি থৌরাং অসিগী শরুক অমনি। মসি রাজগর খক্তগী নত্তনা মধ্য প্রদেশকী অচৌবা প্রোজেক্ত অমনি।

মরূপশিং,

খুঙ্গং ৭২৫গী লৌমীশিংনা প্রোজেক্ত অসিগী কান্নবা ফংলগনি। খুঙ্গংশিং অসিগী লম লাখ হেক্তর ১.২৫দা ইথৈ ফংলগনি অমসুং খুঙ্গং ৪০০দা থক্নবা ঈশিং ফংদবগী অৱাবা লৈরম্বা অদু কোক্লগনি। মসিনা তাক্লে মদুদি ঐখোয়দা ইমাশিং অমসুং ইচলশিং লাখ কয়াগী বর ফংলগনি। মসি ইমাশিং অমসুং ইচলশিংগী সেবা তৌবগী খ্বাইদগী ফারবা থাক অমনি।

প্রোজেক্ত অসি খোংজেল য়াংনা চাউখৎপগী খুদম অমা ওইবতা নত্তনা সরকারগী থবকশিং লোইশিনবগী খুদম অমনি। প্রোজেক্ত অসি চহি ৪গী মনুংদা লোইশিল্লে। প্রোজেক্ত অসিগী পান্দমদি মাইক্রো ইরিগেসন্নি। মসিগী ৱাহন্থোকতি , কেনেল শেম্বগী মহুৎতা পাইপ তিংবদা মীৎয়েং থম্বনি।

ইনাওশিং অমসুং ইচলশিং,

মালৱা লমদমদা চানবা অমসুং ঈশিংগী অৱাৎপা লৈতবা মতম অমা লৈরম্মি হায়না মমাংঙৈদা হায়নবা অমা লৈরমখি। মফম খুদিংদা ঈশিং ফংলম্মি। অদুবু, মমাংগী সরকারনা মীরাইবদগী হৌজিক মফম অসি ঈশিং ফংদ্রে। অদুবু, চহি খর অসিদা সিবাজীনা লুচিংবা বি জে পীগী সরকার অসিনা কন্না হোৎনবদগী মালৱা অমসুং মধ্য প্রদেশকী হান্নগী শক্তম অদু হনজিল্লক্নবা হোৎনরি।

মরূপশিং,

২০০৭তা মধ্য প্রদেশতা শুপ্নগী লম হেক্তর লাখ ৭.৫ খক ইরিগেসন প্রোজেক্তশিংনা ইথৈ পীরম্মি। সিবাজীগী সরকার মখাদা লম হেক্তর লাখ ৪০দা ইথৈ ফংহল্লে। তেলিভিজন য়েংলিবশিংদা ঐনা হায়রি মদুদি ২০২৪ ফাওবদা রাজ্য সরকারনা শরুক অনি হেনগৎনবা ইথৈ পীনবা থৌরাং তৌরি। মাইক্রো ইরিগেসন শেমগৎনবা সরকারনা লুপা কোতি ৭০,০০০ চাদিং তৌরি।

ঐনা অদোমতা থাজবা  পীরি মদুদি থমখিবা পান্দম অদুদগী হেন্না ফংনবা হোৎনগনি অমসুং কেন্দ্র সরকারনা অদোমগা নক্না চৎমীন্নগনি।

প্রধান মন্ত্রী কৃষি সিঞ্চাই য়োজনাগী কান্নবা মধ্য প্রদেশসু ফংলি। স্কিম অসিগী মখাদা মধ্য প্রদেশতা প্রোজেক্ত ১৪ পায়খৎলি। প্রোজেক্ত অসিগী মখাদা মধ্য প্রদেশতা লুপা কোতি ১৪০০ পীখ্রে। স্কিম অসিগী মতেংগা লোয়ননা ‘পার দ্রোপ পার ক্রোপ’কী পান্দম মাংলোমদা চংশিল্লি। হৌখিবা চহি ৪দা থবক কন্না পায়খৎপগী মহৈ ওইনা লৈবাক অসিদা মাইক্রো ইরিগেসনগী খুদোংচাবা ফংবা লম হেক্তর লাখ ২৫ হেনগৎলকপগী মনুংদা মধ্য প্রদেশতা হেক্তর লাখ ১.৫ য়াওরি।

মরূপশিং,

সরকারগী স্কিমশিংগী মতাংদা মীওই কাংলুপ কয়াদা ঐনা ভিদিও তেক্নোলোজী অমসুং নমো এপ্প শীজিন্নদুনা ৱা ঙাংবা অদোম খঙলমগনি। নুমিৎ হুমনিগী মমাংদা ঐনা লৈবাক অসিগী লৌমীশিংদা ৱা ঙাংখি। থৌরম অদুদা ঐনা জাবুৱাগী লৌমীশিংগা ৱারী শানবগী খুদোংচাবা অমা ফংখি। জবুৱাগী লৌমী ইচল অমনা দ্রিপ ইরিগেসন শীজিন্নবদগী মহাক্কী খামেন অশিনবগী পোৎথোক হেনগৎলকপগী ৱারী ঐঙোন্দা লিরকখি।

মরূপশিং,

অনৌবা ভারত অমা শেমগৎপগী মঙলান্দা লৈবাক অসিগী খুঙ্গংশিং অমসুং লৌমীশিংগী অচৌবা থৌদাং লৈ। মরম অদুনা, অনৌবা ভারত অমা শেমগৎনবা লৌমীশিংগী ইনকম শরুক অনিদা হেনগৎনবা থবক পায়খৎলে। মরুদগী হৌরগা কৈথেল ফাওবদা লৌউ-শিংউবগা মরি লৈনবা থবক খুদিংমক ফগৎনবা থবক পায়খৎলে।

মরূপশিং,

হৌখিবা চহি ৪ অসিদা লৈবাক অসি শীনবা থুংনা সোইল হেল্থ কার্দ কোতি ১৪ য়েন্থোকখ্রে অমসুং মসিগী মনুংদা মধ্য প্রদেশকী লৌমীশিংদা কার্দ কোতি ১.২৫ পীখি। কার্দশিংগী অসিগী মতেংদগী হৌজিক লৌমীশিংনা মখোয়গী লৌবুক্ত হাপকদবা হারগী চাং খঙবা ঙম্লগনি। মসিগা চপ মান্ননা, মধ্য প্রদেশকী লৌমীশিংনা প্রধান মন্ত্রী ফসল বিমা য়োজনাগী কান্নবা ফংলি।

লৌমীশিংদা মখোয়গী মহৈ-মরোংশিংগী চুনবা মমল ফংনবা লৈবাক অসিদা লৈরিবা কৈথেল খুদিংমক ওনলাইন মার্কেত-ই-নামগা শম্নরে। হৌজিক ফাওবদা কৈথেল ৬০০ ই-নামগী প্লেৎফোর্মগা শম্নরে। হৌজিক মধ্য প্রদেশকী কৈথেল ৫৮ মসিগা শম্নরে। লৌমশিংনা মখোয়গী পোৎথোকশিং অদু মখোয়গী খুঙ্গংশিংগী কম্মন সর্বিস সেন্তরশিং নৎত্রগা মোবাইল ফোনশিংদগী য়োনবা য়াগদবা মতম অদু ইরাপ লাপত্রে।

ইনাওশিং অমসুং ইচলশিং,

খুঙ্গংশিং অমসুং লায়রবশিংগী পুন্সি মহিং ফগৎহন্নবা সরকারনা থবক কয়া পায়খৎলি। দলিৎ, ত্রাইবেল অমসুং শোৎথরবা কাংলুপকী ইমাশিং অমসুং ইচল-ইচেশিং হু চেল্লবা মৈখুদগী কন্নবা থবক কয়া লেপ্পা লৈতনা পায়খৎলি।

হৌজিক ফাওবদা ইমা অমসুং ইচল-ইচে কোতি ৪ হেনবদা লেম্না এল পি জি সিলিন্দরশিং মখোয়গী চাকশঙগীদমক ফংহনখ্রে। মধ্য প্রদেশতা নুপী লাখ ৪০ হেনবদা লেম্না গ্যাস কনেক্সন পীখ্রে।

মরূপশিং,

থবক কন্না শুবশিংবু সরকারনা ইকায়খুম্নৈ। হৌজিক ভারত সরকারনা থবক য়াম্না পীবা ঙম্বা  ইন্ত্রপ্রিনরশিং পুক্নীং থৌগৎনবা খন্নরি। অদুবু মীওই খরনা শিন্মীশিং হন্থনা য়েংলবসু, সরকার অসিগী মাইপাকপা অসি মীপুম খুদিংমক্কীনি।

হৌজিক, মুদ্রা য়োজনাগী মখাদা অপীকপা ইন্ত্রপ্রিনরশিংনা গরেন্তী য়াওদনা বেঙ্কতগী লোন লৌবা য়ারে। মধ্য প্রদেশকী মীওই লাখ ৮৫ স্কিম অসিগী কান্নবা ফংখ্রে।

মরূপশিং,

দিল্লী অমসুং ভোপালদা লৈরিবা চাউখৎপগী ইঞ্জিন অনি অসিনা মধ্য প্রদেশ অসি মাংলোমদা পুদুনা চৎলি।

রাজ্য অসিগী ফিবম ফত্তবনা মরম ওইদুনা মতম অমদা মধ্য প্রদেশ অসি ফজদবা ৱাহৈশিংগা লোয়নরম্বা অদু ঐ ফজনা নীংশিংলি। বীমারু হায়রিবা ৱাহৈ অদু কনা অমত্তনা তাবা পাম্লোই।  লৈবাক অসিগী লায়রবা রাজ্যশিংগী মরক্ত মধ্য প্রদেশ য়াওরম্মি। মতম শাংনা সরকার পায়রমখিবা কংগ্রেসনা মদু মধ্য প্রদেশকী ফত্তবা মীংচৎ অমনি হায়না খনখিদে।

মখোয়না মীয়াম অসি মখোয়গী খুৎলাই ওইনা লৌখি অমসুং মখোয়বু থাগৎনবা শীজিন্নখি। মখোয়না কৈদৌঙৈদা মধ্য প্রদেশকী তুংগীদমক পুক্নীং চংখিদে।

অদুমওইনমক, ভারতীয় জনতা পার্তী সরকারনা রাজ্য অসি ফিবম অদুদগী চিংখৎখি অমসুং লৈবাক অসিগী চাউখৎ-থৌরাংগী মরূপ অমা ওইখি। ফম অসিগীদমক অদোম্না সিবরাজজীবু খল্লে অমসুং মহাক্না লমদম অসিগী অমসুং মীয়ামগীদমক মীনাই অমগুম থবক তৌরি।

মাইপাকপগী লম্বীদা চংশিল্লকপগীদমক ঐনা মধ্য প্রদেশকী মীয়াম অমসুং মসিগী সরকারবু থাগৎচরি।

অমুক হন্না ঐনা অদোমদা য়াইফ-মঙ্গল পীজরি। মফম অসিদা মশীং য়াম্না লাকপীবগীদমক অদোমবু থাগৎচরি।

অদোমগী খুৎতুম তাশিন্দুনা ঐগা লাওনা হায়মিন্নসি –

ইমা ভারতনা য়াইফরে !

ইমা ভারতনা য়াইফরে !

ইমা ভারতনা য়াইফরে !

থাগৎচরি !