ভারতকী প্রধানমন্ত্রী

ইমা ভারতকী সেবা অমসুং ঙাক-শেন্নবগীদমক্তা পুং কুনমরি মথৌ পাংথোক্লিবা ঐখোয়গী অথৌবা পুম্নমক্তা অমুক্কা হন্না ঐগী মায়কৈদগী ইরৈবাকচা ১৩০গী মায়কৈদগী দিৱালীগী হন্না হন্না নুংঙাইবা ফোংদোকচরি। লৈবাক অসিগী ঙমখৈদা ওইরবসু, অতিয়াদা নত্ত্রগা সমুদ্রগী ইপাক্তা ওইরবসু, উন্তনা য়োম্লবা চিংদোন্দা ওইরবসু নত্ত্রগা শুক্লবা উংদা ওইরবসু, লৈবাক্কী ঙাক-শেলগী থবক্তা শরুক য়ারিবা মপারী-মমোম পুম্নমক, ঐখোয়গী লান্মীশিং, বি.এস.এফ., আই.তি.বি.পি., সি.আই.এস.এফ., সেক্যুরিতী ফোর্স পুম্নমক, ঐখোয়গী পুলিসকী জৱানশিং, পুম্নমক্কী মফমদা ঐনা ঙসি দিপাবলীগী শেংলবা থৌরম অসিদা ইকাই খুম্নবগা লোইননা নোলুকচরি।

অদোম লৈবগী লৈবাক্না অসিনা লৈরিবনি, লৈবাক অসিনা মসিগীদমক শেম-শাবা ঙমজরিবনি। ঙসি ঐনা অদোমগী নরক্তা ভারত মচা পুম্নমক্কী য়াইফ-পাউজেল পুদুনা লাকচরি। অদোমগীদমক্তা ইরৈবাকচা কোতি কয়াগী নুংশিবা পুদুনা লাকচরি। অহন ওইরবা মীওই পুম্নমক্কী ঐনা অদোমগীদমক্তা থৌজাল পুদুনা লাকচরি। ঐনা ঙসি অদুগুম্বা থৌনা ফরবা/বী মমা-মপা অমসুং মচাশিংদা দীপাবলীগী হন্না হন্না য়াইফ-পাউজেল পীজরি, মখোয়গী কৎথোকপা অদুদা ইকোক নোঞ্জরি, ঙসিগী কুম্মৈগী মতম অসিদসু মখোয়গী মচা-মসু ঙমখৈদা মথৌ তৌরিবা অদুগুম্বা ইমুংগী মীওই পুম্নমক্তুসু ইকাই খুম্নবদা মতিক চাই। অমুক্কা হন্না খুত্তুম তাশিন্দুনা পাঙ্গল পুথোক্তুনা ঐগা লোইননা হায়বীয়ু ভারত ইমানা য়াইফরে, ভারত ইমানা য়াইফরে, ভারত ইমানা য়াইফরে।

মরূপশা ঐ নীংশিংলি মদুদি প্রধান মন্ত্রী ওইরবা মতুংদা অহানবা ওইনা ২০১৪দা দীপাবলীগী থৌরমদা ঐ সিয়াচিন্দা চৎখি। জৱানশিংগা লোইননা দিৱালী পাংথোক্নবা মদুদা মীওই কয়ানা অঙকপা ফাওনখি। কুম্মৈ নুমিত্তা প্রধান মন্ত্রীনা তৌরিবসি করিনো। অদুবু, হৌজিক্তি অদোমসু ঐগী ৱাখল খঙবীরে। দিৱালীগী থৌরমদা ইশাগী মীওইগী মরক্তা চত্তনা কনাগী মনাক্তা চৎলুনি। অমসুং মরম অসিনা ঙসিসু দীপাবলী অসিদা অদোমগী নাক্তা লাক্লিবনি। ঐগী মীওইশিংগী মরক্তা লাক্লিবনি। অদোম উন্না কুপ্পা চিংদোন্দা লৈজরবসু, নত্ত্রগা লৈঙোই মরক্তা, ঐগী দিৱালীদি অদোমগী নাক্তা লাক্লগা মপুং ফাজৈ। অদোমগী মায়থোংদা মঙান উজৈ। অদোমগী মায়থোংদা হরাও-তয়াম্বা উজৈ। মদুদা ঐসু অদুক্কী মতিক নুংঙাইবা ফাওজৈ। ঐগী নুংঙাইবা হেনগৎচৈ। নুংঙাইবা অসিগীদমক্তা, লৈবাক মীয়ামগী হরাও-তয়াম্বা অসি অদোমদা য়ৌহন্নবগীদমক ঙসি ঐ অমুক্কা হন্না, লৈঙোই লম অসিদা অদোমগী নরক্তা লাকচরিবনি। অমসুং ৱাফম অমনা, অদোমগীদমক্তা ঐনা কুম্মৈগী নুমিৎ ওইবনিনা অথুম-অহাও খরসু পুদুনা লাকচরি। অদুবু মসি শুপ্নগী লৈবাক অসিগী প্রধান মন্ত্রীনা অথুম-অহাও পুদুনা লাকপা অদুখক নত্তে। মসি ঐ খক্তগী নত্তে মসি ইরৈবাকচা পুম্নমক্কী নুংশিবা অমসুং ইশাগী ওইবা মতৌগী মহাও অদুসু য়াওরবনি। অথুম অহাও অসিদা অদোম্না লৈবাক অসিগী ইমা খুদিংগী খুৎকী মহাও অদু ফাওবীগনি। অথুম-অহাও অসিদা অদোম্না ইচিন-ইনাও, ইচে-ইচল অমসুং ইপা-ইপু পুম্নমক্কী থৌজাল অদু ফংবীগনি। অমসুং মরম অসিনা ঐহাক অদোমগী নরক্তা ইথন্তা লাকপা নত্তে। ঐনা ঐগা লোইননা লৈবাক অসিনা অদোমগী মফমদা থম্লিবা নুংশিবা অমসুং অদোমগীদমক্তা থৌজাল অদুসু পুদুনা লাকচরি অমসুং মরূপশা,

ঙসি লোঙ্গেৱালাগী পোস্ত অসিদা লৈরি, অদুনা লৈবাক অপুনবনা অদোমদা মিৎয়েং থমলি, ইমা ভারতীগী মপারীশিং, ঐগী মমোমশিং, ঐগী লৈবাক্না চাউথোকচবা ঙমহল্লিবা ইমোমশিং ঐগী মাংদা ফম্লিবীশিং, মখোয়দা লৈবাক অসিনা মিৎয়েং থমলি। ঐনা খল্লি মদুদি লৈবাক্কী ঙমখৈদা করিগুম্বা পোস্ত অমগী মমিং লৈবাক অসিনা খ্বাইদগী নীংশিংনবা তারবদি, মীরোল কয়ানা নীংশিংনবা তারবদি, অদুগুম্বা পোস্ত অদু লোঙ্গেৱালা পোস্তনি, পুম্নমক্না মসি শোন্নরি। অসিগুম্বা পোস্ত অমা, কালেন্থাগী মতমদা দিগ্রী ৫০ য়ৌরিবা অদুগা নিংথম থাদনা জিরোদগী হন্থরিবা অমসুং মে জুন্দনা লৈঙোইনা অমনা অমগী মশক উনবা ফংদবমখৈ শিৎলিবা মফমনি। পোস্ত অসিদা অদোমগী মরূপশিংনা থৌনা ফবগী অসিগুম্বা ৱারী অমা ইখ্রে, মদু ঙসিসু ভারত মচা পুম্নমক্কী থমোইবু মথুম-মরাং হৌহল্লি। লোঙ্গেৱালাগী মমিং তাবতদা থমোইগী কাচিন্দগী মসি থোরকই ‘জো বোলে সো নিহাল, সত শ্রী অকাল’ মসিগী খোল্লাও অসি নাকোংদা খোন্থাং য়ৈরি।

মরূপশা,

লান্মীশিংগী লৌশিংগী পুৱারীগী মতাংদা পারু-তারুবা মতমদা, লান্মীশিংগী মথৌনাগী মতাংদা ৱারী শান্নরকপদা, বেতল ওফ লোঙ্গেৱালা অসি শোইদনা নীংশিংনরগনি। মসি পাকিস্তানগী লান্মীনা বঙ্গলাদেশকী মীচম-মীয়ামদা মীনোৎ-মীনৈ চৎথখিবা মতম অদুনি, ওৎপী-নৈবীখিবা মতম অদুনি, মীহাৎ থিনা হাৎতোকপীখিবা মতম অদুনি। ইচল-ইচেশিংদা মীওইবগী মচৎ নত্তবা লমচৎ চৎথখিবা মতম অদুনি। অদুগুমবা মচৎ অদুনা পাকিস্তানগী তুকচ্চনীংঙাই ওইরবা মশক অদু ফোংদোরকখি। পাকিস্তানগী তমথিবা মশক মালেমগী মাংদা উৎথোরকখি। পুম্নমক অসিদগী মালেমগী পুক্নীং থৈদোকহনখিনবা পাকিস্তান্না ঐখোয়গী লৈবাক্কী নোংচুপ থংবা ঙমখৈশিংদা লানবন শাজিনখি। পাকিস্তান্না খনখি মদুদি ভারতকী নোংচুপ থংবা ঙমখৈদা লানবন শারবদি, মালেমদা ভারতনা অদু তৌখ্রে, ভারতনা অসি তৌখ্রে হায়জিন্দুনা কপশিন-লাওশিন্নগনি অমসুং বঙ্গলাদেশতা তৌখিবা পাপ খুদিংমক লোৎশিনগনি। অদুবু ঐখোয়গী লান্মীশিংনা মতিক চাবা পাউখুম পীখিদুনা, পাকিস্তানগী থৌরাং অরেম্বদা তাহনখি।

মরূপশা,

পোস্ত অসিদা উৎখিবা থৌনা ফবগী খোঞ্জেল অদুনা য়েক্নবগী থৌনা মাংহনখি। মখোয়না করম্নদি খঙগনি মসিদা মখোয়না ইমা ভারতীগী থৌনা লৈরবা/বী অথৌবা মপারী-মমোশিংগা মায়োক্নগনি হায়বসে। মেজর কুলদীপ সিংহ চান্দপুরীগী লুচিং মখাদা ভারতকী অথৌবশিংনা তেঙ্কশিংনা য়োম্লবা য়েক্নবগী লান্মীশিংবু মায়থিবা পীখি, মখোয়গী ফত্ত্রবা ৱাখল্লোনশিং অদু উৎ ওলহনখি। করিগুম্বা মতমদা ঐনা খল্লি মদুদি কুলদীপজীগী ইমা-পাবুংনা মহাক্কী মমিং কুলদীপ হায়না থোনজরবসু, মহাক শাগৈগী মৈরানি হায়না মখোয়না খনজরবসু কুলদীপজীনা মহাক্কী মপাঙ্গলনা মিং অদুগী ৱাহন্থোক অদু অসুম্না চান্নহনখি, অসুম্না চান্নহনখি মদুদি শুপ্নগী শাগৈগী মৈরা খক্তা নত্তনা মহাক লৈবাক অসিগী মৈরা ওইখি।

মরূপশা,

হিমালয়গী মতোন্দবু ওইরবসু, লৈঙোই লমগী লৈঙোই মরক্তবু ওইরবসু, শুক্লবা উমংবু ওইরবসু নত্ত্রগা সমুদ্রগী লুরবা ইরোন্নুংদবু ওইরবসু, শিংনবা খুদিংমক্তা অদোমগী থৌনা অদোমগী পাঙ্গলনা শিংনরিবা অদুদা পোৎলুম অমা ওইহন্দুনা লাক্লি। ঙসি লৈঙোই লমদম অসিদা য়াওরিবা অদোমগী মরক্তগী খোংলোই কয়ামরুম্না হিমালয়গী অৱাংবা মতোন য়ৌরুরবা য়াওরি। ফিভম অমা হেক্তা ওইরবসু, অদোমগী থৌনা, অদোমগী পাঙ্গল, চাংদমনীংঙাই লৈতবনি। মসিগী মরমদগীনি ঙসি য়েক্নবনসু মসি ফাওরি মদুদি ভারতকী থৌনাফবশিংগী লাম্বা অমত্তা লৈতে। অদোমগী থৌনা অসিদা কোক নোঞ্জরদুনা ভারতকী ইরৈবাকচা করোর ১৩০না অদোমগা লোইননা লেপ্লি।

মরূপশা,

মালেমগী পুৱারীনা ঐখোয়দা মসি তাক্লি মদুদি লান্দারকপশিংগা মায়োক্ননবা থৌনা লৈবা লৈবাকশিং অদুখক্তনা শোইদ-ঙামদবা ওই, মাংদা চখৎপা ওই। করিগুম্বা ঙসিগী শক্তম অসি য়েংলুরগদি, ইন্তর্নেস্নেল কোওপরেসন অদুক্কী মতিক লৈজদুনসু, ঐখোয়না কৈদৌঙৈদসু মসি কাওবা য়ারোই মদুদি চেকশিনবতনা ঙাক-শেলগী লম্বীনি, চেকশিনবতনা হরাও-তয়াম্বগী শম্বলনি। ভারত অসি ঙসিদি শোইদ-ঙামদবা ওইরি মরমদি ভারত্তা মশাবু ঙাক-শেন্নবগী থৌনা লৈজৈ, ভারতকী অদোমগুম্বা থৌনা ফবা/বী মপারী-মমোশিং লৈরি।

মরূপশা,

মথৌ হেক তারকপদা, ভারতনা মালেমদা উৎলি মদুদি মসিদা থৌনাসু লৈ অমসুং অচুম্বা পাউখুম পীনবা রাজনীতিগী ওইবা পাঙ্গলসু লৈ। ঐখোয়গী লান্মীগী পাঙ্গল অদুনা ঙসি ঐখোয়গী নেগোসিএতিং পাৱর অসিসু শরুক কয়া হেনগৎহল্লে, মখোয়গী থৌনা হেনগৎহল্লে, মখোয়গী খাংবা কনবগী পাঙ্গলনা হেনগৎহল্লে। ঙসি ভারতনা তেরোরিজম্বু, তেরোরিজম য়োকখৎপশিংবু মখোয়গী ময়ুমদা চংদুনা খুৎ থারে। ঙসি মালেম্না মসি খঙলে মদুদি লৈবাক অসিনা মসিগী কান্ননবগীদমক্তা মতৌ অমত্তদসু য়াশিন্নবা পুরক্কদা লৈতে। ভারতকী মতৌ অসি, অদোমগী পাঙ্গল অমসুং অদোমগী থৌনা অদুগী মরমদগী ওইরিবনি। ঐখোয়গী লৈবাক অসিবু শোইদ-ঙামদনা থম্বীবদগী ঙসি ভারতনা মালেমগী ফম্বাক্তা ময়েক শেংনা ঐখোয়গা ৱা ফোংদোকপা ঙম্লি।

মরূপশা,

ঙসি মালেম পুম্বনা লম শন্দোকপশিংদগী অৱাবা মায়োক্নরি। লম শন্দোকপা, মসি অমরোমদা ৱাখল্লোন অমনি অমসুং তরানিপাল শুবা চহি চাগী ৱাখল্লোন অদুবু ফোংদোক্লি। ৱাখল্লোন অসিগী মায়োক্তসু ভারত অকনবা খোঞ্জেল অমা ওইরি।

মরূপশা,

ঙাক-শেলগী লমদা আত্মনির্বর ভারত, লৈবাক অসিগী অসিগুম্বা থৌনা অসিগী পান্দমনি – ঙমখৈদা শান্তি। ঙসি ভারতকী লাল্লোং অসি ময়েক শেংলি, ভারতকী লাল্লোং তরু তরুরি। ঙসিগী ভারত খঙবা অমসুং খঙহনবা হায়বা মওং অসিদা থাজবা থম্লি, খঙবগীসু অমসুং খঙহনবগীসু, অদুবু ঐখোয়বু চাং য়েংননবা হোৎনরক্লবদি, পাউখুম অদুসু চপ চানা ফংগনি।

মরূপশা,

লৈবাক্কী অপুনবা, লৈবাক মচাশিংগী অমত্তা ওইবা অসিগী মখা পোল্লি। শান্তি, অপুনবা, নুংশি-চান্নবা অসিনা লৈবাক মনুংদা লৈবাক্কী অমত্তা অপুনবা অসিদা থৌনা হাপ্লি। ঙমখৈ ঙাকপা, সেক্যুরিতী ফোর্সকী পাঙ্গলগী মখা পোল্লি। ঙমখৈদা ঐখোয়গী পাঙ্গলবশিংগী থৌনা লেংদনা লৈনবা, মখোয়গী পুক্নীংগী পাঙ্গল অতিয়াদগীসু হেন্না ৱাংবা ওইনবা, মখোয়গী মথৌ তাবা খুদিংমক্তা, তঙাইফদবা খুদিংমক, ঙসি লৈবাক অসিগী খ্বাইদগী মরুওইবা ওইরি। মখোয়গী ইমুং-মনুং য়েংশিনবা অসি লৈবাক্কী থৌদাংনি। হৌখিবা মতমদা, লান্মীশিংগী মচা-মশুশিংগী মহৈ-মশিং অমসুং থবক পীবগী মতাংদসু ৱারেপ কয়া লৌখ্রে। হৌখিবা চহিদা ঐনা অনিরকশুবা ওইনা ৱাশক লৌখিবদা অহানবা ৱারেপ অদু অথৌবশিংগী মচা-মশুশিংগী মহৈ-মশিং তম্বগা মরী লৈনখি। মসিগী মখাদা নেস্নেল দিফেন্স ফন্দগী মখাদা ফংবা স্কোলরশিপসু হেনগৎহনখ্রে।

মরূপশা,

খুদোংচাবগা লোইননা অথৌবশিংবু ইকাই খুম্ননবসু লৈবাক অসিনা অমুক্তা ওইখিদ্রিবা মওংদা হোৎনরি। নেস্নেল ৱার মেমোরিয়েল, নেস্নেল সমর মেমোরিয়েল নত্ত্রগা নেস্নেল পুলিস মেমোরিয়েল, মেমোরিয়েল অনি অসি লৈবাক্কী খৌনা ফবগী খ্বাইদগী অথোইবা খুদম ওইদুনা ইরৈবাকচাশিংদা, ঐখোয়গী অনৌবা মীরোলদা ইথিন পীনবীরি।

মরূপশা,

অরুবা শিংনবশিংগী মরক্তা, অদোমগী লমচৎ, অদোমগী তীম ৱর্ক, লৈবাক অসিগী লানফম খুদিংদা থৌনা অসিগা লোইননা মায়োক্ননবগী পারা তম্বীরি। ঙসি লৈবাক অসিনা ৱাখল্লোন অসিদগী কোরোনাগুম্বা লাইচৎ অসিগী মায়োক্তসু লান্থেংনরি। লৈবাক অসিগী দোক্তর, নর্স, হেল্পর অমসুং সপোর্ত স্তাফ লিশিং কয়ানা, অহিং-নুংথিল, লেপ্পা লৈতনা, চোকথবা লৈতনা থবক তৌরি। ইরৈবাকচাশিংসু লানফম অসিদা ফ্রন্তলাইন ৱারিয়র ওইনা লান্থেংনরি। থা কয়া অসিদগী ঐখোয়গী ইরৈবাকচাশিংনা থক্সি-খাসি অসি মপুং ফানা ঙাক্লক্লি, মাস্ককুম্বা চেকশিন থৌরাং পায়খৎলি অমসুং মশাবু অমসুং ইমুং মনুংগী পুন্সিবুসু ঙাক-শেল্লি। অদুবু ঐখোয়না মসিসু খঙই মদুদি করিগুমবা ঐখোয়না মাস্ক উপ্পদা ৱারিবা অসিগুম্না অদোমগীদমক্তা ঙাকশেলগী জেকেৎ, অদোমগী হকচাংদা পোৎশক কয়া হাপ্লিবনো হায়বা খঙদবমখৈ, অসিগুম্বা ময়াম অসি শেৎপদা কয়াদা ৱারমগদবা। অদোমগী কৎথোকপা অসিদগী লৈবাক অসিদা থক্সি-খাসিসু তম্বীরি অমসুং সেবা ধর্মসু ঙাক্লি।

মরূপশা,

ঙমখৈদা লৈরগা অদোম্না কৎথোকপীরিবা, অদোম্না লাইনীং ওইবীরিবা, মদুনা লৈবাক অসিদা থাজবগী ফিভম অমা শেমগৎলি, হিন্দুস্তান্নী খুদিংমক্কী নুংদা অনৌবা কনফিদেন্স লেভেল অমা পুরক্লি। মসিনা থাজহল্লি মদুদি অমত্তা ওইনা পুন্না খ্বাইদগী চাউবা শিংনবা মায়োক্নবা ঙম্মি। অদোমদগী ফংজবা ইথিল অসিদগী লৈবাক অসিনা লাইচৎ অসিগী অৱাবা মতম অসিদা ঐখোয়গী মীপুম খুদিংমক্কী ঙাক-শেলগীদমক হোৎনরি। থা কয়া অসিদগী লৈবাক অসিনা মীওই করোর ৮০ হেনবগী চান-থক্নবগী থৌরাং তৌরক্লি। অদুবু মসিগা লোইননা, শেন্মিৎলোনবুসু অমুক হন্না খোংজেল হাপ্ননবসু অদুক্কী মতিক কন্না হোৎনরি। লৈবাক মচাশিংগী অসিগুম্বা হোৎনবা অসিনা মরম ওইদুনা ঙসি সেক্তর কয়াদা অমুকহন্না রিকোর্দ রিকভরী অমসুং গ্রোথ উবা ফংলে। অসিগুম্বা মখলগী তোঙান তোঙানবা লানফমশিং, মায় পাকপা পুম্নমক অসিগী মরম ঙমখৈ ঙাক্লিবা লান্মীশিংনা ওইরি, অদোম্না ওইরি।

মরূপশা,

অদোম লৈরিমখৈ, অদোমগী থৌনা, অদোমগী কৎথোকপা অমসুং অদোমগী লাইনীং লৈরিমখৈ, ভারত মচা করোর ১৩০গী থাজবা অসি কনানসু কাইহনবা ঙম্লোই। অদোম লৈরিমখৈ, লৈবাক অসিগী দীপাবলী মতৌ অসুম্না মঙাল নাইদুনা লৈখিগনি। লোঙ্গেৱালাগী অসিগুম্লবা থৌনা ফবগী লমদম অসিদগী, অথৌবা অমদি পাঙ্গলবগী লমদম অসিদগী, কৎথোকপা অমদি লাইনীংগী লমদম অসিদগী ঐনা অমুক্কা হন্না, অদোম ময়াম্বুসু অমসুং লৈবাক মীয়াম্বুসু দীপাবলীগী য়াইফ-পাউজেল পীজরি। ঐগা লোইননা, পাঙ্গল পুথোক্তুনা খুত্তুম তাশিন্দুনা অদু্ক্কী মতিক কন্না লাওবীয়ু, ভারত ইমানা য়াইফরে! ভারত ইমানা য়াইফরে! ভারত ইমানা য়াইফরে!

হন্না হন্না থাগৎচরি!

****