ভারতকী প্রধানমন্ত্রী

ফম্বাকথক্তা লেংশিনবিরিবা ঝার্খন্দগী রাজ্যপাল শ্রীমতী দ্রোপদী মুর্মুজী, রাজ্যগী ইনর্জেতিক মুখ্য মন্ত্রী শ্রীমান রঘুবর দাসজী, মন্ত্রীপরিশদতা এহাক্কা লোয়নরিবা শ্রীমান সুদর্শন ভগৎজী, বিহার অমসুং ঝার্খন্দদগী লেংরিরক্লিবা সংসদকী ঐহাক্কী মরূপলোয়, ঝার্খন্দ মন্ত্রীমন্দলগী ইকায় খুম্নজরিবা লেজিস্লেচরশিং অমদি মশিং য়াম্না লেংবিরক্লিবা ঐহাক্কী নুংশিজরবা ইচিল–ইনাও অমসুং ইচল–ইচেশিং। মশিং অসুক য়াম্না লেংবিরক্তুনা ঐখোয়বু থৌজাল পীনবিনবা লেংবিরক্লি। ঐহাক্না ময়াম পুম্নমকপু ইকোক নোন্না থাগৎপা ফোংদোকচরি, ময়াম্বু খুরুমজরি।

ঝার্খন্দগী চাউখৎ খোংচৎকী সাখি ওইনা চাউখৎ খোংচৎ অসিদা ময়াম পুম্নমক্না শরুক য়াবিরি। চাউখৎ খোংচৎ অসি খোংজেল য়াংনা মাংলোমদা চংশিল্লিবা অসিগী মরমদি অদোমগী তেংবাং অদুননি। ২০১৯গী চহী হৌরে অমদি অহানবা হপ্তা অসিমক্তদা অদোমগী ইরক্তা তিঞ্জরি। ঐহাক্না ময়াম পুম্নমকপু অনৌবা চহীগী য়াইফ পাওজেল পীজরি।

লমদম অসি অংগ্রেজশিংদা মায়োক্তা ইহৌ হৌখিবা নিংতম লান্মী নীলম্বর পীতম্বরগী পুন্সিগী শরুক অমনি। লমদম অসিগী মপারি পুম্নমক, থৌনা ফবা পুম্নমক, মমোম পুম্নমকপু ঐহাক্না ইকায় খুম্নজরি। ঐহাক্না প্রধান মন্ত্রী আৱাস য়োজনাগী কানবা ফংলবা অদুগুম্লবা ইমুং লিশিং ২৫ অদুবুসু অখন্ননা নুঙাইবা ফোংদোকচরি। অনৌবা চহীনা লাকপদা অনৌবা য়ুমগীদমক অনিরক থোক্না নিঙাইবা ফোংদোকচরি।

মরূপশিং, ঙসি ঐহাক্না লৌমীশিংগী পুন্সিদা অহোংবা পুরক্কদবা লৌউ–শিংউবগা মরী লৈনবা লিপা কোতি লিশিং অহুম মখায় হেনবগী প্রোজেক্তশিংগী উরেপ–উয়ুং তম্বগী তঞ্জা অদুসু ফংজখি। ঙসি থবক হৌরিবা ইথৈ লৌখোংগী প্রোজেক্তশিং অসিনা লৌমীশিংগী শেন্থোক শরুক অনি ওইহন্নবা ঐখোয়না হোৎনরিবা অদুগী মরুওইবা শরুক অমনি। চাউরাক্না লুপা কোতি ১২০গী সোন কনহর পাইপ লাইন স্কিমনা লমদম অসিগী হেক্তর লিশিং ১৪ হেনবা লৌফমদা ঈশিং ফংহনবা ঙমগনি। মদুগা লোয়ননা লমদম অসিগী প্রজা লাখ ৩ হেনবদা থক্নবা ঈশিংশু ফংহল্লগনি। স্কিম অসিগী মখাদা কিলোমীতর ২৫দগী হেন্না শাংবা পাইপ লৈনুংদা ফুম্লগনি, হায়বদি লৈবাক্তা লৈহাওদা লৌশু উবা য়ারগনি অমদি ইথৈ লৌখোংগী খুদোংচাবসু ফংলগনি। চহী ৪৭তগী প্রোজেক্ত অসি লৈখা তাদুনা লোইশিন্দনা লৈরক্লবনি। ১৯৭২দা মসিগী ফাইল লানখৎখি অমদি লমহাংনদুনা লৈখি। হৌখিবা চহী ২৫দগী প্রোজেক্ত অসিগী থবক নাকল অমরোমদা লেপতুনা লৈখি।

শুপ্নতগী লুপা কোতি ৩০ চংনা লোইশিল্লমগদবা প্রোজেক্ত অসি হৌজিক লুপা কোতি লিশিং ২৪০০ চংদুনা লোইশিনগদৌরি। হায়বদি হৌজিক চাউরাক্না চাদা ৮০গী মমল হেন্না লৈবাক অসিগী তেক্স থিরিবশিংনা অপুনবা স্কিম অসিগীদমক তেক্স থিবা তাবনি। ময়াম্না ইফমদা হায়বিয়ু, মতৌ অসুম্না তৌরম্লিবা মখোয় অদু সমাজগী মরাল লৈরবা মীওই নত্তব্রা, মখোয় লৌমাশিংগী মরাল লৈরবা মীওই নত্তব্রা, মখোয় অদোমগী মরাল লৈরবা মীওই নত্তব্রা, মখোয় বিহারগী মরাল লৈরবা মীওই নত্তব্রা, মখোয় ঝার্খন্দগী মরাল লৈরবা মীওই নত্তব্রা। অসিগুম্লবা মরাল লৈরবশিং অসিবু চৈরাক ফংহনবা মথৌ তাদব্রা… অসিগুম্লবা মরাল লৈরবশিংগী মায়োক্তা মোদীনা লান্থেংনগদ্রা নত্রগা লান্থেংনরোইদ্রা… চৌকীদার অমনা থবক অসি তৌগদ্র নত্রগা তৌরোইদ্রা…

ইচল–ইচে অমসুং ইচিল–ইনাওশিং, লৌমীশিংবু শুপ্ননতগী ভোৎ বেঙ্ক ওইনা খনবা মখোয়শিং অমদি লৌমীশিংবু অন্নদাতা ওইনা খনলিবশিং… নাকল অমরোমদা মখোয়গীদমক লৌমীশিং অসি ভোৎ বেঙ্কনি, নাকল অমরোমদা ঐখোয়গীদমক্তদি ঐখোয়গী লৌমীশিং অসি অন্নদাতানি। খেৎনবা অসিনি মমাংদা লৈরম্বা অদুনা লৌমীশিংবু ভোৎ বেঙ্ক ওইনা খনলম্মি অমদি ঙসি ঐখোয়না অদোম্বু অন্নদাতা ওইনা খঞ্জদুনা অদোমগী লৌবুক্তা তারিবা খুদোংচাদবা পুম্নমক থেংননবা পুকচেল শেংনা হোৎনরি।

মরূপশিং, ঙসিদি প্রজা খরনা থৌরম অসিবু চহী কয়াদগী পন্দুনা লৈরক্লবা থবক মাংলোমদা চংশিনবা হৌরে হায়না উগনি। ৱাফম অসি মচা মশু নত্তে। অদোম্না খন্থবিয়ু, মতম অদুদা অপুনবা বিহার ওইরম্মি, ঝার্খন্দ শেমলমদে। সরকার অমখক্তমক পতনাদা ফমলম্মি, করিগুম্বা লৌমীশিংদা থৌজাল খজিক্তং উৎপিরম্লবা, লমদম অসিগী প্রজাশিংগী খুদোংচাদবা অদু খজিক্তং খংবিরম্লবদি অপনুনবা সরকার অমা লৈনা লৈনা থবক অসি অসুক কুইবা মতম অসি ফাওবা পন্দুনা লৈরম্লোই অমদি কোতি ৩০গী প্রোজেক্ত অসি কোতি ২৪০০গী ৱাফম ওইরম্লোই।

অতোপ্পা ৱাফম অমনা ঙসি হিন্দুস্তানদা ঈশিংগী ৱাহৌদা য়ুম্লোন্নবা রাজ্যশিংগী মরক্তা খৎন চৈনবা থোক্লি, সুপ্রিম কোর্ত্তা কেস পন্দুনা লৈরি। ঈশিং চেন্থখিদুনা সমুদ্রদা তিনলি। অদুবু মশাগী রাজনিতীগী ওইবা মরমগী খৎন চৈনবা থোক্লি।

ঙসিগী থৌদোক অসি অখন্ননা লৈবাক অসিনা খংজিনগদবনি। ঐহাক্না বিহারগী মুখ্যমন্ত্রী ঐহাক্কী মরূপ নিতিশ কুমারগী মফমদা নুঙাইবা ফোংদোকচরি। ঐহাক্না ঐহাক্কী ঝার্খন্দগী মরূপ মুখ্যমন্ত্রী রঘুবর দাসকী মফমদা নুঙাইবা ফোংদোকচরি। মদুদী সরকার অনিমক্না পুন্দুনা রাজ্য অনিমক্কা মরী লৈনবা মখোয়না প্রোজেক্ত অসিবু ফগৎহন্নবগী মায়কৈদা হৈ শিংনা খোং থাংজিল্লি।

ঐহাক্না বিহারদগী লেংবিরক্লিবা ঐখোয়গী পর্লিয়ামেন্তকী মীহুৎশিংবু ইকায় খুম্নবা উৎচরি। ঐহাক্না ঝার্খন্দগী ঐহাক্কী পর্লিয়ামেন্তকী মীহুৎশিংবু ইকায় খুম্নবা উৎচরি। রাজ্য অনিমক্না, পর্লিয়ামেন্তকী মীহুৎশিংনা অমত্তা ওইনা পুন্দুনা ঝার্খন্দ অমসুং বিহারগী মায়কৈ অনিমক্কা লোয়ননা ঐহাক্কী ইনাক্তা লাকখি, অমদি সমস্যা অসি রাজ্য অমগীসু নত্তে… রাজ্য অমগীসু নত্তে, ঐখোয়গী লৈবাক অসিগী লৌমীশিংগীনি, মখোয়দা কানবা ফংহনগদবনি… অমত্তা ওইনা পুন্দুনা অমদি এম.পি. পুম্নমক অসিগী মফমদা নুঙাইবা ফোংদোকচরি মদুদি ৱাফম অসি পুরদুনা মখোয়না কৈদৌনুংদা নে তানা ফমখিদে, নে তানা তুমখিদে। ময়ামগীদমক অয়ুক নুমীদাং কোইচেন চেনখি অমদি ঐহাকপুসু কোইচেন চেলহনখি, মরম অদুনা ঐহাক্না পর্লিয়ামেন্তরিয়ানশিং অসিবু অখন্ননা ইকায় খুম্নবা উৎচরি মদুদি মদুনা মরম ওইদুনা ঙসি দাম অসি শারিবনি মদুগা লোয়ন লোয়ননা ভারতকী ফেদেরেলিজমবু অনৌবা পাঙ্গল অমা পীবগী থবকসু বিহাক অমসুং ঝারখন্দগী সরকার অনিমক্না অমত্তা ওইনা পুন্দুনা পাংথোক্লি। মসি ঐহাক্কী ওইনা অখন্ননা চাউথোকচনিঙাই ৱাফম্নি। নুঙাইরবা ৱাফম্নি। অমদি মসিনা লৈবাক অসিগী অতোপ্পা রাজ্যশিংগীসু মসিদগী তমজনিঙাই য়াম্না লৈরি। মরম অসিনা ঐহাক্না থোইদোক হেন্দোক্না পার্লিয়ামেন্তরিয়ানশিংবু, সরকার অনিমকপু, মুখ্য মন্ত্রী অনিমকপু থমোয় শেংনা হন্না হন্না নুঙাইবা ফোংদোকচরি।

মরূশিং, ঙসি মীওই খরনা লৈবাক অসিগী লৌমীশিংবু লোন কোকপীবগী মিংদা চিরোল তৌরি, লৌমীশিংদা ওইদবা ঙাংলি। মখোয়না কৈদৌনুংদসু উত্তর কোয়ল প্রোজেক্তকী মমিং ফাওবা তারমখিরোয় হায়বা ঐহাক খংই। কোয়ল অসি উচেক্কী মমিংলা নত্রগা দামগী মমিংলা নত্রগা তুরেলগী মমিংলা হায়বা ফাওবসু মখোয়দি খংবা নত্তে। কেন্দ্রদা মখোগী সরকার লৈরিঙৈ মতমদা চহী কয়াদগী লৈবাক অসিদা পন্দুনা লোইশিন্দনা লৈরক্লবা ইরিগেসনগী প্রোজেক্তশিং অসি লোইশিন্নবা মখোয়না কৈদৌনুংদা থৌৱা শাখিদে।

ইচিল–ইনাও অমসুং ইচল–ইচেশিং, ঐখোয়গী সরকার লাক্লবা মতমদা লৌমীগী লৌবুক্তা ঈশিং য়ৌহন্নবা থৌরাং ঐখোয়না পায়খৎখি। মতম কুইনা লোইশিন্দনা লৈরিবা ইরিগেসন প্রোজেক্তশিংগী চে চাং পুথোকহল্লপা মতমদা ওইরম্লিবা ফিভম অদু উবদা ঐহাক অঙকপনা থনখি। য়েংবদা অঙকপনা থল্লবা থবক কয়া মখোয়না তৌরম্লগা চৎখিরম্মি।

অদোম্না ভাপনা শাগৎপিরো মদুদি মসি উত্তর কোয়ল প্রোজেক্ত খক্তা নত্তে অসিগুম্বা মখলগী ইরিগেসন প্রোজেক্ত কয়া অমা লৈরম্মি মদুদা দামদি শাবা লোইরবা.. কেনেলদি শেমদ্রিবা। কেনেল শেম্বা লোইরগনা দাম শাবা লোইদ্রিবা। দাম অমসুং কেনেল অনিমক শাবা লোইরগা শম্নহনবগী থবক পাইখৎলমদবা। অসিগুম্বা মওং… পৈশা চংখ্রদি চংখ্রে, লৈবাক লৈহাও মাংখ্রদি মাংখ্রে, লৌমীশিং শিংরগদি শিরে মখোয়না করিগুম্বা অমত্তা নাচুংলমদে। থবক অসিমক্নি তৌরম্লিবা। লৌমীশিংগা লোয়ননা, লৈবাক অসিগী ইরিগেসন প্রোজেক্তশিংগা লোয়ননা অসিগুম্বা মখলগী মীচং মীখাই নাইবা চত্থরম্মি।

ঐহাক্না লৈবাক পুম্বগী অসিগুম্বা মখলগী অচৌবা প্রোজেক্তশিংগী লিস্ত শেমহন্দুনা, বজেৎতা পৈশাগী থৌরাং তৌদুনা প্রধান মন্ত্রী সিঞ্চাই পরিয়োজনা হৌদোক্লম্মি। ঙসি প্রোজেক্ত অসিনা মরম ওইদুনা লৈবাক অসিগী অদুগুম্লবা প্রোজেক্ত ৯৯ অদু মপুং ফানা পাইখৎপগী থবক চত্থরি। মখোয়শিং অসি চহী ৩০–৩০, ৪০–৪০দগী পন্দুনা লৈরম্লবনি, ফাইলশিং ফাওবা মাংখ্রশিংনি।

মরূপশিং, ঐখোয়না মসিদা শেল কয়া য়াম্না থাদরিবগে হায়বা অদোম্না খংলব্রা। ঐহাক ময়ামদা হায়জগে… চাউরাক্না লুপা কোতি লিশিং ৯০ হায়বদি লুপা লাখ কোতি অমগুম্বনি… মসিনি ঐখোয়গী থবক তৌবগী মওং মতৌ।

ইচিল–ইনাও অমসুং ইচল–ইচেশিং, করিগুম্বা ঐহাক্না রাজনীতি তৌগদবা ওইরবা, করিগুম্বা ঐহাক্না লৌমীশিংবু ভোৎ বেঙ্কী শরুক অমা ওইনা থমগে হায়রগদি য়াম্না লাইখ্রে, মসিগী লুপা কোতি লাখ অমগী শেনফম অসি অসুক য়ামখ্রবা প্রোজেক্তশিং অসিগী মতুং ইন্দুনা ৱানা হোৎনরুবগী মথৌ তাদে। অয়ুক নুমিদাং খায়দনা কোইহং হংলুবগী করি মথৌ তাবগে, ওফিসারশিংবু কোইচেল চেলহনবগী করি মথৌ তাবগে। ইচম চম্না লিপা কোতি লাথ ১ অদু লৌমীশিংগী লোন কোকথোক্তুনা য়েন্থোকলম্বা য়াই। অদুবু ঐহাক্না লৌমীশিংবু লম্মুক্নহনগদবা লম্বী অদু খনখিদে, পাপ চেনগদবা থবক তৌখিদে। লোন কোকপীবদি চহী অমা খক্তগীনি অদুবু লুপা কোতি লাখ অমা চংনা লাক্কদৌরিবা ঈশিং অদুদি চহী কয়া কয়া ফাওবা কানবা ফংহল্লগনি। লৌমীগী চারোল ৫–৫,২৫–২৫ কানবা ফংহল্লগনি। মখোয়বু কৈদৌনুংদা লোন তোন্দনবা খোংথোং অদু ঐখোয়না পায়খৎলে। ঐখোয়না অদুগুম্লবা ভোৎ বেঙ্ককী রাজনীতি অদু তৌখিদে, ঐখোয়না ঐখোয়গী লৌমীশিংবু মপাঙ্গল কনখৎহন্নবা থবক তৌখি, মরম অদুনা ইচিল–ইনাও অমসুং ইচল–ইচেশিং ভোৎ কানবা চত্থরম্লিবা প্লে অদুগী মহৈ অদুনা মখোয়না লৌমীশিংবু শেল তোনবা অমা ওইনা থমলম্লি। মখোয়না নহাশিংবু চাক্নিবা ওইহন্দুনা থম্লম্মি। মখোয়না ইমা – ইবেন অমসুং ইচল – ইচেশিংবু অনসেক্যুর ওইনা থম্লি।

লৈবাক অসি সরকারনা নত্তে, লৈবাক অসি লৈবাক মীয়াম্না চত্থগদবনি। লৈবাক অসি ঐখোয় খক্তগী নত্তনা ময়াম পুম্নমক্কী ওইগদবনি, ময়ামগী পাঙ্গল শক্তিনা চত্থগদবনি। ইন্তেন্সন অসিগা লোয়ননা ঐখোয়না থবক তৌরি।

ইচিল–ইনাও অমসুং ইচল–ইচেশিং, সরকারনা লেপ্পা নাইদনা হোৎনবনা মরম ওইদুনা ঙসি মশিং য়াম্লবা স্কিমশিং মপুং ফানা পায়খৎলি অমদি প্রোজেক্ত কয়া অমা অরোইবা থাক্তা চংশিল্লিবা অদু ঐহাক্না উবা ফংলে। অমদি অরোইবা থাক্তা য়ৌরিবা ৱাফম অসি পুথোক্তুনা লৌমীশিংবু ভোৎ বেঙ্ক ওইনা খনবা মমাংদা লৈরম্বা সরকার অমসুং লৌমীশিংবু অন্নদাতা ওইনা খনবা ঐখোয়গী সরকারগী মরক্তা খেৎনবা য়াম্না লৈ। খেৎনবশিং অসি অদোম্না এয়ার কন্দিসনগী কাদা ফম্দুনা তি.ভি.দগী কৈদৌনুংদা খংবা ঙম্লোয়, পাও–চেশিংগী মরুওইবা পাওদগী খংবা ঙম্লোয়, মরম অদুনা ইচিল–ইনাও অমসুং ইচল–ইচেশিং, লৈবাক অসিগী মশেক মঙাল থোকপা তুংগীদমক, লৌমীশিংবু মপাঙ্গল কনখৎহনবা লম্বী অসিদা চৎকদবনি অমসুং ঐখোয়না ঐখোয়গী ইথৌদাং অসি শুপ্নতগী লৌমীশিংগী সেবা তৌবা, লৈবাক অসিগী সেবা তৌবনা ঐখোয়গী ধর্মনি খন্দুনা থবক তৌরি।

মরূপশিং, ঐখোয়গী সরকার অসিনা লৌউ–শিংউবা অমদি লৌমীবু মপাঙ্গল কনখৎহন্নবা অনৌবা ৱাখল্লোন অমগা লোয়ননা মাংলোমদা চংশিল্লি, ঐখোয়না হোৎনরিবা অসি মরু মরাংদগী কৈথেল ফাওবা অনৌবা সিস্তেম লিংখৎতুনা লৌমীশিংবু মপাঙ্গল কনখৎহনবনি। 

ইচিল–ইনাও অমসুং ইচল–ইচেশিং, লৈবাক অসিগী তোঙান তোঙানবা সরকারশিংনা নিং তম্লবা মতুংদগী মশাগী ওইবা ৱাখল্লোন অমদি তৌবা ঙম্বা অদুগী মতুং ইন্না থবক তৌরম্মি। কনাগুম্বনা মীংচৎতা পুক্নিং চংলম্মি অদুগা কনাগুম্বনা থবক্তা পুক্নিং চংলম্মী। ঙসি মফম অসিদা প্রধান মন্ত্রী আৱাস য়োজনাগী মখাদা ইমুং লিশিং ২৫না অনৌবা য়ুম ফংলে। মরম অদুনা ঐহাক্না ময়ামদা স্কিম অসিগী খুদম অমা পীজগে।

মরূপশিং, চহী মরি মখাগী মমাংদা ময়াম পুম্নমক্না ভার্তিয়া জনতা পার্তীগী সরকারবু তঞ্জা অমা পীনবিখিবা অদুদগী ঐখোয়না লৈবাক অসিগী লাইরবশিংদা, ময়ুম লৈজদবশিংগী মফমদা ৱাশক অমা শকখি। মদুদি ২০২২ ফাওবদা লৈবাক অসিগী খুঙ্গং ওইগেরা শহর ওইগেরা লৈবাক অসিগী প্রজা খুদিংমক্কী মফমদা পক্কা ওইবা য়ুমথক পীনবা হোৎনগনি। হোৎনবা অসিগী মনুং চন্না ঐখোয়গী সরকার অসিনা প্রধান মন্ত্রী আৱাস য়োজনা হৌদোকখি। শহরশিংগী তোঙান্না, খুঙ্গংশিংগী তোঙান্না ঐখোয়না স্কিম অসি হৌদোকপা মতমদা অসিগুম্লবা স্কিম অসিদি হান্ননা লৈরে, মসিদা নখোয়না অহোংবা পুরক্কদৌরিবা অদু করিনো, কবম্না পুরক্কদৌরিবনো, নখোয়না তৌরিবা অদুদি মমিং খক্তমক ওন্থোকপনি হায়বা ৱাফম কয়া পুথোরকখি। অদুবু স্কিম অসিদা তশেংনা করি অহোংবা পুরকখিবগে, করম্না পুরকখিবগে, মসিগী ইফেক্ত করিনো হায়বদু ঙসি ঐহাক্না অদোমগী খুত্থাংদগী ঝার্খন্দগী শেংলবা লৈপাক লৈহাওদগী লৈবাক অসিগী লাইরবা পুম্নমক্কী মফমদা য়ৌহনজনিংই।

ইচিল–ইনাও অমসুং ইচল–ইচেশিং, ঐখোয়গী লৈবাক অসিদা লাইরবশিংবু য়ুম ফংহন্নবা স্কিম মমাংদসু লৈরম্মি। অদুবু মদু কনাগুম্বা অমগী ইমুং মনুংগী মমিংদা স্কিম অদু চত্থরম্মি মদুদা য়ুমগী চিন্তা কয়া তৌরমদে, ইমুং মনুংগী মীংচৎ ঙাক্তুনা থম্নবা চিন্তা ওইনা তৌরম্মি। ঐখোয়না লাক্তুনা অহোংবা পুরক্লে… ঐখোয়না নরেন্দ্র মোদী আৱাস য়োজনা হায়না মমিং থোন্দে, ঐখোয়না নমো আৱাস য়োজনা হায়না মমিং থোন্দে, ঐখোয়না রঘুবর দাস আৱাস য়োজনা হায়না মমিং থোন্দে, ঐখোয়না ইচম চম্বা মমিং থোনলে প্রধান মন্ত্রী আৱাস য়োজনা, প্রধান মন্ত্রী ওইরকপা খুদিংমক্না মসিবু মাংলোমদা পুদুনা চৎলগনি। মিংগীদমক খৎনবা, মিংগীদমক নত্তে থবক ওইনা পাংথোক্কদবনি।

মরূপশিং, লৈবাক অসিদা হান্না লৈরম্বা আৱাস য়োজনা অদুদা কনানা য়ুম ফংগনি, মতৌ করম্না ফংগনি হায়বা অদু খন্দোকপদা অচৌ অচৌবা গেম কয়া চত্থরম্মি। দলালি তৌনরম্মি। ঐহাক্না মীয়ামদা হংজরি। ঐঙোন্দা সর্তিফিকেৎ উৎলিবা য়ুম ফংলিবা মীওই লিশিং ২৫গী মফমদা ঐহাক্না হংজনিংবদি অদোম্না প্রধান মন্ত্রী আৱাস য়োজনা ফংনবা কনাগুম্বা অমগী মফমদা পৈশা পীজখিবা লৈখিব্রা, অহৌবা খোংজেলদা হায়বিরকউ, সর্তিফিকেৎ অদু মথক্তা থাংগৎতুনা হায়বিরকউ পৈশা পীজখিবা লৈব্রা… কনাগুম্বা অমত্তনা পৈশা পীবা তাখিব্রা , কনাগুম্বা অমত্তনা অদোমদগী পৈশা নিরকখিবা লৈখিব্রা।

ঐহাক্না লৈবাক পুম্বগী ময়ামদা হায়জনিংবদি, ঐখোয়গী মফম অসিদা দলান তৌবশিংগী মফম লৈতে মরম অদুনা লাইরবশিংগী একাউন্তদা দাইরেক্ত ওইনা বেঙ্কতগী পৈশা দিপোজিৎ তৌহল্লি। অচুম্বা মমিং লেপথোকপদশু ঐখোয়না সাইন্তিফিক ওইবা তেক্নিক শিজিন্নরি। ২০১১গী সেন্সসকী মতুং ইন্না অদুগা মমাংদদি বি.পি.এল. লিস্ত অমদি মদুসু হোংদোক হোংজিন তৌদুনা লৈরম্মি। প্রজা মীয়াম্না মখোয় মখোয়গী মমিং য়াওদে হায়দুনা ৱাকৎতুনতা লৈরম্মি। মমাংদা লৈরম্মি অদুবু হৌজিক মদু ককথৎখ্রে। প্রধান মন্ত্রী আৱাস য়োজনাদা ঐখোয়না খ্বাইদগী অহানবা ওইনা চরাং চহিংনবা অসি চুমথোক্লে।

হৌজিক খুঙ্গংশিংদা কনানা য়ুম ফংগনি হায়বা অদু ২০১১দা পাংথোকখিবা সেন্সস অদুগী মতুং ইন্না গ্রাম সভাশিংগা খুত্থাংদা ৱারেপ লৌরম্মি। মসিদসু নত্তনা করিগুম্বা মরম অমনা ওইদুনা কনাগুম্বা অমগী মমিং লিস্ত অদুদা য়াওদবা তারবা নত্রগা কনাগুম্বা অমানা ৱাকৎনিংবা লৈরগদি মদু অপীল তৌনবা খুদোংচাবা অদু মপুং ফানা পীরি।

য়ুম ফংহনবদা ত্রান্সপরেন্ত ওইহন্নবা ঐখোয়গী সরকারনা য়ুম ফংহনগদৌরিবা মখোয়শিং অদুগী মমিংশিং অদুগী লিস্ত অদু গ্রাম পঞ্চায়ৎশিংগী ফকলাংশিংদা থেৎনবসু ঐখোয়গী সরকারনা ৱারেপ লৌখি। মখোয়শিং অসি য়ুম ফংবগী হক লৈ হায়বদু খুঙ্গং পুম্নমক্না খংগদবনি। হায়বদি থাক খুদিংমক্তা লাইরবশিংবু য়ুম ফংহন্নবা ঐখোয়না হোৎনরি, মমাংদদি থাক খুদিংমক্তা লাইরবশিংগা মমিং ককথৎনবা, লিস্ততগী মমিং লৌথোক্তুনা দলালিশিংগী ফুরিৎখাও থলহল্লম্মি। করোবার অসিমক চত্থরম্মি।

হৌজিক য়ুম শাবগী মোনিতরিংদা লাক্লসি…. মমাংগী স্কিমদা করম্বা মখলগী য়ুম শারম্বগে, অদোম্নসু উবিরম্লগনি মখোয়গী ফিভম নাতৈ চারমদে, প্রজাশিংনা ময়ুম ফংলবা ফাওবা মদুদা চৎনবা থৌরাং তৌরমদে। ফিভম অসিগী মরমদি মমাগী স্কিমশিংদা মোনিতরিংগী মতিক চাবা মওং মতৌ য়াওরমদে। প্রধান মন্ত্রী অৱাস য়োজনাগী মখাদা শারিবা য়ুমশিংগী ক্বালিতীদা মীৎয়েং থম্ননবা ঐখোয়না অনৌবা সিস্তেম হৌদোক্লে।

হৌজিক শারিবা য়ুম অসিদি শারিঙৈ মনুংদা তোঙান তোঙানবা থাক অহুমদা ফোতো নম্লে। মদু জিয়োতেগিং তৌরে। হায়বদি তাং কয়াদা ফোতো নমখি, কদায়দা নমখি হায়বা পুম্নমক অসিগী ইনফোর্মেশন মওং চুম্না হাপচিল্লম্মি। মসিদশু নত্তনা সরকারনা শেম্লিবা সিস্তেম অসিদা ফোতোশিং অদু কনাগুম্বা অমত্তনা য়েংবা য়াহন্নবা থৌরাং অদুসু তৌরি।

ইচিল–ইনাও অমসুং ইচল–ইচেশিং, মমাংদা ফংলম্বা য়ুমশিং অদুদদি শুপ্নতগী ফকলাং মরি খক্তমক লৈরম্মি। হৌজিক ফংলিবা য়ুম অসিদদি ইমুং অমা লৈবদা দরকার ওইবা অদু য়াওরে। মৈগী কনেক্সন, চাকথোং গ্যাসকী কনেক্সন, তোইলেৎ, খুদোংচাবা পুম্নমক অসি য়ুমগা লোয়ননা ফংলে। মসিদসু নত্তনা অচৌবা থবক অমসু তৌরে। ঐখোয়না য়ুমগী দিজাইন অদুদা… মমাংদদি য়ুম মচা মচা শারম্মি, ঐখোয়না মদুগী পাকচাউবা হেঙ্গৎহন্দুনা দিজাইনগী খুদোংচাবা কয়াসু ফংহল্লে। মফম অদুদা ফংবা পোৎলমশিং শিজিন্নদুনা শেল য়াম্না চংহন্দনা মোদর্ন তেক্নিক শিজিন্নদুনা অনৌবা দিজাইনগী য়ুম প্রজাশিংদা ফংহন্নবা খোংথাংশু লৌখৎলি।

মসিদশু নত্তে মসি ঐখোয়গী থবক তৌবগী মওং মতৌ অদুনি মদুদি মমাংগী সরকারনা য়ুম অমা শাবদা চাউরাক্না থা ১৮ চংলম্মি, হৌজিক্তি ঐখোয়না শিজিন্নরিবা তেক্নোলোজী, ঐখোয়না শেমলিবা সিস্তেম অদুনা মমাংদা থা ১৮ হেন্না চংলম্বা অদু ঙসিদি থা ১২দগী তাথবা মতমগী মনুংদা মশাগী ময়ুমদা লৈবা চৎনরে অদুগা ইচিল–ইনাও অমসুং ইচল–ইচেশিং, ঐখোয়গী লৈবাক অসিদা য়ুম ওইরবদি নুপাশিংগী মমিংদা, গারি ওইরবদি নুপাশিংগী মমিংদা, লম ওইরবদি নুপাশিংগী মমিংদা, লৈরিবা পুম্নমক নুপাশিংগী মমিংদা লৈরম্বা অমদি নুপা অদুনা শিবা তারগদি মচানুপাগী মমিংদা, মমাগী মমিংদা করিগুম্বা অমত্তা লৈতে। প্রধান মন্ত্রী আৱাস য়োজনাদা ইমুং অদুগী খ্বাইদগী অহল ওইরিবা নুপী অদুগী মমিংদা য়ুম অদু লৈনবা ঐখোয়না ৱারেপ লৌরে। ঐহাক্কী ইমা–ইবেন অমসুং ইচল–ইচেশিং মপাঙ্গল কল্লি…. মখোয়গী একাউন্তদা পৈশা হাপচিনগনি।

লৈবাক অসিদা লৈরিবা ময়ুম লৈজদবশিং মখোয়দা ময়ুম ফংহন্নবা ঐখোয়না ৱাশক্লি, খোংজেল য়াংনা থবক চত্থরি, ময়ুম ফংহনগদবা কয়া অমা হৌজিকশু লৈরি। ময়ুম ফংদ্রিবশিংগী মফমদা ঐখোয়না থাজবা পীরি। ঐখোয়না চহি মরি মখায় অসিদা শরুক মঙা হেন্না থবক তৌদুনা উৎলে। ২০২২ ফাওবদা য়ুম শাবগী থবক মপুং ফানা লোইশিন্নবা পান্দমগা লোয়ননা চংশিল্লি। য়ুম ফংদ্রিবশিং অদুশু য়ুম ফংগনি হায়বগী থাজবা ঙসি ঐহাক্না পীজরি।

মরূপশিং, লাইরবশিংনা য়ুম ফংলবা মতমদা মখোয়গী আত্মাগী ওইবা থাজবা অদু খম থেংলকই। মখোয়না নোংজু–নুংশা অমদি অইং–অশাগী অৱাবা লৈত্রবা মতমদা সেল তানবারোমদা পুক্নিং চংলকই অমদি মখোয়গী পুন্সিগী থাক হেঙ্গৎলকই।

ইচিল–ইনাও অমসুং ইচল–ইচেশিং, ঝার্খন্দ মফম অসিগী ত্রাইবেলশিং, মফম অসিগী মীচম প্রজাগী স্ত্রগল অদুগী মহৈনি। রাজ্য অসি অদোমগী এস্পিরেসনশিংগী খুদম্নি। মদুবু অতলজীগী সরকারনা ইকায় খুম্নবা পীখি। মসিগী চাং মানবা অমসুং অপুবা চাউখৎ থৌরাংগীদমক কেন্দ্র অমসুং ঝার্খন্দগী সরকারশিংনা পুকচেল শেংনা চংশিল্লি। সবকা সাথ সবকা বিকাস অসি ঐখোয়গী লম্বীসুনি অমদি পান্দমসুনি।

ৱাখল্লোন অদুগী মহৈনি মদুদি মফম অসিদা আয়ুশ্মান ভারত প্রধান মন্ত্রী জয় য়োজনা পি.এম.জে. য়োজনাবু হৌরকপদা মোদী কেয়ারগী মমিংদা ময়াম্না খংনরম্মি। থা অহুগী মমাংদা হৌদোকখিবা অদুনা ঙসিদি লাইরবা লাখ কয়াবু পুন্সী পীনবিরি। শুপ্নতগী নুমীৎ চামগী মনুংদা চাউরাক্না ইচিল–ইনাও অমসুং ইচল–ইচে লাখ তরুক তরেৎ হেন্না লৈবাক্কী তোঙান তোঙানবা মফমশিংদা লৈরিবা হোস্পিতাল লিশিং কয়াদা লায়েংবা ফংখ্রে নত্রগা হৌজিক হৌজিক লায়েংলি, মদুগী মনুংদা ঝার্খন্দগীসু চাউরাক্না কানবা ফংলবা লিশিং ২৮দা মতেং ওইহল্লে।

মরূপশিং, ঙসিদি আয়ুশ্মান য়োজনা অসি য়াম্না পাকথোক চাউথোকখ্রে মদুদি নুমীৎ খুদিংগী চাউরাক্না প্রজা লিশিং ১০না মসিগী কানবা ফংলি। হায়বদি স্কিম অসিনা নুমীৎ খুদিংগী প্রজা লিশিং ১০গী পুন্সি কনবা, মখোয়গী অৱাবা হন্থহন্নবা হোৎনরি।

ইচিল–ইনাও অমসুং ইচল–ইচেশিং, চাউখৎ থৌরাংগী ইচেল মঙা হায়বদি অঙাংশিংগী মহৈ–মশিং, নহাশিংগী শেন্দাল লম্বী, লৌমীশিংগী ইথৈ–লৌখোং, অহল ওইরবশিংবু হিদাক লাংথক অমদি মীপুম খুদিংমক্কী ৱা তাবা অসিবু ন্যু ইন্দিয়াগী সংস্কার ওইহন্নবা ঐখোয়না কন্না হোৎনরি।

ঝার্খন্দগী প্রজা মীয়ামগী মপুংফাবা থৌজাল অদু ঐখোয়না ফংজরি। ন্যু ইন্দিয়াগীদমক ফংজরি, ন্যু ঝার্খন্দগীদমক ফংজরি। চাউখৎ থৌরাংগী মায়কৈদা অদোম্না থম্লিবা থাজবা অদু অদোম্না লেংদনা থমগনি হায়বগী থাজবা অদুগা লোয়ননা ঐহাক্না অমুক হন্না নিতিস কুমার অমসুং রঘুবর দাস অনিমক্কী মফমদা নুঙাইবা ফওংদোকচরি। ঐখোয়গী এম.পি. পুম্নমক্কী মফমদা নুঙাইবা ফোংদোকচরি অমদি প্রজা মীয়াম্বু নুঙাইবা ফোংদোকচরি।

প্রোজেক্তশিং অসিগীদমক হন্না হন্না য়াইফ পাওজেল পীজরি। অমসুং মশিং য়াম্লবা মীয়াম লেংবিরক্তুনা, খাংবা কনবগা লোয়ননা থৌজাল পীনবিবগীদমক ঐহাক্না অমুক হন্না ইকোক নোনজদুনা খুরুমজরি। ঐহাক্কা লোয়ননা অহৌবা খোংজেলদা হায়বিয়ু… খুৎ অনিমক খুৎতুম তাশিন্দুনা হায়বিয়ু…

ভারত ইমানা য়াইফরে…. অদুম্না নত্তে

ভারত ইমানা য়াইফরে…. অদুমক্নি

ভারত ইমানা য়াইফরে….

ভারত ইমানা য়াইফরে….

হন্না–হন্না থাগৎচরি।