ভারতকী প্রধানমন্ত্রী

মশিং য়াম্না লেংবীরক্লিবা ইমাশিং, ইচল-ইচেশিং, ইচিল ইনাওশিং অমসুং নহা ওইরিবা মরূপশিং। চহি ১০০গী মমাংদগী ঙসি মার্চকী ৮ অসি মালেম পুম্বদা ইন্তরনেস্নেল ৱুমেন্স দে হায়না পাংথোক্তুনা লাক্লি। অদুবু ঙসিদি হিন্দুস্তান পুম্বা ঝুনঝুনুগা মরি লৈনরি। তেক্নোলোজীগী মতেংনা ঝুনঝুনুগী থৌরম অসি লৈবাক্কী কাচিন কোয়া খুদিংমক্তা য়ৌহল্লে। ঝুনঝুনুদা ঐহাক্না লাক্লিবা অসি খন্থরবা মতুংদা লাকখিবনি। লাকখিবা নত্তে, অদোম্না চিংদুনা পুরকখিবনি। অদোম্না বেতী বচাও, বেতী পঢ়াও কেম্পেন অসি জিলা অসিদা মওং তানা পাংথোক্তুনা মাংলোমদা পুদুনা চৎলিবা অদুনা ঐহাকপু ঝুনঝুনুদা লাকনীংবা ফাওহনখি।

লমদম অসি অথৌবশিংগী লমদম্নি হায়না বসুন্ধরানা ফোংদোকপীখ্রে, মরম অদুনা সমাজ সেবাগী থবক ওইগেরা, মহৈ মশিংগী থবক ওইগেরা, লৈবাক্কীদমক থৱাই থাবগী থবক ওইগেরা, ঝুনঝুনুনা মায় লৈখিদে, ঝুনঝুনুনা মায়োক্নদুনা থেংনখি হায়বা জিলা অসিনা পাংথোক্তুনা উৎখ্রে। মরম অদুনা ঝুনঝুনুগী লৈপাক লৈহাওদগী হৌদোক্কদৌরিবা থৌরম অসিদা লৈবাক অসিনা ঝুনঝুনুদগীশু ইন্সপিরেসন ফংলগনি, লৈবাক অসিনা মফম অসিদগী থৌনা অমশু ফংলগনি।

বেতী বচাও, বেতী পঢ়াও- করিগুম্বা মায় পাকপা অমা পুরকপদা অপেনবা ফাওই, ফিভম খরা ফগৎলকপগুম খল্লি। অদুবু করি-করিগুম্বা মতমদা পুক্নিংদা য়াম্না চাউনা নুংঙাইতবা অমা ফাওই মদুদি লৈবাক অসিগী থোইদোক হেন্দোকপা সংস্কৃতি, লৈবাক অসিগী চৎন লোনচৎশিং, বেদদগী বিবেকানন্দ ফাওবা- অচুম্বা মায়কৈদা পুবীরি অদুবু করি করম্বা মরমদগীনো ঙসি ঐখোয়না ঐখোয়গী ইয়ুম মক্তদা ইচানুপী কঞ্জনবগীদমক খুরুমজবা মথৌ তারিবা, খঙহনবা মথৌ তারিবা, মদুগীদমক বজেৎতগী শেল চাদিং তৌবা মথৌ তারিবা। সমাজ অমগীদমক মসিদগী হেন্না ৱাবা অমমুক লৈরম্লোই হায়না ঐহাক্না খল্লি। চহি কয়াগী মমাংদগী মপুং ফাদবা ৱাখল্লোন্না মরম ওইদুনা, অরানবা ৱাখল্লোন্না মরম ওইদুনা ইচানুপীশিং খক্তবু মাংহন্নবা লম্বী য়াৎলম্মি। নুপামচা লিশিং অমগা য়েংনরুবদা মফম খরদা নুপীমচা ৮০০, মফম খরদনা নুপীমচা ৮৫০, মফম খরদা নুপীমচা ৯০০ লৈরি, মসিনা সমাজগী ফিভম করি ওইরক্কনি হায়বা খনবীয়ু। নুপী অমসুং নুপা অনিমক মান্ননা লৈরবা মতমদা সমাজগী সাইকল মখা তানা চত্থরিবনি। অঙাং পোক্লকপা মতমদা নুপীমচাশিংগী মশিং হেঙ্গৎলক্লিবা অসিনা মশা মথন্তা অনৌবা থাজবা অমা, অনৌবা আশা অমা পোকহল্লি। মসি হৌখিবা চহি অনিগী এক্সপরিয়েন্সনি অমসুং মায় পাকপা অসি য়েংলগা ঙসি মার্চকী তাং ৮, ইন্তরনেস্নেল ৱুমেন্স দেগী তাঞ্জা অসিদা ভারত সরকারনা প্রোজেক্ত অসি জিলা ১৬১ খক্তা নত্তনা হিন্দুস্তানগী জিলা পুম্নমক্তা মসি হৌদোক্লে। মদুগীদক মফম অদুগী ফিভম ফজরগশু মতৌ করম্না হেন্না ফগৎহনগদগে হায়বা অদুদা থবক তৌরগনি। ঐখোয় ইশানা ইশাদা হংজবা তাবনি। করি করিগুম্বা মতমদা ইচানুপীবু পোৎলুম ওইনা খল্লিবা অদু অরিবা ৱাখল্লোন্নি। ইচানুপী অসি পোৎলুম নত্তে, ইচানুপীদি ইমুং মনুং অপুম্বগী লেমজনীংঙাইনি হায়বা অদু ঙসিদি থৌদোকশিংনা উৎলরে। লৈবাক অসিগী নুপী সাইন্তিস্ত অহুম্না স্পেস তেক্নোলোজীদা চাওনা মীংচৎ ফংলে। ঝুনঝুনুগী নুপীমচা অমনা ফাইতর প্লেন পাইহনবা মতমদুদা ইচানুপীগী পাঙ্গল থৌনা অদু মশক খঙলকই। ওলেম্পিক্তা গোল্দ মেদল ফংদুনা কনাগুম্বা অমা লাকপা মতমদা, মেদল পুরক্লিবা অদু নুপীমচাশিংনি খঙবগা লৈবাক পুম্নমক্না চাওথোকচৈ মদুদি ঐখোয়গী নুপীমচাশিংনা মালেমদা ঐখোয়বু মশক তাক্লে। ঙসি ঐহাক্না মফম অসিদা মচানুপী পোক্লিবা ইমুংশিংগী মমাশিংগা লোয়ননা নুপীমচাশিং অদুগা উনজবগী তঞ্জা ফংজরে। মখোয়গী মায়থোং অদু মোমোন মীনোক্না থল্লরে।

ঐখোয়গী লৈবাক অসিদা নুপামচা ওইগেরা নুপীমচাবু ওইগেরা- মখোয়গী চাউফম থোকপা হকচাংগী ফিভম অদু য়ৌদনা লেপখি। করিগুম্বা মতমদনা লুম্বগী চাং য়ৌদবা অঙাং পোক্লি। সমস্যা অসিদগী ঐখোয় নান্থোকচবা তাই। অদুবু ঐহাক্না হায়জরিবা অসিনি মসি সরকাগী শেনফম খক্তনদি পাংথোকপা ঙমগদবা থবক নত্তে। মসি প্রজানা শরুক য়ারবা মতমদুদা ওইথোক্কনি। মমাংদা চাবা ৱাৎপগী মায়োক্তা থবক পায়খৎলমদবা নত্তে। সরকার খুদিংমক্কী মতমদা করিগুম্বা মখল অমা নত্রগা অমগী স্কিমশিং পায়খৎলম্মী। ঐখোয় অয়াম্বনা খল্লিবা অসি মথৌ তারিবা কেলোরি অদুখক মখোয়গী মপুক্তা য়ৌহল্লগদি চাবা ৱাৎপদগী নান্থোক্লগনি হায়বসিনি। অদুবু এক্সপার্তনা হায়রিবদি অফবা চিঞ্জাক খক্তনা সমস্যা অসি লোইশিনবা য়ারোই। ইকো সিস্তেম চুমথোকপা মথৌ তাই। অফবা চিঞ্জাক ফংজরগশু মফম অদুদা অমোৎপা ঈশিং ফংলগদি, ফনা য়াম্না চারবশু চাবা ফংদবগী ফিভম অদুগা কয়া খেৎনবা লৈতে।

ন্যুত্রিসনগী অৱাবা অসিশু থবক অমনি। করি করিগুম্বা মতমদা সরকারনা তিকা থাবগী প্রোগ্রাম কয়া পায়খৎলি। অদুবু ঐখোয়না হেল্থ সেন্তরশিং অদুদা চৎলুদে। মদুনা মরম ওইরগা মখোয় অমা নত্রগা অমনা নারে হায়না ৱাকৎলকই। অদোম্না হৌজিক উৎখিবা ফিল্ম অদুদা উখ্রে মদুদি খুৎ হামদোক্তনা চাবগী হৈনবীনা মরম ওইদুনা অঙাংশিং শিবা য়াওরি। অঙাংশিংবু চাক ইনবীরিবা মমাশিং অদুগী মখুৎ-মশা অদু শেংনা হামদোকপগী হৈনবী থমগদবনি হায়বসি কনানা তম্বীগনি? থবক অসি ঐখোয়গী তুংগী য়াইফনবা, ঐখোয়গী অঙাংশিংগী পুন্সি ফগৎহনবা অসি ঐখোয় পুম্নমক্কী থৌদাংনি। ঙসি ঐখোয়গী লৈবাক অসিদা চহিগী মতুং ইন্না ৱাংফম থোকপা চাং অদুদগী তাথনা ঐখোয়না উবা ফংই। ঐখোয়গী অঙাংশিং মশা মউ ফবা, মতিক চানা লুম্বা, ৱাংফম থোকপা চাং য়ৌনা ৱাংবা, হিরম পুম্নমক অসিদা পুক্নিং চংলদুনা হোলিস্তিক এপ্রোছ অমগা লোইননা ২০২২ ফাওবদা লৈবাক অসিদা মচি ওইবা চিঞ্জাক্কী লমদা ঐখোয়না ফংবা ঙম্লে হায়না চাওথোক্না হায়বা ঙম্লগনি। চাওরাক্না লুপা কোতী লিশিং ৯ চংনা স্কিম অসি চত্থরগনি। অমসুং অকক্নবা নোর্মগা লোইননা আশা ৱার্কর ওইগেরা, ভিলেজ লেবেলগী ভোলুনতীয়রশিং ওইগেরা, মখোয়না তেক্নোলোজীগী মতেং ফংগনি, চাং নাইনা মখোয়না দাতা খোমজিনগনি। মদুদা করিগুম্বা মখল অমত্তগী অপ-দাউন লাকপা মতমদা খুদক্তা মথক্তগী ইন্তরবেন্সন তৌগনি। সমস্যা অদু করম্না লোইশিনগদগে হায়বা ৱাফমশিং অদুদা খন্নগনি। করিগুম্বা মতমদা থা নিপাল ফাওবদি অঙাংগী গ্রোথ লৈরি, অরুম্বগী চাং চপ চারি; নোংজুথা লাক্লে- খঙহৌদনা অনা অয়েক য়াওরক্লে। অঙাং কয়া অমগী ফিভম শোকচিল্লকই, অদোম্না থা নিপাল চংনা হোৎনখিবা পুম্বা থা অমদা লৈখা তারকই। অসিগুম্বা য়াম্না চাওনা মায়োক্নরিবা থবক অসিশু ঐখোয়না মপুং ফানা পাংথোক্কদবনি। মিসন ইন্দ্রধনুশকী খুত্থাংদা তীকা থাবগী থবক্তা খুমাং চাওশিল্লে অমসুং চহি অসিগী লোইশিল্লকপা ফাওবদা তীকা থাবগী থবক চাদা ৯০ ফাওবা পাংথোক্নবা ঐখোয়না হোৎনরি। মতৌ অদুম্না শীং মৈ থাদুনা থোং থাক্লিবা চাকখুমদা, ইমা অদুনা নোংমদা চুরূপ ৪০০গী চাং ওইগদবা মৈখু অদু মখোয় মশাগী থবোম্বীদা চিংশিল্লম্মি। মদুদগী ঙাকথোক্নবা ঐখোয়না প্রধান মন্ত্রী উজ্জ্বলা য়োজনাগী খুত্থাংদা লেম্না গ্যাস কনেক্সন য়ৌহনবগী থবক হৌরে। লেম্না গ্যাস কনেক্সন ফংহনবনা মরম ওইরগা ঙসিদি চাওরাক্না ইমুং কোতি অহুম মখায়বু মৈখুদগী লাপথোকহনবগী থবক পায়খৎলে । লাক্কদৌরিবা নুমীৎশিং অসিদশু চাওখৎ মায়কৈদা চংশিল্লিবা অসি খুমাং চাওশিলহন্দুনা ঙসি হৌদোক্লিবা স্কিম অসিবু অথুবা মতমদা মাংলোমদা পুখৎতুনা ঐখোয়গী লৈবাক অসি মশা মউ ফবা লৈবাক ওইহনগদবনি। করিগুম্বা ঐখোয়গী অঙাংশিং অসি মশা মউ ফরগদি তুংদশু ঐখোয়গী লৈবাক অসি মশা মউ ফবা লৈবাক অমা ওইগনি।
পুক্নিংদা চপ য়ুংনা লেপ্পগা লোয়ননা ময়াম পুম্নমকশু অসিগুম্লবা মীয়ামগী ইহৌ অসিদা শরুক য়াবিয়ু। মসি মীওইবা জাতিগী থবক্নি, মসি লাক্কদৌরিবা জেনরেসন অদুগী থবক্নি, মসি ভারতকী ফ্যুচরগী থবক্নি, ময়াম পুম্নমক ঐখোয়গা পুন্না চৎমিন্নরশি।

খোঞ্জেল হৌনা ঐহাক্কা লাওমিন্নরসি-

ভারত ইমানা – য়াইফরে

ভারত ইমানা – য়াইফরে

ভারত ইমানা – য়াইফরে

হন্না হন্না থাগৎচরি।