ভারতকী প্রধানমন্ত্রী

মফম অসিদা তিনবীরিবা শক্নাইরবশিং, ইবুংঙো অমসুং ইবেম্মশিং,

অহানবদা ঐনা দাইমন্দ জুব্লী থৌরম অসিদা দাইনিক জগ্রান পারিবশিং, পাউচে অসি ফোংবা অমসুং য়েন্থোকপগী থবক তৌরিবশিং, মরুওইনা হোকরশিংদা ঐগী য়াইফ-পাউজেল পীজরি।

হৌখিবা চহি ৭৫ অসি নখোয়না লৈবাক অসিগী মীওই ক্রোর কয়াদা লেপ্পা লৈতনা ই-পাউ পীদুনা লাক্লি। লৈবাক অসি নৌনা শেমগৎপদা দাইনিক জগ্রান্না মরুওইবা থৌদাং অমা লৌরি। লৈবাক অসিগী মীয়াম ভাব তাহনবদা নখোয়না মরুওইবা দাইত্ব লৌরি। ভারত থাদোকউ খোঙজং মনুংদা নখোয়না পাংথোকখিবা থবকশিং অদুনা ঙসি অনৌবা ভারত অমা শেমগৎনবা অনৌবা থাজবশিং, অনৌবা ৱারেপশিং অমসুং অনৌবা মগুনশিং শেমগৎপা মতেং পাংলি। ঐ দাইনিক জগ্রান পাবা মীওইশিংগী মনুংদা অমনি। ঐনা খঙবা মতুংইন্না, হৌখিবা চহি ১০ অসিদা দাইনিক জগ্রান্না লৈবাক অসিদা অমসুং খুন্নাইগী অহোংবা পুরক্নবা কেম্পেন কনখৎলে।

হৌখিবা চহি মরি অসিদা নখোয়গী পাউচে অমসুং লৈবাক অসিগী অতোপ্পা মেদিয়া হাওসশিংনা লৈবাক শেমগৎনবগী অকনবা য়ুম্বীশিং ওইনা মখোয়গী থৌদাং ফজনা পাংথোক্লি। বেতি বচাও বেতি পারাও নৎত্রগা শ্বাছ ভারত মিসন অমসুং মীয়াম ভাব তাহনবদা মেদিয়ানা য়াম্না মরুওইবা থৌদাং অমা লৌরি। মসিগী থবক অসিদা দাইনিক জগ্রানসু শিংথাবা য়াবা মতেং পাংলি। হন্দক ঐনা ভিদিও কনফরেন্সিংগী খুৎথাংদা নখোয় ময়ামগা উনবগী খুদোংচাবা অমা ফংখ্রে। মতম অদুনা নখোয়না কমদৌনা কৎথোকপগা লোয়ননা লু-নানবগী মতাংদা থবক তৌবগে হায়বা ঐঙোন্দা খঙহনখি।

মরূপশিং,

তুংদা মেদিয়াগী থৌদাং অসি হেন্না মরুওইরক্লি। ঙসিদি দিজিতেলগী অওনবা অসি মেদিয়া অমসুং পাউচেশিংদু য়ৌরে অমসুং ঐনা থাজৈ মদুদি অনৌবা মেদিয়া অসিনা অনৌবা ভারত অমা শেমগৎনবা য়ুমফম মপাঙ্গল কনখৎহনগনি।

মরূপশিং,

করিগুম্বা ঐখোয়না অনৌবা ভারতকী ৱারী শানরকপা মতমদা, মদুগী তুংদা লৈরিবা লাইৱা অদুদি-অপীকপা সরকার অচৌবা লৈঙাক অমসুং সবকা সাথ সবকা বিকাসনি। মীয়াম শরুক য়াদুনা থবক তৌগদবা সিস্তেম অমা শেমগৎনবা ঐখোয়না খন্নরি। হৌখিবা চহি মরি অসিদা ঐখোয়না মসিগী ৱাখল্লোন অসি মাংলোমদা পুখৎতুনা লাক্লি। মীয়াম্না মশাগী থৌদাং অমা ওইনা থবক তৌবদগী কেন্দ্র সরকারগী স্কিমশিং খুমাং চাওশিন্না পায়খৎলি।

মসিগী লৈঙাক, মসিগী ইশাগীনি খনবা অমসুং মতেং পীনবা অসিনা লৈবাক অসি মপাঙ্গল কনখৎহল্লে।

হৌজিক লৈবাক অসিগী নহারোলশিং অসি চাউখৎপগী মরুওইবা শরুক অমা ওইরে। সরকারগী স্কিমশিং অসি হৌজিক মখোয় মশাগীনি হায়না উবা হৌরে। মখোয়গী ৱা তারে হায়না নহারোলশিংনা খল্লে অমসুং মসিনা মরম ওইদুনা সরকারদা থাজবা থম্লে অমসুং সিস্তেম অসি মমাংদা অমুক্ত ওইখিদ্রিবা মওংদা থাক হেনগৎলে। সরকারনা থমখিবা পান্দমশিং অদু ফংলকপা অমসুং অরোনবা লৈতনা থবক তৌরকপদগী মীয়াম্না থাজবা হেনগৎলক্লে।

মরূপশিং,

জগ্রান ফোরমদা নখোয়না ৱাফম কয়া খন্নগনি। নখোয়গী ফোরম অসিদা ঐনা ৱাহং অমা হংলি। মসিগী ৱাহং অসি ইশানা হংজবা ওইরবসু, ৱাহং অদু লৈবাক অসিগা মরি লৈনবনি। করিগীদমক ঐখোয়গী লৈবাক অসি চাউখৎত্রিবনো হায়বা নখোয়না ঙক্লমগনি। নিংতম্বা চহি কয়া সুরবসু করিগীদমক ঐখোয়গী লৈবাক অসি শোৎথরিবনো হায়বা নখোয় নশানা হংজরমগনি। ঐখোয়গী লৈহাও লৈরবা লম, হৈশিংলবা অমসুং থবক কল্লবা নহারোলশিং লৈরে অমসুং মহৌশাগী লন ৱাৎপা লৈত্রে। পুম্নমক অসি লৈরবসু করিগী ঐখোয়গী লৈবাক অসি শোৎথরিবনো? মীশিং য়ামদবা অমসুং লন-থুম য়াম্না লৈজদবা অপীকপা লৈবাকশিংনা অতেনবা মতমগী মনুংদা ঐখোয়দগী কমদৌনা মাংজিল থাখ্রিবনো হায়বসি ৱাহং অমনি।

ঐখোয়গী লৈবাক্কী মীয়ামগী শক্তিনা মরম ওইদুনা থাদা চন্দ্রয়ান থাবা ঙমগনি। ঐখোয়না অহোংবা মমলদা মার্স মিসন পাংথোকপা ঙমগনি। অদুবু করিগীদমক মীওই ক্রোর কয়া লৈরিবা খুঙ্গংশিংগী লম্বী লৈত্রিবনো?

মরূপশিং,

ভারতমচাশিংনা পুথোকপা অনৌবা পোৎশিংনা মালেম অসি পুমলং লংলবসু করিগীদমক ভারতমচা ক্রোর কয়া মৈ ফংদ্রিবনো? করিগীদমক ঐখোয়না লৈবাক অসিনা চহি ৬০ হেন্না শেমগৎ-শাগৎপা ঙাইগদৌরিবনো? অচৌবা মীওই কয়া শক্তি পায়খ্রে অমসুং চৎখি অমসুং লৈবাক অসিগী খ্বাইদগী পীকপা খুদোংচাদবা অমা ফাওবা লোইশিল্লমদে।

মরূপশিং,

ৱাৎলিবসি পান্দম নত্তে তৌগে নিংবা অদুনি, শেন নত্তে হৈনিংবা অদুনি, পাম্বৈ নত্তে মীনুংশিং খঙবা অদুনি অমসুং পাঙ্গল নত্তে থবক শুনিংবা অদুনি। মীওই খরনা কবিরদাস জিগী মমিং লৈরবা ৱাহৈ অদু শিদোক্লি অমসুং করেম্নরি –‘কল করে সো আজ কর, আজ কারে সো অব’। চহি কয়াগী মমাংদগী মসিগা চপ মান্না থবক তৌবগী চৎনবগী অসি লৈরবদি ঐখোয়গী লৈবাক্কী শক্তম অসি করি ওইগনি হায়বা খন্দুনা য়েংউ।

মরূপশিং,

হন্দক ঈশিং মনুংদা কেবল পুদুনা ইলিফেন্তাদা মৈ থানবগী ভিদিও অমা ভাইরেল চৎখি। ভিদিও অদু ঐসু য়েংখি। ইলিফেন্তাগী মীয়াম্না মুম্বাইগী মৈঙাল অদু য়েংদুনা লৈরগা চহি ৭০ অমম্বা মরক্তা লৈরকপগী অৱাবা অদু নিংশিংদুনা য়েংউ। নুমিৎ খরনিগী মমাংদা মীওই অমনা ঐঙোন্দা চিথি অমা থারক্তুনা অহানবা ওইনা মেঘলায়াদা ত্রেন য়ৌবগী থাগৎপা ফোঙদোরকখি। ঐখোয়না সরকার পায়দ্রিঙৈদা মেঘলায়া, মিজোরম অমসুং ত্রিপুরা রেল মেপ্তা য়াওদে হায়বা নখোয় থাজবা ঙম্বরা।

মমাংঙৈদা লৈরম্বা চাউখৎপগী খোঙজেল অমসুং হৌজিক লৈরিবা চাউখৎপগী খোঙজেল অনিগী মতাংদা মেদিয়াগী ঐগী মরূপশিংনা থিজিন্নবগী হীরম অমা ওইবা য়াগনি। নিংতম্বা চহি ৬৭গী মতুংদা করিগী খুঙ্গংদা চাদা ৩৮ খক তোইলেত শারিবনো অমসুং কমদৌনা চহি মরিগী খুঙ্গংদা চাদা ৯৮ তোইলেত শারিবনো? নিংতম্বা চহি ৬৭গী মতুংদা করিগী খুঙ্গং চাদা ৫৫ লম্বী লৈরিবনো অমসুং কমদৌনা চহি মরিগী মনুংদা খুঙ্গং চাদা ৯০ লম্বী লৈরিবনো? নিংতম্বা চহি ৬৭গী মতুংদা করিগী খুঙ্গং য়ুম চাদা ৭০ মৈ ফংলিবনো অমসুং কমদৌনা চহি মরিগী মনুংদা খুঙ্গংগী য়ুম চাদা ৯৫ মৈ ফংলিবনো? করিগুম্বা ঐখোয়না মসিগী মান্নবা ৱাহংশিং হংলবদি পুং কয়া চংগনি।

মরূপশিং,

করিগীদমক নিংতম্বা চহি ৬৭গী মতুংদা লৈবাক অসিগী ইমুংশিংগী চাদা ৫০ খক বেঙ্ক একাউন্তশিং লৈরিবনো? করিগীদমক নিংতম্বা চহি ৬৭গী মতুংদা মীওই ক্রোর ৪ খক ইনকমক তেক্স থিরিবনো? লৈবাক অসিদা মীওই ক্রোর ১২৫ লৈরি। অদুবু চহি ৩গী মনুংদা অনৌবা নাগরিক ক্রোর ৫ ইনকম তেক্স থিরে। ললোন-ইতিক তৌবা মীওই লাখ ৬৬ জি এস তিদা মীং চল্লে। জি এস তি চৎনরবা মতুংদা অনৌবা মীওই লাখ ৫৪ মিং চল্লে।

মরূপশিং,

করিগীদমক মমাংগী সরকারশিংনা পাংথোকপা ঙমদবা থবকশিং হৌজিক পাংথোকপা ঙম্লিবনো? মীয়াম, ফম্নাইবশিং, ইন্সতিতুৎশিং চপ মান্নৈ, ফাইলশিং চপ মান্নবা তেবল,চৌক্রি অমসুং কলম্না চৎলি। কমদৌনা অহোংবা অসি লাক্লিবনো? মনুং য়াওনা হোংনবা অমসুং থবক ওইনা পাংথোক্নবা ৱারেপ লৌদ্রবদি অহোংবা অমত্তা পাংথোকপা ঙম্লোই।

মরূপশিং,

লায়রবশিং মখোয়গী ফংফম থোকপা তোইলেত, মৈ, বেঙ্ক একাউন্তশিং, ইজুকেসন, হকশেলগী কান্নবশিং ফংলে। মখোয়না লায়রবা কোকপা মতমদা লৈবাক অসি লায়রবা কোক্কনি। হৌখিবা চহি মরি অসিদা নখোয়না অহোংবা কয়া উরে। লায়রবদি মুথৎতনা কমদৌনা মখোয়না ‘গরিবি হাতাও’ হায়বা খোল্লাউ লাওরিবনো?

মরূপশিং,

হৌজিক লৈবাক অসিগী মীপুম খুদিংমক্তা তঙাইফনা চংদবা য়াদ্রবা মচাকশিং ফংহল্লে। ভারতমচা ক্রোর কয়াগী নিংবা থুংহন্নবা ঐখোয়না থবক পায়খৎলে। ঙসি ঐখোয়না অনৌবা ভারত অমগী ‘সঙ্কাপ্ল সে সিধি’গী খোঙচৎ অমদা চংশিল্লি। মসিগী খোঙচৎ অসিদা ভারতনা তেক্নোলোজি শীজিন্নবগী মওং অসি চাওখৎলক্লিবা অমসুং চাউখৎত্রিবা লৈবাকশিংনা মতৌ তম্লি।

মরূপশিং,

তেক্নোলোজি শীজিন্নদুনা মীওই কয়া হিংবা নুংঙাইহন্নবা হৌজিক থবক পায়খৎলি। তেক্নোলোজিগী শক্তিনা হিংবদা লাইথোকহল্লে। ঐখোয়গী সিস্তেমশিংনা অনৌবা মালেম অসিদা চুশিন্নবা ঙমলে। সোলার পৱার অমসুং বাইওফুয়েলদা য়ুমফম ওইবা অনৌবা সিস্তেমশিং শেমগৎলে।

হায়ৱেজশিং, রেলৱেজশিং, এয়রৱেজশিং অমসুং ৱাতরৱেজগী ইনফ্রাস্ত্রকচরশিং শেমগৎলে। দ্রাইভর য়াওদবা ত্রেন ‘ত্রেন ১৮’ অমসুং মসিগী চাংয়েংগী পাউ নখোয়গী পাউচেদা য়াওরে। হৌজিক লৈরিবা মথক্ত চৎপগী ফিবম অসিদা মীওই কয়া ত্রেনশিংগী এ সি কোচশিংদাচৎপগী মহুৎতা মথক্ত ওইনা চৎনরে। উরান স্কিমগী মখাদা অপীকপা সহর কয়া অনৌবা এয়রপোর্তশিং শেমগৎতুনা শম্নরে। মমাংদা এল পি জি সিলিন্দর অমা হানবদা নুমিৎ কয়ানি চংলম্বা অদু হৌজিক নুমি ১-২দা য়ারে। মৈ পুশিনবা য়াম্না লাইরে। ইনকম তেক্স রিতর্নগী রিফন্দ তৌবা থা কয়া চংলম্বা অদু হৌজিক নুমি খরনিদা য়ারে। মমাংদা পাসপোর্ত লৌবদা থা কয়া চংলম্বা অদু হৌজিক চয়োল ১-২দা য়ারে। সরকারগী থবক অয়াম্বা হৌজিক ওনলাইন অমসুং মোবাইলদা য়ারে। মীচম মীয়াম্না থবক খরগী পরেং শাংনা লেপ্পা অদু লৈত্রে অমসুং শেঞ্জা-থুমজাদগী কনবা ঙম্লে ।

মরূপশিং,

য়ুম শানবা প্রধান মন্ত্রী অৱাস য়োজনা, গ্যাস পীনবা উজৱালা য়োজনা, মৈ থান্নবা সৌভাগ্যা য়োজনা অমসুং তোইলেত শানবা স্কিমশিংনা মীয়ামদা কান্নবশিং ফংহল্লি। লৈবাক অসিগী লায়রবা মীওই ক্রোর ৫০ হেনবদা প্রধান মন্ত্রী অরোগয়া য়োজনানা অনা-লায়েংগী খুদোংচাবা ফংহল্লি।

দিজিতেল তক্নোলোজি,ওতোমেসন অমসুং মীওইবগী হৈশিংবনা কমদৌনা মীওইবগী য়াইফনবা থবক পায়খৎপগে হায়বদু অয়ুসমান ভারতনা উৎলি। স্কিম অসিগী বেনিফিসরশিং অসি তেক্নোলোজি শীজিন্নদুনা মশক খঙদোক্লবা মতুংদা গোল্ডন কার্দশিং পীগনি। গোল্ডন কার্দ অমসুং অয়ুসমান মিত্র অসি তেক্নোলোজি অমসুং মীওইবগী হৈশিংবা পুনশিনবনি অমসুং লায়রবশিংদা হকশেলগী কান্নবশিং পীরি।

মরুশিং,

স্কিম অসি হৌদোকপা থা অহুমগী মনুংদা মীওই লাখ ৪.৫ হোস্পিতালশিংদা লায়েংবগী খুদোংচাবা ফংখ্রে। অয়ুসমান ভারতকী মখাদা মীরোনবী নুপীদগী হৌরগা শাথিরবা লায়না কেন্সর ফাওবা লায়েংলি। লায়েংনবা শেন কদাইদগী লৌগনি নৎত্রগা ইমুংগী নোংমগী চারা অনি চানবা কমদৌগনি হায়বা ৱাহং অসিনা মরম ওইদুনা খু্ঙ্গং অমসুং সহরশিংদা লায়েংদনা লৈবা মীওই কয়া লৈরি। হিদাক লৈনবা শেন তিংগদরা নৎত্রগা অঙাংগী লাইরিক তাম্নবা হোৎনগদরা? লায়রবশিংনা হংলিবা ৱাহংশিং অসিগী পাউখুম অয়ুসমান ভারতনা পীরে।

মরূপশিং,

তেক্নোলোজিগী মতেংনা মিদলমেন লৈহন্দনা ঐখোয়না হোৎনরি অমসুং পোৎ পুথোক্লিবশিংগা পোৎ শীজিন্নরিবশিংগা নকশিন্ননবা হোৎনরি। থাক খুদিংমক্তা শেঞ্জা-থুমজা লৈহন্দনবা ঐখোয়গী আইনশিং অমসুং থৌশিলশিং কনখৎহল্লে। লমদা অসিদা ভারতনা পায়খৎলিবা থবকশিং মালেম্না উরে।

মরূপশিং,

আর্জেন্তিনাদা পাংথোকখিবা জি-২০ মীফমদা মালেমগী শক্তি লৈরবা ইকনোমিশিংগী মমাংদা ঐখোয়গী ৱাখল্লোন থমখ্রে। শেন-থুমগী অরানবা থবকশিং তৌরম্লগা মীচেন ওইখিবশিং মালেমগী লৈবাক অমত্তনা চংজফম পীরোইদবনি হায়না মালেমগী মীয়ামদা ভারতনা খঙহনখ্রে। ঐখোয়গী থবক অসিগী মহৈ নোংমদি ফংগনি হায়না ঐ থাজৈ।

মরূপশিং,

থাজবা অসিগী মরমদি ঙসিদি মালেম অসিনা ভারতকী ৱা তারে অমসুং ভারত খঙনবা হোৎনরি। ঙসিদি ঐখোয়গা মালেমগী লৈবাকশিংগা লৈনরিবা মরি অসি ফিবম য়াম্না ফগৎলে। পুম্নমক অসি ঐখোয়গী লৈবাক অসিনা মশা-মরোমদোম থাজবা লৈবদগীনি।

মরূপশিং,

অকনবা সরকার অমা লৈবদগী ঙসি অচৌবা অমসুং মরুওইবা ৱারেপ কয়া লৌবা ঙম্লে। মপুংফাবা মেজোরিতি ফংদুনা সরকার অসি শেম্বনি। সরকার অসিনা অনৌবা ভারত অমগী থবক পায়খৎলি। হীরম মঙা- অঙাংশিংগী লাইরিক তম্বা, নহারোলশিংগী শেন্থোক লম্বী, অহলশিংগী হিদাক-লাংথক, লৌমীশিংগী ইথৈ অমসুং মীয়ামগী খুদোংচাদবশিংদা সরকার অসিনা অকনবা মীৎয়েং থম্লি।

অনৌবা ভারতকী অনৌবা মঙলানশিং মঙফাওন্নবা হোৎনবদা দাইনিক জগ্রান অমসুং লৈবাক অসিগী মেদিয়ানা অচৌবা থৌদাং লৌরি। ঐনা মতম চুপ্পদা নখোয়গী পাউতাকশিং অমসুং ক্রিতিসিজমশিং তরাম্না ওক্লি। দাইনিক জগ্রান গ্রুপনা মসিগী মনিংতম্বা অমসুং মীচং মীখাই নাইদনা থবক তৌবা অদুনা লৈবাক শেমগৎপদা মতেং পাংলি। ঐগী ৱারোল মতাং অসিদা লোইশিঞ্জরে। চহি ৭৫ মপুং ফারকপগী অমুক হন্না নখোয় ময়াম থাগৎচরি অমসুং তুংগী য়াইফনবা ঐগী য়াইফ-পাউজেল পীজরি। থাগৎচরি।