ভারতকী প্রধানমন্ত্রী

কেন্দ্রগী মন্ত্রী মন্দলগী ঐহাক্কী মরূপ অশ্বিনী বৈষ্ণবজী, দিল্লীগী মুখ্য মন্ত্রী রেখা গুপ্তজী, ওরিশাগী মুখ্য মন্ত্রী মোহন চরণ মাঝীজী, কেন্দ্রগী রাজ্য মন্ত্রী জিতিন প্রসাদজী, সেমিগী প্রসিদেন্ত অজিৎ মনোচাজী, লৈবাক অমসুং মপান্দগী লাকপা সেমিকন্দক্তর ইন্দস্ত্রীগী সি.ই.ও.শিং, অমসুং মখোয়গী মরী লৈনবশিং, তোঙান তোঙানবা লৈবাকশিংদগী মফম অসিদা শরুক য়াখিবা ঐখোয়গী মীথুংলেনশিং, স্তার্ত-অপকা মরী লৈনবা ইন্ত্রপ্রিনরশিং, তোঙান তোঙানবা রাজ্যশিংদগী লাকপা ঐহাক্কী নহা ওইরিবা মরূপ মহৈরোইশিং, ইবেম্মা অমসুং ইবুংঙোশিং।

ঙরাং নুমিদাং ঐহাক জাপান অমসুং চাইনাদা চৎতুনা হল্লকখি। ঙসি ঐহাক য়শোভুমীদা এস্পিরেসন অমসুং কনফিদেন্সনা থল্লিবা মফম অসিদা, অদোমগী মরক্তা লৈজরি। অদোম পুম্নমক্না খঙনরবনি, তেক্নোলোজীগী লমদা ঐহাক্কী পুক্নিং থৌগৎপীবা অসি মহৌশাগীনি। হৌজিক ঐহাক্না জাপান খোংচৎ মনুংদা, মফম অদুগী প্রধান মন্ত্রী শিগেরু ইশিবা সানগা লোয়ননা, তোকিও ইলেক্ত্রোন ফেক্তরীদা চৎপগী খুদোংচাবা ফংখি। অমসুং মহাক্কী সি.ই.ও.সু মোদী সাহেব লাকখিবগী মতাংদা ঐখোয়গা হৌজিক ৱারী শানরি।

মরুপশিং,

তেক্নোলোজীগী লমদা ঐহাক্কী পুক্নিং চিংশিল্লকপনা ঐহাকপু হন্না হন্না অদোমগী মরক্তা পুরকই। অদুম ওইনমক ঙসিসু অদোমগী মরক্তা লাকপদা ঐহাক য়াম্না নুংঙাইবা ফাওই।

মরুপশিং,

মালেম শিনবা থুংনা সেমিকন্দক্তরগা মরী লৈনবা এক্সপর্তশিং লৈরি, লৈবাক ৪০-৫০ হেন্না মফম অসিদা রিপ্রজেন্তেসন লৈরি, অমসুং ভারতকী ইনোবেসন অমসুং য়ুথ পাৱরসু মফম অসিদা উবা ফংলি। অমসুং মসিগী অপুনবা অসিনা মান্নবা পাউজেল অমা পীরি- মালেম অসিনা ভারতপু থাজৈ, মালেম অসিনা ভারতপু থাজৈ, অমসুং মালেম অসিনা ভারতকা লোয়ননা সেমিকন্দক্তরগী তুংলমচৎ অমা শেম্নবা শেম-শারি।

সেমিকোন ইন্দিয়াদা লাকখিবা ময়াম পুম্নমকপু ঐনা থাগৎচরি। অদোম পুম্নমক অসি চাউখৎলবা ভারতকী খোঙচৎতা, আত্মনির্ভর ভারতকী খোঙচৎতা, ঐখোয়গী য়াম্না মরু ওইবা পার্তনরশিংনি।

মরুপশিং,

নুমিৎ খরনিগী মমাংদা, চহি অসিগী অহানবা ক্বার্তরগী জি.দি.পি. ভারতনা হেক হেক আশা তৌবদগী হেন্না ফনা পাংথোকখ্রে। মালেম পুম্বগী ইকোনোমীদা অৱাবা কয়া লৈরিঙৈ, শেন্মিৎলোনগী স্বার্থনা মরম ওইদুনা অৱাবা কয়া মায়োক্নরিঙৈ মতম অসিদা ভারতনা চাদা ৭.৮গী গ্রোথ ফংখ্রে। অমসুং মসিগী গ্রোথ অসি সেক্তর খুদিংমক্তা, মেন্যুফেকচরিং, সর্ভিসেস, এগ্রিকলচর, কন্সত্রক্সন, মফম খুদিংমক্তা উবা ফংলি। ঙসি ভারত অসি য়াম্না থুনা চাউখৎলক্লি। মসিনা ঐখোয় পুম্নমক্তা, ইন্দস্ত্রীদা, লৈবাক অসিগী মীওই খুদিংদা অনৌবা ইনর্জী পীরি। ভারতপু খ্বাইদগী চাউবা অহুমশুবা ইকোনোমী ওইহন্নবগী মায়কৈদা খোঙজেল য়াংনা খুমাং চাউশিল্লক্লিবা অসি অচুম্বা খোঙথাং অমনি।

মরুপশিং,

সেমিকন্দক্তরগী মালেমদা ৱাফম অমা হায়নৈ, ওইল অসি ব্লেক গোল্দনি, অদুবু চিপশিং অসি দিজিতেল দাইমন্দশিংনি। ঐখোয়গী মমাংঙৈগী চহীচা অসি ওইলনা শেপ তৌখি। মালেমগী লাইবক অসি থাউগী গুহাশিংনা লেপ্পি। গ্লোবেল ইকোনোমী অসি থাউগী গুহাশিং অসিদগী পেট্রোলিয়ম কয়াম য়াম্না পুথোক্কনি হায়বগী মতুং ইন্না মথং-মনাও নাইনা লাকই। অদুবু ২১শুবা চহীচাগী শক্তি অসি অপীকপা চিপ অমদা লৈহৌরে। হায়রিবা চিপশিং অসি পীক্লবসু মালেমগী চাউখৎ থৌরাংবু খুমাং চাউশিলহনবা ঙম্বগী পাঙ্গল লৈ। অমসুং মসিনা মরম ওইদুনা ঙসি সেমিকন্দক্তরশিংগী মালেমগী কৈথেল অসি দোল্লর বিল্লিয়ন ৬০০ য়ৌরে। অমসুং লাক্কদৌরিবা চহি খরদা মসি দোল্লর ত্রিলিয়ন অমা হেনগৎলক্কনি। অমসুং ঐহাক্না থাজৈ মদুদি ভারতনা সেমিকন্দক্তর সেক্তরদা য়াম্না থুনা খুমাং চাউশিল্লি। মসিগী ত্রিলিয়ন অমগী মার্কেত শেয়র অসিদা ভারতকী মরুওইবা শরুক অমা লৈগনি।

মরুপশিং,

ভারতকী স্পীদ করিনো, মসিসু ঐহাক্না অদোমগী মমাংদা থমজনীংই। ২০২১দা ঐখোয়না সেমিকোন ইন্দিয়া প্রোগ্রাম হৌদোক্লে। ২০২৩ ফাওবদা ভারতকী অহানবা সেমিকন্দক্তর প্লান্ত এপ্রুব তৌখ্রে। চহি ২০২৪দা ঐখোয়না অতোপ্পা প্লান্ত খরসু অয়াবা পীখি, চহি ২০২৫দা ঐখোয়না অতোপ্পা প্রোজেক্ত মঙা ক্লিয়র তৌখি, সেমিকন্দক্তরগী প্রোজেক্ত ১০দা পুন্না দোল্লর বিল্লিয়ন ১৮, হায়বদি লুপা লাখ ১.৫ হেন্না ইনভেস্ত তৌখি। মসিনা ভারতকী মায়কৈদা মালেমগী মীয়াম্না থাজবা হেনগৎলক্লিবা অদু উৎলি।

মরুপশিং,

অদোম্না খঙলে, সেমিকন্দক্তরশিংদা স্পীদ মেত্তর তৌই। ফাইলদগী ফেক্টরীগী মতম অদু য়াম্নমক হন্থরগনি, পেপরৱার্ক অদু য়াম্নমক হন্থরগনি, অমসুং ৱেফর ৱার্ক অদু থুনা হৌরগনি। ঐখোয়গী সরকারনা অসিগুম্বা ৱাখল্লোনগা লোয়ননা থবক তৌরি। ঐখোয়না নেস্নেল সিঙ্গল ৱিন্দো সিস্তেম চৎনহনখ্রে। মসিনা কেন্দ্র অমসুং রাজ্যশিংগী এপ্রুবেল পুম্নমক অমত্তা ওইবা প্লেৎফোর্মদা ফংহল্লি। মসিনা ঐখোয়গী ইনভেস্তরশিংবু পেপরৱার্ক ময়ামদগী কনবা ঙমহনখি। ঙসিদি লৈবাক শীনবা থুংনা প্লগ এন্দ প্লে ইনফ্রাস্ত্রকচর মোদেলদা সেমিকন্দক্তর পার্কশিং শেমগৎলি। পার্কশিং অসিদা লম, পাৱর সপ্লাই, পোর্তশিং, এয়রপোর্তশিং, পুম্নমক্কী কনেক্তিবিতীগা লোইননা স্কিল্দ ৱর্কর পুল ফাওবগী খুদোংচাবা লৈ। অমসুং মসিগা লোয়ননা ইন্সেন্তিবশিংসু মরী লৈনরকপা মতমদা, ইন্দস্ত্রী অসি চাউখৎপা ঙমগনি। পি.এল.আই. ইন্সেন্তিব ওইগেরা, দিজাইন লিঙ্ক গ্রান্ত ওইগেরা, ভারতনা এন্দ তু এন্দ কেপেবিলিতীশিং পীরি। মরম অদুনা ইনভেস্তমেন্তসু লেপ্তনা লাক্লি। ভারত অসি হৌজিক বেকএন্দদগী ফোল স্তেক সেমিকন্দক্তর নেসন অমা ওইবগী মায়কৈদা চংশিল্লি। ভারতকী খ্বাইদগী পীকপা চিপ অসিনা মালেমগী খ্বাইদগী চাউবা অহোংবা পুরকপা নুমিৎ অদু অরাপ্পা নত্তে। ঐখোয়গী খোঙচৎ অসি অথেঙবা মতমদা হৌখি অদুবু হৌজিক্তি করিগুম্বা অমত্তনা ঐখোয় থিংবা ঙম্লোই। সি জি পাৱরগী পাইলোৎ প্লান্ত অসি নুমিৎ ৪-৫গী মমাংদা, হায়বদি ওগস্ত ২৮তগী হৌখ্রে হায়না ঐহাক্না খঙজখি। কেন্সকী পাইলোৎ প্লান্তসু হৌগদৌরি। তেস্ত চিপশিং অসি মাইক্রোন অমসুং টাটাগী মমাংদা থাদোকখ্রে। ঐহাক্না মমাংদা হায়খিবগুম্না, কমর্সিএল চিপশিং চহি অসিদগী পুথোকপা হৌরগনি। মসিনা সেমিকন্দক্তর সেক্তরদা ভারতনা কয়া য়াম্না খোঙজেল য়াংনা খুমাং চাউশিল্লিবগে হায়বদু উৎলি ।

মরুপশিং,

ভারত্তা সেমিকন্দক্তরশিংগী মায় পাকপগী ৱারী অসি ভর্টিকল অমত্তদা, তেক্নোলোজী অমত্তদা অকক্নবা ওইদে। ঐখোয়না মপুং ফাবা ইকোসিস্তেম অমা শেমগৎলি। মসিদা দিজাইনিং, মেনুফেকচরিং, পেকেজিং অমসুং হাই-তেক দিভাইস পুম্নমক ভারত্তা ফংই। ঐখোয়গী সেমিকন্দক্তর মিসন অসি ফেব অমা নৎত্রগা চিপ অমা শেমগৎপদা অকক্নবা ওইদে। ঐখোয়না সেমিকন্দক্তর ইকোসিস্তেম অমা শেমগৎলি, মসিনা ভারতপু আত্মানির্ভর অমসুং গ্লোবেল্লি কম্পিতিতিব ওইহল্লগনি।

মরুপশিং,

ভারতকী সেমিকন্দক্তর মিসনগী অতোপ্পা অখন্নবা মশক অমা লৈরি। ভারতনা মালেমগী খ্বাইদগী এদভান্স তেক্নোলোজীশিংগা লোয়ননা লম অসিদা মাংলোমদা চংশিল্লি। অনৌবা তেক্নোলোজীশিং, ভারত্তা শাবা চিপশিংদগী অনৌবা পাৱর ফংহনবা অসি ঐখোয়গী মীৎয়েংনি। নোইদা অমসুং বেঙ্গলোরদা শেমগৎলিবা ঐখোয়গী দিজাইন সেন্তরশিংনা মালেমগী খ্বাইদগী এদভান্স ওইরবা চিপশিং শেমগৎনবা থবক পায়খৎলি। অসিগুম্বা চিপশিং অসিদা ত্রান্সিস্তর বিলিয়ন কয়া অমা স্তোর তৌরি। চিপশিং অসিনা ২১শুবা চহিচাগী ইম্মর্সিভ তেক্নোলোজীশিংদা অনৌবা পাৱর ফংহল্লগনি।

মরুপশিং,

ঙসি মালেমগী সেমিকন্দক্তর সেক্তরগী মায়োক্তা লৈরিবা শিংনবশিং অদুদা ভারতনা লেপ্পা লৈতনা থবক তৌরি। ঙসিদি ঐখোয়না শহরশিংদা অৱাংবা থাক্কী বিলদিংশিং, অঙকপা ফিজিকেল ইনফ্রাস্ত্রকচরশিং উবা ফংলি। অসিগুম্বা ইনফ্রাস্ত্রকচর অসিগী য়ুম্ফমদি স্তীল ওইগনি। অমসুং ঐখোয়গী দিজিতেল ইনফ্রাস্ত্রকচরগী য়ুম্ফমদি ক্রিতিকেল মিনরেলশিংনি। মরম অসিনা ঙসি ভারতনা নেস্নেল ক্রিতিকেল মিনরেল মিসনদা থবক পায়খৎলি। ঐখোয়না রের মিনরেলশিংগী দিমান্দ অসি ময়ুমদা মপুং ফাহনবা হোৎনরি। হৌখিবা চহি মরি অসিদা, ঐখোয়না ক্রিতিকেল মিনরেলস প্রোজেক্তশিংদা কন্না থবক তৌখি।

মরুপশিং,

সেমিকন্দক্তর সেক্তর চাউখৎহনবদা ঐখোয়গী সরকারনা স্তার্ত অপশিং অমসুং এম.এস.এম.ই.শিংবুসু অচৌবা থৌদাং অমা লৌরি। ঙসিদি মালেমগী সেমিকন্দক্তর দিজাইন তেলেন্তকী ২০% ভারতনা কন্ত্রিব্যুত তৌরি। ভারত্তা লৈরিবা নহাশিং অসি সেমিকন্দক্তর ইন্দস্ত্রীগী খ্বাইদগী চাউবা হ্যুমেন কেপিতেল ফেক্তরীনি। ঐহাক্না ঐখোয়গী নহা ওইরিবা ইন্তর্প্রিনরশিং, ইন্নোবেতরশিং, স্তার্ত অপশিংবু অদোম্না মাংলোমদা চংশিনবীয়ু হায়না হায়গনি। সরকারনা অদোমগী নাকলদা লেপ্লি। দিজাইন লিঙ্ক ইন্সেন্তিব স্কিম অমসুং চিপস-তু-স্তার্ত অপ প্রোগ্রাম অসি অদোমগীদমক্তনি। সরকারনা দিজাইন লিঙ্ক ইন্সেন্তিব স্কিমবু অনৌবা মওংদা শেমগৎলি। ঐখোয়গী হোৎনবা অসি সেক্তর অসিদা ভারতকী ইন্তেলেকচুএল প্রোপর্তী (আই.পি.) নেস্নেল রিসর্চ ফন্দগা লোইননা তেয়র-অপ তৌদুনা হৌদোকখিবা রিসর্চ অসিনা অদোমবু মতেং পাংগনি।

মরুপশিং,

রাজ্য কয়ানা সেমিকন্দক্তর সেক্তরগীদমক্তা অখন্নবা পোলিসীশিং শেমখ্রে। রাজ্যশিং অসিনা অখন্নবা ইনফ্রাস্ত্রকচরদা অওনবা পুরক্লি। ঐহাক্না লৈবাক অসিগী রাজ্য পুম্নমক্তা হায়জরি মদুদি মখোয়না সেমিকন্দক্তর ইকোসিস্তেম শেমগৎনবা অতোপ্পা রাজ্যশিংগা হকচাং ফনা চাংদম্ননবা অমসুং মখোয়গী মফমদা ইনভেস্তমেন্তকী ফিভম ফগৎহন্নবা হোৎনবীয়ু।

মরুপশিং,

ভারত অসি রিফোর্ম, পর্ফোর্ম অমসুং ত্রান্সফোর্মগী মন্ত্রদা চৎতুনা মফম অসিদা য়ৌরে। লাক্কদৌরিবা মতম অসিদা ঐখোয়না নেক্স জেনরেসন রিফোর্মশিংগী অনৌবা রাউন্দ অমা হৌদোক্লগনি। ঐখোয়না ইন্দিয়া সেমিকন্দক্তর মিসনগী মথংগী ফেজকী থবকসু পায়খৎলি। ঐহাক্না মফম অসিদা লাক্লিবা ইনভেস্তর পুম্নমক্তা হায়জনীংবদি ঐখোয়না অদোমবু থম্মোয় শেংনা তরাম্না ওকচরি। অমসুং অদোমগী লোনদা হায়রগদি, দিজাইন রেদি, মাস্ক এলাইন তৌরে। হৌজিক মতম অসি অখন্নবা মওংদা থবক পাংথোক্নবা, অমসুং স্কেলদা পীথোক্নবা মতম ওইরে। ঐখোয়গী পোলিসীশিং অসি অতেনবা মতমগী সিগ্নেলশিং নত্তে, মসি অশাংবা মতমগী কম্মিতমেন্তশিংনি। ঐখোয়না অদোমগী মথৌ তাবা খুদিংমক পাংথোক্কনি। মালেম পুম্বনা হায়গদবা নুমিৎ অদু য়াম্না লাপ্না লৈররোই- ভারত্তা দিজাইন তৌবা, ভারত্তা শাবা অমসুং মালেম্না থাজবা। ঐখোয়গী হোৎনবা খুদিংমক মায় পাকপা ওইরসনু, বাইত খুদিংমক ইনোবেসনগা মরী লৈনবা ওইরসনু, অমসুং ঐখোয়গী খোঙচৎ অসি অশোয়বা লৈতবা অমসুং অৱাংবা থাক্কী পর্ফোমেন্সনা মপুং ফাবা ওইরসনু। অসিগুম্বা ৱাখল্লোন অসিগা লোয়ননা অদোম পুম্নমকপু য়াইফ-পাউজেল পীজরি!

থাগৎচরি!

*****