ভারতকী প্রধানমন্ত্রী

ফম্বাক থক্তা লেংশিনবীরিবা ঝারখন্দগী রাজ্যপাল শ্রীমতি দ্রোপদী মুর্মুজী, মুখ্য মন্ত্রী শ্রীমান রঘুবর দাসজী, কেন্দ্র মন্ত্রীমন্দলদা ঐহাক্কী মপাং ওইরিবা শ্রীমান আর.কে. সিংহজী, অশ্বিনীজী, সুদর্শন ভগৎজী, ঝারখন্দ সরকারদা মন্ত্রী ওইবীরিবা শ্রী অমর কুমারজী, রামচন্দ্রজী, পর্লিয়ামেন্তরিয়ান শ্রীমান প্রেম সিংহজী, লেজিস্লেচর ফুলচন্দজী অমদি মশিং য়াম্না লেংবীরক্লিবা ঐহাক্কী নুংশিজরবা ইচল–ইচে অমদি ইচিল–ইনাওশিং।

ঐহাক্না অহানবমক্তদা ভগবান বির্সা মুন্দাগী লমদম অসিবু খুরুমজরি। লমদম অসি কত্থোকপনা থল্লবা লমদম অমনি। লমদম অসি জয়পাল সিংহ শ্রী মুন্দানা লানথেংনখিবা লমদম অদুনি। অমদি মসি অতল বিহারী বাজপেয়ীগী মংলানগী লমদম অদুনি। মফম অসিগী খনীগী মপৈ কোয়লাশিং অসি লৈবাক অসিগী দিবেলপমেন্তকী ইঞ্জিনগী শক্তম লৌরদুনা ইনর্জী পীবগী থবক তৌরি।

ময়াম পুম্নমক মফম অসিদা পুং অনি অহুমদগী ফমলক্লি হায়বা ইফমদা খঙহনবিরে। মশিং য়াম্লবা মীয়াম লেংবীরক্তুনা ঐহাকপু তরাম্না ওকপীরি। ময়াম্না আর্শীবাদ পীনবীরি। অদোমগী মীনুংশি অসিগীদমক, অদোমগী আর্শীবাদ অসিগীদমক ঐহাক্না লমন তোনশিনজরে। ঝারখন্দগী দিবেলপমেন্তকীদমক ইঞ্জিন অনি মথৌ তায় হায়না ঐহাক্না মীখল মতমদা ঝারখন্দা লাকখিবা মতম অদুদা হায়খি। অমনা রাঞ্চীগী ওইবা অতোপ্পা অমদুনা দিল্লীগী ওইবা, অদোম্না চহি মরি অসিদা উবা ফংলে। সরকার অনি অসি অমত্তা ওইনা পুন্দুনা সবকা সাথ সবকা বিকাস হায়বা মন্ত্র অসি পুদুনা চৎমিন্নরি।

ইচল–ইচে অমদি ইচিল–ইনাওশিং, ২০১৪গী মীখলদা ঐহাক্না মফম অসিদা লাকখিবা মতম অদুদা ঝারখন্দনা ঐহাকপু নুংশিবীরিবা অসি শেন্দোয় য়াওনা হন্দোকচগনি, চাউখৎহনগনি হায়না ঐহাক্না হায়খি। ঙসিদি খোংথাং অমগী মতুংদা অমা থাংজিল্লক্লিবা অসিনা দিল্লীদা লৈরিবা সরকার অসিনা ঝারখন্দগী দিবেলপমেন্তকীদমক হোৎনরিবশিং অদু ময়েক শেংনা উবা ফংলে। অতোনবা জাতিবু ওইগেরা, লৈত–লাইরবু ওইগেরা। ঐহাক্কী ত্রাইবেল ইচল–ইচে অমদি ইচিল–ইনাওশিং, নুপীশিংগী ওইগেরা, নহাশিংগী ওইগেরা, মীপুম খুদিংমক্কী য়াইফনবগীদমক্তা স্কিম কয়াগা লোইননা ঐখোয় মাংলোমদা চংশিল্লি।

ঙসি চাউরাক্না লুপা কোতি লিশিং ২৭, রাজ্য সরকারগী বজেৎতগী য়াম্না হেন্না চাউবা শেফম ওইরিবা, লুপা কোতি লিশিং ২৭কী অচৌবা প্রোজেক্ত ৫ ঝারখন্দগী লৈপাক লৈহাওদা উরেপ উয়ুং তম্লে। সিন্দরীদা খুৎকী ফেক্তরী, পত্রাতুগী পাৱর প্রোজেক্ত, বাবা ভোলেনাথকী নগর, দেবঘরদা এয়ারপোর্ত অমসুং এম্স অমদি রাঞ্চীদা পাইপলাইন শিজিন্নদুনা গ্যাস য়ৌহন্নবা প্রোজেক্ত, অমুক্তদা পুন্না লুপা কোতি লিশিং ২৭কী থবক্কীদমক ঝারখন্দগী লৈপাক লৈহাওদা উরেপ উয়ুং তম্লে। চাউরাক্না লুপা কোতি লিশিং ৮০গী থবক ৫০ হেন্নসু পায়খৎলি। অতোপ্পা রাজ্যশিংগা য়েংনরুবদা ঝারখন্দ অসি কয়া য়াম্না মাংলোমদা চংশিল্লগনি হায়বা অদু খন্দুনা য়েংবীয়ু।

ঐহাক্না মতম পুম্নমক্তা হায়দুনা লাক্লি মদুদি ঝারখন্দগী মীয়ামশিং অসি হীরাগী মথক্তা ফম্লি। দাইমন্দগী মথক্তা ফম্লি। অমুবা হীরা ব্লেক দাইমন্দ, ঐখোয়গী কোয়লা অসি মুজরবসু মঙাল পীথোক্নবা মপাঙ্গল অদু মঙোন্দা য়াওজৈ। ইনর্জীনা থলহনবা ঙম্বগী মপাঙ্গল অদু মঙোন্দা য়াওজৈ। মদুগী ৱাখল্লোন অদুগী মখাদা লুপা কোতি লিশিং ১৮ হেন্না থাদগদবা পাৱর প্রোজেক্ত অমা ঙসি পত্রাতুদা উরেপ উয়ুং তম্লে। মফম অসিগী কোয়লা, মফম অসিগী পাৱর অসিনা ঝারখন্দগী ইকোনোমী হেঙ্গৎহনবতা নত্তনা ঝারখন্দগী নহাশিংদসু থবক ফংহল্লগনি। দিবেলপমেন্তকী অনৌবা থোং হাংদোকপগী থবক অসি পত্রাতুগী পাৱর প্লান্ত অসিদগী হৌদোক্লে। ঙসি নহা খরগী মফমদা মখোয়গী কোল লেতর শিন্নবগী তঞ্জা ফংবা অসিদা ঐহাক নুংঙাইবা ফাওই। অদি লাক্কদৌরিবা নুমীৎ খরা অসিদা নহারোল লিশিং কয়াদা মসিনা থবক ফংহল্লগনি।

হিন্দুস্থানগী ইমুং খুদিংদা মৈ ফংহনবা অসি ঐখোয়গী মংলান্নি। ২০১৪দা ঐহাক্না ওফিস পায়রকপা মতম অদুদা লৈবাক অসিগী খুঙ্গং লিশিং ১৮দি মৈ ফংদনা অমম্বা মরক্তা লৈরম্মি। ইলেক্ত্রিক উরমখিদ্রি। ইলেক্ত্রিক পোস্ত উরমদ্রি। ইলেক্ত্রিক ৱায়র তিংলমদ্রি। অসিগুম্লবা খুঙ্গং লিশিং কয়া অসিদা মৈঙাল ফংহন্নবা ঐখোয়না থবক পায়খৎলে। ঐখোয়দি সবকা সাথ, সবকা বিকাস হায়বা মন্ত্র অদুগা লোয়ননা মাংলোমদা চংশিনবা মীওইনি। মরম অদুনা ফনা য়াম্না মফম চাদবা চিংথক্তা ওইগেরা, অশুকপা উমংদা ওইগেরা খুঙ্গং লিশিং ১৮ অসিদা মৈ ফংহন্নবা লুপা লিশিং লাখ কয়া চংলবসু চংনা লৈবাক অসিগী খুঙ্গং খুদিংদা মৈ ফংহন্নবা থবক পায়খৎখি। লেপখিবা মতম অদুগী মাংওইননা খুঙ্গং লিশিং ১৮ অদুদা মৈ ফংহন্নবা পান্দম থম্লিবা অদুদা ঐহাক নুংঙাইবা ফাওই।

ইচল–ইচে অমদি ইচিল–ইনাওশিং, সিন্দরীদা য়ুরিয়াগী কারখানা অমা অমুক হন্না মথৌ তৌহনবগী তঞ্জা অদু ঙসি ঐহাক্না ফংজরে। চাউরাক্না চহি ১৬তগী ফেক্তরী অসি থিংদুনা লাকপনি। মসি দাক্তর শ্যামা প্রসাদ মুখর্জিনা কেন্দ্র সরকারদা মন্ত্রী ওইরিঙৈ মতমদা উরেপ উয়ুং তম্বীরম্বনি। তুংদা মসি থিংজিনখি। অমদি ২০১৪গী মীখলদা ঐহাক্না ঝারখন্দগী সিন্দরীদা লৈরিবা ফেক্তরী অসি মথৌ তৌহনগনি হায়না ময়ামগী মফমদা হায়খি।

ইচল–ইচে অমদি ইচিল–ইনাওশিং, মতমগা লোয়ননা তেক্নোলোজীদা অহোংবা পুরকপা মথৌ তাই। ঐখোয়না গ্যাস শিজিন্নদুনা মথৌ তৌহন্নবা খোংথাং লৌখৎলে অমদি নুমীৎ খরগী মনুংদা ফেক্তরী অসি মথৌ হৌরগনি। উত্তর প্রদেশকী গোরখপুরদসু অসিগুম্বা মখলগী ফেক্তরী অমসু থবক হৌরগনি।

ইচল–ইচে অমদি ইচিল–ইনাওশিং, সিন্দরী অমসুং ধনবাদ অসি মশেক মঙাল থোকপা সহর ওইবা য়াগনি। মখোয়দা প্রোগ্রেসকী মমি চাউনা তারি। ইচল–ইচে অমদি ইচিল–ইনাওশিং, বিহারগী বরাওনী ওইগেরা, উত্তর প্রদেশকী গোরখপুর ওইগেরা নত্রগা ঝারখন্দগী সিন্দরী ওইগেরা য়ুরিয়াগী ফেক্তরীশিং অসিনা অরাইবা মওংদা গ্যাস ফংগনি। য়ুরিয়াগী ফেক্তরী অহুম অসি মথৌ হৌরগদি নোংপোক ভারতকী অথাপ অথাপ্পা মফমশিংদা য়ুরিয়া পুথোক পুশিন তৌবগী চাদিং হন্থহল্লগনি। লমদম অসোমগী নহাশিংনা থবক ফংলগনি। অমদি অরাইবা মওংদা য়ুরিয়া ফংবনা মরম ওইদুনা নোংপোক ভারত্তা লৈবাক অসিগী অনিশুবা এগ্রিকলচরেল রিভোলুসন পুরক্লগনি।

ঐখোয়না য়ুরিয়াদা নিম তোৎপগী থবক হৌদোক্লে। মমাংদদি লৌমীশিংগী মীংদা সবসিদী পীরম্মী। য়ুরিয়া অদু লৌবুক্তা য়ৌরমদে। ইনাক খুন্বশিংগী ফেক্তরীশিংদা য়ৌখিরম্মি। অমদি ইনাক খুনবা খরগী মতেংদগী চহি ৭০ পানখিবা সরকার অদুনা হুরানখিবা য়ুরিয়াশিং অদু কেমিকেল ফেক্তরীশিংদা য়ৌখি হায়বা অদু কৈদৌনুংদা খনখিদে। য়ুরিয়াদা সরকারগী লন থুমদগী চৎলিবা লুপা কোতি কয়াগী সবসিদীশিং অদু ফেক্তরীশিং অসিদা চৎখিবদগী থিনবা লম্বী থিদোক্তুনা ঐখোয়না য়ুরিয়াবু চাদা চামা নীম কোতিং তৌরে। নীমগী মহৈদা য়াওরিবা থাও অদু তোৎশিনবনা য়ুরিয়া হরানবা ঙমহন্দ্রে, য়ুরিয়া অদু ফেক্তরীদা শিজিন্নবা য়াহনদ্রে। য়ুরিয়া অদু শুপ্নতগী লৌউ শিংউবদা শিজিন্ননবা য়াহল্লে। মদুনা মরম ওইরগা হুরানবা থিংলে।

ইনাক খুনবশিংগীদমক্তা শিবা–নাবা খঙদবা মখোয়শিং অদু হৌজিক্তি হুরানবা য়াদবনা মরম ওইদুনা অৱাবা ওইরে, অদুবু ঐখোয়গী লৌমীশিংনা মখোয়গী ফংফম থোকপা য়ুরিয়া অদুগীদমক পরেং শাংনা লেপতুনা ঙাইনদ্রে। ব্লেক্তা য়ুরিয়া লৈবগী মথৌ ওইদ্রে। করিগুম্বা মতম অমদদি য়ুরিয়া ফংনবগীদমক্তা পুলিসকী চৈ চাবা তারম্মি। মদুদগী মখোয় কনবা ঙম্লে। হিন্দুস্থানদা য়ুরিয়া ফংদ্রে হায়না তাদবা ঙসিদি চহি অনি শুরে। মরমদি ঐখোয়না হুরানবা অদু থিংবা ঙম্লে।

ইচল–ইচে অমদি ইচিল–ইনাওশিং, ঐহাক শেঞ্জা থুমজাগী মায়োক্তা লান্থেংনরিবা মীওই অমনি। পুকচেল শেংদবগী মায়োক্তা লান্থেংনরিবা মীওই অমনি। অমদি খোংথাং খুদিংমক মদুগা মরি লৈনরি। ঙসি ঐহাক্না রাঞ্চীদা য়ুমথোং খুদিংদা পাইপ লাইন শিজিন্নদুনা গ্যাস ফংহন্নবা প্রোজেক্তকীসু উরেপ উয়ুং তম্বগী তঞ্জা ফংজখি। ২১শুবা চহি চাগী ইনফ্রাস্ত্রকচর অসিদা গ্যাস গ্রীদ লৈগদবনি, ওপ্তিকেল ফাইবর নেৎৱার্ক লৈগদবনি, ঈশিংগী গ্রীদ লৈগদবনি, ইলেক্ত্রিসিতীগী গ্রীদ লৈগদবনি, মখল খুদিংমক্কী মোর্দন তেক্নোলোজীগী খুদোংচাবা লৈগদবনি। ঐহাক্কী ঝারখন্দনা তুংদা লৈহৌদৌরিবা করিগীনো। মরম অদুনা হৌজিক্তি রাঞ্চীসু হিন্দুস্থানগী খোংজেল য়াংনা চাউখৎলক্লিবা সহরশিংগা চাং মান্ননা চৎমিন্ননবা মংলান অদুগা লোইননা গ্যাস গ্রীদকী থবক অসি ঐখোয়না পায়খৎলে। য়ুমথোং খুদিংদা গ্যাস য়ৌরগনি অমদি তুংদা য়ু পি, বিহার, ৱেস্ত বেঙ্গোল, উরিশা অমসুং অসামগী চাউরাক্না জিলা ৭০দা পাইপ লাইন্না গ্যাস য়ৌহল্লগনি।

ঐখোয়গী মংলানদি মৈখু চেন্দবা চাকখুম অদুনি। মদুবু মপুং ফাহন্নবা ঐখোয়না উজ্জ্বলা য়োজনা হৌদোক্লে। হৌজিক অনিশুবা খোংথাংনা পাইপ লাইন শিজিন্নদুনা গ্যাস য়ৌহনবা অমদি অহুমশুবা অমদা থবক চত্থরি। ক্লিন কুকিংদা লাইরবশিংনা নুমীৎকী মঙালনা চাক থোংদুনা গ্যাসকী চাদিংসু লৈররোইদবা সোলর ইনর্জীগী ফুঙ্গা। মায়কৈ অদোমদা অকনবা থবক পায়খৎলি।

ঙসি ঐহাক্না দেবঘরদা এম্স শানবা উরেপ উয়ুং তম্বগী তঞ্জা অমসু ফংজরে। নোংপোক ভারত্তগী অনাবা কয়া অমা দিল্লীগী এম্স ফাওবা য়ৌরকপা তাই। লাইরবশিংগী নাক্তা পৈসা লৈতে, খুদোং চাদবা কয়া অমা মায়োক্নৈ। ঐখোয়না নোংপোক ভারত্তা এম্স কয়া লিংখৎতুনা লৈবাক অসিগী লাইরবদগী লাইরবা মীওঈশিংনা খ্বাইদগী ফবা মখলগী খুদোংচাবা অদু ফংহনবা মায়কৈদা থবক পায়খৎপা হৌরে অমদি মদুগী মতুং ইন্না ঙসি দেবঘরদা এম্স লিংখৎনবা উরেপ উয়ুং তম্লে। দেবঘর অসি শেংলবা লমদম্নি, বাবা ভোলেনাথকী লমদম্নি। লৈবাক পুম্বদগী মীওই কয়া অমা মফম অসিদা লাকপা পাম্মি। তুরিজমগীদমক চাউনা ওইথোকপা লৈ। মরম অদুনা মসুবু এয়ারপোর্তকী কনেক্তিবিতীগা শম্নহন্নবগী মায়কৈদা ঐখোয়না থবক তৌরি।

ইচল–ইচে অমদি ইচিল–ইনাওশিং, দিবলপমেন্তকী তোঙান তোঙানবা প্রোজেক্ত পুরদুনা ঙসিদি ঐখোয় মাংলোমদা চংশিল্লি। ২০২২ ফাওবদা লাইরবশিংগী মফমদা য়ুম পীনবা মংলান। তোইলেৎসু লৈরবা, ঈশিংসু লৈরবা, ইলেক্ত্রিসিতীসু লৈরবা অমদি অঙাংশিংগীদমক অনকপদা মহৈ মশিং তম্নবা খুদোং চাবসু লৈরবা অদুগুম্বা মখলগী য়ুমগী প্রোজেক্তশিং খোংজেল য়াংনা পায়খৎলি। নীং তম্বা ফংখিবগী চহি ৭৫ ফারকপা ২০২২ ফাওবদা লৈবাক অসিদা ময়ুম লৈতবা কনাগুম্বা অমত্তা লৈররোই।

ইচল–ইচে অমদি ইচিল–ইনাওশিং, দিবেলপমেন্তকী খোংচৎ অসিদা অদোমসু শরুক য়াবীয়ু, ঙসিদি লৈবাক অসি পুকচেল শেংবগী মায়কৈদা চংশিল্লি। হিন্দুস্থানগী মীচম মীয়াম পুম্নমক পুকচেল শেংনা হিংলি। পুকচেল শেংবগীদমক লানথেংনরি। পুকচেল শেংনা হিংলিবা, পুকচেল শেংবগীদমক লানথেংনরিবা মীচম মীয়ামশিং অদুগা অমত্তা ওইনা লেপমিন্নরি। মরম অদুনা ইচল–ইচে অমদি ইচিল–ইনাওশিং অদোমগী মংলানশিং অদু মংফাওহন্নবা অচেৎপা থৌদাং অমগা লোয়ননা ঐখোয় মাংলোমদা চংশিল্লি। য়াম্লবা মীয়ামশিং লেংবীরক্তুনা আশীর্বাদ পীনবীরে, চাউখ্রবা থৌরম অসিগী মরক্তা ঙসিদি ঝারখন্দ অনৌবা থাক অমদা, অনৌবা ঝারখন্দগী মায়কৈদা মাংলোমদা চংশিল্লগনি হায়বা থাজবা অসিগা লোইননা ময়াম পুম্নমকপু হায়নীংঙাই লৈতনা থাগৎচরি।