ভারতকী প্রধানমন্ত্রী

ফম্বাক্তা লৈরিবা ঐগী মন্ত্রীমন্দলগী মরূপশিং ধরমেন্দ্র প্রধানজী, দোক্তর হার্স বর্ধনজী, তেক্নোলোজীগী মতেংনা পাও ফাউনরিবা লৈবাক্কী মফম কয়াদা লৈরিবা শক্নাইরবশিং, বদ্দিংগী থবক শরুক য়ানবা ঙসি মফম অসিদা লৈরিবা উদ্যোক্কী মীওইশিং অমসুং ঙসি মফম অসিদা লৈরিবা শক্নাইরবশিং।

মরূপশিং,

ভারতকী তুংগী য়াইফনবা খল্লগা হৌজিক মতৌ করম্না অচৌবা থবকশিং পায়খৎলিবগে হায়বা ঐখোয়না উবা ফংলে। ভারতকী তুংগী মচাক-মথুম অমা শেমগৎনবগী মরুওইবা খোঙথাং অমা থাংবা হৌবগী ঙসি অসি মরুওইবা নুমিৎ অমনি। লৈবাক অসিগী জিলা ১২৯দা সিতী গ্যাস দিস্ত্রিব্যুসন নেতৱার্ক হৌদোক্নবা ৯শুবা বিদ্দিং রাউন্দ হৌরগনি। মসিগী লোয়ননা ১০শুবা বিদ্দিং রাউন্দসু থবক পায়খৎপা হৌরে।

মসিগী থবকশিং অসি মপুংফানা লোইশিল্লক্লবা মতমদা অঙকপা ফংনা কান্নবা ফংগনি। ১০শুবা বিদ্দিং রাউন্দ লোইশিনদুনা থবক হৌরকপা মতমদা লৈবাক অসিগী জিলা ৪০০ হেন্না সিতী গ্যাস দিস্ত্রিব্যুসন নেতৱার্ককী মখাদা লৈরগনি। লৈবাক অসিগী অপুনবা মীশিংগী চাদা ৭০ মসিগী কান্নবা ফংলগনি। মসিগী লৈবাক অসিগী চাউখৎ-থৌরাং অমসুং মীয়াম হিংবদা নুংঙাইহনবগা মরি লৈনবা অচৌবা মাইপাকপা অমনি।

মরূপশিং,

২০১৪ ফাওবদা লৈবাক অসিগী জিলা ৬৬ খক সিতী গ্যাস দিস্ত্রিব্যুসন নেতৱার্কনা কোনশিল্লম্মি। হৌজিক লৈবাক অসিগী জিলা ১৭৪দা সিতী গ্যাসকী থবক পায়খৎলি। মথং চহি ২-৩দা জিলা ৪০০ হেন্না কোনশিল্লগনি।

মখোয় অসি মশিং থিবদা কান্নদবা নত্তে। মসিনা হৌখিবা চহি মরি অসিদা মতৌ করম্না ঐখোয়গী শহরশিং অসিনা গ্যাস বেজ ইকনোমীদা থবক পায়খৎলবগে হায়বদু উবা ফংলে। ২০১৪দা য়ুমথোং লাখ ২৫ রোম পাইপকী মতেংনা গ্যাস পীখি। চহি মরিদা মসিগী মশিং অসি শরুক অনি হেনগৎলে। হায়রিবা শহরশিং অসিদা থবক হৌরবা মতুংদা মশিং অসি ক্রোর ২ হেল্লবা য়ারি। ২০১৪দা লৈবাক অসিদা সি এন জি স্তেসন ৯৪ লৈরম্মি। চহি ২৫গী মমাংদা, লৈবাক অসিগী শহর অহুম-দিল্লী, মুম্বাই অমসুং সুরত খক্তদা সি এন জি স্তেসনশিং লৈরম্বা অদু ঐখোয় কাউথোক্লোইসি। লাক্লিবা চহি ১০ অসিগী অরোইবা শরুক্তা সি এন জি স্তেসন মশিং লিশিং ১০ হেল্লগনি।

মরূপশিং,

কেন্দ্র সরকারনা চহি মরি চোকথবা নাইদনা থবক তৌরবা মতুংদা, লৈবাক অসিদা সিতী গ্যাস দিস্ত্রিব্যুসন নেতৱার্ক শেমগৎপগী চাং হান্নদগী হেন্না য়াংনা পায়খৎলগনি। দিস্ত্রিবিউতরশিংনা থেংনরিবা খুদোংচাদবশিং অমসুং সিলোগী খুদোংচাদবশিং অমসুং মসিগী সেক্তর অসিগী অতৈ খুদোংচাদবশিং মথং মথং কোকহন্নবা ঐখোয়না থবক পায়খৎলে।
ঐনা হায়বা, ‘রিফোর্ম, পরফোর্ম অমসুং ত্রান্সফোর্ম’গী লাইৱা অদুগী চপ চারবা খুদম অদু মসিগী সেক্তর অসিনি। হৌখিবা চহি মরি অসিদা সরকার অসিনা পুরকপা অওনবা থবকশিং অসিনা সেক্তর অসিগী ফিবম ফগৎলে অমসুং হৌজিক ঐখোয় অওনবগী মতম অমদা লাক্লে।

মরূপশিং,

২০২২দা ঐখোয়গী লৈবাক অসি মনিংতম্বা চহি ৭৫ মপুংফারগনি। অনৌবা তেক্নোলোজীগা লোয়ননা হিংলবা অমসুং অরিবা চৎনবীশিং লৈত্রবা অচৌবা ভারত অমা শেমগৎনবা ভারতমচা ক্রোর ১৩০না থবক কন্না সুরি। মসিগী পান্দম অসিগা লোয়ননা লৈবাক অসিগী ইনর্জি সেক্তর অসি নৌনা শেমগৎলি।

লৈবাক অসিগী শেন-থূমগী থবকশিং হেনগৎলকপদগী ইনর্জি শীজিন্নবা অঙকপা ফংনা হেনগৎলকখি। দরকার ওইরিবা ইনর্জি ফংহনবগা লোয়ননা অনানবা ইনর্জি ফংহন্নবা ঐখোয়গী কোক্তা ৱাখল থাদবা মথৌ তাই। অকোয়বগী ফিবম শোকহন্দনা চাউখৎ-থৌরাংগী থবক পায়খৎপা য়াই হায়বসি ঐখোয়না মালেমদা উৎকদবনি। মসিগী মতাং অসিদা, ঐখোয়গী লৈবাক্কী মথৌ তাবা ইনর্জি ফংনবা অহেনবা নেচরেল গ্যাস শীজিন্নবা মথৌ তাই।

মথং চহি ১০গী অরোইবা শরুক্তা লৈবাক অসিগী নেচরেল গ্যাস শীজিন্নবা শরুক ২.৫ হেনগৎনবা ঐখোয়না হোৎনরি।
মরম অদুনা সরকারনা গ্যস বেজ ইকনোমীগী সেক্তর খুদিংমক্তা সরকার অসিনা মীৎয়েং চংলি। গ্যাসকী মচাকশিং ফগৎহন্নবা, ঐখোয়না এল এন জি তরমিনেলশিং মশিং হেনগৎহন্নবা হোৎনরি অমসুং লৈবাক শীনবা থুংনা গ্যাস গ্রিদ অমসুং সিতী গ্যাস দিস্ত্রিব্যুসন নেতৱার্ককী থবক পায়খৎলি। মপান্দগী এল এন জি পুশিল্লকপা হেনগৎনবা অরিবা তরমিনেলশিং মতমগা চুনবা মওংদা শেমগৎলে অমসুং অনৌবা এল এন জিশিংসু শেমগৎলে।

লুপা ক্রোর লিশিং ১০ চংনা তামিল নাদুগী ইন্নোর অমসুং ওদিসাগী ধামরাদা অনৌবা এল এন জি তরমিনেলশিং শেমগৎপগী থবক লোইশিল্লক্লে। লৈবাক অসিগী জিলা অয়াম্বদা য়ারিবমখৈ নেচরেল গ্যাসশিং ফংহনবা ঙম্নবা নেসনেল গ্যাস গ্রিদ শেমগৎপা হৌরে।

মসিগী মখাদা জগিসপুর-হালদিয়া অমসুং বোকারো-ধামরা পাইপলাইন প্রোজেক্তশিং থবক পায়খৎপা হৌরে ।গ্যাস গ্রিদ অসিগী অৱাং-নোংপোক্কী অতৈ মফমশিংগা শম্ননবা মসিগী প্রোজেক্ত আসি বরাওনিদগী গুৱাহাতি ফাওবা শাংদোক্লে। হায়রিবা প্রোজেক্তশিং অসিগী চাউরাক্না লুপা ক্রোর ১৩০০০ রোম চাদিং তৌগনি।

হায়রিবা প্রোজেক্তশিং অসিনা গোরাগপুর, বরাওনি অমসুং সিন্দ্রিগী হার শুংবা প্লান্ত অহুমদা অনৌবা মপোক অমা পীরগনি। মসিগী গ্যাস গ্রিদ অসিগা সিক্কিম য়াওনা অৱাং-নোংপোক্কী রাজ্যশিংগা শম্ননবা লুপা ক্রোর ৯২০০০ চংনা ইন্দ্রধনুস গ্যাস গ্রিদ কৌবা জোইন্ত ভেঞ্জর অমা পায়খৎলে।

মরূপশিং,

মসিগী সেক্তর অসিদা শেন থাদরিবশিংগী য়াইফনবা থবক কয়া পায়খৎলে। য়ুমদা শীজিন্নরিবা গ্যসকী মমল অসি মালেমগী গ্যাসকী কৈথেলদা লৈরিবা মমল অদুগা মরি লৈনহল্লি। লৈবাক অসিদা গ্যাস পুথোকপা হেনগৎহন্নবা য়োনবা অমসুং মমল লেপ্পগী মনিং তম্বা কম্পেনিশিংদা পীরি।

গ্যাস মমল য়েংশি্ন্নবা অমসুং গ্যাস গ্রিদশিং থবক তৌনবা মনিংতম্বা ত্রান্সপোর্ত সিস্তেম অমা শেম্লে। সেক্তর অসিদা অরোন-অথুপ লৈতনবা অমসুং মনিং তম্বা গ্যাসকী কৈথেল অমা লৈহন্নবা গ্যাস ত্রেদিং একচেঞ্জ শেমগৎনবা সরকারনা থবক পায়খৎলি।

মরূপশিং,

মসিগী থবকশিং অমসুং প্রোজেক্তশিং অসিনা লৈবাক অসিদা অচৌবা কান্নবা কয়া ফংহল্লগনি। হায়রিবা প্রোজেক্তশিং অসিনা খু্ন্নাইগী থাক্তা, শেন-থুমগী থাক্তা অমসুং অকোয়বগী ফিবমগী থাক্তা লৈবাক অসিদা অচৌবা অওনবা অমা পুরক্লগনি।

মরূপশিং,

মফম অমদা অনৌবা থবক অমা পায়খৎলকপা মতমদা, মদুনা অকোয়বগী মফমশিংদা অদুদা মরি লৈনবা থবক মচা কয়া শেমগৎপা ঙম্মি। খুদম ওইনা,মফম অমদা হোস্পিতাল অমা শাবা মতমদা, হোস্পিতাল অদুগী অকোয়বদা হিদাক য়োনবা দুকানশিং, ধাবা রেসতুরেন্তশিং, চা য়োনবা হোতেলশিং, অপীকপা হোতেলশিং লৈরকই। ওতো অমসুং তেক্সি খামফম ফাওবা শেমগৎলকই। মখোয়না তোখাইনা থবক তৌজরবসু মখোয়না হোস্পিতাল অদুগী মখা পোন্নবা হিংবা ঙম্মি।

মসিগা চপ মান্ননা, শহর অমদা গ্যাস য়ৌরকপদা, মসিগী ইকোসিস্তেম অমা শেমগৎলকই। হায়রিবা শহরশিং অদুদা গ্যাসতা য়ুমফম ওইবা অপীকপা অমসুং অচৌবা য়ুনিত মশিং হেনগৎলকই। মীয়ামগী য়ুমশিংদা হকথেংননা গ্যাস পাইপলাইনশিং য়ৌহনবনা মীয়াম হিংবদা নুংঙাইহল্লি। সি এন জি নৎত্রগা এল এন জিগী পাইপলাইনশিংগী নেতৱাক লিংখৎপা মফমদা লৈবা নহারোল লিশিং কয়া থবক ফংগনি। শহর অদুগী ওতোশিং, তেক্সশিং অমসুং কারশিং অনৌবা মতমগী থাও শীজিন্নবা ফংলগনি। লৈবাক অসিগী শেমগৎলিবা গ্যাসকা মরি লৈনবা মচাক-মথুমশিং অসিনা মীওই লাখ কয়া থবক ফংহল্লগনি।
৯শুবা বিদ্দিংগী মখাদা পায়খৎলিবা থবকশিং অসিনা নহারোল লাখ ৩দা হকথেংননা থবক ফংহল্লগনি। মসিগী মথক্তা, অতোপ্পা খুদোংচাবা কয়া শেমগৎলকপদগী, মদুনা মীওই লাখ কয়া থবক ফংহল্লগনি। মরুওইনা অৱাং-নোংপোক অমসুং নোংপোক থংবা রাজ্যশিংদা কান্নবা ফংহল্লগনি। শম্না হায়রবদা, গ্যাসতা য়ুমফম ওইবা থবকশিং অসিনা উদোকশিংদা অহোংবা পুরকপদা নত্তনা মরি লৈনবা জিলাশিং অদুগী মীয়ামগী পুন্সিদা অহোংবা পুরক্কনি।

লাক্কদৌরিবা চহিশিংদা নহাক্না অহোংবা কয়া উবা ফংলগনি অমসুং অহোংবা অদুগী শরুক অমা ওইরগনি। ঐখোয়গী মতমদা অহোংবশিং উবা ফংলিবা অসিগীদমক ঐখোয় লাইবক ফরবনি। অমরোমদা, মীয়াম্না মখোয়গী য়ুমদা গ্যাস কন্নেক্সন লৌনবা পরলিয়ামেন্তরিয়ানশিংদগী রিকমেন্দেসন লেত্তর লৌনবা পরেং শাংনবা লেপ্পা অদু ঐ নিংশিংলি। মতম অদুদগী লৈবাক অসি য়াম্না হোংলে।

২০১৪দা মীয়াম্না সরকার হোংবদা নত্তনা সরকারগী থবক তৌবগী ম ওং অমসুং স্কিমশিং পায়খৎপগী মওংদা অহোংবা কয়া লাকহল্লে হায়বদা ঐ লাল্লোই। ঙসিগী থৌরম অসিদা, সেক্তর অসিগী মতাংদা ঐনা নখোয়দা খুদম অমা হায়গে। ঐখোয়না গ্যাস বেজ ইকনোমীগী মতাংদা ৱারি শানরি ; অদুবু ১৯৫৫দগী এল পি জি পীবা হৌরে হায়বসি ঐখোয়না কাউথোক্লোইদবনি। মতম অদুদগী ২০১৪ ফাওবদা এল পি জি কন্নেক্সন ক্রোর ১৩ পীরে হায়বদি চহি ৬০দা কন্নেক্সন ক্রোর ১৩ পীরে। মচাক-মথুমশিং,মীয়াম, ফাইলশিং, ওফিসশিং অমসুং ফম্নাইবশিংগী থবক খুৎসুদা অহোংবা লৈত্রি অদুবু চহি মরিগী মনুংদা কন্নেক্সন ক্রোর ১২ পীরে।

সচহি ৬০ কন্নেক্সন ক্রোর ১৩ পীরে অদুগা সুপ্নগী চহি ৪দনা কন্নেক্সন ক্রোর ১২ পীরে। মদুগী চাং অদুদা থবক তৌরবদি, মীরোল অনিগী মতুংদসু কান্নবশিং মীয়ামদা য়ৌহনবা ঙম্লোই। ২০১৪গী মমাংদা লৈরম্বা গ্যাস কন্নেক্সনগী চাং চাদা ৫৫ নি। হৌজিক মসি চাদা ৯০দা হেনগৎলে। মসিদা উজৱালা য়োজনানা অচৌবা থৌদাং লৌরি। স্কিম অসি ২০১৬গী মে ১দগী হৌদোকপদগী হৌজিক ফাওবদা নুপী ক্রোর ৬দা লেম্না গ্যাস কন্নেক্সন পীখ্রে। মসিগী স্কিম অসিনা খুঙ্গংদা লৈরিবা মীয়ামগী পুন্সি মহিংদা অহোংবা লাকহল্লে।

বিদ্দিংগী থবকশিং অমসুং উরেপ-উয়ুং তম্বগী থৌরম মরক অসিদা, শিংনা চাক থোংবগী মৈখু মরক্তা শ্বর হোল্লিবী নুপীশিং অদু ঐখোয়না নিংশিংগদবনি ।মহাক্কী পুন্সি অদু মৈখু মরক্তা লৈরগা মহাক্না ইমুং অদু পুন্না পীজরিবনি। হায়রিবা নুপীশিং অদুনা গ্যাস বেজ ইকনোমী করিনো হায়বা খঙদ্রবসু, লৈবাক অসিনা মাংলোমদা চংশিল্লিবা গ্যাস বেজ ইকনোমী অসিনা মখোয়গী পুন্সিদা অহোংবা পুরক্লগনি ।

মরূপশিং,

ঐনা ঙাইহাক্কী মমাংদা অকোয়বগী ফিবমগী মতাংদা হায়খ্রে। ঐখোয়না পায়খৎলিবা গ্যাস বেজ ইকনোমী অসিনা অকোয়বগী ফিবমদা কান্নবা পীগনি। লৈবাক অসিদা সি এন জি স্তেসন লিশিং কয়া লৈরকপা মতমদা, উদোকশিং গ্যাস লেপ্তনা ফংগনি, লৈবাক অসিগী জিলাশিংগী তেক্সিশিং, ওতোশিং অমসুং কারশিং সি এন জি মরাং কাইনা ফংগনি। মসিনা পোলুসন হন্থহনগনি। মসিনা সি ও পি ২১দা ভারতনা পীখিবা থাজবা ফংহনবা ঙমগনি। মসিনা মালেমগী অকোয়বগী ফিবম ঙাক্নবা ভারতনা মতেং পীবা হেনগৎহনগনি ।

মরূপশিং,

অনানবা ইর্জি পীনবা সরকারনা পায়খৎলিবা থবকশিং অসি পাক-চাওই। লৌবুক্কী ফত্তবশিং অমসুং বাইওমাসশিং অসি কমপ্রেস বাইওগ্যাস ওন্থোক্নবা সরকারনা স্কিম পায়খৎলে। মসিগী স্কিম অসিগী মখাদা, মথং চহি ৫দা লৈবাক অসিদা কমপ্রেস বাইওগ্যাস প্লান্ত ৫০০০ লিংখৎলগনি।

মসিনা লৌমীশিংনা চরু মৈ থাবা থিংবদা নত্তনা লৌমীশিংগী শেন্থোক হেনগৎহনবা ঙমগনি। বাইওমাস অসি বাইওফুয়েল ওন্থোক্নবা লুপা ক্রোর লিশিং ১০ চংনা বাই রিফাইনরিশিং শেমগৎনবা থবক পায়খৎলে। ইথানোল য়ানশিন্নবা সরকারনা থৌশিলশিংদা অহোংবা পুরকপদগী হৌজিক ইথানোল য়ানশিনবগী থবক হেনগৎলে।

২০১৪দা য়ানশিন্নবা ইথানোল লিতর ক্রোর ৪০ শীজিন্নখি। হৌজিক মসি শরুক মরিদা হেনগৎলে। ইথানোল য়ানশিনবা চাদা ১০ হেনগৎহন্নবা সরকারনা পান্দম থম্লি। মথং চহিদা, ২০১৪দা লৈখিবা অদুদগী ইথানোল য়ানশিনবা শরুক ৮ হেনগৎলগনি।

অনানবা ইনর্জি শীজিন্নদুনা অকোয়বগী ফিবম ফগৎহন্নবা বি এস-৪দগী বি এস-৬দা হোংদোক্নবা সরকারনা ৱারেপ লৌরে। তেলিকোম সেক্তরদা ঐখোয়না ২জিদগী ৪জিদা অমসুং ৪জিদগী ৫জিদা হোংলে অদুবু ঐখোয়না বি এস -৪দগী বি এস-৬দা হকথেংননা হোংলে ।মসিগী মথক্তা, এল ই দি ব্লব মমল হন্থরকপা অমসুং এল ই দি ব্লব ক্রোর ৩২ য়েন্থোকপদগী কার্বোন দাইওক্সাই তন ক্রোর ৩ থাদোকপা হন্থরে।

২০২২ ফাওবগী মনুংদা রিনইয়েবল ইনর্জি গিগাৱাত ১৭৫ পুথোক্নবা সরকারনা থবক পায়খৎলি। মসিগী মখাদা নুমিৎকী মঙালদগী য়ামদ্রবদা মৈ গিগা ৱাত ১০০ পুথোক্কনি। মথং চহি ৪দা লৌমীশিংদা সোলার পম্পস লাখ ২৮ য়েন্থোক্কনি ।মসিগা লোয়ননা গ্যাস বেজ ইকনোমী চাওখৎলকতুনা ভারতনা মালেমদা পীখিবা থাজবশিং ঙাকপা ঙমগনি।
অতোপ্পা অমদা, ২০৩০ ফাওবদা ভারতনা মসিগী ইমিসন চাদা ৩৩-৩৫ ফাওবা হন্থহনবা ঙমগনি। মথংদা, লৈবাক অসিগী দরকার ওইবা ইনর্জি নন-কনভেন্সনেল ইনর্জি সোর্সতগী লৌনবা হোৎনগনি।

মরূপশিং,

গ্যাস বেজ ইকনোমীগা মরি লৈনবা পান্দমশিং ফংনবা ভারতনা থাজবা থম্লি অমসুং ঐখোয়না মদু ফংবা ঙমগনি। মসিগী ৱারেপশিং অসি ঐখোয় খক্তগী নত্তে, মসি মীওইবা খুন্নাইগী অমসুং তুংগী মীরোলগীনি অমসুং ঐখোয়গী তৌফম থোকপা থবকশিং অদু মপুং ফাহনবনি ।

সিতী গ্যাস দিস্ত্রিব্যুসন নেতৱার্ক ফংলবা শহরশিংগী মীয়াম অমসুং ১০শুবা বিদ্দিংগী মীহুৎশিং ঐনা অমুক হন্না ঐগী য়াইফ-পাউজেল পীজরি। মসিগা লোয়ননা ঐগী ৱারোল লোইশিনজরে ।

অদোমবু থাগৎচরি ।