ভারতকী প্রধানমন্ত্রী

অদোম পুম্নমকপু বিজয়াদশমীগী শেংলবা থৌরম অসিদা হন্না হন্না নুংঙাইবা ফোংদোকচরি।

ঐখোয়গী লৈবাক অসিদা কুম্মৈশিং অসি অমরোমদা খুন্নাইগী মহৈ–মশিংগী পাম্বৈ অমসু ওইরি। ঐখোয়গী কুম্মৈ অসিগা লোইননা খুন্নাই অসিবু অপুনবগী মাইকৈদা পুবা, খুন্নাইগী মাইকৈদা পুক্নীং চংহনবা অমসুং ফত্তবশিংবু মাংহন্নবা লেপ্তনা হোৎনবা, মসিগী মহৈ অমা ওইনা ঐখোয়গী কুম্মৈশিংগী চৎনবী লৈরক্লি। ঐখোয়গী কুম্মৈ অসি লবুক–লমহাংগসু মরি লৈনৈ, ঐখোয়গী কুম্মৈ অসি চীং–পাৎ–তুরেলগসু মরি লৈনৈ, ঐখোয়গী কুম্মৈ পুৱারীগা মরি লৈনৈ, ঐখোয়গী কুম্মৈ ঐখোয়গী নাৎকী চৎনবীশিংগা মরি লৈনৈ।

চহি লিশিং কয়া হৌখ্রে অদুবু প্রভু রাম, প্রভু কৃষ্ণ মখোয়গী ৱারিশিংনা ঙসিসু খুন্নাইগী পুন্সিদা থৌনা পীরি, ইথিল পীরি। ঙসি নবরাত্রিগী শেংলবা থৌরমগী মতুংদা বিজয়াদশমীগী থৌরম অসিদা রাবন–হাৎপগী চৎনবী পাংথোক্লি। মসি রাবন–হাৎপগী শরুক অমনি। অদুবু নাগরিক অমা ওইনা খুন্নাইগী ওইবা পুন্সিদা রাবন–হাৎপগী থৌরম পাংথোক্লিবা অসিদা, মখোয় অসিবু মাংহন্নগীদমক্তসু খুন্নাই অসিনা লেপ্তনা ইথিল পোকহনগদবনি।

অমসুং অসিগুম্বা কুম্মৈ অসিদগী সুপ্নগী হরাও–নুংঙাইবতা নত্তনা করিগুম্বা পান্দম অমসু লৈহনগদবনি। অসিগুম্বা কুম্মৈ অসিদগী করিগুম্বা খরা তৌননবা ৱারেপ লৌগদবনি। কনানা ৱাফম অসি শাগৎপা য়াই মদুদি অয়োধ্যাদগী শেৎখিবা ফিরেল শেৎলদুনা থোরকখিবা রামনা লম্বী চৎনা চৎনা অপুনবা পাঙ্গলগী অসুক চাওখ্রবা লৌশিং অমা তাকপীখি মদুদি শ্রীলংকা মাই পাকপদা খুন্নাইগী কাংলুপ খুদিংমক্কী মীওইশিং মহাক্কা লোইনখি। মীওইবসু মহাক্কী মীচং চংখি, য়োংসু চংখি, মহৌষানসু মহাক্কী মীচং চংখি। অমসুং মাই পাক্লবা মতুংদসু নোল্লুকপা অদুগা লোইননা মীওইবা খুন্নাইবু, মশানা–মশাবু শেমদোকচনবতা হোৎনদুনা লৈখি।   

অসিগুম্বা বিজয়াদশমীগী থৌরম অসিদা ঐখোয়সু ৱাশক লৌরসি মদুদি ২০২২, ভারতকী নীংতম্বগী ৭৫শুবা চহি পাংথোক্কদৌরিবা অসিদা ঐখোয়সু করিগুম্বা ৱাশক অমা লৌরসি, ঐখোয়সু করিগুম্বা পান্দম ফংনবগীদমক লম্বী খল্লসি অমসুং ২০২২ ফাওবগী মনুংদা নাগরিক অমা ওইনা লৈবাক অসিদা করিগুম্বা কান্নরবা থৌদাং অমা য়ারসি, করিগুম্বা কন্ত্রিব্যুসন অমদি তৌসি। ঐখোয়না ২০২২, নীংতম্বগী চহি ৭৫দা। অফাওবা মীওইশিংনা মংলান অদুদা নীং তম্বা পীবীরম্বা অদুগা মান্ননা শেম্বা ঙমগনি অমসুং মরম অসিনা প্রভু রামজীগী মতৌগুম্না ঐখোয়সু করিগুম্বা ৱাশক লৌনবা বর্ত্তা তৌদুনা চৎসি, মসিমক ঐগী অদোম পুম্নমক্তা থমজরিবা য়াইফ-মাঙ্গলনি। অমুক্কা হন্না অদোম পুম্নমকপু বিজয়াদশমীগী হন্না হন্না নুংঙাইবা ফোংদোকচরি।