ভারতকী প্রধানমন্ত্রী

গুজরাতকী রাজ্যপাল আচার্য় দেবব্রতজী, উত্তর প্রদেশকী রাজ্যপাল অমদি গুজরাতকী হান্নগী মুখ্য মন্ত্রী ইচন অনন্দী বেন, মুখ্য মন্ত্রী বিজয় রুপানীজী, উপ মুখ্য মন্ত্রী নীতিন পতেলজী অমদি মফম অসিদা তিনবীরিবা শক্নাইরবশিং, ইচল–ইচে অমসুং ইচিল–ইনাওশিং।

শক্তম কয়া অমদি চহী ১২–১৫গী মতুংদা উবা ফংলি। মশাগী মপুন্সি পুম্বা গুজরাতকীদমক কত্থোকখিবা মীওই কয়া অমসু মফম অসিদা তিনবীরি। মখোয়না ওফিস পায়রিঙৈ মতমদা গুজরাত্তা পীবা য়াবা পীখিবা অদুগুম্লবা থবক্তগী পোত্থারবা ওফিসর কয়াসু উবা ফংজরি অমদি মখোয়না মরম ওইদুনা ঙসিদি গুজরাতকী থাউমৈদা মঙাল পীরি। ঐহাকপু অদোম ময়ামগা উন্নজনবগী তাঞ্জা পীনবীবগীদমক গুজরাত সরকারবু তৌবীলম খঙবা উৎচরি।

অহানবামক্তদা ময়াম পুম্নমকপু গনেশ চতুর্থীগী য়াইফ–পাউজেল পীজরি। লৈবাক মীয়াম পুম্নমকপু ভগবান গনেশনা থৌজানবীবা ওইরসনু। অসিগুম্লবা শেংলবা থৌরম অসিদা অদোম ময়াম অমদি লৈবাক মীয়াম্বু অমদি অখন্ননা ঙসি গুজরাতকী থৌরম ওইবনা গুজরাতকী মীয়াম্বু হন্না–হন্না য়াইফ–পাউজেল পীজরি।

ঐহাক নুংঙাইবা ফাওই মদুদি ভগবান সিদ্ধী বিনায়ক্কী শেংলবা থৌরমদা ঐখোয়না অতোপ্পা এচিবমেন্ত অমগী থৌরম পাংথোক্নবা মফম অসিদা পুল্লরে। গরবী গুজরাত ভবন গুজরাতকী প্রজা কোতি কয়াগী স্পিরিৎশিং, ত্রেদিসন অমসুং সংস্কৃতিগী মখাদা পুম্নমকপু সেবা তৌনবগীদমক থৌরাং তৌরে। ঐহাক্না ময়াম পুম্নমকপু, গুজরাত মীয়াম্বু মসিগীদমক নুংঙাইবা ফোংদোকচরি।

মরূপশিং, গুজরাত ভবনগী তুংদা হৌজিক গরবী গুজরাত সদন লিংখৎপনা মখল কয়াগী অনৌবা খুদোংচাবশিং পুরক্লগনি। বিলদিং অসি শাবদা থৌদাং লৌখিবা মরূপশিংবু থাগৎচরি, মখোয়না লেপখিবা মতমগী মাংওইননা অসিগুম্লবা ফজরবা বিলদিং শাবা লোইশিনখি।

চহী অনিগী মমাং সেপ্তেম্বর থাদা মুখ্য মন্ত্রী অমসুং উপ মুখ্য মন্ত্রীনা মসিগী উরেপ উয়ুং তমখি অমদি ঙসি সেপ্তেম্বর হৌরকপা মক্তদা মসিবু শঙ্গাবগী খুদোংচাবা অদু ঐহাক্না ফংজরে। মতম চানা প্রোজেক্তশিং লোইশিনবগী হৈনবী অসি সরকারগী ওর্গনাইজেসনশিংদা, সরকারগী এজেন্সীশিংদা লৈরকপা অসিদা ঐহাক নুংঙাইবা ফাওই।

মরূপশিং, ভবন অসি মিনি গুজরাতকী মোদেল ওইজরবসু মসি অনৌবা ভারতকী অদুগুম্লবা ৱাখল্লোন অদুগী লেংদ্রবা প্রমান্নি মদুদা ঐখোয়না ঐখোয়গী কলচরেল হেরিতেজবু, ঐখোয়গী চৎন লোনচৎপু অনৌবা থাক্কা শম্নহন্দুনা মাংলোমদা পুখৎনবা ৱাফম থম্লি।

ইচিল–ইনাও অমসুং ইচল ইচেশিং, থাঙ্গৈ শেংনা ভবন অসি গুজরাতকী আর্ত অমসুং হেন্দিক্রাফকীদমক অমদি গুজরাতকী হেরিতেজ তুরিজম্বু প্রমোৎ তৌনবগীদমক য়াম্না মরুওইবা খুদম ওইবা য়াই। মালেম পুম্বগী মীয়াম্না, ললোনবশিংনা চত্থোক চৎশিন তৌরিবা লৈবাক অসিগী কোনুংদা অসিগুম্বা মখলগী খুদোংচাবা ফংবা অসি য়াম্না কান্ননীংঙাইনি।

মফম অসিদা গুজরাত তুরিজমগা মরী লৈনবা সিস্তেম অদু হেন্না চেৎশিলহন্নবা ঐহাক্না মুখ্য মন্ত্রীগী মফমদা হায়জরি। কলচরেল প্রোগ্রাম অমসুং ফুদ ফেস্তিবেলগুম্বা থৌরমশিংগী খুত্থাংদা দিল্লীগী, লৈবাক পুম্বগী লমকোয়বশিংবু গুজরাতকা লোয়ননা শম্নহনবা য়াই।

মতম অমদদি গুজরাতকী চিঞ্জাকপু অৱাং ভারতকী মীয়াম্না পাম্নরমদে, য়াম্না থুম্মল্লি হায়নরম্মি, কারোৎ অখাবিদসু অথুম্বা হাপচিল্লি হায়রম্মি। অদুবু হৌজিক্তি গুজরাতকী অফবা চিঞ্জাক কদায়দা ফংগদগে হায়না হংনবা ঐহাক্না উবা ফংলে।

অনৌবা ভবনদা, গুজরাত্তা ইনভেস্তমেন্তকী পুক্নিং চিংশিন্নবগীদমক, গুজরাত্তা ইন্দস্ত্রীশিংগীদমক, মরুওইবা সেন্তর অমা শানবগীদমক অনৌবা সিস্তেমশিং থম্লে। অদুগা ঐহাক্না থাজবা থম্লি মদুদি অসিগুম্বা খুদোংচাবশিং অসিনা গুজরাত্তা শেল থাদনীংবগী অপাম্বা থম্বা ভারত অমসুং মীরৈবাক্কী ইনভেস্তরশিংদা অহেনবা খুদোংচাবা ফংলগনি।

মরূপশিং, গুজরাতনা দিবেলপমেন্তবু, ইন্তর্প্রাইজবু, হোৎনববু মতম লৈবা খিবিক্তা লুম্না লৌরি। দিবেলপমেন্তকীদমক গুজরাতনা হোৎনরিবা অদু মুখ্য মন্ত্রী ওইনা চাউরাক্না চহী তরামঙা য়াম্না নক্না য়েংজখি। হৌখিবা চহী মঙাদগী ঐহাক্না য়েংদুনা লাক্লি মদুদি গুজরাতনা মশাগী চাউখৎপগী খোংচপু হান্নদগী হেন্না খোংজেল য়াংশিলহল্লে। অহানবদা অনন্দীবেন পতেলনা দিবলপমেন্তকী খোংজেলদা অনৌবা ইনর্জী পীখি, তুংদা রুপানীজীনা অনৌবা থাক্তা পুখৎনবা কয়ারক হোৎনখি। চহী খরা অসিদা গুজরাতকী চাউখৎপগী থাক চাদা তরাদগী হেন্না হেঙ্গৎলে।

মরূপশিং, কেন্দ্র অমসুং রাজ্যদা বি.জে.পি.না লুচিংদুনা সরকার শেম্লবা মতুংদগী অমদি সরকার অনিমক্না পুন্না হোৎনমিন্নবদগী গুজরাতকী দিবেলপমেন্তা লাকপা অপনবা পুম্নমক লৌথোকখ্রে। অদুগুম্লবা অপনবা অমা নর্মদা দামদা লাকখি। সমস্যা অদু লোইশিন্নবা মতুং মতৌ করম্না নর্মদাগী ঈশিংনা গুজরাতকী তোঙান তোঙানবা খুঙ্গংশিংগী ইখৌ লাংবা কোকহল্লি, লৌমীশিংদা কান্নবা ফংহল্লি হায়বদু ঙসিদি ঐখোয়না খঙবা ঙম্লে।

মরূপশিং. সোনী প্রোজেক্ত ওইগেরা নত্ত্রগা সুজলাম–সুখলাম প্রোজেক্ত ওইগেরা, প্রোজেক্ত অনি অসি খুমাং চাউশিনবনা মরম ওইদুনা ঙসিদি গুজরাতকী ইমুং লাখ কয়ানা কান্নবা ফংলে। গুজরাত্তা ঈশিং মতিক চানা ফংহনবা ঙমহল্লে।  

মরূপশিং, ইথৈ–লৌখোংদা নত্তনা ইনফ্রাস্ত্রকচরগী অতোপ্পা লমশিংদসু হৌখিবা চহী মঙাগী মনুংদা গুজরাত্তা অমুক্তা ওইখিদ্রিবা মওংদা শেল থাদখ্রে অমদি ইনফ্রাস্ত্রকচর প্রোজেক্ত পায়খৎপগী খোংজেলসু হেঙ্গৎলে। অহমদবাদতা মেত্রো য়াওনা অনৌবা ইনফ্রাস্ত্রকচরগী প্রোজেক্ত কয়া অমা খোংজেল য়াংনা পায়খৎলে। বরোদা, রাজকোত, সুরত অমসুং অহমদবাদকী এয়ারপোর্তশিংবু অনৌবা থাক্তা শেমগৎলে। মসিদা নত্তনা ধোরেলা এয়ারপোর্ত অমসুং এক্সপ্রেস ৱে, রেলৱে য়ুনিবর্সিতী, মেরিতাইম ম্যুজিয়ম, মেরিন পুলিস একাদেমী, গান্ধী ম্যুজম, অসিগুম্বা খবক কয়া অমা চহী মঙা অসিদা গুজরাত্তা পায়খৎলে। স্তেচু ওফ য়ুনিতীনদি মালেমগী তুরিস্ত মেপতা ভারতপু অহেনবা ইকায় খু্ম্নহনবদা মতেং ওইরে। তুরিজম সেক্তরগা মরী লৈনবা মালেমগী শকখঙলবা মেগাজিনশিংদা স্তেচু ওফ য়ুনিতীগী ৱাফম য়াওরি। জন্মস্তমীগী নুমিৎতা সরদার সাহবপু য়েংনবগীদমক মীওই লিশিং ৩৪ স্তেচু ওফ য়ুনিতীদা লাকখিবা অদুদা ঐহাক নুংঙাইবা ফাওই। নুমিৎ অমদা মীওই লিশিং ৩৪ লাকপা অসি মশানা অচৌবা ৱাফম অমনি।

মরূপশিং, মীচম প্রজাদা খুদোংচাবা য়ৌহন্নবা অমসুং হকচাং ফনা থমহন্নবগীদমক গুজরাতনা শিংথানীংঙাই ওইরবা থবকশিংসু পায়খৎলি। হৌখিবা চহী ৫–৬ অসিদা গুজরাত্তা মেদিকেলগী ইনফ্রাস্ত্রকচরদা খুমাং চাউশিন্না থবক তৌরে। অহমদাবাদ য়াওনা রাজ্যগী মফম কয়াদা মোদর্ন হোস্পিতালশিং অমসুং মেদিকেল কোলেজশিং লিংখৎলি। মসিনা নহাশিংবু গুজরাতমক্তদা মেদিকেল তম্বা অমসুং থবক্কী খুদোংচাবসু ফংহল্লে। হকশেলগা লোয়ননা উজ্জ্বল য়োজনা অমসুং প্রধান মন্ত্রী আৱাস য়োজনা পায়খৎপদসু গুজরাত খুমাং য়াম্না চাউশিল্লে।

মরূপশিং, ভারতকী তোঙান তোঙানবা রাজ্যশিংগী সংস্কৃতি, সমাজ অমসুং ইকোনোমিগী ওইবা পাঙ্গল অদুমক্না ভারতপু অথোয়বা, শক্তি লৈবা ওইহল্লি। দিল্লীদা রাজ্য খুদিংমক্কী ভবন লৈরি। মসি গেস্ত হাউস খক্ততমক ওইদুনা লৈহল্লোয়দবনি, মসিদা পুক্নিং চংগদবনি। ভবন অসি তুরিজম মসুং ত্রেদকী কেন্দ্র ওইহন্নবগী মায়কৈদসু থবক তৌগদবনি।

মরূপশিং, জম্মু কশ্মীর অমসুং লেহ–লদাখতগী অৱাং নোংপোক ফাওবা, বিন্ধ্যাগী ত্রাইবেল লমদমশিংদগী হৌরগা খাগী সমুদ্র লমদম ফাওবদা, ঐখোয়গী নাক্তা লৈবাক অসিগা লোয়ননা সেয়র তৌনবা অমদি মালেমদা ওফর তৌনবা কয়া অমা লৈরি। হৌজিক ঐখোয়না মসিবু প্রমোৎ তৌনবগীদমক এক্তিব ওইবা হেঙ্গৎহনবা তাই।

ঐহাক্না অমুক হন্না ময়াম পুম্নমকপু গরবী গুজরাতকীদমক হন্না–হন্না নুংঙাইবা ফোংদোকচরি। অদুগা ঐখোয়না লৈবাক অসিবু সিঙ্গল য়ুজ প্লাস্তিক্তগী নান্থোকহনগদবনি হায়বদু নীংশিংবীরমগনি হায়বা ঐহাক্না আশা তৌরি। মিসন অসিদসু গরবী গুজরাত ভবন্না মরুওইবা থৌদাং লৌগনি হায়বা ঐহাক্না থাজবা থম্লি।

অমুক হন্না ময়াম পুম্নমকপু অনৌবা ভবন অসিগীদমক নুংঙাইবা ফোংদোকচরি, য়াইফ–পাউজেল পীজরি। অমদি মীসন কয়াগী মীওই কয়াসু মফম অসিদা লাকপীবা অসিদা নুংঙাইবা ফাওই।

হন্না–হন্না থাগৎচরি, হন্না–হন্না য়াইফ–পাউজেল পীজরি।