ভারতকী প্রধানমন্ত্রী
নীংতম ইহৌগী অথৌবশিং নীংশিংদুনা, মহাক্কী ১২২শুবা মপোক নুমিৎতা ঙসি লাল কিলাদা প্রধান মন্ত্রী নরেন্দ্র মোদীনা লৈ কৎতুনা ইকায়খুম্নবা উৎখি অমসুং নেতাজী সুভাষ চন্দ্র বোস ম্যুজম হাংদোকখি।
মহাক্না নেতাজী সুভাষ চন্দ্র বোস অমসুং ইন্দিয়ন নেস্নেল আর্মীগী ম্যুজম য়েংখি। প্রধান মন্ত্রীনা হায়খি, মহাক্কী মপোক নুমিৎতা ঐনা নেতাজী সুভাষ চন্দ্র বোসতা কোক নোঞ্জরি। মহাক অসি ভারত নীংতম্নবা অমসুং চিংলেম্না হিংনবা মশামক কৎথোকখিবা লুচিংবা অমনি। মহাক্না পামজরম্বশিং মপুংফাহন্নবা ঐখোয়না থবক ওইনা পায়খৎলি অমসুং মপাঙ্গল কনবা ভারত অমা শেমগৎলি। মহাক্না হায়খি, ফক্লাংশিং অসিদা পুৱারীগী ৱারী কয়া খোন্থাং য়ৈরি। বিল্দিং অসিদা ভারত ইমাগী থৌনা ফরবা মচাশিং কর্নেল প্রেম সাহগাল, র্কনেল গুরবাখস অমসুং মেজোর জেনেরেল সাহ নৱাজ লোইলম লৈঙাক্কী লৈঙাকপশিংনা ৱায়েনখি। নেতাজী সুভাষ চন্দ্র বোস অমসুং আই এন এগী ৱারীশিং উৎপা ফোতোশিং মহাক্না য়েংখি। নেতাজী অমসুং আই এন এগা মরি লৈনবা পোৎলমশিং হায়বদি নেতাজীনা শীজিন্নরম্বা থাং, মেদলশিং, বেজশিং অমসুং আই এন এগী য়ুনিফোর্মশিং প্রধান মন্ত্রীনা য়েংখি।
য়াদ-ই-জাল্লিয়ান ম্যুজমদা উৎলিবা জাল্লিয়ানৱালা বার্গ মীহাৎকী ফোতোশিং, অয়েকপা লাইশিং অমসুং পাউচেশিংগী ক্লিপ্পিংশিং প্রধান মন্ত্রী মোদীনা য়েংখি। ম্যুজম অদুনা ১৯১৯গী জাল্লিয়ানৱালা বার্গ মীহাৎকী থৌদোকশিং অমসুং মালেমগী অহানবা লাঞ্জাওদা ভারতকী লান্মীশিংনা কৎথোকখিবশিং অদু উৎনবা হোৎনরি ।
মহাক্না ১৮৫৭দা থোকখিবা ভারতকী অহানবা নীংতম লানগী ম্যুজম য়েংখি অমসুং মতম অদুদা ভারতমচা কয়ানা থৱায় কৎখিবগী পুৱারীগী ৱারীশিং অদু য়েংখি। হায়রিবা ম্যুজমশিং অসিদা ঐখোয়গী নীংতম লান্মীশিংনা থৱায় থাখিবা অদু উৎলি।
মফম অদুদা দ্রিস্যকলা ম্যুজমনা শীন্দুনা পাংথোকপা ভারতকী আর্তকী একজিবিসন অমা প্রধান মন্ত্রীনা য়েংখি। মহাক্না হায়খি, গুরুদেব তেগোরগী লাইশিং দ্রিস্যকলা অসিদা উবা ফংবা অসি আর্ত পামজবশিংগী অপেনবনি। ঐখোয় পুম্নমক্না গুরুদেব তেগোর অসি মমিং লৈরবা অইবা অমা ওইনা খঙনৈ অদুবু মহাক অসি আর্তকা অকনবা মরিসু লৈনৈ। থিম কয়াদা মহাক্না লাই কয়া য়েকলমখি। গুরুদেবগী লাইশিং অসি মালেমগী ওইনসু উৎলে। মহাক্না তুইত তৌখি ‘ আর্ত পামজবশিংনা দ্রিস্যকলাদা চৎনবা ঐনা হায়রি। মফম অদুদা ভারতকী আর্তকী অমসুং কলচরগী খ্বাইগী ফজবশিং উবা ফংগনি। ভারতকী মমিং লৈরবা আর্তিস্তশিং হায়বদি রাজা রবি ভরমা, গুরুদেব তগোর, অমরিতা সের-গিল, অবানিন্দ্রানাথ তেগোর, নন্দলাল বোস, গাগানেন্দ্রনাথ তেগোর, সাইলোজ মুখরজী অমসুং জামিনী রেগী লাইশিং লৈরি।
ম্যুজম হৌদোকপা অদুদা প্রধান মন্ত্রীনা হায়খি, ভারতকী ইনাক খুল্লবা কলা অমসুং পুৱারীগা মরি লৈনবা ম্যুজম অমা হাংদোকপা অসি য়াম্না নুংঙাই। হায়রিবা ম্যুজম অহুম অসি ক্রান্তি মন্দির হায়না মমিং থোল্লে। মসিদা নেতাজী সুভাষ চন্দ্র বোসকী ম্যুজম, য়াদ-ই-জাল্লিয়ান ম্যুজম, ১৮৫৭গী ভারতকী অহানবা নীংতম লানগী ম্যুজম অমসুং ভারতকী আর্তকী দ্রিস্যকলা ম্যুজম য়াওরি, মসিদা সেঞ্জুরি অহুমগী কলাগী পোৎথোক ৪৫০ হেন্না উৎলি।
ক্রান্তি মন্দির অসি ঐখোয়গী নীংতম লান্মীশিং অমসুং য়াওল লান্মীশিংগী থৌনা ফবা অদুদা ইকায়খুম্নবা উৎপা অমনি। রিবপ্লিক দে মমাংদা হায়রিবা ম্যুজমশিং অসিনা ঐখোয়গী হৌখ্রবা পুৱারীশিংগা ঐখোয়গী নহারোলশিং অমসুং মরৈবাক নীংবা নাগরিকশিংগা অচেৎপা মরি লৈহনবা ঙমগনি।
