ভারতকী প্রধানমন্ত্রী

শরুক য়াবীরিবা শক্নাইরবশিং অমদি মশিং য়াম্না লেংবীরক্লিবা ঐহাক্কী নুংশিজরবা জনকপুরগী ইচল–ইচে অমসুং ইচিল–ইনাওশিং–

জয় সিয়ারাম, জয় সিয়ারাম,

জয় সিয়ারাম, জয় সিয়ারাম,

জয় সিয়ারাম, জয় সিয়ারাম।

ইচল–ইচে অমসুং ইচিল–ইনাওশিং,

২০১৪গী ওগস্ত থাদা প্রধান মন্ত্রী ওইনা ঐহাক্না অহানবা নেপালদা লাকখিবা মতম অদুদা অথুবা মতমদা জনকপুরদা লাক্কনি হায়না ঐহাক্না ফোংদোকখি। অথুবা মতমদা লাকপা ঙমখিদবা অদুগীদমক অহানবা মক্তদা ময়ামগী মফমদা ঙাকপীনবা হায়জরি। অদুবু পুক্নীংদদি ফাওরি মদুদি ঙসি একাদসিগী নুমিৎ অসিদা ইমা সীতানা থৌজানবীরে। মতম কয়াগী মমাংদগী ঐহাক্না নিংথৌ জনক্কী কোনুং অমদি জগৎকী মমা সীতাগী শেংলবা লমদম অসিদা লাক্তুনা মখোয়গী মফমদা ইকোক নোঞ্জবা পামজখি। ঙসি জানকী মন্দির উবা ফংজবা অসিনা চহি কয়াদগী নীংজরকপা অদু মপুং ফাবা ফংজরে।

ইচল–ইচে অমসুং ইচিল–ইনাওশিং,

ভারত অমসুং নেপাল অসি লৈবাক অনি ওইজরবসু ঐখোয়গী মরূপ ওইবগী মরি অসি ঙসি ঙরাংগী নত্তে ত্রেতা য়ুগকী মতমদগীনি। নিংথৌ জনক অমসুং নিংথৌ দশরথনা জনকপুর অমসুং অয়োধ্যা খক্তা নত্তনা ভারত অমসুং নেপালবু মরূপ ওইবগী অচেৎপা মরি অদুনা পুনশিনখি। কিশি অদুদি রাম–সীতাগী ওইবা কিশি অদুনি।

মহাভারত, রমায়নগী মতমদা জনকপুরগী, মহাভারতকী মতমদা বিরাতনগরগী, মদুগী মতুংদা সিমরন গঞ্জকী, বুদ্ধগী মতমদা লুম্বিনী; অসিগুম্লবা মরি অসি য়ুগ কয়া কয়াদগী চত্থদুনা লাক্লি।

ঐখোয়গী ইমাসু অমত্তনি– ঐখোয়না থাজরিবা অদুসু অমত্তনি; ঐখোয়গী মহৌশাগী ফিভমসু অমত্তনি–ঐখোয়গী সংস্কৃতিসু অমত্তনি; ঐখোয়গী লম্বীসু অমত্তনি– ঐখোয়গী নীংজরিবসু অমত্তনি। ঐখোয়গী অৱা নুংঙাইসু অমত্তনি– ঐখোয়না মায়োক্নরিবসু অমত্তনি। ঐখোয়না পাম্লিবসু অমত্তনি অমদি ঐখোয়গী লম্বীসু অমত্তনি। ঐখোয়গী পন্থুংসু অমা খক্তনি। নেপাল য়াওদনা ভারতকী পুৱারী মপুং ফাদে, নেপাল য়াওদনা ঐখোয়গী রামসু মপুং ফাদে।   

ইচল–ইচে অমসুং ইচিল–ইনাওশিং,

নিংথৌ জনক অমদি মীয়ামগী য়াইফনবা পাউজেল অদু পুরদুনা ঙসিদি নেপাল অমসুং ভারতনা মাংলোমদা চংশিল্লি। অদোমগী নেপাল অমসুং ভারতকী মরি অসি রাজনিতী, দিপ্লোমেসী, মদুগী মথক্তা দেবনিতীনা পুন্দুনা থম্লি। মীয়াম অমসুং সরকারশিংদি লাক্কনি চৎখিগনি অদুবু ঐখোয়গী মরি অসিদি মতম পুম্নমক্তা মুৎনাইদনা লৈরগনি। মতম অসি ঐখোয় অমত্তা ওইনা পুন্দুনা চৎন–লোনচৎ, মহৈ মশিং, তংদু লৈতাবা, ঙাক–শেল, ৱাৎত–পাদবা মঙা অসি ঙাক্তুনা থম্নবা মতম্নি। ভারত অমসুং নেপালগী মরূপ ওইবগী মওং মতৌ অদু রামচরিতমানসতগী ঐখোয়না খংবা ঙম্মি।

জে ন মিত্র দুঃখ হোহিং দুখারী।

তিনহহি বিলোকোত পাতক ভারী॥

নিজ দুঃখ গিরি সম রজ করি জানা।

মিত্রক দুঃখ রজ মেরু সমানা॥

হায়বদি মরূপকী অৱাবা মতমদা ৱাদবা মীওই অদু উরুবা খক্তদা পাপ পোকই। মরম অদুনা অদোমগী অৱাবা পোৎলুম অদু চিংজাউগুম চাউরবসু মদুদা পুক্নীং য়াম্না চংলুগনু, অদুবু মরূপকী অৱাবা অদু উফুলগুম খজিক্তমক ওইবা তারবসু মদু চিংজাউগুম খন্দুনা পাংথোকপা য়াবা খুদিংমক পাংথোক্কদবনি।

মরূপশিং,

ইতিহাসনা সাখিনি মদুদি অমনা অমগী অৱাবা তারকপা মতমদা ভারত অমসুং নেপাল অনিমক্না অমত্তা ওইনা লেপখি। অরুবা তানফম খুদিংমক্তা ঐখোয়না অমত্তা ওইনা চৎমিন্নখি। চহি কয়াদগী ভারতনা নেপালগী চাউখৎ খোংথাংদা শরুক য়ারি। নেপালনা ঐখোয়গী নৈবরহুদ ফর্স্ত পোলিসীদা খ্বাইদগী মাংদা লৈরি।

ঙসি ভারত অসি মালেমগী খ্বাইদগী চাউবা অহুমশুবা ইকোনোমী ওইবগী মায়কৈদা খুমাং চাউনা চংশিল্লিবনা অদোমগী নেপালসু চাউখৎ মায়কৈদা খোংজেল য়াংনা চংশিল্লি। ঙসিদি পার্তনরশিপ অসি অনৌবা থাক অমা পীনবগীদমক নেপালদা লাকচনবগী তাঞ্জা অমা ঐহাক্না ফংজরে।

ইচল–ইচে অমসুং ইচিল–ইনাওশিং,

দিবেলপমেন্তকীদমক অহানবদা তৌদবা য়াদবদি দেমোক্রেসীনি। অদোম্না দেমোক্রেসীগী থৌওং অসিবু চেৎশিনহল্লিবা অসিদা ঐহাক নুংঙাইবা ফাওই। ইকুই কুইদ্রিঙৈ মমাংদা মফম অসিদা মীখল পাংথোকখি। অদোম্না অনৌবা সরকার অমা খনখি। চহি অমগী মনুংদা তাঙ্কক অহুমদা মীখল মায় পাক্না পাংথোকহনখিবদা ময়াম্বু নুংঙাইবা ফোংদোকচরি। 

চহি তরাগী মমাংদা নেপালগী নহারোলশিংনা নোংমৈ মরু থাদোক্তুনা বেলোতকী লম্বী খনখি। লানফমদগী বুদ্ধ ফাওবা অহোংবা পুরকপা অসিগীদমকসু ঐহাক্না নেপালগী মীয়াম্বু থাগৎপা ফোংদোকচরি।

মরূপশিং,

ইকুই কুইদ্রিঙৈ মমাংদা ইকায় খুম্নজরিবা নেপালগী প্রধান মন্ত্রী শ্রীমান ওলীবু দিল্লীদা তরাম্না ওকচনবগী তাঞ্জা অমা ঐহাক্না ফংজখি। নেপালগীদমক মহাক্না য়েংলিবা মীৎয়েং অদু খঙজনবগী তাঞ্জা ফংজখি। ওলীজীনা চাউখৎপা নেপাল, নুংঙাই য়াইফবা নেপালগী মঙলান শাগৎলি। ভারতনা মতম পুম্নমক্তা নেপালগী চাউখৎপা অমসুং নুংঙাইবা পাম্লি। প্রধান মন্ত্রী ওলীগী মীৎয়েং অসি মপুং ফাবা ওইরসনু হায়না ভারত মচা কোতি চামগা কুনমঙাগী মায়কৈদগী য়াইফ-পাওজেল পীজরি।

ভারত্তা ঐখোয়গী সরকারনা সবকা সাথ- সবকা বিকাস হায়বা মমল য়াম্লবা মন্ত্র অসি পুরদুনা মাংলোমদা চংশিল্লি। খুন্নাইগী শরুক অমা ফাওবা, লৈবাক্কী মফম অমা ফাওবা দিবেলপমেন্তগী চিত্থদনবা লেপ্পা লৈতনা হোৎনরি। নোংপোক, নোংচুপ, অৱাং, খা; মায়কৈ খুদিংদা দিবেলপমেন্তকী খোংজং চংশিল্লি। হৌজিক ফাওবা দিবেলপমেন্তকী মঙাল ফংদ্রিবা মফমশিং অদুদা ঐখোয়গী সরকার অসিনা অখন্ননা মীৎয়েং চংলি। মসিগী মনুং চন্না পুর্বানচল হায়বদি নেপালগগী ঙমখৈগা থংনরিবা অৱাং ভারত্তা অখন্নবা মীৎয়েং থম্লি। য়ু.পি.দগী হৌরগা বিহার ফাওবা, অৱাং নোংপোক, নোংচুপ বেঙ্গলদগী হৌরগা উরিশা ফাওবা, মফমশিং অসি লৈবাক্কী অতৈ মফমশিংগা চাং মান্ননা লেপচবা ঙমজনবা ঐখোয়না খোংথাং পায়খৎলি। লমদমশিং অসিদা পায়খৎলিবা থবক পুম্নমক অসিগী কান্নবা অদু য়ুম্লোন্নবা অমা ওইবনা নেপালনা খ্বাইদগী য়াম্না শোয়দনা ফংগনি।

জনকপুরগী ইচল–ইচে অমসুং ইচিল–ইনাওশিং, ভারত্তা ঐখোয়না অচৌবা ৱারেপ অমা লৌরে, ৱারেপ অদুদি ন্যু ইন্দিয়ানি। ২০২২দা ভারতনা নীংখা তম্বা ফংখিবা চহি ৭৫ মপুং ফারনি। মতম অদু ফাওবদা ভারত মচা কোতি চামগা কুনমঙানা ন্যু ইন্দিয়া শেম্নবা পান্দম থম্লি। ঐখোয়না লাইরবদগী লাইরবা মীওই ফাওবা য়াইফনবা চপ মান্নবা তাঞ্জা ফংগদবা অনৌবা ভারত অমা শেমগৎলি। মদুদা থাক মান্নদবা, অচৌ মচা, অনেম অৱাংগী মফম লৈরোই, পুম্নমক চপ মান্নরগনি। মদুদা অঙাংশিংবু মহৈ মশিং, নহাশিংবু শেন্দাল লম্বী অমসুং অহলশিংদা হিদাক লাংথক ফংহল্লগনি।

মরূপশিং, ঐখোয়না অমনা অমগী য়ুমদা তোয়না চৎথোক চৎশিন তৌদুনা লৈবা মতমদা মরূপ ওইবগী মরি হেন্না চেৎশিলহল্লি। নেপালগী প্রধান মন্ত্রীগী ভারত খোংচৎ হেক লোয়খিবগা ময়ামগী মরক্তা মফম অসিদা লাকপগী তাঞ্জা ফংজবা অসিদা ঐহাক নুংঙাইবা ফাওই। মফম অসিদা ঐহাক তোয়না লাক্লিবা অসুম্না লৈবাক অনিগী প্রজাশিংসু অথিংবা য়াওদনা চৎথোক চৎশিন তৌবা মথৌ তাই। ঐখোয় হাইৱেনা শম্নহনবা তাই, ঐখোয় ইনফোর্মেশন ৱেজ হায়বদি আই–ৱেজনা শম্নহনবা তাই, ঐখোয় ত্রান্স ৱেজ হায়বদি মৈগী লাইন্না শম্নহনবা তাই, ঐখোয় রেলৱেনসু শম্নহনবা তাই, ঐখোয় কস্তম চেক পোস্তকসু শম্নহনবা তাই, ঐখোয় নোংথক্কী লম্বীনসু শম্নহনবা তাই। ঐখোয় ইনলেন্দ ৱাতর ৱেজনসু শম্নহনবা তাই, ঈশিং লম্বীনসু শম্নহনগদবনি। ঈশিং ওইগেরা, কংফাল ওইগেরা, নোংথক ওইগেরা নত্রগা শুন্দ্রং ওইগেরা, ঐখোয় শম্নহনবা তাই। মীয়ামগী মরক্তা লৈনরিবা মরি হেন্না পাকথোক চাউথোকহন্নবা হেন্না চেৎশিলহন্নবগীদমক কনেক্তিবিতী মরু ওই।

ঙসিমক প্রধান মন্ত্রী ওলীজীগা লোয়ননা ঐহাক্না জনকপুরদগী অয়োধ্যাগী মরক্তা বস সর্বিস হৌদোক্লে। হৌখিবা থাদা প্রধান মন্ত্রী ওলীজী অমসুং ঐহাক্না বীরগঞ্জদা অহানবা ইন্তিগ্রেতেদ চেক পোস্ত হৌদোকখ্রে। পোস্ত অসি মপুং ফানা মথৌ তৌরবা মতমদা ঙমখৈদা ললোন ইতিক হেন্না লাইথোকহল্লগনি। জয়নগর–জনকপুর রেলৱে লাইন্দসু খুমাং চাউশিন্না থবক চত্থরি।

ইচল–ইচে অমসুং ইচিল–ইনাওশিং,

চহি অসিগী লোইশিল্লকপা ফাওবদা লাইন অসি মপুং ফানা লোইশিন্নবা হোৎলরি। রেল লাইন অসি মপুং ফানা লোইশিল্লবা মতমদা নেপাল–ভারতকী পাক চাউরবা নেতৱর্ক্তা রেল নেতৱর্কসু য়াওরগনি। হৌজিক ঐখোয়না বিহারগী রকসৌলদগী হৌরগা কাথমান্দুবু ভারতকা শম্নহন্নবা থবক খুমাং চাউনা চংশিল্লি। মসিদসু নত্তনা ঐখোয়না ঈশিং লম্বীদসু ভারত অমসুং নেপাল শম্নহন্নবা হোৎনরি। নেপালগী ঈশিং লম্বী অসি ভারতকী ঈশিং লম্বীগী খুত্থাংদা সমুদ্রগসু শম্নহল্লগনি। ঈশিং লম্বী অসিনা নেপালদা শাবা পোত্থোক মালেমগী লৈবাকশিংদা লাইনা য়ৌহনবা য়ারগনি। মসিনা নেপালদা ইন্দস্ত্রী লিংখত্তুনা থবক ফংহন্নবা অনৌবা তাঞ্জা অমা পীরগনি।

ইচল–ইচে অমসুং ইচিল–ইনাওশিং,

ঙসিগী য়ুগ অসিদা তেক্নোলোজী য়াওদনা দিবেলপমেন্ত পুরকপা ওইথোক্তে। ভারত স্পেস তেক্নোলোজীদা মালেমগী মাংজিল থারিবা লৈবাক মঙাগী মনুং চল্লি। অদোম্না নীংশিংবীরমগনি, ঐহাক্না অহানবা ওইনা নেপালদা লাকখিবা মতম অদুদা হায়খি মদুদি ভারতনা নেপালগুম্বা য়ুম্লোন্নবশিংগীদমক সেতেলাইৎ অমা থাগৎকনি। মমাং চহিদা ঐহাক্কী ৱাশক অদু থবক ওইনা পাংথোকখ্রে। মমাং চহিদা থাগৎখিবা সাউথ এসিয়া সেতেলাইৎনা ঙসিদি মপুং ফানা মথৌ তোরি অমদি মদুগী কান্নবা নেপালনা মপুং ফানা ফংলি।   

ইচল–ইচে অমসুং ইচিল–ইনাওশিং,

ভারত অমসুং নেপালগী দিবেলপমেন্তকীদমক তি মঙাগী লম্বিদা ঐখোয় খোং থাংজিল্লি। অহানবা তি অদুদি ত্রেদিসন্নি, অনিশুবা তি অদুদি ত্রেদনি, অহুমশুবা তি অদুদি তুরিজম্নি, মরিশুবা তি অদুদি তেক্নোলোজীনি অমসুং মঙাশুবা তি অদুদি ত্রান্সপোর্তনি।

মরূপশিং, সংস্কৃতিগা লোয়ননা ভারত অমসুং নেপালগী মরক্তা ললোন ইতিক্কী মরিসু মরুওইবা অমা ওইরি। মৈ পুথোকপগী লমদা নেপাল খুমাং চাউনা চংশিল্লি। ঙসি ভারত্তগী চাউরাক্না মৈ মেগাৱাৎ ৪৫০ নেপালদা সপ্লাই তৌরি, মসিগীদমক ঐখোয়না অনৌবা ত্রান্সমিসন লাইনশিং তিংলে।

মরূপশিং, ২০১৪দা নেপালগী সংবিধান সভাদা ত্রক্কী মহুৎ পাইপ লাইন শিজিন্নদুনা থাও পুরক্নবা ঐহাক্না থমখিবা ৱাফম অদু থবক ওইনা পাংথোক্নবা ঐখোয়না মোতীহারী–অমলেখ গঞ্জ ওইল পাইপ লাইনগী থবকশু পায়খৎপা হৌরে।

ইচল–ইচে অমসুং ইচিল–ইনাওশিং,

ঐখোয়গী চাকচা ইথক অমসুং ৱাঙাং শঙাংদা মান্নবা কয়া অমা লৈরি। ভারত্তা মৈথিলী ঙাংবা মীশিংগী চাং অদুমক নেপালদসু লৈরি। মৈথিলীগী কলা, সংস্কৃতি অমসুং সভ্যতা মালেমগী থাক্তা শক্ন-শোন্নরি। লৈবাক অনিমক্না মৈথিলী চাউখৎনবগীদমক অমত্তা ওইনা পুল্লগা হোৎনবা মতমদা লোন অসি হেন্না চাউখৎপগী ওইথোকপা অদু হেন্না লায়থোকহল্লগনি। মফম অসিদা মৈথিলী ঙাংবা মীশিং য়াম্না লৈরিবা অসুম্না ভারত্তা নেপালী ঙাংবা মীশিং য়াম্না লৈরি। নেপালী লোনগী সহিত্যবু অনুবাদ তৌবদসু পুক্নীং থৌগৎনবা হোৎনরি। ময়ামদা হায়জনিংবদি নেপালগী লোন অসিসু ভারতকী সংবিধান্না শকখঙলবা লোনশিংগী মরক্তা অমা ওইরি। 

ইচল–ইচে অমসুং ইচিল–ইনাওশিং,

ঐখোয়গী পার্তনরশিপ অসি মখা তানা চত্থবা য়াবা হিরম অমসু লৈরি। ভারতকী প্রজাশিংনা লু নানবগী অচৌবা খোংথাং অমা পায়খৎলে। বিহার অমসুং য়ুমলোন্নবা রাজ্যশিংদা লৈরিবা মরি–মতাশিংগী নাক্তা চৎপা মতমদা তাবা উবা ফংলমগনি মদুদি শুপ্নগী চহি অহুম মরিগী মনুংদা ভারতকী খুঙ্গংশিংদা লমহাং তুমাংদা খোংহাম–খুৎহাম তৌবা চাদা ৮০ হন্থরে। ভারতকী স্কুল খুদিংদা নুপীমচাশিংগী তোঙানবা তোইলেৎ থম্লে। লু নানবা ভারত অমসুং লু নানবা গঙ্গাগী মতৌগুম জনকপুরগী পুৱারীগা শগোন্নরবা ধর্মগী মফমশিং লু নান্না থম্নবা খোংজং মায় পাক্না চংশিল্লিবা অদুগীদমক ময়াম পুম্নমক অমসুং মেয়রবু থাগৎপা ফোংদোকচরি। 

স্বচ্ছ জনকপুরগী খোংজংবু মাংলোমদা পুখৎপগীদমক ঐহাক্না অখন্ননা মফম অসিগী মেয়রগী মফমদা নুংঙাইবা ফোংদোকপা পাম্লি, মহাক্কী মপাংশিংগী মফমদা নুংঙাইবা ফোংদোকপা পাম্লি, মফম অসিগী নহারোলশিংগী মফমদা, মফম অসিগী এম এল এশিং অমসুং পর্লিয়ামেন্তরিয়ানশিংগী মফমদা নুংঙাইবা ফোংদোকপা পাম্লি।

অমুক হন্না ইকায় খুম্নজরিবা নেপালগী প্রধান মন্ত্রী ওলীজীবু, রাজ্য সরকারবু, নগর সরকার অমসুং মফম অসিগী প্রজা মীয়াম্বু অমুক্কা হন্না থাগৎচরি।

জয় সিয়ারাম। জয় সিয়ারাম।