ভারতকী প্রধানমন্ত্রী

মন্ত্রীমন্দলগী ঐগী মরুপশিং, ইসরো অমসুং স্পেস সেক্তরগী সাইন্তিস্তশিং অমসুং ইঞ্জিনিয়ারশিং, অমসুং ঐগী নুংশিরবা ইরৈচাশিং!

নেসনেল স্পেস দে থৌরমদা মীয়ামদা ঐগী য়াইফ পাউজেল পীজরি। চহি অসিগী নেসনেল স্পেস দেগী থিমদি ‘অর্য়াভত্তদগী গগানয়ান ফাওবা: থৱায়নগী লৌশিংদগী মপান নাইদ্রবা ওইথোকপশিং ফাওবা’ হায়বনি। মসিদা ভারতকী পুৱারি অমসুং লৈবাক অসিগী তুংগীদমক লৌরিবা ৱারেপ অনিমক্ত থম্লিবা থাজবশিং য়াওরে। ঙসি, ঐখোয়না তেনখ্রবা মতম অমদা, নেসনেল স্পেস দে থৌরম অসি ঐখোয়গী নহারোলশিং ইথিল পীবা অমসুং হরাওবা থৌরম অমা ওইরক্লে। মসি তশেংনা লৈবাক অসিগী চাউথোক্নবগী মচাক অমনি। নেসনেল স্পেস দে থৌরমদা স্পেস সেক্তরগা মরী লৈনবশিং- সাইন্তিস্তশিং অমসুং নহারোলশিংদা ঐনা য়াইফ পাউজেল পীজরি। হন্দক ভারতনা য়ুম্বু ওইদুনা এষ্ট্রোনোমি অমসুং এষ্ট্রোফিসিক্সকী ইন্তরনেসনেল ওলেম্পিয়াদ পাংথোকখ্রে। মসিদা লৈবাক ৬০ হেনবগী নহারোল ৩০০ রোম্না শরুক য়াখি। থৌরম অসিদা শরুক য়াখিবা ভারমচা কয়া মনা কয়া ফংলে। ওলেম্পিয়াদ অসি স্পেস সেক্তরনা ভারতনা মালেমগী মাঙজিল থারকপগী খুদম অমনি।

মরুপশিং,

নহারোলশিং মখা তানা স্পেস সেক্তরদা থৱায় য়াওনা শরুক য়াবদা ঐ হরাওই। ইসরোনা ইন্দিয়ান স্পেস হেক্কাথোন অমসুং রোবোতিক্স চেলেঞ্জগুম্বা থবকশিং পায়খৎলে। হায়রিবা চাংদম্নবশিং অসিদা শরুক য়ারিবা মহৈরোয়শিং অমসুং মাইপাক্লবশিংদা ঐনা থাগৎপা ফোঙদোকচরি।

মরুপশিং,

স্পেস সেক্তরদা, অমগী মথংদা অমা মাইপাক্তুনা হৌজিক ভারত অমসুং মসিগী সাইন্তিস্তশিংগী চৎনবী অমা ওইরক্লে। চহি অনিগী মমাংদা, থাগী খা মেরুদা য়ৌবা অহানবা লৈবাক ভারতনা ওইদুনা পুৱারি শেমখ্রে। স্পেসতা দোক্কিং-অনদোক্কিং ঙম্বা মালেমগী মরিশুবা লৈবাক ভারতনা ওইরে। ইন্তরনেসনেল স্পেস ষ্টেসন্দা ভারতকী ফিরাল পাইহনখিবা গ্রুপ কেপ্তেন সুভান্সু সুক্লা, ঐনা নুমিৎ হুমনিগী মমাঙদা উনখ্রে। গ্রুপ কেপ্তেন সুভান্সু সুক্লানা মহাক্কী মফমদা মচু অহুমগী ফিরাল উৎপদা, মদুদা ফাওখিবা অদু ৱাহৈশিংনা ফোঙদোকপা ঙম্লোই। ঐনা গ্রুপ কেপ্তেন সুভান্সু সুক্লাগা ৱারি শানবদা, অনৌবা ভারতকী নহারোলশিংগী মপানা নাইদ্রবা থৌনা অমসুং লোম্বা নাইদ্রবা মঙলানশিং ঐনা উবা ফংখি। মঙলানশিং অদু মঙফাওনবা ঙম্নবা, “এষ্ট্রোনোত পুল” অমা শেমগৎনবা ভারতনা থৌরাং তৌরি। নেসনেল স্পেস দে অসিদা, নহারোলশিং পুল অসিদা শরুক য়ানবা ঐনা হায়জরি অমসুং ভারতকী অনিংবশিং থুংহন্নবা মতেং পাংগদবনি।

মরুপশিং,

ঙসি সেমি-ক্রাইয়োজেনিক ইঞ্জিনশিং অমসুং ইলেক্ত্রিক প্রোপুলসনগুমবা অনৌবা তেক্নোলোজিশিংদা ভারতনা য়াংনা চাউখৎলক্লি। য়াম্না য়াংনা, ঐখোয়গী সাইন্তিস্তশিংনা কৎথোকপগা লোয়ননা হোৎনবদগী, ভারতনা অথুবা মতমদা গগানয়ান মিসন থাগৎলগনি অমসুং তুংদা লৈবাক অসিগী মশাগী স্পেস ষ্টেসন শারগনি। ভারতনা মাঙজৌননা থা অমসুং মার্স য়ৌখ্রে অমসুং হৌজিক অমুক সুন্দ্রংগী অরাপ্পা মফমশিং থিজিনগদবনি। থিজিনবা ঙমদ্রিবা মফমশিং অসিদা মীওইবা খুন্নাইগী তুংলমচৎকী মরুওইবা অরোনবশিং লৈরি। গেলেক্সিশিংগী ৱাংমদা ঐখোয়গী পনখৈ লৈরি!

মরুপশিং,

লোইবা নাইদবা স্পেসকী ঙমখৈ অসিনা পন্থুং খুদিংমক অরোইবা নত্তে হায়বা ঐখোয়দা নিংশিংহল্লে। মরম অদুনা স্পেস সেক্তরদা থৌশিলগী মতাংদা অরোইবা হায়বা লৈতে হায়না ঐনা থাজৈ। মরম অদুনা ঐনা লাল কিলাদগী হায়খিবনি মদুদি ভারতকী লম্বীদি রিফোর্ম, পরফোর্ম অমসুং ত্রান্সফোর্মগী লম্বীনি। হৌখিবা চহি ১১ দা, স্পেস সেক্তরদা লৈবাক অসিনা অচৌবা অওনবা কয়া পুরকখ্রে। স্পেস সেক্তর অসি অথিংবা কয়া থম্বা মতম অমা লৈরমখি। হৌজিক অথিংবশিং অদু লৌথোক্লে। লনাই কাংবু স্পেস-তেক্লোলোজিদা শরুক য়াবগী অয়াবা পীরে। স্পেস তেক্নোলোজিদা ইন্নোবেসন অমসুং খোঙজেল য়াংখৎগী ইঞ্জিনশিং ওইনা ষ্টার্দঅপ ৩৫০ হেন্না লৈরে অমসুং ঙসিগী থৌরম অসিদা মখোয় থৱায় য়াওনা শরুক য়ারি। লনাই কাংবুনা শাবা অহানবা পি.এস.এল.ভি রেক্কেত অথুবা মতমদা থাগৎলগনি। ভারতকী অহানবা লনাই কম্মুনিকেসন সেতেল্লাইত শেমগৎলিবা অসিদা ঐ হরাওই। পব্লিক-প্রাইভেত পার্তনরশিপকী মখাদা আর্থ ওবজার্বেসন সেতেল্লাইত কন্সতেল্লেসন অমা থাগৎনবা থবক পায়খৎলি। স্পেস সেক্তরদা ভারতকী নহারোলশিংগী মশিং য়াম্না খুদোংচাবশিং লৈরিবা অদু অদোম খন্দুনা য়েংউ।

মরুপশিং,

ওগষ্ট ১৫,২০২৫ দা লাল কিলাদা, ঐনা ভারত হিরম খুদিংমক্ত অত্মনির্ভর ওইবা য়াম্না মরুওই হায়না ফোঙদোকখি। হিরম খুদিংমক মশাগী পান্দমশিং ফংনবা ঐনা খঙহনখি। ঙসি নেসনেল স্পেস দে অসিদা ভারতকী স্পেস ষ্টার্দঅপশিংদা ঐনা হায়নিংলি: মথং চহি ৫ দা ঐখোয়না স্পেসক সেক্তরদা য়ুনিকোর্ন মঙা শেমগৎপা ঙমগদরা? হৌজিক ভারতনা লৈবাক অসিদগী চহি অমদা অচৌবা লঞ্চ ৫-৬ উবা ফংলে। ভারতনা মথং চহি ৫ দা চহি খুদিংগী রোক্কেত ৫০ থাগৎনবা লনাই কাংবু শরুক য়াবা ঐনা পাম্মী। চয়োল অমদা অমা! পান্দম অসি ফংনবা সরকারগী থৌনা অমসুং অচেৎপা ফিরেপ লৈরে। স্পেসকী থবক খুদিংমক্ত সরকারনা মখোয়গীদমক লেংদনা লেপকনি হায়না ঐনা থাজবা পীরি। 

মরুপশিং,

ভারতনা স্পেস তেক্নোলোজি অসি সাইন্তিফিক ওইনা থিজিন্নবগী খুৎলায় অমা ওইনা উবত নত্তনা হিংবদা লাইনবা পাম্বৈ অমা ওইনা উরি। স্পেস তেক্নোলোজি অসি ভারত্ত লৈবাক ঙাকপগী শরুক অমা ওইরক্লে- মসি ক্রোপ ইন্সুরেন্স স্কিমশিং সেতেল্লাইতনা য়েংশিনবা, সেতেল্লাইতনা ঙামশিংদা পাউ পীবা অমসুং অশোই-অঙাম থোকহন্দবা, অমাং-অতা থেংনবগী থবকশিং নত্ত্রগা পি.এম গাতি শক্তি নেসনেল মাষ্টর প্লানদা জিওস্পাসিএল দেতা শীজিন্নবগী ওইবা য়াই। স্পেসতা ভারতনা চাউখৎলকপা অসিনা হৌজিক মীচম মীয়ামগী পুন্সি হিংবদা লাইহনবদা হকথেংননা মতেং পাংলে। মাইকৈ অসিদা, কেন্দ্র সরকার অমসুং রাজ্য সরকারশিংদা মখা তানা স্পেস তেক্নোলোজি শীজিন্নবা পুক্নিং থৌগৎনবা ঙরাং নেসনেল মীত ২.০ পাংথোকখ্রে। অসিগুম্বা থবক অসি মখা তানা পাংথোকপা ঐনা পাম্মী। স্পেস ষ্টার্দঅপশিংনা সরকারগী থবকশিংদা পান্দম থমদুনা অনৌবা পাম্বৈশিং অমসুং অনৌবা থবকশিং পুথোক্নবা ঐনা তকশিল্লি। তুংদা ভারতকী স্পেসকী খোঙচৎশিং অনৌবা থাকশিং য়ৌগনি হায়না ঐনা থাজৈ। থাজবা অসিগা লোয়ননা, ঐনা অমুক হন্না নেসনেল স্পেস দে লাকপদা মীয়ামদা ঐগী য়াইফ পাউজেল পীজরি।

***