ভারতকী প্রধানমন্ত্রী

বাবা তারকনাথনা য়াইফরে!

হর হর মহাদেব!

ফম্বাক্ত লেংশিল্লিবা রাজ্যপাল আর.এন রবি জি, রাজ্য অসিগী মীয়ামগী চীফ মিনিষ্টর সুবেন্দু অধিকারি জি, অতোপ্পা শক্নাইরবশিং অমসুং বেঙ্গলগী ঐগী ইনাওশিং অমসুং ইচলশিং।

বাবা তারকনাথ অমসুং পশ্চিমবঙ্গ দিবসকী পুৱারি ওইরবা নুমিৎ অসিদা, শেংলবা বেঙ্গল লমদম অসিদা অমসুং ঙসি অদোম মশিং য়াম্না শরুক য়ারি, মীখল অমসুং ৱাশকপা লোইখ্রবা মতুংদা অহানবা ওইনা অদোমগী মরক্ত তিনবগী খুদোংচাবা অমা ঐনা ফংলে। বেঙ্গলদা অনৌবা নুংশিৎ অমা শীৎলে, পোৎশক খুদিংমক্তগী অনৌবা মনম অমা থোক্লক্লে। হৌজিক বেঙ্গল য়োৎকী চেনশিংদগী নান্থোক্লে। বেঙ্গলগী হান্নগী মিংচৎ অমুক হঞ্জিন্নবা থবক পায়খৎপা হৌরে। ঙসি হৌদোক্লিবা থৌরমশিং অসিনা অনৌবা তুংলমচৎ অমা শেমগৎনবা ঐখোয়গী বেঙ্গলগী খোঙচৎ হৌরে হায়বা তাক্লে। বেঙ্গলগী মীয়ামগী মাইথোঙ মকা লাম্লে, খুঙ্গং খুদিংমক্ত হরাওবা অমসুং থাজবা লৈরে। অদোমগী হরাওবদা শরুক য়ানবা ঐ লাকপনি। অদোমগী ভোৎ অমা, মীখল অমনা, অসুক্কী মতিক অহোংবা পুরকপা ঙম্মী, মদু বেঙ্গলদা ময়েক শেংনা উবা ফংলে।

পোরিবোর্তন ভালো লাগছে তো?

থৌরম অসিদা, পশ্চিমবঙ্গ দিবস থৌরমদা লৈবাক অসিগী মীওই খুদিংমক অমসুং বেঙ্গলগী মীয়ামদা ঐনা ঐগী য়াইফ পাউজেল পীজরি।

মরুপশিং,

“শ্বাচ্ছতা সে শ্বাগৎ” কী অদোমগী থবক ঐনা থাগৎপা পাম্মী অমসুং তরাম্না ওকচরি। লু-নানবা অসি অদোমগী নুমিৎ খুদিংগী পুন্সিগী তৎনবা য়াদ্রবা শরুক অমা ওইহনগদবনি। লু-নানবা মফমদা, চাউখৎ-থৌরাং হেন্না ফজনা লংগনি। লু-নানবগা লোয়ননা তরাম্না ওকপগীদমক ঐনা অদোম থাগৎপা ফোঙদোকচরি।

মরুপশিং,

চহি অসিগী পশ্চিমবঙ্গ দিবসকী নুমিৎ অসিনা অমুক্কা হেন্না অখন্নবা ওইরে। নিংতম্লবা মতুংদা, বেঙ্গলগী অফবা তুংলমচৎকীদদমক মঙ মঙখি, বেঙ্গলগী শক্নাইরবশিংগী মঙলান ওইখি- ঙসিদি অহানবা ওইনা, পশ্চিমবঙ্গ দিবসতা মঙলানশিং অদু থবক ওইনা পাংথোকপা ঐখোয়না উরে। পুৱারি ওইরবা নুমিৎ অসি বেঙ্গল চাউখৎনবা ইথিল অমা ওইরসনু, ঐখোয়না অনৌবা অমসুং অফবা পুৱারি অমা শেম্বা ওইরসনু। ঙসি, বি.জে.পি-এন.দি.এ সরকারগী মখাদা, পান্দম অসিগীদমক চাউখৎ-থৌরাংগী অচৌবা খোঙজং অমা হৌরে।

মরুপশিং,

চহি কয়া, অহানবদা লেফনা অমসুং মথংদা তি.এম.সিনা বেঙ্গলদা অরুবা কোম কয়া তৌখি। হায়রিবা কোমশিং অদু ফুঞ্জিন্নবা, য়াম্না য়াংবা খোঙজেলদা দবল ইঞ্জিন সরকারনা থবক পায়খৎপা হৌরে। ঙসি মফম অসিদা লুপা করোর কয়াগী চাউখৎ-থৌরাংগী প্রোজেকশিং শঙ্গারে অমসুং উরেপ-উয়ুং তম্লে। রেল, লম্বী, লৌউ-শিংউ, ঙা য়োকপগী প্রোজেকশিংনা বেঙ্গলগী চাউখৎপদা অনৌবা ইনোৎ পীরগনি। মখোয়না রাজ্য অসিগী খুঙ্গংগী শেন্মিৎলোন ফগৎহনগনি। প্রোজেকশিং অসিগীদমক ঐনা বেঙ্গলগী মীয়ামদা হরাওবা ফোঙদোকচরি। ঙসি, পি.এম কিষান সম্মান নিধিগী ২৩শুবা ইন্সতোলমেন্তসু থাদোক্লে। লৈবাক শীনবা থুংবগী লৌমী করোর ৯ হেনবগী বেঙ্ক একাউন্তশিংদা লুপা করোর ১৯,০০০ রোম হকথেংননা হাপচিনখ্রে। কান্নবা ফংলবা লৌমী ইমুংশিংদা ঐনা ঐগী য়াইফ পাউজেল পীজরি।

মরুপশিং,

মীনাই ওইরিঙৈ মতম মনুংদা, বেঙ্গলনা অৱাবা কয়া মায়োক্নখি, মশিং থিঙমদ্রবা থৱায় কয়া কৎখি অমসুং মনা-মথুম কয়া হন্দোকখি। ১৯৪৬ দা কোলকাতদা হিংশা থোকখি, নাওখালিদা ইরাং থোকখি- মরাল লৈজদ্রবা বেঙ্গলগী মীচম মীয়াম কয়া, বেঙ্গলগী মীওই কয়া থৱায় মাঙখি।

ইনাওশিং অমসুং ইচলশিং,

বেঙ্গল ইমু-নাইমু তাবা থেংনখি, বেঙ্গল মশাগী লম মাঙখি, মশাগী মমা লৈবাক শেগাইবা বেঙ্গলনা উখি। অদুবু বেঙ্গলনা মসিগী শক্তম মাঙখিদে। মদুগী ফল ওইনা, ভারত্তগী বেঙ্গল শীনবা থুংনা তোখায় তানবা লৌতুনরকপা মতমদা, নোংচুপ বেঙ্গল শেমদুনা মখোয়গী থৌরাং অদু মাইপাকহনখিদে। চহি লিশিং কয়াগী সভেত্য অমসুং নাৎ, অচেৎপা থাজবা অমসুং চৎনবীশিং, লান্থেং কয়াগী মতুংদা হিংখি। ঙসিসু, হায়রিবা গুনশিং অমসুং চৎনবীশিং নোংচুপ বেঙ্গলদা ঙাক-শেন্দুনা থম্বা খক নত্তনা, মখোয় হিংলি অমসুং চঙ চঙ  লাওরি। মরম অদুনা পশ্চিমবঙ্গ দিবস পাংথোকপা অসি, ঐখোয়না ইচম চম্না নুমিৎ অমা নিংশিংবা নত্তে, ঐখোয়না অপুনবা পুৱারি অমা নিংশিংলি। বেঙ্গলগী চহি লিশিং কয়াগী হেরিতেচদা ঐখোয়না ইকায়খুম্নবা উৎলি।

মরুপশিং,

পশ্চিমবঙ্গ দিবসকী মরুওইবা ঙসিগী মীরোলদা হঞ্জিন হঞ্জিন খঙহনবা দরকার ওই। মতম অদুদা করি থোকখিবগে হায়বা নহারোলশিংনা খঙগদবনি। বেঙ্গল পুম্নমক পাকিস্তানগী শরুক অমা ওইনবা হোৎনরকপা মতমদা, লৌতুনরিবা মীওইশিংগী মমাংদা কংগ্রেসনা কোক নোনখি। মতম অদুদা থবক অদুগী মায়োক্ত দোক্তর শ্যামা প্রসাদ মুকর্জিনা লাউখি। এপ্রিল ১৯৪৭ দা, মহাক্না পুৱারি ওইরবা ৱারেপ অমা লৌখি। বেঙ্গল শীনবা থুংনা পাকিস্তানগী শরুক অমা ওইরোইদবনি হায়না মহাক্না লাউথোকখি। মসিগীদমক, দোক্তর শ্যামা প্রসাদ মুকর্জিনা লুচিংদুনা বেঙ্গলি হিন্দু হোমলেন্দ ইহৌ হৌদোকখি। সাইন্তিষ্ট মেঘনাদ সাহ, পুৱারি নৈনবা আর.সি মজুমদার অমসুং জাদুনাথ সরকার, লোলগী ওজা সুনিতি কুমার চেত্তরজিগুম্বা শক্নাইরবশিং অমসুং বেঙ্গলগী শক্নাইরবা মীওই কয়া ইহৌ অসিদা শরুক য়াখি। জি.দি বিরলাগুম্বা ওন্ত্রেপ্রেন্যুরশিংনা মসি মাঙলোমদা পুখৎখি। মাতুৱা লুচিংবা পি.আর থাকুরনা মসি শৌগৎখি। পাউচেশিংদা আর্তিকলশিং ইখি, ৱারিশিং ফোঙখি, বন্দে মাতরমগী থৌনা অমুক হিঙ্গৎলকখি। তোখায় তাবগী পান্দমশিংনা নমহৎখ্রবা বেঙ্গলগী খোঞ্জেল, মীয়ামগী ইহৌগী খুৎথাংদা অমুক হৌগৎলকখি। ফল অমা ওইনা, ভারত্তগী বেঙ্গল শীনবা থুংনা খায়দোকপা ঙম্লোই হায়বা ভারতকী মায়োক্ত লৈরিবশিংনা খঙখি। মতৌ অসুম্না, নোংচুপ বেঙ্গল ইমা ভারতকা লৈমিন্নখি।

মরুপশিং,

নিংতগম্বা মতমদা লৈখিবা নোংচুপ বেঙ্গলগী থৌনা অদু নিংতম্লবা মতুংদা মাঙলোমদা পুখৎকদবনি। লাইবক থিবদি, ওন্ন-তৈনবা থোকখি। পশ্চিমবঙ্গ দিবস অমসুং মসিগী অশেংবা ৱাহন্থোক কাউথোক্নবা হোৎনখি। রাজনিতিগী পান্দমশিংগীদমক, পুৱারি মুৎথৎখি।

ইনাওশিং অমসুং ইচলশিং,

লৈবাক অনি থোক্না খায়দোকপা মতমদা, বেঙ্গল পীথোকখিবা কংগ্রেসনা পামখি। লৈবাক খায়দোক্নরবা মতুংদা, নোংচুপ বেঙ্গল লেমহৌরবা মতুংদা ফাওবা, দল অসিনা অতোপ্পা পেনহল্লবা শান্নবা হৌরকখি। নোংচুপ বেঙ্গলগী পুৱারি নমশিনখি। মরম অদুনা শ্যাম প্রসাদ মুকর্জি জন শঙঘ লিংখৎপা মীওই অমা ওইরকখি, মহাক্না পাংথোকখিবা থবক মীরাইখি। বেঙ্গলগীদমক মহাক্না হোৎনখিবা থবক খুদিংমক মখা তানা খুৎ থাখি। গুরদেব রবিন্দ্রনাথ তেগোর, বঙ্কিমচন্দ্র চট্টোপাধ্যায়, স্বামী বিবেকানন্দ, নেতাজি সুভাস চন্দ্র বোস অমসুং ঈশ্বরচন্দ্র বিদ্যাসাগর পোক্লিবা মফম অসিদা, মপান লৈবাক্কী ৱাখল্লোনশিং নমদুনা পুশিল্লকখি। অহানবদা কংগ্রেস, মথংদা লেফ অমসুং তি.এম.সি- চহি কয়া, নোংচুপ বেঙ্গল য়োকখৎপা অমসুং মপাঙ্গল কনখৎহনবগী মহুত্ত, রাজ্য অসি আইন্না য়াদনা চঙলকপা মীওইশিংগী মফম অমা ওইহনখি। ভারতকী চাউখৎপদা মাঙজিল থাগদবা বেঙ্গলনা মাংলোমদা চঙশিনবগী মহুত্ত মনিংদা লৈহৌখি।                                 

মরুপশিং,

পশ্চিমবঙ্গ দিবসদা, পুৱারিগী অরানবশিং অমুক হন্না থোকহন্দনবা ৱাশক অমা লৌবা হায়বসি ঐখোয়গী থৌদাংনি। পশ্চিমবঙ্গ দিবসতগী ইথিল ফংদুনা, অনৌবা পুৱারি অমা ইরগনি।

মরুপশিং,

চহি কয়া অরানবা লৈঙাক লৈরকপদগী নোংচুপ বেঙ্গলনা মাইল কয়া মনিংদা লৈহৌবনি। মমাঙগী সরকারশিংগী মখাদা কমদৌনা ফিবমশিং শোকপগে হায়বা অদোম উরে। অচৌবা উদ্যোগশিং চেনখি, অপীকপা ললোন-ইতিকশিং তুখি, নহারোলশিং থবক মুনখি অমসুং নারোন্দা চঙলকপা মীওইশিংনা কান্নবশিং লৌখি। মতম অমদা খুদোংচাবশিংগী মফম অমা ওইরম্বা বেঙ্গল অদু খুল হোংখিবগী মফম অমা ওইখি। ফিবম অসিদা, অদোম্না ৱাশক অমা শকখি, তি.এম.সি সরকারনা ইন্থুনবা। সিত মশিং য়াম্না কাহন্দুনা অদোমনা বি.জে.পিদা থৌজাল পীখি অমসুং কমদৌনা বেঙ্গলদা খুদক্ত ফলশিং ফংবগে হায়বা ঙসিদি লৈবাক শীনবা থুংনা উরে। চহি কয়া মৎতুনা লাকখিবা অদোমগী হকশিং অদু হৌজিক অদোমগী থোঙজিলদা থুংলরে। মীখল মনুংদা, অয়ুস্মান ভারত স্কিমগী ঐনা অদোমদা থাজবা পীখি। হৌজিক, বেঙ্গলদা লায়রবা মীওই খুদিংমক মসিগী কান্নবা ফংলগনি। ইমুং খুদিংমক্ত অফবা ঈশিং ফংহন্নবা, জল জিবন মিসনগী মখাদা নোংচুপ বেঙ্গল সরকার অমসুং কেন্দ্র সরকারগী মরক্ত এম.ও.য়ু অমা খুৎয়েক পীনরে। থবক চঙবগী চহি কোমথোক্কনি হায়না মীখল মনুংদা            ঐখোয়না বেঙ্গলগী নহারোলশিংদা ৱাশকখি- হায়রিবা ৱাশক অদু ঙাক্লে। নুপীশিং লেম্না বস তোংহন্নবা ৱাশক অদুসু ঙাক্লে।

মরুপশিং,

চহি কয়া, রাজনিতিগী য়েংথিনবনা স্কিক কয়া পন্দুনা লৈহনখি। ঙসিদি অথিংবা খুদিংমক নমখায়রে, জন কলয়ান সিবিরশিংগী খুৎথাংদা, সরকারগী স্কিম খুদিংমক অদোমগী মনাক্ত য়ৌরক্লে। ময়াই চাবী অমতা লৈতে, অথিংবা লৈতে- অদোমগী হকশিং, বেঙ্গল চাউখৎপা অমসুং বেঙ্গল অমসুং লৈবাক অসিগী সেকুরিতি খক্তদা মীৎয়েং চঙলি। অদোম উরে, মমাংগী সরকারশিংনা চহি কয়া ঙমখৈগী শম্বল খানবা লম পীদনা লৈরকখি- অনৌবা সরকার হেক শেম্বগা, মসিগী থবক হৌরে।

ইনাওশিং অমসুং ইচলশিং,

নোংচুপ বেঙ্গলদা উদ্যোগ চাউখৎনবা য়ুম্ফম থোনবা অমুক হৌরকপদা ঐ হরাওই। য়ুম্ফম অসি মরুওইবা য়ুম্বী অনি- পুকচেল শেংবা অমসুং অরোন-অথুপ লৈতবা লৈঙাক অমসুং নিয়মগী মতুংইন্না থবক তৌবগী মথক্ত তোংলি। নোংচুপ বেঙ্গল খক নত্তনা, ঙসিদি লৈবাক শীনবা থুংনা অহোংবা লাকপা উরে। অদোম শগুন তৌখিবা মীওইশিংনা হৌজিক মখোয় মশানা হুরানখিবা শেনফমশিং হঞ্জিল্লক্লে। অচৌবা হুরানবশিং জেলদা থাজিল্লে। সিন্দিকেত মেম্বরশিংনা মীয়ামদা হায়জরে। তোল গেতশিংদা শেন মুনবা হুরানবশিং চেনখ্রে। অথিংবা অমতা লৈতনা বেঙ্গলগী মীয়াম চৎথোক-চৎশিন তৌরে। ইখোন কাতমানি  সেস, কজ সুরু হোয়ে গেছে।

মরুপশিং,

ফত্তবা লম্বীশিং অমসুং অমনবা ইনফ্রাষ্ট্রকচরশিংগা লোয়ননা অৱাবা থেংনরকখিবা বেঙ্গলনা হৌজিক পন্দুনা লৈরকপা প্রোজেকশিং য়াংনা পায়খৎপা উরে। পন্দুনা লাকপা কোলকাতা মেত্রোগী ওরেঞ্জ লাইন চিনগ্রিঘাতা ক্রোসিংদা লোইশিল্লে। হাওরাদা, লুপা করোর ১০০ রোমগী অনৌবা দিবিজনেল রেলৱে হোস্পিতাল অমা শানবা উরেপ-উয়ুং তম্লে। মসিনা অরুবা লাইনাশিং লাইয়েংনবা অমসুং খুদক্তগী অনাবশিং লাইয়েংনবা খুদোংচাবা পীগনি। ইষ্ট মেদিনাপুরদা, হৌর অমসুং রাধামোহানপুরগী মরক্ত রোদ ওভরব্রিজগুম্বা প্রোজেকশিং অমসুং শঙ্করাইল–সান্ত্রাগাছি লিঙ্ক লাইন্না মীয়ামদা খুদোংচাহল্লে।

মরুপশিং,

ঙসি, লৈবাক শীনবা থুংবগী লৌমী করোর ৯ হেনবগী বেঙ্ক একাউন্তশিংদা পি.এম সম্মান নিধিগী মখাদা শেন হাপচিনখ্রে। নোংচুপ বেঙ্গলগী লৌমীশিংগী অতোপ্পা নুংঙাইবা লাউথোকপা অমা লৈরে-ঙসিদগী, রাজ্য অসিদা পি.এম ক্রোপ ইন্সুরেন্স স্কিম হৌদোক্লগনি। স্কিম অসিনা অৱাবা তারবা মতমদা লৌমীশিংগী ইমুংশিংদা মতেং পাংগনি। করিগুম্বা মহৈ-মরোংশিং মাঙলবদি লৌমীশিংনা পোৎলুম পুররোই।

মরুপশিং,

হৌজিক নোংচুপ বেঙ্গলসু দিজিতেল এগ্রিকলচরেল মিসন শরুক য়ারে। এগ্রি-ষ্টেক্কী খুৎথাংদা, লৌমীশিংগী রেজিষ্ট্রি অমা শেমগনি। খুঙ্গংগী মেপশিং অমসুং মহৈ-মরোংগী ই-পাউ দিজিতেল ওইনা ফংহনগনি। হার লৈবা, লৌমীশিংগী ক্রেদিৎ কার্দশিং, দি.বি.তি অমসুং এম.এস.পিদা লৈবগী থবকশিং হেন্না লাইরগনি।

মরুপশিং,

লৌউ-শিংউদা খ্বাইদগী শোৎথবা জিলাশিংগী ফিবম ফগৎনবা, সরকারনা পি.এম ধন-ধন্যা কৃষি য়োজনা হৌদোক্লে। নোংচুপ বেঙ্গলগী জিলা মরি- পুরুলিয়া, দর্জিলিং, অলিপুরদুৱার অমসুং ঝারগ্রাম য়াওরে। পোৎথোক হেনগৎনবা থবক পায়খৎকনি, মহৈ-মরোংশিং থম্ফম শাগনি অমসুং লৌমীশিংদা য়াম্না লাইনা লোনশিং ফংহনগনি। নোংচুপ বেঙ্গলদা, ঙা য়োকপগা লৌমীশিং, ঙামীশিং অমসুং ললোনবশিংগা শম্নরে। মরম অদুনা, সাউথ ২৪ পরগানাসতা ফ্রাসেরগঞ্জ ফিসিং হর্বরগী থবক পাকথোক-চাউথোক্লে। বিরভুমদা অনৌবা ঙাগী কৈথেল অমসু শারে। হৌজিক বেঙ্গল লেপ্লরোই- একবার বাংলা থাম্বে না, একোন ইতিহাস গোরবে।

মরুপশিং,

ঙসিদি, তোঙান তোঙানবা রাজ্যশিংগী চীফ মিনিষ্টরশিং, রাজ্যপালশিং অমসুং মিনিষ্টরশিংগা লোয়ননা, লৈবাক অসিগী লৌমী করোর কয়া থৌরম অসিদা শরুক য়ারে। মফম খুদিংমক্কী লৌমীশিং থৌরম অসি শরুক য়ারি। লৌমীশিং অসি পি.এম কিষান সম্মান নিধিগী বেনিফিসরিশিংনি। ঐগী লৌমী ইনাওশিং অমসুং ইচলশিংদা, ঐনা থম্মোয় শেংনা হায়জরি। পুক্নিং চঙনা তাবীয়ু।

ঐগী খুৎ লোন্নদুনা অদোমদা ঐনা হায়জরি- ঐখোয়না ঐখোয়গী অঙাংশিংদা শীজিন্নবা য়াদ্রবা লৌবুকশিং পীরম্লোইদবনি, ঐখোয়না মখোয়দা লৈহাও লৈরবা লৌবুকশিং পীরমগদবনি। ঐখোয়না ঐখোয়গী মালেম ইমা কনগদবনি। ভারত সরকারনা “লৌবুক কনসি” খোঙজং পায়খৎলি। মসিদা লৈবাক লৈহাও ঙাক-শেন্নবা, কেমিকেলগী হার শীজিন্নবা হন্থহন্নবা অমসুং মহৌশাগী ওইবা লৌউ-শিংউগী থবক পায়খৎনবা তকশিল্লি। খোঙজং অসি শরুক য়ানবা ঐনা অদোমদা হায়জরি, অদোমগী লৌবুকশিং কন্নবা ৱাশক অমা শকপীয়ু, চপ মান্নবা থবকশিং পাংথোক্নবা অনকপগী লৌমীশিংদা ইথিল পীয়ু অমসুং অপুনবা ওইনা মালেম ইমা ঙাক-শেনসি। মহাক ঐখোয়গী ইমানি- কেমিকেলশিংনা মহাক হাৎতুনা ঐখোয় পাপ লংশিল্লোইসি। ঐখোয়না ঐখোয়গী মালেম ইমা কনগদবনি।

মরুপশিং,

২০৪৭ দা বিকসিত ভারত অমা ওইনবা ভারতনা থবক পায়খৎলি। ৱাশক অসিগী খ্বাইদগী চাউবা য়ুম্ফমদি নোংপোক ভারত চাউখৎহনবনি। মসিগীদমক, মিসন পুরভোদয়াদা ঐখোয় থবক পায়খৎলি। মসিদা নোংচুপ বেঙ্গলগী থৌদাং য়াম্না মরুওই। নোংচুপ বেঙ্গল চাউখৎপনা নোংপোক ভারত চাউখৎপা য়াংখৎহনগনি।

ইনাওশিং অমসুং ইচলশিং,

চাউখৎপগী খোঙজং অসিদা, থবক অমা ঐখোয়না নিংশিংগদবনি-অহানবা ফিবমনা চাউখৎপনি, মসিদা ঐখোয়না শান্তি, পুন্না নুংশিন্না হিংমিন্নবা অমসুং খুন্নাইগী তুংদু-লৈতাবা কাউরোইদবনি। ঐখোয়না নোংচুপ বেঙ্গলগী নাৎকী শক্তম অমসুং খুন্নাইগী অপুনবা মপাঙ্গল কনখৎহনগদবনি। ঐখোয় অমতা ওইনা মাঙলোমদা চঙশিনগদবনি।

মরুপশিং,

হয়েং, লৈবাক অসিদা অমসুং মালেম শীনবা থুংনা মালেমগী য়োগ নুমিৎ পাংথোক্কনি। ঐসু নোংচুপ বেঙ্গলদা য়োগ নুমিৎ শরুক য়াগনি। শ্বামী বিবেকানন্দা অমসুং মহর্ষি অরবিন্দগুম্বা য়োগীশিংগী লমদম অসিনা মালেম অপুম্বা লমজিংনবা পাউজেল অমা পীগনি। নোংচুপ বেঙ্গল শীনবা থুংনা য়োগ নুমিৎ পাংথোকপা ঐনা পাম্মী। য়োগগী নুমিৎ অসিদা, অদোম য়োগ শান্নগদবনি। মসিগী হায়জবা অসিগা লোয়ননা, চাউখৎ-থৌরাংগী প্রোজেকশিংগীদমক ঐনা অমুক হন্না হরাওবা ফোঙদোকচরি। ঙসি ঐখোয়না হরাওনা পশ্চিমবঙ্গ দিবস পাংথোক্লি, অদোমগী ফোনশিং পায়খৎলু অমসুং ফ্লাসলাইতশিং ঙানহল্লু অমসুং ঐখোয় পুন্না পশ্চিমবঙ্গ দিবস হরাওবা ফোঙদোক্লসি। ঐগা লোয়ননা হায়মিন্নসি- ভারত মাতা কি জয়। ভারত মাতা কি জয়। ভারত মাতা কি জয়।

 বন্দে মাতারম।

বন্দে মাতারম।

বন্দে মাতারম।

বন্দে মাতারম।

বন্দে মাতারম।

বন্দে মাতারম।

বন্দে মাতারম।

অদোম থাগৎপা ফোঙদোকচরি।

***