ভারতকী প্রধানমন্ত্রী

খুরুমজরি

কি ওরা ন্যুজিলেন্দ!

চহি ২০ গী মতুংদা, ঐখোয়না ভারতকী মীয়ামগী মরমদা তাদুনা লাকখ্রে। অদুবু ঙসি, চহি ৪০ গী মতুংদা, ভারতকী প্রধান মন্ত্রী অমা ন্যুজিলেন্দা লাক্লে। মসি ঐগী লাইবক ফবনি। ন্যুজিলেন্দমচা খুদিংমক, অদোম ময়ামগী মফমদা ভারতমচা করোর ১৪০গী য়াইফ পাউজেলশিং ঐনা পুরক্লে।

মরুপশিং,

মসি প্রধান মন্ত্রী ওইনা ন্যুজিলেন্দদা লাকপা ঐগী অহানবা খোঙচৎনি। চহি ২৫ নত্ত্রগা ৩০ গী মমাঙদা, ঐনা সরকার পায়বা য়াওদ্রিঙৈ মতমদা, মীয়ামগী পুন্সিদা কনা অমতনা ঐ মশক খঙখিদে, মতম অদুদা ঐ ন্যুজিলেন্দদা লাক্নবগী খুদোংচাবা ফংখি। মতম অদুদা, কনাগুম্বা অমনা ঐঙোন্দা পোৎশক অহুম পীরকখিবা অদু ঐনা ভারত্ত পুরকখি। পোৎশক অমনা মাফলার অসিনি। অমনা তুপী অমসুং অমনা গ্লোবনি। মরমদি মতম অদু অইংবা মতমনি। 

পোৎশকশিং অদুগী মনুংদা অমা ঐনা মফম অসিদা থৌরম অসিদা পুরক্লে। অদোম্না উরিবা মাফলার অসি চহি ২৫-৩০ গী মমাঙদা ন্যুজিলেন্দগী মরুপ অমনা ঐঙোন্দা পীরকখিবনি। ঐনা মসি চহি কয়া শীজিন্নরকখ্রে অমসুং মসি হৌজিক ফাওবা মতু তেক্তনা লৈরি। ঐনা অদোমগী নুংশিবা ফংবগুম্না।

হন্দক ঐনা মফম অসিদা লাকপা অসিদা, মফম অসি য়াম্না ইংলি হায়বা খঙবদগী ঐনা মসি মরুওইনা লৌদুনা পুরক্লে।

মরুপশিং,

ভারত অমসুং ন্যুজিলেন্দগী মরক্ত লৈনরিবা মরীগী মরক্ত নিংশিংবশিং, মরুপ-মপাং ওইবা, গুনশিং অমসুং থাজবা অমা লৈরি। ন্যুজিলেন্দগী ফজরবা চৎনবী অমনা মরী অসি মপুংফানা মশক তাক্লে। মীয়াম চহি চা কয়া শম্নহনখিবা ৱাহৈ অমা মফম অসিদা লৈরে-ৱাকা। ৱাকা অসি শুপ্নগী হি অমগী মমিং নত্তে, ঐখোয়গী শরুক য়ামিন্নরিবা খোঙচৎকী খুদম ৱাকানা ওইরি। ঙসি, ভারত- ন্যুজিলেন্দগী ৱাকা অনৌবা খোঙচৎ অমগী খোঙশান্নবা থৌরাং তৌদুনা লৈরে।

ঐখোয়গী মমাঙদা খুদোংচাবশিংনা থল্লবা অহাংবা সমুদ্র অমা লৈরে, নুংশিৎ ঐখোয়গা লৈমিন্নরি, সমুদ্রগী চাউরবা ইথকশিং ঐখোয়গা লোয়নরি, শংবান্নবা অতিয়াগী খাংবা কনবগী থৌনা ঐখোয়না লৈমিন্নরি, কান্নবা ফংগদবা কয়া মরাংকাইনা লৈরি অমসুং ঐখোয় মাইপাক্কনি হায়বা ঐ খঙলে।

মরুপশিং,

খোঙচৎ অসি মাইপাক্কনি হায়না ঐনা থাজৈ, করিগীনো খঙবরা? মোদীনা নত্তে, মসি অশেংবা হিরোয়শিং ওইরিবা অদোম্না ওইহনবনি। ওকলেন্দগী ৱেলিংতন ফাওবা, খৃষ্টচর্চতগী ক্বিন্সতাউন ফাওবা, ন্যুজিলেন্দগী মফম খুদিংমক্ত লৈরিবা ভারতমচাশিং খোঙচৎ অসিগী হিরোয় অমনি।

মরুপশিং,

ঐ মখা চৎথদ্রিঙৈদা, ঐনা ঐগী মরুপ, প্রধান মন্ত্রী খৃষ্টোফর লক্সন, ন্যুজিলেন্দ সরকারগী ঐগী মরুপশিং অমসুং লেবর পার্তিগী মেম্বরশিং থাগৎপা পাম্মী।

লৈবাক অসিদা ভারত- ন্যুজিলেন্দগী মরী অচৌবা দল অনিনা শৌগৎলি হায়বা মসিনা তাক্লে। কিৱি ইন্দিয়ান কম্মুনিতিগী মাইপাকপশিংদা অদোম্না কয়া য়াম্না মতেং পাংবগে হায়বসু মসিনা উৎলে। কিৱিদা লৈবা ভারতমচাশিংগী থৌরম অসি শরুক য়ানবা মফম অসিদা অদোম লাকপা অসিনা থৌরম অসি হেন্না মশক থোকহল্লে।

ঐখোয় ময়াম তরাম্না ওকপগা লোয়ননা অদোমগী মীনুংশি, থৌজাল অমসুং থৱায় য়াওবগীদমক ঐনা অদোমগী মফমদা তৌবীমল খঙবা উৎচরি।

মতৌ অসুম্না, ইকায়খুম্নরবা, কিৱিশিং ভারতমচাশিংনা য়াম্না পাম্নরি। ভারতকী নিংতম্বা নুমিত্ত খৃস হিপকিন্সগা লোয়ননা অদোম্না দামাদাম মাষ্ট কলান্দর ঈশৈদা জগোয় শাখিবা অদু ভাইরেল চৎখি। অদোমগী জগোয় অদু কিৱিদা লৈরিবা ভারতমচাশিংগী থম্মোয়শিংদা মমি তাখি।

মরুপশিং,

ন্যুজিলেন্দ তশেংনা অঙকপা লৈবাক অমনি। মফম অসিদা শান্তি লৈ, নুংঙাই-য়াইফবা লৈ, মহৌশাগী ফজবা লৈরি, নাৎ লৈরি অমসুং ন্যুজিলেন্দগী অশেংবা মপাঙ্গলদি মফম অসিগী মীয়াম্নি। পামজবা অমগা লোয়ননা লৈবাক অমা মাঙলোমদা চঙশিনবা মতমদা, লৈবাক অদুনা মালেমদা ইথিল পীরি হায়বা ন্যুজিলেন্দমচাশিংনা উৎলে।

লৈবাক অসিদা ভারতমচাশিং, পুকচেল চাউরবা ন্যুজিলেন্দগী মীয়াম্না য়াম্না নুংশিনা কোনশিল্লে, মখোয়গী মঙলানগী শরুক অমা ওইহল্লে। অদোমগী হৈথোই-শিংথোইবা, অদোমগী মীৎয়েং শানবদা মখোয়না থাজবা থম্লি। ঙসি, ন্যুজিলেন্দগী শেন্মিৎলোন নত্ত্রগা খুন্নাই ওইবা য়াই, কিৱি ভারতমচাশিংনা অনৌবা মচুশিং হাপচিল্লে।

ন্যুজিলেন্দ অসি নিখিল রবিসঙ্করনা এর ন্যু জিলেন্দগী সি.ই.ও ওইবা মফমনি। অনন্দ সত্যনন্দনা গভর্নর জেনেরেল ওইবা মফমদা রচিন রবিন্দ্র, ইস সোধি অমসুং ইজাজ পতেলগুম্বা শান্নরোয়শিং ক্রিকেত তিমদা খুদোংচাবা অমা ফংলে।

ন্যুজিলেন্দ অসি লম্বীশিং ফাওবদা ভারতকী সহরশিং ইকায়খুম্নবা মফম অমনি। মফম খরদা উন মফোলশিং তারি। মফম খরদা বোম্বে হিলস লৈরি। মফম খরদা কোরোমন্দেল লৈরি।

কলকাতা ষ্ট্রিৎ, দিল্লি, ক্রিসেন্ত, অমৃতশর ষ্ট্রিৎ, মমিং খর পনসি। মফম অসিদা লৈবদা, অদোম কিৱিগী শরুক অমা ওইরে। হিরম অমগী মতাংদা ৱা ঙাংবা হৌরকপদা নোংজু-নুংশাগী মতাংদা ৱা ঙাংদবা মতম অমতা লৈতে হায়বা ঐ খঙলে।

মরুপশিং,

ঐনা ন্যুজিলেন্দগী লুচিংবশিং উনবা মফম খুদিংদা, মখোয়না অদোম য়াম্না থাগৎখি। থাগৎলিবা অদু অদোমনি, অমসুং ঐগী ফিবম ফগৎখি।

মরুপশিং,

অদোম ময়াম্না খঙলে, মদুদি চহি লিশিং কয়াগী সভ্যতা লৈরিবা ভারতনা ঙসিদি লৈবাক অদুগী অরিবা পোৎলমশিং ঙাক-শেনবগা লোয়ননা অনৌবা থবকশিং পায়খৎলে। যুগ খুদিংমক্ত ভারতনা অহোংবা পুরক্লে অমসুং মসিগী মরমদি, ঐখোয়না তম্নিংবগী লাংতক্নবা লৈবদগীনি।

ভারতনা তম্লিবা অসি অতোপ্পা লৈবাক্কী অপুনবা মীওইশিংগী মরমদা নত্তে, মীয়ামগী য়াইফ থৌরাংগা মরী লৈনবা ৱাফমশিংনি অমসুং মরম অদুনা ঐখোয়না ন্যুজিলেন্দদগী কয়া অমা তম্লে অমসুং হৌজিক ফাওবা তম্লি।

নুপীশিংদা ভোৎ থাদবগী হক পীবা মালেমগী অহানবা লৈবাক ন্যুজিলেন্দনি। পাক-চাউনা ন্যুজিলেন্দ খুন্নাইদা নুপীশিংনা মতেং পাংবা ঙসি ঐখোয়না উরে। নুপীশিংনা লুচিংদুনা চাউখৎপা পুরক্নবা লাইৱাগা লোয়ননা ঙসি ভারতসু নুপীশিংদা খুদোংচাবশিংগী অনৌবা থোঙশিং হাংদোক্লে।

মরুপশিং,

কমদৌনা খুঙ্গংগী শেন্মিৎলোন্না লৈবাক অমগী মরাইবক অহোংবা পুরকপা ঙম্বগে হায়বা ন্যুজিলেন্দনা উৎলে। লৌউ-শিংউগী লমদা অফবা থবক অমা পায়খৎলিবা অসি ন্যুজিলেন্দগী মপাঙ্গলনি। খোঙ্গুল লিবা ঙম্বা, ফুদ সেফতি লৈবা, নিয়মশিং ইন্নবা থবকশিং লৈবা অসি অচৌবা পুক্নিং থৌগৎপা অমনি। মসি ভারতগুম্বা লায়রবা লৌমীশিং লৈবা লৌউ-শিংউগী অচৌবা লৈবাক অমগী অচৌবা পারা অমনি।

লায়রবা লৌমীশিং ফাওবা অচৌবা কৈথেল অমগী ব্রান্দ অমা ওইবা য়াই হায়বা জেসপারি মোদেলগা লোয়ননা ন্যুজিলেন্দনা উৎলে। ন্যুজিলেন্দগী নোংজু-নুংশা ঙাকথোক্নবা লৌউ-শিংউগী অকুপ্পা তেক্নোলোজিদগী ঐখোয়না তম্বা য়াবা তম্লে। 

মরুপশিং,

মফম অসিদা মনুকা খোইহি অসি লিকুইদ গোল্দ হায়না খঙনরি। চৎনবী অমসুং মহাওগী মথক্ত লৈবাক অসিদা খোইহি অসি হকচাং ফনা লৈবগা মরী লৈনরি, ভারতকী অয়ুর্বেদদা খোইহি য়াম্না মরুওই। ভারত্তসু ঐখোয়না খোই লোইবগী মিসন অমা পাংথোক্লি হায়বা খঙবদা অদোম অঙকপা ফাওগনি। মসিনা ভারত্ত খোইহি পুথোকপা শিংথাবা য়ানা হেনগৎহল্লে।

ঙসিদি, হিমালায়গী চীঙজাওশিংদগী পুরকপা খোইহি সনা, দাইমন্দ ওইরে। খোইহি পুথোকপা অমসুং পোৎথোক হেনগৎহনবগী মতাংদা ঐখোয়না ন্যুজিলেন্দদগী তম্বা য়াবা তম্লে হায়বা ঐ খঙলে।

মরুপশিং,

চহি অসিদা ভারত-ন্যুজিলেন্দ শান্নবগী মরীশিং লৈনরকপগী চহি ১০০ শুবা থৌরম পাংথোক্লি। চহি ১০০ গী মমাংদা ঐখোয়গী হোক্কি তিম ন্যুজিলেন্দদা শান্নবা লাকখি। খোঙচৎ অদুদা মেজর ধ্যান চান্দগী ফজরবা মশান্না মফম খুদিংমক্ত ৱারীনখি। মহাক্কী হোক্কিনা ন্যুজিলেন্দমচাশিংগী থম্মোয় শুমহৎখি।

মরুপশিং,

কন্তেন্ত শেম্বশিংগী লোলদা, মসি পুন্না থবক তৌমিন্নবগী চহিনি। ন্যুজিলেন্দ অমসুং ভারতকী শান্ন-খোৎনবসু পুন্না থবক তৌমিন্নরে। খুদম অমদি রগবীনি। ঙাইহাক্কী মমাংদা ওল ব্লেকসনা নুংঙাইরবা রগবী মেতচ অমা থোইখ্রে হায়বা ঐ খঙলে। রগবীগী হিরমদা ভারতনা ন্যুজিলেন্দদগী তম্বা পাম্লি। ভারতসু রগবী শান্নবা হৌরে, মসিগীদমক ঐখোয়না কোচশিং, অখঙ-অহৈশিং দরকার ওইরে, মসিদা ন্যুজিলেন্দনা ঐখোয়দা মতেং য়াম্না পাংগনি। হন্দক ভুবনেশ্বরদা “ন্যুজিলেন্দ রগবী” অমসুং “রগবী ইন্দিয়া”গী কোচিং অমা পাংথোকখিবা অদু অফবা খোঙহৌ অমনি হায়না ঐনা খল্লি।

মরুপশিং,

ঙসি মফম অসিদা লাক্ত্রিঙৈদা, ন্যুজিলেন্দা পাংথোকপা স্পোর্তস ষ্টার্দঅপস থৌরম অমদা ঐ শরুক য়ারুরে। শান্নবগী অনৌবা থবকশিং অমসুং অনৌবা ৱাখল্লোনশিংদা ঐ তশেংনা অঙকপা ফাওহনখি। শান্নবগী তেক্নোলোজিগী লমদা ঐখোয়না থবক কয়া পুন্না পায়খৎমিন্নবা য়াগনি হায়না ঐনা খল্লি।

ভারত অমসুং ন্যুজিলেন্দগী তুংগী ফিবম অমগা অমগা মরী লৈনরি। মসিগী খুদম অমদি, স্পেস সেক্তরনি। ভারতকী মুন রোভর থাগী খা মেরুদা তাবা মতমদা, নুমিৎ অদুদা ন্যুজিলেন্দ শীনবা থুংনা জগোয় শাখি। ঐখোয় খুদিংমক নুমিৎ অদুগীদমক চাউথোকচখি।

হৌজিক ঐনা চাউথোকচনবগী অতোপ্পা মরম অমা অদোমদা হায়গনি। মাইপাকপা অদুদা ন্যুজিলেন্দ তেক্নোলোজিসু চাউনা মতেং পাংখি। থৌরম কয়াদা ন্যুজিলেন্দ স্পেস কম্পেনিগা ঐখোয়না চেৎনা থবক তৌমিন্নরি। পুন্না থবক তৌমিন্নবা অসি মখা চৎথনবা ঐখোয় থবক তৌমিন্নরি।

মরুপশিং,

ভারত অমসুং ন্যুজিলেন্দগী শেন্মিৎলোনশিংনা লৈবাক অমনা অমদা কয়া য়াম্না কান্নবশিং পীনবগে হায়বা উৎপদা স্পেস সেক্তরনা চপ চারে। মসিসু ঐখোয়গী ত্রেদ এগ্রিমেন্তগী পান্দমনি। ত্রেদ এগ্রিমেন্তশিং অসিনা বিকসিত ভারতকী মাইকৈদা চঙশিল্লিবা ঐখোয়গী খোঙচৎ য়াংখৎহনগনি অমসুং ভারত অমসুং ন্যুজিলেন্দ অনিমক্কী ললোন-ইতিকশিংদা অনৌবা খুদোংচাবশিং পীগনি।

মরুপশিং,

ভারত অমসুং ন্যুজিলেন্দগী মরক্ত অতোপ্পা ইকায়খুম্নবা অমা লৈরি। মান্নবশিং অদুদি ঐখোয়গী অরিবা চৎনবীশিং, ঐখোয়গী থায়নগী নাৎ হরাওবা ফোঙদোকপা, মসি ঙাক-শেনবনি। ঙসি ঐনা মাওরি মীয়াম নিংশিংবা পাম্মী।

ঐনা হাকা অসি পর্ফোমেন্স অমা ওইনা উদে। ফুরুপ অমগী ৱাখল্লোন ঐনা হাকাদা উবা ফংলি। মহাক্কী থৌনা, মশানা মশাবু ইকায়খুম্নবা, মহাক্কী মপা-মপুশিং ইকায়খুম্নবা অমসুং অপুনবা খুন্নাইগী অপুনবা শক্তি অমা লৈরি।

মরুপশিং,

মাউরিগী চৎনবীদা ফজরবা ৱাহৈ অমা লৈরি- মানা-কিতঙ্গা। মসিনা হায়রি মদুদি মহাক ইকায়খুম্নবা, মরী লৈনবা অমসুং থৱায় হকচাং য়াওনা মশক শেন্নবনি। ভারত্তসু ঐখোয়না হায়রি ‘অতিথি দেবো ভাবা’।

ৱাহৈশিং মান্নদে, মহৌশাগী অকোয়বগী ফিবম মান্নদে, ফিজেৎ মান্নদে, লোল মান্নদে, অদুবু ৱাখল্লোন্দি চপ মান্নৈ।

মাউরিগী চৎনবীদা ইমু-মনুংগী ফজরবা ৱাহৈ অমা লৈরি- ফানো হায়বদি ইমুং। মসিদা মীরোল কয়া য়াওরি। মরী কয়া য়াওরি। অপুনবা খুন্নাই য়াওরি। ভারত্তসু, ইমুং অমা খক ওইনা লৌদে, খুন্নাইগী অপুনবা অমা ওইনা লৌরি, ঐখোয়গী ওইনা ইমুং অসি মহৈলোয়শঙ অমনি।

মরুপশিং,

মাউরি চৎনবীগী অতোপ্পা ফজরবা ৱাখল অমদি-কাইত্যা কিতাঙ্গা। ঐখোয় মহৌশাগী অকোয়বগী ফিবমগী মপু নত্তে হায়বা মসিনা ঐখোয়দা তম্বীরি। ঐখোয় মহাক ঙাক-শেনবা মীওইশিংনি। মসি ভারত্তসু হায়রি-মালেম ইমা, ঐ মালেম ইমাগী মচানি। মালেম অসি ঐখোয়গী ইমানি। ৱাখল্লোন অসিদা য়ুম্ফম ওইদুনা, ভারত্ত মালেম ইমা কন্নবা এক পের মা কে নাম, নেচরেল ফার্মিং মিসনগুম্বা খোঙজং কয়া ঐখোয়না পাংথোক্লি।

মরুপশিং,

ঐ খঙলে, অদোম কিলোমিতর লিশিং কয়া লাপ্না লৈরবসু, অদোমগী থম্মোয়গী কাচিন অমদা, নোংমগী থবকশিংগী মফম খরদা, ভারতকী মমি তারি, ভারতনা মফম কল্লি। মসি চুম্বরা নত্ত্রগা লানবরা? হকচাংদি মফম অসিদা লৈরি, ৱাখলদি কদাইদা লৈরিবগে? মরম অদুনা, ভারতকী মাইপাকপা খুদিংমক্ত অদোমসু মীৎয়েং অমা থম্লি।

অদোম ক্রিকেত ষ্টদিয়ম অমদা ফম্বা মতমদা, অদোম নুংঙাইতবা কয়া ফাওরমগনি। অদুবু য়ুমদা তি.ভি য়েংবা মতমদা অদোম ফজনা উগনি। মতৌ অসিগুম্না, ভারত্ত থোক্লিবা থৌদোক খুদিংমক অদোমসু খঙলমগনি। মসিনা ঐখোয় অখন্নবা ওইহল্লে।

ভারতমচাশিংনা মখোয়না লৈরিবা মপান লৈবাকশিং চাউখৎহনবদা মতেং পাংলি অমসুং মখোয় মশাগী লৈবাক চাউখৎনবসু হোৎনরি।

মরুপশিং,

ঐখোয়না ঐখোয়গী পোক্নফম লমদমগী কৎথোকপগুম্না ঐখোয়না ঐখোয়গী পোক্নফম লমদম নুংশিরি।

মরুপশিং,

মালেমগী মুক্নবা মরক্ত, ঙসি ভারতনা চাউখৎলকপগী খোঙজেল অসি মমাংদা অমুক্ত ওইখিদ্রি। লৈবাক অসিগী মাইপাকপশিং অমসুং ভারতকী মপাঙ্গল ময়াম অমা ঙসি ঐনা অদোমদা উৎকনি। মসিগী নাচোম অসি অদোমগীদমক ঐনা পুরকপনি। অদোম ফজনবা অমসুং অদোম চাউথোকচবা পোক্নবা নাচোম অসিদগী অদোমগী অপাম্বা লৈ খর অদোম শোইদনা লৌগনি হায়না ঐনা থাজৈ।

অদোম শেম-শারবরা? ঐ নাচোম অমা পীবা য়ারবরা? মসিদা অদোমগী লৈ কদায়দা য়াওবগে, লৈ পুম্নমক অদোমগী ঙাক্তরা হায়বা হৌজিক অদোম্না থিগনি।

মরুপশিং,

ঙসি মালেমদা ভারত খ্বাইদগী য়াংনা চাউখৎলক্লিবা ইকোনোমিনি। ভারত মালেমদা অনিশুবা খ্বাইদগী চাউবা তিকা পুথোকপা লৈবাক্নি। মোবাইল দেতা শীজিন্নবদা মালেমগী মাঙজিল থাবা লৈবাকশিংগী মনুংদা ভারত য়াওরি। ঙসি, ভারত মালেমদা অনিশুবা খ্বাইদগী চাউবা মোবাইল ফোন শাবা লৈবাক ওইরে। ঙসি ভারত মালেমদা অনিশুবা খ্বাইদগী চাউবা তেলিকোমগী কৈথেলনি। ঙসি ভারত মালেমদা অনিশুবা খ্বাইদগী য়াম্না গেহু পুথোকপা লৈবাক ওইরে। ঙসি ভারত মালেমদা শঙ্গোম খ্বাইদগী য়াম্না পুথোকপা লৈবাকনি। ঙসি ভারত মালেমদা অনিশুবা খ্বাইদগী চাউবা ঙা পুথোকপা লৈবাক্নি।

মরুপশিং,

পুম্নমক অসিগী মথক্ত, ঙসি ভারত মালেমদা অহুমশুবা খ্বাইদগী চাউবা ওতোমোবাইল কৈথেল ওইরে। ঙসি ভারত্ত মালেমগী অহুমশুবা খ্বাইদগী চাউবা ষ্টার্দঅপকী থবকশিং লৈরে। ভারতনা অথুবা মতমা মালেমদা অহুমশুবা খ্বাইদগী চাউবা রিন্যুএবল ইনর্জি পুথোকপা লৈবাক ওইনবা শেম-শারে। সোলার ইনর্জি পুথোকপা মালেমগী অচৌবা লৈবাকশিংগী মনুংদা ভারতসু য়াওরে।

মরুপশিং,

ঙসি ভারতনা মালেমদা চাউখৎপগী অনৌবা নমুনাশিংসু পীরি। ঙসি, ভারতনা মাইপাক্না মালেমগী খ্বাইদগী চাউবা দিজিতেল আইদেন্তিদি প্লেতফোর্ম থবক ওইনা পাংথোক্লি। ঙসি, ভারত্ত য়ু.পি.আইগী খুৎথাংদা থা খুদিংগী লুপা করোর কয়াগী দিজিতেল ত্রান্সসেক্সনশিং পাংথোক্লি। ঙসি মালেমগী লৈবাক কয়ানা ভারতকী দিজিতেল পব্লিক ইনফ্রাষ্ট্রকচরদা থৱায় য়াওবা উৎলি। দ্রোন তেক্নোলোজি অমসুং স্পেস ইকোনোমিদা ভারত অনৌবা থাকশিং য়ৌরে।

মরুপশিং,

ন্যুজিলেন্দগুম্না ইকোলোজি অমসুং ইকোনোমি অনিমক্ত কমদৌনা ভারতনা থোং মান্ননা চৎপগে হায়বা উৎপা অনৌবা ভারতকী শক্তমশিং লৈরে।

মরুপশিং,

ভারতকী চাউখৎপগী অতোপ্পা শক্তম অমা লৈরে, মদুদি ঐখোয়গী নাৎ অমসুং চৎনবীশিংনি। ভারতনা লৈবাক অসিগী ইকোনোমি অমসুং ইকোলোজিদা মরুওইনা লৌবগুম্না, লৈবাক অসিনা মসিগী হেরিতেচসু মীৎয়েং চঙলি।

মরুপশিং,

কমদৌনা ভারতনা থবক পায়খৎপগে হায়বগী খুদমদি শ্রী গুরু গ্রান্থ সাহিব জিগী শেংলবা মওং অসিনি। অফগানিস্তান্দা লাল লাকপা মতমদা, মপুংফানা ইকায়খুম্নবা উৎপগা লোয়ননা ঐখোয়না ভারত্ত গুরু গ্রান্থ সাহিবকী শেংলবা মওংশিং পুরকখি।

মরুপশিং,

মীওইবা খুন্নাই শীনবা থুংনা ঐখোয়গী শক্নাইরবা সিখ গুরুশিংনা সেবা, থৌনা, মান্নবা অমসুং মীওইবগী মীনুংশিগী পাউজেল পীরি। মালেমগী মফম শীনবা থুংনা গুরুদ্বারাশিং, মীয়ামগী থবক তৌনবা সেন্তরশিং লৈরি। কনাগুম্বা অমা চাক লাম্লবদি, মহাক চাবা ফংগনি। কনাগুম্বা অমা অৱাবা তারবদি মহাক মতেং ফংগনি।

শ্রী হরমিন্দর সাহিবতা সেবাগীদমক শেন কৎপদা এফ.সি.আর.এগা মরী লৈনবা খুদোংচাদবা খর থোক্লে হায়না সিখ ফুরুপকী ইনাওশিং অমসুং ইচলশিং খরনা ঐখোয়দা খঙহল্লে। ঐখোয়না মখোয়গী খুদোংচাদবশিং খুদক্ত কোকহল্লে।

মরুপশিং,

অদোম ময়াম্না শ্রী হেমকুন্দ সাহিব জিসু খঙলে। হিমালয়গী ৱাংলবা চীঙজাওশিংদা। চহি কয়া উন কুপ্লবা চীঙদোলশিংনা কোইশিন্দুনা লৈখি। কনাগুম্বা অমনা মফম অদুদা লাই খুরুম্বা চৎনিংলবদি লম্বী য়াম্না নুংঙাইরমদে, মফম অদুদা মীওই খর খক চৎলম্মী। মরুওইনা ঐখোয়গী সিখ ইনাওশিং অমসুং ইচলশিং লাই খুরুম্নবা মফম অদুদা চৎখি।

মরুওইনা ঐখোয়গী অহলশিং, ঐখোয়গী সিখ ইনাওশিং অমসুং ইচলশিং মফম অদুদা লাই খুরুম্বা চৎপদা লাইনবা সরকারনা হেমকুন্দ সাহিব ফাওবা রোপৱে অমা শেমগৎলি।

মরুপশিং,

সাহিবজাদাশিংগী থৌনা অমসুং থৱায় কৎখিবা নিংশিংনবা ঐখোয়গী সরকরনা চহি খুদিংগী দিসেম্বর ২৬ দা ‘বীর বাল দিবস’ পাংথোকপা হৌখ্রে। ঙসিদি, নুমিৎ অসি লৈবাক শীনবা থুংবদা ইথিল পীনবা কুহ্মৈ অমা ওইরে। ঙসিদি, কেরলাদগী অসাম ফাওবগী অঙাংশিং ফাওবা সাহিবজাদাশিং অমসুং মাতা গুজরিগী কৎথোকপগী মরমদা খঙলে।

‘বীর বাল দিবস’ না ভারতকী মশিং থিঙমদ্রবা নহারোলশিং অমসুং নহারোলশিংগী থম্মোয়শিংদা অচেৎপা থৌনা পোকহল্লে।

মরুপশিং,

ঐনা শেংলবা মতৈ-মনাও অমগী মতাংদসু হায়গনি। ঐগী সরকারদা মরুপ অমা য়াওরি, হরদিপ পুরি সিংহ। পুরি ইমুংগী মপা-মপুশিং শ্রী গুরু গোবিন্দ সিংহ জিগী ভক্তশিংনি। মহাক্কী ইমুংনা শ্রী গুরু গোবিন্দ সিংহ জি অমসুং মাতা সাহিব কৌর জিগী “জোদে সাহিব” চহি ৩০০ ঙাক-শেন্দুনা লাক্লি হায়না হরদিপ পুরি সিংহনা ঐঙোন্দা হায়খি।

লৈবাক অসি খায়দোকপা মতমদা পুরি সাহিবকী মপা-মপুশিংনা তেক্ত কাইদনা দিল্লিদা পুরকখি। মহাক্কী ইমুংনা শেংলবা “জোদে সাহিব” সিখ শঙ্গত্ত শীন্নখি অমসুং মদুদগী মীওই কয়া উবা ফংখি।

সিখ চৎনবীশিং খঙবা কম্মিতি অমা মতম অদুদা ঐখোয়না শেমখি, ঐখোয়না অখঙ-অহৈশিংগী পাউতাক লৌখি অমসুং শেংলবা জোদে সাহিবশিং অহানবা ওইনা শেংলবা শ্রী গুরু গোবিন্দ সিংহ জি পোকখিবা মফম শ্রী পাত্ন সাহিবতা থম্নবা ঐখোয়না ৱারেপ লৌখি।

হৌজিক শেংলবা জোদে সাহিব অসি পাত্ন সাহিবকী শেংলবা লমদমদা লৈবদা ঐ য়াম্না হরাওই অমসুং শেংলবা থৌরম অদু শরুক য়াবা ফংখিবা ঐগী লাইবক ফবনি। অদোম্না ভারত্ত লাকপা মতমদা পাত্ন সাহিবতা চৎনবা ঐনা অদোমদা হায়জরি।

মরুপশিং,

ঙসি ঐনা মফম অসিদা থাজবা কয়া, নুংশিবা কয়া অমসুং নিংশিংবা থম্লম্লে। ভারতকী প্রধান মন্ত্রী অমনা ন্যুজিলেন্দা লাকপদা চহি ৪০ চঙখি হায়না ঐনা অদোমদা হায়গনি, অদুবু অদোম্না মতম শাংনা ঙাইররোই। হৌজিক মসি চহি ৪০ চঙলরোই, মসি মোদীগী গেরেন্তিনি।

মোদীগী গরেন্তি হায়বগী ৱাহন্থোক্তি, থাজবা অদু থবক ওইনা পাংথোকপনি।

মরুপশিং,

ঐনা অদোমদা করিগুম্বা খর হায়জনিংই। মপান লৈবাক্ত লৈরিবা ভারতমচাশিংগী অঙাংশিংগী অনৌবা চাংয়েং অমা মতম খরগী মমাঙদা ঐখোয়না পাংথোকখ্রে। ভারত মশক খঙবদা অমসুং ভারতকী খেন্নবশিং খঙবদা ঐখোয়গী অঙাংশিংগী মতেং পাংনবা, ঐখোয়না ভারত খঙউ কুইজ হৌদোকখ্রে। মসি চুম্নগী হৌদোকপা খক্তনি অমসুং মদুদা ঐখোয়গী মরুপশিংনা শরুক য়াবদা ঐ য়াম্না হরাওই।

হৌজিক ঐখোয়না থৌরম অসি অৱাংবা তেক্নোলোজিশিংগা লোয়ননা ৬শুবা ইদিসন পাংথোক্লে। হৌজিক এপ্পকী খুৎথাংদা থৌরম কয়া পাংথোক্লি। নহারোলশিং থৌরম অসি শরুক য়ানবা ঐনা হায়জরি। ভারত্ত লাকউ অমসুং ন্যুজিলেন্দগী মীয়ামগা লোয়ননা ভারতকী চৎনবী মশক খঙউ। 

মরুপশিং,

বিকসিত ভারত অমগী মঙাল অমসুং ন্যুজিলেন্দগী নুংঙাই য়াইফবগা লোয়ননা অফবা তুংলমচৎ অমা ঐনা উরে। থাজবা অসিগা লোয়ননা, ময়াম পুম্নমক অমুক হন্না থাগৎপা ফোঙদোকচরি।

প্রধান মন্ত্রী লক্সন অমসুং মহাক্কী কাংবু থাগৎচরি! ন্যুজিলেন্দগী মীয়াম থাগৎচরি!

ঐগা লোয়ননা অমুক হন্না হায়মিন্নসি, ভারত মাতা কি জয়! বন্দে মাতারম!

অদোম থাগৎচরি!

কি ওরা!

***