ভারতকী প্রধানমন্ত্রী

মফম অসিদা লেংশিনবীরিবা ঐগী মন্ত্রীমন্দলগী মরূপশিং, দোক্তর মহেস শর্ম্ম, কিরেন রিজেজু, ইন্তর্নেস্নেল বুদ্ধিস্ত ফাওন্দেসনগী সেক্রেতরী জনরেল দোক্তর ধম্মাপিয়া, লৈবাক অসিগী মফম কয়াদগী লাকপীরিবা মীওইশিং লোইননা ইবুংঙো অমসুং ইবেম্মশিং !

মীওই লিশিং কয়ানা পুনশিল্লগা মন্ত্র থিবা মতমদা পাঙ্গল শেম্বা ঙম্মি হায়না থাজনবা অমা লৈ। মদুগী পাঙ্গল অসি ঙসি ঐখোয়না ফাওরি। ঐখোয়গী মীৎ পাংথোকপা মতমদা ঐখোয় অমগা অমগা উনরি, মসিগা চপ মান্ননা মিকুপ খুদিং ঐখোয়গী ৱাখলদা ভগবান বুদ্ধগী মিং খোন্থাং য়ৈরি।

ভগবান বুদ্ধদা লৈরিবা কৎথোকপা অদু ৱাহৈনা ফোংদোকপা ঙম্লোই।

মন্ত্রশিংনা মীয়াম শুমহৎপগুম, মখোয়সু ভগবান বুদ্ধনা শুমহৎলি। ঙসিগী শেংলবা বুদ্ধ পুর্ণিমা নুমিৎ অসিদা শেংলবা ধর্ম্মগী লুচীংবশিংগী বর ফংনবা ঐ মফম অসিদা য়াওবা ফংজবসি ঐগী লাইবক ফবনি।

মসি ঐগী অনিশুবা খোঙচৎনি হায়না ঙাইহাক্কী মমাংদা মহেস শর্ম্মজী অমসুং কিরেন রিজেজুজীনা হায়বীখ্রে। হৌখিবা চহীদা ঐ মফম অসিদা লাকখি অদুবু মসিগা মান্নবা থৌরম অমা শ্রীলঙ্কাদা বৈসাখকীদমক য়াওখি। ঐনা শ্রীলঙ্কাগী মীয়াম, শ্রীলঙ্কাগী সরকার অমসুং মালেমগী মফম কয়াদগী লাকপা বুদ্ধ ধর্ম্মগী লুচীংবশিংগা লোইননা বুদ্ধ পুর্ণিমা পাংথোক্নবগী খুদোংচাবা অমা ফংজখি।

ঐখোয় অয়াম্বা থবক চিল্লি অমসুং ঐখোয়গী থৌদাং কয়া লৈ। ময়াম অসিগী মরক্ত ঐখোয়না ভগবান বুদ্ধগী মিং শোনদুনা অরান খুভম ফংলি। অদুবু মফম অসিদা লৈরিবা লাইনীংবশিংনা মখোয়গী পুন্সি কৎথোক্তুনা ভগবান বুদ্ধগী নুংশিগী পাউজেল শন্দোক্লি। ভগবান বুদ্ধনা তাক্লম্বা লম্বীদা মখোয়না চৎলি। ঙসিগী থৌরম অসিনা ঐনা মালেম শীনবা থুংনা ভগবান বুদ্ধগী পাউজেল শন্দোকপা মীওইশিংগী মফমদা কোক নোঞ্জরি। লৈবাক্কী মফম কয়াদগী লাকপা মীওইশিংবু ঐনা তরাম্না ওকচরি। মখোয়গী থবকশিংবু মতেং পাংলিবা লুপশিং অমসুং লনাই মীওইশিং তরাম্না ওকচরি। মখোয়গী তুংগী থবকশিংদা য়াইফ-মঙ্গল পীজরি। সর্নাথতা লৈবা সেন্ত্রেল ইন্সতিত্যুৎ ওফ হায়র তিবেতান স্তদিজ অমসুং ওল ইন্দিয়া বিক্ষুক সঙ্ঘ, বৌধ গয়া থাগৎচরি।

মরূপশিং,

ঐখোয়গী ভারত অসিদা মালেমগী মফম অতৈদা ফংদবা মমল নাইদ্রবা চৎন-লোনচৎশিং মরাং কাইনা ফংলি।

চহিচা কয়াগী মমাংদগী গৌতম বুদ্ধগী পোকপা, লাইরিক তম্বা অমসুং মহাপরীনির্বানগী মরমদা হায়নদুনা লাক্লি অমসুং ইদুনা লাকলি। খুদোংথিবা কয়াগী মরক্ত মসিগী শরুক খরা হিংলম্বা অসি মতম অসিগী মীরোলগী লাইবক য়াম্না ফবনি।

ঐখোয়গী লৈহাওদগী থোকখিবা ৱাখল্লোনশিংগী মরুওইবশিং অসি মীওইবগী য়াইফনবা ঙাক্তা ওইবা অসিদা ঐখোয়না চাউথোকচবা পোকই। অনৌবা মতমগী ৱাখল্লোনশিং অসিনা কনাগুম্বা অমগী হক নৎত্রগা ৱাখলদা খুৎ থিংজিন্দবা অসিদা ঐখোয়না চাউথোকচবা পোকই। ঐখোয়না কনাগুম্বা অমগী ধর্ম্ম নৎত্রগা ৱাখল্লোনদা খুৎ থিংজিনদে।

ভারত্তগী হৌখিবা ৱাখল্লোনশিং অসিনা মীওইবা খুন্নাইগী য়াইফনবা থবক তৌবগীদমক ঐখোয়না চাউথোকচবা পোকই। ঐখোয়গী তুংইনবশিং কান্নবা ফংগনি হায়না ঐখোয়না কৈদৌঙৈদা হায়খিদে। ভগবান বুদ্ধগী ৱাখল্লোন্না অনৌবা ৱাখল পোকহনবা খক নত্তনা ঙসিদি মহাক্কী ৱাখল্লোনশিংনা এসিয়াগী লৈবাক কয়াগী জাতিগী মশক তাকলি।

মরূপশিং,

মসি লমদম অসিগী অখন্নবনি। কনাগুম্বা লৈবাক অমগী মথক্তা ভারতনা কৈদৌঙৈদা খুৎ থিংজিন্দে হায়বসি ঐখোয়গী লৈবাক্কী অমসুং ভারত মচা খুদিংগী চাউথোকচবনি। চহী লিশিং কয়াগী মমাংদগী হৌনা ঐখোয়গী লৈবাক্না লম্বী অসিদা চৎতুনা লাকলি।

মরূপশিং,

সিদ্ধার্থতগী গৌতম বুদ্ধ ওইরকখিবগী ৱারী অসি নিরভানা ফংলকপগী ৱারী নত্তে। মসি মীওইবগী অৱা-অনাদগী ঙাকথোক্নবা অচুম্বা থিবগী ৱারীনি অমসুং সিদ্ধার্থতগী বুদ্ধ ওইরকপগী ৱারী অদুনি। লৌশিং ফংনবা লম্বী অদুদা মহাক্না চৎখি।

বুদ্ধ পুর্ণিমাগী থৌরম অসিদা, ঐখোয়না মিকুপ খুদিং মীগী অৱাবা খঙবা অমসুং মচিন-মনাও ওইবগী ৱাখল্লোনশিং অদু নীংশিংহল্লি। তেরোরিজম, রেসিজম অমসুং সেপরেতিজম্না বুদ্ধগী পাউতাক অদু অমুবা লৈচিলনা কুপশিনখ্রবা মতুংদা, মীগী অৱাবা খঙবা অমসুং মচিন-মনাও ওইবগী ৱাখল্লোনশিং অদু মরি লৈনরি অমসুং থাদোকপা য়াদ্রি। পুন্সিগী ৱাহন্থোকতি মরূপ-মপাং ওইবা অমসুং মীগী অৱাবা খঙবনা তুকৎচবা, হাৎনবা অমসুং অরানববু জয় তৌবনি।

বুদ্ধগী লাইনীংনা অশাওবা ৱাখল লাকশিনবা ঙম্বশিং অদু মাইপাক্কনি অমসুং লোম্বা নাইদনা হিংগনি। অচুম্বা অমসুং মীগী অৱাবা খঙবনা ঐখোয়গী নুংদা লৈরিবা বুদ্ধ অসি মঙাল ফংগনি।

বুদ্ধ হায়বগী ৱাহন্থোকতি তমথীরবা ৱাখল অমবু অশেংবা অমসুং অতপ্পা ওইহনবা হায়বনি। কাংলুপ, কুচু অমসুং লোন্দা য়ুমফম ওইরগা মীওইবগী মরক্তা খেন্নবা থম্নবা পাউজেল শন্দোকপা অদু ভারত নৎত্রগা বুদ্ধনা য়াবা ঙম্লোই। কাংলুপ, কুচু, থাক নৎত্রগা ধর্ম্মগী মীওই অমা হেক্তা মখোয়গী ওইনীংবা ওইজসনু মদু য়াগদবনি। খুদম ওইনা, জিউশিং নৎত্রগা ফার্সীশিং অসি চহি কয়াগী মমাংদগী ঐখোয়গা পুন্না লৈমিন্নরক্লি। মখোয়বু তাথি-তাওইনা তৌনবা ঐখোয়না কৈদৌঙৈদা খনখিবা লৈতে। ঐখোয়গী পুন্সিদা চপ মান্নবগী ৱাখল্লোন অমদা হিংবা অদু বুদ্ধগী পুন্সি অদুমক্নি। পুন্না হিংমিন্নবা অমসুং মান্নবা হায়বা ৱাখল্লোন অসিনা মালেমদা বুদ্ধ অসি খ্বাইদগী পাম্নবা মহাপুরুস অমা ওইখিবনি। বাবাসাহেব অম্বেদকার ফাওবা ভগবান বুদ্ধনা তাক্লম্বা লম্বী অদুগী মতুং ইন্দুনা চৎখি।

ঙসিদি, ভারত অসি ভগবান বুদ্ধগী লম অমা ওইনা খঙনরে। মসিনা মালেমদা ভারতকী ফিবম ফগৎহল্লে। ‘বুদ্ধম শরণম গচ্ছামি, ধর্মম শরণম গচ্ছামি, সংঘম শরণম গচ্ছামি’ অসি ঐখোয়গী শেংলবা লৈবাক অসিদগী মালেমগী মফমশিংদা মীওইবা খুন্নাইগী পাউজেল শন্দোক্লিবা মীওইশিংগী লাইৱা ওইরে। মরম অদুনা বুদ্ধ পুর্ণিমা অসিগী খ্বাইদগী ফবা পাউজেলদি, ‘নহাক্না অতোপ্পশিং হোংহন্দ্রিঙৈদা নহাক নশা হন্না হোংউ, নহাকশু বুদ্ধ ওইরক্কনি। অতোপ্পগী মরাল থিদ্রিঙৈদা, নশাগী অশোয়বশিং হান্না লোইশিল্লু, নহাক বুদ্ধ ওইরক্কনি’। ‘আপো দীপঃ আপ ভবঃ’ হায়বগী ৱাহন্থোক্তি নহাক নশানা নুংদা মঙাল ফংনবা হোৎনরবদি নহাক বুদ্ধ অমা ওইরক্কনি।

ভগবান বুদ্ধনা মতম চুপ্পদা থৌনা পীখি অমসুং মীগী অৱাবা খঙবা অমসুং শান্তিগী পাউজেল শন্দোকখি। থোং মান্নবা, অচুম্বা, নীংতম্বা অমসুং মীওইবগী হক অসি ঙসিগী দেমোক্রেতিক ৱার্ল্দ অসিদা য়াম্না মরুওইবা ওইরে। অদুবু হায়রিবা ৱাখল্লোনশিং অসি চহি ২৫০০গী মমাংদা ভগবান বুদ্ধনা মসিগা মরি লৈনবা পাউতাকশিং পীরম্লবনি। ভারত্তা মসি তোখাইবা ৱাখল্লোন অমা নত্তে অমসুং মালেম অপুম্বা অসিগী অপাম্বা অমনি।

ভগবান বুদ্ধগী ফিলোসোফী মতুংইন্না, মান্নবা হায়বগী ৱাহন্থোক্তি মালেম অসিদা মীপুম খুদিংমক চিংলেম্না হিংবনি। মী খুদিংমক চপ মান্নবা খুদোংচাবা ফংহনগদবনি অমসুং খেন্নবা থমদনা হকশিং ফংহনগদবনি।
মরূপশিং,

লৈবাক খুদিংমক্তা থেংনরিবা তেরোরিজম অমসুং কাংলুপ নাইবা অমসুং মান্নদবশিং অসি কনা অমত্তনা শেম্বা নত্তে, মীওইবনা থোকহনবনি। মসিগী মান্নদবশিং অসিনা অরানবা, নৈহৎপীবা, মীওৎ-মীনৈ, হাৎনবা অমসুং খুন্নাইদা লৈতাদবা থোকহল্লি। অতোপ্পা অমদা, অচুম্বা, মনীং তম্বা অমসুং মীওইবগী হক অসিনা মান্নবগী ৱাখল্লোন পোকহল্লি। মরমদি মান্নবা হায়বসি ৱাখল্লোনশিং অসিগী হৌরকফমনি।

ঐখোয়গী খুন্নাই অসিদা চপ মান্নবগী ৱাখল লৈহল্লবদি খুন্নাইগী অচুম্বা, নীংতম্বা, মীওইবগী হক, খুন্নাইগী অহোঙবা, ইশাগী হকশিং, শান্তি, নুংঙাইবা লাক্কনি অমসুং মাংলোমদা চংশিনবা ঙমগনি।

ভগবান বুদ্ধনা মহাক্কী পাউতাকশিংদা ‘অস্তাং’গী মতাংদা নৈলখি। অস্তাংগী লম্বী খঙদনা বুদ্ধগী ৱাখল্লোনশিং ফংবা য়াম্না লুগনি হায়না ঐনা খল্লি। বুদ্ধগী লম্বী নিপাল অদুদা য়াওরি, চুম্না য়েংবা, চুম্না খনবা, চুম্না ঙাংবা, চুম্না থবক তৌবা, চুম্না হিংবা, অচুম্বা থবকশিং, অচুম্বা ৱাখলশিং অমসুং চুম্না তান্নবা য়াওরি।

ভগবান বুদ্ধনা তাক্লম্বা লম্বীশিং তুং ইন্নদুনা ঙসি ঐখোয়না থেংনরিবা খুদোংচাদবশিং কোকহনবা ঙমগনি। মালেম অসি খুদোংথিবদগী কন্নবা বুদ্ধগী নুংশিবা অমসুং মীগী অৱাবা খঙবা পাউজেল অসি ইনবা তঙাইফদে। মহাক্কী লম্বী অসিদা চৎলবদি মীওই অমনা পাঙ্গল কনগনি হায়না ভগবান বুদ্ধনা হায়রমখি।

মরূপশিং,

মরম চানা থবক তৌবগী তঙাইফদবা খঙবা ফিলোসোফরশিংগী মরক্তা ভগবান বুদ্ধসু অমনি। মহাক্কী ধর্ম্মগী মরুওইবা ৱাফমশিং চুম্বরা হায়না মহাক্না চাংয়েং তৌখি।

নাপল অমত্ত য়াওদনা মহাক্কী ৱাখল্লোনশিং অদু চাংয়েং তৌনবা অমসুং খন ওন্নবা মহাক্না মহাক্কী তুংইনবশিংদা খঙহনখি। অনিশুবা চহীচাদা, নাগরাজুন্না নীংথৌ উদয়দা ভগবান বুদ্ধগী পাউতাকশিংগী মওং শেম্নবা খঙহনখিবা অদু হৌজিক ফাওবা চুনরি।

মহাক্না হায়খি, মীৎতাংবশিং, অনাবশিং, অশোনবশিং, উপায় লৈত্রবশিং অমসুং লাইরবশিং মখোয়গী অৱাবা খঙনা লোইনগদবনি অমসুং অতৎ-অখম লৈতনা চিঞ্জাক অমসুং ঈশিং পীগদবনি। অনাবশিং সেবা তৌগদবনি অমসুং অৱাবা তারবা লৌমীশিংদা মরু-মরাং অমসুং মথৌ তাবা পোৎলমশিং ফংহনগদবনি।

ভগবান বুদ্ধগী মালেমগী ওইনা য়েংলিবা মীৎয়েং অসিদি মতৌ করম্না মালেম পুম্নমক্কী অৱাবশিং কোকহনগদগে হায়বা অসিনি। মহাক্না হায়খি, মী অমনা অতোপ্পগী অৱাবশিং য়েংদুনা লৈবগী মহুৎতা মশাগী অৱাবশিং কোকহন্নবা হোৎনবনা হেন্না ফৈ।

ঐনা হরাওই মদুদি, ঐখোয়গী সরকার অসি মীওইবগী অৱাবা খঙবগী লম্বীদা চংশিল্লি অমসুং ভগবান বুদ্ধগী পাউতাকশিং ইল্লি। মীয়ামগী অৱাবা অমসুং খুদোংচাদবশিং হন্থহন্নবা ঐখোয়না হোৎনরি।

শুপ্নগী থা অমদা লুপা ১ অমসুং নোংমদা পৈশা ৯০গী প্রেমিয়ম থীদুনা জন ধন য়োজনাগী মখাদা বেঙ্ক একাউন্ত কোতি ৩১ হেন্না হাংদোক্তুনা লাইরবশিংগী য়াইফনবা সরকারনা থবক কয়া পায়খৎলি। লাইরবশিংনা ইন্সুরেন্স কোতি ১৯ হেন্না য়াওখ্রে অমসুং লাইরবী নুপী কোতি ৩.৭তা লেম্না গ্যাস কনেক্সন পীখ্রে। মিশন ইন্দ্র ধনুসকী মখাদা অঙাং কোতি ৩ অমসুং মীরোনবী লাখ ৮০ হেনবদা তিকা থাখ্রে। মুদ্রা য়োজনাগী মখাদা বেঙ্ক গরেন্তী য়াওদনা লোন কোতি ১২ হেন্না পীখ্রে। হৌজিক অয়ুশ্মান ভারত য়োজনাগী মখাদা লাইরবা ইমুং কোতি ৫০দা মখোয়গী লায়েংনবা চহী অমদা লুপা লাখ ৫ পীগনি।

মরূপশিং,

পুন্না হিংমিন্নবা অমসুং অপুনবা হায়বা ৱাখল্লোন অসিনা ভগাবন বুদ্ধ মপুংফানা অওনবা পুরকখি। মহাক নীংথৌ অমগী মচানি। মহাক পুন্সিগী নুংঙাইবশিং ফংখি, অদুবু মহাক্না অৱাবা নংলবা মীওই অমা উরুবা মতমদা মহাক্না খনখি মদুদি মহাক্কা মখোয়গা খেন্নবা অমত্তা লৈতে অমসুং মখোয়গা চপ মান্নৈ।
মসিগী অচুম্বা অসিনা মঙোন্দা মঙাল অমা পীখি – লৌশিং, মরম চাবা, ৱাখল খনবা, চৎন-কাংলোন অমসুং মগুন অসি মঙোন্দা শক্তি অমা ওইনা য়াওবা হৌরকখি।

ঙসি ঐখোয়না মসিগী ৱাখল অসি হেন্না চেল্লিবদি, অহানবদা ঐখোয় অশেংবা মীওইবা অমা ওইবা ঙমগনি। মীওইবা খুন্নাইগী য়েংলগা মসি পাংথোকপা অসি য়াম্না মথৌ ওই অমসুং ২১শুবা চহিচা অসি মালেমগী খ্বাইদগী মরুওইবা চহিচা অমা ওইহল্লসি।

মরূপশিং,
মতম শাংনা মীনাই ওইরম্লবা মতুংদা, ঐখোয়গী লৈবাক্কী কলচরেল হেরিতেজ অসি কন্নবা ফজনা হোৎনদে। লৈবাক অদুগী পুৱারী লিদুনা থম্বা ঙমদবা লৈবাক অমসুং তুংগী মীরোলনা শীজিন্ননবা ঙাকশেন্দবা লৈবাক অদু কৈদৌঙৈদা মপুং ফাবা ঙম্লোই। মসিগী ৱাখল্লোন অসি মাংদা থম্লগা, ঐখোয়গী সরকার অসিনা লৈবাক অসিগী কলচরেল হেরিতেজদা য়ুমফম ওইরগা থবক পায়খৎলি অমসুং ভগবান বুদ্ধগা মরি লৈনবশিং লিদুনা থম্লি।

মরম অমদা নৎত্রগা মরম অমদা ভগবান বুদ্ধগা মরি লৈনবা লাই খুরুমফমশিং লৈবা ভারতকী রাজ্য ১৮ ঐখোয়গী লৈবাক অসিদা লৈরি। মখোয় খরদি চহী ২০০০ হেনবা য়াওরি অমসুং মালেম শীনবা থুংনা লমকোয়বশিংগী পুক্নীং চিংশিল্লি। অসিগুম্বা মতম অসিদা, মীয়ামগী মথৌ ওইবগী মতুংইন্না হায়রিবা মফমশিং অসি মালেমগী থাক্তা শেমগৎপা হায়বসি য়াম্না মরু ওইরে। মসিগী মতুংইন্না বুদ্ধিস্ত সর্কুইৎ অসি স্বদেশ দর্শন স্কিমগী মখাদা শেমগৎলে।

বুদ্ধিস্ত সর্কুইৎ শেমগৎনবা সরকারনা লুপা কোতি ৩৬০ কাইথোকখ্রে। বুদ্ধিস্তগী মফমশিং হায়বদি, উত্তর প্রদেশ, বিহার, মৈধ্য প্রদেশ, আন্ধ্র প্রদেশ অমসুং গুজরাত শেমগৎলে।

মসিগী মথক্তা, রোদ ত্রান্সপোর্ত মন্ত্রলয়না গয়া-বরানসী-কুসিনগর লম্বী মপান্দা মথৌ ওইবশিং শেমগৎলে। তুরিজম মন্ত্রালয়না চহী ২ খুদিংগী বুদ্ধিজমগী মালেমগী মীফম পাংথোক্লি। চহী অসিগী ওইনা মালেমগী মফম কয়াদগী লাকপা অখঙ-অহৈশিং থৌরম অসি শরুক য়াগনি। থৌরম অসিগী মরুওইবা পান্দমদি মী অয়াম্বদা ঐখোয়গী লৈবাক্কী কলচরেল হেরিতেজগী মরমদা খঙহনদুনা অতোপ্পা লৈবাকশিংদগী মীওই কয়া লাকহনবা অমসুং বুদ্ধিস্তগী মফমশিংদা কোইহনবা অমসুং মফমশিং অদুগী মরমদা খঙহন-উহনবনি। মসিগী মথক্ত য়ুমলোন্নরিবা লৈবাকশিংদা লৈরিবা বুদ্ধিস্ত হেরিতেজশিং ঙাকশেনবগী থবক্তসু কেন্দ্র সরকারনা মতেং পাংলি। ম্যান্মারগী বাগান অমসুং অনন্দা লাইশঙ শেমজিনবা অমসুং কেমিকেল রেস্তোরেসনগী থবক আর্ক্যোলোজিকেল সর্ভে ওফ ইন্দিয়া (এ এস আই)না য়াম্না য়াংনা পায়খৎলি। হায়রিবা লাইশঙশিং অসি চহী ২গী মমাংদা থোকখিবা য়ুহা হাবদা অকাই-অতোই থোকখিবনি।

অফগানিস্থানগী বামিয়ান, কম্বোদিয়াগী অঙ্গোদ বাদ অমসুং তা প্রোন, লাওসকী ভাদ ফৌ অমসুং ভিয়েৎনামগী মাই সন লাইশঙ য়াওনা অতোপ্পা লৈবাকশিংগী লাইশঙশিং শেমজিনবগী থবকশিংদা এ এস আইসু শরুক য়ারি। মসিনা মঙ্গোলিয়াগী গানদান মোনাস্ত্রীগী মেনুস্ক্রিপশিং ঙাকশেনবা অমসুং দিজিতাইজেসন তৌবগী থবক পায়খৎলি।

ঙসি ঐনা মফম অসিদগী কেন্দ্র সরকারগী মন্ত্রলয়শিংদা করিগুম্বা খরা হায়জরি। বুদ্ধিস্ত ফিলোসোফীগী মরমদা তোঙান-তোঙানবা ইন্সতিত্যুৎশিংনা পায়খৎলিবা অর্থ হন্দোকপা অমসুং লিদুনা থম্বগী থবকশিং অসি মতৌ করম্না মফম অমদা পুনশিনবা য়াগদগে? ভগবান বুদ্ধগী পাউতাকশিং অচম্বা লোন্দা ফংনবা অমসুং ইন্সতিত্যুৎশিং অসিগী থবকশিং খঙনবা ঐখোয়না অনৌবা পোর্তেল অমা শেমগৎপা য়ারোইদ্রা? হায়রিবা প্রোজেক্তশিং অসি অকক্নবা মতম অমগী মনুংদা লোইশিন্নবা অচৌবা থৌদাং লৌনবা ঐনা মহেস শর্ম্মজীদা হায়জরি।

মরূপশিং,

চহি ২৫০০গী মতুংদসু ভগবান বুদ্ধগী পাউতাকশিং হৌজিক ফাওবা ঐখোয়গী ইরক্তা লৈরিবা অসি ঐখোয়গী লাইবক ফবনি। মসি খুদোংচাবা অমনি হায়না ঐনা হায়রিবা অসিগী মরম করিনো হায়বদু খনবীয়ু।

লাইশঙশিং ঙাকশেনবদা ঐখোয়গী ইপা-ইপুশিংনা অচৌবা থৌদাং লৌবীরম্মি। ঐখোয়গী মমাংগী মীরোলশিংনা থবক কয়া পায়খৎলম্বদগী অসিগুম্বা বুদ্ধ পুর্ণিমাগী থৌরম পাংথোকপা ঙমবগী থাগৎচরি। চহি ২৫০০ শুরবা হেরিতেজশিং অসি তুংগী মীরোলশিংগীদমক ঐখোয়গী মমাংগী মীরোলশিংনা চোকথবা নাইদনা হোৎনদুনা ঙাকশেন্দুনা থম্লমখি। হৌজিক লাক্কদৌরিবা মীওইবগী পুৱারী অসিনা অদোমগী অচৌবা থৌদাং অমসুং ৱারেপশিং ঙাইদুনা লৈরি।

২০২২দা ঐখোয়গী লৈবাক্না পাংথোক্কদৌরিবা লৈবাক অসিগী চহি ৭৫শুবা নীংতম্বগী থৌরমগা মরি লৈননা অদোম্না ৱারেপ ৫ নৎত্রগা ১০ লৌবা ঐনা পাম্মি। লৌগদৌরিবা ৱারেপশিং অদু ঐখোয়গী কলচরেল হেরিতেজশিং ঙাকশেনবা নৎত্রগা গৌতম বুদ্ধগী পাউতাকশিং শন্দোকপা ওইবা য়াই। ২০২২ ফাওবদা মপুং ফানবা ঙসি মফম অসিদা লৈরিবা লনাই মীওইশিং অমসুং লুপশিংনা ৱারেপ খরা লৌবীনবা ঐনা হায়জরি। অদোমগী থবকশিং অদুনা অনৌবা ভারত অমগী মঙলান অদু মঙফাওনবা ঙমগনি। ঐখোয় ভগবান বুদ্ধগী বর ফংলে। মরম অদুনা, ঐখোয়গী অনীংবশিং ফংগনি হায়না ঐনা চেৎনা থাজৈ।

ঙসি শেংলবা বুদ্ধ পুর্ণিমাগী নুমিৎ অসিদা ঐনা ভগবান বুদ্ধগী মখোঙ ময়াদা ফমদুনা মহাক্কী বর নীজবা অমসুং ময়ামগা উনবগী খুদোংচাবা অমা ফংলে। ঐ বর ফংলে হায়না খনজৈ।

বুদ্ধ পুর্ণিমাগী, ময়াম পুম্নমকপু ঐনা অমুক হন্না য়াইফ-পাউজেল পীজরি। মসিগা লোয়ননা ঐগী ৱারোল লোইশিনজরে ।

থাগৎচরি ।