ভারতকী প্রধানমন্ত্রী

ভারত ইমানা য়াইফরে!

ভারত ইমানা য়াইফরে!

ভারত ইমানা য়াইফরে!

মালেম অসিনা স্লোগান অসিগী শক্তি অদু উবা ফংলি। ভারত ইমানা য়াইফরে হায়বা অসি স্লোগান অমা খক্তা নত্তে, মসি ভারতকী ইমাগী ইকাই খুম্নবা ঙাক্নবগীদমক মহাক্কী পুন্সি থাদোক্লিবা লৈবাক অসিগী লান্মী খুদিংমক্কী অচেৎপা ৱাশকনি। মসি লৈবাক অসিগীদমক হিংবা পাম্বা, করিগুম্বা খরা ফংবা পাম্বা লৈবাক অসিগী নাগরিক খুদিংমক্কী খোঞ্জেলনি। ভারত ইমানা য়াইফরে হায়বা অসি লমদমসিদা অমসুং মিসনসিদা ময়েক শেংনা ফোংদোক্লি। ভারতকী লান্মীশিংনা ভারত ইমানা য়াইফরে হায়রবদি, য়েক্নবশিংগী থম্মোয় থক-থক নীকই। ঐখোয়গী দ্রোনশিংনা য়েক্নবগী লাবনশিং থুগাইরকপা মতমদা, ঐখোয়গী মিসাইলশিংনা তার্গেৎ অদু অঙংবা মখোলগা লোয়ননা য়ৌবা মতমদা, য়েক্নবশিংনা তাবা ফংই – ভারত ইমানা য়াইফরে! ঐখোয়না নুমিদাংগী অমমবদা মঙাল পীবা মতমদা, য়েক্নবশিংনা উবা ফংই – ভারত ইমানা য়াইফরে! ঐখোয়গী লান্মীশিংনা ন্যুক্লিয়র ব্লেকমেলগী অকিবা অদু মায়পাকহনদবা মতমদা, অমত্তা ঙাইরবা ৱাফম অমখক্তনা নোংথক্তগী লৈখা ফাওবা শন্দোক্কনি – ভারত ইমানা য়াইফরে!

মরুপশিং,

তশেংনমক, অদোম পুম্নমক্না ভারত মচা মিলিয়ন কয়াবু চাউথোকচবা পোকহল্লে, ভারত মচা খুদিংমকপু চাউথোকচবা পোকহল্লে। অদোম্না পুৱারী শেমখ্রে। অমসুং ঐহাক্না নখোয়বু উনবা অয়ুক অঙনবদগী নখোয়গী মরক্তা লাক্লি। থৌনা লৈবশিংগী খোঙচৎনা পৃথিবীবু শোকহল্লকপা মতমদা, পৃথিবী অসি লাইবক ফবা ওইরকই, থৌনা লৈবশিংবু উনবগী খুদোংচাবা ফংলকপা মতমদা, পুন্সি অসি লাইবক ফবা ওইরকই। মরম অদুনা ঐহাক্না নখোয়গা উননবা অয়ুক অঙনবদা মফমসিদা লাকখি। ঙসিদগী দিকেদ কয়াগী মতুংদা, ভারতকী থৌনা অসি খন্ন-নৈনরকপা মতমদা, মসিগী খ্বাইদগী মরুওইবা চেপ্তর অসি অদোম অমসুং অদোমগী মরুপশিং ওইগনি। অদোম পুম্নমক্না লৈবাক অসিগী হৌজিক্কী অমদি তুংগী মীরোনগীদমক অনৌবা ইথিল অমা ওইরক্লি। অথৌবশিংগী লমদম অসিদগী ঙসি ঐহাক্না এয়র ফোর্স, নেভী অমসুং আর্মীগী থৌনা ফরবা লান্মীশিং, BSFকী ঐখোয়গী থৌনা ফরবা লান্মীশিংবু ইকায় খুম্নবা উৎচরি। অদোমগী থৌনাগীদমক, ওপরেসন সিন্দুরগী খোন্থাং অসি মফম খুদিংমক্তা শন্দোরক্লি। ওপরেসন অসিগী মনুংদা ভারত মচা খুদিংমক্না অদোমগা লোয়ননা লেপখি। ভারত মচা খুদিংমক্কী থৌনা অদোমগা লোয়ননা লৈখি। ঙসি লৈবাক অসিগী নাগরিক খুদিংমক্না মাগী লান্মীশিং অমসুং মখোয়গী ইমুং-মনুংশিংগী মফমদা থাগৎপা ফোংদোক্লি।

মরুপশিং,

ওপরেসন সিন্দুর অসি মহৌশাগা মান্নবা মিলিতরী ওপরেসন নত্তে। মসি ভারতকী পোলিসী, ইন্তেন্সন অমসুং ৱারেপ লৌবগী থৌনাগী অপুনবনি। ভারত অসি গুরু গোবিন্দ সিংহজীগী লম অদুগুম্না বুদ্ধগী লমসু ওইরি। গুরু গোবিন্দ সিংহজীনা হায়রম্মি – করিগুম্বা ঐহাক্না মীওই অমবু মীওই লাখ অমগা লিশিং কুনমঙাগী মরক্তা লান্থেংনহল্লবদি, করিগুম্বা ঐহাক্না উচেক অম‌গা উমাইবী অমগী মরক্তা লান্থেংনহল্লবদি, ঐহাকপু গুরু গবিন্দ সিংহ কৌবা য়াই। ঐখোয়গী চৎনবীনা ফত্তববু মুত্থৎনবা অমসুং অচুম্বা পুথোক্নবগীদমক খুৎলায় পায়খৎলি। মরম অসিনা ঐখোয়গী ইচে-ইচল অমসুং ইচানুপীশিংগী সিন্দুর মুথৎখিবা মতমদা, ঐখোয়না মখোয়গী য়ুমশিংদা চঙদুনা তেরোরিস্তশিংগী মহুশিং অদু মাংহনখি। মখোয়না মীতমবালগুম্না লোৎখি, অদুবু মখোয়না শিংনরকখিবা অদুদি ভারতকী লান্মীনি হায়বসি মখোয়না খল্লমদে। অদোম্না মখোয়বু মাংদগী লান্দাখি অমসুং মখোয়বু হাৎখি, অদোম্না তেরোরিস্তশিংগী অচৌবা বেজ পুম্নমক মাংহনখি, তেরোরিস্তশিংগী লৈফম 9 মাংহনখি, তেরোরিস্ত 100 হেন্না শিহনখি, তেরোরিস্তশিংগী মাস্তরশিংনা হৌজিক্তি খঙলে মদুদি ভারতকী মায়োক্তা চৎলবদি মহৈ অমখক্তমক ফংগনি – অমাং অতা! ভারত্তা মীচম মীয়ামগী ঈখেং তাহনবগী মহৈ অমখক্তমক লৈগনি – অমাং অতা অমসুং অচৌবা অমাং অতা! ইন্দিয়ন আর্মী, ইন্দিয়ন এয়র ফোর্স অমসুং ইন্দিয়ন নেভীনা হায়রিবা তেরোরিস্তশিংনা থাজবা থম্লিবা পাকিস্তানি আর্মীবু মায়থীবা পীখ্রে। পাকিস্তানগী লান্মীদা অদোম্না হায়খি মদুদি পাকিস্তানদা তেরোরিস্তশিংনা ফমদুনা চাদুনা লৈমিন্নবা য়াবা মফম অমত্তা লৈতে। ঐখোয়না মখোয়গী য়ুমদা চঙগনি অমসুং মখোয়বু হাৎকনি অমসুং মখোয়বু নান্থোক্নবগী খুদোংচাবা অমত্তা পীরোই। অমসুং ঐখোয়গী দ্রোনশিং, ঐখোয়গী মিসাইলশিং, পাকিস্তাননা নুমিৎ কয়ামরুম মখোয়শিং অদুগী মতাংদা খল্লবদি তুম্বা ঙম্লরোই। মহাক্না থৌনা ফবা খোঙথাংশিং উৎখি। মহাক্না অকিবা লৈতনা চংশিনখি। হায়রিবা লাইনশিং অসি মহারানা প্রতাপকী মমিং চৎলবা শগোল চেতাকতা ইবনি, অদুবু হায়রিবা লাইনশিং অসি ঙসিগী মোদর্ন ইন্দিয়ন খুৎলাইশিংদসু চপ মান্নৈ।

ঐগী থৌনা ফরবা মরুপশিং,

ওপরেসন সিন্দুরগী খুত্থাংদা, অদোম্না লৈবাক অসিগী মোরেল হেনগৎহনখ্রে, লৈবাক অসিবু অমত্তা ওইবগী লিপুন অমদা শম্নহনখ্রে, অমসুং ভারতকী ঙমখৈশিং অদোম্না ঙাক-শেনখ্রে, ভারতকী মশাগী ইকাই খুম্নবা অসি অনৌবা থাক্তা পুখৎলে।

মরুপশিং,

অদোম্না মমাংদা অমুক্তা ওইখিদ্রিবা, ৱাখলনা খল্লুদবা, শিংথানিংঙাই ওইবা অমা তৌখি। ঐখোয়গী এয়র ফোর্সনা পাকিস্তানগী মনুং চন্না লৈবা তেরোরিস্ত কেম্পশিংবু তার্গেৎ তৌখি। হৌজিক মতমগী তেক্নোলোজীগা লোয়নবা প্রোফেস্নেল ফোর্স খক্তনা ঙমখৈগী ৱাংমদা লৈবা তার্গেৎশিং চঙশিনবা ঙম্মী অমসুং মিনিত 20-25গী মনুংদা পিন পোইন্ত তার্গেৎশিংদা চঙশিনবা ঙম্মী। অদোমগী খোঙজেল অমসুং প্রিসিজনগী থবকশিং অদুনা য়েক্নববু থোইদোক হেন্দোক্না অঙকপা পোকহনখি। মহাক্কী থবাক্তা খুৎ থাখিবদু মহাক্না খঙলমদে।

মরুপশিং,

ঐখোয়গী পান্দমদি পাকিস্তানগী মনুং চন্না লৈবা তেরোরিস্তশিংগী হেদক্বার্তরশিং, তেরোরিস্তশিংদা খুদোংথিবা পীবনি। অদুম ওইনমক, পাকিস্তাননা মাগী পেসেঞ্জর প্লেনশিং মাগী মাংদা শিজিন্নদুনা থৌরাং তৌখিবা অদুগী মতাংদা, সিভিল এয়রক্রাফ্ত অদু উবা মতম অদু কয়া য়াম্না অরুবা ওইগনি হায়বদু ঐনা খঙই। অমসুং অদোম্না য়াম্না চেকশিন্না, য়াম্না চেকশিন্না, সিভিল এয়রক্রাফ্ত অদু শোকহন্দনা, অদোম্না মসিবু থুগাইখি অমসুং মতিক চাবা পাউখুম অমা পীখি হায়বসিদা ঐনা চাউথোকচৈ। অদোম পুম্নমক্না অদোমগী পান্দমশিং অদু ফংবা ঙম্লে হায়না ঐহাক্না চাউথোকচবা পোকচৈ। পাকিস্তানদা তেরোরিস্তশিংগী মফম অমসুং মখোয়গী এয়রবেজশিং থুগাইবতা নত্তনা মখোয়গী ফত্তবা ৱাখল্লোন অমসুং মখোয়গী থৌনাদুসু মায়থিবা পীখ্রে।

মরুপশিং,

ওপরেসন সিন্দুরনা মরম ওইদুনা মাইয়োক্নরিবা য়েক্নবশিংনা ঐখোয়গী এয়রবেজশিংগা লোয়ননা এয়রবেজ অসিদা লান্দারক্নবা কয়ারক হন্না হোৎনখি। ঐখোয়বু হন্না হন্না তার্গেৎ তৌখি, অদুবু পাকিস্তা্নগী ফত্তবা ৱাখল্লোনশিং অদু মতম খুদিংদা মায় পাকখিদে। পাকিস্তানগী দ্রোনশিং, মসিগী য়ু.এ.ভি.শিং, পাকিস্তানগী এয়রক্রাফ্ত অমসুং মাগী মিসাইলশিং, পুম্নমক অসি ঐখোয়গী মপাঙ্গল কনবা এয়র দিফেন্সকী মমাংদা মাংখি। লৈবাক অসিগী এয়রবেজ পুম্নমক্কা মরী লৈনবা লুচিংবশিং, ভারতকী এয়র ফোর্সকী এয়র ৱারিয়র খুদিংমকপু ঐহাক্না থাগৎপা ফোংদোকচরি। অদোম্না তশেংনা অফবা থবক অমা তৌরি।

মরুপশিং,

তেরোরিজমগী মায়োক্তা ভারতকী লক্ষ্মন রেখা অসি হৌজিক য়াম্না ময়েক শেংলে। করিগুম্বা তেরোরিস্তকী থৌওং অমা অমুক হন্না তৌরকপা তারবদি, ভারতনা অকনবা পাউখুম পীরগনি। ঐখোয়না মসিবু সর্জিকেল স্ত্রাইককী মতমদা, এয়র স্ত্রাইককী মতমদা উখি, অমসুং হৌজিক ওপরেসন সিন্দুর অসি ভারতকী অনৌবা নোর্মেল ওইরে। অমসুং ঐহাক্না ঙরাং হায়খিবগুম্না, ভারতনা হৌজিত্তি প্রিন্সিপল অহুমগী মতাংদা ৱারেপ লৌরে। অহানবা- করিগুম্বা ভারত্তা তেরোরিস্ত এতেক অমা থোক্লবদি, ঐখোয়না ঐখোয়গী মওং মতৌদা, ঐখোয়গী তর্মদা, ঐখোয়গী মতম অদুদা পাউখুম পীরগনি। অনিশুবদা – ভারতনা ন্যুক্লিয়র ব্লাকমেল অমত্তা খাংদদুনা লৈরোই। অহুমশুবদা – ঐখোয়না তেরোরিজমবু শৌগৎলিবা সরকার অমসুং তেরোরিজমগী মাস্তরশিংবু তোখাইনা উররোই। মালেম অসিনা ভারতকী অনৌবা মওং, অনৌবা সিস্তেম অসিবু খঙমিন্নদুনা মাংলোমদা চংশিল্লি।

মরুপশিং,

ওপরেসন সিন্দুরগী মীকুপ খুদিংমক্না ভারতকী লান্মীশিংগী মপাঙ্গল অদু উৎলি। মতম অসিগী মনুংদা, ঐখোয়গী ফোর্সশিংগী কোওর্দিনেসন অসি, ঐহাক্না তশেংনা হায়গনি, য়াম্না ফজনা ওইখি। আর্মী, নেভী নৎত্রগা এয়র ফোর্স ওইগেরা, মীপুম খুদিংমক্কী কোওর্দিনেসন অসি য়াম্না মপাঙ্গল কনবা ওইখি। নেভীনা সমুদ্রদা মাগী নিংথৌ ওইরকখি। লান্মীনা ঙমখৈ অদু মপাঙ্গল কনখৎহনখি। অমসুং ভারতকী এয়র ফোর্সনা লান্দারকপগা লোয়ননা ঙাকথোকখি। বি.এস.এফ. অমসুং অতৈ ফোর্সশিংনসু অঙকপা তৌবা ঙম্বশিং উৎখ্রে। ইন্তিগ্রেতেদ এয়র অমসুং লেন্দ কোম্বেৎ সিস্তেমশিংনা অচৌবা থবক অমা পাংথোকখ্রে। অমসুং মসিমক্নি জোইন্তনেস হায়বদু, মসি হৌজিক্তি ভারতকী ফোর্সশিংগী মপাঙ্গলগী মপাঙ্গল লৈবা মশক অমা ওইরে।

মরুপশিং,

ওপরেসন সিন্দুরদা, মেনপাৱর অমসুং মেছিনশিংগী কোওর্দিনেসন অসি য়াম্না ফজৈ। লান কয়া থেংনখিবা ভারতকী অরিবা এয়র দিফেন্স সিস্তেম ওইগেরা, নত্রগা ভারতনা শেম্বা অকাসগুম্বা প্লেৎফোর্ম ওইগেরা, S-400 গুম্বা মোদর্ন অমসুং শক্তি লৈরবা দিফেন্স সিস্তেমশিংনা মখোয়বু মমাংদা অমুক্তা ওইখিদ্রিবা মপাঙ্গল পীরি। মপাঙ্গল কনবা সেক্যুরিতী শিল্দ অসি ভারতকী মশক ওইরক্লি। পাকিস্তানগী কন্না হোৎনরবসু, ঐখোয়গী এয়রবেজশিং নৎত্রগা ঐখোয়গী অতোপ্পা ঙাকশেলগী ইনফ্রাস্ত্রকচরদা অকায়বা অমত্তা পীবা ঙমখিদে। মসিগী ক্রেদিৎ অসি অদোম পুম্নমক্তা পীজরি, অমসুং ঐহাক্না অদোম পুম্নমক্তা চাউথোকচরি। ঙমখৈদা থবক তৌরিবা লান্মী খুদিংমক, মসিগী ওপরেসন অসিগা মরী লৈনবা মীওই খুদিংমক্না মসিগী ক্রেদিৎ অসি ফংফম থোকই।

মরুপশিং,

ঙসিদি ঐখোয়না অনৌবা অমসুং অৱাংবা থাক্কী তেক্নোলোজীগী খুদোংচাবা ফংলি, মসিদা পাকিস্তান্না চাংদম্নবা ঙম্লোই। হৌখিবা চহি তরা অসিদা, এয়র ফোর্স য়াওনা ঐখোয়গী ফোর্স পুম্নমক্না মালেমগী খ্বাইদগী ফবা তেক্নোলোজী ফংলে। অদুবু অনৌবা তেক্নোলোজীগা লোয়ননা, শিংনবশিং অসিসু চপ মান্ননা চাউই হায়বসি ঐখোয় পুম্নমক্না খঙই। কমপ্লেক্স ওইরবা অমসুং সোফিস্তিকেতেদ ওইরবা সিস্তেমশিং য়েংশিনবা, মখোয়বু ইফিসিএন্সীগা লোয়ননা চলাইবা অসি অচৌবা স্কিল অমনি। নহাক্না তেক্কা তেক্তিক্সকা শম্নদুনা উৎলি। অদোম্না গেম অসিদা মালেমগী খ্বাইদগী ফবা শান্নরোইনি হায়বা উৎখ্রে। ইন্দিয়ন এয়র ফোর্সনা হৌজিক্তি খুৎলাইশিংখক্তা নত্তনা দেতা অমসুং দ্রোনশিংগা লোয়ননা য়েক্নবশিংবু মায়থিবা পীনবদা হৈ-শিংলক্লে।

মরুপশিং,

ভারতনা মসিগী লানগী থবকশিং অসি পাকিস্তানগী হায়জবা মতুং ইন্না লেপহনখি। করিগুম্বা পাকিস্তান্না অমুক্কা হন্না তেরোরিস্তকী থবক থৌরমশিং নৎত্রগা লানগী থৌওং উৎলবদি, ঐখোয়না মদুগী মতিক চাবা পাউখুম পীরগনি। ঐখোয়না মসিগী পাউখুম অসি ঐখোয়গী ৱাহন্থোক্তা, ঐখোয়গী মওংদা পীগনি। অমসুং মসিগী ৱারেপ অসিগী য়ুম্ফম, মসিগী মখাদা লৈরিবা থাজবা অসি, অদোম পুম্নমক্কী অখাং কনবা, থৌনা, লিংজেল অমসুং চেকশিনবা অদুনি। অদোম্না মসিগী থৌনা, পুক্নিং থৌগৎপা অসি অসিগুম্বা মওংদা লেংদনা থম্বা তাই। ঐখোয়না লেপ্পা লৈতনা চেকশিন্না লৈগদবনি, ঐখোয়না শেম-শাদুনা লৈগদবনি। মসি অনৌবা ভারত অমনি হায়বসি ঐখোয়না য়েক্নবশিংদা নীংশিংহল্লি। ভারত অসিনা শান্তি পাম্মি, অদুবু, করিগুম্বা মীওইবা জাতিদা শীংনরকপা তারবদি, ভারত অসিনা লানগী ফ্রন্ততা করম্না য়েক্নববু মাংহনগদগে হায়বদুসু ফজনা খঙই। মসিগী ৱারেপ অসিগা লোয়ননা, ঐখোয়না অমুক্কা হন্না হায়জরি-

ভারত ইমানা য়াইফরে। ভারত ইমানা য়াইফরে।

ভারত ইমানা য়াইফরে।

বন্দে মাতরম। বন্দে মাতরম।

বন্দে মাতরম। বন্দে মাতরম।

বন্দে মাতরম। বন্দে মাতরম।

বন্দে মাতরম। বন্দে মাতরম।

বন্দে মাতরম।

হন্না-হন্না থাগৎচরি।

*****