ভারতকী প্রধানমন্ত্রী

কবভোকেসন্দা ঐহাক য়াম্না ৱাখল লুম্বা পোক্কদ্রা? ই-পাও কয়া অমা পীখ্রবা মাল্লি। মীপুম খুদিংমকপু খুরুমজরি! থৌরম অসিদা ঐখোয়গা লোয়ননা য়ু.পি.গী মুখ্য মন্ত্রী য়োগী আদিত্যনাথজী, দা. কে. রধাকৃষ্ণজী, প্রোফেসর অভে করন্দিকরজী, আই.আই.তি. কানপুরগী প্রোফেসরশিং, মহৈরোয় পুম্নমক, অতোপ্পা দিগ্নিতরীসিং অমসুং পুৱারি ওইরবা ইন্সতিত্যুসন অসিদগী দিগ্রী ফংলিবা অতোপ্পা দিগ্নিতরীশিংনা শরুক য়ারি! ঙসি অসি কানপুরগী ওইনা নুংঙাইবা অনি ফংলিবা নুমিৎ অমা ওইররে। ঙসি নাকল অমরোমদা শহর অসিনা মেত্রো ফেসিলিতী অমা ফংলি অদুগা অমরোমদনা আই.আই.তি. কানপুরদগী নখোয়গুম্বা মমল য়াম্লবা খুদোল অমা তেক্নোলোজীগী লমদা পীরি। ঐহাক্কী নহা ওইরিবা মরুপশিংদা ঐহাক্না য়াইফ-মঙ্গোল পীজরি। ঙসি ইকাই খুম্নবা ফংলিবা মহৈরোয়শিংদা ঐহাক্না থাগৎপা ফোঙদোকচরি। অদোম্না ঙসি মফ অসিদা য়ৌরক্লিবা, মসি ফংবা ঙম্লিবা অসি অদোমগী ইমা-ইপা, অদোমগী ইমুং-মনুংগী মীওইশিং, অদোমগী ওজাশিং, অদোমগী প্রোফেসরশিংনা কন্না হোৎনবদগী ঙমখিবনি। মখোয় পুম্নমক্তা, মরু ওইনা অদোমগী ইমা-ইপাশিংদা ঐহাক্না থমোয় শেংনা থাগৎপা ফোঙদোকচরি।

মরুপশিং,

আই.আই.তি. কানপুরদা মিং চল্লকপা মতম অমসুং মফম অসিদগী তম্বা লোইরগা চৎকদৌরবা মতম অসিগী মরক্তা অদোম্না ইশাদা অচৌবা অহোংবা অমা শোইদনা ফাওরমগনি। মফম অসিদা লাক্ত্রিঙৈ মমাংদা অদোমদা শক উদবা অমগী অকিবা অমা, শক উদবা অমা খঙনীংবা পোক্লমগনি। মমাংদা অদোমগী লৌশিং, অদোমগী ক্বেরীশিংগী স্কোপ অদু অদোমগী স্কুল-কোলেজ, অদোমগী মরুপশিং, অদোমগী ইমুং-মনুং, অদোমগী নক্নবা মীওইশিংগী মরক্তা খক্তা লৈরম্মি। আই.আই.তি. কানপুরনা মসিদগী লৌথোক্তুনা অচৌবা কেনবাস অমা পীরি। হৌজিক্তি শক উদবা অমগী অকিবা লৈত্রে, হৌজিক্তি মালেম পুম্বা  এক্সপ্লোর তৌনবা থৌনা লৈরে। হৌজিক্তি শক উদবা অমা খঙনীংবা পোক্ত্রে, হৌজিক্তি খ্বাইদগী অথোইবা অদু থিরি, মালেম পুম্বা খুদুম চন্নবা মঙলান মঙলি। অমসুং অদোমগী ক্লাসরুমদা কয়া অমা তম্লি, নত্ত্রগা  অদোমগী ক্লাসরু,গী মালদা অদোমগী লেংগশিংগী মরক্তা এক্সপরিয়েন্স তৌবা অদুদগী হেন্না অদোমগী ক্লাসতা অদোম্না খঙনীংবা খুদিংমক তম্বা ফংলি। অদোমগী ৱাখল্লোনশিং অদু ক্লাসরুমগী খুত্থাংদা চাউখৎলক্লি। ক্লাসরুমগী মপান্দা অদোমগী পর্সনেলিতী হেনগৎলক্লি, অদোমগী পর্সনেলিতী হোংলক্লি। আই.আই.তি. কানপুরদা অদোম্না তানশিনখিবা , অসিগুম্বা অফবা ফাউন্দেসন ফোর্স অমদা ফংলিবা ৱাখল্লোনশিং, অসিগুম্বা শক্তিশিং অসিগা লোয়ননা অদোম্না করিগুম্বা অনৌবা অমা তৌবা, তোপ-তোপ্পা অমা তৌবা, অদোম্না চৎপা মফমদা ভেল্যূ হাপকদবা তৌবা ঙম্লগনি। ঙসি অদোম্না ফংলিবা ত্রেনিং, অদোমগী স্কিল, অদোমগী লৌশিং অসিনা প্রেক্তিকেল ৱর্ল্দদা অফবা মফম অমা শেমগৎপদা শোইদনা চাউনা মতেং ওইরগনি। অদুবু মফম অসিদা শেমগৎখিবা অদোমগী পর্সনেলিতী অসিনা অদোম্না খুন্নাই পুম্বগী অফবা তৌবা ঙম্বা অদুগুম্বা থৌনা পীরগনি, অদোমগী খুন্নাই অমদি লৈবাক্তা অনৌবা থৌনা অমা পীরগনি।

মরুপশিং,

অদোম্না আই.আই.তি.গী হিস্তোরিকেল পেরিয়দকী অচৌবা লেগেসী অমা উবা ফংলি। অদোম্না মখল মথেল কয়ানা থল্লবা ভারতকী নীংথিজবা অসিগা লোয়ননা হৌজিক হিংলি। অচৌবা লেগেসী অমসুং বাইব্রেন্ত প্রজেন্ত, য়ুম্বী অনি অসিদা য়ুম্ফম ওইরগা, লম্বী অনি অসিদা অদোমগী আশা লৈরবা তুংলমচৎকীদমক খোঙচৎ ঙসিদগী হৌরগনি। খোঙচৎ অসি য়াইফবা, লৈবাক অসিগীদমক মাইপাকপনা থনবা ওইরসনু, ঙসি ময়ামগী মরক্তা ঐহাক্না তিনবা ফংজবা অসিদা মফম অসিমক্তদা ময়াম পুম্নমক্তা ঐহাক্না য়াইফ-মঙ্গোল পীজরি।

মরুপশিং,

চহি অসিদা ভারতনা নীংখা তমখিবগী চহি ৭৫শুরি। ঐখোয় পুম্নমক্না অমৃত মহোৎসব পালন তৌরি। অদোমগী দিগ্রী ফংখিবা শহর, কানপুর অসিগী মশাগী ওইবা নীংথিজরবা পুৱারী অমা লৈজৈ। কানপুর অসি ভারতকী দাইভর্স ওইবা শহর খরগী মনুংদা অমনি। সত্তী চৌরা ঘাত্তগী মসারী পাসী ফাওবা, নানা সাহেবতগী বতুকেশ্বর দত্ত ফাওবা, ঐখোয়না শহর অসিদা চৎপা মতমদা ঐখোয়না হৌখ্রবা মতমগী নীংথিরবশিং অদু উবা ফংজবা অমসুং নীংতম ইহৌদা কত্থোকখিবশিং অদুগী নীংথিজবা অদু শোকপা ফংজবগুম্না ফাওই। নীংশিং পরৈ চল্লুরবশিং অসিগী মনুংদা মথংগী চহি ২৫ অসিদা লৈবাক অসিগী মাইকৈ তাকপা, লৈবাক অসিদা ইনোৎ হাপ্পগী থৌদাং অসি অদোমগীনি। অদোম্না খন্দুনা য়েংবীয়ু, দান্দী য়াত্রা ইং কুমজা ১৯৩০দা হৌখিবা মতমদা, হায়রিবা মতম অদুদা লৈবাক পুম্বদা ইহৌ কয়া অমা হৌখি। মতম অদুদা লৈবাক অসিনা লৌখিবা থৌদাং অদুনা নীংখা তম্নবা ভারতকী মীয়ামদা অমুক্তা থোকখিদ্রিবা মওংদা থৌনা হাপখিম ভারত মচা খুদিংমক্কী ৱাখল্লোন্দা মাইপাক্কনি হায়বগী থাজবনা থলহনখি। ইং কুমজা ১৯৩০গী মতমদা চহি ২০-২৫ শুরবা নহা ওইরিবা নুপামচাশিং অদুনা ইং কুমজা ১৯৪৭ ফাওবগী মখোয়গী খোঙচৎ, ইং কুমজা ১৯৪৭তা নীংতম্বা ফংবগী মাইপাকপা ফংখিবা অদু মখোয়গী পুন্সিগী গোল্দন ফেজ ওইখি। ঙসি অদোম্নসু অদুগুম্বা গোল্দন ইরা অদুদা খোঙ থাংজিল্লি। লৈবাক অসিগী হৌজিক অমৃত কাল ওইরিবা অসিগুম্না চপ মান্নবা মওংদা অদোমগী পুন্সিগীসু মসি অমৃত কালনিঅমৃত মহোৎসবকী পুংফম অসিদা অদোম্না আই.আই.তি.গী লেগেসীগা লোয়ননা থোকখিবা মতমদা ইং কুমজা ২০৪৭দা ভারতনা ফংবা পাম্বা মঙলানশিং অদুগা লোয়ননা চৎখো। মথংগী চহি ২৫ অসিদা অদোম্না ভারতকী চাউখৎপগী খোঙচৎ অসি লুচিংগদবনি মদুগীদমক অদোম্না হৌজিক্তগী হৌনা হোৎনবা তাই। অমসুং ঐহাক্না খঙই মদুদি কানপুর আই.আই.তি., অকোইবগী ফিভম অসিনা অদোমদা পীরিবা পাঙ্গল অসি হৌজিক অদোমগী মঙলানশিং থুংহনবদা কনাগুম্বা অমত্তনা অথিংবা পীবা ঙমলোই। মসিগী চহিচা, ২১শুবা চহিচা অসি মপুং ফানা তেক্নোলোজী দ্রিবন ওই। দিকেদ অসিদসু তেক্নোলোজীনা তোঙান-তোঙানবা লমশিংদা খুদম চনবা হেনগৎলক্লি। হৌজিক্তি নাকল অমরোমদা তেক্নোলোজী য়াওদ্রবদি পুন্সি অসি মপুং ফাররোই। মসি পুন্সিগী অমদি তেক্নোলোজী গী অথোই-অহেন তান্নরিবা চহিচানি অমসুং মসিদা অদোম্না শোইদনা মাং থাদুনা থোরক্কনি হায়না ঐহাক্না থাজৈ। অদোম্না নহা ওইরিঙৈগী মরু ওইবা চহি কয়া তেক্নোলোজীদা এক্সপর্ত ওইনবা হোৎনখি। মসিদগী হেন্না চাউবা খুদোংচাবা অমা কদাইদগী লৈরুগনি? অদোম্না ভারত্তা নত্তনা মালেম পুম্বগী তেক্নোলোজীগী লমদা শরুক তম্নবা মসি অচৌবা খুদোংচাবা অমনি।

মরুপশিং,

ঐখোয়গী আই.আই.তি.শিং অসি তেলেন্ত অমসুং তেক্নোলোজীগী ইক্যুবেসন সেন্তরশিং ওইদুনা লাকখি অমসুং আই.আই.তি. কানপুরগী মশাগী রেপ্যুতেসন লৈজৈ। অদোমগী কম্পনীগী এক্বা-ফ্রন্ত ইনফ্রাস্ত্রকচরগী খুত্থাংদা মালেমগী অহানবা ফ্লোতিং সি.এন.জি. ফিলিং স্তেসন অমা বনারাসকী খিরকিয়া ঘাত্তা শাখি। মসিগা মান্ননা অদোম্না লৌউ-শিংউগী লমদা স্তেৎ ওফ দি আর্ত তেক্নোলোজী দিবেলপ তৌখি, মালেমগী অহানবা পোর্তেবল সোইল তেস্তিং কিত পুথোকখি। ৫জি তেক্নোলোজীদা আই.আই.তি. কানপুরগী থবক অসি গ্লোবেল স্তেন্দর্দশিংগী শরুক অমা ওইখি। ইন্সতিত্যু অসি মাইপাকপা কয়াগীদমক থাগৎফম থোকই। অসিগুম্বা ফিভমদা অদোমগী থৌদাংসু শরুক কয়া হেনগৎলক্লি। ঙসি আর্তিফিসিএল ইন্তেলিজেন্স, ইনর্জী অমসুং ক্লাইমেৎ সোল্যুসনশিং অসিগুম্বা লম অসিদা, হায়-তেক ইনফ্রাস্ত্রকচরগী লমদা লৈবাক অসিগী মাংদা অচৌবা স্কোপ অমা লৈরি। হেল্থ অসিগুম্বা সেক্তরশিং অসি ঙসিদি তেক্নোলোজী দ্রিবন ওইরি। ঐখোয়না দিজিতেল দাইগ্নোসিসকী চহিচাদা, রোবোত এসিসতেদ ত্রীৎমেন্তগী চহিচা অমদা খোঙ থাংজিল্লি। হেল্থ দিভাইসশিং অসি য়ুম অমদা চংদবা য়াদ্রবা অমা ওইরক্লে। ঐখোয়না তেক্নোলোজীগী খুত্থাংদা দিজাস্তর মেনেজমেন্তদসু শীংনবশিং ফাওবা মায়োক্নবা ঙমগনি। ঐখোয়না ওইথোকপা য়াবশিংগী থোঙ্গালদা কয়াম চাউনা লেপ্পবগে হায়বা খনবীয়ু। মসিগী ওইথোকপা য়াবশিং অসি অদোমগীদমক্তনি, মসিগী অদোমগী থৌদাং য়াম্না চাউই। মসি অদোমগী লৈবাক্কীদমক শুপ্নগী থৌদাংশিং খক্তা নত্তনা ঐখোয়গী মীরোন কয়াগী মঙলানশিং থুংহনবসু তাই। অদুবু মঙলানশিং অসি ওইথোকপা য়ানবা, অনৌবা ভারত অমা শেম্নবা অদোমদা খুদোংচাবা পীরি, অদোমগী মীরোন্না মসি ফংলি।

মরুপশিং,

ঙসি অদোম্না ২১শুবা চহিচাদা লৈরিবা মতম অসি অচৌবা পান্দমশিং থম্নবা মতমনি অমসুং মসি মাইপাক্নবা অদোমগী ইনর্জী পুম্বা থাদনবা মতমনি। ঙসি অদোমদা ফাওরিবা ৱাখল্লোন অমসুং এতিত্যুদ অদু লৈবাক অসিগী এতিত্যুদকা চপ মান্নৈ। মমাংদা করিগুম্বা থবক অমা পাঙথোক্নবা ওইনা ৱাখল খল্লম্বা তারবসু ঙসিদি করিগুম্বা খরা তৌনবা অমদি ফল পুরক্নবা ওইবা ৱাখল্লোন পোক্লে। মমাংদা সমস্যাশিং থেংনদনবা চেন্নবা হোৎনরম্বা তারবসু ঙসিদি সমস্যাশিং অদুগী ৱারোইশিন পুরক্নবা অচেৎবা ফিরেপ লৈরে। মতম শাংনা চৎকদবা ৱারোইশিন অমা! মসিগীদমক আত্মনির্ভর ভারতকী অচৌবা খুদম অমনি।

মরুপশিং,

ঐহাক্কী ৱাহৈশিং অসিদা  অদোম্না ঐহাক অসি ঙাইঙমদবা মালবসু মসিগী মরমদি ঐহাক্না নখোয়দা চপ মান্নবা মওংদা আত্মনির্ভর ভারত ওইহন্নবা ঙাইঙমদবা পোকহনবা পাম্মি। কনাগুম্বা অমত্তদা মীপাল তাংদনবা, আত্মনির্ভর ভারতনা মপুং ফানা নীংখা তম্বা ফংনবা তঙাই ফদবা শক্লোন ওইরি। স্বামী বিবেকানন্দনা হায়খি – ‌এভরী নেসন হেজ অ মেসেজ তু দিলিভর, অ মিসন তু ফুলফিল, অ দেস্তিনি তু রিচ। হায়বরি করিগুম্বা ঐখোয়না আত্মনির্ভর ওইদ্রবদি ঐখোয়গী লৈবাক অসিনা মাগী পান্দমশিং অদু করম্না থুংহনবা ঙমগনি, মাগী দেস্তিনি অদু করম্না য়ৌগনি?

মরুপশিং,

অদোম্না মসি পাংথোকপা ঙমগনি। ঐহাক্না অদোমদা থাজবা থম্মি। ঙসি ঐহাক্না ৱা কয়া ঙাংলিবা, থবক কয়া পাংথোক্লিবা অসিগী মনুংদা নখোয়গী শক্তম উরি। ঙসিদি লৈবাক অসিদা অদোম্না  অৱাবা অমগী মথংদা অমা থেংনরিবা অসিগী মরুমদা ঐহাক্না অদোমগী শক্তম উবা ফংই। লৈবাক অসিনা ঙসি থম্লিবা পান্দম অসিগী পন্থুংফম ফংনবা শক্তি অদু লৈবাক অসিনা ফংলগনি। মসি পাংথোক্কদবা মীশক অদু অদোম্নি অমসুং অদোম্না শোইদনা পাংথোক্কদবনি। মসিগী লোয়বা নাইদ্রবা ওইথোকপা য়াবা অসি অদোমগীনি অমসুং মসি মংফাওনহনবদা অদোম্না অচৌবা থৌদাং লৌগদবনি। লৈবাক অসিনা নীংতম্বগী চহি ১০০ শুবগী কুমওন থৌরম পাংথোকপদা, মদুগী মাই পাকপা অদুদা অদোমগী হুমাং  মমল অমসুং অদোমগী হোৎনবা কনবা অদু মশক তাক্কদৌরিবনি। ভারত অসি মরোমদোম লেপ্পা ভারত অমা ওইহন্নবা হৌখিবা চহি খরা অসিদা লৈবাক অসিনা করম্বা থবক পাইখৎখিবগে হায়বা অদোম্না ময়েক শেংনা খংলে। হৌখিবা চহি ৭ অসিদা, স্তার্ত অপ ইন্দিয়া গুম্বা প্রোগ্রামশিং লৈবাক অসিদা হৌদোকখ্রে। অতল ইনোভেসন মিসন অমসুং পি.এম. রিসর্চ ফেলোশীপকী খুত্থাংদা লৈবাক অসিনা নহাশিংগী অনৌবা এভেন্যুশিং শেমগৎলি। ফ্যুচরিস্তিক তেম্পারেমেন্তকা লোয়ননা অনৌবা চারোল অমগী শেম শাবা অসি নেস্নেল এদিকেসন পোলিসীনা হৌদোকলে। ইজ ওফ দুইং ব্যুজিনেস ফগৎহল্লে, পোলিসীশিংদা অথীংবা লৌথোকখ্রে, অতেনবা মতমগী মসিগী হোৎনবশিংগী অসিগী ফল অসি ঙসিদি ঐখোয়গী ইমাংদা লৈরে। ভারতনা নীংখা তমখিবগী চহি ৭৫শুরকপা অসিদা য়ুনিকোর্ন ৭৫ হেন্না লৈরে, স্তার্ত-অপ ৫০,০০০ হেন্না লৈরে। মসিগী মনুংদা ১০,০০০দি হৌখিবা থা ৬ অসিদা খক্তা শেমখিবনি। ঙসি ভারতনা মালেমগী অনিশুবা খ্বাইদগী চাউবা স্তার্ত-অপ হব ওইরে। ঐখোয়গী আই.আই.তি.শিংগী নহাশিং খক্তনা স্তার্ত-অপ কয়া হৌদোকখ্রে। হন্দক্তা থোকখীবা রিপোর্ত অমগী মতুং ইন্না ভারতনা চাউখৎলবা লৈবাক কয়া তুংদা হুন্দোক্লমলগা মালেমগী খ্বাইদগী চাউবা অহুমশুবা য়ুনিকোর্ন লৈবাক ওইখ্রে।  

মরুপশিং,

হৌজিক মতমদা গ্লোবেলাইজেসনগী মতাংদা মীয়াম্না ঙাংনরি, মসিগী প্রোস অমসুং কোন্সকী মতাংদসু খন্নরি। অদুবু মসিগী মতাংদা চয়েৎনবা অমদি লৈতে। করম্বা ভারত মচানা ভারতকী কম্পনীশিং গ্লোবল ওইহনবা অমসুং ভারতকী প্রদক্তশিং গ্লোবল ওইহনবা পাম্লোইদগে। আই.আই.তি.শিংনা খঙবা, মফম অসিদা লৈরিবা তেলেন্ত অসিনা মফম অসিগী প্রোফেসরশিংনা কন্না হোৎনরিবা অসি খঙই, আই.আই.তি.গী নহাশিংনা শোইদনা থবক তৌরক্কনি হায়না ঐহাক্না থাজৈ। অদুগা ঙসিদি অসিগুম্বা প্রোফেস্নেলশিংগা লোয়ননা সরকারনা চৎলি হায়বসি ঐহাক্না অদোমগী মফমদা থমজগে।  

মরুপশিং,

অদোম্না খ্বাইদগী মরুওইবা ৱাফম অমা নীংশিংবীয়ু। ঙসিদগী হৌগদৌরিবা খোঙচৎ অসিদা খুদোংচাবা ফংনবা মীওই কয়ানা অশম্বা পাম্বৈ কয়া তাকপীরক্কনি। অদুবু ঐহাক্কী ওইবা পাউতাক্তি করিগুম্বা অদোম্না কমফর্ত অমসুং চেলেঞ্জগী মরক্তা খনগদবা ওইরবদি ঐহাক্না চেলেঞ্জগী মহুৎতা কমফর্ত খলহননীংই। মরমদি অদোম্না পাম্বা নত্রগা পামদবা অদোমগী পুন্সিদা অৱাবা কয়া মায়োক্নগনি। মসি কিদুনা চেনবা মীওইশিং অদুনা মসিগী অৱাবা নংই। করিগুম্বা অদোম্না শীংনবশিং মায়োক্নবা পাম্লবদি অদোম্না শাদানবা ওইগনি অমসুং শীংনবা অদুনা ‌‌‌‌‌‌‌অদোম্না তান্নগদবা অদু ওইগনি। মরম অদুনা অদোম অৱাবশিং থীদোকপা মীওই ওইগদবনি অমসুং অদোমগী অপাম্বগী মতুং ইন্না মদুগী পাম্বৈশিং পুথোরক্কদবনি। মরুপশিং নখোয় মহৈরোয় খুদিংমক আই.আই.তি.শিংগী ফাইনেস্ত তেক মাইন্দশিংনি। নখোয় খুদিংমক্না তেক্নোজী চাই, থকই অমসুং শ্বর হোনবদা শিজিন্নৈ। অদোম্না লেপ্পা লৈতনা ইনোবেসনগা লোয়নদুনা লৈ। অদুম ওইনমক মসিগী চৈরক অসিদা ঐহাক্না অদোমদা করিগুম্বা অমা হায়জনীংই। তেক্নোলোজীদা  মশাগী স্ত্রেংথ লৈজৈ, মসিদা অকাইবা পীগদবা য়াওদা অমসুং মসি অদোমগী পেসনসুনি। অদুবু তেক্নোলোজীগী মালেম অসিদা লৈরবসু অদোম্না কৈদৌনুংদা পুন্সিগী ওইবা হ্যুমেন্ত ইলিমেন্তশিং অদু কাউরোইদবনি। অদোম্না কৈদৌনুংদা অদোমগী রোবোত বর্জন ওইরোইদবনি। অদোমগী হ্যুমন সেন্সিবিলিতী, অদোমগী ইমাজিনেসন, অদোমগী ক্রিয়েতিবিতী অমসুং ক্যুরোসিতীনা ঐখোয়বু হিংহল্লিবনি। ঐখোয়না তেক্নোলোজীগী মতেং খক্তনা ফংবা ঙমদবা ঐখোয়গী পুন্সিদা থেংনরিবা পোৎলমশিং অদুসু মরুওইনা লৌগদবনি। অদোম্না শোইদনা ইন্তর্নেত ওফ থিংসতা থবক তৌরমগনি অদুবু অদোম্না ইমোসন ওফ থিংসসু কাউরোইদবনি। অদোম্না আর্তিফিসিএল ইন্তিলিজেন্স  মতংদা শোইদনা খল্লমগনি অদুবু হ্যুমন ইন্তিলিজেন্সকী মতাংদসু খনগদবনি। অদোম্না কোদিং তৌদুনা লৈরমগনি অদুবু অতোপ্পা মীওইশিংগা লোয়নদুনা লৈবসু তমগদবনি। অদোম্না তোঙান তোঙানবা মীওইশিং, তোঙান তোঙানবা কলচরগী মীওইশিংগা লোয়নবনা অদোমগী পর্সনেলিতীগী মপাঙ্গল কনখৎহনগনি। অদোমগী ব্রেন্না ইমোসন উৎলকপা মতমদা ঐচ.তি.তি.পি. ৪০৪ পেজ নোৎ ফাউন্দ ওইহল্লোইদবনি। নুংঙাইবা অমদি মীনুংশি উৎপগী মতাংদা পাসৱার্দ অমত্তা থমগনু অমসুং পুন্সিবু পেন্থোক্না হিংঙু। ঐহাক্না হরাউ তয়াম্বা শিয়র তৌবগী মতাংদা পনখিবা অসিনা অদোমদা মসিগী ৱাহৈ অসিনা ৱাফম কয়া নিংশিংহল্লমগনি। সাগর দাবা অমসুং কেরেলা কেফকী মীৱা ঙাংনবা, কেম্পস রেস্তুরেন্তকী মহাউ, ও.এ.তি.দা সি.সি.দি.এস.কী কোফী কাথী অমসুং চা অমসুং জলেবী এম.তি.দা তেক-ক্রিতি অমসুং অন্থারিনি। অদোম্না মসি য়াম্না নিংশিংলগনি। পুন্সি হায়বসি মসিগী মমিংনি। মফম হোংবা, অতোপ্পা মীওইশিং থেংনবা অমসুং লাপ্নবা অদুবু পুন্সি হায়বসি অসিনি। মসিবু চরাইবেতী চরাইবেতী চরাইবেতী হায়না কৌই। কোরোনা প্রোতোকোলনা মরম ওইরগা মহৈরোয় কয়ামরুম অমসু অতোপ্পা লেকচর হোলদগী শরুক য়ারি অমসুং ঐহাক্কী ৱা তারি হায়বা ঐহাক্না খংই। করিগুম্বা অদোমগী অয়াবা য়াওরবদি অমসুং অদোমগী প্রোতোকোলদা অকাইবা লৈত্রবদি ঐহাক্না মখোয়গা হকথেংননা উনবা পাম্মি। অদোমগী পুন্সিদা মাই পাকপা ওইয়ু, লৈবাক অসিগী মিংচৎ পুরকপা ওইয়ু হায়বা য়াইফ-মংগোল অসিগা লোয়ননা ঐহাক্কী ৱারোল অসি তেনশিল্লগে। অমুক্কা হন্না য়াইফ-মঙ্গোল পীজরি। থাগৎচরি!

***