ভারতকী প্রধানমন্ত্রী

খুরুমজরি!

কারবারগী লুচিংশিং,

শক্নাইরবা মীওইশিং,

ঐহাক্না য়ু.এস.-ইন্দিয়া ব্যুজিনেস কাউন্সিলবু “ইন্দিয়া আইদিয়া সম্মিৎ”তা ৱাফম খরা ফোংদোক্নবা হায়রকপগীদমক্তা থাগৎপা ফোংদোক্লি। চহীসিদা য়ু.এস.আই.বি.সি.গী মপোক কুমওন ৪৫শুবগীশু নখোয়বু থাগৎলি। হৌখিবা দিকেদ খরা অসিদা য়ু.এস.আই.বি.সি.না ভারত অমসুং য়ু.এস.এ.গী কারবারগী মরীবু নকশিন্ননা পুরক্লি। য়ু.এস.আই.বি.সি.গী চহীসিগী আইদিয়া সম্মিৎকী হীরম্বু “অফবা তুং লমচৎ অমা শেম্বা” অসিসু য়াম্না চান্নবা অমনি।

মরূপশিং,

মালেম অসিনা অফবা তুং লমচৎ অমগী তঙাই ফদবা লৈরে হায়বসি ঐখোয় পুম্নমক্না য়ানরবা ৱাফম্নি। অমসুং মসিবু মশক থোকহনবা অসিসু ঐখোয় পুম্নমক্না হোৎনমিন্নগদবনি। ঐখোয়না লাক্কদৌরিবা মতম অসিদা থাংগদবা খোংথাংশিং অসি মীওইবা খুন্নাইদা য়ুম্ফম ওইগদবনি হায়বসি ঐহাক্কী অচেৎপা থাজবনি। ঐখোয়গী শাহৌ লৌবগী থৌওং অসিদা লায়রবা অমসুং শোত্থরবশিংবু ময়ায় ওইবা মরু ওইবা মফমদা থমগদবনি। “নুংঙাইনা হিংবা” হায়বসিসু “নুংঙাইনা কারবার তৌবগা” চপ মান্ননা মরু ওই।

মরূপশিং,

হন্দক্কী থৌদোকশিং অসিনা মালেমগী শেন্মিৎলোন অসিনা নীংথিজনা থবক তৌবা অমসুং করিগুম্বা অমদগী খ্বাইদগী হেনবা কান্নবা লৌবদা কা হেন্না মিৎয়েং চংলে হায়বসি ঐখোয় খুদিংমক্তা তাকপিরে। নীংথিনা থবক তৌবা অসি য়াম্না ফবা অমনি। তৌবতবু ঐখোয়না মসিগা চপ মান্ননা মরু ওইবা অমদি খন্নবদা য়াওদ্রে। মদুদি মপানগী থৌওংশিংনা থোকহনবা খুদোংচাদবশিংগী মায়োক্তা নীংহন্নবা লৈতনা থেংনবা অদুনি। মালেমগী লায়চৎ অসিনা নীংহন্নবা লৈতনা হল্লকপগী কান্নবা অসি ঐখোয়দা খংহল্লে।

মরূপশিং,

মালেমগী শেন্মিৎলোন হিংগৎহন্নবা নীংহন্নবা লৈতনা হোৎনবা অসিদি লৈবাক অমগী কল্লবা শেন্মিৎলোনগী মতিকশিংদগী ফংহনবা ঙমগনি। মসিনা হায়বদি লৈবাক অমগী ওইবা পোত্থোক পুথোকপগী, শেলথুমগী পথাপকী ফিভম ফগৎহনবা অমসুং ইন্তর্নেস্নেল ত্রেদপু তোঙান তোঙালহনবা হায়বনি।

মরূপশিং,

নুংঙাই য়াইফবা অমসুং নীংহন্নবা লৈতবা মালেম অমা ওইহন্নবা ভারতনা ‘আত্মানির্ভর ভারত’কী খোল্লাওগী খুত্থাংদা তেংবাংলি। অমসুং মসিগীদমক্তা ঐখোয়না নখোয়না খুৎশম্নরকপবু ঙাইরি।

মরূপশিং,

ঙসিদি মালেম্না ভারত্তা থাজবা থম্লি অমসুং মসিগী মরমদি ভারতনা তরাম্না ওকপা, খুদোংচাবা ফংহনবা অমসুং হীরম কয়াগী মনুংদগী অপাম্বা খনবা য়াবগী নীংথিরবা অপুনবগী মওং অমা পীবগীনি। ঐহাক মসিবু শন্দোক্না তাকচগে। ভারতনা মীয়াম অমসুং লৈঙাক্তা ৱাখল চাউথোকপগী থৌওং পাংথোকই। তরাম্না ওকপা ৱাখলনা তরাম্না ওকপা কৈথেল শেম্মি। তরাম্না ওকপা কৈথেলনা নুংঙাই য়াইফবশু হেন্না পুরকই। মসিগী হীরমশিং অসিদা ভারত অমসুং য়ু.এস.এ. অনিমক্না য়ানরি।

মরূপশিং,

হৌখিবা চহী তরুক্তা ঐখোয়গী শেন্মিৎলোন অসি তরাম্না ওকপগী মওং চেনবা অমসুং অফবগীদমক শেমদোকপদা পান্দম থম্বা অমা ওইহন্নবগীদমক্তা হোৎনদুনা লাক্লি অমসুং শেমদোকপা অসিনা চাংদম্নবা হেনগৎহনবা, ময়েক শেংবা হেলহনবা, দিজিতাইজেসন তৌবা হেলহনবা, অনৌবা থৌওং পাক শন্না পাংথোকপা অমসুং তং তাবা পোলিসী অমা ওইহনবদা তেংবাংলি।

মরূপশিং,

ভারত অসি খুদোংচাবশিংগী মফম অমা ওইরক্লি। তেক সেক্তরগী মতাংদা ঐহাক খুদম অমা পীজগে। য়াম্না নুংঙাইবা রিপোর্ত অমা হন্দক্তা ভারত্তগী লাকই। মসিদা হায়রিবসি, খ্বাইদগী ইহান হানবা ওইনা ভারত্তা শহরগী মফমদা লৈবা মীওইশিংনা ইন্তর্নেৎ শিজিন্নবদগী খুঙ্গংগী মীওইনা ইন্তর্নেৎ শিজিন্নবনা হেল্লি । পাক চাউবা অসি অমুক্তা খন্থবীয়ু। লৈবাক অসিদা ইন্তর্নেত তত্তনা শিজিন্নবা মীওই বিলিয়ন তংখায় অমা লৈরে। মীওই বিলিয়ন তংখায় অমা অমগা অমগা ইন্তর্নেৎনা  শম্নহল্লবা। মসি য়াম্না পাক চাউই হায়না খনবরা? মসিমগা তাবীয়ু।  হৌজিক মীওই বিলিয়ন তংখায় অমা অমগা অমগা ইন্তর্নেৎনা শম্নরবনি। ৫জি., বিগ দেতা এনালাইতিক্স, ক্বান্তম কম্প্যুতিং, ব্লোক-চেন অমসুং ইন্তর্নেৎ ওফ থিংশকুম্বা ফ্রন্তিয়র তেক্নোলোজীগী খুদোংচাবশিং অসি তেক্নোলোজীগী খুদোংচাবশিংগী মনুংদা য়াওরবনি।

মরূপশিং,

ভারত্তা তোঙান তোঙানবা হীরমশিংদা শেল থাদবগী খুদোংচাবা কয়া অমা পাক শন্না লৈরে। ঐখোয়গী লৌউবশিংনা কন্না হোৎনরিবা অসিদা শেল থাদরক্নবা ভারতনা হায়জরি। লৌউ-শিংউগী সেক্তরদা হন্দক্তা পুৱারী ওইরবা শেমদোকপশিং খরা পাংথোকখ্রে। শেল থাদবগী খুদোংচাবা ফংগদবা হীরম খরা লৈঃ এগ্রিকলচর ইনপুৎ অমসুং মেছিনরী,  এগ্রিকলচর সপ্লাই চেন শেন্নবা, চাবা য়ারবা চিঞ্জাক্কী পোত্থোকশিং, ফিশরী অমসুং ওর্গানিক্কী পোত্থোকশিং। ইং ২০২৫ ফাওবগী মনুংদা ভারতকী ফুদ প্রোসেসিং সেক্তর অসি ত্রিলিয়ন দোল্লর তংখায় ওইরগনি।  শেন্দান য়াম্না তানগে হায়রবদি ভারতকী লৌউ-শিংউগী সেক্তরদা লৈরিবা খুদোংচাবশিং লৌবগী খ্বাইদগী চানবা মতম অসি হৌজিক্নি।

হেলথকেয়রদা শেল থাদরক্নবা ভারতনা হায়জরি। ভারতকী হেলথকেয়র সেক্তর অসি চহী খুদিংগী ২২%গী চাংদগী হেন্না চাউখৎলক্লি। মেদিকেল-তেক্নোলোজী, তেলি-মেদিসিন অমসুং দাইগ্নোস্তিক্সকী মতাংদা ঐখোয়গী কম্পেনীশিং অসি য়াম্না চাউখৎলক্লি। ভারত অমসুং য়ু.এস.না ফার্মা সেক্তরদা হান্ননা চাউরবা খুৎশম্নবগী মওং অমা শেমদুনা লৈরবনি। পাক-চাউবা অমসুং খোংজেল থুবা কান্নবা ফংনীংলবদি হৌজিক্কী মতম অসি ভারতকী হেলথকেয়র সেক্তরদা শেল থাদবদা পাকথোক চাউথোকপগী খ্বাইদগী ফবা মতম্নি। 

ইনর্জীদা শেল থাদরক্নবা ভারতনা হায়জরি। ভারতনা গ্যাস্তা য়ুম্ফম ওইবা শেন্মিৎলোন অমা ওইরকপগা লোয়ননা য়ু.এস.কী কম্পেনীশিংনা শেল থাদবগী খুদোংচাবা য়াম্না লৈরগনি। ক্লিন ইনর্জী সেক্তরদসু য়াম্লবা খুদোংচাবা কয়া অমা লৈ। নখোয়না শেল থাদরক্লিবা অদুগী মতিক য়াম্না লৈহনগে হায়রবদি মসিগী মতম অসি ভারতকী পাৱর সেক্তরদা চংশিল্লকপগী খ্বাইদগী ফরবা মতমনি।

ইনফ্রাস্ত্রকচরদা শেল থাদরক্নবা ভারতনা হায়জরি। ঐখোয়গী লৈবাক অসিনা পুৱারীদা খ্বাইদগী চাউবা ইনফ্রাস্ত্রকচর শেমগৎ শাগৎপগী থব চত্থরি। লাকপিরো অমসুং ঐখোয়গী লৈবাক্কী মিলিয়ন কয়াগী য়ুম শাবা নত্ত্রগা শোরোক, হাইৱে অমসুং হিথাংফম শেম্বগী খোঙলোয় ওইবিরো।

সিবিল এবিএসন অসিসু শাহৌ চাউনা লৌবা য়াবা মফম অমনি। মথংগী চহী ৮গী মনুংদা এয়র পেসেঞ্জরগী মশিং অসি শরুক অনি হেনগৎলগনি হায়না পানরি। লাক্লিবা দিকেদ খরা অসিদা লমদমসিগী মকোক থোংবা লন্নাইগী এয়রলাইনশিংনা অনৌবা এয়রক্রাফত ১০০০মুক লৈবগী থৌরাং য়াৎলি। ভারত্তা মেন্যুফেকচরিং ফেসিলিতী লিংখৎনীংবশিংগী ওইনদি মসিনা শেল থাদবগী য়াম্না চাউবা খুদোংচাবা অমনি অমসুং মসিদগী মফম অসিগী মার্কেৎশিংদা পোত্থোক থাদোক থাজিন তৌবগী বেজ ওইনশু শিজিন্নবা য়াগনি। মসিগা মান্ননা শেমদোক-শেমজিন তৌবগী ফেসিলিতী হাংদোক্নিংবশিংগীশু মসিদা শেল থাদবদা খুদোংচাবা কয়া ফংগনি। নখোয়গী এবিএসনগী পান্দমশিংদা মশা পালহনগে হায়রবদি ভারতকী এবিএসন সেক্তরদা শেল থাদবগী খ্বাইদগী ফবা মতম অসি হৌজিক্নি।

দিফেন্স অমসুং স্পেস্তা শেল থাদরক্নবা ভারতনা হায়জরি। দিফেন্স সেক্তরদা শেল থাদবগী ওইনা থম্বা এফ.দি.আই. কেপ অসি ৭৪% ফাওবা ঐখোয়না হেনগৎলে। দিফেন্সকী খুৎলায়শিং অমসুং প্লেৎফোর্মশিং শাবদা পুক্নিং থৌগৎনবা দিফেন্স কোরিদোর অনিশু ভারতনা হাংদোকখ্রে। লন্নাই অমসুং ফোরেন ইনবেস্তরশিংগী অখন্নবা ইন্সেন্তিবশু ঐখোয়না পীরি। চয়োল খরগী মমাংদা স্পেস সেক্তরগী হীরমশিংদা মশক থোকপা শেমদোকপগী থবক কয়া পাংথোকখ্রে। লাকপিরো, মসিগী হৌগৎলক্লিবা সেক্তর অসিগী শরুক অমা ওইরসি।

ফাইনান্স অমসুং ইন্স্যুরেন্সতা শেল থাদরক্নবা ভারতনা হায়জরি। ইন্স্যুরেন্সতা থম্লম্বা এফ.দি.আই. কেপ অসি ৪৯%দা ভারতনা হেনগৎলে। হৌজিক্তি ইন্স্যুরেন্স ইন্তর্মেদিএরীদা শেল থাদবগী ওইনদি এফ.দি.আই.গী ১০০% অয়াবা পীরে। ভারতকী ইন্স্যুরেন্স মার্কেত অসি ১২%গী চাংদগী হেন্না শাহৌ লৌরি অমসুং ইং ২০২৫ ফাওবগী মনুংদা বিলিয়ন দোল্লর ২৫০ ফাওবগী চাংদা হেনগৎলগনি হায়না পানরিবনি। ঐখোয়গী হেলথ এস্যুরেন্স স্কিম ‘অয়ুশমান ভারত’; ঐখোয়গী লৌরোক্কী ইন্স্যুরেন্স স্কিম ‘পি.এম. ফসল বিমা য়োজনা’ অমসুং ঐখোয়গী সোসিএল সেক্যুরিতী স্কিম ‘জন সুরক্সা’না মায় পাকপদগী সরকারনা ইইন্স্যুরেন্সকী প্রদকশিং য়াম্না থুনা মীয়াম্না লৌশিন্নবা ফিভমশু শিনখ্রবনি। হকশেল, লৌউ-শিংউ, কারবার অমসুং লাইফ ইন্স্যুরেন্সতা ইন্স্যুরেন্স কবর হেনগৎনবা মশিং থিঙমদ্রবা খুদোংচাবা কয়া অমশু লৈরি। মতম শাংনা অমসুং শোইদনা শেন্দান ফংগে হায়রবদি হৌজিক্কী ওইবা খ্বাইদগী ফবা শেল থাদফম অসি ভারতকী ইন্স্যুরেন্স সেক্তরনি।

ঐহাক্না নখোয়না খনবা য়াবা হীরম খরা শেল অমত্তা লৌদনা হায়রবনি।

মরূপশিং,

কৈথেলশিংনা হাংলকপা মতমদা, খুদোংচাবশিংনা য়াম্লকপা মতমদা অমসুং খন্ননবা হীরমশিংনা য়াম্লকপা মতমদা মায় পাকপা অসি কয়া য়াম্না লাপ্লিবগেনে! ভারতনা কারবারগী তৌবগী থাক্কী মকোক মথংদা ৱাংনা কারকপা মতমদা মসিগী মায় পাকপগী থাজবা অসি উবা ফংগনি। মরু ওইনা, ৱর্ল্দ বেঙ্ককী রেঙ্কিংদা ভারতকী “কারবার তৌবগী নুংঙাইবা”গী থাক ৱাংখৎলকপা অসি য়েংবীয়ু।

শেল থাদবা অসিনা থাজৈ হায়বা উৎপগী খ্বাইদগী মতিক চাবা মওংনি। চহী খুদিংগী ওইনা ভারতনা এফ.দি.আই.দা মশক থোকপা ৱাংখৎপগী চাং য়ৌবা ঙম্লি। মথং লাকপা চহীনা মমাংদগী চাং য়াম্না হেন্দুনা লাক্লি। ভারতকী ইং ২০১৯-২০গী এফ.দি.আই. ইনফ্লো অসি বিলিয়ন দোল্লর ৭৪নি। মসি মমাংগী চহীদগী ২০% হেনগৎপনি। য়ু.এস.আই.বি.সি.দা মরূপশিংনা হায়বিরকপদা চহীশিগী ওইনা ঐখোয়দা শেল থাদরগনি হায়না লেপ্লবশিং অসি বিলিয়ন দোল্লর ৪০ হেল্লে হায়রি। মসিগা লোয়ননা হৌজিক চত্থরিবা লায়চৎ অসিগী মনুংদা করি থোকখিবগে হায়বদু য়েংবীয়ু। লায়চৎ অসিগী মনুংদসু চহী অসিগী এপ্রিল অমসুং জুলাইগী মনুংদা মপান লমদ্গী বিলিয়ন দোল্লর ২০দগী হেন্না শেল থাদরক্নবগী পুক্নিং চিংশিনবা ঙম্লবনি।

তৌবতবু ভারতনা অতোপ্পা খুদোংচাবা কয়া অমশু পীরি। মালেমগী শেন্মিৎলোন অসিবু নৌনা অমুক ফহল্লকপা ঙম্বগী মতিক ঐখোয়দা লৈ।

মরূপশিং,

ভারতনা চাউখৎলকপা হায়বসি থাজবা য়াবা লৈবাক অমগা ললোন ইতিক্কী হীরমদা মরী লৈনবগী খুদোংচাবা ফংবা হেনগৎলকপা; তরাম্না ওকপা হেনগৎপগা লোয়ননা মালেমগী থাক্তা পুনমিন্ননবা; পাক চাউথোকপগী খুদোংচাবা পীবা মার্কেত্তা চাংদম্নবা হেনগৎহনবা অমসুং হৈ-শিংলবা মীওই কয়া ফংদুনা শেল থাদবগী মহৈ হেনগৎলকপা হায়বনি।

মরূপশিং,

মসিগী মংলান অসিগীদমক্তা য়ুনাইতেদ স্তেৎস ওফ অমেরিকাদগী হেন্না ফবা খোংলোয় কয়া লৈতে। ভারত অমসুং য়ু.এস.এ. অসি ৱাখল্লোন মান্নবা মতিক মগুন লৈবা গনতন্ত্র চৎপা লৈবাক অনিনি। ঐখোয় অসি মহৌশাগী ওইবা খোংলোইনি। মমাং মমাংদসু ভারত-য়ু.এস. খুৎশম্নদুনা থবক কয়া অমা পাংথোকখ্রে। হৌজিক্তি খুৎশম্নবা অসিনা মালেম্বু লায়চৎ অসিগী মতুংদা য়াম্না থুনা ফগৎহল্লক্নবা মরু ওইবা থৌদাং লৌবগী মতম ওইরবনি। অমেরিকাগী শেল থাদবশিংনা সেক্তর অমদা নত্ত্রগা লৈবাক অমদা চংনবা মতাং চাবা মতম ঙাইদুনা লৈনৈ। মখোয়দা ঐহাক্না হায়নীংবদি ভারত্তা শেল থাদবগী ওইনা হৌজিক্কী মতমসিদগী হেন্না ফবা মতম লৈখিদ্রি হায়বসিনি।

ঐহাক্না অমুক হন্না য়ু.এস.আই.বি.সি.গী মকোক থোংবশিংবু ভারত-য়ু.এস.কী শেন্মিৎলোনগী হীরমদা খুৎশম্নববু খুমাং চাউশিলহন্নবা হোৎনবগী থাগৎলি। য়ু.এস.আই.বি.সি.না অনৌ অনৌবা থবক হেন্না পাংথোকপা ঙম্বা ওইরসনু।

ভারত-অমেরিকাগী নুংশি চান্নবা অসি তুংদসু অমুক্কা হেন্না হেনগৎপা ওইরসনু।

নমস্তে!

থাগৎচরি!