ভারতকী প্রধানমন্ত্রী

রাজ্যগী রাজ্যপাল, শ্রী থাৱরচন্দ গহলোৎজী, মুখ্য মন্ত্রী শ্রী বসবরাজ বোম্মৈ, শ্রী য়দুবীর কৃষ্ণা দাতা চামরাজা ৱাদীয়ারজী, রাজমাতা প্রমোদা দেবী, মন্ত্রী শ্রী সর্বানন্দ সোনোৱালজী, লৈবাক অসিগী অমদি মালেম শিনবা থুংবদা লৈরিবা মীয়ামদা ৮শুবা মালেমগী য়োগ নুমিৎনা লাকপদা য়াইফ পাউজেল পীজরি।

ঙসি য়োগ নুমিৎ অসিদা ঐহাক্না কর্নাতকাগী কলচরেল কেপিতেল ওইরিবা, আধ্যাত্মিক অমসুং য়োগগী লমদম ওইরিবা, মৈসুরুবু ইকাই খুম্নবা উৎচরি। মৈসুরুগুম্বা ভারতকী আধ্যাত্মিককী মফমশিংদা চহিচা কয়া শেমগৎলকপা য়োগগী শক্তি অসিনা ঙসিদি মালেমগী ওইনা হকচাং ফনা লৈনবা লম্বী তাক্লি। ঙসিদি য়োগ অসি মালেমগী তেংবাং পীননবা য়ুম্ফম অমা ওইরি। ঙসিদি য়োগনা মীওইবা জাতিদা হকচাং ফবা পুন্সি অমা হিংনবগী থাজবা অদু পীরি।

চহি খরগী মমাংদা য়ুম, আধ্যত্মিক সেন্তরশিংদা খক্তা য়োগ তৌরম্বা উবা ফংলম্বা অদু ঙসিদি মালেমগী কাচিন-কোয়া খুদিংমক্তগী ঙসি অয়ুক পিকচরশিং উবা ফংলি। পিকচরশিং অসি স্পিরিচুএল রিএলাইজেসন পাকথোক-চাউথোরকপগী মমিশিংনি। পিকচরশিং অসি মশা-মথন্তা, মহৌশানা অমসুং মান্নবা মীওইবগী ৱাখল খন্থবা ঙম্বা মতৌ অদুগী পিকচরশিংনি। মরু ওইনা মালেম অসিনা হৌখিবা চহি অনি অসিদা চহিচা অমদা থোকপা লাইচৎ মায়োক্নরিবা তানফম অসিদা মরু ওই। ফীভমশিং অসিদা য়োগ নুমিৎকী থৱায় য়াওবা অসি লৈবাক, ইথৎ, মহাদীপকী ঙমখৈশিং অসিগী মথক্তা ঐখোয়গী মরু ওইবা অমগী খুদমসু ওইরি।

য়োগ অসি হৌজিক মালেমগী কুহ্মৈ অমা ওইরে। য়োগ অসি লনাই মীওইগী নত্তে, মসি অপুনবা মীওইবা জাতিগীদমক্নি। মরম অসিনা হন্দক্তি মালেমগী য়োগ নুমিৎকী থীম অসি – য়োগ ফোর হ্যুমেনিতীনা ওইরি! ঐহাক্না য়ুনাইতেদ নেসন্স অমসুং লৈবাক পুম্নমক্তা থীম অসিগী খুত্থাংদা মীওইবা জাতিদা য়োগগী পাউজেল য়ৌহনবগীদমক থাগৎপা ফোঙদোকচরি। ঐহাক্না ভারত মচা পুম্নমক্কী মহুৎ শিন্দুনা মালেমগী প্রজা পুম্নমক্তসু থাগৎপা ফোঙদোকচরি।

মরুপশিং,

য়োগগীদমক ঐখোয়গী ঋসিশিং, ঐখোয়গী মুনিশিং, ঐখোয়গী আচার্য়াশিংনা হায়রমখি মদুদি – “শান্তিম য়োগেন বিন্দতি”।

হায়বদি য়োগনা ঐখোয়দা শান্তি ফংহল্লি। য়োগদগী ফংলিবা শান্তি অসি শুপ্নতগী মীওই খরগী নত্তে। য়োগনা ঐখোয়গী খুন্নাইদা শান্তি পুরকই। য়োগনা ঐখোয়গী লৈবাকশিং অমসুং মালেমদা শান্তি পুরকই। অমসুং, য়োগনা তাইবংপালদা শান্তি পুরকই। কনাগুম্বা অমদা মসি য়াম্না হকচিংন্না লৌরম্বা য়াই, অদুবু ঐখোয়গী ভারতকী মুনিশিংনা অরাইবা মন্ত্রগা লোয়ননা মসিগী পাউখুম পীবীরমখি – “য়ত পির্দে তত ব্রহ্মাদে

তাইবংপাল পুম্বা অসি ঐখোয়গী হকচাং অমসুং থৱায়দগী হৌরকই। তাইবংপাল অসি ঐখোয়দগী হৌরকই। অমসুং, য়োগনা ঐখোয়গী নুংদা লৈরিবা পুম্নমক অসি খঙহল্লি অমসুং ৱাখল তাহল্লি। মসি সেল্ফ-এৱের্নেসকা লোয়ননা হৌরকই অমসুং মালেমদা এৱের্নেস পীনবা মাইকৈদা চংশিলজলি। ঐখোয়না ইশা অমদি ঐখোয়গী মালেমগী মরমদা খঙলবা মতমদা ঐখোয়না ইশা অমদি মালেমদা অহোংবা পুরকপা মথৌ তাবা পোৎশিং খঙবা হৌরকই।

মসি লনাইগী পুন্সি মহিংগী সমস্যা নত্ত্রগা ক্লাইমেৎ চেঞ্জ অমসুং ইন্তর্নেস্নেল কনফ্লিকশিংগুম্বা মালেমগী শীংনবশিং ওইবা য়াই। য়োগনা ঐখোয়দা শীংনবশিং মায়োক্নবা ঙম্নবা ৱাখল তাহল্লি, কম্পিতেন্ত ওইহল্লি অমসুং মীনুংশিং পোকহল্লি। মান্নবা ৱাখল্লোনগা লোয়ননা মীওই কয়ানা, নুংগী ওইবা শান্তি ফংলবা মীওই কয়ানা শান্তি লৈবা মালেম অমা ওইহল্লি। অসুম্না য়োগনা মীয়ামবু শম্নহল্লি। অসুম্না য়োগনা লৈবাকশিংবু শম্নহল্লি। অমসুং অসুম্না য়োগনা ঐখোয় পুম্নমক্কী প্রোব্লেম সোলভর অমা ওইরি।

মরুপশিং,

ভারত্তা হন্দক্তি য়োগ নুমিৎ অসি লৈবাক অসিনা নিংতম্বা ফংখিবগী চহি ৭৫ শুরকপগী থৌরম, অমৃত মহোৎসব পাংথোকপা মতম অসিদা পাংথোক্লি। য়োগ নুমিৎ পাকশন্না পাম্নরকপা অসি ভারতকী নিংতম ইহৌদা থৌনা পীখিবা ভারতকী অমৃত ৱাখল্লোন পাম্নরকপনি

ৱাখল্লোন অসি সেলেব্রেৎ তৌনবা, ঙসি লৈবাক অসিগী তোঙান-তোঙানবা সহর ৭৫গী পুৱারী ওইরবা মফম ৭৫দা পাঙথোকপগী মথক্তা অতোপ্পা সহরশিংগী মীওইশিংনা পুৱারী ওইবা অতোপপা মফমশিংদসু য়োগ তৌরি। ভারতকী পুৱারী উহৌবা পুৱারী ওইরবা মফমশিং, কলচরেল ইনর্জীগী সেন্তর ওইরিবা মফমশিং অসিনা ঙসি য়োগ নুমিৎকী খুত্থাংদা অমত্তা ওইনা পুল্লরি।

মৈসুরু পেলেসকীসু পুৱারীদা মশাগী ওইবা অখন্নবা মফম অমা লৈজৈ। ভারতকী পুৱারিগী মফমশিংদা পুন্না য়োগা শানবা উৎপা অসি ভারতকী মাঙলমচৎ, ভারতকী তোঙান-তোঙানবা শক্তমশিং অমসুং ভারতকী পাক-চাউবা অসি অমতা ওইনা পুনশিনবনি। মালেমগী থাক্তসু ঐখোয়না হন্দক্তি মালেম শিনবা থুংবদা “গর্জিয়ন রিং ওফ য়োগ”গী মান্নবা অনৌবা পাম্বৈ অসি শীজিন্নরি। মালেমগী তোঙান-তোঙানবা লৈবাকশিংদা নুমিৎ থোরকপগা লোয়ননা, নুমিৎকী খোঙচৎকা লোয়ননা, মীয়াম্না য়োগ তৌরি। নুমিৎ থোরকপগা লোয়ননা তোঙান-তোঙানবা লৈবাকশিংগী মীওইশিংনা নুমিৎকী অহানবা মঙালগা লোয়ননা অমত্তা ওইনা পুনশিল্লি, য়োগগী রিং অমা মালেম শিনবা থুংবদা শেম্লি। মসি গর্জিয়ন রিং ওফ য়োগনি। য়োগা শানবা অসি হকচাং ফবা, বেলেন্স অমসুং মতেং পাংনবগীদমক অঙকপা থৌনা পীরি।

মরুপশিং,

মালেমগী মীয়ামগীদমক য়োগ অসি শুপ্নগী ঐখোয়গী পুন্সিগী শরুক ওইবা খক্তা নত্তনা য়োগনা হৌজিক পুন্সিগী লম্বী ওইরক্লি। ঐখোয়গী নোংমগী পুন্সি অসি য়োগদগী হৌরকই, মসিদগী হেন্না ফবা অতোপ্পা লম্বী লৈবরা? অদুবু ঐখোয়না য়োগগী অকক্নবা মতম অমদি মফম থমলোইদবনি। ঐখোয়গী য়ুমগী অহলশিংনা, ঐখোয়গী য়োগ প্রেক্তিস্নরশিংনা প্রানায়াম অসি তোঙান-তোঙানবা মতমশিংদা তৌই। মীওই কয়ানা থবক তৌরিঙৈ মনুংদা মতম খরা মখোয়গী ওফিসত দন্দাসন তৌই, মতুংদা অমুক হন্না থবক তৌবা হৌই। ঐখোয়না ফনা ৱাখল ৱারবসু, মিনিত খরা ধ্যান তৌবনা ঐখোয়বু ৱাখল পোথাহল্লি, ঐখোয়গী প্রদক্তিবিতী হেনগৎহল্লি।

মরম অসিনা ঐখোয়না য়োগ অসি অহেনবা থবক অমনি হায়না লৌরোইদবনি। ঐখোয়না য়োগ খঙবা তাই, ঐখোয়না য়োগ হিংহনবা তাই। ঐখোয়না য়োগ তৌবা তাই, ঐখোয়না য়োগ অসি লৌশিনবা তাই। অমসুং ঐখোয়না য়োগগা লোয়ননা হিংবা মতমদা য়োগগী নুমিৎ অসি ঐখোয়না য়োগ শান্নবা নুমিৎ অমা ওইহল্লোইদবনি, মসি ঐখোয়গী হকচাং ফবা, নুংঙাইবা অমসুং শান্তিগী হরাওবা ফোঙদোকপা নুমিৎ ওইহনগদবনি।

মরুপশিং,

ঙসিদি য়োগগা মরী লৈনবা মশিং থীঙমদ্রবা কান্নবশিং অসিগী মতাংদা খঙবা মথৌ তারে। ঙসিদি ঐখোয়গী নহারোলশিং অসিনা য়োগগী লমদা অনৌবা ৱাখল্লোন কয়ামরুম পুদুনা লাক্লি। মসিগী লম অসিদা আয়ুশ মন্ত্রালয়না ঐখোয়গী লৈবাক অসিদা ‘স্তার্তঅপ য়োগ চেলেঞ্জ’সু হৌদোকখ্রে। য়োগগী হৌখ্রবা, চৎলিবা খোঙচৎ অমসুং য়োগগা মরী লৈনবা কান্নবশিং উৎনবা মৈসুরুগী দসহরা গ্রাউন্দদা ইনোবেতিব দিজিতেল একজিবিসন অমা পাংথোক্কনি।

ঐহাক্না লৈবাক অসিগী, মালেম অসিগী নহারোলশিংদা অসিগুম্বা খোঙথাংশিং অসিদা য়াওশিনবীনবা হায়জরি। ঐহাক্না প্রাইম মিনিস্তর্স এৱার্দস ফোর আউতস্তেন্দিং কন্ত্রিব্যুসন ফোর প্রমোসন এন্দ দিবেলপমেন্ত ওগ য়োগগীদমক ইং কুমজা ২০২১গী ৱিন্নরশিংদা থাগৎপা ফোঙদোকচরি। য়োগগী লোইনাইদ্রবা খোঙচৎ অসিনা অসুম্না লোইনাইদ্রবা তুংলমচৎকী মাইকৈদা মখা তানা চংশিনখিগনি হায়না ঐহাক্না থাজৈ। 

‘সর্বে ভবন্তু সুখিন, সর্বে সন্তু নিরাময়’গী ৱাখল্লোনগা লোয়ননা য়োগগী খুত্থাংদা ঐখোয়না হকচাং ফবা অমসুং শান্তি লৈবা মালেম ওইহন্নবা খোঙজেল য়াংনা চংশিনগনি। ৱাখল্লোন অসিগা লোয়ননা ঐহাক্না পুম্নমক্তা য়োগ নুমিৎকী য়াইফ-পাউজেল পীজরি।

হন্না-হন্না থাগৎচরি।

*****