ভারতকী প্রধানমন্ত্রী

খুরুমজরি,

হরিয়ানাগী মুখ্য মন্ত্রী, শ্রী মনোহর লাল খত্তারজী, কেন্দ্রগী হকশেল মন্ত্রী, শ্রী মন্সুখ মন্দাবিয়াজী, কেন্দ্রগী হকশেলগী রাজ্য মন্ত্রী, দা. ভারত্তি পাৱরজী, হরিয়ানাগী হকশেল মন্ত্রী, শ্রী অনিল বিজজী, ইনফোসিস ফাউন্দেসনগী চিয়রপর্সন শ্রীমতি সুধা মুর্তীজী, পার্লিয়ামেন্তগী ঐহাক্কী মরুপশিং, লেজিস্লেচরশিং, অতৈ দিগ্নিতরীশিং অমসুং ঐহাক্কী ইচিল-ইনাওশিং।

ঙসি ২০২১গী ওক্তোবর ২১ অসিদা পুরারী অমা  শেমখ্রে। ভারতনা হৌজিক্তগী পুংজা খরগী মমাংদা ভেক্সিন দোজ করোর ১০০ কাপখিবগী পন্দুপ লানখ্রে। চহি ১০০দা থেংনবা খ্বাইদগী চাউবা লাইচৎ অসি লাকশিন্নবা হৌজিক করোর ১০০গী ভেক্সিন দোজ কাপখিবনা লৈবাক অসিদা মপাঙ্গল কনবা চুঙ্গোই অমা লৈরে। মসিগী মাইপাকপা অসি ভারতকীনি, ভারতকী প্রজা খুদিংমক্কীনি। ঐহাক্না লৈবাক অসিগী ভেক্সিন শারিবা কম্পনী পুম্নমক, ভেক্সিন পুথোক-পুশিন তৌরিবা শিন্মীশিং, ভেক্সিন দিবেলপ তৌবগী থবক তৌরিবা হেল্থ সেক্তরগী প্রোফেস্নেলশিংদা ঐহাক্না তৌবীমল খঙবা উৎচরি। মীকুপ খরগী মমাংদা ঐহাক্না রাম মনোহর লোহিয়া হোস্পিতালদা লৈবা ভেক্সিনেসন সেন্তরদগী লাকখি। থৱায় য়াওবা অমসুং অথুবদা কোরোনাবু মাইথিবা পীনবা পুন্না থৌদাং লৌবগী ৱাখল্লোন উবা ফংখি। ঐহাক্না ভারত মচা খুদিংমক্তা নুংঙাইবা ফোঙদোচরি অমসুং ঐহাক্না ভেক্সিন দোজ করোর ১০০ মাইপাক্না কাপখিবা অসি ভারত মচা খুদিংদা মনা পীজরি।

মরুপশিং,

ঙসিদি এম্স ঝজ্জরদা কেন্সর লায়েংনবা লাকপা অনাবশিংদা চাউনা খুদোংচাবা অমা ফংলে। নেস্নেল কেন্সর ইন্সতিত্যুত্তা শাখিবা বিশ্রাম সদন (রেস্ত হাউস) অসিনা অনাবশিং অমসুং মখোয়গী মরী-মতাশিংগী অৱাবা হন্থহল্লগনি। কেন্সরগুম্বা অনাবশিংগী ওইন্দি অনাবা মীওই অমদি মহাক্কী মরী-মতাশিংনা লায়েংনবা, করিগুম্বা মতমদা দোক্তরগী পাউতাক লৌনবা, তেস্ত তৌনবা, রেদিও-থেরাপী অমসুং কেমোথেরাপী তৌনবা হোস্পিতালদা তোয়না লাকপা মথৌ তাই। অসিগুম্বা ফীভম অসিদা মখোয়না কদায়দা লৈগদগে হায়বা অসি অচৌবা অৱাবা অমা ওইখি। হৌজিক্তি নেস্নেল কেন্সর ইন্সতিত্যুত্তা লাকপা অনাবা মীওইশিংগী সমস্যা অসি চাউনা হন্থরগনি। মসিনা মরু ওইনা হরিয়ানা, দিল্লী অমসুং মখোয়গা নক্নবা মফমশিং অমসুং উত্তরাখন্দগী মীয়ামদা চাউনা কান্নবা অমা ওইরগনি।

মরুপশিং,

হন্দক্তি ঐহাক্না লাল কিলাদগী ‘সবকা প্রয়াস’কী মতাংদা পনখি। করিগুম্বা সেক্তর অমা হেক্তদা অপুনবগী শক্তি লৈরবদি মীপুম খুদিংনা হোৎনরিবা অদু ময়েক শেংনা উবা ফংগনি, অদু ওইরবদি অওনবা পুরকপগী খোঙজেল অসিসু হেনগৎলক্কনি। মথোল ১০গী বিশ্রাম সদন অসি কোরোনাগী মতমগী মীওই খুদিংমক্না হোৎনবনা লোইশিনবা ঙমখি। মরু ওইনা লৈবাক অসিগী সরকার অমসুং কোর্পোরেত ৱর্ল্দনা বিশ্রাম সদন অসি শান্নবা পুন্না হোৎনখি। ইনফোসিস ফাউন্দেসন্না বিশ্রাম সদরগী বিল্দিং অসি শাখি, মসিগীদমক লম অমসুং মৈ-ঈশিংগী অচংমল এম্স ঝজ্জরনা পুথোকখি। সর্ভিস অসিগীদমক এম্সকী মেনেজমেন্ত অমসুং সুধা মুর্তিজীগী তীমবু ঐহাক্না তৌবীমল খঙবা উৎচরি। সুধাজী অসি য়াম্না চম্বা অমসুং লোয়নবা নুংঙাইবা মীশক অমনি অমসুং মহাক্না লায়রবশিংদসু চপ মান্ননা মীনুংশি উৎলি। মহাক্কী ৱাখল্লোন ‘নারায়ন সেবাগুম্না নর সেবা তৌবা’ অমসুং মহাক্কী থবক-থৌরমশিংনা মীপুম খুদিংমক্তা ইথিল পীখি। বিশ্রাম সদন অসিদা মহাক্না মতেং পাংবীখিবগীদমক মহাকপু ঐহাক্না থাগৎচরি।

মরুপশিং,

ভারতকী কোর্পোরেত সেক্তর, প্রাইবেৎ সেক্তর, সোসিএল ওর্গনাইজেসনশিংনা লৈবাক অসিগী হেল্থ সর্ভিসেস মপাঙ্গল কনখৎহন্নবা লেপ্পনা মতেং পাংদুনা লাকখি। আয়ুশ্মান ভারত – পি.এম.জে.এ.ৱাই. অসিসু মসিগী অচৌবা খুদম অমনি। স্কীম অসিগী মখাদা অনাবা মীওই করোর ২.২৫ হেন্না লেম্না লায়েংখ্রে। মসিগী লায়েংবা অসি সরকার অমদি লনাই হোস্পিতাল অনিমক্তা চত্থখি।  আয়ুশ্মান স্কীমগী মখাদা এম্পেনেল তৌখিবা হোস্পিতাল লিশিং কয়াগী মনুংদা ১০,০০০রোমদি প্রাইবেৎ সেক্তরদগী ওইখি।

মরুপশিং,

পব্লিক অমসুং প্রাইবেৎ সেক্তরশিংগী মরক্তা চুংশিন্নবা অসিনা মেদিকেল ইনফ্রাস্ত্রকচর অমসুং মেদিকেল এজুকেসন্দা অমুক্তা ওইখিদ্রিবা মওংদা চাউথোকপা ঙমখি। ঙসি ঐখোয়না লৈবাক অসিগী জিলা খুদিংমক্তা য়ামদ্রবদা মেদিকেল কোলেজ অমা লিংখৎনবা মীৎয়েং চংলিবা মতম অসিদা , প্রাইবেৎ সেক্তরগী থৌদাং অসি য়াম্না মরু ওই। পার্তনরশিপ অসিদা শাফু পীনবা মেদিকেল এজুকেসনগী গভর্নান্সতা অচৌবা রিফোর্মশিং পাইখৎখি।  নেস্নেল মেদিকেল কম্মিসন শেম্লবা মতুংদা ভারত্তা প্রাইবেৎ মেদিকেল কোলেক হাংবা অসি হেন্না লাইরে।

মরুপশিং,

ঐখোয়গী লৈবাক অসিদা হায়নবা অমা লৈ মদুদি দান তিয়া ধন না গতে, নদী না ঘতে নীর হায়বদি দান তৌবনা শেল হন্থহন্দে লোয়ননা তুরেলগী ঈশিংসু হন্থদে। মরম অসিনা অদোম্না সেবা হেন্না তৌরিবা মখৈ, দান হেন্না তৌরিবা মখৈ, অদোমগী লন হেনগৎলক্কনি। অমরোমদা ঐখোয়না পীরিবা মতেং, ঐখোয়না তৌরিবা সেবা অসি ঐখোয়গী খুমাং চাউশিন্নবা লম্বী ওই। ঐহাক্না হরিয়ানাগী ঝজ্জরগী বিশ্রাম সদন অসিনা বিশ্বাস সদন অমা ওইরক্কনি হায়না থাজবা থম্মি। মসিগী বিশ্রাম সদন অসি বিশ্বাস সদন ওইনা মথৌ তৌরক্কনি। মসিনা লৈবাক অসিগী অতোপ্পা মীওইশিংদা অসিগুম্বা বিশ্রাম সদন শানবা ইথিল পীরগনি। কেন্দ্র সরকারনা এম্স পুম্নমক্তা নাইত সেল্দরশিং শান্নবা অমসুং শারিবশিংদা মখোয়না থবক পাইখৎলি।  

মরুপশিং,

করিগুম্বা অনাবা মীওই অমদি মহাক্কী মরী-মতাশিংনা খরা পোত্থরবদি মখোয়না লাইনা অসি থেংননবা থৌনা অদুসু হেনগৎলক্কনি। ফেসিলিতী অসি পীবা অসিসু সেবা মখল অমনি। আয়ুশ্মান ভারতকী মখাদা অনাবনা লেম্না লায়েং ফংবা মতমদা মহাক্কী শেবা তৌই। মসিগী শেবা অসিনা মরম ওইরগা ঐখোয়গী সরকারনা কেন্সরগী হীদাক ৪০০রোমগী মমল হন্থহন্নবা খোঙথাং লৌখৎপা ঙমহনখি। সর্ভিস অসিনা মরম ওইরগা জন ওশাধি কেন্দ্রশিংদা অহোংবা অমদি অতাবা মমলশিংদা লায়রবশিংদা হীদাক-লাংথকশিং পীরি। অমসুং চহি চুপ্পা হীদাক চাবা মথৌ তাবা মিদল ক্লাসকী ইমুংশিংনা চহি অমদা লুপা ১০,০০০-১৫,০০০ ফাওবা তুংশিনবা ঙমহনখি। হোস্পিতালশিংদা মথৌ তাবা ফেসিলিতী পুম্নমক ফংহন্নবা, এপোইন্তমেন্তশিং লৌবগী থৌওংসু লায়থোকহন্নবা অমসুং এপোইন্তমেন্ত লৌবদা অৱাবা অমত্তা মায়োক্নদনবা মীৎয়েং চংখি। ইনফোসিস ফাউন্দেসনগুম্বা ইন্সতিত্যুসন কয়ানা সেবা তৌবগী ৱাখল্লোনগা লোয়ননা লায়রবশিংদা মতেং পাংলিবা অমসুং মখোয়গী পুন্সিদা নুংঙাইহল্লিবা অসিদা ঐহাক্না অপেনবা পোকচৈ। সুধাজীনা ‘পত্রম-পুশপম’গী মতাংদা কুপ্না হায়বীখ্রে অমসুং ইরৈবাকচা পুম্নমক্না সেবা তৌনবগী খুদোংচাবা অমত্তা মাংহনদবা হায়বা অসি মখোয়গী থৌদাং ওইরগনি হায়না ঐহাক্না থাজৈ।

মরুপশিং,

নীংখা তম্বগী শেংলবা চহি অসিদা অচৌবা হেল্থকিয়র সিস্তেম অমা শেমগৎনবা মাইকৈদা খোঙজেল য়াংনা চংশিল্লি। খুঙ্গংশিংদা হেল্থ এন্দ ৱেলনেস সেন্তর কয়া লিংখৎনবা, ই-সঞ্জীবনিগী খুত্থাংদা তেলি-মেদিসিনগী খুদোংচাবশিং ফংহন্নবা, হেল্থ সেক্তরদা হ্যুমেন রিসোর্স দিবেলপমেন্ত তৌনবা, অনৌবা মেদিকেল ইন্সতিত্যুসনশিং শানবা থবক খোঙজেল য়াংনা পাইখৎলি। মসিগী পান্দম অসি য়াম্না চাউবা ওইগনি অদুনি করিগুম্বা খুন্নাই অমদি সরকারনা পুন্না থবক তৌমিন্নরবদি ঐখোয়না পান্দম অসি থুনা ফংবা ঙমগনি। মতম খরগী মমাংদা সেল্ফ-ফোর-সোসাইতী কৌবা ইন্নোভেতিব ওইবা থৌশিল অমা লৈরমখি হায়না ঐখোয়না হায়নগনি। মসি য়াওশিনদুনা খুন্নাইগীদমক ইন্সতিত্যুসন লিশিং কয়া অমসুং মীওই লাখ কয়ানা শরুক য়াখি। ঐখোমা তুংদা হেন্না এৱের্নেস পীনবা অমসুং মীওই কয়া কয়াবু কন্নেক্ত তৌনবা অমসুং পুন্না অমত্তা ওইনা থবক তৌমিন্নবা তাই। অমসুং মসি মীপুম খুদিংমক্না হোৎনমিন্নদুনা খুন্নাইগী অপুনবা শক্তি অদু খক্না ফংবা ঙমহনগনি। ঐহাক্না অমুক্কা হন্না সুধাজী অমসুং ইনফোসিস ফাউন্দেসনবু তৌবীমল খঙবা উৎচরি। হরিয়ানাগী মীয়ামগা ৱারী শাবা অসিদা ঐহাক্না মখোয়দা করিগুম্বা খরা হায়জনীংই। হরিয়ানাদগী ঐহাক্না কয়া অমা তমজবা ফংজবা অসিদা লাইবৈ ফৈ হায়না ফাওজৈ। ঐহাক্না সরকার কয়া কুপ্না য়েংজখ্রে। অদুবু হরিয়ানানা দিকেদ কয়াগী মতুংদা হরিয়ানাগী অফবা তুংলমচৎকীদমক খনবা থমোয় শেবং সরকার অমা মনোহর লাক খাত্তরজীগী মখাদা শেম্বা ফংজখি। ঐহাক্না খঙই মদুদি মীদিয়ানা অসিগুম্বা অফবা ৱাফমশিংদা মীৎয়েং কয়া চংদে অদুবু হরিয়ানাগী সরকারগী পর্ফোর্মেন্স অসি ইভাল্যুৎ তৌবা মতমদা হৌজিক পাল্লিবা সরকার অসিনা মখোয়গী ইন্নোভেতিব ওইবা অমসুং অফবা ৱারেপশিং লৌবগীদমক হৌখিবা দিকেদ মঙাগী খ্বাইদগী ফবা সরকার ওইরক্কনি। অদুবু মহাক্কী তেলেন্ত অসিনা মুখ্য মন্ত্রী ওইনা মাংদা থোরকপা, মহাক্না থৱায় য়াওনা তোঙান-তোঙানবা ইন্নোভেতিব ওইবা প্রোগ্রামশিং পাইখৎপগী মওং অসিদা করিগুম্বা মতমদা ভারত সরকারনা হরিয়ানগী অসিগুম্বা এক্সপরিয়েন্স অসি লৈবাক পুম্বদসু ইম্প্লিমেন্ত তৌবা য়াগনি হায়না ফাওবা য়াওখি। মরম অসিনা ঐহাক্না হরিয়ানাগী লৈমাইদা লেপচবদা অমদি মাগী মীয়ামগা ৱারী শাবা মতমদা ভারত্তিয়া জন্তা পার্তীগী তীমনা মনোহর লালজীগী লুচিং মখাদা হরিয়ানাগী সেবা তৌবা ফংজবগীমওং অমসুং তুং কোইনা চৎকদবা থৌরাংগী উরেপ-উয়ুং তমখিবা অসিনা হরিয়ানাগী অফবা তুংলমচৎ অমা শোইদনা পুরক্কনি হায়না হায়জনীংই। ঐহাক্না ঙসি মীয়াম মাংদা মনোহর লালজীবু অমু্ক্কা হন্না থাগৎচরি। মহাক্কী অপুবা তীমবুসু হন্না-হন্না থাগৎচরি। ঐহাক্না ময়ামবুসু থমোয় শেংনা থাগৎপা ফোঙদোচরি।

খঙহঞ্জবা: মসি পি.এম.না পীখিবা ৱারোলগী চাউরাকপা ৱাহন্থোক্নি। তশিংবা ৱারোলদি হিন্দীদা পীখি।

****