ভারতকী প্রধানমন্ত্রী

ফম্বাক থক্তা লেংশিনবীরিবা উত্তর প্রদেশকী রাজ্যপাল শ্রীমান রামনায়কজী, রাজ্যগী মীয়াম্না য়ারা মুখ্যমন্ত্রী য়োগী আদিত্যনাথজী, কেন্দ্রদা মন্ত্রীপরিষদকী ঐগী খোংলোই শ্রীমতি স্মৃতি ঈরানীজী, কেন্দ্রদা মন্ত্রীপরিষদকী ঐগী খোংলোই শ্রী অজয় তমতাজী, রাজ্যগী উপমুখ্যমন্ত্রী শ্রীমান কেশব প্রসাদ মৌর্যজী, লমদম অসিগী সংসদ চহি কয়া মরুম মন্ত্রীপরিষদতা ঐগী খ্বাইদগী ইতেং পাংখিবা অমসুং হৌজিক্না য়ুপিগী ভারতীয় জনতা পার্তীগী থবক পুম্নমক য়েংশিনবীরীবা দাক্তর মহেন্দ্র নাথ পান্দেজী, রেলৱে বোর্দকী চিয়র্মেন অশ্বনীজী মহাক্না লাইরবষশিংগী য়াইফ-থৌরাংগীদমক্তা মখোয়বু মরোমদোম লেপচবা ঙম্ননবা য়াম্না হৈ-শিংনা, মচা খাইনা ফাইনান্সিয়েল ইনক্লুজনগী য়াম্না চাওরবা পোৎলুম অমা থোংগৎচরি। অসিগুম্বা উৎকর্ষ বেঙ্ককী মেনেজিং দাইরেক্তর শ্রীমান গোবিন্দজী অমসুং মশিং য়াম্না লেংবীরক্লিবা ঐগী বনারসকী ঐগী নুংশিজরবা ইচিল-ইনাও অমসুং ইচল-ইচেশিং।

ঙসি থৌরম অমখক্তদা ফম্বাক অমখক্তগী লুপা কোতি লিশিং অমরোমদগী হেনবা শেনফমগী প্রোজেক্ত খরা শঙ্গাবা অমসুং প্রোজেক্ত খরা উরেপ-উয়ুং তম্বগী থবক পাংথোক্কদৌরি। ঐহাক্না উত্তর প্রদেশকী সরকারগীসু অদুক্কী মতিক লমন তোন্সিঞ্জরবনি। মদুদি মখোয়না বনারস লমদমগী চাওখৎ-থৌরাংগীদমক্তা ঐখোয়গী মংলান ওইরিবা নোংপোক ভারতকী চাওখৎ থৌরাং অসিদা য়াম্না চাওরবা থৌদাং য়বীরি। অমসুং মরম অসিনা রাজ্য সরকারবুসু নোল্লুকচবগী হক লৈ। ঙসি চাওরাক্না লুপা কোতি ৩০০ লোমগী শেনফম্না তেক্সতাইল মন্ত্রালয়না প্রোজেক্ত অসিবু মীয়ামদা কৎথোকপীরিবা অসি হৌখিবা চহি তরাগী খুজিং কয়াদগী বনারসকী লৈমাইদা অসুক চাওবা প্রোজেক্তকী থৌরাং পাইখৎলমগনি হায়বা ঐহাক থাজদে। অমসুং ঐখোয়না উরেপ-উয়ুং তম্লম্বা স্কিমশিং অদুগী শঙ্গাবা অদুসু ঐখোয়না অদুম্মক পাংথোকচৈ নত্রবদি রাজনীতি অসি হিসাব-কিতাবতা উরেপ-উয়ুং তম্মি স্কিমশিং পন্দুনা অদুম্মক লৈহৌই, মপুং খক ফাদে। মফম অসিদা থোং অনি মীয়ামদা কৎথোক্লিবা অসি কয়াদা কুইনা পন্দুনা লৈরুরবনো, অদুবু য়োগীজীনা লাক্তুনা মসিগী পোৎলুম অসি থোংগৎচখি ঙসিদি মদু মংফাওনরে অমসুং অসোম থংবদা লৈরিবা মীয়ামগীদমক্তা চাওখৎ থৌরাংগীদমক্তা অনৌবা থোং অমা হাংলে খুদোংচাবা হেনগৎহল্লে।

ঙসি ফি শাবা অমসুং খুৎহৈবা ইচিল-ইনাওশিংগীদমক্তা ঐনা খঞ্জৈ মদুদি মসি তাংলবা খুদোংচাবা অমনি। অদোমদা অদোমগী ইপা-ইপুগী খুৎথাংদগী মসিগী লৌশিং ফংহৌরি। মালেমগী মীয়াম্বু অঙকপা পোকহনবা ঙম্বা পোৎ-চৈ শাবগী থৌনা অদোমগী লৈ অদুবু জঙ্গলদা ৱাহোংনা জগোই শাবা কনানা উরুবগে। ঐনা নৌনা এমপি ওইরক্তুনা ফি শাবা ইচিল-ইনাওশিংগা উন্নখিবা মতমদুদা ঐনা ৱাফম অমখক তাখি মদুদি ঐখোয়গী অঙাংশিংনা হৌজিক থবক অসি পায়বা পামদ্রে। ঐখোয়গী ইমুংগী মীওইশিং হৌজিক মসিদগী খুৎ থাবা পাম্লে। মখোয় লাইরিক-লাইশু তমলগা মপানলোমদা চৎপা পাম্লে। অমসুং মতমদুদা ঐঙোন্দা ফাওখি মদুদি অসুক চাওরবা অকনবা শেন্মিৎলোনগী খোংজেলগী খুৎলাই অসি করিগুম্বা ঐখোয়গী ইমুংশিং অসিদগী তোকখিবা তারবদি লাক্কদৌরিবা পুৱারিনা ঐখোয়বু ঙাকপীররোই। মরমদি অদুগুম্বা মালেম অসিবু ঙকহনবা ঙম্বা পোৎশক অমা অদোমগী নাক্তা লৈ। অমসুং অসুম অসুম যুগ অসিনা চখৎপগুম মালেমনসু ভারতকী মগুনশিং অসিদা মিয়েং থম্লক্লি। অমসুং মরম অসিনা লুপা কোতি ৩০০গী শেনফম্না শাবা অসিগুম্বা যুম অসি, মসি শুপ্নগী য়ুম খক্তা নত্তে। মসি ভারতকী থৌনা উৎথোক্লিবা ঐখোয়গী কাশী লমদমগী খুৎহৈবা ফি শাবশিংগী, তুংলমচৎকী অনৌবা থোং হাংদোক্নবগী পাঙ্গল চেনবা থৌনাগী অসিগুম্বা ৱারি অমা লেংশিল্লি। ঐনা মফম অসিগী ওতোরিক্সা দ্রাইবরশিং, তেক্সী থৌবশিংদা হায়জরি মদুদি কাশীদা করিগুম্বা কনাগুম্বা তুরিস্তশিং লাকপা মতমদা মখোয় অদু মফম অসিদা শোইদনা পুবীরকউ।

হায়জদুনা পুবীরকউ, মফম অমা খক্তদা কাশী লমদমগী থৌনা অদু মশক তাকপীয়ু, অমসুং অরাকপা তুরিস্তশিংদুনা করিগুম্বা খরদি লৈখিগনি। মীরমগী তুরিস্ত লাক্কনি মখোয়দি মফম অসিদগী চৎলগে ফাওবা হায়রক্লোই। শারিবা ম্যুজিয়ম অসিনা কাশীগী তুরিজম্বুসু চাওখৎহনগনি। কনাগুম্বা লাইনীং-লাইশোনগী ৱাখল্লোন্দা কাশীদা লাকপশিংনা পোৎলমশিং অসিগা থেংনরুরগা, মসিবু উরুরগা, কাশীগী থৌনা অদুবু খঙ্গনি ঐনা থাজৈ মদুদি কাশীগী তুরিজম্বুসু চাওখৎহনগনি। কাশীগী অসিগুমবা কলাগী হৈশিংবা অসিসু থৌনা ফংলগনি। অমসুং অনৌবা শেনমিৎলোনগী মফম অমা ওইরগনি।

ইচিল-ইনাওসা কাশীদা ঙসি ৱাতর এম্বুলেন্স অমসু হৌদোক্লি। জল শব ৱাহনীসু হৌদোক্লি। ঐনা অহানবা ওইনা জল শব ৱাহনীগী ৱাফম হৌদোকখিবদা মীওই কয়ামরুম্না অঙকপা পোকনখি। ঐনা হায়খি মদুদি কাশীগী ত্রাফিক্কী অৱাবা অমদি পোৎলোইফমগী খোংচৎকা লোইনরিবা মীওইশিংগী অৱাবা মসিদগী কোক্ননবগীদমক ঐখোয়না ঈশিংগী লম্বী নীংথিজনা শিজিন্নগদবনি, ঈশিংগী লম্বীবুসু শিজিন্নগদবনি। ঐখোয়গী ঈশিংগী লম্বীদসু থৌনা অদু লৈরি। মসিবু শেন্মিৎলোনগী চাওখৎ-থৌরাংগা মরি লৈনহনবা ঐখোয়গী ঈশিংগী লম্বীবু মহৌশা ওইবা মীওইবগী খুদোংচাবশিংগা শম্নহনবা, তুরিস্তশিংগী থবক-থৌরমশিং অদু হেন্না খুমাং চাওশিনহনবনি। মাইকৈ অসোমদা ঐখোয়না থৌরাং কয়া হৌদোক্লি। মদুগী মখাদা ঙসি মসিসু শঙ্গারিবনি।

বনারসকী ঐগী নুংশিজরবা ইচিল-ইনাওসা ঐনা বনারসতগী মীখল থেংনবা লাকখিবা অদুগা লোইননা বড়োদাদগীসু মীখল থেংনখি হায়বা অদোম খঙবীবরা। অমসুং বড়োদানসু ঐবু ভোৎ মশিং য়াম্না ফংহন্দুনা কাহনবীখি। বনাসরনসু ঐবু ভোৎ মশিং য়াম্না ফংহন্দুনা মাই পাকহনবীখি। অদুবু সীৎ অমা থাদোকপগী ৱাফম লাকখিবা মতমদা ঐনা খনখি মদুদি বড়োদাবু মাংদা পুখৎনবা ঐগী খোংলোই ময়াম অমা লৈরি। বড়োদাগী চাওখৎ-থৌরাংগীদমক্তা মখোয়না অখাকপা অমত্তা থমেলোই। অদুবু কাশীগীদমক্তা করিগুম্বা ঐনা ঐগী মতম কৎথোকচরবদি ঐগী পুন্সিদা অপেনবা ফংবা য়াই। অমসুং মরম অসিনা ঐনা কাশীবু সেবা তৌনবগীদমক খনখি অদুগা ঙসি ঐহাক নুংঙাইবা ফাওই মদুদি বড়োদা অমসুং কাশী শম্নহল্লে। মদুদি বড়োদা অমসুং বনারস মহামনা এক্সপ্রেসনা শম্নহল্লে। ঙসি মফম অসিদগী বড়োদাদগী মহামনা এক্সপ্রেস হৌদোক্লে। বড়োদাদগী সুরৎ ফাওদুনা মহামনা এক্সপ্রেস অসি বনারসতা থুংগনি। গুজরাত্তগী তেক্সতাইল খ্বাইদগী হান্না অহমদাবাদতগী চৎখিদুনা তেক্সতাইল ইন্দস্ত্রী অসি বনারসতা লাকখি। ঙসি অমুক হন্না মহামনা এক্সপ্রেসকী থোংদা বড়োদা মদুসু সংস্কৃতিগী মফমদা। মদুসু মহৈগী মফম অমনি। বনারসসু সংস্কৃতিগী মফম অমনি, মহৈগী মফম্নি। মতিং লৈবা থৌরম কয়া পাইখৎলি। চহি কুন-কুন কুনমঙা-কুনমঙা পন্দুনা লৈরুরবা ৱাফম কয়া লোইশিন্নবা থৌরাং থৌনা ফনা হোৎনরি। থৌনা লৈনা ৱারেপ লৌরি। অমসুং মসিগী ফল ওইনা ঙসি মালেম পুম্নমক্না উরি। মদুদি ভারত খোংজেল য়াংনা মাংদা চংসিল্লি। ভারত হোংলক্লি। ঐখোয় নোংপোক থংবা য়ুপিবুসু হোংদোক্কনি। লৈবাক্কী শেনমিৎলোন্দা নোংচুপ লোমগী থৌনা অদুগুম্না নোংপোকসু থৌনা ওইননবা মসিগী মাইকৈরোমদা ঐখোয় থবক পাইখৎলি। ঙসিগী স্কিমশিং অসি লুপা কোতি লিশিং অমরোমগী প্রোজেক্ত অসি ঐনা থাজৈ মদুদি মফম অসিগী শেন্মিৎলোনগী পুন্সিদা অহোংবা পুরক্নবগীদমক্তা, মফম অসিগী খুন্নাইগী পুন্সিদা অহোংবা পুরক্নবগীদমক্তা, মফম অসিগী ইনফ্রাস্ত্রকচরদা অহোংবা পুরক্নবগীদমক্তা য়াম্না চাওবা থৌনা অমা ওইনা থবক তৌগনি। ঐনা অমুক্কা হন্না য়ুপিদা য়োগীজীগী লুচীং মখাদা থবক-থৌরম কয়া খোংজেল য়াংনা পাইখৎলি। থা তরুক্কী মতমগী মনুংদা য়োগীজীনা অঙকপা মওংদা তৌদুনা উৎলে। ঐনা মহাকপু থমোইশেংনা হন্না হন্না নুংঙাইবা ফোংদোকচরি । হন্না হন্না থাগৎচরি।