ভারতকী প্রধানমন্ত্রী

ঐগী নুংশিরবা ইরৈবাকচাশিং! খুরুমজরি হন্দক্তা এপ্রিল ৪দগী এপ্রিল ১৫ ফাওবা ওস্ত্রেলিয়াদা ২১শুবা কমনৱেল্থ গেম্স পাংথোকখ্রে। ভারত য়াওনা মালেমগী লৈবাক ৭১না মসিদা শরুক য়াখি। অসুক চাউনা পাংথোকখিবা, মালেম পুম্বদগী লাকপা শান্নরোই লিশিং কয়ানা মসিদা শরুক য়াখিবা, করম্বা ফিভম ওইরমগনি হায়বা লাম্বা ঙম্বীবরা? থৌনা, লাংতক্নবা, আশাশিং, অপাম্বশিং, করিগুম্বা খরা তৌদুনা উৎনিংবগী ৱাশক – অসিগুম্বা মখলগী ফিভম অদুদা কনানা মসিদগী লাপথোকপা ঙমগনি। মতম অদুদা লৈবাক পুম্বদা মীয়াম্না নুংতিগী খন্নখি মদুদি ঙসি করম-করম্বা শান্নরোইশিংনা শান্নগনি। ভারতকী পর্ফোরমেন্স করম তৌগনি, ঐখোয়না মেদল কয়াম লৌগনি অমসুং মসি মশানা তাবসুনি। ঐখোয়গী শান্নরোইশিংনসু লৈবাক মীয়ামগী থাজবশিংদা মাই পাক্না চোংথোক্তুনা হেন্না ফবা পর্ফোরমেন্স উৎখি লোইননা মেদল মথং মথং ফংদুনা লাকখি। শুতিংবু ওইরো, রেস্তলিংবু ওইরো, ৱেৎলিফতিংবু ওইরো, তেবল তেনিসপু ওইরো নত্রগা বেদমিন্তলবু ওইরো; ভারতনা রেকোর্দ থমখি। গোল্দ ২৬, সিলবর ২০, ব্রোঞ্জ ২০ – ভারতনা চাউরাক্না পুন্না মেদল ৬৬ লৌখি। ভারত মচা খুদিংমক্তা মাই পাকপা অসিনা চাউথোকচবা পোকহল্লে। মেদল ফংবা অসি শান্নরোইশিংগীদমক্তদি চাউথোকচনীংঙাই অমসুং নুংঙাইনীংঙাই ওইবা ৱাফম্নি। মসিনা লৈবাক অপুনবগীদমক্তা, লৈবাক মচা পুম্নমমক্কীদমক্তা অদুক্কী মতিক চাউথোকচনীংঙাইগী কুম্মৈ অমা ওইরি। মেচ লোইরবা মতুংদা মেদলগা লোইননা ভারতকী মহুৎ শিল্লদুনা এথলেৎনা মফম অদুদা মেদলগা লোইননা লেপ্পদা, মচু অহুমগী ফিরেল য়েৎসিল্লদুনা, জাতিগী ঈশৈ থাদুনা অমসুং মদুদা পোকপা ৱাখল অদু, পেঞ্জবা অমসুং নুংঙাইবগী, চাউথোকচবগী, ইকাই-খুম্নবগী মশা মথন্তনা অদুম অখন্নবা অমা ওইজৈ, থোইদোক হেন্দোকপা ওইজৈ। পুক্নীং হকচাংবু তনিকহল্লি। পুক্নীংদা ইনোৎ কাহল্লি। ঐখোয় পুম্নমক ৱাখল্লোন অমদা থলহল্লি। অদুগুম্বা ৱাখল্লোন অদু ফোংদোক্নবা ৱাহৈ অদু ইফমদা তাংনা থোক্লে। অদুবু শান্নরোইশিং অদুদগী তাখিবদু অদোমদা তম্বা পামজৈ। ঐদি চাউথোকচবা পোকচৈ অদোমসু পোকপীগনি।

ঐ মনিকা বত্রা কমনৱেল্থতা মেদল মরি লৌরক্লে। সনাগী অনি, সিলভরগী অমা, ব্রোঞ্জগী অমা। ‘মন কী বাত’কী থৌরম তাবীরিবশিংদা ঐনা হায়জবা পাম্মি মদুদি ঐহাক য়াম্না নুংঙাইজৈ মদুগি মরমদি অহানবা ওইনা ভারত্তা তেবল তেনিস অসি অদুক্কী মতিক পোপুলর ওইররে। হোয় ঐনা ঐগী বেস্তা তেবল তেনিস শান্নরমগনি। পুন্সি চুপ্পা অসিমগী বেস্তা তেবল তেনিস শান্নরমগনি। মসিগী মমাংদা ঐনা তৌখিবা প্রেক্তিস অদুগী মতাংদা তমজগে মদুদি ঐনা অদুক্কী মতিক ঐগী কোচ সন্দীপ সরগা লোইননা প্রেক্তিস তৌজখি। কমলৱেল্থকী মমাংদা পোর্তুগলদা তৌখিবা ঐখোয়গী কেম্পশিংদা, সরকারনা ঐখোয়বু তুর্নামেন্তশিংদা থাবীখি অমসুং ঐনা সরকারবু থাগৎচরি মরমদি মখোয়না ঐখোয়দা অদুক্কী মতিক ইন্তর্নেস্নেল এক্সপোজর পীবীখি। য়ং জেনরেসনদা শুপ্নগী মেসেজ অমখক্তং পীজগে মদুদি কৈদৌনুংদসু গিব অপ (নীংহন্নবা) তৌগনু। এক্সপ্লোর য়োরসেল্ফ।

ঐ পি. গুরুরাজনা মন ‘মন কী বাত’ তাবীরিবশিংদা মসি হায়জনীংই। ২০১৮গী কমনৱেল্থ গেম অসি ঐগী মেদল লৌনবগী মঙলান্নি। ঐনা অহানবা ওইনা কমনৱেল্থ গেম্সতা ইহান হান্না ভারত্তা মেদল অমা পীবদা ঐহাক য়াম্না নুংঙাইবা পোকচৈ। মেদল অসি ঐগী খুঙ্গং কুন্দাপুরা অমসুং ঐগী রাজ্য কর্নাতক অমসুং ঐগী লৈবাক্তা কৎথোকচরি।

মীরাবাই চনু, ঐনা ২১শুবা কমনৱেল্থ গেম্সতা ভারতকী অহানবা সনাগী তকমান ফংখি। মসিদা ঐহাক য়াম্না নুংঙাইবা পোকচৈ। ঐগী মঙলান অমখক লৈজৈ ভারতকী অমসুং মণিপুরগীদমক্তা অফবা শান্নরোই অমা ওইবা ঙমজবা, অদুনা ঐ মুভী কয়াদা য়েংজৈ। মণিপুরগী ঐগী ইচে অমসুং পুম্নমক য়েংলুরগা ঐহাকসু ভারতকীদমক্তা মণিপুরগীদমক্তা অফবা শান্নরোই অমা ওইবা পামখি। ঐনা মাই পাকপগী মরম ঐগী দিসিপ্লিন অসিসুনি অমসুং সিন্সর্লিতী, দেদিকেসন অমসুং হার্দ ৱর্ক অসিনসুনি।

কমনৱেল্থ গেম্সতা ভারতকী পর্ফোর্সেন য়াম্না ফজখিবগা লোইননা অখন্নবা অমসু ওইখি। অখন্নবা ওইরিবগী মরমদি হন্দক ইহান হান্না ওইখিবা পোৎশক কয়ামরুম য়াওরি। অদোম খঙবীবরা, হন্দক কমনৱেল্থ গেম্সতা ভারতকী মাইকৈদগী য়াওখিবা রেস্তলর পুম্নমক্না মেদল লৌরগা লাকখি। মনিক বত্রানা শরুক য়াখিবা ইভেন্ত খুদিংমক্তা মেদল লৌরকখি। মহাক ইন্দিবিজুএল তেবস তেনিসতা ভারতপু গোল্দ ফংহনখিবা অহানবা ভারতকী নুপী শান্নরোইনি। ভারতনা খ্বাইদগী য়াম্না মেদল শুতিংদা ফংখি। চহি ১৫ শুরবা ভারতকী শুতর অনীশ ভানৱালানা কমনৱেল্থ গেম্সতা ভারতকী মাইকৈদগী গোল্দ মেদল লৌখিবা খ্বাইদগী নহা ওইরিবা শান্নরোই ওইখি। সচীন চৌধরীনা কমনৱেল্থ গেম্সতা মেদল লৌরকখিবা অমত্তা ঙাইরবা পেরা পৱর-লিফতর ওইরে। হন্দক্কী গেম্স অসি মসিগীদমক্তা অখন্নবা ওইরিবনি মদুদি মেদল লৌরকখিবা অনম্বনা নুপী এথলেৎ ঙাক্তনি। স্ক্বাস ওইরো, বোক্সিং ওইরো, ৱেৎলিফতিং ওইরো, শুতিং ওইরো – নুপী শান্নরোইশিংনা অঙকপা মওংদা উৎথোকখি। বেদমিন্তন্দদি ফাইনেলদা ভারতমক্তগী শান্নরোই অনি সাইনা নেহৱাল অমসুং পি.ভি. শিন্ধু অনিগী মরক্তা শান্নখি। পুম্নমক মথুম-মরাংনখি মদুদি অথোইববুদি তান্নবনি অদুবু মেদল অনিমক ভারতনা অদুম্মক ফংলগনি – লৈবাক পুম্বনা য়েংখি। ঐসু য়েংবদা ওন্থোক্না নুংঙাইবা ফাওখি। গেম্সতা শরুক য়াখিবা এথলেৎশিং, লৈবাক্কী তোঙান তোঙানবা শরুক্তগী, অপীক অপীকপা শহরশিংদগী লাকপনি। অপনবা, অৱাবা কয়ামরুম লান্থোক্তুনা মসি ফাওবা য়ৌরক্লিবনি অমসুং ঙসি মখোয়না ফংলিবা ফিদা অসি, পান্দম অসি ফাওবা য়ৌরক্লিবা অসিগী খোংচৎ অসিদা মখোয়গী মমা-মপাবু ওইরো, মখোয়গী গার্জিয়নবু ওইরো, কোচপু ওইরো, সপোর্ত স্তাফপু ওইরো, স্কুলবু ওইরো, স্কুলগী ওজাবু ওইরো, স্কুলগী অকোইববু ওইরো – পুম্নমক্কী থৌদাং য়াওরিবনি। মখোয়গী মরূপ-মপাংশিংগীসু থৌদাং য়াওরিবনি, মখোয়না ফিভম পুম্নমক্তা মখোয়গী থৌনা হাপ্পীরিবনি। ঐনা শান্নরোইশিং অসিগা লোইননা মখোয় পুম্নমকপুসু নুংঙাইবা ফোংদোকচরি, য়াইফ-পাউজেল পীজরি।

হৌখিবা থাদা ‘মন কী বাত’কী মতমদা ঐনা ইরৈবাকচাশিংদা মরু ওইনা ঐখোয়গী নহারোলশিংদা ফিৎ ইন্দিয়াগী মরমদা খঙহনখি অমসুং ঐনা পুম্নমকতা লাকপীনবা বার্তন তৌখি! ফিৎ ইন্দিয়াগা লোইনবীয়ু, ফিৎ ইন্দিয়াবু লমজিংবীয়ু। অমসুং ঐহাক য়াম্না নুংঙাইবা পোকচৈ মদুদি মীয়াম্না অচেৎপা থৌনাগা লোইননা মসিদা য়াওবীররি। মী ময়াম অমনা মসিগীদমক্তা মখোয়গী সপোর্ত উৎলদুনা ঐঙোন্দা ইবীরকখি, চিথী থাবীরকখি, সোসিয়েল মীদিয়াদা মখোয়গী ফিৎনেসগী মন্ত্র – ফিৎ ইন্দিয়া স্তোরীসু শেয়র তৌবীরে।

শ্রীমান শশিকান্ত ভোন্সলে কৌবা মীশক অমনা স্বিমিং পুলদা নম্বা মাগী ফোতো অমা শেয়র তৌরদুনা ইবীরকই –

“মাই ৱিপোন অসি মাই বোদী, মাই ইলিমেন্ত ইজ ৱাতর, মাই ৱর্ল্দ ইজ স্বিমিং।”

রুমা দেবনাথনা ইরকই – “মোর্নিং ৱার্ক্না ঐ ইশাবু হেপ্পী অমসুং হেল্দী ওইবা ফাওহল্লি।” অমসুং মহাক্না মখা তাই – “ফোর মি – ফিৎনেস কম্স ৱিদ এ স্মাইল্স এন্দ ৱি শুদ স্মাইল, ৱ্হেন ৱি হেপ্পী।”

দেবনাথজীনা মসিদা করিসু চীংনবা লৈতে মদুদি হেপ্পীনেস অসিমক ফিৎনেসনি।

ধৱল প্রজাপতিনা ত্রেক্কিংগী মহাক্কী ফোতো শেয়র তৌরদুনা ইবীরকই – ‘ঐগীদমক্তদি ত্রাবেলিং অমসুং ত্রেকিং অসিমক ফিৎ ইন্দিয়ানি।’ মসি উরুবা তশেংনা নুংঙাইবা ফাওই মদুদি শক্নাইরবা মীশক কয়ামরুম ফাওবা য়াম্না নুংঙাইবা মওংদা ফিৎ ইন্দিয়াগীদমক্তা ঐগী নহারোলশিংবু ইথিল পীবীরি। সিনেমাগী কলাকার অক্ষয় কুমারনা ত্বিত্তরদা ভিদিও অমা শেয়র তৌবীরকই। ঐসু মদু য়েংলে অমসুং অদোম ময়ামসু শোইদনা য়েংবীগনি; মদুদা মহাক্না ৱুদন বীদ্সকা লোইননা এক্সর্সাইস তৌবা উই অমসুং মহাক্না হায় মদুদি এক্সর্সাইস তৌবা অসিনা নঙ্গল অমসুং পুক্কী মশলশিংদা য়াম্ন কান্নহল্লি। মহাক্কী ভিদিও অমসু মমিং চৎখ্রে, মদুদা মহাক্না মীয়ামগা লোইননা বোলীবোল শান্নৈ। নহারোল ময়াম অমনা ফিৎ ইন্দিয়া ইফোর্তকা লোইনদুনা মখোয়না থেংনরকপশিং অদু শেয়র তৌই। মসিগী অওনবা অসিনা ঐখোয় পুম্নমক অমদি লৈবাক পুম্বদা কান্নবা য়াম্না পীগনি। অদুগা ৱাফম অমনা শেল অমত্তা তিংদবা ফিৎ ইন্দিয়াগী খোংজং অমনা ‘য়োগ’নি। ফিৎ ইন্দিয়াগী খোংজং অসিদা য়োগগী থৌদাং অসি য়াম্না চাউই অমসুং অদোমসু মসিগীদমক শেম শারমগনি খল্লি। জুন ২১, ‘মালেমগী য়োগ নুমিৎ’ অসিবু মালেম পুম্বনা য়ানরবনি। অদোমসু হৌজিক্তগী হৌনা শেম-শাবীরো। অদোম ইথন্তা নত্তে – অদোমগী শহর, অদোমগী খুঙ্গং, অদোমগী লৈকাই, অদোমগী স্কুল, অদোমগী কোলেজ অমদি অঙাং-অহল, নুপা নুপী খাক্তনা য়োগ তৌনবগীদমক্তা থৌরাং তৌবীরো। হকচাংগী কোক্তগী খোং ফাওবা ফগৎহনবা, পুক্নীং ৱাখল ফগৎহনবা অমদি ৱাখলগী খল কাইদনা থম্বদা য়োগগী কান্নবশিং অদু হিন্দুস্তান্দা নত্তনা মালেম পুম্বদা হায়রুবগী কান্নবা লৈত্রে, পুম্নমক্না খঙনরে। ঐগী মরমদা উৎপা এনিমেতেদ ভিদিও অমা ময়াম পুম্বনা উবীরম্লগনি, মদু হৌজিক ময়াম্না য়াম্না পাম্নরি। ওজা অমনা তৌগদবা থবক অদু এনিমেসন তৌবশিংনা য়ামনা কুপ্না উৎলি। মসিগীদমক ঐনা এনিমেসন তৌরিবশিং অদুবু থাগৎপা ফোংদোকচরি। ময়াম পুম্নমকসু মসিদগী কান্নবা শোইদনা ফংবীগনি।

ঐগী নহা ওইরিবা মরুপশিং! নখোয় হৌজিক পরিখাগী কোইঙাওনবদগী নানন্থোক্তুনা শুতিগী ৱাখল খনবা হৌরম্লগনি। শুতি করম্না পাংথোকসিগে, কদাইদা চৎসিগে খল্লমগনি। ঐহাক্না ঙসি নখোয়দা অনৌবা থবক অমা পাইখৎনবা হায়নীংই মদুদি ঐনা উবদসু নহারোল কয়ানা অনৌবা কয়া তম্ননবা হোৎনৈ। সমর ইন্তর্নশিপকী মগুন নোংম-নোংমগী হেনগৎলক্লি অদুগা নহারোলশিংনসু মসিবু থিনরি। অমরোমদা ইন্তর্নশিপ অসিমক অনৌবা ৱাখল্লোন অমনি। ফক্লাং মরিনা কোইশিনবা কাগী মপান্দা চে-কলম, কমপ্যুতরদগী লাপ্না পুন্সি অসিবু অনৌবা মওংদা হিংনবগী তাঞ্জা অমা ফংগদৌরিবনি। ঐগী নুংশিরবা নহা ওইরিবা মরূপশিং, অখন্নবা ইন্তর্নশিপ অমগীদমক্তা ঐ ঙসি নখোয়দা হায়রিবসিনি। ভারত সরকারগী মন্ত্রালয় অহুম শান্ন-খোৎনবা, ঐচ.আর.দি. থকননবা ঈশিংগী বিভাগশিংনা পুল্লগা ‘স্বচ্ছ ভারত সমর ইন্তর্নশিপ ২০১৮’ হৌদোক্লে। অদোম্না মাই গোবতা চংলগা ‘স্বচ্ছ ভারত সমর ইন্তর্নশিপ’কীদমক রেজিস্তর তৌবা য়াগনি। ঐখোয়গী নহারোলশিংনা লু-নানবগী অসিগুম্বা খোংজং অসিবু হেন্না খুমাং চাউশিলহনগনি হায়না ঐনা থাজৈ। অদোম্না হোৎনরিবশিং অদুগী মতাংদা ঐহাক য়াম্না খঙনীংই। ঐঙোন্দা শোইদনা থাবীরকউ, ৱারী থাবীরকউ, ফোতো থাবীরকউ, ভিদিও থাবীরকউ। লাক্লো! অনৌবা খরা তমহৌনবগী খুদোংচাবা অদু হন্দক্কী শুতি অসিদা লৌহৌরসি।

ঐগী নুংশিরবা ইরৈবাকচাশিং! তাঞ্জা হেক ফংবদা ঐ দুরদর্শন্দা ‘গুদ ন্যুজ ইন্দিয়া’গী থৌরম শোইদনা য়েংই অমসুং ইরৈবাকচাশিংদসু ‘গুদ ন্যুজ ইন্দিয়া’ অসি শোইদনা য়েংবীয়ু হায়না ঐ হায়জনীংই। মসিদগী ঐখোয়না লৈবাক অসিগী কদাই কদাইদা কনানা করি অফবা থবক তৌরিবগে হায়বা খঙবা ঙম্মি।

ঐহাক্না হৌখিবা নুমিৎ খরনিগী মমাংদা দিল্লীগী নহা খরনা লাইরবা অঙাংশিংবু লাইরিক তম্বীবগী থবক পাইখৎলি হায়না উখি। নহাশিং অদুনা দিল্লীগী ময়ুম লৈজদবা, লম্বীদা লৈবা অঙাংশিং অমসুং খাংপোকশিংদা লৈবা অঙাংশিংবু মহৈ তম্বীবগী খোংজং অমা চংশিনবা হৌখি। লম্বীদা শেল নীবা অমসুং থবক মচা-মশু তৌবা অঙাংশিংগী ফিভম য়েংবা ঙমদ্রদুনা থবক অসি মখোয়না হৌখিবনি। দিল্লীগী গীতা কোলোনীগী মনাক্তা খাংপোক্তা লৈবা অঙাং ১৫দগী হৌখিবা খোংজং অসি ঙসিদি লৈবাক্কী কোনুংগী মফম ১২দা অঙাং লিশিং অনি শুরে, ওজাশিংনা মখোয়গী চিল্লবা মতমদগী পুং অনি কাইথোক্লগা খুন্নাই অসিদা অহোংবা অমা পুরক্কে হোৎনরিবা থবক অসিদা শরুক য়ারি।

ইচিল-ইনাওশা, মসিগা মান্নবা মওংদা উত্ত্রাখন্দগী চীংগী মফম অমদা লৌমী খরগী থবক অসিনা লৈবাক অসিগী লৌমীশিংদা অনৌবা থৌনা অমা পীরি। মখোয়গী অপুনবগী হোৎনজমন্না মখোয়গী মশাগীদা নত্তনা মখোয়গী মফম অদুগী অচৌবা অহোংবা অমা পুরকপা ঙম্লে। উত্ত্রাখন্দগী বাগেশ্বরদা মরু ওইনা চুজাক অমসুং চনান্নচীংবা অসি থাই। চীংগী লম ওইবনা লৌমীশিংনা মসিগী মতিক চাবা মমল ফংবা ঙমদে। কপকোৎ তহেশিলগী লৌমীশিংনা কৈথেলদা য়োল্লগা মাংগদবগী শরুক ভেল্যু এদিশনগী পাম্বৈ শিজিরন্নকই। মখোয়না লবুক্কী পোৎথোকশিং অদু বিস্ক্যুইৎ ওইনা শারগা য়োনবা হৌরকই। মফম অসিগী মীওইশিংনা বিস্ক্যুইৎ অসি আইরন রিচ ওই হায়না থাজনৈ। আইরন রিচ ওইবা বিস্ক্যুইৎশিং অসি মীরোনবীশিংগীদমক্তা য়াম্না কান্নৈ। লৌমীশিং অসিনা কোওপরেতিব ওর্গনাইজেসন অমা মুনার খুঙ্গংদা লিংখৎলে অদুগা মফম অদুদা বিস্ক্যুইৎ শানবা ফেক্তরী অমা হাংদোক্লে। লৌমীশিং অদুগী থৌনা অদু য়েংলগা লৈঙাক্না মসিবু খুন্নাইগী পুন্সিগী হিংননবা খোংচৎকা লোইননা পুন্সিলহল্লে। বিস্ক্যুইৎ অসি হৌজিক্তি বাগেশ্বর জিলাগী চাউরাক্না আঙ্গনৱারী সেন্তর য়াঙ্খৈরোমদা নত্তনা অল্মোরা অমসুং কৌসানী ফাওবা য়ৌখ্রে। লৌমীশিংগী হোৎনজমন্না ওর্গনাইজেসন অসিগী চহিগী তর্ন ওভর লাখ ১০দগী ১৫ ফাওবা য়ৌবদা নত্তনা য়ুমথোং ৯০০দগী হেনবদসু থবক পীবা ঙম্লে।

নুংশিরবা ইরৈবাকচাশিং! মালেম অসিদা মতম খরগী তুংদা ঈশিংগী লান শোক্নরক্কনি হায়না ঐখোয় পুম্বনা ঙাংনরি। মদু ওইরবদি ঈশিং য়োকশিনবা অসি ঐখোয় পুম্বগী ইথৌ নত্তবরা? নোংলিকশিং অসিবু মতৌ করম্না য়োক্কদগে অমসুং ঐখোয় পুম্নমক্না খঙই ঈশিং য়োকপা অসি ঐখোয় ভারত মচাশিংগীদমক অনৌবা হিরম অমা অমুক নত্রে, চহি চা কয়াগী মমাংদগী মসি ঐখোয়গী ইপা ইপুশিংনা তৌদুনা লাক্লবা থবক অমনি। ঈশিং মরিক অমমম কন্নবা হোৎনবদা মখোয়না অনৌ অনৌবা পাম্বৈ পুথোক্লম্মি। তমিল নাদুদা চৎপীরবা মীওইশিংনা শোইদনা খঙবীরম্লগনি লাইশঙ খরদা ইথৈ-লৌখোংগী ঈশিং য়োকশিনবনচিংবা হিরমশিংদা ৱাফম কয়া নুংদা হক্তুনা লৈরি। মনারকোৱিল, চিরান মহাদেবী, কোবিলপত্তী নত্রগা পদুকোত্তইবু ওইরো মফম খুদিংমক্তা অচৌ অচৌবা নুংশিংদা হক্লিবা অদোম্না শোইদনা উবীরম্লগনি। ঙসিসু লম কোইফমশিংগী মফম ওইনা স্তেপৱেল্স কয়া অমা লৈরি মসি ঐখোয়গী ইপা ইপুশিংগী ঈশিং য়োকশিনবগী খুদম অমনি। গুজরাতকী অদারজ অমসুং পাতনগী রানীগী গুৱাহ, য়ুনেস্কোগী ৱার্ল্দ হেরিতেজ সাইৎ অসি অমুক্তা য়েংসি, অমরোমদা গুৱাহ অসি ঈশিংগী লাইশঙ অমনি। করিগুম্বা রাজস্থান্দা চৎপীবা তারবদি, জোধপুরগী চান্দ গুৱাহ শোইদনা চৎপীয়ু। মসি ভারতকী খ্বাইদগী চাউবা অমসুং ফজবা স্তেপৱেলশিংগী মনুংদা অমনি। হেন্না পুক্নীং চিংশিন্নীংঙাই ওইবা ৱাফম অমদি মসিনা লৈরিবা অসি ঈশিং য়াম্না তাংবা মফমদনি। এপ্রিল, মে, জুন, জুলাই অসি নোংগী ঈশিং য়োকশিনবগী খ্বাইদগী খুদোং চাবা মতম্নি। অদুগা ঐখোয়না মাংজৌননা শেম-শাহৌরবদি হেন্না কান্নবা ফংগনি।
ঐগী নুংশিজরবা ইরৈবাকচাশিং! ‘মন কী বাত’কী মতম হেক ওইরকপদা মাইকৈ মরিদগী ঐঙোন্দা পাউজেল কয়া, চিথী কয়া অমসুং ফোন কয়া লাকই। ৱেস্ত বেঙ্গলগী নোর্থ ২ পরগনা জিলাগী দেবীতোলা খুঙ্গংদগী আয়ন কুমার বেনর্জীনা মাই গোবতা কমেন্ত পীরক্তুনা ইরকই – “ঐখোয়না চহি খুদিংগী রবীন্দ্র জয়েন্তী পাংথোকই অদুবু মীওই কয়া অমদি নোবেল প্রাইজ ফংলবা রবীন্দ্র নাথ তেগোরগী ইং-তপ্পা, ফজবা অমদি অপুনবগী শক্তমগা লোইনবা হিংবগী ফিলোজোফী অদুগী মরমদদি খঙনদে। চানবীদুনা ‘মন কী বাত’কী থৌরমদা হিরম অসিগী মরমদা নৈনবীরকউ। অদু ওইরগদি মীয়াম্না মসিগী মরমদা খঙবা ঙম্লগনি।”

ঐনা আয়নজীবু থাগৎচরি মদুদি অদোম্না ‘মন কী বাত’কী মরূপ খুদিংমকপু হিরম অসিদা পুক্নীং চিংশিনবীরি। গুরুদেব তোগোরদি লৌশিংতনা থল্লবা মীওই অমনি, মহাক্কী খুৎইনা মীওই খুদিংমক্কী পুক্নীংদা কাউঙমদ্রবা মমি অমা তাহল্লি। মহাক্তি গুন্তনা থল্লবা মাইথোং য়াম্বা মীশক অমনি। মহাক্না গীতাঞ্জলিদা অসুম্না ইবীরম্মি – ‘হি, হু হেজ দ নোলেজ হেস দ রেস্পোন্সিবিলিতী তু ইম্পাত ইৎ তু দ স্তুদেন্তস।’ হায়বদি লৌশিং লৈবা মীওইশিংগী থৌদাংদি মদুবু খঙনীংবা মীওই খুদিংমক্তা য়েন্থোক্কদবনি।
ঐ বাঙ্গলা লোন্দি খঙদে, অদুবু অঙাং ওইরিঙৈদগী হৌনা ঐহাক ঙন্না হৌগৎপগী হৈনবী লৈরকই – নোংপোক ভারতকী রেদিও অসি নোংচুপলোমদগী খরা ঙন্না হৌই। ঐনা অসুম নীংশিংবদা অয়ুক পুং ৫.৩০দা রেদিওদা রবীন্দ্র সঙ্গিৎ হৌই। লোন্দি খঙদে অদুবু অয়ুক ঙন্না হৌগৎলগা মদু তাবগী হৈনবী লৈখি। লোইননা আনন্দলোকে অমসুং আগুনের, পোরোশমোনী – শৈরেংশিং অসি তাবগী খুদোং চাবা ফংবদা পুক্নীংদা নুংঙাইবা ফাওখি। রবীন্দ্র সঙ্গিৎ অমসুং মহাক্কী শৈরেংশিং অসিনা অদোমসু শোইদনা শুমহৎলমগনি। ঐহাক্না রবীন্দ্রনাথ থাকুরবু নোল্লুক্না খুরুমজরি।

নুংশিরবা ইরৈবাকচাশিং! নুমিৎ খরনিগী মনুংদা রমজানগী শেংলবা থা হৌরগনি। মালেম পুম্নমক্তা রমজানগী থা অসি নোল্লুকপা অমসুং ইকাই খুম্নবগা লোইননা পাংথোক্নৈ। রোজাগী অপুনবা ৱাখল্লোন্দি মীওই অমনা চারা হেল্লবদি অতোপ্পা অমগী চাদবগী অৱাবা অদু খঙগনি হায়বনি। অমসুং মশানা খৌরাংলবদি অতোপ্পগী খৌরাংবা অদু খঙবা ঙমগনি। পৈগম্বর মোহম্মদ সাহবকী পাউদম অমসুং পাউজেলশিং অদু নীংশিংবগী তাঞ্জা অদু লাক্লে। মহাক্কী পুন্সিদগী মান্নবা খুন্নাই অমসুং ইচিল-ইনাও ওইবগী ৱাখল্লোন অদু লৌরগা মাগী খুদুং ইনবনা ঐখোয়গী ইথৌনি। মীওই অমনা পৈগম্বর সাহবতা হংখি “ইস্লামদা খ্বাইদগী অথোইবা থবক অসি করিনো?” পৈগম্বর সাহবনা হায়খি –“কনাগুম্বা লাইরবা অমসুং মথৌ তাবা মীওইবু পীজবা অমসুং মীপুম খুদিংমক্না নুংশিননা লৈমিন্নবনি।” পৈগম্বর মোহম্মদ সাহবনা লৌশিং অমসুং মীনুংশিবু চেৎনা থাজরম্মি। মহাক্কী মশাদা চাউথোকপা অমসুং অচাউরম কাবগী ৱাফম লৈতে। মহাক্না হায়রম্মি অচাউরম কাবনা লৌশিং মাংহল্লি। পৈগম্বর মোহম্মদ সাহবনা করিগুম্বা নঙোন্দা নহাক্না মথৌ তাবদগী অহেনবা পোৎ লৈরবদি মদু মথৌ তাবা মীওই অদুদা পীথোকখো। মরম অসিনা রমজানগী মনুংদা দান তৌবগী থোইদোক্না চৎনবী লৈ। মীয়াম্না শেংলবা থা অসিদা মথৌ তাবা মীওইশিংদা দান তৌই। পৈগম্বর মোহম্মদ সাহবকী থাজবদি মীওইবা অসি মাগী লন-থুম্না ইনাক খুনগদবা নত্তে, মহাক্কী শেংলবা আত্মা অদুনা খুনগদবনি। ঐহাক্না ইরৈবাকচা পুম্নমক্তা শেংলবা রমজান থাগী যাইফ-পাউজেল পীজরি অমসুং ঐহাক্না থাজজবদি ঐখোয় খুদিংমক্না মহাক্কী পাউজেল অইংবা, অতপ্পা অমসুং মীনুংশিগী লম্বেল অসিদা চৎপগী থৌনা অদু লৈগনি।

ঐগী নুংশিরবা ইরৈবাকচাশিং! বুদ্ধ পুর্ণিমা অসি ভারত মচা খুদিংমক্কী মরু ওইবা নুমিৎ অমনি। ভারত অসি মীনুংশি, সেবা অমসুং কৎথোকপগী থৌনা উৎলিবা অথোইবা ভগবান বুদ্ধগী লমদমনি হায়না ঐখোয়না চাউথোকফম থোকই। মহাক্না মালেম পুম্নমক্কী মীওই লাখ কয়াগী লম্বেল তাকপীরম্মি। বুদ্ধ পুর্ণিমাদা ভগবান বুদ্ধবু নীংশিংবগা লোইননা মহাক্না তাকপীরম্বা লম্বেলদা চৎনবা হোৎনবা অমসুং মদু ঙমজগে হায়না ৱাশকপগী থৌদাং অদু নৌহৌননা নীংশিংহল্লি। ভগবান বুদ্ধ অসি মান্নবা, ইংতপ্পা ৱাখল্লোন পীরিবা শক্তি অমনি। তশেংনমকসু মসি মীওইবা খুন্নাইগী মরু ওইবা শরুক অমনি। মসি মালেম অসিদা য়াম্নমক মথৌ তাই। বাবা সাহেব দা. অম্বেদকরনা হায়বীরম্মি মদুদি মহাক্কী সোসিয়েল ফিলোসোফীদা ভগবান বুদ্ধগী ৱাখল্লোন য়াম্না য়াওই। মহাক্না হায়বীরম্মি – “মাই সোসিয়েল ফিলোসোফী মে বি সেদ তু বি এনশ্রাইন্দ ইন দ থ্রি ৱদস; লিবর্তী, ইক্বেলিতী এন্দ ফ্রেতর্নিতী। মাই ফিলোসোফী হেজ রুৎস ইন রেলিজন এন্দ নোৎ ইন পোলিতিকেল সাইন্স। আই হেব দিরাইব দেম ফ্রোম দ তীচিং ওফ মাই মাস্তর, দ বুদ্ধ।”

বাবা সাহেবনা সংবিধানগী খুৎথাংদা তোল্লবা, লৈত-লাইরা কোতি কয়াবু মপাঙ্গল কলহনবীখি মসি মীনুংশিগী অচৌবা খুদম অমনি। অৱাবা তারবা শোৎথরবা মীওইশিংবু নুংশিবীবা অসি ভগবান বুদ্ধগী অথোইবা মগুনশিংগী মনুংদা অমনি। হায়নৈ বুদ্ধিস্ত লম্বোইবশিংনা কোইনা চৎতুনা ভগবান বুদ্ধগী ৱাখল্লোনশিং শন্দোকই। এশিয়া পুম্বসিদা ভগবান বুদ্ধগী পাউতাকশিং অসি ঐখোয়না ঐখোয়গী লন ওইনা ফংজবনি। মসিনা এশিয়াগী অতোপ্পা লৈবাকশিং চীনা, জাপান, কোরিয়া, থাইলেন্দ, কম্বোদিয়া, ম্যানমারনচিংবা লৈবাকশিংগা নকশিন্নহল্লি। মরম অসিনা ঐখোয়না বুদ্ধিস্ত তুরিজমগী ইনফ্রাস্ত্রকচর শেমগৎহল্লি। মসিনা খা-নোংপোক এশিয়াগী মরু ওইবা মফমশিংদা ভারতকী মরু ওইবা বৌদ্ধগী মফমশিংগা শম্নহল্লিবনি। ঐহাক্না হেন্না নুংঙাইজরিবদি বৌদ্ধগী লাইশঙশিং নৌহৌননা শেমগৎপদা ভারত সরকারসু শরুক য়ারি। মসিগী মনুংদা ম্যানমারগী বাগান্দা চহি লিরবা আনন্দ মন্দিরসু য়াওরি। ঙসি মালেম পুম্নমক্তা য়েংথিনবা অমসুং মীওইবগী চৈনা উবা ফংলি। ভগবান বুদ্ধগী পাউতাকশিং অসিনা য়েংথিনবশিং অসিবু মীনুংশিনা মুথৎনবা লম্বী পীরি। মালেম পুম্বদা লৈরিবা ভগবান বুদ্ধগী লাইনীং চৎলিবা মীওই খুদিংমক্তা বুদ্ধ পুর্ণিমাগী য়াইফ-পাউজেল পীজরি। মহাক্কী পাউতাকশিংদা য়ুম্ফম ওইবা ইং-তপ্পা অমসুং মীনুংশিতনা থনবা মালেম অমা শেম্বা ঙমহনবীয়ু হায়না মফমদা নীজসি। ময়াম লফিং বুদ্ধগী শক্তমশিংগী মরমদা তাবীরম্লগনি। হায়নৈ লফিং বুদ্ধনা গুদ লক ওইহল্লি অদুবু স্মাইলিং বুদ্ধগা ভারতকী ঙাক-শেলগী পুৱারীগী মরু ওইবা থৌদোক্কা শম্নৈ হায়বসিদি মী অয়াম্বনা খঙনদে। স্মাইলিং বুদ্ধগা ভারতকী ঙাক-শেল লান্মীগী পাঙ্গলগা করি মরি লৈনবগে হায়না ময়াম্না খনবীরমগনি। ময়াম নীংশিংবীরমগনি, ঙসিদগী চহি ২০গী মমাংদা মে ১১, ১৯৯৮গী নুমিদাংৱাইরমদা মতম অদুগী প্রধান মন্ত্রী শ্রী অতল বিহারী বাজপেয়ীজীনা জাতিদা পীখিবা ৱারোলনা লৈবাক্কী মীপুম খুদিংমক্তা চাউথোকচবা অমসুং নুংঙাইবা পোকহনখি। মালেম পুম্বদা লৈরিবা ভারত মচাশিংদা অনৌবা আশা অমা পীখি। মে ১১, ১৯৯৮ অদু বুদ্ধ পুর্ণিমা নুমিৎ ওইখি। নুমিৎ অদুদা ভারতকী নোংচুপ চিদাইদা রাজস্থানগী পোখরন্দা ন্যুক্লিয়র চাংয়েং পাংথোকখি। চহি ২০গী মমাংদা চাংয়েং অদু বুদ্ধ পুর্ণিমা নুমিত্তা বুদ্ধগী থৌজালগা লোইননা পাংথোকখি। ভারতকী চাংয়েং অদু মাই পাকখি। অমরোমদা হায়রবদা সাইন্স অমসুং তেক্নোলোজীগী লমদা ভারতনা মহাক্কী মপাঙ্গল উৎপা ঙমলে। ভারতকী পুৱারীদা নুমিৎ অদু ঙাক-শেল লান্মীগী পাঙ্গল উৎপা নুমিৎ ওইনা লৈরি। ভগবান বুদ্ধনা নুংগী পাঙ্গল, ইন্নর স্ত্রেংথ অসি শান্তিগীদমক মরু ওই হায়না উৎপীরম্মি। মতৌ অসুম তৌনা ঐখোয়না লৈবাক অমা ওইনা পাঙ্গল কল্লবদি ময়াম মরক্তা ইং-তপ্না লৈমিন্নবা ঙমগনি। মে ১৯৯৮গী থা অসি ন্যুক্লিয়র চাংয়েং তৌখিবগীদমক মরু ওইখিবা নত্তে, মরু ওইরিবদি মতৌ করম্না তৌখিবগে হায়বদুনি। মসিনা মালেম পুম্বদা ভারত অসি অথোইবা সাইন্তিস্তশিংগী লমদমনি হায়না উৎপা ঙম্বগা লোইননা অকনবা লিচিং অমগা লোইননা ভারতনা মতম লৈবা খিবিক্তা অনৌবা মাই পাকপা কয়া অমা ফংলকখিগনি। অতল বিহারী বাজপেয়ীজীগী মন্ত্র ‘জয় জৱান, জয় কিসান, জয় বিজ্ঞান’ অদু পীখিবা মে ১১, ১৯৯৮ নুমিৎ অদুগী চহি ২০ শুরকপা নুমিৎ অসিদা ‘জয় বিজ্ঞান’গী মন্ত্র অদুগী খুদুং ইন্দুনা অনৌবা মপাঙ্গল কনবা ভারত অমা শেম্ননবা ঐখোয়গী নহাশিংনা ৱাশক লৌরসি। ইশাগী তৌবা ঙম্বা অদু ভারতকী তৌবা ঙম্বগী শরুক ওইহল্লসি। উনা উনা অতলজীনা হৌদোকপীরম্বা খোংচৎ অসি মাংলোমদা চখৎনবগী নুংঙাইবা অদু ঐখোয়না ফংবা ঙমগনি।
ঐগী নুংশিরবা ইরৈবাকচাশিং, অমুক হন্না “মন কী বাত”তা উনবদা হেন্না ৱারী তৌরসি।

হন্না হন্না থাগৎচরি।