ভারতকী প্রধানমন্ত্রী

ঙসি ন্যু দিল্লিগী লোক কালয়ান মার্গতা পাংথোকপা থৌরম অমদা প্রধান মন্ত্রী নরেন্দ্র মোদীনা ইজ ওফ দুইং ব্যুজিনেস গ্রান্দ চেলেঞ্জ হৌদোকখ্রে।

চেলেঞ্জ অসিগী পান্দমদি আর্তিফিসিয়েল ইন্তিলিজেন্স, ইন্তরনেত ওফ থিংস, বিগ দেতা এনালাইতিক্স, ব্লোকচেন অমসুং সরকারগী থবকশিং শেমদোক্নবা অনৌবা তেক্নোলোজীশিংদা য়ুমফম ওইবা অনৌবা ৱাখল্লোনশিং শীজিন্নবা হৌদোকপনি। গ্রান্দ চেলেঞ্জ অসিগী প্লেতফোর্মদি স্তার্তঅপ ইন্দিয়া পোর্তেলনি।

থৌরম অদুদা ৱা ঙাংবদা প্রধান মন্ত্রীনা উদ্যোক্কী মীওইশিং থাগৎখি অমসুং মখোয়না ভারতকী ইজ ওফ দুইং ব্যুজিনেস (ই ও দি বি) রেঙ্কিং ফগৎহনবগীদমক থাগৎখি।

লাক্কদৌরিবা চহিশিংদা ই ও দি বি রেঙ্কিং ৫০গী মনুংদা ভারত য়াওহন্নবা মহাক্না পান্দম থমখিবদা মদু নোক্নখিবা অদু মহাক্না নিংশিংখি। মহাক্না হায়খি, চহি মরি অসিদা হৌজিক হেন্না ফগৎলকপা উরে। হায়রিবা মতম অসিদা ই ও দি বিগী রেঙ্ক অসি মফম ৬৫ হাইগৎলে। হৌজিক ভারত অসি খা-নোংপোক এসিয়াদা অহানবা ওইরে অমসুং মকোক ৫০গী মনুং চনগদবা খর খক ঙাইরে। কোওপরেতিপ অমসুং কম্পিতিতিব ফেদেরেলিজমগী ৱাখল্লোনদা ই ও দি বি ফগৎহন্নবা কেন্দ্র অমসুং রাজ্য সরকারশিংনা পুন্না থবক তৌমিন্নরি।

প্রধান মন্ত্রীনা হায়খি, থৌশিলগী লমজিংগী লৈঙাক অমসুং মাংজৌননা খঙবা ঙম্বা অরোনবা লৈতবা থৌশিলশিংগী মখাদা কেন্দ্র সরকারনা থবক তৌরি। কেন্দ্র সরকারনা পায়খৎলিবা অওনবশিং অসিগী পান্দমদি মীচম মীয়াম হিংবদা লাইহনবনি। ঙসিদি অপীকপা ইন্ত্রপ্রিনরশিপ য়াম্না লাইনা ললোন-ইতিক তৌরে অমসুং অচম্বা থবক হায়বদি মৈ শম্বা ফাওবা লাইনা পাংথোক্লে। হৌখিবা চহি মরি অসিদা অরিবা কান্নদ্রবা আইন ১৪০০ লৌথোক্লে। মসিনা ললোন-ইতিক্কী থবকশিংদা য়েৎনবা লাকপদা ৱায়েনবদা অমসুং মপানগী পোৎ পুশিল্লকপদা অয়াবা পীবদা মতম য়াম্না চংবা অদু হন্থহল্লে। এম এস এম ই সেক্তরগী থবক কয়া পায়খৎলে অমসুং মিনিত ৫৯গী মনুংদা লুপা ক্রোর ১ ফাওবগী লোন পীবগী অয়াবা পীরে।

প্রধান মন্ত্রীনা হায়খি, আই এম এফ অমসুং মুদিসনা ঙসিদি ভারতকী তুংগী ফিবমদা থাজবা থম্লে। ঐখোয়গী পান্দমদি অতেনবা মতমগী মনুংদা ভারত অসি ত্রিলিয়ন দোল্লর ৫গী ইকনোমিদা য়াওহনবনি। মসিগীদমক ইকনোমিগী সেক্তর খুদিংমক ফগৎহনবা মথৌ তাই। অনৌবা ভারত অসিগী ওন্ত্রেপ্রেন্যুয়রশিংগী অনৌবা মঙলানগা হৌজিক ওইরিবা ফিবম অসিগা চুনবা ঙম্নবা উদ্যোক্কী থৌশিল অমা শেম্নবা কেন্দ্র সরকারনা থবক পায়খৎলি। ই ও দি বি রেঙ্কিংগী মকোক ৫০গী মনুং চান্নবা পুন্না থবক পায়খৎলি।

প্রধান মন্ত্রীনা হায়খি, থবকশিং পাংথোকপদা মীওইবগী খুৎ চংবা হন্থহনবা অমসুং অনৌবা অমসুং দিজিতেল তেক্নোলোজীশিং শীজিন্নবা হেনগৎহনবা অসি য়াম্না দরকার ওই। মসিদা য়ুমফম ওইবা থবক তৌবগী চৎনবী অসিনা মখা তানা থৌশিলদা য়ুমফম ওইবা লৈঙাক লৈহনবা ঙমগনি।