ভারতকী প্রধানমন্ত্রী

ঙসি প্রধান মন্ত্রী শ্রী নরেন্দ্র মোদীনা অদিস অবাবাদা নেসনেল পেলেস্তা ইথোপীয়াগী প্রধান মন্ত্রী দোক্তর অবিয় অহমদকা উনখ্রে। কোনুংদা থুংলবগা, প্রধান মন্ত্রী দোক্তর অবিয় অহমদনা প্রধান মন্ত্রী মোদী তরাম্না ওকখি অমসুং চৎনবগী মতুংইন্না তরাম্না ওকপগী থৌরম অমা পাংথোকখি।

লুচিংবা অনি অকক্নবা ওইনা অমসুং মীহুৎ কাংবুগী থাকশিংদা উনখি। চহি চা কয়াগী সভেত্যগী মরীশিং অমসুং মপাঙ্গল কনবা মীগা মীগা লৈনবা মরীশিংদা য়ুম্ফম ওইবা লৈবাক অনিগী মরীগী হিরম কয়া মখোয়না খন্নখি। ভারত-ইথোপীয়াগী মরীশিং ষ্ট্রাতেজিক পার্তনরশিপকী থাক্ত পুখৎপা লুচিংবশিংনা য়ানরে। গ্লোবেল সাউথকী মরুপশিং ওইনা, লৈবাক খুদিংমক কোনশিনবা মালেম অমা শেমগৎনবা লৈবাক অনি মখা তানা থবক তৌমিন্নবা হায়না মখোয়না য়ানরে। প্রধান মন্ত্রী মোদীনা হায়খি মদুদি ২০২৩ দা লৈবাক অসিনা জি-২০ গী প্রসিদেন্ত ওইরিঙৈদা অফ্রিকান য়ুনিয়ন জি-২০ গী মেম্বর অমা ওইহনখিবা অসি ভারতকীদমক ইকায়খুম্নবা অমনি। পহালগাম তেরর এক্তেক্ত লৈবাক অসিনা অমতা ওইনা লেপ্পগীদমক অমসুং তেরোরিজমগী মায়োক্ত মালেম্না লান্থেংনরিবা অসিদা শৌগৎপগীদমক প্রধান মন্ত্রীনা ইথোপীয়া থাগৎপা ফোঙদোকখি।

ললোন-ইতিক অমসুং শেন থাদবা, ইন্নোবেসন অমসুং তেক্নোলোজি, ইজুকেসন আমসুং কেপাসিতি বিল্দিং অমসুং দিফেন্স কোওপরেসন য়াওনা হিরম কয়াদা ভারত অমসুং ইথোপীয়াগী মরীশিংগী ফিবম ফগৎলকপা লুচিংবা অনিমক্না য়েংশিনখ্রে। হেল্থ সেকুরিতি, দিজিতেল হেল্থ, মহৌশাগী লায়য়েং, জন ঔসাধি কেন্দ্র, চীঞ্জাক ফংহনবা, লৌউ-শিংউ, মহৌশাগী লৌউ পথাপ অমসুং এগ্রি-তেক্কী হিরমশিংদা ইথোপীয়াগা লোয়ননা পুন্না থবক তৌমিন্ননিংবগী ভারতকী অপাম্বা প্রধান মন্ত্রী মোদীনা ফোঙদোকখ্রে।

লুচিংবা অনিনা লৈবাক অনিগী শেন-থুমগী মরীশিংগী ফিবম হন্না য়েংশিনখি। দিজিতেল পব্লিক ইনফ্রাষ্ট্রকচর, মাইনিং, ক্রিতিকেল মিনরেলশিং অমসুং ক্লিন ইনর্জিগী হিরমশিংদা মতেং পাংন্নবা মখোয়না খন্নখি। প্রধান মন্ত্রী মোদীনা হায়খি মদুদি থাজনবা মরুপশিং ওইনা মেনুফেকচরিং অমসুং ফার্মস্যুতিকেলশিং য়াওনা মরুওইবা সেক্তরশিংদা ইথোপীয়াগী ইকোনোমিদা ভারতকী কম্পেনিশিংনা দোল্লর বিল্লিয়ন ৫ হেন্না থাদখ্রে অমসুং থবক ৭৫,০০০ হেন্না ফংহল্লে।

গ্লোবেল সাউথকী ৱাফমশিং পুখৎনবা পুন্না থবক তৌমিন্ননবা প্রধান মন্ত্রী অনিনা অমুক হন্না থাজবা পীনখি। য়ুনাইতেদ নেসন্স য়াওনা মালেমগী লুপশিংদা মতেং পাংন্নবা মখোয়না খন্নখি। অইং-অশাগী খল হোংলকপা, রিন্যুএবল ইনর্জি অমসুং অমাং-অতা থোকপা হন্থহনবগী য়াওনা হিরম কয়াদা হেন্না মতেং পাংন্নবা মখোয়না খন্নখি অমসুং হিরম অসিদা ইন্তরনেসনেল বিগ কেত এল্লাইন্স (আই বি সি এ), কোলিএসন ফোর দিজাষ্টর রিসিলিয়েন্ত ইনফ্রাষ্ট্রকচর (সি দি আর আই), গ্লোবেল বাইওফ্যুল এল্লাইন্স (জি বি এ) অমসুং ইন্তরনেসনেল সোলার এল্লাইন্স (আই এস এ) গুম্বা মালেমগী লুপশিংনা লৌরিবা থৌদাং মখোয়না তরাম্না ওকখি। প্রধান মন্ত্রী মোদীনা হায়খি মদুদি ভারতনা ব্রিক্সগী প্রসিদেন্ত ওইবগী মখাদা ইথোপীয়াগা লোয়ননা থবক তৌমিন্ননবা ভারতনা থাজবা থম্লি অমসুং ইন্দিয়া-অফ্রিকা ফোরম সম্মিৎ পাংথোক্নবা ৱাফম হৌদোকখি।

ৱারি শান্নরবা মতুংদা, লুচিংবা অনিনা হিরম অহুমদা এম.ও.য়ু অহুম খুৎশীন্নবা শরুক য়াখি। হিরমশিং অদুদি: য়ুনাইতেদ নেসন্স পীছকিপ্পিং ওপরেসন ত্রেনিং; কষ্টমসগী থবকশিংদা অমনা অমদা মতেং পাংনবা অমসুং ইথোপীয়াগী ফোরেন এফেয়ার্স মিনিষ্ট্রিদা দেতা সেন্তর অমা লিংখৎপনি।

প্রধান মন্ত্রী নরেন্দ্র মোদী ইকায়খুম্নবা উৎতুনা প্রধান মন্ত্রী দোক্তর অবিয়না চাক্লেন অমা লাংখি। ভারত্ত লাক্নবা প্রধান মন্ত্রী দোক্তর অবিয়দা প্রধান মন্ত্রী মোদীনা চেপাউ পীখি অমসুং মদু প্রধান মন্ত্রী অবিয়না য়াখ্রে।

***