ভারতকী প্রধানমন্ত্রী

অদোমগী এক্সলেন্সী, প্রধান মন্ত্রী কৃস্তর্সন,

অদোমগী এক্সলেন্সী, উর্সুলা,

লৈবাক অনিমক্কী দেলিগেতশিং,

মীদিয়াগী মরুপশিং,

খুরুমজরি,

ঐহাক্না প্রধান মন্ত্রী কৃস্তর্সনবু ঐহাকপু তরাম্না ওকপীবগীদমক্তা থাগৎচরি।

ঐহাক্কী মফমদা পুংফম খরগী মমাংদা স্বিদেনগী খ্বাইদগী থাক ৱাংবা ইকায়খুম্নবা, দি রোয়ল ওর্দর ওফ দি পোলর স্তার পীবিখি। মসিগী ইকায় খুম্নরিবা অসি ঐহাক্কী ইফমদখক্তা নত্তে, মসিদি ভারত মচা বিলিয়ন ১.৪গী মফমদা ইকায় খুম্নবনি। মসিদি ভারত-স্বিদেনগী মরী ফগৎহল্লিবা অমসুং মসিগী ফম্বাক্কী মপাঙ্গল হাপ্লিবা ঐখোয়গী মরুপ খুদিংগী মফমদা ইকায় খুম্নবা উৎপনি।

স্বিদেন অমসুং য়ুরোপকী ইন্দস্ত্রীগী ময়োল ওইরিবা গোথনবর্গতা ঐহাক্না লাক্লিবা অসিবু হেন্না মরু ওইবা ওইহল্লিবা ঙসিগী থৌরম অসিদা লাকপীবগীদমক্তা ঐহাক্না উর্সুলাজীবু অখন্ননা ইকায় খুম্নজরি।

মরুপশিং,

ভারত অমসুং স্বিদেনগী মরী অসি গনতন্ত্রগী ভেল্যু, আইনগী কাঙলোন অমসুং মীওবদা মিৎয়েং চঙলগা চাউখৎপা পুরকপগী থৌওংনা ফম্বাক ওইদুনা শেম্বনি। ঐখোয়গী লৈবাক অনিমক্না ইনোভেসনবু শাহৌ লৌবগী শাফু, সস্তেনেবিলিতী অসিনা পুন্না লৌমিন্নবা থৌদাং অমসুং গনতন্ত্রবু ঐখোয়গী পাঙ্গলনি হায়না লৌই।

ঙসিগী মীফম অসিদা ঐখোয়না তেংবাংমিন্নরিবা অসিবু হায়রিবা অপুনবা ভেল্যু অমসুং অপাম্বশিং অসিদা য়ুম্ফম ওইরগা ঐখোয়না তুংলমচত্তা পুদুনা চৎলি। ঐখোয়গী পার্ত্নরশিপ অসিনা সেক্তর খুদিংদা খুমাং চাউশিল্লকপগা লোয়ননা, ঐখোয়না মরী অসিবু স্ত্রেতজিক পার্ত্নরশিপকী থাক্তা পুখৎনবা ৱারেপ লৌরে। ঐখোয়না পার্ত্নরশিপ অসিগী মখাদা গ্রীন ত্রাঞ্জিসন, ইমর্জিং তেক্নোলোজী অমসুং পীপল-তু-পীপল কনেক্সনগুম্বা মরু ওইবা হীরমশিংদা চঙশিনগনি।

মরুপশিং,

এ.আই., হেল্থ-তেক অমসুং গ্রীন মোবিলিতীগুম্বা হাই-তেক সেক্তরশিংদা ঐখোয়গী মরক্তা তেংবাংমিন্নবা য়াবগী ওইথোকপা য়াম্না চাউনা লৈ। হন্দক্কী চহিসিদা ভারত্তা পাংথোকখিবা এ.আই. ইম্পেক্ত সমিত্তা স্বিদেনগী কারবারগী চাউরবা দেলিগেতশিংনা শরুক য়াখি। ঐখোয়না “স্বিদেন-ভারত তেক্নোলোজী অমসুং এ.আই. কোরিদোরগী” মপাঙ্গল হেনগৎহন্নবা ঐখোয়না মশক থোকপা থবক খরা পাংথোকমিন্নগনি।

লৈবাক অনিমক্কী স্তার্তঅপ অমসুং রিসর্চ ইকোসীস্তেমগী মরক্তা মরী হেনগৎহন্নবা ঐখোয়না ভারত-স্বিদেন সাইন্স অমসুং তেক্নোলোজী সেন্তর লিংখৎলগনি।

ক্লাইমেত চেঞ্জ অমসুং সস্তেনেবিলিতীগী মতাংদা লৈবা ভারত অমসুং স্বিদেনগী ৱাখল্লোন্দা মান্নবা য়াম্না থোক্লক্লি। লীদর্শিপ গ্রুপ ফোর ইন্দস্ত্রী ত্রাঞ্জিসন নত্ত্রগা লীদ আই.তি. অসিই ঐখোয়না পায়খৎপা মালেমগী খোঙথাং অমনি অমসুং ঐখোয়না মসিগী মখাদা লো-কার্বন ইন্দস্ত্রীএল ত্রান্সফোর্মেসন্দা মিৎয়েং চঙলি। ঐখোয়না ঙসিদি মসিগী অহুমশুবা ফেজতা থবক তৌনবা ৱারেপ লৌরে।

ভারতনা গ্রীন হাইদ্রোজেন, সর্ক্যুলর ইকোনোমী অমসুং সস্তেনেবল ইনফ্রাস্ত্রকচরগুম্বা ম্রু ওইবা হীরমশিংদা অচৌবা থবক কয়া পায়খৎলি। ঐখোয়না স্বিদেনগী তেক্নোলোজী অমসুং ভারতকী স্কেলবু পুনশিন্নদুনা মালেমদা কান্নবা পীবা ক্লাইমেত সোল্যুসন অমা ঐখোয়না শেম্বা ঙমগনি। ভারত অমসুং স্বিদেন্না আর্ক্তিক্কী মফমশিংদা তেংবাংনরিবা অসিনা মালেম্না ক্লাইমেত চেঞ্জ নীংথিনা খঙহন্নবা মরু ওইবা থৌদাং অমা লৌরি।

মরুপশিং,

ঐখোয়না দিফেন্সকী লমদা তেংবাংনবগী চাংশু লেপ্তনা হেনগৎলক্লি। স্বিদেনগী কম্পেনীশিংনা ভারত্তা মেন্যুফেকচরিং ফেসিলিতী কয়া শারিবা অসিনা ঐখোয়গী পার্ত্নরশিপ অসিনা লৈবা-য়োনবগী মরীদগী হেন্দোক্লি অমসুং ইন্দস্ত্রীগী মতম শাংবা মরী অমা ওইরক্লি।

মরুপশিং,

ঙসিগী থৌরম অসিদা উর্সুলাজীনা শরুক য়াবসিনা হেন্না অখন্নবা থৌরম অমা ওইহল্লে। হন্দক্কী জনুৱারীদা মহাক্না ভারত্তা লাকপা মতমদা ঐখোয়না ভারত-ই.য়ু.গী মরী হেন্না ফগৎহন্নবা পুৱারী ওইরবা ৱারেপ কয়া লৌখি। হীরম অসিদা খুমাং য়াম্না চাউশিনবা ফল উবসিদা ঐহাক্না নুংঙাইবা ফাওই।

ভারত-ই.য়ু. এফ.তি.এ.না ইন্দস্ত্রী, ইনভেস্তর অমসুং ইনোভেতরশিংগী অনৌবা খুদোংচাবা কয়া শেমগনি। উর্সুলাজীনা হায়বগুম্না মসিদি “য়ান ৱারোল খুদিংগী মমানি”।

সেক্যুরিতী অমসুং দিফেন্স পার্ত্নরশিপ অমদি মোবিলিতী এগ্রীমেন্তনা ঐখোয়গী স্ত্রেতজিক অমসুং পীপল-সেন্ত্রিক পার্ত্নরশিপ্তা অনৌবা পাঙ্গল হাপ্লে। ভারত-ই.য়ু. ত্রেদ অমসুং তেক্নোলোজী কাউন্সিলনা ঐখোয়গী তেংবাংনবা অসিবু হেন্না চেৎশিনহল্লে। ঐখোয়না দিজিতেল তেক্নোলোজী, ক্লীন ইনর্জী, সেমিকন্দক্তর, রেজিলিএন্ত সপ্লাই চেন অমসুং ইনোভেসনগুম্বা মরু ওইবা হীরমশিংদা থবক তৌমিন্নরি।

ভারত অমসুং য়ুরোপকী মরক্তা লৈরিবা রাজনিতী, শেন্মিৎলোন অমসুং স্ত্রেতজিক কনভর্জেন্স অসিনা মালেম পুম্বদা শান্তি পুরকপগী মরু ওইবা থৌওং অমা ওইরি।

মরুপশিং,

ঙসিগী মালেমগী লুরবা তাঞ্জাসিদা ভারত অমসুং স্বিদেনগুম্বা গনতন্ত্র চৎপা লৈবাক্কী মরক্তা তেংবাংনবনা অখন্নবা মরু ওইবা অমা পীরি। ঐখোয়না ৱারী শানবা অমসুং দিপ্লোমেসীদা মতম পুম্বদা মিৎয়েং চঙদুনা লাক্লি অমসুং মসিনা চয়েৎনবা খুদিংগী ৱারোইশিন পুরকপগী পাম্বৈ অমা ওইরি।

তেরোরিজম্না মীওইবা খুন্নাইদা অচৌবা অকায়বা অমা পী হায়বসি ভারত অমসুং স্বিদেন্না য়ানা চৎলি। মমাংগী চহিদা পহলগামদা তেরোরিস্ত লান্দা অমা চত্থখ্রবা মতুংদা স্বিদেন্না পাংখিবা মতেংগীদমক্তা ঐহাক্না প্রধান মন্ত্রী কৃস্তর্সনবু থাগৎচরি। ঐখোয়না তেরোরিজম অমসুং মসিবু শৌগৎপা মীওইশিংদা মাইয়োক্তা মখা তানা লান্থেংনখিগনি।

এক্সলেন্সীশিং,

ঙসিগী কান্নরবা ৱারী ৱাতাইশিং অসিগীদমক্তা ঐহাক্না অদোম্বু অমুক হন্না থাগৎচরি। ঐখোয়না হোৎনমিন্নরিবা অসিনা মরম ওইরগা ভারত-স্বিদেন অমসুং ভারত-য়ুরোপকী মরী অসি তুংলমচত্তা লেপ্তনা চঙশিনগনি অমসুং ঐখোয়না পুন্না হোৎনমিন্নদুনা মালেমদা শান্তি অমসুং তংদু লৈতাবা পুরকপা ঙমগনি হায়না মপুং ফানা থাজবা থম্লি।

অদোম্বু অমুক্কা হন্না থাগৎচরি।

***