ভারতকী প্রধানমন্ত্রী

কির্গিজ রিপব্লিক্কী বিস্কেক্তা ওগস্ত ৩১দগী সেপ্তেম্বর ০১, ২০২৬ ফাওবা পাংথোকখিবা শংঘাই কোওপরেসন ওর্গনাইজেসন (এস.সি.ও.)গী লৈবাকশিংগী মকোক থোংবশিংগী কাউন্সিলগী ২৬শুবা মীফমদা প্রধান মন্ত্রী শ্রী নরেন্দ্র মোদীনা ঙসি শরুক য়াখ্রে।

চহি অসিদা এস.সি.ও.গী ২৫শুবা কুমওন পাংথোক্লি। থৌরম অসিদা লুচিংবশিংনা মাংলোমদা চংশিল্লিবা থবকশিং য়েংশিনখি অমসুং লমদম অসিদা শান্তি, সেক্যুরিতী, স্তেবিলিতী অমসুং চাউখৎপা পুরকপদা এস.সি.ও.গী থৌদাং মখা তানা হেনগৎহন্নবগী মতাংদা ৱাখল্লোনশিং ফোংদোক্নখি।

প্রধান মন্ত্রীনা কির্গিজ রিপব্লিক্কী রাস্ত্রপতি, ঐচ.ই. শ্রী সাদির জাপারোবপু মহাক্কী মীয়োক-মীচান ফবা মতৌগীদমক থাগৎপা ফোংদোকখি। মহাক্না হায়খি মদুদি মীফম অসিগী ২৫শুবা কুমওন অসি এস.সি.ও.না শেমগৎলকপা দাইলোগ অমসুং মতেং পীনবগী মপাঙ্গল কনবা চৎনবীদা য়ুম্ফম ওইদুনা লাক্কদৌরিবা চহি ২৫গী রোদমেপ অমা শেমগৎনবা মতম ওইরি। মহাক্না হায়খি মদুদি হৌখিবা সম্মিৎতা, ভারতনা সেক্যুরিতী, কনেক্তিবিতী অমসুং ওপুর্চুনিতিগী ভিজন শেয়র তৌখি অমসুং হৌজিক অপুনবা থবক অসিগী য়ুম্বী অহুম অসিদা কংক্রিৎ ওইবা মহৈশিং ফংহন্নবা গ্রুপ অসিনা থবক তৌগদবনি। মহাক্না ভারতকী ফিরেপ অমুক হন্না ফোংদোকখি মদুদি লমফমদা লান লোইশিনবা ঙম্লোই অমসুং দাইলোগ অমসুং দিপ্লোমেসী খক্তনা মাংলোমদা চংশিনবগী অমত্তা ঙাইরবা পাম্বৈনি। তেরোরিজম অসি মীওইবা খুন্নাইগীদমক অচৌবা খুদোংথীবনি হায়না পল্লদুনা, মহাক্না তেরোরিজমগী ইকোসিস্তেম অসি মুত্থৎনবা অচেৎপা থবক লৌখৎনবা হায়খি। তেরোরিজমগা লান্থেংনবদা দবল স্তেন্দর্দ অমত্তা লৈরোই হায়না মহাক্না অখন্ননা ফোংদোকখি। য়ুরেশিয়াগী লমদমদা সেক্যুরিতী অসি অফগানিস্তান্দা শান্তি অমসুং তংদু লৈতাবাগা নক্না মরী লৈনৈ হায়না পল্লদুনা মহাক্না লৈবাক অসিদা ভারতকী চাউখৎ-থৌরাং অমসুং হ্যুমেনিতরিয়নগী ওইবা তেংবাং পীনবগী মতাংদা পনখি।

প্রধান মন্ত্রীনা মখা তানা হায়খি মদুদি মপাঙ্গল কনবা অমসুং থাজবা থম্বা কনেক্তিবিতীগী থৌরাংশিং অসি গ্রুপ অসিগী অপুনবা চাউখৎপা অমসুং খুমাং চাউশিনবা অসিগীদমক মরু ওই। ভারতনা কৈথেলশিং শম্নহল্লিবা, ললোন-ইতিক হেনগৎহল্লিবা অমসুং চাউখৎপগী অনৌবা খুদোংচাবশিং ফংহল্লিবা কনেক্তিবিতীগী থবকশিংদা মতেং পাংলি হায়না পল্লদুনা মহাক্না হায়খি মদুদি অসিগুম্বা থবকশিং অসিনা লৈবাকশিংগী লৈঙাক অমসুং লমগী অপুনবগী ইকাই খুম্নবা উৎগদবনি। তেক্নোলোজী, ওন্ত্রপ্রিন্যুওরশিপ, ইন্নোবেসন, স্তার্ত-অপ অমসুং পিপল-তু-পিপল ইনিসিয়েতিবশিংনা এস.সি.ও.গী লৈবাকশিংদা লৈরিবা মীয়ামগীদমক অচৌবা খুদোংচাবা কয়া অমা হাংলি হায়না মহাক্না মখা তাখি। মতাং অসিদা, মহাক্না কির্গিজস্তানগী প্রসিদেন্সীগী মখাদা নহাশিংগী থৌদাংদা মীৎয়েং থম্লিবা অসিদা থাগৎপা ফোংদোকখি। প্রধান মন্ত্রীনা হায়খি মদুদি ভারতনা চহি অসিগী অরোইবা শরুক্তা এস.সি.ও. সিভিলাইজেসন দাইলোগ ফোরমগী অহানবা এদিসন পাংথোকপদা নুংঙাইবা ফাওগনি। মসি মেম্বর স্তেতশিংগী মরক্তা সিভিলাইজেস্নেল একচেঞ্জ শেমগৎনবা হোৎনরিবা ভারতকী মরুওইবা খোংথাং অমনি।

বিস্কেক দিক্লারেসনগী মথক্তা, এম ও য়ু মরি অমসুং ক্লাইমেৎ, ন্যুক্লিয়র সেফতী, ইনর্জী কঞ্জার্বেসন অমসুং দ্রগ এদিক্সনগা লান্থেংনবা য়াওবা হীরমশিংদা ৱারেপ অমসুং স্তেতমেন্ত ২০ হেন্না সম্মিৎ অসিদা এদোপ্ত তৌখি।

ভারতনা বিস্কেক দিক্লারেসনদা য়াওরিবা থবক থৌরম কয়া, হায়বদি এস.সি.ও. চার্তরদা ওফিসিএল লেংগ্বেজ ওইনা ইংলিশ; সিভিলাইজেসন দাইলোগ ফোরম; য়ং সাইন্তিস্ত ফোরম; অমসুং য়ং ওথর্স কনক্লেব অসিনচিংবদা লমজিংখি অমসুং মতেং পাংখি।

প্রধান মন্ত্রীনা রাস্ত্রপতি ঐচ.ই. সাদির জাপারোবপু মীফম অসি মাই পাক্না পাংথোকখিবগীদমক থাগৎপা ফোংদোকখি। ভারতনা এস.সি.ও.গী ইমুং মনুংগা লোয়ননা পুন্না চাউখৎপা অমসুং নুংঙাই য়াইফবা পুরক্নবা থবক তৌমিন্ননবা ফিরেপ মহাক্না ফোংদোকখি।

***********