ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদীনা ঙসি বিদিও কনফরেন্সকী খুত্থাংদা আই.আই.এম. কোঝিকোদেদা স্বামী বিবেকানন্দগী লাইফ সাইজ মীতম অমা মাখুম হাংদোকখি।

মহাক্না আই.আই.এম. কোঝিকোদেনা শিনবা “গ্লোবেল ইন্দিয়ন থোত”কী মতাংদা পাংথোকপা ইন্তরনেস্নেল কোনক্লেবতা শরুক য়াখি।

মীয়াম তিনখিবা অদুদা ৱা ঙাংলদুনা প্রধান মন্ত্রীনা হায়খি, “ইন্দিয়ন থোত অসি থক থক নিকপা অমসুং তোঙানবা ওই। মসি হোংবা নাইদে অমসুং হেঙ্গৎতে। মসিগী পাক চাউবা অসি অদুক্কী মতিক য়াম্বা মরম্না লেকচর অমদা নত্রগা সেমিনার অমদা নত্রগা লাইরিক অমদা ফোংবা ঙম্লোই। অদুবু পাক চাউনা, ফিদম্নফম কয়া অমা লৈরি মদুনা ভারতকী ভেল্যুদা লেংদনা লৈরি। মখোইশিং অদুদি – ৱামিন্নবা, মত তিন্নবা, জস্তিস, সর্বিস অমসুং ৱাখল চাউথোকপা অসিনি।”

শান্তি, মত তিন্নবা অমসুং মচিন-মনাও ওইনা লৈবা

ভারত্তা মালেম অসিনা মীৎয়েং চংলিবা অসি পল্লদুনা প্রধান মন্ত্রীনা হায়খি, “অহানবা ওইনা ৱাখলদা লাকপা অসি শান্তি, অপুনবগী শক্তম অমসুং মচিন-মনাও ওইবগী মতিক মগুন অদুনি।”

মহাক্না হায়খি, মত তিন্নবা অমসুং শান্তিনা মরম ওইরগা ঐখোয়গী সিভিলাইজেসন অসি য়াইফরি অমসুং হিংদুনা লৈরি অদুবু কয়া অমদি মায়থিরি।

“রাজ্য কয়া। লোল কয়া। দাইলেক্ত কয়া। থাজবা কয়া। কস্তম অমসুং ত্রেদিসন কয়া। চাবা-থকপগী মওং কয়া। লাইফ স্তাইল কয়া। ফিজেৎকী মওং কয়া। তৌবতবু চহী চা কয়াদগী শান্তি ওইনা লৈদুনা লাক্লি। চহী চা কয়াদগী মালেম্বু ঐখোইগী লমদম অসিদা তরাম্না ওক্তুনা লাক্লি। কয়া অমনা ঙমদ্রবসু ঐখোয়গী সিভিলাইজেসন অসি য়াইফরি। মরম করিগিনো? মরমদি মীওই অমা হেক্তনা মফম অসিদা শান্তি অমসুং মত তিন্নবা ফংবা ঙমই।” 

হায়রিবা চৎনবী অসি য়াম্না অহকপা অমসুং মাইকৈ অমত্তদা চৎপা ওইদে। মসিগী ফজবা অসি তোঙানবা মওংদা শিজিন্নবা য়াবা অদুনি হায়না মহাক্না হায়খী।

মহাক্না হায়খি মদুদি ভারত অসি হিন্দুজম, বুধিজম, জৈনিজম অমসুং শিখিজমগুম্বদা হকনা থাজবা থম্বা লৈবাক্নি।

“লমদম অসিদা সুফিজম চাউখৎখি” মহাক্না হায়খি।

পুম্নমক অসিগী মপুং ওইবদি অহিংশানি অমসুং মহাত্মা গান্ধীনা ৱাখল্লোন অসিবু মায় পাক্না শিজিন্নদুনা ভারতপু নিং তম্বা ফংহনখিবনি হায়না মহাক্না হায়খি।

“য়েৎলকপা থৈদোক্নবা ভারতকী লম্বী অসি অঙম-শাসন নত্তে ৱারী শানবগী শক্তিনা পাংথোকই”, মহাক্না হায়খী।

অকোইবগী ফিভমগীদমক নুংশিবাঃ

“ভারতনা শান্তি অমসুং মত তিন্নবদা থজৈ হায়না ঐহাক্না হায়বা মতমদা, মসিদা মহৌশা লাইরেম্বী অমসুং ঐখোয়গী অকোয়বগী ফিভমগা লোয়ননা মত তিন্নবা য়াওরি”, মহাক্না হায়খি।

প্রধান মন্ত্রীনা ৱাখল্লোন অসিগী মমি অসি চৎথরক্লিবা খোংকাপ কয়াদা উবা ফংই হায়না হায়খী।

অফবা হয়েং অমা ওইনবা হায়দুনা নুমিৎকী কান্নবা লৌবগী ইন্তরনেস্নেল সোলর এলাইন্স শেম্বদশু ভারতনা মকোক থোংখি হায়না মহাক্না হায়খি।

হৌখিবা চহী ৫দা এল.ই.দি. বল্ব কোতি ৩৬ য়েন্থোকখ্রে অমসুং লম্বীদা থান্নবা মৈ কোতি ১বু এল.ই.দি.না মহুৎ শিন্দুনা লুপা কোতি ২৫০০০ কনবা ঙমখ্রে অমসুং সি.ও.2. শন্দোকপা অসি কোতি তন ২গী চাংদা হন্থবা ঙমখ্রে।

কৈ অমসুং নোংশাবু ঙাক শেনবা

ভারতকী কৈগী মশীং অসি ২০০৬তগী শরুক অনী হেনগৎলে হায়না মহাক্না হায়খি। “ঙসিদি ভারত অসি কৈ ২৯৭০গী ময়ুম ওইরে। পৃথীবিগী কৈগী মশিংগী শরুক অহুম থোকপগী অমদি ইন্দিয়াদা লৈরী। ঐখোইগী লম অসি কৈনা লৈবদা খ্বাইদগী খুদোং থিনিঙাই ওইদবা লম অমনি। ২০১০দা মালেম্না কৈগী মশিং অসি ২০২২ ফাওবদা শরুক অনী ওইহন্নবা য়ানখিবা অদু ঐখোইনা হান্ননা ফংবা ঙম্লে।“ হায়না মহাক্না হায়খি।

উমং হেনগৎহনবা

প্রধান মন্ত্রীনা লৈবাক অসিগী উমংগী চাংশু হেনগৎলে হায়না হায়খি।

“২০১৪দা ঙাক শেন্দুনা থম্বা মফম অসি ৬৯২নী। মসি ২০১৯দা ৮৬০দা হেঙ্গৎলে। ২০১৪দা কম্যুনিতী রিজার্ব ৪৩ লৈরম্মী। হৌজিক্তি ১০০দগী হেন্না লৈরে। মসিনা মরম ওইদুনা অকোইবা অমসুং লম্লক্কী শা-ঙাবু নুংশিবা কয়া অমা ইন্দিয়াদা লাক্লি।“

নুপীশিংগী য়াইফ থৌরাং

প্রধান মন্ত্রীনা হায়খি,” লমদম অসিগী খ্বাইদগী মপুং ওইবা মশক অসি নুপীশিংদা ইকাই খুম্নবা, মখোইদা শন-মান পীবগী মরু ওইবনি। নুপী অসি লাই ওইবা ফিভমগী মশক অমনি।“

মহাক্না ভক্তি শাধুশিং, রাজা রাম মোহন রোই, ইশ্বর চন্দ্র বিদ্যাসাগর, মহাত্মা ফুলে অমসুং সাবিত্রি বাই ফুলেবু হিরম অসিগী মতাংদা পল্লদুনা থাগৎপা ফোংদোকখি।

নোংচুপ থংবা লৈবাকশিংদা চহী চা কয়া চংখিবদা ভারতকী সংবিধান্নদি নুপীশিংদা ভোত থাদবা অসি অহানবা নুমিত্তা য়াহনখি হায়না প্রধান মন্ত্রীনা হায়খি।

ঙসিদি মুদ্রা লোন বেনেফিসরীগী চাদা ৭০দগী হেনবদি নুপীশিংনি হায়না মহাক্না হায়খি।

“ঐখোইগী আর্ম ফোর্সতসু নুপীশিংনা থৱাই য়াওনা শরুক য়ারি। নুপীগী নেভী ওফিসার কাংলুপ অমনা সমুদ্রদা মালেম শীনবা থুংনা চৎপা অসি পুৱারী ওইবনী। ঙসিদি ভারতনা নুপী এম.পি.শিংগী মশিং খ্বাইদগী ৱাংই। ২০১৯গী লোক শভা মীখলদা নুপীনা থোক্লকপসি খ্বাইদগী ৱাংবনি।“

ৱাখল চাউথোকপগী নুংঙাইবা ফোংদোকপা

ইন্দিয়ানা ৱাখল চাউথোকপগী নুংঙাইবা ফোংদোক্লি হায়না প্রধান মন্ত্রীনা হায়খি। ৱাখল চাউথোকপা মফমদা তোঙানবা অপাম্বগী ইকাই খুম্নবা লৈগনি অমসুং অনৌবা থবক পাংথোকপা অসি মশানা তাবনি। ভারতকী মীওইশিংগী অনৌবা থবক পাংথোক্নিংবগী নিংহন্নবা লৈতবা অসিনা মালেম্না মায় ওন্সিল্লক্লি। মহাক্না হায়খি মদুদি ভারতকী ৱাখল্লোন অসিনা মালেমদা কান্নবা কয়া অমা পীখ্রে অমসুং হেন্না পীবগী মতিক লৈ। মসিনা ঐখোইগী গ্রহ অসিগী খ্বাইদগী মমাং থাবা খুদোংচাদবা কয়া মায় পাক্না লোইশিনবদশু মতেং পাংবা ঙমগনি হায়না হাইরদুনা মহাক্না লোইশিনখি।